1. Ano ang ginsiling sang mga disipulo ni Jesus nga dapat himuon sang madamo nga tawo?

MADAMO nga lalaki kag babayi ang nagkadto sa Jerusalem. Halin sila sa lainlain nga mga pungsod kag lainlain man ang ila lenguahe. Makatilingala gid ang natabo sadto nga adlaw. Kay man, may pila ka Judiyo nga kabalo na dayon maghambal sang mga lenguahe sang mga tawo nga nagkadto sa Jerusalem. Nagdayaw gid ang mga tawo. Pero mas interesado sila sa ginsiling sang mga Judiyo sa ila kag sa ginsiling ni apostol Pedro sa ila tanan. Nabatian nila nga puede sila maluwas kon magtuo sila kay Jesucristo. Nalipay gid sila sa ila nabatian, gani namangkot sila: “Ano ang amon himuon?” Nagsabat si Pedro sa ila: “Magpabawtismo kamo.”—Binu. 2:37, 38.

2. Ano ang binagbinagon naton sa sini nga artikulo? (Tan-awa ang piktyur sa kober.)

² Dalayawon gid ang masunod nga natabo. Mga 3,000 ka tawo ang nagpabawtismo sadto nga adlaw kag nangin disipulo sila sang Cristo. Amo ini ang umpisa sang hilikuton nga ginsugo ni Jesus sa iya mga sumulunod nga amo ang pagtudlo sa mga tawo para mangin disipulo niya sila. Ginahimo gihapon ini sang iya mga sumulunod asta subong. Pero sa aton tion subong, indi posible nga magpabawtismo na dayon ang mga naistorya naton sing pila lang ka oras. Mahimo magligad pa ang pila ka bulan ukon tinuig pa gani nga pagtuon antes magdesisyon ang isa ka Bible study nga gusto na niya magpabawtismo. Kon may Bible study ka subong, magakomporme ka gid nga kinahanglan ang pagpanikasog para mabuligan sia nga mangin disipulo sang Cristo. Sa sini nga artikulo, binagbinagon naton kon paano naton mabuligan ang aton Bible study nga magpabawtismo.

3. Suno sa Mateo 28:19, 20, ano ang dapat himuon sang isa ka Bible study para mag-uswag sia kag magpabawtismo?

³ Antes mabawtismuhan ang isa ka Bible study, dapat nga ginaaplikar na niya ang mga ginatudlo sang Biblia. (Basaha ang Mateo  28:19, 20.) Kon ginaaplikar sang Bible study ang iya mga natun-an, daw pareho sia sang “tawo nga mainandamon” sa ilustrasyon ni Jesus nga nagkutkot sing madalom kag nagtukod sang iya balay sa igang. (Mat. 7:24, 25; Luc. 6:47, 48) Paano naton mabuligan ang Bible study para iaplikar niya ang iya mga natun-an? Binagbinagon naton ang tatlo ka panugda.

4. Paano naton mabuligan ang Bible study para padayon sia nga mag-uswag kag magpabawtismo? (Tan-awa man ang kahon nga “ Tudlui ang Imo Bible Study sang mga Puede Niya Himuon Para Mag-uswag Sia.”)

⁴ Tudlui ang imo Bible study sang mga puede niya himuon para mag-uswag sia. Ngaa dapat mo ini himuon? Binagbinaga ini nga ilustrasyon: Kon nagabiyahe ka pakadto sa malayo nga lugar, mas maayo nga maghapit ka sa matahom nga mga lugar nga imo maagyan. Kon himuon mo ini, indi ka magbatyag nga tama gid kalayo sang imo kaladtuan. Sing kaanggid, kon himuon man sang imo Bible study ang mga masarangan niya lang anay himuon, indi sia magbatyag nga tama gid kabudlay sang mga dapat niya himuon para mabawtismuhan sia. Gamita ang seksion nga “Ang Puede Mo Himuon” sa libro nga Magkabuhi sing Wala Katapusan! para buligan ang imo Bible study nga mag-uswag. Sa katapusan sang kada leksion, binagbinaga kon paano makabulig sa iya ang mga panugda sa sini nga seksion para maaplikar niya ang mga bag-o niya lang natun-an. Kon may mapensaran ka pa nga mga panugda nga gusto mo ipahimo sa iya, isulat ini sa “Iban pa.” Gamita pirme ini nga kahon para ipahanumdom sa iya ang mga puede niya himuon. Ang iban sa sini nagakinahanglan sang malip-ot lang nga tion, kag ang iban naman nagakinahanglan sang malawig nga tion.

