1, 2. (a) Ano nga karatula ang nakaluwas sang madamo nga kabuhi? (Tan-awa ang piktyur sa umpisa sini nga artikulo.) (b) Ano nga panuytoy sa katawhan sang Dios ang makaluwas sa ila?

“STOP, LOOK, LISTEN.” (Magdulog, magtan-aw, magpamati.) Amo ini ang mga tinaga nga nakaluwas sang madamo nga kabuhi. Masobra 100 ka tuig ang nagligad, ang dalagku nga karatula nga may amo sini nga mga tinaga ginbutang sa mga krosing nga ginaagyan sang tren sa North America. Ngaa? Para indi magtabok ang mga salakyan sa riles kon may nagaagi nga tren kay mabungguan sila sini. Huo, ang pagtalupangod sadtong mga karatula nakaluwas sang madamo nga kabuhi.

² Pero mas maayo pa ang ginhimo ni Jehova sangsa pagbutang sang karatula nga nagapaandam. Daw nagatindog sia sa atubangan sang iya katawhan kag ginatudlo niya sila sa kabuhi nga wala sing katapusan, palayo sa mga katalagman. Pero labaw pa sa sini ang iya ginhimo. Nangin mahigugmaon pa sia nga manugbantay sa iya panong, nga nagatuytoy sa mga karnero kag nagapaandam sa ila para malikawan nila ang makatalagam nga mga alagyan.—Basaha ang Isaias 30:20, 21.

3. Ngaa nagakapatay ang tanan nga tawo?

³ Sa bug-os nga kasaysayan, nag-aman si Jehova sang espesipiko nga mga instruksion ukon mga panuytoy. Halimbawa, sa hardin sang Eden, maathag ang instruksion ni Jehova para sa mga tawo agod matigayon nila ang wala katapusan nga kabuhi kag kalipay. (Gen. 2:15-17) Kon gintuman kuntani nanday Adan kag Eva ang iya panuytoy, nalikawan kuntani nila ang makapasubo nga kahimtangan—kabuhi nga puno sang kasakit kag kamatayon nga wala sing paglaum. Pero sa baylo nga magtuman, ginsunod ni Eva ang laygay halin sa kubos nga sapat. Namati man si Adan sa tingog sang iya asawa, sa tingog sang isa ka tawo. Ginsikway nila ang panuytoy sang ila mahigugmaon nga Amay. Gani nangin indi maayo ang kahimtangan sang tanan nga tawo.

4. (a) Ngaa kinahanglan ang dugang nga mga panuytoy pagkatapos sang Baha? (b) Paano nangin maathag ang pagtamod sang Dios parte sa kabuhi sang nagbag-o ang mga kahimtangan?

⁴ Sang panahon ni Noe, may panuytoy ang Dios para maluwas. Pagkatapos sang Baha, may espesipiko nga pagdumili si Jehova parte sa dugo. Ngaa kinahanglan ini? Nagbag-o ang mga kahimtangan. Gintugutan ni Jehova ang mga tawo nga kaunon ang karne sang sapat. Gani, dapat may bag-o nga panuytoy: “Indi ninyo pagkaunon ang karne nga may dugo, kay ang dugo amo ang kabuhi.” (Gen. 9:1-4) Bangod sining bag-o nga mga kahimtangan, nangin maathag ang pagtamod sang Dios parte sa kabuhi, kay sia ang nagapanag-iya sini. Subong Manunuga kag Manughatag sing Kabuhi, sia lang ang may kinamatarong sa paghimo sing mga kasuguan parte sa kabuhi. Halimbawa, nagsugo sia nga indi magpatay sang tawo. Ginakabig sang Dios nga balaan ang kabuhi kag dugo, kag manabat sa iya ang nagagamit sini sing indi husto.—Gen. 9:5, 6.

5. Ano ang binagbinagon naton, kag ngaa?

⁵ Binagbinagon naton ang pila ka halimbawa kon paano nagpadayon sa pag-aman sing mga panuytoy ang Dios sa pagligad sang mga siniglo. Ini nga pagbinagbinag magapalig-on sa aton nga sundon ang panuytoy ni Jehova pakadto sa bag-ong kalibutan.

6. Ngaa dapat tumanon sang katawhan sang Dios ang mga kasuguan nga ginhatag paagi kay Moises, kag ano dapat ang panimuot sang mga Israelinhon sa sini?

