1-2. Ano ang pangagda ni Jehova sa iya matutom nga mga alagad?

 ANO ang pagkabig mo kay Jehova sa imo kabuhi? Posible magsiling ka, ‘Si Jehova ang akon Amay, akon Dios, kag akon Abyan.’ Magluwas sa sini, posible may mapensaran ka pa gid nga iban pa nga mga tinaga nga nagalaragway man kay Jehova. Pero, ginakabig mo man bala sia bilang imo Host ukon ang isa nga nag-agda sa imo bilang iya bisita?

² Ginkumparar ni Hari David si Jehova sa isa ka host kag ang Iya matutom nga mga alagad bilang Iya mga bisita. Namangkot si David: “O Jehova, sin-o ang makaduaw sa imo tolda? Sin-o ang makaistar sa imo balaan nga bukid?” (Sal. 15:1) Matun-an naton sa sini nga teksto nga puede kita mangin bisita ni Jehova sa iya tolda ukon mangin abyan niya. Indi bala nga isa gid ka daku nga kadungganan nga maagda ni Jehova bilang iya bisita?

GUSTO NI JEHOVA NGA MANGIN BISITA NIYA KITA

3. Sin-o ang pinakauna nga bisita ni Jehova, kag ano ang nabatyagan ni Jehova kag sang iya bisita?

³ Antes nagpanuga si Jehova, nagaisahanon lang sia. Pero sang gintuga niya ang iya panganay nga Anak, daw nangin pareho sia sa isa ka Host nga nag-agda sang iya pinakauna nga bisita sa iya tolda. Nalipay gid si Jehova nga mangin isa ka Host. Ang Biblia nagasiling nga ‘nalipay gid’ si Jehova sa iya Anak. Kag sa bahin naman sang iya pinakauna nga bisita, ‘nalipay sia pirme sa atubangan ni Jehova.’—Hulu. 8:30.

4. Sin-o pa ang mga gin-agda ni Jehova sang ulihi nga mangin bisita sa iya tolda?

⁴ Dayon gintuga ni Jehova ang mga anghel, kag gin-agda man niya sila bilang iya mga bisita. Ginatawag sang Biblia ang mga  anghel bilang mga “anak sang Dios,” kag nagsiling man ini nga nalipay sila nga kaupod nila si Jehova. (Job 38:7; Dan. 7:10) Sa sulod sang madamo nga tinuig, ang mga kaupod sang Dios sa langit amo lang ang iya mga bisita. Sang ulihi, ginlakip niya ang mga tawo sa mga puede niya mangin bisita. Ang pila sa nangin bisita niya amo si Enoc, si Noe, si Abraham, kag si Job. Ginapakita sang Biblia nga abyan sila ni Jehova bangod gintuman nila sia, ukon naglakat sila “upod ang matuod nga Dios.”​—Gen. 5:24; 6:9; Job 29:4; Isa. 41:8.

5. Ano ang matun-an naton sa tagna nga mabasa sa Ezequiel 37:​26, 27?

⁵ Sa sulod sang madamo nga tinuig, padayon nga ginaagda ni Jehova ang iya mga abyan nga mangin bisita niya. (Basaha ang Ezequiel 37:​26, 27.) Halimbawa, matun-an naton sa tagna ni Ezequiel nga gusto gid ni Jehova nga mangin suod sa iya ang matutom niya nga mga alagad. Nagapromisa sia nga magahimo sia sing “katipan sang paghidait sa ila.” Ini nga tagna nagapatuhoy sa tion nga magahiusa ang mga may paglaum nga mabuhi sa langit kag ang mga may paglaum nga mabuhi sa duta. Magahiusa sila sa malaragwayon nga tolda ni Jehova bilang “isa ka panong.” (Juan 10:16) Nagakatuman na subong ini nga tagna.

