1. Ano ang ginhimo ni Jehova sa kada isa sa aton?

GINBUYOK ni Jehova ang kada isa sa aton. (Juan 6:44) Hunahunaa kon ano ang buot silingon sini. Sang gin-usisa ni Jehova ang binilyon ka tawo sa bilog nga kalibutan, nakita niya nga sinsero ka kag gusto mo nga palanggaon sia. Ginapabaloran gid ni Jehova ining nakita niya. (1 Cron. 28:9) Kilala ka ni Jehova, nahangpan ka niya, kag palangga ka niya. Makapalig-on gid ini!

2. Paano kita ginbuligan ni Jesus nga mahangpan nga nagaulikid gid si Jehova sa kada isa sa aton?

² Ginaulikdan ka gid ni Jehova pareho sa pag-ulikid niya sa tanan niya nga alagad. Para buligan kita nga mahangpan ini, ginpaanggid ni Jesus si Jehova sa isa ka manugbantay. Kon ang manugbantay may 100 ka karnero kag nagtalang ang isa, ano ang himuon niya? “Bayaan niya ang 99 sa kabakuluran kag pangitaon ang isa nga nagtalang.” Kon makita niya ang nagtalang nga karnero, indi niya ini pag-akigan. Sa baylo, malipay gid sia. Ano ang matun-an naton sa sini? Importante kay Jehova ang kada isa sa aton. Nagsiling si Jesus: “Indi luyag sang akon Amay sa langit nga malaglag ang bisan isa sining mga kubos.”—Mat. 18:12-14.

3. Ano ang binagbinagon naton sa sini nga artikulo?

³ Sigurado gid nga indi naton gusto nga magluya ang buot sang isa ka utod bangod sa aton. Ano ang himuon naton para indi naton mapasandad ang iban? Kag ano ang puede naton nga himuon kon may ginhimo ukon ginsiling ang iban nga nagpalain sang aton buot? Sabton naton ini nga mga pamangkot sa sini nga artikulo. Pero, binagbinagon anay naton kon sin-o ining “mga kubos” nga ginsambit sa Mateo kapitulo 18.

4. Sin-o ang “mga kubos”?

⁴ Ang “mga kubos” amo ang mga disipulo ni Jesus. Ang ekspresyon nga “mga kubos” mahimo man i-translate nga “gagmay nga mga bata.” Ano man ang edad sang mga disipulo ni Jesus, daw pareho sila sa “mga bata” kay handa sila nga magpatudlo sa iya. (Mat. 18:3) Lainlain ang ila ginhalinan, kultura, kag personalidad, pero nagatuo sila tanan sa Cristo. Gani palangga gid niya sila.—Mat. 18:6; Juan 1:12.

5. Ano ang ginabatyag ni Jehova kon may nagsandad ukon naghimo sang malain sa isa Niya ka alagad?

⁵ Palangga gid ni Jehova ining “mga kubos.” Para mahangpan naton ang iya ginabatyag, hunahunaa kon daw ano naton ka palangga ang mga bata. Gusto naton nga proteksionan sila kay maluya pa sila kag kulang pa sila sang eksperiensia kag kaalam, indi pareho sa mga hamtong. Kon ginhimuan sang malain ang isa ka tawo, nasubuan kita. Pero kon ang ginhimuan sang malain isa ka bata, magluwas nga nasubuan kita, posible nga naakig pa gani kita. Gusto man ni Jehova nga proteksionan kita. Nasubuan sia kag posible naakig pa gani sia kon may nagsandad ukon naghimo sang malain sa isa Niya ka alagad.—Isa. 63:9; Mar. 9:42.

6. Suno sa 1 Corinto 1:26-29, ano ang pagtan-aw sang kalibutan sa mga disipulo ni Jesus?

⁶ Ano pa gid ang isa ka rason kon ngaa pareho sa “mga kubos” ang mga disipulo ni Jesus? Ti, sin-o bala ang ginakabig sang kalibutan nga importante? Indi bala ang mga manggaranon, mga bantog, kag mga may awtoridad? Pero indi pareho sa ila ang kalabanan nga disipulo ni Jesus. Gani para sa mga tawo sa kalibutan, “mga kubos” sila kag indi sila importante. (Basaha ang 1 Corinto 1:26-29.) Pero indi amo sina ang pagtan-aw ni Jehova sa ila.