⁶ Sang panahon ni Moises, kinahanglan ang maathag nga mga panuytoy para sa husto nga paggawi kag pagsimba. Ngaa? Bangod nagbag-o naman ang mga kahimtangan. Sa masobra duha ka gatos ka tuig, ginbihag sang mga Egiptohanon ang mga kaliwat ni Jacob. Lapnag sa Egipto ang pagsimba sa mga patay, diosdios, kag iban pa nga mga pagpati kag mga buhat nga nagapakahuya sa Dios. Sang nahilway ang katawhan sang Dios sa kapintas sang Egipto, kinahanglan ang bag-o nga mga panuytoy. Indi na ulipon ang katawhan sang Dios kundi nahilway nga pungsod nga magasunod lamang sa Kasuguan ni Jehova. Ang pila ka reperensia nagsiling nga ang Hebreong tinaga para sa “kasuguan” kaanggid sa tinaga nga nagakahulugan sing “pagtuytoy, paggiya, pagtudlo.” Ang Mosaikong Kasuguan nangin pangamlig gikan sa imoral nga mga buhat kag butig nga relihion sang iban nga pungsod. Sang ginsunod sang Israel ang Dios, ginpakamaayo niya ang pungsod. Sang ginsikway nila sia, malain ang ila nadangatan.—Basaha ang Deuteronomio 28:1, 2, 15.

7. (a) Ipaathag kon ngaa naghatag sing mga panuytoy si Jehova sa iya katawhan. (b) Paano nangin bantay sang Israel ang Kasuguan?

⁷ May isa pa ka rason kon ngaa kinahanglan ang mga panuytoy. May ginatudlo ang Kasuguan parte sa importante nga katumanan sang kabubut-on ni Jehova. Parte ini sa  pag-abot sang Mesias, si Jesucristo. Nangin maathag paagi sa Kasuguan nga indi himpit ang mga Israelinhon. Ginpakita man sini nga kinahanglan nila ang gawad, isa ka himpit nga halad nga makatabon sing bug-os sang sala. (Gal. 3:19; Heb. 10:1-10) Dugang pa, gin-amligan sang Kasuguan ang kaliwat nga halinan sang Mesias kag ginpakilala sia sini kon mag-abot sia. Huo, ang Kasuguan nangin temporaryo nga tutor, ukon “bantay,” nga nagadul-ong sa Cristo.—Gal. 3:23, 24.

8. Ngaa dapat kita magpagiya sa mga prinsipio sang Mosaikong Kasuguan?

⁸ Makabenepisyo man kita nga mga Cristiano gikan sa mga panuytoy sang Kasuguan nga ginhatag sa pungsod sang Israel. Paano? Puede naton tun-an ang mga prinsipio sang Kasuguan. Bisan indi kita obligado nga tumanon ini nga mga kasuguan, puede naton tamdon ang kalabanan sini subong masaligan nga mga panuytoy sa aton pagkabuhi adlaw-adlaw kag sa pagsimba naton sa aton balaan nga Dios, nga si Jehova. Ginpasulat niya ini nga mga kasuguan sa Biblia para matun-an naton, matuytuyan kita sang mga prinsipio sini, kag mahangpan naton kon daw ano kataas ang mga talaksan sa moral sang mga Cristiano. Talupangda ang ginsiling ni Jesus: “Nabatian ninyo nga ginsiling sang una: ‘Indi ka magpanghilahi.’ Apang nagasiling ako sa inyo nga ang bisan sin-o nga nagatulok sa isa ka babayi kag nagahandum sa pagpakighilahi sa iya, nakapakighilahi na sa iya tagipusuon.” Gani, dapat naton likawan indi lamang ang pagpakighilahi kundi ang bisan ano nga handum nga maghimo sing imoralidad.—Mat. 5:27, 28.

9. Anong bag-o nga mga kahimtangan ang nagakinahanglan sang bag-o nga panuytoy sang Dios?

⁹ May gindugang nga panuytoy ang Dios sang mag-abot si Jesus bilang ang Mesias kag may ginpahayag pa gid parte sa katuyuan ni Jehova. Kinahanglan ini bangod nagbag-o naman ang mga kahimtangan. Sang 33 C.E., wala na ginkahamut-an ni Jehova ang pungsod sang Israel kundi ang Cristianong kongregasyon.

10. Ngaa may bag-o nga mga kasuguan ang Cristianong kongregasyon, kag ngaa ining mga kasuguan tuhay sa ginhatag sa mga Israelinhon?

