1. Ano ang nagabulig sa katawhan ni Jehova para padayon nila sia nga masimba bisan pa may mga problema sila?

 ANG Biblia nagasiling nga ari na kita sa “makahalanguyos nga mga tion nga mabudlay atubangon.” (2 Tim. 3:1) Magluwas sa mga problema nga ginabatas sang tanan nga tawo sa sini nga sistema, dapat man batason sang katawhan ni Jehova ang mga pagpamatok kag paghingabot. Ano ang nagabulig sa aton para padayon naton nga masimba si Jehova bisan pa sa sini nga mga problema? Ari ang isa ka panguna nga rason: Nakilala naton si Jehova bilang “ang buhi nga Dios.”​—Jer. 10:10; 2 Tim. 1:12.

2. Ano ang nabal-an naton parte kay Jehova bilang ang buhi nga Dios?

² Isa ka matuod nga Persona si Jehova. Kabalo sia kon ano ang aton mga problema kag gusto gid niya nga buligan kita. (2 Cron. 16:9; Sal. 23:4) Kon tamdon naton sia bilang ang buhi nga Dios, makabulig ini sa aton nga masarangan ang bisan ano nga problema. Binagbinagon naton kon paano ini nakabulig kay Hari David.

3. Ano ang buot silingon ni David sang nagsiling sia nga “buhi si Jehova”?

³ Kilala ni David si Jehova kag nagsalig sia sa Iya. Sang gusto patyon si David sang iya mga kaaway, pati na sang iya kaaway nga si Hari Saul, nangamuyo si David kay Jehova para buligan sia. (Sal. 18:6) Ginsabat sang Dios ang iya pangamuyo kag ginluwas Niya sia. Pagkatapos sini, nagsiling si David: “Buhi si Jehova!” (Sal. 18:46) Ginapahangop ni David nga indi lang parte sa pagluntad sang Dios ang iya ginapatihan. Ang isa ka libro nagsiling nga ginpabutyag ni David ang iya pagsalig nga si Jehova amo “ang buhi nga Dios nga pirme nagabulig sa iya katawhan.” Huo, naeksperiensiahan mismo ni David nga buhi ang iya Dios. Gani napalig-on si David nga padayon nga alagaron kag dayawon si Jehova.​—Sal. 18:​28, 29, 49.

4. Ano ang benepisyo kon ginatamod naton si Jehova bilang ang buhi nga Dios?

⁴ Kon kumbinsido kita nga si Jehova amo ang buhi nga Dios,  makabulig ini sa aton nga mangin mapisan sa aton pag-alagad sa iya. Makahatag ini sa aton sang kabakod para mabatas naton ang mga problema, kag magapalig-on ini sa aton nga padayon nga mag-alagad sa iya sa bug-os naton nga masarangan. Palig-unon man kita sini nga magpabilin nga suod kay Jehova.

PABAKURON KA SANG BUHI NGA DIOS

5. Ano ang magapabakod sa aton kon may problema kita? (Filipos 4:13)

⁵ Gamay man ukon daku ang aton problema, masarangan naton ini nga batason kon dumdumon naton nga buhi si Jehova kag buligan niya kita. Ano man ang aton problema, gamay lang ini kon ikumparar sa aton Dios. Sia ang Labing Gamhanan, kag hatagan niya kita sang kusog para makabatas kita. (Basaha ang Filipos 4:13.) Nagapabakod ini sa aton kon may problema kita. Kon maeksperiensiahan naton ang bulig ni Jehova sa gamay nga mga problema, magapabakod ini sang aton pagsalig nga buligan man niya kita sa daku nga mga problema.

6. Ano ang mga naeksperiensiahan ni David sang pamatan-on sia nga nagpabakod pa gid sang iya pagsalig kay Jehova?

⁶ Binagbinaga ang duha ka eksperiensia ni David nga nagpabakod pa gid sang iya pagsalig kay Jehova. Sang pamatan-on si David, ginabantayan niya ang mga karnero sang iya amay. May tion sadto nga gintaban sang isa ka oso ang isa nila ka karnero, kag may tion man nga isa naman ka leon ang nagtaban sang isa nila ka karnero. Sa sining duha ka hitabo, maisog nga ginlagas ni David ini nga mga sapat kag ginluwas niya ang mga karnero. Pero, wala nagsiling si David nga nahimo niya ini sa iya kaugalingon nga kusog. Kabalo sia nga ginbuligan sia ni Jehova. (1 Sam. 17:​34-37) Wala gid nalipatan ni David ini nga mga eksperiensia. Ginpamalandungan niya ini, gani nagbakod ang iya pagsalig nga buligan gid sia sang buhi nga Dios bisan ano pa ang maeksperiensiahan niya sa palaabuton.

