1. Suno sa Salmo 18:​46, sa ano ginpaanggid ni David si Jehova?

 MAY mga tion nga gulpi lang kita makaeksperiensia sang mga problema nga makapabag-o gid sang aton kabuhi. Pero, nagapasalamat gid kita kay makapangayo kita sang bulig kay Jehova nga Dios. Sa nagligad nga artikulo, ginpahanumdom kita nga si Jehova ang buhi nga Dios kag handa gid sia pirme sa pagbulig sa aton. Sa kada tion nga ginabuligan niya kita, nagapabakod ini sa aton pagsalig nga “buhi si Jehova.” (Basaha ang Salmo 18:46.) Pero pagkatapos nagsiling si David nga buhi si Jehova, ginpaanggid niya si Jehova sa isa ka butang nga wala sing kabuhi. Gintawag niya si Jehova nga “akon Igang.” Ngaa?

2. Ano ang binagbinagon naton sa sini nga artikulo?

² Sa sini nga artikulo, binagbinagon naton kon ngaa gintawag si Jehova nga isa ka igang kag kon ano ang ginatudlo sini sa aton parte sa iya. Tun-an man naton kon paano naton sia mahimo bilang aton Igang. Kag binagbinagon naton kon paano naton mailog ang mga kinaiya ni Jehova nga mapaanggid sa isa ka igang.

KON NGAA GINTAWAG SI JEHOVA NGA ISA KA IGANG

3. Kon ginagamit sang mga alagad sang Dios sa Biblia ang tinaga nga “igang,” ano sa masami ang gusto nila himuon? (Tan-awa ang piktyur.)

³ Ginpaanggid sang Biblia si Jehova sa isa ka “igang” para buligan kita nga mahangpan ang pila sa iya mga kinaiya. Sa masami, kon gusto dayawon sang mga alagad sang Dios ang iya dalayawon nga mga kinaiya, mabasa naton sa Biblia nga ginatawag nila sia nga isa ka igang. Sa Deuteronomio 32:4 una nga gintawag si Jehova nga isa ka “Igang.” Sang nangamuyo si Hana, nagsiling sia nga “wala gid sing igang nga pareho sa aton Dios.” (1 Sam. 2:2) Gintawag ni Habacuc si Jehova nga “akon Igang.” (Hab. 1:12) Gintawag sang manunulat sang Salmo 73 ang Dios nga “igang sang akon tagipusuon.” (Sal. 73:26) Kag gintawag mismo ni Jehova ang iya kaugalingon nga isa ka igang. (Isa. 44:8) Binagbinagon naton ang tatlo ka kinaiya ni Jehova nga mapaanggid sa isa ka igang, kag tun-an  naton kon paano naton sia mahimo nga “aton Igang.”​—Deut. 32:31.

4. Ngaa masiling naton nga isa ka dalangpan si Jehova? (Salmo 94:22)

⁴ Dalangpan si Jehova. Kon may mabaskog nga bagyo, puede kita makapanago sa isa ka daku nga igang para maamligan kita. Sing kaanggid, ginaamligan kita ni Jehova kon makaeksperiensia kita sang mabudlay nga mga sitwasyon. (Basaha ang Salmo 94:22.) Ginabuligan niya kita nga maamligan ang aton kaangtanan sa iya. Ginapasalig man niya nga bisan pa mag-antos kita sa sining malain nga kalibutan, temporaryo lang ini. Kag nagapromisa sia nga dulaon niya ang tanan nga rason sang aton kabalaka kag pag-antos.​—Ezeq. 34:​25, 26.

5. Paano naton mahimo si Jehova nga aton Dalangpan pareho sa isa ka igang?

⁵ Ang isa ka paagi para mahimo naton si Jehova nga aton Dalangpan amo ang pagpangamuyo sa iya. Sa kada tion nga mangamuyo kita kay Jehova, hatagan niya kita sang “paghidait sang Dios” nga magaamlig sa aton tagipusuon kag hunahuna. (Fil. 4:​6, 7) Binagbinaga ang eksperiensia sang isa ka brother nga si Artem nga ginpriso bangod sa iya pagtuo. Madamo nga beses sia nga gin-interogar sang mapintas nga imbestigador. Ginpahog pa gani niya si Artem kag ginpakahuy-an. Nagsiling si Artem: “Kon ipatawag ako sang imbestigador grabe gid ang akon stress. . . . Pirme ako nagapangamuyo kay Jehova. Nagapangabay ako sing kalinong sa tagipusuon kag kaalam.” Nagsiling pa sia: “Wala ako nagkompromiso bisan ano pa ang himuon sang imbestigador. . . . Sa bulig ni Jehova, daw pareho lang nga nagasandig ako sa isa ka pader nga bato.”