¹⁰ Sang unang siglo, ang katawhan sang Dios nangin bahin sang Cristianong kongregasyon kag may bag-o sila ukon ginpasangkad nga mga instruksion sa pagsimba kag paggawi. Ining matutom nga mga alagad sang Dios nangin bahin sang bag-o nga katipan. Ang Mosaikong Kasuguan ginhatag sa isa lang ka pungsod, ang kinaugali nga Israel. Pero ang espirituwal nga Israel ginahuman sang mga tawo halin sa madamo nga pungsod. Maathag nga “ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.” (Binu. 10:34, 35) Gintuytuyan sang Mosaikong Kasuguan ang kinaugali nga Israel sa Ginsaad nga Duta paagi sa mga kasuguan nga gintigib sa bato. Pero “ang kasuguan sang Cristo” nga nagatuytoy sa espirituwal nga Israel nabase sa mga prinsipio nga ginsulat sa tagipusuon. Maaplikar ini sa mga Cristiano bisan diin sila kag makabenepisyo sila sa sini.—Gal. 6:2.

11. Anong duha ka bahin sang pagkabuhi sang Cristiano ang apektado sang “kasuguan sang Cristo”?

¹¹ Makabenepisyo gid ang espirituwal nga Israel sa panuytoy sang Dios paagi sa iya Anak. Antes ginhimo ang bag-o nga katipan, duha ka importante nga sugo ang ginhatag ni Jesus. Ang isa parte sa pagbantala. Ang isa parte sa paggawi sang mga sumulunod ni Jesus kag kon paano nila pakig-angutan ang ila masigkatumuluo. Ini nga mga sugo para sa tanan nga Cristiano; amo nga lakip sa sini ang matuod nga mga sumilimba subong, sa langit man ukon sa duta ang paglaum.

12. Ano ang bag-o sa pagbantala nga hilikuton?

¹² Binagbinaga ang ginpahimo ni Jesus nga  pagbantala sang maayong balita sa iya mga sumulunod. Bag-o ang pamaagi kag kasangkaron sang pagbantala. Sang una nga mga siniglo, ang mga tawo sa mga pungsod ginaabiabi kon magkadto sila sa Israel para alagaron si Jehova. (1 Hari 8:41-43) Antes pa ini sang sugo ni Jesus sa Mateo 28:19, 20. (Basaha.) Ginsugo ang mga disipulo ni Jesus nga ‘kadtuan’ ang tanan nga mga tawo. Sang adlaw sang Pentecostes 33 C.E., ginpakita ni Jehova nga luyag niya nga ibantala ang maayong balita sa bug-os nga duta. Gingiyahan sang iya balaan nga espiritu ang mga 120 ka miembro sang bag-o nga kongregasyon nga maghambal paagi sa milagro sing lainlain nga lenguahe sa mga Judiyo kag mga proselita. (Binu. 2:4-11) Masunod, ginlakip sa teritoryo ang mga Samaritano. Kag sang 36 C.E., ginpasangkad pa ini kag lakip na ang wala matuli nga mga Gentil. Ang pagbantala nga ginsugdan lang sa mga Judiyo nagsangkad asta sa bug-os nga kalibutan.

13, 14. (a) Ano ang nalakip sa “bag-o nga sugo” ni Jesus? (b) Ano ang matun-an naton sa halimbawa ni Jesus?

¹³ Binagbinagon naton subong kon paano pakig-angutan ang aton masigkatumuluo. Si Jesus may “isa ka bag-o nga sugo.” (Basaha ang Juan 13:34, 35.) Indi lang ang paghigugmaanay ang nalakip sa sini nga sugo kundi dapat mangin handa man kita nga isakripisyo ang aton kabuhi para sa aton utod. Amo ini ang wala malakip sa Mosaikong Kasuguan.—Mat. 22:39; 1 Juan 3:16.

¹⁴ Naghatag si Jesus sing pinakamaayo nga halimbawa. Ginhigugma niya ang iya mga disipulo kag handa sia magsakripisyo para sa ila. Nalakip sa sini nga gugma ang mapatay para sa iya mga disipulo, kag handa sia nga himuon ini. Kag ginapaabot niya nga himuon man ini sang iya mga disipulo, lakip kita. Mahimo nga maantos kita ukon mahimo mapatay pa gani para sa aton mga masigka-Cristiano.—1 Tes. 2:8.

