1-2. Suno sa Salmo 25:14, ano ang dapat naton himuon kon gusto naton nga mangin suod nga abyan ni Jehova?

 KON may suod ka nga abyan, ano nga mga kinaiya ang dapat mo ipakita para indi maguba ang inyo pag-abyanay? Posible nga magsiling ka nga dapat nagapalanggaanay kag nagabuligay ang suod nga mag-abyan. Posible nga indi mo gid mahunahuna nga importante man ang kahadlok. Pero, pareho sa ginsiling sang teksto nga ginbasihan sini nga artikulo, ang mga gusto mangin suod nga abyan ni Jehova dapat nga “nagakahadlok sa iya.”—Basaha ang Salmo 25:14.

² Bag-uhan man kita ukon madugay na nga nagaalagad kay Jehova, dapat pirme kita magkahadlok sa iya. Pero ano ang buot silingon sang pagkahadlok sa Dios? Ano ang himuon naton para mapakita ang kahadlok kay Jehova? Kag ano ang matun-an naton kay Obadias nga isa ka tulugyanan sang hari, kay Jehoiada nga isa ka mataas nga saserdote, kag kay Hari Jehoas parte sa kahadlok sa Dios?

3. Ipaathag kon paano makaamlig sa aton ang kahadlok.

³ Kon kabalo kita nga indi maayo ang mangin resulta sang isa ka sitwasyon, posible nga makabatyag kita sang kahadlok. Maayo ini nga sahi sang kahadlok kay makabulig ini sa aton nga makahimo sang maayo nga mga desisyon. Halimbawa, bangod nahadlok kita nga mahulog, wala kita nagapatibitibi sa banglid kon nagalakat kita. Ginalikawan man naton ang delikado nga mga sitwasyon kay nahadlok kita nga mahalitan. Kag kon palangga gid naton ang aton suod nga abyan, ginatinguhaan naton nga indi makasiling kag makahimo sing indi maayo sa iya kay nahadlok kita nga maguba ang aton pag-abyanay.

4. Ano nga sahi sang kahadlok kay Jehova ang gusto ni Satanas nga mabatyagan naton?

 ⁴ Gusto ni Satanas nga mahadlok ang mga tawo kay Jehova. Indi ini maayo nga sahi sang kahadlok. Gusto ni Satanas nga patihan naton ang ginsiling ni Elifaz nga si Jehova pirme lang nagapangakig, gusto Niya nga silutan kita, kag wala sing pulos ang aton mga ginahimo kay indi naton Sia mapalipay. (Job 4:18, 19) Gusto niya nga grabe gid ang aton kahadlok kay Jehova para mag-untat kita sa pag-alagad sa Iya. Para indi kita madala ni Satanas, dapat naton ipakita ang maayo nga sahi sang kahadlok sa Dios.

5. Ano ang buot silingon sang pagkahadlok sa Dios?

⁵ Kon palangga naton ang Dios kag ginatinguhaan naton nga indi makahimo sang bisan ano nga posible makaguba sang aton kaangtanan sa iya, ginapakita sini nga may maayo kita nga sahi sang kahadlok sa iya. Amo sini nga sahi sang “kahadlok sa Dios” ang ginpakita ni Jesus. (Heb. 5:7) Wala gid sia nagbatyag sang indi maayo nga sahi sang kahadlok kay Jehova. (Isa. 11:2, 3) Sa baylo, palangga gid niya si Jehova kag gusto niya nga tumanon sia. (Juan 14:21, 31) Pareho kay Jesus, tudok gid ang aton pagtahod kay Jehova bangod mahigugmaon Sia, maalam, matarong, kag gamhanan. Kabalo man kita nga palangga niya kita kag importante sa iya ang aton pagtuman sa iya mga ginatudlo. Masubuan gid si Jehova kon indi naton sia pagtumanon, pero malipay gid sia kon tumanon naton sia.—Sal. 78:41; Hulu. 27:11.

