1. Ngaa nasubuan kon kaisa ang mga alagad ni Jehova kag nagabatyag nga nagaisahanon lang sila?

MAHIMO gid nga nasubuan ang kalabanan sa aton kon kaisa. Para sa iban, nagakadula man lang ini dayon nga balatyagon. Pero para naman sa iban, daw wala ini nagakadula. Bisan gani may upod kita nga madamo nga tawo, mahimo kita gihapon masubuan. May pila ka utod nga nabudlayan makakita sing abyan sa ginsayluhan nila nga kongregasyon. May iban naman nga suod gid sa ila pamilya, gani nasubuan sila kon magsaylo sila sa iban nga lugar nga malayo sa ila mga paryente. May mga utod nga nahidlaw gid sa ila pinalangga nga napatay. Kag may pila ka utod nga nagabatyag nga nagaisahanon lang sila bangod ginsikway sila ukon ginahingabot sang ila pamilya kag mga abyan. Matuod gid ini sa mga bag-o lang nangin Saksi.

2. Ano nga mga pamangkot ang sabton naton?

² Nabal-an ni Jehova ang tanan parte sa aton kag nahangpan niya kita. Kabalo sia kon nasubuan kita, kag gusto niya kita buligan. Paano kita ginabuligan ni Jehova? Ano ang puede naton himuon para madula ang aton kasubo? Kag ano ang puede naton himuon para mabuligan naton ang aton mga kauturan nga nasubuan? Binagbinagon naton ang mga sabat sa sini nga mga pamangkot.

3. Paano ginpakita ni Jehova nga nagaulikid sia kay Elias?

³ Gusto ni Jehova nga mangin malipayon ang tanan nga nagasimba sa iya. Malapit sia sa kada isa sa aton, gani kabalo sia kon nasubuan kita ukon naluyahan sing buot. (Sal. 145:18, 19) Binagbinaga ang pag-ulikid ni Jehova sa iya matutom nga manalagna nga si Elias, kag kon paano niya sia ginbuligan. Sang panahon ni Elias, mabudlay gid ang kahimtangan sa Israel.  Ginahingabot ang mga alagad ni Jehova sang iya maimpluwensia nga mga kaaway nga nagapamatok sa iya, kag gusto gid nila patyon si Elias. (1 Hari 19:1, 2) Mahimo nga nadugangan pa gid ang pagluya sing buot ni Elias kay abi niya sia na lang isa ang nabilin nga manalagna nga nagaalagad kay Jehova. (1 Hari 19:10) May ginhimo dayon si Jehova para buligan si Elias. Nagpadala si Jehova sang anghel para silingan ang Iya manalagna nga wala sia nagaisahanon. Ginsilingan sang anghel si Elias nga madamo nga Israelinhon ang nagaalagad gihapon sing matutom kay Jehova.—1 Hari 19:5, 18.

4. Paano ginapakita sang Marcos 10:29, 30 nga ginaulikdan ni Jehova ang iya mga alagad nga ginsikway sang ila pamilya ukon abyan?

⁴ Kabalo si Jehova nga madamo sang ginsakripisyo ang pila sa aton para maalagad sia. Halimbawa, posible nga ginsikway kita sang aton mga paryente kag mga abyan nga indi Saksi. Mahimo nga nabalaka sadto si apostol Pedro sang ginpamangkot niya si Jesus: “Ginbiyaan namon ang tanan kag nagsunod sa imo; ano gid bala ang mabaton namon?” (Mat. 19:27) Ginsilingan ni Jesus ang iya mga disipulo nga makasalig sila nga mangin pamilya nila ang bilog nga kongregasyon. (Basaha ang Marcos 10:29, 30.) Kag nagpromisa si Jehova, ang aton Amay sa langit, nga buligan niya ang mga gusto mag-alagad sa iya. (Sal. 9:10) Binagbinaga ang puede mo himuon para mabuligan ka ni Jehova nga madula ang imo kasubo kon pamatyag mo nagaisahanon ka lang.

5. Ano ang benepisyo kon hunahunaon mo kon paano ka ginabuligan ni Jehova?

⁵ Hunahunaa kon paano ka ginabuligan ni Jehova. (Sal. 55:22) Makabulig ini sa imo nga marealisar nga wala ka nagaisahanon. Si Carol, * nga isa ka dalaga kag nagaisahanon nga Saksi sa ila pamilya, nagsiling: “Kon ginahunahuna ko kon paano ako ginbuligan ni Jehova sa mga kabudlayan nga akon naeksperiensiahan, masiling ko gid nga wala ako nagaisahanon. Sigurado ako nga ara gid pirme si Jehova para buligan ako.”

