1. Suno sa 1 Pedro 5:2, ano nga responsibilidad ang ginhatag sa mga gulang?

 GINTANGDO ang mga gulang para atipanon ang hamili nga mga karnero ni Jehova. Ginapabaloran gid sining matutom nga mga brother ang responsibilidad nga ginhatag ni Jehova sa ila nga mag-alagad sa ila mga kauturan, kag ginapanikasugan gid nila nga mangin “mga manugbantay nga magabantay gid.” (Jer. 23:4; basaha ang 1 Pedro 5:2.) Ginapasalamatan gid naton ini nga mga brother sa aton kongregasyon.

2. Ano nga mga kabudlayan ang posible maeksperiensiahan sang pila ka gulang?

² Madamo sing dapat himuon ang mga gulang para maatipan ang kongregasyon, kag may mga kabudlayan ini. Halimbawa, narealisar sang isa ka gulang sa United States nga si Tony nga dapat pa gid sia mangin maugdang sa pagbaton sang mga asaynment nga ginahatag sa iya. Nagsiling sia: “Sang nagsugod ang COVID-19 nga pandemic, gindugangan ko pa gid ang akon mga ginahimo sa pag-organisar sang mga miting kag sang pagbantala. Pero bisan pa grabe na ang akon pagpanikasog, daw indi ko gihapon matapos ang tanan nga dapat ko himuon. Sang ulihi, diutay na lang ang akon tion sa pagbasa sang Biblia, personal nga pagtuon, kag pagpangamuyo.” Lain naman ang kabudlayan ni Ilir nga isa ka gulang sa Kosovo. Bangod sang inaway sa ila lugar, nabudlayan sia nga tumanon ang mga instruksion halin sa organisasyon. Nagsiling sia: “Natilawan ang akon kaisog sang ginpangabay ako sang branch office nga buligan ang mga kauturan sa delikado nga mga lugar. Nakulbaan ako, kag pamatyag ko daw indi praktikal ang ila instruksion.” Si Tim, nga isa ka misyonero sa Asia, nagbatyag nga daw indi niya matapos ang tanan nga dapat niya himuon kada adlaw. Nagsiling sia: “Kon kaisa, grabe gid ang akon kakapoy kag daw wala na ako sang kusog sa pagbulig sa mga kauturan.” Ano ang makabulig sa mga gulang nga may amo man sini nga mga kabudlayan?

3. Paano ang pagbinagbinag sa halimbawa ni Hukom Gideon makabulig sa aton tanan?

 ³ May matun-an gid ang mga gulang kay Hukom Gideon. (Heb. 6:12; 11:32) Ginproteksionan niya ang katawhan sang Dios, kag gin-atipan niya sila bilang isa ka manugbantay. (Huk. 2:16; 1 Cron. 17:6) Pareho kay Gideon, gintangdo man ang mga gulang para atipanon ang katawhan sang Dios sa sining mabudlay gid nga tion. (Binu. 20:28; 2 Tim. 3:1) Gani, may matun-an ang mga gulang sa kaugdang, pagkamapainubuson, pagkamatinumanon, kag pagbatas ni Gideon. Bisan pa indi kita gulang, makabulig gihapon sa aton ang halimbawa ni Gideon para pabaloran pa gid ang aton mapisan nga mga gulang kag suportahan sila.—Heb. 13:17.

4. Paano ginpakita ni Gideon nga maugdang sia kag mapainubuson?

⁴ Maugdang gid kag mapainubuson si Gideon. b Sia ang ginpili ni Jehova nga magaluwas sa Israel sa ila gamhanan nga kaaway nga mga Midianhon. Sang ginsugid ini sang anghel ni Jehova kay Gideon, mapainubuson sia nga nagsabat: “Ang akon pamilya ang pinakagamay sa tribo ni Manases, kag ako ang pinakakubos sa panimalay sang akon amay.” (Huk. 6:15) Nagbatyag si Gideon nga indi niya masarangan ini nga asaynment, pero kabalo si Jehova nga masarangan niya ini. Paagi sa bulig ni Jehova, natuman ni Gideon ang iya asaynment.