6. Ano ang puede naton himuon para mapakita naton ang kahadlok sa Dios? (Salmo 34:11)

⁶ Sang natawo kita, wala pa kita sing kahadlok kay Jehova, gani dapat naton tun-an kon paano ini ipakita. (Basaha ang Salmo 34:11.) Ang isa nga puede naton himuon amo ang pag-obserbar sa mga tinuga. Kon makita naton “sa mga butang nga gintuga” ni Jehova nga maalam gid sia, gamhanan, kag palangga gid niya kita, mapalig-on kita nga magpakita sang tudok nga pagtahod sa iya kag palanggaon sia. (Roma 1:20) Ang isa ka sister nga si Adrienne nagsiling: “Nagdayaw gid ako sa kaalam ni Jehova nga makita sa mga tinuga. Nakabulig ini sa akon nga magsalig pa gid nga kabalo sia kon ano ang pinakamaayo para sa akon.” Bangod pirme niya ini ginapamalandungan, nakasiling sia, “Indi ko gid paghimuon ang bisan ano nga posible makaguba sang akon kaangtanan kay Jehova nga naghatag sa akon sang kabuhi.” Testingi nga magpain sang tion sini nga semana para obserbahan ang isa ka tinuga ni Jehova. Makabulig ini sa imo nga tahuron kag higugmaon pa gid si Jehova.—Sal. 111:2, 3.

7. Paano ang pangamuyo makabulig sa aton nga mapakita ang maayo nga sahi sang kahadlok kay Jehova?

⁷ Ang isa pa nga puede naton himuon para mapakita naton ang kahadlok sa Dios amo ang regular nga pagpangamuyo. Sa kada tion nga mangamuyo kita kay Jehova, mas makilala pa gid naton sia. Halimbawa, sa kada tion nga nagapangamuyo kita kay Jehova nga hatagan niya kita sang kusog nga makabatas, ginadumdom naton kon daw ano sia ka gamhanan. Kon ginapasalamatan naton sia bangod sa paghatag niya sang iya Anak, ginapahanumdom kita sini kon daw ano niya kita ka palangga. Kag kon hanuot kita nga nagapangamuyo sa iya nga buligan niya kita sa aton problema, ginadumdom naton nga maalam gid sia. Ini nga mga pangamuyo nagabulig sa aton nga tahuron pa gid si Jehova. Nagabulig man ini sa aton nga tinguhaan nga indi paghimuon ang bisan ano nga posible makaguba sang aton kaangtanan sa iya.

8. Ano ang himuon naton para padayon naton nga mapakita ang kahadlok sa Dios?

⁸ Para padayon naton nga mapakita ang kahadlok kay Jehova, importante nga tun-an naton ang Biblia. Gusto naton tun-an sa Biblia ang mga nagpakita sang maayo nga halimbawa kag ang mga wala nagpakita sang maayo nga halimbawa. Binagbinagon naton ang duha ka matutom nga alagad ni Jehova: Si Obadias nga tulugyanan ni  Hari Ahab kag si Jehoiada nga isa ka mataas nga saserdote. Dayon hibaluon naton kon ano ang matun-an naton kay Hari Jehoas sang Juda nga sang primero nagpakita sang maayo nga halimbawa pero nagbiya kay Jehova sang ulihi.

