1. Suno sa 1 Pedro 3:8, ngaa nalipay kita kon kaupod naton ang mga tawo nga nagaulikid sa aton balatyagon kag kaayuhan?

NALIPAY kita kon kaupod naton ang mga tawo nga nagaulikid sa aton balatyagon kag kaayuhan. Ginabutang nila ang ila kaugalingon sa aton sitwasyon para mahibaluan nila kon ano ang aton ginahunahuna kag ginabatyag. Matalupangdan nila kon ano ang kinahanglan naton kag may mga tion nga ginabuligan nila kita antes pa kita magpabulig. Ginaapresyar gid naton ang mga tawo nga nagapakita sang “simpatiya” * sa aton.—Basaha ang 1 Pedro 3:8.

2. Ngaa indi pirme mahapos magpakita sang empatiya?

² Bilang mga Cristiano, gusto naton tanan nga magpakita sang empatiya, ukon simpatiya. Pero ang matuod, indi pirme mahapos magpakita sang empatiya. Ngaa? Ang isa ka rason amo nga indi kita perpekto. (Roma 3:23) Gani dapat naton pakigbatuan ang aton panghunahuna nga unahon ang aton kaugalingon. Ang iban sa aton nabudlayan man sa pagpakita sang empatiya bangod sang aton gindak-an ukon mga eksperiensia. Kag mahimo naimpluwensiahan man kita sang mga tawo sa palibot naton. Sa sining katapusan nga mga adlaw, madamo ang wala nagaulikid sa balatyagon sang iban. Sa baylo, “mahigugmaon [sila] sa kaugalingon.” (2 Tim. 3:1, 2) Paano naton maatubang ang mga kabudlayan sa pagpakita sang pag-ulikid sa balatyagon sang iban?

3. (a) Paano pa gid naton mapakita ang simpatiya? (b) Ano ang binagbinagon naton sa sini nga artikulo?

 ³ Mapakita pa gid naton ang simpatiya paagi sa pag-ilog kay Jehova nga Dios kag sa iya Anak, si Jesucristo. Si Jehova ang Dios sang gugma, kag ginapakita niya ang pinakamaayo nga halimbawa sang pag-ulikid sa iban. (1 Juan 4:8) Gin-ilog gid ni Jesus ang personalidad sang iya Amay. (Juan 14:9) Sang ari sia sa duta, ginpakita niya ang kaluoy. Sa sini nga artikulo, binagbinagon naton kon paano nagpakita si Jehova kag si Jesus sang pag-ulikid sa balatyagon sang iban. Dayon binagbinagon naton kon paano naton sila mailog.

4. Paano ginapakita sang Isaias 63:7-9 nga nagaulikid si Jehova sa balatyagon sang iya mga alagad?

⁴ Ang Biblia nagatudlo sa aton nga nagaulikid si Jehova sa balatyagon sang iya mga alagad. Halimbawa, hunahunaa kon ano ang nabatyagan ni Jehova sang ang mga Israelinhon sadto nag-antos sang mga kabudlayan. “Sa tanan nila nga pag-antos, nag-antos man sia,” siling sang Pulong sang Dios. (Basaha ang Isaias 63:7-9.) Sang ulihi, paagi kay manalagna Zacarias, nagsiling si Jehova nga sang ginpintasan ang iya katawhan, daw pareho lang nga sia ang ginpintasan. Nagsiling si Jehova sa iya mga alagad: “Ang nagatandog sa inyo nagatandog sa tawotawo sang akon mata.” (Zac. 2:8) Ginpakita gid ni Jehova ang pag-ulikid sa iya katawhan.

5. Maghatag sing halimbawa kon paano ginbuligan ni Jehova ang iya mga alagad nga nagaantos.

⁵ Si Jehova wala lang nagabatyag sang kaluoy sa iya mga alagad nga nagaantos, kundi may ginahimo man sia para buligan sila. Halimbawa, sang nag-antos ang mga Israelinhon sa pagkaulipon sa Egipto, nabatyagan ni Jehova ang ila kasakit kag ginbuligan niya sila. Nagsiling si Jehova kay Moises: “Nakita ko gid ang pag-antos sang akon katawhan . . . , kag nabatian ko ang ila pagsinggit . . . Nahibaluan ko gid ang ila pag-antos. Magapanaug ako agod luwason sila sa kamot sang mga Egiptohanon.” (Ex. 3:7, 8) Bangod naluoy si Jehova sa iya katawhan, ginhilway niya sila sa pagkaulipon. Mga tinuig sang ulihi, sa Ginsaad nga Duta, ginsalakay ang mga Israelinhon sang ila mga kaaway. Ano ang ginbatyag ni Jehova? “Naluoy  [sia] sa ila pag-ugayong bangod sang pagpigos kag pagpamintas sa ila.” Naluoy liwat si Jehova sa iya katawhan amo nga ginbuligan niya sila. Nagpadala sia sang mga hukom para luwason ang mga Israelinhon sa ila mga kaaway.—Huk. 2:16, 18.

6. Maghatag sing halimbawa kon paano ginpakita ni Jehova ang pag-ulikid sa isa ka tawo nga daw indi husto ang panghunahuna.