5. Sa ano nga mga sitwasyon posible mabudlayan ang mga gulang nga mangin maugdang kag mapainubuson?

⁵ Ginapanikasugan sang mga gulang nga mangin maugdang kag mapainubuson sa tanan nila nga ginahimo. (Miq. 6:8; Binu. 20:18, 19) Wala nila ginapabugal ang ila mga ikasarang ukon ang ila mga hinimuan. Kag wala man nila ginapamensar nga wala sila sing pulos kon makasala sila. Pero kon kaisa, mabudlay para sa isa ka gulang nga mangin maugdang kag mapainubuson. Halimbawa, kon ginbaton niya ang madamo nga asaynment nga ginhatag sa iya, posible nga mabudlayan sia nga himuon ini tanan. Kon nahimo niya sing maayo ang isa ka asaynment, posible nga dayawon sia sang iban. Pero posible nga pakalainon naman sia kon wala niya nahimo sing maayo ang iban nga asaynment. Paano makabulig sa mga gulang ang halimbawa ni Gideon sa sini nga mga sitwasyon?

6. Ano ang matun-an sang mga gulang kay Gideon parte sa kaugdang? (Tan-awa man ang piktyur.)

⁶ Magpabulig sa iban. Kon maugdang ang isa ka tawo, kabalo sia sang iya mga limitasyon.  Ginpakita ni Gideon nga maugdang sia sang nagpabulig sia sa iban. (Huk. 6:27, 35; 7:24) Nahangpan gid sang mga gulang nga amo man sini ang dapat nila himuon. Si Tony, nga ginsambit kaina, nagsiling: “Bangod sa paagi sang pagpadaku sa akon, wala ko ginapangindian ang mga asaynment nga ginahatag sa akon bisan pa indi ko na ini masarangan himuon. Gani, ginlakip ko sa amon family worship ang parte sa kaugdang, kag ginpamangkot ko ang akon asawa kon ano ang iya natalupangdan sa akon parte sa kaugdang. Gintan-aw ko man liwat ang video sa jw.org nga Hanasa, Saligi, kag Hatagi sing Awtoridad ang Iban, Pareho sang Ginhimo ni Jesus.” Nagpangabay si Tony nga buligan sia sang iban sa iya mga asaynment. Ano ang resulta? Si Tony nagsiling: “Naatipan sing maayo ang mga dapat himuon sa kongregasyon, kag mas madamo na ako sang tion para pabakuron ang akon kaangtanan kay Jehova.”

7. Paano mailog sang mga gulang si Gideon kon ginapakalain sila? (Santiago 3:13)

⁷ Mangin kalmado kon pakalainon ka sang iban. Mabudlay gid para sa mga gulang kon pakalainon sila. Makabulig gihapon sa ila ang halimbawa ni Gideon. Kabalo sia nga indi sia perpekto, gani nangin kalmado lang sia sang ginpakalain sia sang mga lalaki sang Efraim. (Huk. 8:1-3) Imbes nga mangakig, ginpakita ni Gideon nga mapainubuson sia paagi sa pagpamati sa ila kag pagsabat sa ila sing kalmado. Bangod sini, nagkalma man sila. Mailog sang mga gulang si Gideon paagi sa pagpamati sing maayo sa mga nagapakalain sa ila kag pagsabat sa ila sing kalmado. (Basaha ang Santiago 3:13.) Kon himuon ini sang mga gulang, nagabulig sila para indi madula ang paghidait sa kongregasyon.