7. Ano ang gusto ni Jehova nga pagtamod naton sa aton mga kauturan?

⁷ Palangga ni Jehova ang tanan niya nga alagad, bag-uhan man sila ukon madugay na nga nagaalagad sa iya. Importante kay Jehova ang tanan naton nga kauturan, gani dapat importante man sila sa aton. Dapat naton ‘higugmaon ang tanan naton nga kauturan,’ indi lang ang pila sa ila. (1 Ped. 2:17) Dapat naton ipabatyag sa ila nga palangga naton sila kag dapat kita maghalong para indi naton mapalain ang ila buot. Kon nabal-an naton nga nasandad sa aton ang isa ka utod, indi naton ini pagbalewalaon. Indi man naton paghunahunaon nga nasandad sia kay madasig gid man sia magsunggod. Pero ngaa nagakasandad ang iban? Posible nga bangod sang ila gindak-an, may pila ka kauturan nga wala sing kompiansa sa ila kaugalingon. May pila nga bag-o lang nag-Saksi, gani nabudlayan pa sila magpatawad sa mga nakasala sa ila. Ano man ang rason sang ila pagkasandad, dapat may himuon gid kita para madula ang kalain sang ila buot. Pero, dapat man marealisar sang isa nga nasandad nga indi man maayo kon dali sia masandad, gani dapat niya tinguhaan nga bag-uhon ini. Kon himuon niya ini, mangin matawhay ang iya hunahuna kag mangin maayo ang kaangtanan niya sa iya mga kauturan.

8. Ano ang panimuot sang kalabanan nga tawo sang panahon ni Jesus nga nakaimpluwensia sa iya mga disipulo?

⁸ Ngaa ginsambit ni Jesus ang parte sa “mga kubos”? Ginpamangkot sia sang iya mga disipulo: “Sin-o gid bala ang pinakamataas sa Ginharian sang langit?” (Mat. 18:1) Para sa madamo nga Judiyo sadto, importante gid ang posisyon kag ranggo. Ang isa ka propesor nagsiling: “Ang pinakaimportante sa ila kabuhi amo ang padunggan sila sang iban kag mangin bantog sila.”

9. Ano ang dapat himuon sang mga disipulo ni Jesus?

⁹ Kabalo si Jesus nga gusto gid sang madamo nga Judiyo nga mas labaw sila sangsa iban, gani dapat gid panikasugan sang iya mga  disipulo nga bag-uhon ini nga panghunahuna. Ginsilingan niya sila: “Ang pinakamataas sa inyo dapat mangin kaangay sang kamanghuran, kag ang nagapanguna mangin kaangay sang nagaalagad.” (Luc. 22:26) Kon ‘kabigon naton ang iban nga labaw’ sila sa aton, ginapakita naton nga kita ang “kamanghuran.” (Fil. 2:3) Kon pirme naton ipakita ini nga panimuot, malikawan naton nga mapasandad ang iban.

10. Ano ang ginlaygay ni Pablo nga dapat naton iaplikar?

¹⁰ Mas labaw sa aton ang tanan naton nga kauturan sa pila nila ka kinaiya. Makita naton ini kon magpokus kita sa ila maayo nga mga kinaiya. Dapat naton iaplikar ang ginlaygay ni apostol Pablo sa mga taga-Corinto: “Sin-o ang nagahimo sa imo nga labaw sa iban? Ano ang yara sa imo nga wala mo mabaton? Kon nabaton mo ini, ngaa nagapahambog ka subong nga daw wala mo ini mabaton?” (1 Cor. 4:7) Indi gid naton dapat paghandumon nga dayawon kita sang iban ukon hunahunaon nga labaw kita sa iban. Halimbawa, kon ang isa ka brother maayo magpamulongpulong ukon ang isa ka sister madamo sing Bible study, dapat nila panikasugan nga si Jehova ang madayaw sa tanan nila nga ginahimo.

