1. Ano ang gintudlo sa aton ni Hari Solomon sa Manugwali 7:20?

 NAGSULAT si Hari Solomon: “Wala sing matarong nga tawo sa duta nga nagahimo pirme sing maayo kag indi makasala.” (Man. 7:20) Matuod gid ini. Tanan kita makahimo gid sang sala. (1 Juan 1:8) Gani kinahanglan naton tanan ang pagpatawad sang Dios kag sang iban.

2. Ano ang mabatyagan mo kon patawaron ka sang imo suod nga abyan?

² Sigurado gid nga nadumduman mo pa ang tion nga nasakit mo ang balatyagon sang imo suod nga abyan. Gusto mo nga mag-ayuhay kamo liwat, gani sinsero ka nga nag-sorry sa iya. Ano ang nabatyagan mo sang ginpatawad ka niya? Nagtawhay bala ang imo pamatyag? Huo. Magluwas sa sini, sigurado nga nalipay ka man.

3. Ano ang binagbinagon naton sa sini nga artikulo?

³ Gusto naton nga mangin aton pinakasuod nga Abyan si Jehova. Pero kon kaisa, may mahambal ukon mahimo kita nga makasakit sang iya balatyagon. Ngaa makasigurado kita nga patawaron gid kita ni Jehova? Ano ang kinalain sang pagpatawad ni Jehova kag sang ginahimo naton nga pagpatawad sa iban? Kag sin-o ang ginapatawad sang Dios?

4. Ngaa makasigurado kita nga si Jehova handa sa pagpatawad?

⁴ Ginapasalig kita sang Pulong sang Dios nga si Jehova handa sa pagpatawad. Sa Bukid Sinai, ginsugid ni Jehova ang iya mga kinaiya kay Moises paagi sa isa ka anghel. Nagsiling Sia: “Si Jehova, si Jehova, isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran, nagapakita sing mainunungon nga gugma sa linibo, nagapatawad sing sayop kag paglapas kag sala.” (Ex. 34: 6, 7) Mapinalanggaon kag maluluy-on nga Dios si Jehova, kag handa niya patawaron ang mga nakasala nga nagahinulsol.—Neh. 9:17; Sal. 86:15.

5. Suno sa Salmo 103:13, 14, ano ang ginahimo ni Jehova bangod kilala gid niya ang mga tawo?

⁵ Nabal-an ni Jehova ang tanan parte sa aton kay sia ang nagtuga sa aton. Binagbinaga ini: Nabal-an niya ang tanan nga detalye parte sa tanan nga tawo sa duta. (Sal. 139:15-17) Gani makita niya ang tanan naton nga kaluyahon nga napanubli naton sa aton mga ginikanan. Kabalo man sia sang tanan nga natabo sa aton kabuhi nga nakaimpluwensia sa aton personalidad. Ano ang ginahimo ni Jehova bangod kilala gid niya kita? Ginapakitaan niya kita sang kaluoy.—Sal. 78:39; basaha ang Salmo 103:13, 14.

6. Paano ginpamatud-an ni Jehova nga handa sia sa pagpatawad?

⁶ Ginpamatud-an ni Jehova nga handa sia sa pagpatawad. Nahangpan niya nga tanan kita makasasala kag mapatay sa ulihi bangod sang ginhimo ni Adan. (Roma 5:12) Wala sing mahimo ang bisan sin-o sa aton para mahilway kita sa sala kag kamatayon. (Sal. 49:7-9) Pero ginkaluuyan kita sang aton mahigugmaon nga Dios kag may ginhimo sia para mahilway kita. Ano ang iya ginhimo? Suno sa Juan 3:16, ginpadala ni Jehova ang iya bugtong nga Anak para ihatag ang iya kabuhi para sa aton. (Mat. 20:28; Roma 5:19) Gani imbes nga kita ang silutan sang kamatayon, si Jesus ang napatay para mahilway sa silot sang sala ang tanan nga nagatuo sa iya. (Heb. 2:9) Grabe gid kasakit ang ginbatyag ni Jehova sang nakita niya ang iya pinalangga nga Anak nga nag-antos sang makahuluya nga kamatayon. Sigurado gid nga indi pagtugutan ni Jehova nga mapatay ang iya Anak kon indi Niya gusto nga patawaron kita.