9. Paano nakabulig kay Obadias ang iya kahadlok kay Jehova? (1 Hari 18:3, 12)

⁹ Sang una nga beses nga ginsambit si Obadias b sa Biblia, amo ini ang mabasa naton: “May daku nga kahadlok si Obadias kay Jehova.” (Basaha ang 1 Hari 18:3, 12.) Paano nakabulig kay Obadias ang iya kahadlok? Nakabulig ini sa iya nga mangin honest kag masaligan. Bangod sini, ginhimo sia nga tulugyanan sa panimalay sang hari. (Ipaanggid ang Nehemias 7:2.) Nakabulig man kay Obadias ang iya kahadlok nga mangin maisog. Kinahanglan gid niya nga mangin maisog kay ang hari sadto nga tion amo si Ahab. “Mas malain [si Ahab] sa panulok ni Jehova sangsa tanan nga [hari nga] nauna sa iya.” (1 Hari 16:30) Dugang pa, si Jezebel nga asawa ni Ahab, nagasimba kay Baal kag akig gid kay Jehova. Bangod sini, gintinguhaan niya nga dulaon ang pagsimba kay Jehova sa naaminhan nga ginharian sang Israel. Ginpatay pa gani niya ang madamo nga manalagna sang Dios. (1 Hari 18:4) Gani sigurado nga mabudlay gid para kay Obadias ang pagsimba kay Jehova sadto nga tion.

10. Ngaa talalupangdon gid ang kaisog ni Obadias?

¹⁰ Talalupangdon gid ang kaisog nga ginpakita ni Obadias. Ngaa masiling naton ini? Sang ginpangita ni Jezebel ang mga manalagna sang Dios para patyon, gintago ni Obadias ang 100 ka manalagna sa mga kueba, “tig-50 sa isa ka kueba, kag ginhatagan [niya] sila sing pagkaon kag tubig.” (1 Hari 18:13, 14) Maisog gid si Obadias, pero kon nabal-an sadto ni Jezebel ang iya ginhimo, sigurado nga ginpatay gid sia ni Jezebel. Tawo lang si Obadias, gani indi niya gusto mapatay. Pero palangga niya si Jehova kag ang mga nagasimba sa Iya, gani handa si Obadias nga irisgo ang iya kabuhi.

11. Ngaa masiling naton nga ang mga alagad ni Jehova subong pareho kay Obadias? (Tan-awa man ang piktyur.)

¹¹ Madamo nga alagad ni Jehova subong ang nagaistar sa mga lugar nga ginadumilian ang aton hilikuton. Ginatahod gid nila ang mga awtoridad. Pero pareho kay Obadias, wala sila nagauntat sa  pagsimba kay Jehova. (Mat. 22:21) Ginapakita nila ang ila kahadlok sa Dios paagi sa pagtuman sa iya sa baylo sang mga tawo. (Binu. 5:29) Padayon sila nga nagabantala kag nagahiwat sang mga miting, pero nagahalong sila sa paghimo sini. (Mat. 10:16, 28) Ginatinguhaan nila nga padayon nga makabaton sang mga publikasyon ang ila mga kauturan para padayon sila nga mangin suod kay Jehova. Binagbinaga ang eksperiensia ni Henri nga nagaistar sa isa ka pungsod sa Africa diin gindumilian ang aton hilikuton sadto. Nagboluntaryo si Henri sa pagdul-ong sang mga publikasyon nga nabase sa Biblia sa iya mga kauturan. Nagsulat sia: “Mahuluy-on ako. Gani kumbinsido ako nga ang akon tudok nga pagtahod kay Jehova amo gid ang nakabulig sa akon nga mangin maisog.” Pareho kay Henri, masarangan mo man bala nga mangin maisog? Mahimo mo ini kon ipakita mo ang maayo nga sahi sang kahadlok sa Dios.