7. Paano nakabulig kay David ang husto nga pagtamod sang nagpakig-away sia kay Goliat?

⁷ Sang ulihi, nagkadto si David sa kampo sang mga soldado sang Israel. Posible nga isa sia gihapon ka tin-edyer sadto. Nakita niya nga nahadlok ang mga soldado sa higante nga Filistinhon nga si Goliat bangod ‘ginyaguta ni Goliat ang mga soldado sang Israel.’ (1 Sam. 17:​10, 11, footnote) Nahadlok ang mga soldado bangod nagpokus sila sa kadakuon ni Goliat kag sa iya mga pangyaguta. (1 Sam. 17:​24, 25) Pero, husto ang pagtamod ni David sa sitwasyon. Sang ginyaguta ni Goliat ang mga soldado sang Israel, gintamod ini ni David nga isa ka pagyaguta sa “kasuldadusan sang buhi nga Dios.” (1 Sam. 17:26) Si Jehova ang ginahunahuna ni David. Mabakod ang pagsalig ni David nga buligan gid sia sang Dios nga nagbulig sa iya sang nagabantay sia sang mga karnero. Gani nagpakig-away sia kay Goliat, kag napierde niya si Goliat.​—1 Sam. 17:​45-51.

8. Paano naton mapabakod ang aton pagsalig nga buligan gid kita ni Jehova kon may problema kita? (Tan-awa man ang piktyur.)

⁸ Kon dumdumon naton nga handa gid pirme ang buhi nga Dios sa pagbulig sa aton, masarangan man naton ang aton mga problema. (Sal. 118:6) Mapabakod naton ang aton pagsalig sa iya paagi sa pagpamalandong sa mga ginhimo niya sang una. Basaha ang mga kasaysayan sa Biblia parte sa kon paano ginluwas ni Jehova ang iya mga alagad. (Isa. 37:​17, 33-37) Basaha man ukon tan-awa ang mga report sa aton website nga jw.org. Ginapakita sini kon paano ginbuligan ni Jehova ang aton mga kauturan sa aton tion subong. Dumduma man ang mga tion nga ginbuligan ka ni Jehova. Ano abi kon wala ka sing tumalagsahon nga eksperiensia pareho sang pagpatay sa isa ka oso ukon leon? Posible mahunahuna mo nga wala sing may ginhimo si Jehova nga dalayawon nga butang para sa imo. Pero ang matuod, madamo na sing ginhimo si  Jehova para sa imo. Halimbawa, ginbuyok ka niya para mangin abyan mo sia. (Juan 6:44) Kag padayon ka nga nagaalagad sa iya asta subong. Nangin posible lang ini bangod ginabuligan ka niya. Gani, pangabaya si Jehova nga buligan ka nga madumduman ang mga tion nga ginsabat niya ang imo mga pangamuyo, ang mga tion nga tayming gid ang pagbulig niya sa imo, ukon ang mga tion nga ginbuligan ka niya sa mabudlay nga sitwasyon. Kon pamalandungan mo ini nga mga eksperiensia, magabakod ang imo pagsalig nga buligan ka gid pirme ni Jehova.

9. Paano naton dapat tamdon ang aton mga problema? (Hulubaton 27:11)

⁹ Kon kumbinsido kita nga si Jehova isa ka buhi nga Persona, mangin husto ang aton pagtamod sa aton mga problema. Paano? Kay man, tamdon naton ang aton mga problema nga bahin lang sang mas daku nga isyu. Parte ini sa ginsiling ni Satanas nga Yawa nga kon makaeksperiensia kita sang mga kabudlayan, bayaan naton si Jehova. (Job 1:​10, 11; basaha ang Hulubaton 27:11.) Gani kon padayon kita nga mangin matutom kay Jehova bisan pa may mga problema kita, ginapakita naton nga palangga naton sia kag ginapamatud-an naton nga butigon ang Yawa. Ginapamatukan bala sang gobierno sa inyo pungsod ang aton hilikuton, nagapamigado ka bala, indi bala interesado sa maayong balita ang mga tawo sa inyo teritoryo, ukon nagaantos ka bala bangod sa iban pa nga mga problema? Kon amo sini ang imo sitwasyon, dumduma nga nagahatag ini sa imo sing kahigayunan nga mapasadya ang tagipusuon ni Jehova. Dumduma man nga indi gid sia magtugot nga makaeksperiensia ka sang mga problema nga indi mo masarangan. (1 Cor. 10:13) Hatagan ka gid niya sang kusog para makabatas ka.