7. Sin-o ang pila sa mga kinabubut-on nga ginpatawad ni Jehova nga mabasa sa Biblia?

⁷ Madamo kita sang mabasa sa Biblia nga mga halimbawa sang kinabubut-on nga ginpatawad ni Jehova. (Efe. 4:32) Sin-o ang madumduman mo nga ginpatawad niya? Posible nga madumduman mo si Hari Manases. Grabe gid ang ginhimo niya nga mga sala kay Jehova. Nagsimba sia sa indi matuod nga mga dios kag gin-impluwensiahan man niya ang iban nga sundon sia. Ginpatay niya ang iya kabataan  kag ginhalad niya sila sa indi matuod nga mga dios. Nagbutang pa gani sia sang tinigib nga imahen sang diosdios sa sagrado nga templo ni Jehova. Amo ini ang ginasiling sang Biblia parte sa iya: “Malain gid ang iya ginhimo sa panulok ni Jehova, nga nagpaakig sa Iya.” (2 Cron. 33:2-7) Pero sang tinagipusuon nga naghinulsol si Manases, kinabubut-on sia nga ginpatawad ni Jehova. Ginbalik pa gani sia sang Dios sa iya posisyon bilang hari. (2 Cron. 33:12, 13) Posible nga madumduman mo man si Hari David. Nakahimo sia sang mabug-at nga mga sala, kag lakip sa sini ang pagpanghilahi kag pagpatay. Pero sang gin-aku ni David nga nakasala sia kag sinsero sia nga naghinulsol, ginpatawad man sia ni Jehova. (2 Sam. 12:9, 10, 13, 14) Gani makasigurado kita nga patawaron gid kita ni Jehova. Kag matun-an naton nga lain ang pagpatawad ni Jehova sa ginahimo sang tawo nga pagpatawad.

8. Bilang pinakamaayo nga Hukom, ngaa tumalagsahon kon magpatawad si Jehova?

⁸ Si Jehova ang “Hukom sang bug-os nga duta.” (Gen. 18:25) Naintiendihan gid sang maayo nga hukom ang kasuguan. Bilang aton Hukom, naintiendihan gid ni Jehova ang kasuguan kay sia man ang aton Manughatag sing Kasuguan. (Isa. 33:22) Si Jehova lang ang bug-os nga nakabalo kon ano ang husto kag sala. Ano pa gid ang dapat nabal-an sang maayo nga hukom? Dapat nabal-an niya ang tanan nga impormasyon parte sa isa ka kaso antes sia magdesisyon. Nabal-an gid pirme ni Jehova ang tanan nga impormasyon, gani sia ang pinakamaayo nga Hukom.

9. Kon magdesisyon si Jehova nga patawaron ang isa ka tawo, sa ano ini nabase?

⁹ Indi pareho sa mga tawo nga hukom, nabal-an gid pirme ni Jehova ang tanan nga impormasyon sa bisan ano nga kaso nga iya desisyunan. (Gen. 18:20, 21; Sal. 90:8) Indi sia pareho sa mga tawo nga nagadepende lang sa ila makita kag mabatian. Nahangpan gid ni Jehova kon ano ang nagaimpluwensia sa isa ka tawo nga himuon ang isa ka buhat. Nagaimpluwensia sa iya ang mga kinaiya kag batasan nga napanubli niya sa iya mga ginikanan, ang iya ineskwelahan, ang lugar nga iya gindak-an, kag ang kondisyon sang iya emosyon kag hunahuna. Mabasa man ni Jehova ang tagipusuon. Nahangpan gid niya kon ngaa ginahimo sang isa ka tawo ang isa ka buhat. Makita ni Jehova ang tanan. (Heb. 4:13) Gani kon magdesisyon si Jehova nga patawaron ang isa ka tawo, nabase gid ini sa kompleto nga impormasyon.

10. Ngaa makasiling kita nga matarong kag patas pirme ang paghukom ni Jehova? (Deuteronomio 32:4)

¹⁰ Matarong kag patas pirme ang paghukom ni Jehova. Wala gid sia sing ginapasulabi. Kon magpatawad sia, wala niya ini ginabase sa hitsura, manggad, pagkaprominente, ukon mga abilidad sang isa ka tawo. (1 Sam. 16:7; Sant. 2:1-4) Wala sing makapahog kay Jehova kag indi gid sia masuhulan. (2 Cron. 19:7) Kon nagadesisyon sia, wala niya ini ginabase sa iya kaakig ukon emosyon. (Ex. 34:7) Sigurado gid nga si Jehova ang pinakamaayo nga Hukom bangod nahangpan gid niya kita kag ang aton kahimtangan.—Basaha ang Deuteronomio 32:4.