GINAATIPAN KITA SANG DIOS BISAN DIIN MAN KITA SA KALIBUTAN

6. Paano mangin bisita sa tolda ni Jehova ang isa ka tawo, kag diin makita ang Iya tolda?

⁶ Sang panahon sang Biblia, ang tolda amo ang ginagamit sang mga tawo nga palahuwayan kag para maamligan sila. Kon may bisita ang isa ka tawo sa iya tolda, ginapaabot sang iya bisita nga atipanon sia sing maayo. Sang gindedikar naton ang aton kaugalingon kay Jehova, nangin bisita niya kita sa iya tolda. (Sal. 61:4) Nagabaton kita sang bugana nga espirituwal nga pagkaon, kag nangin abyan naton ang iban pa nga bisita ni Jehova. Pero sa isa lang bala ka lugar makita ang iya tolda? Indi. Kon nakakadto ka na sa iban nga pungsod para mag-attend sa isa ka espesyal nga kombension, sigurado gid nga madamo ka sing nakilala nga mga kauturan. Nalipay man sila nga nangin bisita sila sa tolda sang Dios. Gani kon matutom kita nga nagaalagad kay Jehova, puede niya kita mangin bisita sa iya tolda bisan diin man kita sa kalibutan.​—Bug. 21:3.

7. Ngaa masiling naton nga bisita gihapon ni Jehova sa iya tolda ang matutom niya nga mga alagad nga napatay na? (Tan-awa man ang piktyur.)

⁷ Bisita bala gihapon ni Jehova sa iya tolda ang matutom niya nga mga alagad nga napatay  na? Huo. Ngaa masiling naton ini? Bangod buhi sila sa memorya ni Jehova. Nagsiling si Jesus: “Bisan gani si Moises, sang ginsaysay niya ang tuhoy sa tunukon nga kahoykahoy, nagpamatuod nga ang mga patay banhawon sang gintawag niya si Jehova nga ‘Dios ni Abraham kag Dios ni Isaac kag Dios ni Jacob.’ Dios sia sang mga buhi, kag indi sang mga patay, kay para sa iya buhi sila tanan.”​—Luc. 20:​37, 38.

ANG ATON MGA PAGPAKAMAAYO KAG ANG ATON MGA RESPONSIBILIDAD

8. Ano ang mga pagpakamaayo kay ara kita sa tolda ni Jehova?

⁸ Pareho sa isa ka literal nga tolda nga puede mangin palahuwayan kag pangamlig, ginaamligan man sang tolda ni Jehova ang iya mga bisita para indi maguba ang ila kaangtanan sa iya kag para hatagan sila sing paglaum. Kon magpabilin kita nga suod kay Jehova, limitado lang ang halit nga mahimo ni Satanas sa aton. (Sal. 31:23; 1 Juan 3:8) Sa bag-ong kalibutan, padayon nga amligan ni Jehova ang iya matutom nga mga abyan. Amligan niya sila para indi maguba ang ila kaangtanan sa iya, kag amligan man niya sila sa kamatayon.​—Bug. 21:4.

9. Ano ang ginapaabot ni Jehova sa iya mga bisita?

⁹ Isa gid ka daku nga kadungganan nga mangin bisita sa tolda ni Jehova. Puede kita mangin suod sa iya nga posible magpadayon asta sa wala sing katapusan. Ano ang dapat naton himuon para padayon kita nga mangin bisita niya? Kon gin-agda ka sa isa ka balay, sigurado gid nga gusto mo nga mangin isa ka maayo nga bisita. Halimbawa, kon ginsilingan ka sang tagbalay nga ubahon mo ang imo sapatos antes ka magsulod, sigurado gid nga tumanon mo sia. Sing kaanggid, kon gusto naton nga padayon nga mangin bisita ni Jehova sa iya tolda, sigurado gid nga tumanon naton ang iya mga ginapatuman. Bangod palangga naton si Jehova, ginahimo naton ang aton bug-os nga masarangan para “pahamut-an sia sing bug-os.” (Col. 1:10) Matuod gid man nga Abyan naton si Jehova. Pero, indi gid naton dapat pagkalimtan nga sia man ang aton Dios kag Amay nga dapat naton tahuron. (Sal. 25:14) Gani dapat naton pirme ipakita ang aton tudok nga pagtahod sa iya. Kon may tudok kita nga pagtahod, malikawan naton nga maghimo sang mga butang nga makapaakig sa iya. Sigurado gid nga gusto naton nga ‘maglakat sing maugdang’ upod sa aton Dios.​—Miq. 6:8.