12. Paano ginpakita sang mataas nga saserdote nga si Jehoiada kag sang iya asawa ang ila katutom kay Jehova?

¹² May kahadlok kay Jehova ang mataas nga saserdote nga si Jehoiada. Nakabulig ini sa iya nga mangin matutom kag palig-unon ang iban nga magsimba kay Jehova. Sang gin-agaw sang bata nga babayi ni Jezebel nga si Atalia ang trono kag naggahom bilang rayna sa Juda, ginpakita ni Jehoiada nga matutom sia. Nahadlok gid ang mga tawo kay Atalia bangod mapintas sia. Kag bangod gusto gid niya mangin rayna, ginpapatay niya ang tanan niya nga apo nga lalaki. (2 Cron. 22:10, 11) Ang isa sa iya mga apo amo si Jehoas. Wala napatay si Jehoas kay gintago sia sang asawa ni Jehoiada nga si Jehosabet. Gin-atipan nila nga mag-asawa si Jehoas. Bangod sa ila ginhimo, may kaliwat gihapon si David nga mangin hari sa ulihi. Matutom gid kay Jehova ang tigulang nga si Jehoiada, gani bisan pa nahadlok sia kay Atalia, padayon niya gihapon nga ginhimo ang husto.—Hulu. 29:25.

13. Sang pito ka tuig si Jehoas, paano ginpamatud-an liwat ni Jehoiada ang iya katutom?

¹³ Sang pito na ka tuig si Jehoas, ginpamatud-an liwat ni Jehoiada ang iya katutom kay Jehova. May ginplano sia. Kon matuman ang iya ginaplano, mangin hari si Jehoas nga amo ang may kinamatarong sa paggahom bilang kaliwat ni David. Pero kon indi matuman ang iya ginaplano, sigurado nga mapatay gid sia. Ginpakamaayo ni Jehova ang iya plano, gani natuman ini. Ginsuportahan sang mga pangulo kag sang mga Levinhon ang plano ni Jehoiada, gani ginhimo nila nga hari si Jehoas kag ginpapatay nila si Atalia. (2 Cron. 23:1-5, 11, 12, 15; 24:1) “Dayon nagpakigkatipan si Jehoiada kay Jehova kag sa hari kag sa katawhan, nga magapabilin sila nga katawhan ni Jehova.” (2 Hari 11:17) “Ginpapuesto man [ni Jehoiada] ang mga manugbantay sa mga gawang sang balay ni Jehova agod wala sing makasulod nga indi matinlo sa bisan ano nga paagi.”—2 Cron. 23:19.

14. Paano ginpadunggan si Jehoiada bangod ginpadunggan niya si Jehova?

¹⁴ Madugay na nga may ginpromisa si Jehova: “Padunggan ko ang mga nagapadungog sa akon.” Naeksperiensiahan gid ini ni Jehoiada kay ginpakamaayo sia ni Jehova. (1 Sam. 2:30) Halimbawa, ginpasulat niya ang kasaysayan ni Jehoiada sa Biblia para tudluan kita. (Roma 15:4) Kag sang napatay si Jehoiada, nakabaton sia sang pinasahi nga kadungganan kay ginlubong sia “sa Siudad ni David upod sa mga hari, bangod nakahimo sia sing maayo sa Israel para sa matuod nga Dios kag sa Iya balay.”—2 Cron. 24:15, 16.

15. Ano ang matun-an naton sa kasaysayan ni Jehoiada? (Tan-awa man ang piktyur.)

¹⁵ Ang kasaysayan ni Jehoiada makabulig sa aton nga mapakita ang kahadlok sa Dios. Mailog sang mga gulang si Jehoiada kon matutom nila nga amligan ang kongregasyon. (Binu. 20:28) May matun-an man ang mga tigulang kay Jehoiada. Kon magpakita sila sang kahadlok kay  Jehova kag padayon sila nga mangin matutom sa iya, puede niya sila gamiton para matuman ang iya katuyuan. Wala niya sila ginabalewala. Kamusta naman ang mga pamatan-on? Puede nila mailog kon paano gintratar ni Jehova si Jehoiada paagi sa pagtahod sa mga tigulang ilabi na ang mga madugay na nga nagaalagad kay Jehova. (Hulu. 16:31) Kag dapat naton tanan ilugon ang mga pangulo kag mga Levinhon nga nagsuporta kay Jehoiada. Dapat naton suportahan sing matutom ang “mga nagapanguna” paagi sa pagtuman sa ila.—Heb. 13:17.