5. Suno sa Marcos 10:17-22, ano ang ginsiling ni Jesus sa manggaranon nga tawo nga dapat niya himuon, kag ngaa?

⁵ Buligi ang imo Bible study nga maghimo sang mga pagbag-o. (Basaha ang Marcos 10:17-22.) Kabalo si Jesus nga mabudlay para sa manggaranon nga tawo nga ibaligya ang tanan niya nga  pagkabutang. (Mar. 10:23) Pero ginsilingan ni Jesus ini nga tawo nga dapat niya ini himuon. Ngaa? Bangod palangga sia ni Jesus. Kon kaisa, wala naton ginapalig-on ang aton Bible study nga iaplikar ang iya natun-an bangod pamatyag naton indi pa sia handa nga himuon ini. Indi dalidali nga mauntat sang isa ka tawo ang iya mga bisyo, kag nagakinahanglan sang tion para mapakita niya ang maayo nga mga kinaiya. (Col. 3:9, 10) Pero kon hambalan mo sia nga dapat iaplikar gid niya dayon ang iya mga natun-an, posible nga magatinguha man sia dayon nga magbag-o. Kon himuon mo ini, ginapakita mo nga nagaulikid ka sa iya.—Sal. 141:5; Hulu. 27:17.

6. Ngaa dapat naton pamangkuton ang aton Bible study parte sa iya opinyon?

⁶ Importante gid nga pamangkuton naton ang aton Bible study kon ano ang iya opinyon parte sa topiko nga inyo ginatun-an. Paagi sa sini, mabal-an mo kon nahangpan niya ang inyo ginatun-an kag kon ano ang iya ginapatihan. Kon himuon mo ini pirme, mangin mahapos na lang para sa imo nga binagbinagon sa iya ang mga topiko nga mahimo mabudlayan sia nga iaplikar. Madamo sing pamangkot sa libro nga Magkabuhi sing Wala Katapusan! nga makabulig sa imo nga mabal-an ang iya opinyon. Halimbawa, sa leksion 04, may pamangkot nga “Sa banta mo, ano ang ginabatyag ni Jehova kon tawgon mo sia sa iya ngalan?” Sa leksion 09, may pamangkot nga “Ano ang pila ka butang nga gusto mo ipangamuyo?” Sa umpisa, mahimo nga mabudlayan sia sa pagsabat sa sini nga mga pamangkot. Gani buligi sia paagi sa pagpalig-on sa iya nga binagbinagon ang mga teksto kag mga piktyur nga ara sa libro nga may labot sa inyo topiko.

7. Paano naton magamit ang mga eksperiensia sang mga kauturan para palig-unon ang aton Bible study?

⁷ Kon nahangpan na sang imo Bible study ang mga dapat niya himuon, gamita ang mga eksperiensia sang mga kauturan para mapalig-on sia nga himuon ini. Halimbawa, kon talagsa lang naga-attend ang imo Bible study sa mga miting, mahimo mo ipatan-aw sa iya ang video nga Nagaulikid si Jehova sa Akon. Makita ini sa leksion 14 sa seksion nga “Dugang nga Impormasyon.” May makita ka pa gid nga pareho sa sini nga eksperiensia sa seksion nga “Usisaa Pa Gid” ukon “Dugang nga Impormasyon” sa iban pa nga leksion sang libro nga Magkabuhi sing Wala Katapusan! * Indi pag-ikumparar ang imo Bible study sa iban, kag likawan mo ang pagsiling sing, “Kon nasarangan niya ini nga himuon, masarangan mo man ini.” Mas maayo kon sia mismo ang magsiling sini. Sa baylo, sambita kon ano gid ang nakabulig sa utod nga ara sa video nga iaplikar ang mga ginatudlo sang Biblia. Puede mo sambiton ang isa ka teksto ukon ang ginhimo sang utod nga nakabulig sa iya. Kag puede mo ipatalupangod kon paano ginbuligan ni Jehova ang utod.