PADYAAN KA SANG BUHI NGA DIOS

10. Ano ang himuon sang buhi nga Dios para sa mga nagasimba sa iya?

¹⁰ Ginapadyaan ni Jehova ang mga nagasimba sa iya. (Heb. 11:6) Subong, ginahatagan niya kita sang malinong nga hunahuna kag ginabuligan niya kita nga mangin kontento. Kag sa palaabuton, hatagan niya kita sang kabuhi nga wala sing katapusan. Makasalig kita nga padyaan gid  kita ni Jehova kay gusto gid niya nga himuon ini kag may gahom sia nga himuon ini. Bangod sini, gusto gid naton nga mangin masako sa aton pagsimba sa iya, pareho sa ginhimo sang iya matutom nga mga alagad sang una. Ang isa ka halimbawa sa sini amo si Timoteo.​—Heb. 6:​10-12.

11. Ngaa nagpangabudlay gid si Timoteo para sa kongregasyon? (1 Timoteo 4:10)

¹¹ Basaha ang 1 Timoteo 4:10. Mabakod ang pagtuo ni Timoteo sa buhi nga Dios nga padyaan gid Niya sia. Gani nagpangabudlay sia para kay Jehova kag para sa iban. Ano ang ginhimo ni Timoteo? Ginpalig-on sia ni apostol Pablo nga mangin maayo nga manunudlo sa ministeryo kag sa kongregasyon. Ginpalig-on man sia ni Pablo nga mangin maayo nga halimbawa sa tanan nga kauturan, bata man ukon tigulang. Ginhatagan man sia sang mabudlay nga mga asaynment, pareho sang paghatag sing prangka pero mahigugmaon nga laygay. (1 Tim. 4:​11-16; 2 Tim. 4:​1-5) Posible may mga tion nga wala natalupangdan sang iban ang mga ginhimo ni Timoteo ukon wala nila sia napasalamatan, pero sigurado si Timoteo nga padyaan sia ni Jehova.​—Roma 2:​6, 7.

12. Ano ang nagapalig-on sa mga gulang nga mangin masako sa ila hilikuton? (Tan-awa man ang piktyur.)

¹² Subong, makasigurado man ang mga gulang nga nakita ni Jehova ang ila mga ginahimo kag ginapabaloran niya ini. Magluwas sa pag-shepherding, pagtudlo, kag pagbantala, madamo nga mga gulang ang nagabulig man sa mga construction project kag sa mga ginahimo sang organisasyon para sa mga nahalitan sang kalamidad. May mga gulang man nga miembro sang Patient Visitation Group ukon sang Hospital Liaison Committee. Kabalo ini nga mga gulang nga indi tawo ang nagapanag-iya sang kongregasyon, kundi si Jehova mismo. Gani ginahimo nila ang ila mga asaynment sa bug-os nila nga masarangan, kag bug-os ang ila pagsalig nga padyaan gid sila sang Dios.​—Col. 3:​23, 24.

13. Ano ang ginabatyag ni Jehova sa aton mga ginahimo para sa iya?

¹³ Indi posible nga mangin gulang kita tanan. Pero may mahatag kita tanan para kay Jehova.  Nalipay gid ang aton Dios kon ginahimo naton ang aton pinakamaayo sa aton pag-alagad sa iya. Nakita niya kon nagahatag kita sang donasyon para sa aton bug-os kalibutan nga hilikuton bisan pa gamay lang ini. Nalipay sia kon nagabayaw kita sa aton mga miting para magkomento bisan pa mahuluy-on kita. Kag nalipay sia kon ginapalampas naton ang sala sang iban kag ginapatawad sila. Bisan pa pamatyag mo kulang ang imo mga ginahimo para kay Jehova, makasalig ka nga ginapabaloran niya ini. Palangga ka niya bangod sa imo mga ginahimo suno sa imo masarangan, kag padyaan ka niya.​—Luc. 21:​1-4.

MAGPABILIN NGA SUOD SA BUHI NGA DIOS

14. Kon nagapabilin kita nga suod kay Jehova, paano ini makabulig sa aton nga padayon nga mangin matutom sa iya? (Tan-awa man ang piktyur.)