16. Ngaa masiling naton nga maluya ang gugma ni Jehoas kay Jehova?

¹⁶ Ginbuligan ni Jehoiada si Hari Jehoas nga mangin maayo nga tawo. (2 Hari 12:2) Gani sang pamatan-on si Jehoas, gusto gid niya himuon ang makapalipay kay Jehova. Pero sang napatay si Jehoiada, ginpamatian niya ang apostata nga mga pangulo. Bilang resulta, “nag-alagad [sia kag ang iya mga sakop] sa sagrado nga mga poste kag sa mga diosdios.” (2 Cron. 24:4, 17, 18) Bisan pa nasakitan gid si Jehova sa ila ginhimo, padayon nga “nagapadala si Jehova sing mga manalagna sa ila agod pabalikon sila sa iya . . . , apang wala sila magpamati.” Wala gani nila ginpamatian ang anak nga lalaki ni Jehoiada nga si Zacarias, bisan pa manalagna sia ni Jehova, saserdote, kag pakaisa pa ni Jehoas. Daku ang kabalaslan ni Hari Jehoas sa pamilya ni Zacarias, pero ginpapatay pa niya si Zacarias.—2 Cron. 22:11; 24:19-22.

17. Ano ang natabo kay Jehoas?

¹⁷ Bangod wala nahuptan ni Jehoas ang maayo nga sahi sang kahadlok kay Jehova, malain gid  ang nangin resulta sini sa iya. Nagsiling si Jehova: “Tamayon ko ang mga nagatamay sa akon.” (1 Sam. 2:30) Sang ulihi, napierde sang diutay nga soldado sang Siria ang “tuman kadamo nga soldado” ni Jehoas kag “grabe ang iya mga pilas.” Paghalin sang mga soldado sang Siria, ginpatay sia sang iya mga alagad bangod sang pagpatay niya kay Zacarias. Bangod sang kalainan nga ginhimo ni Hari Jehoas, wala sia ginlubong sang mga tawo “sa lulubngan sang mga hari.”—2 Cron. 24:23-25. c

18. Suno sa Jeremias 17:7, 8, ano ang himuon naton para indi naton mailog si Jehoas?

¹⁸ Ano ang matun-an naton kay Jehoas? Daw pareho sia sa kahoy nga manabaw ang gamot kag ginatukuran lang para indi matumba. Si Jehoiada daw pareho sa tukod nga nagasuporta kay Jehoas. Gani sang napatay sia, amat-amat nga nadala si Jehoas sang mga apostata amo nga ginbiyaan niya si Jehova. Ginatudluan kita sini nga para mapakita naton ang kahadlok sa Dios, indi bastante nga magsalig lang kita sa maayo nga halimbawa sang aton pamilya kag sang mga kauturan. Para padayon kita nga mangin suod kay Jehova, dapat naton pabakuron ang aton gugma sa iya kag dapat naton panikasugan nga mapakita pirme ang maayo nga sahi sang kahadlok sa iya. Mahimo naton ini paagi sa regular nga pagtuon, pagpamalandong, kag pagpangamuyo.—Basaha ang Jeremias 17:7, 8; Col. 2:6, 7.

19. Ano ang gusto ni Jehova nga himuon naton?

¹⁹ Indi mabudlay ang gusto ni Jehova nga himuon naton. Mabasa naton sa Manugwali 12:13 ang gusto niya nga himuon naton. Nagasiling ini: “Kahadluki ang matuod nga Dios kag tumana ang iya mga sugo, kay amo ini ang bug-os nga katungdanan sang tawo.” Kon may kahadlok kita sa Dios, pareho kay Obadias kag kay Jehoiada, makapabilin kita nga matutom kay Jehova bisan ano pa ang maeksperiensiahan naton sa ulihi. Sigurado nga wala gid sing may makaguba sang aton kaangtanan kay Jehova.