6. Paano mapalig-on sang 1 Pedro 5:9, 10 ang mga kauturan nga nagabatyag nga nagaisahanon lang sila?

⁶ Hunahunaa kon paano ginabuligan ni Jehova ang aton mga kauturan nga nasubuan kay  pamatyag nila nagaisahanon lang sila. (Basaha ang 1 Pedro 5:9, 10.) Si Hiroshi, nga madugay na nabawtismuhan kag nagaisahanon nga Saksi sa ila pamilya, nagsiling: “Ang kada isa may ara gid sing ginabatas nga problema. Gani tanan kita sa kongregasyon nagapanikasog gid nga maalagad si Jehova sa bug-os naton nga masarangan. Para sa mga pareho sa akon nga nagaisahanon nga Saksi sa pamilya, makapalig-on gid nga makita ang pagpanikasog sang mga kauturan.”

7. Paano nakabulig sa imo ang pagpangamuyo?

⁷ Regular nga mangamuyo, magbasa sang Biblia, kag mag-attend sa mga miting. Dapat mo isugid kay Jehova kon ano gid ang imo ginabatyag. (1 Ped. 5:7) “Ang isa nga nakabulig gid sa akon para maghaganhagan ang akon kasubo amo ang hanuot nga pagpangamuyo kay Jehova,” siling ni Massiel. Nasubuan ini nga pamatan-on nga sister kay sia lang isa sa ila pamilya ang nagaalagad kay Jehova. “Nabatyagan ko gid nga isa sia ka matuod nga Amay, kag madamo nga beses nga nagapangamuyo ako sa iya kada adlaw kag ginasugid ko sa iya kon ano gid ang akon ginabatyag.”

8. Paano ka nabuligan sang pagbasa sang Biblia kag pagpamalandong sa sini?

⁸ Regular nga basaha ang Pulong sang Dios, kag pamalandungi ang mga kasaysayan nga nagapamatuod nga palangga ka ni Jehova. Si Bianca, nga isa ka sister nga ginapakalain sang iya pamilya, nagsiling: “Nakabulig gid sa akon ang pagbasa kag pagpamalandong sa mga kasaysayan sa Biblia kag sa mga eksperiensia sang mga alagad ni Jehova nga nagbatas sang mga problema nga pareho sa akon.” Ang pila ka utod nagasaulo sang mga teksto nga makapahaganhagan sang ila kasubo, pareho sang Salmo 27:10 kag Isaias 41:10. Ang iban naman nagapamati sang mga rekording kon nagahanda sila para sa mga miting ukon nagabasa sang Biblia. Nagsiling sila nga nakabulig ini sa ila nga maumpawan sila sa ila kasubo.

9. Paano ka nabuligan sang pag-attend sa mga miting?

⁹ Panikasugi nga mag-attend sa mga miting sing regular. Mapalig-on ka gid sa imo mabatian sa mga miting, kag mas makilala mo pa gid ang imo mga kauturan. (Heb. 10:24, 25) Si Massiel, nga ginsambit kaina, nagsiling: “Mahuluy-on gid ako, pero ginapanikasugan ko gid nga mag-attend sa tanan nga miting kag magkomento. Nakabulig ini sa akon nga magsuod sa mga kauturan.”

10. Ngaa dapat gid naton panikasugan nga mangin abyan ang aton matutom nga mga kauturan?

¹⁰ Panikasugi nga mangin abyan mo ang matutom nga mga kauturan. Pilia ang mga kauturan nga madamo ka sing matun-an. Puede nga manghod sila ukon magulang sila sa imo, kag puede man nga lain ang ila kultura. Ang Biblia nagasiling nga “may kaalam sa mga tigulang.”  (Job 12:12) Makatuon man ang mga tigulang sa matutom nga mga pamatan-on sa kongregasyon. Halimbawa, mas magulang si Jonatan kay David, pero nangin suod sila nga mag-abyanay. (1 Sam. 18:1) Nagbuligay sila para maalagad nila si Jehova bisan pa sa mabudlay nga mga kahimtangan. (1 Sam. 23:16-18) Si Irina, nga isa ka sister kag nagaisahanon nga Saksi sa ila pamilya, nagsiling: “Daw mga ginikanan na naton ukon mga utod ang aton mga kauturan. Puede sila gamiton ni Jehova para buligan kita.”

