GUSTO sang kada isa sa aton nga makilala bilang isa ka maayo nga tawo. Pero, mabudlay ipakita ang kaayo subong. Madamo nga tawo ang “wala sing gugma sa kon ano ang maayo.” (2 Tim. 3:3) Mahimo nga may personal sila nga talaksan sang maayo kag malain, kay para sa ila, “ang maayo malain kag ang malain maayo.” (Isa. 5:20) Mabudlay man mangin maayo bangod sang aton mga inagihan kag indi kita perpekto. Mahimo nga pareho kita kay Anne. * Bisan pa madugay na sia nga nagaalagad kay Jehova, nagsiling sia, “Pamatyag ko daw indi gid ako mangin maayo nga tawo.”

Maayo lang kay tanan kita makapakita sang kaayo. Ang kaayo ginapatubas sang balaan nga espiritu sang Dios, kag gamhanan gid ini nga espiritu kay masarangan sini ang bisan ano nga mga kabudlayan nga aton maeksperiensiahan. Tun-an naton kon ano ang kaayo kag kon paano pa gid naton mapakita ini nga kinaiya.

Ang kaayo nagapatuhoy sa dalayawon nga pamatasan kag paggawi, nga wala sing kalainan. Ang maayo nga tawo pirme nagapangita sing paagi para makabulig sa iban kag nagahimo sia sing maayo sa ila.

Mahimo nga natalupangdan mo nga ang iban nagahimo sing maayo sa ila pamilya kag mga abyan, pero sila lang bala ang dapat pakitaan sang kaayo? Limitado lang ang aton ikasarang para ipakita ini nga kinaiya, kay ang Biblia nagasiling nga “wala sing matarong nga tawo sa duta nga nagahimo pirme sing maayo kag indi makasala.” (Man. 7:20) Si apostol Pablo nagsiling: “Nahibaluan ko nga ako undanon kag wala sing maayo sa akon.” (Roma 7:18) Gani kon gusto naton mapakita ini nga kinaiya, dapat kita magpatudlo kay Jehova, ang Tuburan sang kaayo.

Naghimo si Jehova nga Dios sang talaksan sa kon ano ang maayo. Ang Biblia nagasiling parte sa iya: “Maayo ka kag maayo ang imo mga binuhatan. Tudlui ako sang imo mga pagsulundan.” (Sal. 119:68) Binagbinagon naton ang duha ka aspekto sang kaayo ni Jehova sa sini nga teksto.

Maayo si Jehova. Ang kaayo bahin gid sang personalidad ni Jehova. Binagbinaga kon ano ang natabo sang nagsiling si Jehova kay Moises: “Ipakita ko sa imo ang akon bug-os nga kaayo.” Sang ginpakita ni Jehova ang iya himaya, lakip ang iya kaayo, nabatian ni Moises ini nga pinamulong: “Si Jehova, si Jehova, isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran, nagapakita sing mainunungon nga gugma sa linibo, nagapatawad sing sayop kag paglapas kag sala, apang indi niya pagpabay-an nga indi masilutan ang nakasala.” (Ex. 33:19; 34:6, 7) Nagapakita ini nga si Jehova maayo gid sa tanan niya nga ginahimo. Sang nagkabuhi si Jesus bilang tawo, maayo gid sia, pero nagsiling sia: “Wala sing isa nga maayo, kundi ang Dios lamang.”—Luc. 18:19.

Maayo ang mga binuhatan ni Jehova. Ang tanan nga ginahimo ni Jehova nagapakita nga maayo sia. “Si Jehova maayo sa tanan, kag ang iya kaluoy makita sa tanan niya nga ginahimo.” (Sal. 145:9) Bangod maayo si Jehova kag wala sing ginapasulabi,  ginhatagan niya ang tanan nga tawo sang kabuhi kag sang mga kinahanglanon nila para mabuhi. (Binu. 14:17) Ginapakita man niya nga maayo sia kay ginapatawad niya kita. Ang salmista nagsulat: “Ikaw, O Jehova, maayo kag handa sa pagpatawad.” (Sal. 86:5) Makasigurado gid kita nga “wala ginadingot ni Jehova ang bisan ano nga maayo sa mga nagalakat nga may integridad.”—Sal. 84:11.

Gintuga kita suno sa larawan sang Dios, gani puede kita makapakita sing kaayo kag makahimo sing maayo. (Gen. 1:27) Pero, ginapalig-on sang Pulong sang Dios ang iya mga alagad nga “magtuon sa paghimo sing maayo.” (Isa. 1:17) Paano naton ini mahimo? Binagbinagon naton ang tatlo ka paagi.

Una, mangamuyo sang balaan nga espiritu, nga amo ang makabulig sa mga Cristiano nga mapatubas ang matuod nga kaayo. (Gal. 5:22) Ang espiritu sang Dios makabulig sa aton nga higugmaon ang maayo kag isikway ang malain. (Roma 12:9) Ang matuod, ang Biblia nagasiling nga si Jehova ‘makapalig-on sa aton agod pirme kita maghimo kag maghambal sing maayo.’—2 Tes. 2:16, 17.

Ikaduha, dapat naton basahon ang Pulong sang Dios. Ang pagsulat sa sini gintuytuyan sang iya espiritu. Kon basahon naton ini, matudluan kita ni Jehova sa “bug-os nga dalanon sang kaayo” kag masangkapan kita “para sa tagsa ka maayong buhat.” (Hulu. 2:9; 2 Tim. 3:17) Ang aton tagipusuon daw isa ka bahandian. Kon basahon naton ang Biblia kag pamalandungan ini, ginasudlan naton sang maayo nga mga butang ang aton tagipusuon, nga daw pareho sa pagsulod sa aton bahandian sang hamili nga mga butang nga makabulig sa aton sa ulihi.—Luc. 6:45; Efe. 5:9.

