1-2. Pareho kay Lot, ano nga problema ang naeksperiensiahan sang mga Cristiano subong?

 GRABE na gid ka imoral sang mga tawo sa kalibutan subong, gani nabatyagan man naton ang ginbatyag ni Lot sadto. “Natublag gid [sia] sa matampalason nga paggawi sang indi matinumanon sa kasuguan nga mga tawo” bangod kabalo sia nga ginakaugtan ini sang aton Amay sa langit. (2 Ped. 2:7, 8) Bangod sa iya kahadlok kag gugma sa Dios, gindumtan ni Lot ang imoral nga paggawi sang mga tawo sa iya palibot. Subong, madamo nga tawo ang indi interesado ukon wala nagasunod sa mga kasuguan ni Jehova. Pero bisan pa sini, masarangan naton nga mangin matinlo sa panulok ni Jehova kon pabakuron naton ang aton gugma sa Dios kag tinguhaan nga padayon nga ipakita ang maayo nga sahi sang kahadlok sa iya.—Hulu. 14:2.

² Ginabuligan kita ni Jehova nga mahimo ini paagi sa laygay nga mabasa naton sa libro sang Hulubaton. Makabenepisyo gid sa sini nga mga laygay ang tanan nga Cristiano, lalaki man ukon babayi, bata man ukon tigulang.

3. Suno sa Hulubaton 17:3, ano ang isa ka rason kon ngaa dapat naton amligan ang aton tagipusuon? (Tan-awa man ang piktyur.)

³ Ginausisa ni Jehova ang aton tagipusuon. Amo ini ang isa ka importante nga rason kon ngaa dapat naton amligan ang aton malaragwayon nga tagipusuon. Makita ni Jehova ang indi makita sang iban parte sa aton kag kabalo sia kon ano gid kita nga klase sang tawo. (Basaha ang Hulubaton 17:3.) Ang iya mga laygay makabulig sa aton nga magkabuhi sing wala sing katapusan. Kag kon pirme naton ini hunahunaon, palanggaon niya kita. (Juan 4:14) Makabulig man ini sa aton nga indi magpaimpluwensia sa kabutigan ni Satanas kag sang mga tawo, kag indi pag-ilugon ang indi maayo nga mga paggawi sang malain nga mga tawo. (1 Juan 5:18, 19) Kon mangin suod pa gid kita kay Jehova, mas palanggaon kag tahuron pa gid naton sia. Bangod indi naton gusto nga masakitan ang aton Amay, ginakaugtan na  naton bisan ang pagpamensar pa lang sang paghimo sang sala. Gani kon ginasulay kita nga maghimo sang sala, pamangkuton naton ang aton kaugalingon, ‘Gusto ko bala nga masakitan si Jehova nga nagapalangga gid sa akon?’—1 Juan 4:9, 10.

4. Paano ang kahadlok kay Jehova nakabulig sa isa ka sister nga indi makahimo sang sala?

⁴ Amo ini ang ginsiling ni Marta nga isa ka sister sa Croatia sang ginsulay sia nga maghimo sang imoral: “Daw indi ako makapamensar sing maayo kag nabudlayan ako nga punggan ang akon kaugalingon para indi ako makahimo sang sala. Pero naamligan ako sang akon kahadlok kay Jehova.” b Paano? Nagsiling si Marta nga ginpamalandungan niya ang indi maayo nga resulta kon maghimo sia sang imoral. Amo man sini ang dapat naton himuon. Ang pinakamalala nga resulta kon makahimo kita sang sala amo nga mapasubo naton si Jehova kag madula naton ang aton paglaum nga masimba sia sing wala sing katapusan.—Gen. 6:5, 6.

5. Ano ang natun-an mo sa eksperiensia ni Leo?

⁵ Kon may kahadlok kita kay Jehova, wala kita nagapakig-abyan sa mga tawo nga nagahimo sang malain. Amo ini ang narealisar ni Leo nga taga-Congo. Apat ka tuig pagkatapos niya mabawtismuhan, nagpakig-abyan sia sa mga tawo nga nagahimo sang malain. Para sa iya indi man ini sala basta wala lang sia nagahimo sang malain. Pero naimpluwensiahan gid sia sang iya mga kaupdanan nga magpahubog kag maghimo sang imoral. Sang ulihi, ginpamensaran niya ang gintudlo sang iya Cristiano nga mga ginikanan kag kon daw ano sia ka malipayon sang nagaalagad sia kay Jehova. Ano ang resulta? Nakamarasmas sia. Nagpabulig sia sa mga gulang para makaalagad sia liwat kay Jehova. Subong, isa na sia ka gulang kag espesyal payunir kag malipayon gid sia sa iya pag-alagad.

