TULUN-AN NGA ARTIKULO 26
“Magbalik Kamo sa Akon”
“Magbalik kamo sa akon kag magabalik ako sa inyo.”—MAL. 3:7.
AMBAHANON 102 “Buligan ang mga Maluya”
ANG BINAGBINAGON SA SINI NGA ARTIKULO *
1. Ano ang ginabatyag ni Jehova kon mag-alagad liwat sa iya ang isa nga nangin indi aktibo?
GINBINAGBINAG naton sa nagligad nga artikulo nga ginpaanggid ni Jehova ang iya kaugalingon sa isa ka maayo nga manugbantay nga nagaatipan gid sa iya mga karnero. Kag ginapangita gid niya kon may madula nga karnero. Ginsilingan ni Jehova ang mga Israelinhon nga nagpalayo sa iya: “Magbalik kamo sa akon kag magabalik ako sa inyo.” Kabalo kita nga amo ini gihapon ang gusto ni Jehova asta subong, bangod nagsiling sia: “Wala ako nagabag-o.” (Mal. 3:6, 7) Nagsiling si Jesus nga nalipay gid si Jehova kag ang mga anghel kon ang Iya mga alagad nga nangin indi aktibo magbalik sa Iya.—Luc. 15:10, 32.
2. Ano ang binagbinagon naton sa sini nga artikulo?
2 Binagbinagon naton ang tatlo ka ilustrasyon ni Jesus nga makatudlo sa aton kon paano buligan ang mga nag-untat sa pag-alagad kay Jehova. Tun-an naton ang pila ka kinaiya nga dapat naton ipakita para mabuligan naton nga magbalik kay Jehova ang mga indi aktibo. Kag matun-an naton nga malipay gid kita kon panikasugan naton nga buligan sila.
GINPANGITA ANG NADULA NGA SENSILYO
3-4. Ngaa ginpangita gid sang babayi nga ginsambit sa Lucas 15:8-10 ang iya drakma nga nadula?
3 Dapat gid kita magpanikasog para makita naton ang mga gusto magbalik kay Jehova. Sa ilustrasyon ni Jesus nga mabasa sa Ebanghelyo ni Lucas, gin-istorya niya ang parte sa isa ka babayi nga nadulaan sang isa ka sensilyo nga drakma nga importante gid sa iya. Ang talalupangdon sa sini nga ilustrasyon amo ang pagpanikasog gid sang babayi para makita niya ang sensilyo.—Basaha ang Lucas 15:8-10.
4 Ginlaragway ni Jesus kon ano ang ginbatyag sang babayi sang nakita niya ang isa ka sensilyo nga drakma nga nadula. Sang panahon ni Jesus, may mga tion nga kon magpakasal ang isa ka Israelinhon nga babayi, ginahatagan sia sang iya iloy sang napulo ka sensilyo nga drakma. Posible nga isa sa napulo ka drakma ang nadula nga sensilyo, gani importante gid ini sa babayi. Naghunahuna ang babayi nga basi nahulog sa salog ang sensilyo. Gani nagsindi sia sang suga kag ginpangita niya ini. Pero wala niya ini nakita. Mahimo nga indi masyado masanag ang iya suga, gani indi niya makita ang gamay nga sensilyo nga pilak. Sang ulihi, ginsilhigan niya ang bilog nga balay. Dayon may nakita sia nga nagainggat, kag amo na ini ang ginapakabahandi niya nga drakma. Grabe gid ang iya kalipay! Gani gintawag niya ang iya mga abyan kag mga kaingod para updan sia sa iya kalipay.
5. Ngaa kinahanglan ang pagpanikasog para makita naton ang mga indi aktibo?
5 Matun-an naton sa ilustrasyon ni Jesus nga kinahanglan ang panikasog para makita ang isa ka butang nga nadula. Dapat man kita magpanikasog para makita ang mga nagpalayo sa kongregasyon. Mahimo nga tinuig na sila nga nag-untat sa pagpakig-upod sa kongregasyon. Basi nagsaylo na gani sila sa iban nga lugar kag indi sila kilala sang mga kauturan didto. Pero sigurado kita nga ang pila ka indi aktibo gusto na gid magbalik kay Jehova. Gusto gid nila mag-alagad liwat kay Jehova upod ang ila mga kauturan, pero kinahanglan nila ang aton bulig.