15, 16. Ano ang bag-o naton nga mga kahimtangan subong, kag paano kita ginatuytuyan sang Dios?

¹⁵ Nag-aman si Jesus sa iya katawhan sang espirituwal nga pagkaon sa nagakaigo nga tion paagi sa pagtangdo sang “matutom kag mainandamon nga ulipon.” (Mat. 24:45-47) Ini nga pagkaon nagalakip sang importante nga mga panuytoy suno sa bag-o nga mga kahimtangan.

¹⁶ Nagakabuhi kita sa ginatawag sang Biblia nga “katapusan nga mga adlaw,” kag dali na lang ang kapipit-an nga wala pa gid matabo anay. (2 Tim. 3:1; Mar. 13:19) Dugang pa, gintagbong na halin sa langit si Satanas kag ang iya mga demonyo kag nagpabilin sila sa duta, amo nga nangin makaluluoy pa gid ang pumuluyo sang duta. (Bug. 12:9, 12) Ginsugo man kita nga himuon ang importante kag wala sing tupong nga hilikuton nga pagbantala sa mga tawo kag mga lenguahe!

17, 18. Ano dapat ang aton reaksion sa mga panuytoy?

¹⁷ Dapat naton gamiton ang mga galamiton sa pagbantala nga ginaaman sang organisasyon sang Dios. Luyag mo bala nga gamiton ini? Ginatalupangod mo bala ang mga panuytoy nga ginahatag sa aton mga miting kon paano gamiton ini sing maayo? Ginakabig mo bala ini nga panuytoy nga halin sa Dios?

¹⁸ Gani, para mabaton naton ang pagpakamaayo sang Dios, dapat talupangdon naton ang tanan nga panuytoy nga ginaaman paagi sa Cristianong kongregasyon. Kon matinumanon kita subong, makabulig ini sa aton nga magsunod sa mga panuytoy sa “dakung kapipit-an,” diin dulaon sing bug-os ang malaut nga sistema ni Satanas. (Mat. 24:21) Pagkatapos sini, kinahanglan naman naton ang bag-o nga mga panuytoy sa pagkabuhi sa bag-o nga kalibutan sa duta nga wala na sing pagpasilabot ni Satanas.

19, 20. Ano nga mga linukot ang pagabukaron, kag ano ang mangin resulta sini?

 ¹⁹ Kinahanglan ang bag-o nga mga panuytoy sa pungsod sang Israel sa idalom ni Moises kag sang ulihi sa Cristianong kongregasyon sa idalom sang “kasuguan sang Cristo.” Sing kaanggid, ginasiling sang Biblia nga bukaron ang mga linukot para hatagan kita sing mga panuytoy sa aton pagkabuhi sa bag-ong kalibutan. (Basaha ang Bugna 20:12.) Ini nga mga linukot mahimo magaunod sang mga ipatuman ni Jehova para sa katawhan sina nga tion. Kon tun-an ini sang tanan nga tawo, lakip ang mga banhawon, mahibaluan nila ang kabubut-on sang Dios para sa ila. Makita pa gid naton sa sini nga mga linukot ang panghunahuna ni Jehova. Paagi sa pag-uswag sang paghangop sa gin-inspirar nga Pulong sang Dios lakip ang mga panuytoy sa bag-ong mga linukot, pakig-angutan sang mga pumuluyo sa Paraiso sa duta ang ila isigkatawo sing mahigugmaon, matinahuron, kag may dignidad. (Isa. 26:9) Imadyina ang programa sa pagpanudlo sa panuytoy sang Hari, si Jesucristo!

²⁰ Matigayon sang mga nagatuman sa “mga butang nga nasulat sa mga linukot” ang kabuhi nga wala sing katapusan. Isulat sang permanente ni Jehova sa “linukot sang kabuhi” ang mga ngalan sang nakahupot sang ila integridad sa Dios sa katapusan nga pagtilaw. Puede naton ini matigayon! Gani kon MAGDULOG kita para binagbinagon ang Pulong sang Dios, MAGTAN-AW sa sini para mahangpan naton ang kahulugan sini para sa aton, kag MAGPAMATI paagi sa pagtuman sa panuytoy sang Dios subong, makapaabot kita nga maluwas sa dakung kapipit-an, kag matun-an naton sing dayon ang parte sa aton labing maalam kag mahigugmaon nga Dios, nga si Jehova.—Man. 3:11; Roma 11:33.