WALA SING GINPASULABI SI JEHOVA SA MGA ISRAELINHON SA KAMINGAWAN

10-11. Ano nga halimbawa ang binagbinagon naton nga nagapakita nga wala sing ginapasulabi si Jehova?

¹⁰ Wala sing ginapasulabi si Jehova sa iya mga bisita. (Roma 2:11) Makita naton ini sa iya pagtratar sa mga Israelinhon sang ara sila sa kamingawan sang Sinai.

¹¹ Pagkatapos ginluwas ni Jehova ang iya katawhan nga nabihag sa Egipto, nagtangdo sia sang mga saserdote para mag-alagad sa tabernakulo. Dayon gin-asayn niya sa mga Levinhon ang iban pa nga mga hilikuton sa tabernakulo. Mas maayo bala ang pag-atipan ni Jehova sa mga nagaalagad sa tabernakulo ukon sa mga nagaistar malapit sa sini sangsa iban nga mga Israelinhon? Indi. Kay man, wala sing ginapasulabi si Jehova.

12. Ano ang ginhimo ni Jehova nga nagapakita nga wala sia sing ginpasulabi sa mga Israelinhon? (Exodo 40:38) (Tan-awa man ang piktyur.)

¹² Puede mangin suod nga abyan ni Jehova ang tanan nga Israelinhon. Posible ini bisan sa mga wala nagaalagad sa tabernakulo ukon bisan sa mga nagaistar malayo sa sini. Halimbawa, ginsigurado ni Jehova nga makita sang bilog nga pungsod ang haligi nga panganod  kag haligi nga kalayo sa ibabaw sang tabernakulo. (Basaha ang Exodo 40:38.) Kon magpaibabaw ang panganod para magsaylo sa lain nga lugar, makita ini bisan sang mga ara sa pinakamalayo nga bahin sang kampo halin sa tabernakulo. Gani ginaimpake nila dayon ang ila mga pagkabutang, ginabungkag nila ang tolda sang ila pamilya, kag nagalakat sila upod ang iban pa nga Israelinhon. (Num. 9:​15-23) Mabatian man sang tanan ang mabaskog nga tunog sang duha ka trumpeta nga pilak nga nagapabalo sa ila nga masaylo na sila sang kampo. (Num. 10:2) Gani kon nagaistar malapit sa tabernakulo ang isa ka Israelinhon, indi buot silingon sini nga mas suod sia kay Jehova kon ikumparar sa iban nga Israelinhon. Kay man, puede mangin bisita ni Jehova ang tanan nga Israelinhon. Makasalig ang kada isa sa ila nga giyahan niya sila kag amligan. Subong, makasalig man kita nga bisan diin man kita nagaistar sa kalibutan, palangga kita ni Jehova, atipanon niya kita, kag amligan niya kita.