6. Paano makabulig ang tanan sa kongregasyon sa pagpangita sa mga indi aktibo?
6 Sin-o ang makabulig sa pagpangita sa mga indi aktibo? Ang mga gulang, mga payunir, mga pamilya sang mga indi aktibo, kag mga manugbantala sang kongregasyon. Buot silingon, tanan kita makabulig. May abyan ka bala ukon paryente nga nangin indi aktibo? May naistorya ka bala nga indi aktibo sang nagpamalaybalay ka ukon sang nagbantala ka sa publiko nga mga lugar? Ipaathag sa iya nga kon gusto niya nga bisitahan sia, puede niya ihatag sa imo ang iya address ukon contact number kag ihatag mo ini sa mga gulang sa inyo kongregasyon.
7. Ano ang natun-an mo sa ginsiling sang isa ka gulang nga si Thomas?
7 Ang mga gulang amo ang may panguna nga responsibilidad sa pagpangita sa mga indi aktibo nga gusto magbalik kay Jehova. Paano nila ini mahimo? Talupangda ang ginsiling sang isa ka gulang nga si Thomas * nga taga-Spain. Sobra na 40 ka Saksi ang nabuligan niya nga magbalik sa kongregasyon. Si Thomas nagsiling: “Una, ginapamangkot ko ang mga kauturan kon kabalo sila kon diin na nagaistar ang mga indi aktibo. Ginapamangkot ko man sila kon may madumduman sila nga madugay na nga wala nagatambong sa mga miting. Ang kalabanan sa kongregasyon nalipay gid sa pagbulig nga makita ang mga indi aktibo. Kon nagaduaw ako sa mga indi aktibo, ginapamangkot ko sila kon kamusta na ang ila mga kabataan kag iban pa nga mga paryente. Sang una, ginadala nila ang ila mga kabataan sa mga miting kag mahimo nangin manugbantala ang pila sa sini nga kabataan. Dapat man sila buligan nga makabalik kay Jehova.”
BULIGI NGA MAKABALIK KAY JEHOVA ANG IYA NAGPALAYO NGA MGA ANAK
8. Sa ilustrasyon parte sa anak nga naghalin sa ila balay nga mabasa sa Lucas 15:17-24, ano ang ginhimo sang amay sang naghinulsol ang iya anak?
8 Ano nga mga kinaiya ang dapat naton ipakita para mabuligan naton ang mga gusto magbalik kay Jehova? Binagbinagon naton ang aton matun-an sa ilustrasyon ni Jesus parte sa isa ka anak nga naghalin sa ila balay. (Basaha ang Lucas 15:17-24.) Ginpaathag ni Jesus nga sang ulihi nakamarasmas ini nga anak kag nagbalik sia sa ila balay. Nagdalagan ang iya amay para sugataon sia. Ginhakos sia sang iya amay sing hugot para ipabatyag sa iya nga palangga niya sia. Ginkonsiensia gid sia sa iya ginhimo kag para sa iya indi na sia bagay nga tawgon nga anak. Ginsugid sang anak sa iya amay ang iya ginabatyag kag naluoy gid sa iya ang iya amay. Dayon may mga ginhimo ang amay para ipabatyag sa iya anak nga nalipay sia nga nagbalik ang iya anak. Indi sia pagkabigon bilang ginasuhulan nga alagad kundi bilang pinalangga nga anak. Para ipakita sang amay nga nalipay sia nga naghinulsol ang iya anak nga nagbalik sa iya, nagpahanda sia sing sinalusalo kag ginpasuksukan sang manami gid nga bayo ang iya anak.
9. Ano nga mga kinaiya ang dapat naton ipakita para mabuligan naton ang mga indi aktibo nga makabalik kay Jehova? (Tan-awa ang kahon nga “ Kon Paano Buligan ang mga Indi Aktibo nga Gusto Magbalik kay Jehova.”)
9 Si Jehova pareho sa amay sa sina nga ilustrasyon. Palangga niya ang aton mga kauturan nga indi aktibo kag gusto niya nga magbalik sila sa iya. Kon ilugon naton si Jehova, mabuligan naton sila nga makabalik. Para mahimo ini, kinahanglan naton ipakita ang pasensia, empatiya, kag gugma. Ngaa dapat naton ipakita ini nga mga kinaiya, kag paano naton ini mapakita?
10. Ngaa dapat kita mangin mapinasensiahon para mabuligan naton ang mga indi aktibo nga makabalik kay Jehova?
10 Dapat kita mangin mapinasensiahon bangod kinahanglan sang indi aktibo sang tion para makabalik kay Jehova. Madamo nga indi aktibo sang una ang nagsiling nga kapila sila balikbalikan sang mga gulang kag iban pa nga kauturan sa kongregasyon antes sila nagdesisyon nga magbalik kay Jehova. Ang isa ka sister sa Southeast Asia nga si Nancy nagsulat: “Daku gid ang nabulig sa akon sang isa ka sister nga suod ko nga abyan. Daw magulang ang pagkabig niya sa akon. Ginpahanumdom niya sa akon ang amon masadya nga mga eksperiensia. Mapinasensiahon gid sia kay ginapamatian niya ang akon mga ginabatyag kag ginalaygayan gid niya ako. Matuod gid sia nga abyan nga handa magbulig sa tanan nga tion.”