11. Ano ang dapat mo himuon para mangin suod mo nga abyan ang mga kauturan?

¹¹ Indi mahapos magpakig-abyan kon mahuluy-on ka. Si Ratna, nga isa ka mahuluy-on nga sister kag nakaeksperiensia sang pagpamatok sang naga-Bible study pa lang sia, nagsiling, “Narealisar ko nga kinahanglan ko ang bulig sang akon mga kauturan.” Mahimo nga nabudlayan ka nga isugid sa iban ang imo ginabatyag. Pero kon isugid mo ini sa isa ka utod, posible nga mangin suod kamo nga mag-abyanay. Gusto gid sang imo mga abyan nga palig-unon ka kag buligan, pero dapat mo ipabalo sa ila kon ano ang puede nila himuon.

12. Paano makabulig sa imo ang pagbantala para makakita ka sing maayo nga mga abyan sa kongregasyon?

¹² Ang isa sa pinakamaayo nga paagi para mangin abyan naton ang mga kauturan amo ang pagbantala upod sa ila. Si Carol, nga ginsambit kaina, nagsiling: “Madamo ako sing nangin abyan nga sister paagi sa pagbantala upod sa ila kag paghimo sang iban pa nga hilikuton sa pag-alagad kay Jehova. Halin pa sang una, ginabuligan gid ako ni Jehova paagi sa ila.” Makabenepisyo gid kita kon panikasugan naton nga mangin abyan ang matutom nga mga kauturan. Ginagamit ni Jehova ini nga mga abyan para palig-unon kita kon naluyahan kita sing buot ukon nasubuan.—Hulu. 17:17.

13. Ano ang responsibilidad sang tanan sa kongregasyon?

¹³ Responsibilidad sang tanan nga kauturan nga magbuligay para may paghidait sa kongregasyon, kag dapat magpalanggaanay ang tanan para wala sing may magbatyag nga nagaisahanon sia. (Juan 13:35) Mapalig-on gid naton ang iban paagi sa aton mga ginahimo kag ginasiling. Ang isa ka sister nagsiling: “Wala siguro ako nangin Saksi ni Jehova kon wala ako ginbuligan sang mga kauturan. Nangin pamilya ko ang kongregasyon.” Kon may utod sa inyo kongregasyon nga nagaisahanon lang nga Saksi sa ila pamilya, ano ang puede mo himuon para mabatyagan niya nga palangga sia sang mga kauturan?

14. Ano ang puede mo himuon para mangin abyan mo ang mga bag-uhan?

¹⁴ Panikasugi nga mangin abyan mo ang mga bag-uhan sa kongregasyon. Mahimo naton ini kon abiabihon naton sila. (Roma 15:7) Pero may dapat pa kita himuon magluwas sa pagbugno lang sa ila. Gusto naton nga mangin suod naton sila nga abyan. Gani ipabatyag sa ila nga nagaulikid ka sa ila. Indi man kinahanglan nga hibaluon mo gid ang tanan parte sa ila kabuhi, pero tinguhai nga hangpon ang ila mga problema. May pila ka utod nga nabudlayan nga isugid ang ila ginabatyag, gani indi sila pagpilita nga mag-istorya. Sa baylo, maggamit sang mga pamangkot nga makabulig sa ila nga mapabutyag nila ang ila ginabatyag, kag pamatii sing mapinasensiahon ang ila mga sabat. Halimbawa, puede mo sila pamangkuton kon paano sila nangin Saksi.

15. Paano mabuligan sang hamtong nga mga kauturan ang pila ka utod sa kongregasyon?

¹⁵ Magabakod ang pagtuo sang tanan sa kongregasyon kon ginaulikdan naton ang isa kag isa. Dapat gid ini ipakita sang mga gulang kag sang  hamtong nga mga kauturan. Si Melissa, nga gintudluan sang iya iloy sang kamatuoran, nagsiling: “Nagapasalamat gid ako sa mga brother nga nagahatag pirme sang tion sa akon. Daw mga tatay ko na gid sila. Kon gusto ko nga may kaistorya, sigurado ako nga may magapamati gid sa akon.” Si Mauricio, nga isa ka pamatan-on nga brother, nasubuan gid kag pamatyag niya nagaisahanon na lang sia sang nag-untat sa pag-alagad kay Jehova ang nag-Bible study sa iya. Si Mauricio nagsiling: “Nakabulig gid sa akon ang pag-ulikid sang mga gulang. Pirme nila ako ginaistorya. Ginaupdan nila ako sa pagbantala, ginasugiran nila ako sang ila mga natun-an sa ila pagtuon sang Biblia, kag nagahampang kami sang mga sports.” Subong, nagaalagad sa Bethel si Melissa kag si Mauricio.