6. Ano ang binagbinagon naton parte sa duha ka “babayi”?

⁶ Binagbinagon naton subong ang Hulubaton kapitulo 9 nga nagasugid parte sa duha ka babayi.  Ang isa ka babayi nagarepresentar sa kaalam kag ang isa naman nagarepresentar sa kabuangan. (Ipaanggid ang Roma 5:14; Galacia 4:24.) Samtang ginabinagbinag naton ini, dumduma nga ang mga tawo sa kalibutan ni Satanas gusto gid maghimo sang imoral kag magtan-aw sang pornograpiya. (Efe. 4:19) Gani importante gid nga padayon naton nga ipakita ang kahadlok sa Dios kag likawan ang paghimo sang malain. (Hulu. 16:6) Tanan kita makabenepisyo gid sa mga laygay sa sini nga kapitulo. Pareho nga ginaagda sang duha ka babayi ang “mga kulang sa maayo nga paghangop,” ukon ang mga tawo nga kulang sing kinaalam. Daw nagasiling sila, ‘Sulod diri sa akon balay kay may pagkaon ako diri.’ (Hulu. 9:1, 5, 6, 13, 16, 17) Pareho lang ang pangagda sang duha ka babayi, pero ang kada pangagda may lainlain nga resulta.

7. Suno sa Hulubaton 9:13-18, ano ang indi maayo nga resulta kon batunon sang isa ka tawo ang pangagda sang buangbuang nga babayi? (Tan-awa man ang piktyur.)

⁷ Binagbinaga ang pangagda sang “buangbuang nga babayi.” (Basaha ang Hulubaton 9:13-18.) Wala sia nahuya magtawag sa mga kulang sang maayo nga paghangop nga magsulod sa iya balay kag magpaayaw sa pagkaon. Kon batunon sang isa ka tawo ang iya pangagda, indi gid maayo ang resulta kay “wala [sia] makahibalo nga yara didto ang mga patay.” Posible nga madumduman mo nga may ginsiling pa gid ang Hulubaton nga daw pareho man sini. Ginpaandaman kita parte sa “malain” kag “imoral nga babayi.” Nagsiling ini: “Ang iya balay nagalugdang padulong sa kamatayon.” (Hulu. 2:11-19) Ang Hulubaton 5:3-10 nagapaandam man parte sa isa pa ka “malain nga babayi” nga “ang iya mga tiil nagalakat padulong sa kamatayon.”

8. Sa ano nga mga sitwasyon nga kinahanglan naton magdesisyon?

⁸ Ang mga nakabati sang pangagda sang “buangbuang nga babayi” kinahanglan magdesisyon kon bala batunon nila ang iya pangagda ukon indi. May mga sitwasyon nga kinahanglan man naton magdesisyon. Ano ang himuon naton kon ginasulay kita sang iban nga maghimo sang imoral? Ukon ano ang himuon naton kon gulpi lang kita makakita sang imoral nga mga palaguaon sa media ukon sa Internet?

9-10. Ano ang pila ka rason kon ngaa indi kita dapat maghimo sang imoral?

⁹ May maayo kita nga mga rason kon ngaa indi kita dapat maghimo sang imoral. Suno sa Biblia, ang “buangbuang nga babayi” nagsiling: “Matam-is ang kinawat nga tubig.” Ano ang “kinawat nga tubig”? Ginpaanggid sang Biblia sa makaparepresko nga tubig ang pag-sex sang mag-asawa. (Hulu. 5:15-18) Kay man, makahatag ini sang kalipay sa mag-asawa. Pero lain gid ang “kinawat nga tubig.” Posible nga nagapatuhoy ini sa imoral nga pagpakig-sex. Sa masami, ginatago sang mga  tawo nga nagahimo sang imoral ang ila ginahimo. Daw pareho sila sa kawatan nga nagapanago kon mangawat sia. Daw matam-is ining “kinawat nga tubig” kay pamatyag nila wala man sing may makabalo sa ila ginahimo. Ginainto lang nila ang ila kaugalingon bangod kabalo si Jehova sang tanan nga nagakatabo. Kon sikwayon kita ni Jehova, indi gid naton masiling nga “matam-is” ini. Sa baylo, amo ini ang pinakamapait ukon pinakamalala nga matabo sa aton. (1 Cor. 6:9, 10) Pero indi lang amo sini ang puede mangin epekto sa aton.