11. Ngaa kinahanglan naton ang empatiya para maghaganhagan ang ginabatyag sang isa nga naglain ang buot?
11 Ang empatiya daw pareho sa isa ka epektibo nga bulong. Makabulig ini para maghaganhagan ang ginabatyag sang isa nga naglain ang buot. Tinuig na nga nangin indi aktibo ang iban bangod nagalain gihapon ang ila buot sa ginhimo sang isa ka utod. Amo ini ang nagapugong sa ila nga magbalik kay Jehova. Ang iban nga indi aktibo mahimo nagahunahuna nga indi husto ang ginhimo sa ila. Mahimo nga kinahanglan nila nga may magpamati sa ila kag mag-intiende sang ila nabatyagan. (Sant. 1:19) Si María nga indi aktibo sadto nagsiling, “Gusto ko lang kuntani nga may mamati sa akon, magpaumpaw, kag maglaygay.”
12. Ngaa mapaanggid naton sa lubid ang gugma ni Jehova?
12 Suno sa Biblia, ang gugma ni Jehova sa iya katawhan daw pareho sa pisi ukon lubid. Ngaa mapaanggid naton sa lubid ang gugma sang Dios? Binagbinaga ini nga ilustrasyon: Imadyina nga ara kamo sa barko. Nahulog ka sa mabalod nga dagat kag daw malumos ka. Dayon may isa ka tawo sa barko nga naghaboy sa imo sang salbabida. Sigurado gid nga magapasalamat ka kay nakabulig ini sa imo nga indi malumos. Pero bangod matugnaw ang tubig, indi lang salbabida ang kinahanglan mo para maluwas. Kinahanglan mo nga makahalin sa tubig. Gani kinahanglan nga may maghaboy sa imo sang lubid para butungon ka pabalik sa barko. Amo ini ang ginsiling ni Jehova parte sa mga Israelinhon nga nagpalayo sa iya: “Gin-ubayan ko sila . . . paagi sa pisi sang gugma.” (Os. 11:4) Amo ini gihapon ang gusto himuon sang Dios para sa mga nag-untat sa pag-alagad sa iya kag daw malumos na sa ila mga problema kag mga kabalaka. Gusto niya nga mabal-an nila nga palangga niya sila, kag gusto niya nga magbalik sila sa iya. Kag mahimo ka gamiton ni Jehova para buligan sila nga mabatyagan ang gugma niya para sa ila.
13. Isaysay ang isa ka eksperiensia nga nagapakita nga ang aton gugma makabulig sa iban nga magbalik kay Jehova.
13 Dapat pirme naton isiling sa mga indi aktibo nga palangga sila ni Jehova kag palangga man naton sila. Si Pablo nga ginsambit sa nagligad nga artikulo nangin indi aktibo sing sobra 30 ka tuig. Nagsiling sia: “Isa ka aga sang manughalin na ako sa balay, gin-istorya ako sang isa ka mabuot nga tigulang nga sister. Nabatyagan ko gid ang iya pagpalangga. Naghibi ako nga daw isa ka bata. Ginsilingan ko sia nga ginpadala gid sia ni Jehova para palig-unon ako. Sadto mismo, nagdesisyon ako nga magbalik kay Jehova.”
PALANGGAA KAG BULIGI ANG MGA MALUYA
14. Suno sa ilustrasyon sa Lucas 15:4, 5, ano ang ginhimo sang manugbantay sang nakita niya ang nadula nga karnero?
14 Dapat padayon naton nga buligan kag palig-unon ang mga indi aktibo. Mahimo nga nakonsiensia man sila gihapon pareho sa anak sa ilustrasyon ni Jesus. Kag mahimo nga nagluya gid sila sa espirituwal sa kalibutan ni Satanas. Dapat naton sila buligan nga magbakod liwat ang ila pagtuo kay Jehova. Sa ilustrasyon ni Jesus parte sa nadula nga karnero, nagsiling sia nga ginpas-an sang manugbantay ang karnero kag gindala ini pabalik sa panong. Gingamit sang manugbantay ang iya tion kag nagpanikasog gid sia para makita ang nadula nga karnero. Pero kabalo sia nga dapat niya pas-anon ang karnero bangod indi pa sini masarangan maglakat pabalik sa panong.—Basaha ang Lucas 15:4, 5.