8. Paano naton mabuligan ang aton Bible study nga palanggaon si Jehova?

⁸ Buligi ang imo Bible study nga palanggaon si Jehova. Paano? Mangita sing kahigayunan nga matudluan mo ang imo Bible study parte sa mga kinaiya ni Jehova. Buligi sia nga mahangpan nga si Jehova isa ka malipayon nga Dios nga nagabulig sa mga nagapalangga sa iya. (1 Tim. 1:11; Heb. 11:6) Ipakita sa iya ang mga benepisyo kon iaplikar niya ang iya mga natun-an, kag ipaathag sa iya nga pamatuod ini nga palangga sia ni Jehova. (Isa. 48:17, 18) Samtang nagabakod ang gugma sang imo Bible study kay Jehova, mas mapalig-on sia sini nga maghimo sang mga pagbag-o.—1 Juan 5:3.

9. Suno sa Marcos 10:29, 30, ano ang makabulig sa isa ka tawo nga maghimo sang mga sakripisyo para mabawtismuhan sia?

⁹ Para mag-uswag kag magpabawtismo ang isa ka Bible study, dapat gid sia magsakripisyo. Pareho  sa manggaranon nga tawo nga ginsambit kaina, posible nga kinahanglan man isakripisyo sang pila ka Bible study ang ila materyal nga pagkabutang. Halimbawa, kon ang ila obra nagalapas sa mga prinsipio sa Biblia, kinahanglan nila mangita sang lain nga obra. Madamo sa ila ang kinahanglan mag-untat sa pagpakig-upod sa ila mga abyan nga wala nagapalangga kay Jehova. Ang iban posible nga sikwayon sang ila pamilya nga akig sa mga Saksi ni Jehova. Nagsiling si Jesus nga posible mabudlay para sa iban nga himuon ini nga mga sakripisyo. Pero nagpromisa si Jesus nga pakamaayuhon gid ang mga nagasunod sa iya. Kay man, mangin pamilya nila ang mga kauturan nga magapalangga sa ila. (Basaha ang Marcos 10:29, 30.) Paano mo mabuligan ang imo Bible study para mabaton niya ining dalayawon nga pagpakamaayo?

10. Ano ang natun-an mo sa eksperiensia ni Manuel?

¹⁰ Panikasugi nga mangin abyan mo ang imo Bible study. Importante gid nga ipabatyag mo sa iya nga nagaulikid ka sa iya. Ngaa? Binagbinaga ang ginsiling ni Manuel nga taga-Mexico sang naga-Bible study pa lang sia. Nagsiling sia: “Antes kami mag-study, ginakamusta anay ako sang naga-study sa akon. Ginabuligan niya ako nga magtawhay ang akon hunahuna kag ginapabatyag niya sa akon nga puede ko iistorya sa iya ang bisan ano nga mapensaran ko. Nabatyagan ko nga nagaulikid gid sia sa akon.”