11. Ano ang gusto nga itudlo sa aton ni Jesus sa iya ilustrasyon parte sa isa ka hari kag sa iya ulipon?

¹¹ Pagkatapos ginpaandaman ni Jesus ang iya mga sumulunod nga dapat nila likawan nga mapasandad ang iban, nagsugid sia sang ilustrasyon parte sa isa ka hari kag sa iya ulipon. Wala na ginpabayaran sang hari sa iya ulipon ang daku niya nga utang. Pero, gusto gid sini nga ulipon nga bayaran ang gamay nga utang sa iya sang pareho niya nga ulipon. Gani ginpabilanggo sang hari ini nga ulipon kay wala sia nagpakita sang kaluoy. Ano ang matun-an naton sa sini? Si Jesus nagsiling: “Amo man ang himuon sang akon langitnon nga Amay sa inyo kon indi ninyo pagpatawaron sing tinagipusuon ang inyo utod.”—Mat. 18:21-35.

12. Kon wala kita nagapatawad, ano ang malain nga epekto sini sa iban?

¹² Bangod sang ginhimo sang ulipon, indi lang sia ang nahalitan kundi pati man ang iban. Una, ginhalitan niya ang pareho niya nga ulipon kag wala sia naluoy sa iya kay “ginpabilanggo niya sia tubtob mabayaran niya ang iya utang.” Ikaduha, naapektuhan man ang iban pa nga mga ulipon. Sang “makita [nila] ang natabo, ginsubuan gid sila.” May epekto man sa iban ang aton mga ginahimo. Ano ang matabo kon indi naton pagpatawaron ang nakasala sa aton? Una, masakitan sia kay wala naton sia ginpatawad, wala naton sia ginasapak, kag ginapabatyag naton sa iya nga indi naton sia palangga. Ikaduha, masaw-ahan ang iban nga kauturan sa kongregasyon kon matalupangdan nila nga akig kita sa isa ka utod.

13. Ano ang matun-an mo sa eksperiensia sang isa ka payunir?

¹³ Kon ginapatawad naton ang aton mga kauturan, may maayo ini nga epekto sa aton kag sa iban. Naeksperiensiahan ini sang isa ka payunir nga tawgon naton nga Crystal. Nasakitan gid sia sa ginsiling sang isa ka sister. Si Crystal nagsiling: “Kon kaisa, masakit sia maghambal kag makapilas ini sa balatyagon. Kon nagabantala, indi ko gusto nga upod kami sa isa ka salakyan. Wala na ako gana magbantala kag indi na ako malipayon.” Para kay Crystal, may rason sia nga maglain ang iya buot. Pero wala sia nagdumot kag wala sia nagpadala sa iya emosyon. Nangin mapainubuson sia kag gin-aplikar niya ang laygay sang Biblia nga mabasa sa artikulo nga “Magpatawad sing Tinagipusuon” sa Oktubre 15, 1999, nga Ang Lalantawan. Ginpatawad ni Crystal ang sister. Nagsiling sia: “Nahangpan ko na subong nga tanan kita dapat magpanikasog nga bag-uhon ang aton indi maayo nga mga pamatasan, kag handa si Jehova nga patawaron kita kada adlaw. Pamatyag ko daw ginkuha ang akon mabug-at nga ginapas-an. Gani nangin malipayon ako liwat.”

14. Suno sa Mateo 18:21, 22, ano ang posible nga nabudlayan nga himuon ni apostol Pedro kag ano ang matun-an mo sa sabat ni Jesus?