Ikatlo, himuon naton ang aton bug-os nga masarangan para ‘mailog ang maayo.’ (3 Juan 11) May mga halimbawa sa Biblia nga mailog naton. Siempre, ang pinakamaayo nga halimbawa amo si Jehova kag si Jesus. Pero binagbinagon man naton ang iban nga kilala sa ila kaayo. Ang duha sa sini amo si Tabita kag si Bernabe. (Binu. 9:36; 11:22-24) Makabenepisyo kita sa ila maayo gid nga halimbawa kon tun-an naton ang ginasiling sang Biblia parte sa ila, kag kon paano nila ginbuligan ang iban. Hunahunaa kon paano naton mabuligan ang pila sa aton pamilya ukon sa kongregasyon. Talupangda man kon paano nakabenepisyo si Tabita kag si Bernabe bangod maayo sila sa iban. Makabenepisyo ka man kon ilugon mo sila.

Hunahunaon man naton ang mga nagahimo sing maayo sa aton tion subong. Halimbawa, hunahunaa ang mapisan nga mga gulang sa kongregasyon nga “mahigugmaon sa maayo.” Hunahunaa  man ang matutom nga mga sister nga “nagatudlo sang maayo” paagi sa ila ginahambal kag ginahimo. (Tito 1:8; 2:3) Ang utod nga si Roslyn nagsiling: “Ang akon abyan nagatinguha gid sa pagbulig kag pagpalig-on sa iban sa kongregasyon. Ginahunahuna niya ang ila kahimtangan kag sa masami nagahatag sia sa ila sang simple nga mga regalo ukon nagabulig sa ila. Para sa akon, maayo gid sia nga tawo.”

Ginapalig-on ni Jehova ang iya katawhan nga ‘pangitaon ang maayo.’ (Amos 5:14) Kon himuon naton ini, makabulig ini sa aton nga higugmaon ang iya mga talaksan kag mapalig-on pa gid kita nga himuon ang maayo.

Indi naton kinahanglan maghimo sang dalayawon nga mga buhat ukon maghatag sang malahalon nga mga regalo para mapakita ang kaayo. Halimbawa, kon magdrowing ang isa ka pintor, indi lang isa ukon duha ka palhit sang brutsa ang ginahimo niya. Sa baylo, ginahimo niya ini sing madamo nga beses. Sing kaanggid, ang kaayo mapakita man naton sa madamo nga paagi.

Ginapalig-on kita sang Biblia nga mangin “handa” sa paghimo sing maayo. (2 Tim. 2:21; Tito 3:1) Kon nabalaka kita sa kahimtangan sang iban, magahimo kita sang ‘maayo sa aton isigkatawo, agod pabakuron sila.’ (Roma 15:2) Mahimo nga nagalakip ini sa paghatag sa ila sang mga ara sa aton. (Hulu. 3:27) Puede naton sila imbitahon sa isa ka simple nga pagkaon ukon para makapalig-unay. Kon ang isa nagamasakit, puede naton sia padal-an sang sulat, bisitahon, ukon tawgan. Madamo sing kahigayunan nga mahambal naton ang ‘maayo nga pinamulong nga makapabakod suno sa kinahanglanon, agod mahatag sini ang maayo sa mga nagapamati.’—Efe. 4:29.

Pareho kay Jehova, gusto naton nga himuon ang maayo sa tanan nga tawo. Wala kita sing may ginapasulabi. Ang isa ka paagi nga mapakita naton ini amo ang pagbantala sang maayong balita sang Ginharian sa tanan nga tawo. Pareho sa ginsugo ni Jesus, gusto naton nga himuon ang maayo bisan sa mga nagadumot sa aton. (Luc. 6:27) Indi sala nga mangin mainayuhon kag maghimo sing maayo sa iban, kay “wala sing kasuguan nga batok sa sini nga mga butang.” (Gal. 5:22, 23) Paagi sa aton maayo nga paggawi bisan pa ginapamatukan kita ukon may mga kabudlayan, mabuligan naton ang iban nga magtuon sang kamatuoran kag mahimaya ang Dios.—1 Ped. 3:16, 17.

“Ang maayo nga tawo magaani sang padya sang iya mga binuhatan.” (Hulu. 14:14) Ano ang pila sa mga padya? Kon maayo kita sa iban, mahimo gid nga mangin maayo man sila sa aton. (Hulu. 14:22) Bisan pa ang iban indi maayo sa aton, ang aton padayon nga paghimo sing maayo mahimo magpahumok sang ila balatyagon kag magtunaw sang ila katig-a.—Roma 12:20, footnote.

Madamo ang nakabenepisyo sa paghimo sing maayo kag paglikaw sa malain. Binagbinaga ang eksperiensia ni Nancy. “Nagdaku ako nga salawayon, imoral, kag indi matinahuron,” siling niya. “Pero, sang natun-an ko ang maayo nga mga talaksan sang Dios kag gin-aplikar ini, nalipay gid ako. Subong may dignidad na ako kag may pagtahod sa kaugalingon.”

Ang pinakaimportante nga rason kon ngaa dapat naton ipakita ang kaayo amo nga mapahalipay naton si Jehova. Bisan pa nga indi makita sang madamo ang aton ginahimo, makita ini ni Jehova. Nahibaluan niya ang aton maayo nga hinimuan kag ginahunahuna. (Efe. 6:7, 8) Ano dayon ang himuon niya? “Ginakahamut-an ni Jehova ang maayo nga tawo.” (Hulu. 12:2) Gani padayon naton nga ipakita ang kaayo. Nagpromisa si Jehova sing “himaya kag dungog kag paghidait para sa tagsatagsa nga nagahimo sing maayo.”—Roma 2:10.