TANAN kita nagapati nga ginatuytuyan ni Jehova ang iya katawhan kag ginahatagan niya sila sang ila kinahanglanon para mangin suod sila sa iya sa sining “katapusan nga mga adlaw.” (2 Tim. 3:1) Pero nagadepende sa kada isa sa aton kon tumanon naton si Jehova. Daw pareho kita sa mga Israelinhon sang ara sila sa kamingawan. May dapat sila himuon kon magtunog ang mga trumpeta.

Ginsugo ni Jehova si Moises nga maghimo sing duha ka trumpeta nga sinalsal nga pilak para gamiton “sa pagtipon sa katilingban kag sa pagpahibalo nga magasaylo ang mga kampo.” (Num. 10:2) Patunugon ini sang mga saserdote sa lainlain nga paagi para ipahibalo sa katawhan kon ano ang dapat nila himuon. (Num. 10:3-8) Subong, nagabaton ang katawhan sang Dios sang panuytoy sa lainlain nga paagi. Binagbinagon naton ang tatlo sa sini nga mga paagi kag ipaanggid naton ini sa mga tunog sang mga trumpeta sa Israel sang una. Ari ang tatlo ka paagi: kon ginaagda kita sa dalagku nga pagtilipon, kon ginahanas ang mga gulang, kag kon ginahatagan sang bag-o nga panuytoy ang mga kongregasyon.

Kon gusto ni Jehova nga magtipon “ang bug-os nga katilingban” sa atubangan sang puertahan sa sidlangan nga bahin sang tabernakulo, ginapatunog sang mga saserdote ang duha ka trumpeta. (Num. 10:3) Mabatian ini sang tanan nga tribo nga gintunga sa apat ka tropa. Nagakampo sila sa palibot sang tabernakulo. Mahimo nga pagligad lang sang pila ka minuto, magaabot dayon ang mga tribo nga nagakampo malapit sa puertahan. Pero ang mga tribo nga nagakampo sa malayo mahimo nagakinahanglan sang madamo nga tion kag dugang nga panikasog para makakadto sa tilipunan. Bisan ara man sila sa malapit ukon sa malayo, gusto ni Jehova nga magtipon ang tanan kag magpamati sa iya.

Subong, wala na kita nagatipon sa tabernakulo, pero ginaagda kita sa mga pagtilipon sang katawhan sang Dios. Nalakip sa sini ang rehiyonal nga mga kombension kag iban pa nga pinasahi nga pagtilipon. Paagi sa sini, ginatudluan kita kag ginahatagan sang mga panuytoy. Ang katawhan ni Jehova sa bilog nga kalibutan nagabenepisyo sa pareho nga programa. Nalipay gid ang mga nagakadto sa sini nga pagtilipon, bisan pa ang iban nagabiyahe sing malayo. Pero ang tanan nga nagatambong makasiling gid nga may pulos ang ila mga sakripisyo.

Kamusta naman ang mga kauturan nga malayo sa ginahiwatan sang dalagku nga pagtilipon? Bangod sang teknolohiya, madamo sa ila ang nakabenepisyo sa pareho nga programa kag nagabatyag sila nga daw ara lang sila sa dalagku nga pagtilipon. Halimbawa, sang ginbisita sang tiglawas sang ulong talatapan ang branch office sa Benin, gin-connect sa programa ang banwa sang Arlit sa Niger. Sa sini nga banwa sa Sahara Desert nga may minahan,  nagtipon ang 21 ka kauturan kag interesado. Bisan pa malayo sila, pamatyag nila daw kaupod lang nila ang 44,131 nga nagtambong sa programa. Ang isa ka brother nagsulat: “Madamo gid nga salamat kay gin-connect ninyo kami sa programa. Isa naman ini ka pamatuod nga palangga gid ninyo kami.”

Kon isa lang ka trumpeta ang patunugon sang saserdote sa Israel, “ang mga pangulo lang nga amo ang mga ulo sang mga linibo” ang magakadto sa tolda nga tilipunan. (Num. 10:4) Tudluan sila kag hanason ni Moises. Makabulig ini sa ila nga mahimo sing maayo ang ila mga responsibilidad sa ila mga tribo. Kon isa ikaw sa sini nga mga pangulo, sigurado gid nga himuon mo ang tanan para makakadto ka kag makabenepisyo sa paghanas.