8. Ano ang dapat himuon sang mga gulang kon dayawon sila sang iban? Maghatag sing halimbawa.

⁸ Panikasugi nga si Jehova ang dayawon sa tanan mo nga ginahimo. Sang napierde ni Gideon kag sang iya mga soldado ang mga Midianhon, gindayaw sia sang mga tawo. Pero, ginpatalupangod niya sa ila nga si Jehova ang dapat dayawon. (Huk. 8:22, 23) Paano mailog sang mga gulang si Gideon? Dapat nila panikasugan nga si Jehova ang dayawon sa tanan nila nga ginahimo. (1 Cor. 4:6, 7) Halimbawa, kon dayawon ang isa ka gulang kay maayo sia magtudlo, puede niya pasalamatan ang Pulong sang Dios nga amo gid ang nagatudlo sa aton ukon ang paghanas sang organisasyon ni Jehova. Dapat man pamensaran sing maayo sang mga gulang kon bala ang ila pagtudlo nagadayaw kay Jehova ukon basi sila ang ginadayaw. Binagbinaga ang eksperiensia sang isa ka gulang nga si Timothy. Sang gintangdo sia nga gulang, nanamian gid sia magpamulongpulong. Nagsiling sia: “Grabe ka detalyado sang akon introduksion kag mga ilustrasyon. Bangod sini, pirme ako ginadayaw sang iban. Pero mas nagapokus sila sa akon imbes nga sa Biblia ukon kay Jehova.” Narealisar ni Timothy nga kinahanglan niya bag-uhon ang iya paagi sang pagtudlo para indi sia ang dayawon. (Hulu. 27:21) Ano ang resulta? Nagsiling sia: “Madamo nga kauturan ang nagasiling nga nakabulig sa ila ang akon pamulongpulong para mabatas nila ang ila mga problema kag mangin suod pa gid sila kay Jehova. Sang una, nalipay ako kon ginadayaw ako sang mga kauturan. Pero mas daku ang akon kalipay subong sa ila mga ginasiling parte sa epekto sang akon pamulongpulong sa ila.”

9. Paano natilawan ang pagkamatinumanon kag kaisog ni Gideon? (Tan-awa ang piktyur sa kober.)

⁹ Pagkatapos gintangdo si Gideon nga hukom, natilawan ang iya pagkamatinumanon kag kaisog. Ginsugo sia nga gub-on ang halaran sang iya amay para kay Baal, kag posible mabutang sa peligro ang iya kabuhi. (Huk. 6:25, 26) Sang ulihi, duha ka beses sia nga ginsilingan ni Jehova nga buhinan ang kadamuon sang iya mga soldado. (Huk. 7:2-7) Dayon, ginsugo sia nga gab-i nila salakayon ang ila mga kaaway.—Huk. 7:9-11.

10. Paano matilawan ang pagkamatinumanon sang isa ka gulang?

¹⁰ Dapat mangin “handa sa pagtuman” ang mga  gulang. (Sant. 3:17) Kon matinumanon ang isa ka gulang, handa sia nga tumanon ang mga ginasiling sang Biblia kag ang mga instruksion halin sa organisasyon sang Dios. Kon himuon niya ini, nagapakita sia sang maayo nga halimbawa sa iban. Pero, posible matilawan ang iya pagkamatinumanon. Halimbawa, posible mabudlayan sia magtuman kon makabaton sia sang madamo nga instruksion ukon kon gulpi lang ginbag-o ang mga instruksion. Posible magbatyag man sia nga ang pila ka instruksion daw indi praktikal ukon daw indi husto. Ukon basi pangabayon sia nga himuon ang isa ka asaynment nga posible mangin rason nga mapriso sia. Paano mailog sang mga gulang si Gideon kon amo sini ang ila sitwasyon?

11. Ano ang dapat himuon sang mga gulang para mangin matinumanon sila?

¹¹ Pamatii sing maayo ang mga instruksion kag sunda ini. Ginsilingan sang Dios si Gideon kon paano gub-on ang halaran sang iya amay, kon diin niya himuon ang bag-o nga halaran para kay Jehova, kag kon ano nga sapat ang iya ihalad. Wala ginkuestyon ni Gideon ang mga instruksion nga iya nabaton. Gintuman niya ang tanan nga ginsiling ni Jehova sa iya. Subong, makabaton ang mga gulang sang mga instruksion halin sa organisasyon ni Jehova paagi sa mga sulat, mga pahibalo, kag mga guidelines. Ini nga mga instruksion nagabulig sa aton para maamligan ang aton kabuhi kag para padayon kita nga mangin suod kay Jehova. Palangga gid naton ang aton mga gulang kay ginasunod gid nila sing maayo ini nga mga instruksion halin sa organisasyon. Nakabenepisyo gid ang tanan nga kauturan bangod sini.—Sal. 119:112.

