Kinahanglan may pagtuo kita para malipay sa aton si Jehova. Pero, nagsiling ang Biblia nga “indi tanan nga tawo may pagtuo.” (2 Tes. 3:2) Sang ginhambal ini ni apostol Pablo, ginapatuhuyan niya ang mga nagahingabot sa iya nga “makahalalit kag malaut nga mga tawo.” Pero puede man sini patuhuyan ang iban pa nga mga tawo. Halimbawa, may pila ka tawo nga wala nagapati sa maathag nga pamatuod nga may ara sang Dios nga nagtuga sang tanan nga butang. (Roma 1:20) Posible nagatuo ang iban nga may ara gid man sang Dios. Pero indi bastante ini nga pagtuo para malipay si Jehova.

Dapat kumbinsido kita nga matuod si Jehova kag “nagapadya” sia sa mga tawo nga may mabakod nga pagtuo sa iya. (Heb. 11:6) Para mapakita naton ini nga klase sang pagtuo, kinahanglan naton ang balaan nga espiritu sang Dios. Para mabaton naton ang balaan nga espiritu, dapat naton ini ipangamuyo kay Jehova. (Luc. 11:​9, 10, 13) Ang isa pa ka importante nga paagi para mabaton naton ang balaan nga espiritu amo ang pagbasa sang Pulong sang Dios. Dayon, pamalandungan naton ang aton ginbasa kag tinguhaan naton nga iaplikar ang aton natun-an. Kon himuon naton ini, nagapagiya kita sa espiritu ni Jehova. Paagi sa sini, mapakita naton sa aton kabuhi ang klase sang pagtuo nga nagapahalipay sa iya.