6. Ngaa masaligan gid naton pirme si Jehova? (Isaias 26:​3, 4)

⁶ Masaligan si Jehova. Ang isa ka daku nga igang ukon bukid wala gid nagahalin sa puesto sini. Sing kaanggid, ara gid pirme si Jehova para buligan kita. Masaligan naton sia bangod sia “ang Igang sa wala sing katubtuban.” (Basaha ang Isaias 26:​3, 4.) Buhi sia ukon ara sia pirme para tumanon ang iya mga promisa, para pamatian ang aton mga pangamuyo, kag para buligan kita. Masaligan man naton si Jehova bangod mainunungon sia sa mga nagaalagad sa iya. (2 Sam. 22:26) Indi gid niya pagkalimtan ang aton mga ginahimo para sa iya, kag padyaan gid niya kita.​—Heb. 6:10; 11:6.

7. Ano ang maeksperiensiahan naton kon magsalig kita kay Jehova? (Tan-awa man ang piktyur.)

⁷ Ginahimo naton si Jehova nga aton Igang kon nagasalig kita sing bug-os sa iya. Nagasalig kita nga kon ginatuman naton sia bisan sa mabudlay nga mga sitwasyon, para gid ini sa aton kaayuhan. (Isa. 48:​17, 18) Sa kada tion nga maeksperiensiahan naton ang bulig ni Jehova, mas nagabakod pa gid ang aton pagsalig sa iya. Bangod sini, mangin kumbinsido pa gid kita nga si Jehova lang ang makabulig sa aton nga mabatas ang bisan ano nga pagtilaw. Sa mga sitwasyon nga pamatyag naton wala na kita sing mapangayuan sang bulig, marealisar naton nga masaligan gid naton pirme si Jehova. Binagbinaga ang eksperiensia sang isa ka brother nga si Vladimir. Nagsiling sia: “Mas nangin suod ako sa Dios sang napriso ako. Mas nagsalig pa gid ako kay Jehova bangod nagaisahanon lang ako kag wala ako sing kontrol sa akon sitwasyon.”

8. (a) Ngaa masiling naton nga wala nagabag-o si Jehova? (b) Ano ang masaligan naton bangod ang Dios amo ang aton Igang? (Salmo 62:​6, 7)

 ⁸ Wala nagabag-o si Jehova. Pareho sa isa ka daku nga igang ukon bukid, wala nagabag-o si Jehova. Wala nagabag-o ang iya personalidad kag ang iya katuyuan. (Mal. 3:6) Sang nagrebelde sanday Adan kag Eva kay Jehova sa Eden, wala ginbag-o ni Jehova ang iya katuyuan para sa mga tawo. Nagsiling si apostol Pablo nga ‘indi mapanghiwala ni Jehova ang iya kaugalingon.’ (2 Tim. 2:13) Ginapahangop sini nga ano man ang matabo ukon bisan ano pa ang himuon sang iban, indi gid pagbag-uhon ni Jehova ang iya mga kinaiya, ang iya katuyuan, ukon ang iya mga kasuguan. Bangod wala nagabag-o si Jehova, makasalig kita nga buligan gid niya kita sa mabudlay nga mga sitwasyon kag tumanon gid niya ang iya mga promisa.​—Basaha ang Salmo 62:​6, 7.

9. Ano ang natun-an mo sa eksperiensia ni Tatyana?

⁹ Kon pirme naton ginapamalandungan ang mga kinaiya ni Jehova kag kon pirme naton ginadumdom ang iya katuyuan, ginahimo naton si Jehova nga aton Igang. Makabulig ini sa aton nga mangin kalmado kag mangin mainunungon sa iya kon may mga problema kita. (Sal. 16:8) Naeksperiensiahan ini sang isa ka sister nga si Tatyana nga gin-house arrest bangod sa iya pagtuo. Nagsiling sia: “Pamatyag ko nagaisahanon na lang ako. . . . Ginbudlayan gid ako sang primero. Pirme ako naluyahan sing buot.” Pero sang ginpamalandungan niya ang parte kay Jehova kag sa iya katuyuan, narealisar niya nga importante gid nga batason niya ang iya sitwasyon. Bangod sini, nangin kalmado sia kag napalig-on sia nga magpabilin nga matutom. Nagsiling sia: “Ginhunahuna ko kon ngaa natabo ini sa akon kag nakabulig ini sa akon nga madumduman nga amo sini ang akon sitwasyon kay palangga ko si Jehova kag gusto ko nga malipay sia sa akon. Bangod sina wala na nagaluya ang akon buot.”