12. Paano maaplikar sang mga gulang ang Hebreo 13:17 kon may pagbag-o sa mga instruksion halin sa organisasyon ni Jehova?

¹² Mangin handa sa pagsunod sa mga pagbag-o. Ginsilingan ni Jehova si Gideon nga buhinan ang iya mga soldado sang sobra 99 ka porsiento. (Huk. 7:8) Posible nga nagpamensar sia: ‘Ngaa buhinan? Paano kami magdaug?’ Pero, nagtuman si Gideon. Subong, mailog sang mga gulang si Gideon kon ginasunod nila ang mga pagbag-o sa mga instruksion halin sa organisasyon. (Basaha ang Hebreo 13:17.) Halimbawa, sang 2014, may ginhimo nga pagbag-o ang Nagadumala nga Hubon parte sa paggamit sang pondo sa pagpatindog sang mga Kingdom Hall kag mga Assembly Hall. (2 Cor. 8:12-14) Sang una, ginapahulam sang organisasyon sang kuarta ang mga kongregasyon para gamiton nila sa pagpatindog sang Kingdom Hall, kag dapat ini bayaran sang kongregasyon. Pero subong, ang mga donasyon halin sa tanan nga kongregasyon sa bilog nga kalibutan amo na ang ginagamit sang organisasyon para magpatindog sang mga Kingdom Hall kag mga Assembly Hall. Gani, mapatindugan sang Kingdom Hall bisan ang mga kongregasyon nga gamay lang ang masarangan iamot. Sang nabal-an ni José ini nga pagbag-o, ginduhaduhaan niya ini. Naghunahuna sia: ‘Wala gid sing bisan isa ka Kingdom Hall nga mapatindog. Indi ina ’ya praktikal diri sa amon.’ Ano ang nakabulig kay José nga suportahan ini nga pagbag-o? Nagsiling sia: “Ang Hulubaton 3:5, 6 nagbulig sa akon nga magsalig kay Jehova. Kag kanami gid sang resulta. Magluwas nga madamo kita sing napatindog  nga Kingdom Hall, narealisar man naton nga madamo sing paagi nga makaamot kita para may pag-alalangay sa organisasyon.”

13. (a) Sa ano kumbinsido si Gideon? (b) Paano mailog sang mga gulang si Gideon? (Tan-awa man ang piktyur.)

¹³ Mangin maisog sa paghimo sang kabubut-on ni Jehova. Gintuman ni Gideon si Jehova bisan pa nahadlok sia kag posible mabutang sa peligro ang iya kabuhi. (Huk. 9:17) Madamo sing ginhimo si Jehova para pasaligon si Gideon, gani kumbinsido gid sia nga buligan sia ni Jehova para luwason ang katawhan sang Dios. Ginailog sang mga gulang nga nagaistar sa lugar nga ginadumilian ang aton hilikuton ang halimbawa ni Gideon. Maisog nila nga ginapangunahan ang mga miting kag ang pagbantala bisan pa posible sila dakpon, interogahon, madulaan sang trabaho, ukon sakiton. c Sa tion sang dakung kapipit-an, dapat mangin maisog ang mga gulang sa pagsunod sa mga instruksion nga ila mabaton bisan pa mabutang sa peligro ang ila kabuhi. Halimbawa, posible makabaton kita sang mga instruksion kon paano ibantala ang matigdas nga mensahe sang paghukom kag kon ano ang himuon naton para maluwas kita kon magsalakay na ang Gog sang Magog.—Ezeq. 38:18; Bug. 16:21.