11. Ngaa lain ang pagpatawad ni Jehova sa ginahimo sang tawo nga pagpatawad?

¹¹ Ginpakita sang mga manunulat sang Hebreong Kasulatan nga tumalagsahon kon magpatawad si Jehova. May mga tion nga gingamit nila ang isa ka Hebreo nga tinaga nga suno sa isa ka reperensia “ginagamit lang para ilaragway ang pagpatawad sang Dios sa mga makasasala. Wala gid ginagamit ini nga tinaga para ilaragway ang pagpatawad sang isa ka tawo sa  iban nga tawo, nga indi bug-os kon ipaanggid sa pagpatawad sang Dios.” Si Jehova lang ang makapatawad sing bug-os sa nakasala nga nagahinulsol. Ano ang resulta kon patawaron kita ni Jehova?

12-13. (a) Ano ang maeksperiensiahan sang isa ka tawo kon patawaron sia ni Jehova? (b) Kon mapatawad na kita ni Jehova, ano ang indi na gid niya paghimuon?

¹² Kon nagapati kita nga ginpatawad na kita ni Jehova, maeksperiensiahan naton “ang mga tion sang kaumpawan,” kag lakip sa sini ang matawhay nga hunahuna kag matinlo nga konsiensia. Mabatyagan lang naton ini kon si Jehova mismo ang magpatawad sa aton. (Binu. 3:19) Kon patawaron kita ni Jehova, mangin abyan niya kita liwat, nga daw pareho lang nga wala kita nakahimo sang sala.

¹³ Kon mapatawad na ni Jehova ang aton sala, indi na gid niya ini pag-isukmat liwat sa aton kag indi na gid niya kita pagsilutan liwat bangod sa sini nga sala. (Isa. 43:25; Jer. 31:34) Ginapalayo niya sa aton ang aton mga sala nga daw pareho ‘kalayo sang sidlangan sa katundan.’ * (Sal. 103:12) Magapasalamat gid kita kag magadayaw kon hunahunaon naton kon daw ano ka tumalagsahon ang pagpatawad ni Jehova. (Sal. 130:4) Pero sin-o ang ginapatawad ni Jehova?

14. Ano na ang natun-an naton parte sa pagpatawad ni Jehova?

¹⁴ Natun-an naton nga ang pagpatawad ni Jehova wala nabase sa kadakuon sang sala sang isa ka tawo. Natun-an man naton nga ginagamit ni Jehova ang iya nabal-an bilang aton Manunuga, Manughatag sing Kasuguan, kag Hukom sa pagdesisyon kon bala patawaron niya ang isa ka tawo ukon indi. Pero antes si Jehova magdesisyon, ano anay ang mga ginabinagbinag niya?

15. Suno sa Lucas 12:47, 48, ano ang isa sa mga ginabinagbinag ni Jehova?

¹⁵ Ginabinagbinag ni Jehova kon bala nabal-an sang nakasala nga malain ang iya ginhimo. Maathag ini sa ginsiling ni Jesus sa Lucas 12:47, 48. (Basaha.) Kon ginplano sang isa ka tawo nga himuon ang nabal-an niya nga malain, kag dayon ginhimo niya ini bisan pa kabalo sia nga maakig sa sini si Jehova, nakahimo sia sang serioso nga sala. Posible nga magdesisyon  si Jehova nga indi sia pagpatawaron. (Mar. 3:29; Juan 9:41) Pero ang matuod, may mga tion nga kabalo kita nga sala ang ginhimo naton. Puede pa bala kita patawaron? Huo. Bangod may ginabinagbinag pa si Jehova antes sia magdesisyon kon bala patawaron niya kita.

16. Ano ang buot silingon sang paghinulsol, kag ngaa dapat gid kita maghinulsol kon gusto naton nga patawaron kita ni Jehova?