11. Ano ang benepisyo sa aton Bible study kon mag-iskedyul kita sang tion nga makaupod sila?

¹¹ Mag-iskedyul sang tion nga makaupod mo ang imo Bible study, pareho sa ginhimo ni Jesus sa iya mga sumulunod. (Juan 3:22) Kon nagahimo na sang mga pagbag-o ang imo Bible study, agdaha sia sa inyo balay para magpangape ukon magkaon ukon magtan-aw sang mga programa sa JW Broadcasting^®. Pasalamatan gid niya ini ilabi na kon nagaselebrar ang iya pamilya kag mga abyan sang mga selebrasyon nga wala nabase sa Biblia. Posible nga nasubuan sia ukon nagaisahanon sa sini nga mga tion. Si Kazibwe nga taga-Uganda nagsiling: “Madamo gid ako sing natun-an parte kay Jehova, indi lang kon naga-Bible study kami sang naga-study sa akon, kundi pati man sa iban nga tion nga updanay kami. Nakita ko nga ginaatipan gid ni Jehova ang iya katawhan kag malipayon gid sila. Amo man ini ang gusto ko nga kabuhi.”

12. Ngaa dapat kita mag-upod sang lainlain nga kauturan sa isa ka Bible study?

 ¹² Mag-upod sing lainlain nga kauturan sa imo Bible study. Kon kaisa, mahimo nagabatyag kita nga mas mahapos nga kita lang ang makadto sa aton Bible study ukon amo lang gihapon nga utod ang updon naton. Mahapos gid man ini para sa aton, pero mas makabulig sa aton Bible study kon mag-upod kita sang lainlain nga kauturan. Si Dmitrii nga taga-Moldova nagsiling: “Lainlain nga kauturan ang ginaupod sang naga-study sa akon, kag lainlain man ang ila paagi kon nagapaathag sila. Nakabulig ini sa akon nga mabal-an nga puede ko iaplikar ang akon mga natun-an sa sarisari nga sitwasyon. Kag bangod madamo na ako sang kilala nga kauturan, wala na ako gawa nahuya sa akon una nga pag-attend sa miting.”

13. Ngaa dapat naton buligan ang aton Bible study nga mag-attend sa mga miting?

¹³ Buligi ang imo Bible study nga mag-attend sa mga miting sang kongregasyon. Ngaa? Bangod ginsugo ni Jehova nga magtipon ang mga nagasimba sa iya. Bahin ini sang aton pagsimba. (Heb. 10:24, 25) Isa pa, daw pamilya na naton ang mga kauturan sa kongregasyon. Kon kaupod naton sila sa mga miting, daw pareho lang nga ara kita sa isa ka balay nga ululupod nga nagakaon sang manamit nga pagkaon. Importante gid nga mag-attend sa mga miting ang imo Bible study kay makabulig ini sa iya nga magdesisyon nga magpabawtismo. Pero mahimo nga mabudlay para sa iya nga umpisahan ang pag-attend sa mga miting, gani buligi sia. Kon indi sia maka-attend sa mga miting bangod may mga problema sia, paano makabulig sa iya ang libro nga Magkabuhi sing Wala Katapusan!?

14. Paano naton mapalig-on ang aton Bible study nga mag-attend sa mga miting?

¹⁴ Gamita ang leksion 10 sang libro nga Magkabuhi sing Wala Katapusan! para palig-unon ang imo Bible study nga mag-attend sa mga miting. Antes nahuman ini nga libro, may pila ka kauturan nga ginpangabay nga binagbinagon ini nga leksion sa ila Bible study. Nagsiling sila nga nakabulig ini sa ila Bible study nga mag-attend sa mga miting. Pero indi na kinahanglan nga hulaton mo nga makalab-ot kamo sa leksion 10 antes mo agdahon ang imo Bible study nga mag-attend. Agdaha sia dayon sa umpisa pa lang sang inyo pagtuon kag agdaha sia pirme. Lainlain ang problema sang kada Bible study. Gani hibalua kon ano ang problema sang imo Bible study kag buligi sia. Indi ka dapat maluyahan sing buot kon wala sia gihapon naga-attend bisan pa madugay mo na sia nga ginaagda. Padayon sia nga agdaha kag mangin mapinasensiahon.