15. Paano naton mabuligan ang mga indi aktibo nga gusto magbalik kay Jehova? (Tan-awa ang kahon nga “ Isa ka Brosyur nga Makabulig Gid.”)
15 Mahimo nga kinahanglan naton maggamit sang daku nga tion kag magpanikasog para buligan ang mga indi aktibo nga masarangan ang mga problema nga nagapabudlay sa ila nga magbalik kay Jehova. Pero paagi sa espiritu ni Jehova, sa iya Pulong, kag sa mga publikasyon nga ginaaman sang iya organisasyon, mabuligan naton sila nga magbakod liwat sa espirituwal. (Roma 15:1) Paano naton ini mahimo? Ang isa ka madugay na nga gulang nagsiling, “Dapat tudluan liwat sa Biblia ang kalabanan nga indi aktibo nga gusto na magbalik kay Jehova.” * Gani kon ginpangabay ka sang gulang nga tudluan liwat sa Biblia ang indi aktibo, dapat mo ini batunon sing kinabubut-on kon masarangan mo man lang ini himuon. Ang gulang nagsiling man: “Ang manugbantala nga nagatudlo sing Biblia sa indi aktibo dapat mangin maayo nga abyan kag masaligan. Dapat nga komportable ang indi aktibo nga sugiran sia sang tanan.”
MAY KALIPAY SA LANGIT KAG SA DUTA
16. Ngaa masiling naton nga ginabuligan kita sang mga anghel?
16 Ginapakita sang madamo nga eksperiensia nga ginabuligan kita sang mga anghel nga makita ang mga indi aktibo nga gusto na magbalik kay Jehova. (Bug. 14:6) Halimbawa, si Silvio nga taga-Ecuador hanuot nga nangamuyo nga buligan sia nga makabalik sa kongregasyon. Samtang nagapangamuyo pa sia, nagtunog ang iya doorbell. Duha ka gulang ang nag-abot sa iya balay. Sa tion sang pagbisita sang mga gulang, nalipay gid sila nga umpisahan ang pagbulig sa iya.
17. Ano ang mabatyagan naton kon mabuligan naton ang indi aktibo?
17 Malipay gid kita kon mabuligan naton ang indi aktibo nga makabalik kay Jehova. Talupangda ang ginsiling ni Salvador nga isa ka payunir nga nagapanikasog gid para buligan ang mga indi aktibo. Nagsiling sia: “May mga tion nga nagahibi ako bangod sa kalipay. Nalipay gid ako kay ginluwas ni Jehova ang iya pinalangga nga alagad sa kalibutan ni Satanas, kag may pribilehiyo ako nga makabulig sa sini.”—Binu. 20:35.
18. Kon isa ikaw sa mga indi aktibo, ano ang masaligan mo?
18 Kon nag-untat ka sa pag-alagad kay Jehova, makasalig ka nga palangga ka niya gihapon. Gusto niya nga magbalik ka sa iya. May mga dapat ka himuon para makabalik ka sa iya. Pero pareho sa amay sa ilustrasyon ni Jesus, ginahulat ni Jehova ang imo pagbalik, kag nalipay sia nga batunon ka liwat sa iya pamilya.
AMBAHANON 103 Mga Manugbantay—Dulot nga mga Lalaki
^ par. 5 Gusto ni Jehova nga magbalik sa iya ang mga indi aktibo. Ginsilingan sila ni Jehova: “Magbalik kamo sa akon.” May mahimo gid kita para mapalig-on ang mga gusto magbalik kay Jehova. Binagbinagon naton sa sini nga artikulo kon paano naton sila mabuligan.
^ par. 7 Gin-islan ang pila ka ngalan.
^ par. 15 Ang pila ka indi aktibo mahimo mabuligan paagi sa pagtuon sa ila sang pila ka kapitulo sang libro nga Kon Paano Magpabilin sa Gugma sang Dios. Ang iban naman nabuligan paagi sa pagbinagbinag sa ila sang pila ka kapitulo sang libro nga Mangin Suod kay Jehova. Ang Komite sang Pag-alagad sang Kongregasyon amo ang magapili kon sin-o ang magatudlo liwat sa indi aktibo.
^ par. 68 MGA PIKTYUR: Ginabuligan sang tatlo ka utod ang isa ka brother nga gusto magbalik kay Jehova. Pirme sila nagakomunikar sa iya, ginapasalig sia nga palangga sia, kag ginapamatian sia sing maayo.