Subong, ang mga gulang sa kongregasyon indi “mga pangulo,” kag wala man sila nagapakaginuo sa panong sang Dios nga ila ginaatipan. (1 Ped. 5:1-3) Pero ginahimo nila ang ila bug-os nga masarangan para bantayan ang panong. Gani nalipay gid sila kon may mga paghanas para sa ila, pareho sang Kingdom Ministry School. Sa sini nga mga paghanas, ginatudluan ang mga gulang kon paano pa gid nila maatipan sing maayo ang kongregasyon. Bangod sini, nagasuod pa gid kay Jehova ang mga gulang kag ang tanan nga kauturan sa kongregasyon. Bisan pa wala ka nakatambong sa sini nga mga paghanas, nagabenepisyo ka gihapon bangod ginaaplikar sang mga nakatambong ang ila mga natun-an.

Kon kaisa, ginabulubag-o sang mga saserdote sa Israel ang tunog sang mga trumpeta. Ginapahibalo sini nga gusto ni Jehova nga magsaylo ang bilog nga kampo. (Num. 10:5, 6) Organisado gid sila kon nagasaylo sila sang kampo. Pero mabudlay man ini himuon. Posible nga ang iban nga Israelinhon nagabatyag nga indi pa nila gusto magsaylo. Ngaa?

Mahimo ang iban nagabatyag nga masako ang ila pagsaylosaylo kag bag-o lang sila nakasaylo. “Kon kaisa ang panganod nagapabilin lang halin sa gab-i tubtob sa aga.” Kag kon kaisa, “duha ka adlaw, isa ka bulan, ukon mas malawig pa” antes sila magsaylo liwat. (Num. 9:21, 22) Pila ka beses sila nagsaylosaylo sang kampo? Suno sa Numeros kapitulo 33, mga 40 ka lugar ang ginkampuhan sang mga Israelinhon.

Kon kaisa, nagakampo ang mga Israelinhon sa lugar nga may mga kahoy. Manamian gid sila sa sini nga lugar kay ara sila sa “malapad kag makahaladlok nga kamingawan.” (Deut. 1:19) Gani, mahimo nga daw indi na sila maghalin kay basi indi maayo nga lugar ang sayluhan nila.

Kon nagaumpisa na ang pagsaylo sang kampo, mahimo nga natak-an ang iban sa paghulat sang ila turno sa paghalin. Mabatian sang tanan ang nagabulubag-o nga tunog sang mga trumpeta, pero indi sila dungan nga makalakat. Kon magpatunog ang mga saserdote sang nagabulubag-o nga tunog sang mga trumpeta, ang mga tribo ni Juda, ni Isacar, kag ni Zebulon nga nagakampo sa sidlangan amo ang una nga magahalin. (Num. 2:3-7; 10:5, 6) Kon makahalin na sila, magapatunog ang mga saserdote sa ikaduha nga tion sang nagabulubag-o nga tunog sang mga trumpeta. Dayon ang tatlo ka tribo sa bagatnan amo naman ang magahalin. Padayon ini nga himuon sang mga saserdote asta nga makahalin ang bilog nga kampo.

May mga pagbag-o bala sa organisasyon nga nabudlayan ka nga tumanon? Mahimo nagahunahuna ka nga kadamo gid nga mga pagbag-o ang ginahimo. Ukon basi naanad ka na sa mga pamaagi sang una kag indi mo gusto nga bag-uhon ini. Mahimo nagabatyag ka nga daw kadugay sa imo maka-adjust sa mga pagbag-o. Pero kon panikasugan gid naton nga tumanon ini, posible gid nga makita naton nga ginapakamaayo kita sang Dios.

Sang panahon ni Moises, gintuytuyan ni Jehova ang minilyon ka lalaki, babayi, kag kabataan sang ara sila sa kamingawan. Kon wala niya sila gin-atipan kag gintuytuyan, wala gid kuntani sila nakalampuwas. Subong, ginagiyahan kita ni Jehova sa sining makatalagam nga katapusan nga mga adlaw. Ginabuligan niya kita nga magsuod sa iya kag magbakod ang aton pagtuo. Gani, kabay pa nga himuon naton ang aton bug-os nga masarangan nga tumanon si Jehova pareho sa matutom nga mga Israelinhon nga nagtuman sa mga tunog sang mga trumpeta!