¹⁶ Ginabinagbinag man ni Jehova kon bala nagahinulsol gid ang nakahimo sang sala. Ano ang buot silingon sang paghinulsol? Nagahinulsol ang isa ka tawo kon “ginabag-o niya ang iya hunahuna, panimuot, ukon intension.” Nasubuan gid sia bangod nakahimo sia sang malain ukon bangod wala niya nahimo ang husto. Nasubuan man ang nagahinulsol nga tawo bangod ginpabay-an niya nga magluya ang iya kaangtanan kay Jehova, nga amo ang nangin rason kon ngaa nakahimo sia sang malain. Dumdumon naton nga nakahimo sang serioso nga mga sala si Hari Manases kag si Hari David. Pero ginpatawad sila ni Jehova bangod naghinulsol gid sila. (1 Hari 14:8) Gani patawaron lang kita ni Jehova kon makita niya nga nagahinulsol kita. Pero indi bastante nga nasubuan lang kita sa mga sala nga nahimo naton. Dapat may himuon gid kita dayon nga pagbag-o. * Kag amo ini ang isa pa nga ginabinagbinag ni Jehova.

17. Ano nga pagbag-o ang dapat naton himuon, kag ngaa importante ini para indi na naton masulit ang mga sala nga nahimo naton sang una? (Isaias 55:7)

¹⁷ Importante man kay Jehova ang ginahimo nga pagbag-o sang isa nga nakasala. Ini nga pagbag-o daw pareho sa pagkanakumbertir, nga nagakahulugan sang “pagliso.” Buot silingon, dapat untatan sang isa ka tawo ang ginahimo niya nga malain kag dapat na niya himuon ang mga ginapatuman ni Jehova. (Basaha ang Isaias 55:7.) Dapat bag-uhon sang isa ka tawo ang iya panghunahuna kag magpagiya sa panghunahuna ni Jehova. (Roma 12:2; Efe. 4:23) Dapat gid niya isikway ang iya malain nga panghunahuna kag untatan ang iya malain nga ginahimo. (Col. 3:7-10) Dapat naton tandaan nga ang aton pagtuo sa halad sang Cristo amo  gid ang ginabasihan para patawaron kita ni Jehova kag matinluan kita sa aton sala. Patawaron kita ni Jehova base sa sini nga halad kon makita niya nga nagapanikasog gid kita nga bag-uhon ang aton ginahimo.—1 Juan 1:7.

18. Ano ang ginbinagbinag naton parte sa pagpatawad ni Jehova?

¹⁸ Repasuhon naton ang pila sa mga ginbinagbinag naton. Kon parte sa pagpatawad, si Jehova gid ang pinakamaayo. Ngaa masiling naton ini? Una, pirme sia handa sa pagpatawad. Ikaduha, kilala gid niya kita. Nabal-an niya ang tanan parte sa aton, gani mabal-an gid niya kon matuod kita nga nagahinulsol. Kag ikatlo, kon patawaron kita ni Jehova, bug-os gid ini nga daw pareho lang nga wala kita nakahimo sang sala. Bangod sini, may matinlo na kita nga konsiensia kag malipay na sia sa aton.

19. Bisan pa indi kita perpekto kag makahimo kita sang sala, ngaa puede kita mangin malipayon?

¹⁹ Bangod indi pa kita perpekto, makahimo kita sang sala. Pero mapalig-on kita sang ginasiling sang Insight on the Scriptures, Volume 2, pahina 771: “Maluluy-on si Jehova kag kabalo sia nga may mga kaluyahon ang iya mga alagad. Gani kon makahimo sila sang sala bangod indi sila perpekto, indi ini rason nga magpangasubo sila pirme. (Sa 103:8-14; 130:3) Kon ginahimo nila ang ila bug-os nga masarangan nga sundon ang mga kasuguan sang Dios, puede sila mangin malipayon. (Fil 4:4-6; 1Ju 3:19-22).” Makapalig-on gid ini.

20. Ano ang binagbinagon naton sa masunod nga artikulo?

²⁰ Nagapasalamat gid kita kay handa si Jehova sa pagpatawad sa aton kon nagahinulsol gid kita sa mga sala nga nahimo naton. Pero paano naton mailog ang pagpatawad ni Jehova? Sa ano nga mga paagi pareho kita kay Jehova kon magpatawad, pero sa ano nga mga paagi indi kita pareho sa iya? Ngaa importante nga mahangpan naton ini? Sabton ini nga mga pamangkot sa masunod nga artikulo.