¹⁰ Ang seksuwal nga imoralidad posible magresulta sa kahuy-anan, pagbatyag nga wala sing pulos, pagbusong nga wala sang bana, kag pagkaguba sang pamilya. Gani maalamon gid kon indi naton pagbatunon ang pangagda sang buangbuang nga babayi kay makaguba ini sang aton kaangtanan kay Jehova. Magluwas sini, madamo nga tawo nga naghimo sang imoral ang nagmasakit nga posible bangdan sang ila kamatayon. (Hulu. 7:23, 26) Ang bersikulo 18 sang kapitulo 9 nagsiling: “Ang mga bisita sang babayi yara sa kadadalman sang Lulubngan.” Ngaa madamo ang nagabaton sang iya pangagda bisan pa indi gid maayo ang resulta sini?—Hulu. 9:13-18.

11. Ngaa makahalalit gid ang pagtan-aw sang pornograpiya?

¹¹ Ang isa ka rason amo ang pornograpiya. Ginahunahuna sang iban nga indi makahalit ang pagtan-aw sang pornograpiya. Pero kon nagatan-aw ang isa ka tawo sang pornograpiya, mahalitan gid sia, maganubo ang iya pagtan-aw sa iya kaugalingon kag sa iban, kag maadik sia sa sini. Mabudlay gid dulaon sa hunahuna ang imoral nga mga piktyur kag mga eksena. Dugang pa, ginapabaskog sang pornograpiya ang indi husto nga mga handum nga dapat naton patyon. (Col. 3:5; Sant. 1:14, 15) Madamo sang nagtan-aw sang pornograpiya ang nakahimo gid sang imoral.

12. Paano naton mapakita nga ginapanikasugan gid naton nga indi makahunahuna sang imoral nga mga handum?

¹² Bilang mga Cristiano, ano ang dapat naton himuon kon gulpi lang may naggua nga imoral nga piktyur sa aton gadyet? Dapat indi gid naton ini pagtan-awon. Para mahimo naton ini, dapat naton dumdumon nga ang aton kaangtanan kay Jehova amo ang pinakaimportante sa aton. Bisan gani ang mga piktyur nga indi man imoral posible gihapon makaimpluwensia sa aton nga maghunahuna sang imoral nga mga handum. Ngaa indi naton ini dapat pagtan-awon? Bangod indi naton gusto maghimo sang bisan ano nga posible mangin rason nga maghandum kita sang imoral. (Mat. 5:28, 29) Ang isa ka gulang sa Thailand nga si David nagsiling: “Ginapamangkot ko ang akon kaugalingon: ‘Bisan pa indi man imoral ang piktyur, malipay ayhan si Jehova kon padayon ko ini nga tan-awon?’ Nabuligan ako sini nga himuon ang husto.”

13. Ano ang makabulig sa aton nga mahimo ang husto?

¹³ Kon nahadlok kita nga masubuan si Jehova, buligan kita sini nga himuon ang husto. Ang kahadlok sa Dios “amo ang una nga tikang,” ukon pundasyon, “sa pagtigayon sing kaalam.” (Hulu. 9:10) Ginapamatud-an ini sang una nga mga bersikulo sang Hulubaton kapitulo 9. Mabasa naton diri ang parte sa isa pa ka babayi nga nagarepresentar sa “matuod nga kaalam.”

14. Ano nga pangagda ang mabasa naton sa Hulubaton 9:1-6?

¹⁴ Basaha ang Hulubaton 9:1-6. Mabasa naton sa sini ang pangagda ni Jehova nga amo ang aton Manunuga kag ginhalinan sang tanan nga kaalam. (Hulu. 2:6; Roma 16:27) Ginsambit sa sini ang parte sa isa ka daku nga balay nga may pito ka haligi. Ginapakita sini nga maalwan si Jehova kag ginabaton niya ang tanan nga gusto mag-aplikar sang iya kaalam sa ila kabuhi.

15. Ano ang gusto sang Dios nga himuon naton?

¹⁵ Maalwan gid si Jehova kay ginahatagan niya kita sang aton mga kinahanglanon. Amo ini ang ginatudlo sa aton sang halimbawa sang babayi nga nagarepresentar sa “matuod nga kaalam” nga  mabasa sa Hulubaton kapitulo 9. c Ginsambit sa sini nga ginpreparar na sini nga babayi ang iya karne, ginpaisog na niya ang iya alak, kag ginhanda na niya ang lamesa sa iya balay. (Hulu. 9:2) Kag suno sa bersikulo 4 kag 5: “Nagsiling sia [ukon ang matuod nga kaalam] sa isa nga kulang sa maayo nga paghangop: ‘Kari kamo, magkaon kamo sang akon tinapay.’” Ngaa dapat naton batunon ang pangagda sini nga babayi? Bangod gusto ni Jehova nga mangin maalam ang iya mga anak kag indi sila mahalitan. Indi niya gusto nga masakitan pa kita antes kita manuto. Amo ini ang rason kon ngaa “nagatigana sia sing praktikal nga kaalam para sa mga matarong.” (Hulu. 2:7) Kon may maayo kita nga sahi sang kahadlok kay Jehova, himuon gid naton ang makapalipay sa iya. Ginapamatian naton ang iya maalamon nga mga laygay kag nalipay kita sa pag-aplikar sini.—Sant. 1:25.