¹⁴ Kon matuod sa aton si Jehova, indi kita mabudlayan nga magpadayon nga mangin matutom sa iya. Naeksperiensiahan ini ni Jose. Malig-on niya nga ginpangindian ang paghimo sang imoralidad. Matuod sa iya ang Dios, kag indi niya gusto nga masubuan Sia. (Gen. 39:9) Para mangin matuod sa aton si Jehova, dapat kita magpain sang tion para magpangamuyo sa iya kag magtuon sang iya Pulong. Kon himuon naton ini, magabakod ang aton pagpakig-abyan sa iya. Kag kon suod ang aton kaangtanan kay Jehova pareho kay Jose, indi gid kita maghimo sang bisan ano nga makapasubo sa Iya.​—Sant. 4:8.

15. Ano ang matun-an naton sa natabo sa mga Israelinhon sang ara sila sa kamingawan? (Hebreo 3:12)

¹⁵ Kon kalimtan naton nga si Jehova ang buhi nga Dios, mahapos lang mangin indi matutom sa iya. Binagbinaga ang natabo sa mga Israelinhon sang ara sila sa kamingawan. Nagapati sila nga nagaluntad si Jehova, pero nagduhaduha sila kon bala hatagan gid man niya sila sang ila mga kinahanglanon. Namangkot pa gani sila: “Yara bala si Jehova sa tunga naton ukon wala?” (Ex. 17:​2, 7) Bangod sini, nagrebelde sila sa Dios. Sigurado gid nga indi naton gusto ilugon ang ila indi maayo nga halimbawa kay isa ini ka paandam para sa aton.​—Basaha ang Hebreo 3:12.

16. Ano ang posible magtilaw sa aton pagtuo?

 ¹⁶ Ginapabudlayan kita sang kalibutan nga magpabilin nga suod kay Jehova. Madamo ang wala nagapati nga may Dios. Sa masami, daw maayo pa ang kabuhi sang mga wala nagatuman sa mga kasuguan sang Dios. Kon makita naton ini, posible matilawan ang aton pagtuo. Paano? Bisan pa nagapati kita nga may Dios, posible magduhaduha kita kon bala buligan gid niya kita. May tion nga nabatyagan ini sang manunulat sang Salmo 73. Nakita niya nga daw mas malipayon pa ang mga tawo nga wala nagatuman sa mga kasuguan sang Dios. Bangod sini, nahunahuna niya kon bala may pulos ang iya pag-alagad sa Dios.​—Sal. 73:​11-13.

17. Ano ang makabulig sa aton nga magpabilin nga suod kay Jehova?

¹⁷ Ano ang nakabulig sa salmista para mangin husto ang iya pagtamod? Ginpamalandungan niya kon ano ang matabo sa mga nag-untat sa pagdumdom kay Jehova. (Sal. 73:​18, 19, 27) Ginpamalandungan man niya kon ano ang mga benepisyo sang pag-alagad sa Dios. (Sal. 73:24) Puede man naton pamalandungan ang mga pagpakamaayo nga ginhatag sa aton ni Jehova. Dayon imadyinon naton kon ano ayhan ang aton kabuhi subong kon wala kita nagaalagad kay Jehova. Kon pamalandungan naton ini, makabulig ini sa aton nga padayon nga mangin matutom kay Jehova. Kag pareho sa salmista, makasiling man kita: “Para sa akon, maayo nga magpalapit sa Dios.”​—Sal. 73:28.

18. Ngaa indi kita dapat mahadlok sa matabo sa palaabuton?

¹⁸ Bangod ‘nagapaulipon kita sa buhi kag matuod nga Dios,’ masarangan naton ang bisan ano nga kabudlayan sa sining katapusan nga mga adlaw. (1 Tes. 1:9) Isa ka matuod nga Persona ang aton Dios kag handa gid sia pirme sa pagbulig sa aton. Ginbuligan niya ang iya mga alagad sang una, kag ginabuligan man niya kita subong. Sa indi na lang gid madugay, maeksperiensiahan na naton ang pinakamabudlay nga kahimtangan. Pero indi kita mag-isahanon sa sina nga tion kay kaupod naton si Jehova. (Isa. 41:10) Kabay pa nga “makasiling kita [tanan] nga may pagsalig: ‘Si Jehova ang akon manugbulig; indi ako magkahadlok.’”—Heb. 13:​5, 6.