10. Paano naton mahimo si Jehova nga aton Igang subong?

¹⁰ Sa indi na lang madugay, maeksperiensiahan naton ang mabudlay gid nga mga sitwasyon. Sa sina nga tion, dapat kita magsalig kay Jehova sing bug-os. Subong na ang tion para pabakuron naton ang aton pagsalig sa iya nga buligan gid niya kita nga mangin matutom sa iya. Paano naton ina mahimo? Basahon naton ang mga kasaysayan sa Biblia kag ang mga eksperiensia sang mga alagad ni Jehova sa aton tion subong. Dayon binagbinagon naton kon paano niya sila ginbuligan. Pamalandungan naton sing maayo ini nga mga kasaysayan kag mga eksperiensia. Kon himuon naton ini, ginahimo naton si Jehova nga aton Igang.

ILUGA ANG MGA KINAIYA NI JEHOVA NGA MAPAANGGID SA ISA KA IGANG

11. Ngaa gusto naton ilugon ang mga kinaiya ni Jehova nga mapaanggid sa isa ka igang? (Tan-awa man ang kahon nga “ Ang Puede Himuon sang Pamatan-on nga mga Brother.”)

¹¹ Ginbinagbinag naton kon paano ginapakita ni Jehova nga pareho sia sa isa ka igang. Binagbinagon naman naton kon paano naton mailog ang iya mga kinaiya. Kon panikasugan naton nga ipakita ini nga mga kinaiya, mas mapalig-on pa gid naton ang aton mga kauturan. Halimbawa, gintawag ni Jesus si Simon nga Cefas (gin-translate nga “Pedro”),  nga nagakahulugan sing “Isa ka Bato.” (Juan 1:42) Ginapahangop ni Jesus nga paumpawan kag palig-unon ni Pedro ang mga kauturan sa kongregasyon. Ginlaragway man ang mga gulang sa kongregasyon bilang “landong sang daku nga igang.” Buot silingon, ginaamligan nila ang ila mga kauturan. (Isa. 32:2) Pero siempre, puede naton tanan mapalig-on ang isa kag isa paagi sa pag-ilog sa mga kinaiya ni Jehova nga mapaanggid sa isa ka igang.​—Efe. 5:1.

12. Paano kita mangin isa ka dalangpan para sa iban?

¹² Mangin isa ka dalangpan. Kon naguba ang balay sang aton mga kauturan bangod sa kalamidad ukon kon kinahanglan nila magsaylo bangod sa inaway, basi puede naton sila mapadayon sa aton balay. Samtang nagalain pa gid ang sitwasyon sa sining “katapusan nga mga adlaw,” madamo kita sing kahigayunan nga buligan ang isa kag isa. (2 Tim. 3:1) Puede man naton paumpawan ang aton mga kauturan, kag ipabatyag naton sa ila nga palangga naton sila. Ang isa ka paagi para mahimo naton ini amo ang pag-istorya sa ila sa Kingdom Hall para palig-unon sila. Gusto naton nga mabatyagan nila ang gugma sa sulod sang kongregasyon. Madamo nga tawo subong ang mapintas kag wala nagapakita sang gugma. Bangod sini, madamo sa aton mga kauturan ang nagaka-stress. Gani kon mag-attend ang aton mga kauturan sa mga miting, gusto naton himuon ang aton bug-os nga masarangan para palig-unon sila kag para ipabatyag sa ila nga palangga naton sila.

13. Paano mangin isa ka dalangpan ang mga gulang para sa iban? (Tan-awa man ang piktyur.)

¹³ Kon may problema ang mga kauturan ukon nahalitan sila sang kalamidad, puede mangin isa ka dalangpan ang mga gulang para sa ila. Sa tion sang kalamidad ukon medikal nga emerhensia, may ginahimo dayon ang mga gulang para buligan ang ila mga kauturan. Ginapalig-on man nila ang mga kauturan paagi sa paggamit sang Biblia. Kon makita sang mga kauturan nga mabuot ang isa ka gulang, handa sia mamati, kag ginaintiende niya ang ila ginabatyag, indi sila matahap nga  magpalapit sa iya. Mabatyagan man nila nga ginapalangga sila sang gulang, gani mangin mahapos para sa ila nga iaplikar ang iya laygay nga nabase sa Biblia.​—1 Tes. 2:​7, 8, 11.