16. Paano nakabulig kay Alain ang iya kahadlok sa Dios para makahimo sia sang husto nga desisyon, kag ano ang resulta?

¹⁶ Binagbinaga kon paano nakabulig kay Alain ang iya kahadlok sa Dios para makahimo sia sang husto nga desisyon. Isa ka gulang si Alain kag maestro sa eskwelahan. Nagsiling sia, “Madamo nga kaupod ko nga maestro ang nagapati nga ang pagtan-aw sang pornograpiya makatudlo sa ila parte sa sex.” Pero kabalo si Alain nga indi husto ang ila ginapatihan. “Bangod sang akon kahadlok sa Dios,” siling niya, “wala ako nagtan-aw sini nga mga pelikula. Ginpaathag ko man sa ila kon ngaa indi ako magtan-aw sini.” Gin-aplikar gid ni Alain ang laygay sang “matuod nga kaalam” nga “maglakat sing paabante sa dalanon sang paghangop.” (Hulu. 9:6) Nagdayaw gid ang pila ka manunudlo nga kaupod ni Alain sa iya ginhimo. Bangod sini, naga-Bible study na sila subong kag naga-attend sa mga miting.

17-18. Paano nagabenepisyo ang mga nagabaton sang pangagda sang “matuod nga kaalam,” kag ano ang ila paglaum? (Tan-awa man ang piktyur.)

¹⁷ Gingamit ni Jehova ang halimbawa sang duha ka babayi para tudluan kita kon paano mangin malipayon ang aton kabuhi. Ang mga nagabaton sang pangagda sang magahod kag “buangbuang nga babayi” nagakalipay sa paghimo sang imoral. Nagapagusto sila sa ila kabuhi subong, kag wala sila sing labot sa matabo sa ila sa ulihi. Pero bangod sa ila mga ginahimo, ang “kadadalman sang Lulubngan” amo ang ila madangatan.—Hulu. 9:13, 17, 18.

¹⁸ Pero maayo ang resulta para sa mga nagabaton sang pangagda sang babayi nga nagarepresentar sa “matuod nga kaalam.” Malipayon sila subong kay matigayon nila ang tanan nga kinahanglan nila para mangin suod sila kay Jehova. (Isa. 65:13) Amo ini ang ginsiling ni Jehova paagi kay manalagna Isaias: “Pamati kamo sing maayo sa akon, kag magkaon sing maayo nga pagkaon, kag makabatyag kamo sing kalipay sa matuod  nga kabuganaan.” (Isa. 55:1, 2) Ginatun-an naton nga higugmaon ang mga ginahigugma ni Jehova kag dumtan ang mga ginadumtan niya. (Sal. 97:10) Kag nalipay kita kay may pribilehiyo kita nga agdahon ang iban nga magtuon sa “matuod nga kaalam.” Daw pareho lang nga “[nagapanawag kita] sa pinakamataas nga mga lugar sang siudad: ‘Kon sin-o ang kulang sing kinaalam, magpalapit sia diri.’” Nagabenepisyo na kita subong sa “matuod nga kaalam” pati na ang mga nagabaton sini. Pero padayon naton nga mabaton ini nga benepisyo kay may paglaum kita nga “magkabuhi” asta sa wala sing katapusan basta padayon kita nga “maglakat sing paabante sa dalanon sang paghangop.”—Hulu. 9:3, 4, 6.

19. Suno sa Manugwali 12:13, 14, ano ang determinado naton nga himuon? (Tan-awa man ang kahon nga “ Ang mga Benepisyo Kon May Kahadlok Kita sa Dios.”)

¹⁹ Basaha ang Manugwali 12:13, 14. Kabay pa nga maamligan kita pirme sang aton kahadlok sa Dios. Kag kabay pa nga buligan kita sini nga padayon nga mangin matinlo sa panulok ni Jehova kag mangin suod sa iya sa sining katapusan nga mga adlaw. Bangod may kahadlok kita sa Dios, padayon naton nga ginaagda ang iban nga magtuon sa “matuod nga kaalam” para makabenepisyo man sila.