 ¹⁴ Dapat kita magpatawad kag amo ini ang husto nga himuon. Pero posible nga nabudlayan kita nga himuon ini kon kaisa. Mahimo nga amo man sini ang ginbatyag ni apostol Pedro. (Basaha ang Mateo 18:21, 22.) Ano ang makabulig sa aton? Una, pamalandungi kon pila ka beses na kita nga ginpatawad ni Jehova. (Mat. 18:32, 33) Puede kuntani nga indi niya kita pagpatawaron, pero ginapatawad niya kita gihapon sing kinabubut-on. (Sal. 103:8-10) Kag “kita mismo obligado man nga maghigugmaanay.” Gani indi kita makasiling nga depende sa aton kon bala patawaron naton ang aton mga kauturan ukon indi. Dapat gid naton sila patawaron. (1 Juan 4:11) Ikaduha, pamalandungi ang mga resulta kon nagapatawad kita. Mahimo naton mabuligan ang nakasala sa aton, mahiusa ang kongregasyon, maamligan naton ang aton kaangtanan kay Jehova, kag magatawhay ang aton panghunahuna. (2 Cor. 2:7; Col. 3:14) Kag ang katapusan, mangamuyo kay Jehova nga amo ang nagsugo sa aton nga magpatawad. Indi pagpabay-i si Satanas nga gub-on ang imo maayo nga kaangtanan sa imo mga kauturan. (Efe. 4:26, 27) Kinahanglan naton ang bulig ni Jehova para may paghidait sa kongregasyon.

15. Suno sa Colosas 3:13, ano ang himuon naton kon naglain ang aton buot bangod sang ginhimo sang isa ka utod?

¹⁵ Pero ano abi kon naglain ang imo buot bangod sang ginhimo sang isa ka utod? Ano ang dapat mo himuon? Panikasugi nga indi maguba ang inyo maayo nga kaangtanan. Mangamuyo kay Jehova kag isugid sa iya kon ano gid ang imo ginabatyag. Pangabaya sia nga  pakamaayuhon ang utod nga nagpalain sang imo buot, kag buligan ka nga makita ang maayo nga mga kinaiya sang utod nga nanamian ni Jehova sa iya. (Luc. 6:28) Pero kon daw indi mo gid mapalampas ang ginhimo sang utod, hunahunaa sing maayo kon paano mo sia istoryahon. Mas maayo nga hunahunaon mo nga indi hungod sang utod nga maglain ang imo buot sa iya ginhimo. (Mat. 5:23, 24; 1 Cor. 13:7) Kon nagaistoryahanay kamo, indi paghunahunaa nga sala gid ang iya ginhimo. Pero ano abi kon indi niya gusto nga mag-ayuhay kamo? “Padayon nga batasa” ang imo utod kag padayon nga magpasensia. (Basaha ang Colosas 3:13.) Ang pinakaimportante, indi ka magdumot sa iya kay maapektuhan sini ang imo kaangtanan kay Jehova. Panikasugi nga indi gid masandad. Kon himuon mo ini, ginapakita mo nga palangga mo si Jehova labaw sa tanan.—Sal. 119:165.

16. Ano ang katungdanan sang kada isa sa aton?

¹⁶ Nagapasalamat gid kita nga nagaalagad kita kay Jehova upod ang aton mga kauturan bilang “isa ka panong nga may isa ka manugbantay.” (Juan 10:16) Ang libro nga Organisado sa Paghimo sang Kabubut-on ni Jehova, sa pahina 165, nagasiling: “Karon nga nagabenepisyo ka na sa sini nga paghiusa, may katungdanan ka nga huptan ini.” Gani dapat naton “[hanason] ang aton kaugalingon nga tamdon ang aton kauturan subong sang pagtamod ni Jehova sa ila.” Para kay Jehova, hamili kita tanan sa iya. Amo man bala sini ang pagtamod mo sa imo mga kauturan? Kabalo si Jehova sang tanan mo nga ginahimo para buligan sila kag para ipakita nga nagaulikid ka sa ila, kag ginapabaloran niya ini.—Mat. 10:42.

17. Ano ang dapat naton himuon?

¹⁷ Palangga naton ang aton mga kauturan. Gani ‘determinado kita nga indi magbutang sing kasandaran ukon kasablagan sa aton utod.’ (Roma 14:13) Ginakabig naton nga labaw sa aton ang aton mga kauturan, kag gusto naton nga patawaron sila sing tinagipusuon. Kabay pa nga panikasugan naton nga indi gid masandad. Sa baylo, “tinguhaan naton nga himuon ang mga butang nga nagadala sing paghidait kag ang mga butang nga makapabakod sa isa kag isa.”—Roma 14:19.