MGA HALIMBAWA SUBONG NGA WALA SING GINAPASULABI SI JEHOVA

13. Ngaa masiling naton nga wala sing ginapasulabi si Jehova subong?

¹³ Subong, may katawhan ang Dios nga nagaistar malapit sa world headquarters ukon sa branch office sang mga Saksi ni Jehova. May iban pa gani nga nagaalagad gid mismo sa sini nga mga pasilidad. Gani, makabulig sila sa madamo nga hilikuton sa sini nga mga pasilidad kag makaupod nila ang nagapanguna nga mga utod. May iban naman nga nagaalagad bilang mga traveling overseer ukon sa lainlain nga klase sang special full-time nga pag-alagad. Pero indi amo sini ang sitwasyon sang kalabanan nga mga kauturan kag indi tanan may amo sini nga mga pribilehiyo. Kon isa ikaw sa sini nga mga kauturan, makasalig ka nga palangga kita tanan ni Jehova bilang iya mga bisita. Kag ginaatipan gid niya ang kada isa sa aton. (1 Ped. 5:7) Ginahatagan ni Jehova sang espirituwal nga pagkaon ang tanan niya nga alagad, ginagiyahan niya sila, kag ginaamligan.

14. Ano ang isa pa ka halimbawa nga nagapakita nga wala sing ginapasulabi si Jehova?

 ¹⁴ Ari ang isa pa ka halimbawa nga nagapakita nga wala sing ginapasulabi si Jehova: Ginsigurado niya nga may mabasa nga Biblia ang mga tawo sa bilog nga kalibutan nga mahangpan nila. Ang Balaan nga Kasulatan orihinal nga ginsulat sa sining tatlo ka lenguahe: Hebreo, Aramaiko, kag Griego. Mas suod bala kay Jehova ang mga tawo nga kabalo magbasa sang Biblia sa orihinal nga mga lenguahe sangsa iban nga mga tawo? Indi.​—Mat. 11:25.

15. Ano ang pamatuod nga wala sing ginapasulabi si Jehova? (Tan-awa man ang piktyur.)

¹⁵ Ginaagda kita ni Jehova bilang iya mga bisita indi bangod may tinapusan kita ukon bangod kabalo kita magbasa sang Biblia sa orihinal nga mga lenguahe. Kay man, ginsigurado ni Jehova nga matun-an sang mga tawo sa bilog nga kalibutan ang parte sa iya kaalam. Gani may tinapusan man kita ukon wala, puede naton tanan tun-an ang parte sa kaalam ni Jehova. Na-translate na sa linibo ka lenguahe ang iya Pulong nga amo ang Biblia. Gani, makabulig sa mga tawo sa bilog nga kalibutan ang mga ginatudlo sini kag matun-an nila kon paano nila mangin abyan ang Dios.​—2 Tim. 3:​16, 17.

PANIKASUGI NGA ‘MAHAMUOT’ PIRME SA IMO SI JEHOVA

16. Suno sa Binuhatan 10:​34, 35, ano ang himuon naton para mahamuot pirme sa aton si Jehova?

¹⁶ Isa gid ka daku nga pribilehiyo nga mangin bisita sa tolda ni Jehova. Sia ang pinakamaayo, pinakamahigugmaon, kag pinakamaabiabihon nga Host. Wala man sia sing ginapasulabi kay ginaabiabi niya kita tanan. Ginahimo niya ini bisan diin man kita sa kalibutan, ano man ang aton gindak-an, ineskwelahan, rasa, tribo, edad, lalaki man kita ukon babayi. Pero siempre, ang mga nagatuman lang sang iya mga kasuguan ang ginabaton niya bilang iya mga bisita.​—Basaha ang Binuhatan 10:​34, 35.

17. Diin naton mabasa ang dugang nga impormasyon parte sa aton pribilehiyo bilang bisita sa tolda ni Jehova?

¹⁷ Suno sa Salmo 15:​1, namangkot si David: “O Jehova, sin-o ang makaduaw sa imo tolda? Sin-o ang makaistar sa imo balaan nga bukid?” Gintuytuyan ni Jehova si David sa pagsabat sa sini nga mga pamangkot, kag mabasa naton ini sa Salmo 15. Binagbinagon sa masunod nga artikulo ang pila sa mga dapat naton himuon para mahamuot pirme sa aton si Jehova.