14. Paano naton mapakita nga masaligan kita?

¹⁴ Ipakita nga masaligan ka. Sa tion sang mabudlay nga mga sitwasyon, gusto naton nga mabatyagan sang mga kauturan nga masaligan nila ang aton bulig. (Hulu. 17:17) Paano naton mapakita sa mga kauturan nga masaligan nila kita? Panikasugan naton nga ilugon ang mga kinaiya ni Jehova kag ipakita naton ini pirme. Halimbawa, dapat naton tumanon ang aton mga promisa kag dapat naton panikasugan nga mag-abot sing temprano. (Mat. 5:37) Kag kon may nabal-an kita nga nagakinahanglan sang bulig, buligan naton sila. Dugang pa sa sini, dapat man naton tapuson ang aton mga asaynment sa kongregasyon base sa mga instruksion nga ginhatag sa aton.

15. Kon masaligan ang mga gulang, paano nagabenepisyo ang kongregasyon?

¹⁵ Kon masaligan sang mga kauturan ang mga gulang, paano nagabenepisyo ang kongregasyon? Kon may problema ang mga kauturan, nagahaganhagan ang ila kabalaka kon kabalo sila nga matawgan  nila dayon ang mga gulang pareho sang ila group overseer. Mabatyagan man sang mga kauturan nga palangga sila sang mga gulang kon kabalo sila nga handa sila nga buligan sang mga gulang. Kag kon ginabase sang mga gulang sa Biblia kag sa aton mga publikasyon ang ila mga laygay imbes nga sa ila opinyon, mas saligan sila sang mga kauturan. Kag kon wala ginasugid sang mga gulang ang personal nga mga butang parte sa mga kauturan kag kon ginatuman nila ang ila mga promisa, mas saligan pa gid sila sang mga kauturan.

16. Kon ginahimo naton pirme ang husto, paano kita nagabenepisyo kag ang iban?

¹⁶ Himua pirme ang husto. Kon ginahimo naton pirme ang husto kag kon ginabase naton sa Biblia ang aton mga desisyon, mangin maayo kita nga halimbawa para sa iban. Kon ginatun-an naton ang Biblia kag ginapabakod naton ang aton pagtuo, mangin mainunungon kita kay Jehova kag sa iya mga kasuguan. Indi man kita maimpluwensiahan sang butig nga mga panudlo kag sang panghunahuna sang kalibutan. (Efe. 4:14; Sant. 1:​6-8) Kag bangod nagatuo kita kay Jehova kag sa iya mga promisa, kalmado lang kita kon makabaton kita sang indi maayo nga balita. (Sal. 112:​7, 8) Bangod sini, makabulig kita sa aton mga kauturan nga may mga problema.​—1 Tes. 3:​2, 3.

17. Paano mapalig-on kag mapabakod sang mga gulang ang mga kauturan?

¹⁷ Ang mga gulang dapat kabalo magpugong sang ila kaugalingon, maligdong sing hunahuna, mahim-ong, kag organisado. Ginapalig-on nila ang iban kag ginapabakod nila ang kongregasyon paagi sa ‘pagpanguyapot sing malig-on sa matutom nga pulong.’ (Tito 1:9; 1 Tim. 3:​1-3) Paagi sa ila halimbawa kag pag-shepherding, ginabuligan sang mga gulang ang mga kauturan nga mangin regular sa pag-attend sa mga miting, sa pagbantala, kag sa personal nga pagtuon. Kon nabalaka ang mga kauturan bangod sa ila mga problema, ginapalig-on sila sang mga gulang nga magsalig kay Jehova kag magpokus sa iya mga promisa.

18. Ngaa gusto naton nga dayawon si Jehova kag mangin suod pa gid sa iya? (Tan-awa man ang kahon nga “ Isa ka Paagi Para Mangin Suod Pa Gid kay Jehova.”)

¹⁸ Pagkatapos naton mabinagbinag ang dalayawon nga mga kinaiya ni Jehova, masiling man naton ang ginsiling ni Hari David: “Kabay nga dayawon si Jehova nga akon Igang.” (Sal. 144:1) Masaligan gid naton pirme si Jehova. Bisan pa magtigulang na kita, makasalig kita nga padayon niya kita nga buligan nga makapabilin nga suod sa iya. Gani may rason gid kita nga magsiling: “Sia ang akon Igang.”​—Sal. 92:​14, 15.