14. Paano natilawan ang pagbatas ni Gideon?

¹⁴ Kinahanglan gamiton ni Gideon ang iya puersa kag kusog para mahimo niya ang iya asaynment bilang hukom. Sang ginsalakay niya kag sang iya mga soldado ang mga Midianhon sang kagab-ihon, nagpalagyo ang mga Midianhon, gani ginlagas sila ni Gideon halin sa nalupyakan sang Jezreel asta sa Suba Jordan nga posible nga masiot bangod sang madabong nga mga tanom. (Huk. 7:22) Pag-abot sa Jordan, nag-untat bala si Gideon sa paglagas? Wala. Bisan pa kapoy na sia kag ang iya 300 ka soldado, gintabok nila ang Jordan kag padayon nila nga ginlagas ang ila mga kaaway. Sang ulihi, naabtan nila ang mga Midianhon kag napierde nila sila.—Huk. 8:4-12.

15. Sa ano nga sitwasyon posible matilawan ang pagbatas sang mga gulang?

¹⁵ Kon kaisa, posible magbatyag sang grabe nga kakapoy ang mga gulang sa pag-atipan sang kongregasyon kag sang ila pamilya. Paano mailog sang  mga gulang si Gideon kon amo sini ang ila ginabatyag?

16-17. Ano ang nakabulig kay Gideon nga makabatas, kag ano ang masaligan sang mga gulang? (Isaias 40:28-31) (Tan-awa man ang piktyur.)

¹⁶ Magsalig nga pabakuron ka ni Jehova. Nagsalig si Gideon nga pabakuron sia ni Jehova, kag wala gid sia napaslawan. (Huk. 6:14, 34) Sang nagpalagyo ang duha ka hari sang Midian nga posible nagasakay sa mga kamelyo, nagadalagan lang si Gideon kag ang iya mga soldado nga nagalagas sa ila. (Huk. 8:12, 21) Pero ginbuligan sila ni Jehova amo nga naabtan nila ang ila mga kaaway kag napierde nila sila. Subong, makasalig man ang mga gulang kay Jehova, ang isa nga ‘wala gid ginakapoy ukon ginalapyo.’ Hatagan niya sila sang kusog kon kinahanglan nila ini.—Basaha ang Isaias 40:28-31.

¹⁷ Binagbinaga ang eksperiensia ni Matthew nga miembro sang Hospital Liaison Committee. Ano ang nakabulig sa iya nga magbatas? Si Matthew nagsiling: “Madamo nga beses ko na nga naeksperiensiahan nga matuod gid ang ginasiling sang Filipos 4:13. Sa kada tion nga grabe gid ang akon kakapoy, hanuot ako nga nagapangamuyo sa Dios, kag nagapangabay ako sa iya nga hatagan niya ako sang kusog nga kinahanglan ko para buligan ang akon mga kauturan. Sa sini nga mga sitwasyon, nabatyagan ko gid nga ginapabakod ako sang espiritu ni Jehova. Nakabulig gid ini sa akon nga makabatas.” Pareho kay Gideon, madamo man sing kabudlayan ang aton mapisan nga mga gulang samtang ginaatipan nila ang katawhan ni Jehova. Gani importante gid nga dumdumon nila kon ano lang ang ila masarangan himuon kag ang ila mga limitasyon. Pero makasalig sila nga pamatian ni Jehova ang ila pagpangayo sing bulig kag pabakuron niya sila para makabatas sila.—Sal. 116:1; Fil. 2:13.

18. Paano mailog sang mga gulang si Gideon?

¹⁸ Madamo gid sing matun-an ang mga gulang kay Gideon. Dapat mangin maugdang kag mapainubuson ang mga gulang kon ano lang ang masarangan nila himuon kag kon ginapakalain sila ukon ginadayaw. Dapat sila mangin matinumanon kag magpakita sang kaisog kay malapit na gid ang katapusan sini nga kalibutan. Kag dapat sila magsalig nga pabakuron sila sang Dios bisan ano man ang ila mga kabudlayan. Nagapasalamat gid kita sa pagpangabudlay sang aton mga gulang, kag kabay pa nga ‘padayon naton nga palanggaon ang subong sina nga mga tawo.’—Fil. 2:29.