16-17. Ano pa ang puede naton himuon para buligan ang iban?

¹⁶ Magbulig sa praktikal nga paagi. (Gal. 6:10) Si Leo, nga isa ka misyonero sa pungsod nga malayo sa iya pamilya, nagsiling: “Kon pakitaan ka sang kaayo sa tion nga kinahanglan mo gid ini, daku gid ang epekto sini sa imo bisan pa daw kasimple lang sini. Nadumduman ko sang isa ka bes nga naaksidente ako sa akon salakyan. Sang nakapauli na ako sa balay, grabe gid ang akon stress. Pero gin-agda ako sang isa ka mag-asawa nga magkaon sa ila balay. Indi ko na madumduman ang amon ginkaon, pero indi ko gid malipatan ang ila kaayo samtang ginapamatian nila ako. Naumpawan gid ako.”

¹⁷ Nalipay gid kita nga makaupod ang mga kauturan pareho sa tion sang asembleya kag kombension, kag nalipay man kita nga mag-istorya upod sa ila parte sa aton nabatian sa mga programa. Pero, si Carol, nga ginsambit kaina, nagsiling, “Nasubuan gid ako kon asembleya kag kombension.” Ngaa? Nagsiling sia: “Kay bisan pa may ara ginatos ukon linibo ka kauturan, ang kalabanan sa ila may upod nga pamilya. Gani nagabatyag ako nga nagaisahanon lang ako gihapon.” May pila ka utod nga napatyan sang bana ukon asawa ang nasubuan nga mag-attend sa ila pinakauna nga kombension ukon asembleya nga indi na nila kaupod ang ila pinalangga. May kilala ka bala nga utod nga amo sini ang iya kahimtangan? Hagara sia nga mag-upod sa inyo pamilya sa masunod nga kombension ukon asembleya.

18. Kon nagahatag kita sang tion para sa isa ka utod, paano naton maaplikar ang 2 Corinto 6:11-13?

 ¹⁸ Magpain sang tion para makaupod mo ang mga kauturan. Panikasugi nga iupod ang lainlain nga mga kauturan sa inyo paglingawlingaw, ilabi na ang mga utod nga nasubuan. Gusto naton nga ‘buksan sing masangkad ang aton tagipusuon’ para sa sini nga mga kauturan. (Basaha ang 2 Corinto 6:11-13.) Si Melissa, nga ginsambit kaina, nagsiling, “Nalipay gid kami kon ginahagad kami sang mga kauturan sa ila balay para makaupod ang ila pamilya, kag kon nagalagaw kami upod sa ila.” May ara bala sa inyo kongregasyon nga puede mo mahatagan sang tion?

19. Sa ano nga mga tion posible nga kinahanglan gid sang aton mga kauturan ang kaupod?

¹⁹ May mga tion nga malipay gid ang aton mga kauturan kon updan naton sila. Halimbawa, posible nga nabudlayan ang pila ka utod kon nagaselebrar ang ila mga paryente nga indi Saksi sang mga selebrasyon nga wala nabase sa Biblia. May pila naman nga grabe gid ang ila kasubo kon mag-abot ang adlaw nga madumduman nila ang ila pinalangga nga napatay, pareho sang petsa sang kamatayon sang ila pinalangga. Kon magpain kita sang tion para makaupod ang mga kauturan nga may amo sini nga kahimtangan, ginapakita naton nga ‘nagaulikid gid’ kita sa ila.—Fil. 2:20.

20. Kon nasubuan kita, paano kita mabuligan sang ginsiling ni Jesus sa Mateo 12:48-50?

²⁰ Madamo sang rason kon ngaa nasubuan ang isa ka utod kon kaisa. Pero, indi naton dapat pagkalimtan nga nabal-an gid ni Jehova ang aton ginabatyag. Sa masami, ginagamit niya ang aton mga kauturan para buligan kita. (Basaha ang Mateo 12:48-50.) Gani ipakita naton kay Jehova nga nagapasalamat gid kita sa sini nga mga kauturan paagi sa paghimo sang aton bug-os nga masarangan nga buligan man sila. Bisan pa nasubuan kita kon kaisa, wala kita nagaisahanon kay kaupod naton pirme si Jehova.