15. Ano ang posible nga ginakahadlukan sang aton Bible study?

¹⁵ Sang naga-Bible study ka pa lang, nahadlok ka man bala nga mangin isa ka Saksi ni Jehova? Basi nahunahuna mo nga indi mo gid masarangan nga magbantala sa mga tawo. Ukon basi nahadlok ka nga pamatukan ka sang imo pamilya ukon mga abyan. Kon amo sini ang imo naeksperiensiahan, mahangpan mo ang ginabatyag sang imo Bible study. Nagsiling si Jesus nga posible gid ini mabatyagan sang iban. Pero ginpalig-on ni Jesus ang iya mga sumulunod nga indi sila dapat mahadlok kag padayon sila nga mag-alagad kay Jehova. (Mat. 10:16, 17, 27, 28) Paano ginbuligan ni Jesus ang iya mga sumulunod nga madula ang ila kahadlok? Kag paano mo mailog ang iya halimbawa?

16. Paano naton mahanas ang aton Bible study nga isugid sa iban ang iya mga natun-an?

¹⁶ Hanasa ang imo Bible study nga isugid sa iban ang iya mga natun-an. Sang ginsugo ni Jesus ang iya mga disipulo nga magbantala, mahimo nga ginkulbaan sila. Pero ginbuligan sila ni Jesus paagi sa pagtudlo sa ila kon diin sila mabantala kag kon ano nga mensahe ang ila ibantala. (Mat. 10:5-7) Paano mo mailog si Jesus? Buligi ang imo Bible study nga mabal-an kon sin-o ang puede niya mabantalaan. Halimbawa, pamangkuta sia kon may kilala sia nga posible mabuligan sang kamatuoran sa Biblia nga inyo ginatun-an. Dayon buligi sia nga maghanda paagi sa pagtudlo  sa iya kon paano niya ipaathag sing simple ini nga kamatuoran. Puede ninyo mapraktis kon ano ang iya ihambal. Gamita ang seksion nga “Kon Magsiling ang Iban” kag “Kon Pamangkuton Ka” sa libro nga Magkabuhi sing Wala Katapusan! Buligi sia nga magsabat sing simple kag sa maayo nga paagi nga ginagamit ang Biblia.

17. Paano naton gamiton ang Mateo 10:19, 20, 29-31 para buligan ang aton Bible study nga magsalig kay Jehova?

¹⁷ Buligi ang imo Bible study nga magsalig kay Jehova. Ginsilingan ni Jesus ang iya mga disipulo nga makasalig sila nga buligan gid sila ni Jehova bangod palangga Niya sila. (Basaha ang Mateo 10:19, 20, 29-31.) Ipahanumdom sa imo Bible study nga buligan man sia ni Jehova. Mabuligan mo sia nga magsalig kay Jehova kon sambiton mo sa imo pangamuyo ang mga ginaplano niya nga himuon para mag-uswag sia. Si Franciszek nga taga-Poland nagsiling: “Kon nagapangamuyo ang naga-study sa akon, pirme niya ginasambit ang mga ginaplano ko nga himuon para mag-uswag ako. Sang nakita ko nga ginsabat ni Jehova ang iya mga pangamuyo, napalig-on ako sini nga magpangamuyo man. Nabatyagan ko gid nga ginbuligan ako ni Jehova sang naglisensia ako sa akon boss sa bag-o ko nga obra nga mag-off para maka-attend ako sa mga miting kag sa kombension.”

18. Ano ang ginabatyag ni Jehova sa ginahimo sang iya mga alagad nga pagtudlo sa iban?

¹⁸ Palangga gid ni Jehova ang aton mga Bible study. Ginapabaloran gid niya ang mga sakripisyo sang iya mga alagad para buligan ang mga tawo nga mangin suod sa iya, gani palangga gid niya sila. (Isa. 52:7) Kon wala ka sing Bible study subong, puede mo gihapon buligan ang mga Bible study nga mag-uswag kag magpabawtismo paagi sa pag-upod sa mga kauturan nga naga-study sa ila.