⁶ Nagaulikid si Jehova sa balatyagon sang iya katawhan, bisan pa daw indi husto kon kaisa ang ila panghunahuna. Binagbinaga si Jonas. Ginpadala sang Dios ini nga manalagna para ipahayag ang paghukom batok sa mga taga-Ninive. Sang naghinulsol sila, wala sila ginlaglag sang Dios. Pero wala malipay si Jonas sa sini nga desisyon. “Naakig gid sia” bangod wala matuman ang iya gintagna. Pero mapailubon si Jehova kay Jonas kag ginbuligan niya sia nga matadlong ang iya panghunahuna. (Jon. 3:10–4:11) Sang ulihi, nahangpan ni Jonas ang ginatudlo ni Jehova sa iya, kag ginpasulat pa gani sa iya ni Jehova ini nga hitabo para makabenepisyo kita.—Roma 15:4. *

7. Ano ang ginapasalig sa aton sang pagpakig-angot ni Jehova sa iya katawhan?

⁷ Ang pagpakig-angot ni Jehova sa iya katawhan nagapasalig sa aton nga may empatiya sia sa iya mga alagad. Nabatyagan niya ang kasakit kag pag-antos sang kada isa sa aton. ‘Nahibaluan gid ni Jehova ang tagipusuon sang tawo.’ (2 Cron. 6:30) Nahangpan niya ang tanan naton nga panghunahuna, balatyagon, kag kaluyahon. Kag “indi sia magtugot nga sulayon [kita] labaw sa [aton] masarangan.” (1 Cor. 10:13) Makapalig-on gid ini nga pasalig!

8-10. Ano ang mga rason sa pag-ulikid ni Jesus sa iban?

⁸ Sang ari si Jesus sa duta, nagaulikid gid sia sa iban. May tatlo ka rason kon ngaa ginpakita niya ini. Una, pareho sa ginsambit kaina, gin-ilog gid ni Jesus ang personalidad sang iya Amay sa langit. Pareho sa iya Amay, palangga ni Jesus ang mga tawo. Nalipay gid si Jesus sa mga ginhimo ni Jehova nga nakabulig sia, pero “mas nalipay [sia] sa mga anak sang mga tawo.” (Hulu. 8:31) Ang gugma amo ang nagbulig kay Jesus nga ulikdan ang balatyagon sang iban.

⁹ Ikaduha, pareho kay Jehova, mabasa ni Jesus ang tagipusuon. Mahibaluan niya ang motibo kag balatyagon sang mga tawo. (Mat. 9:4; Juan 13:10, 11) Gani sang natalupangdan ni Jesus nga nasubuan gid ang mga tawo, gin-ulikdan niya sila kag ginpalig-on.—Isa. 61:1, 2; Luc. 4:17-21.

¹⁰ Ikatlo, naeksperiensiahan ni Jesus ang pila ka kabudlayan nga nagakatabo sa mga tawo. Halimbawa, nagdaku si Jesus sa imol nga pamilya. Paagi sa pagbulig sa iya amay sa duta, nga si Jose, natun-an ni Jesus ang mabug-at nga obra. (Mat. 13:55; Mar. 6:3) Mahimo nga napatay si Jose antes matapos ang ministeryo ni Jesus. Gani nabatyagan man ni Jesus ang kasakit sang pagkapatay sang pinalangga. Kag nahibaluan ni Jesus ang kahimtangan sang pamilya nga lainlain ang mga ginapatihan. (Juan 7:5) Ini nga mga kahimtangan kag ang iban pa nagbulig kay Jesus nga mahangpan ang mga kabudlayan kag balatyagon sang mga tawo.

11. Paano nangin maathag nga nagaulikid gid si Jesus sa mga tawo? Ipaathag. (Tan-awa ang piktyur sa kober.)

¹¹ Nangin maathag nga nagaulikid gid si Jesus sa mga tawo sang naghimo sia sang mga milagro. Ginhimo niya ini indi lang bangod kinahanglan niya ini himuon, kundi “naluoy gid  sia” sa mga nagaantos. (Mat. 20:29-34; Mar. 1:40-42) Halimbawa, imadyina ang balatyagon ni Jesus sang gindala niya sa unhan nga malayo sa kadam-an ang isa ka tawo nga bungol kag gin-ayo sia, ukon sang ginbanhaw niya ang bugtong nga anak nga lalaki sang isa ka balo nga babayi. (Mar. 7:32-35; Luc. 7:12-15) Ginpakita ni Jesus ang simpatiya sa sini nga mga tawo kag ginbuligan niya sila.

12. Suno sa Juan 11:32-35, paano ginpakita ni Jesus ang simpatiya kay Marta kag kay Maria?

¹² Ginpakita ni Jesus ang simpatiya kay Marta kag kay Maria. Sang nakita niya nga nasubuan sila bangod sang pagkapatay sang ila utod nga si Lazaro, “nagtulo ang luha ni Jesus.” (Basaha ang Juan 11:32-35.) Naghibi sia indi bangod indi na niya makaupod ang iya suod nga abyan. Kay man, nahibaluan niya nga banhawon man niya si Lazaro. Sa baylo, naghibi sia bangod nabatyagan niya ang kasubo sang iya mga abyan.

13. Ngaa makapalig-on gid mahibaluan nga may simpatiya si Jesus sa mga tawo?

¹³ Makapalig-on gid mahibaluan nga may simpatiya si Jesus sa mga tawo. Siempre, indi kita perpekto pareho sa iya. Pero, ginahigugma naton sia bangod nagaulikid sia sa iban. (1 Ped. 1:8) Makapalig-on mahibaluan nga nagagahom na sia bilang Hari sa Ginharian sang Dios. Kag malapit na niya dulaon ang tanan nga pag-antos. Bangod nangin tawo si Jesus, nahibaluan gid niya kon paano buligan ang mga tawo nga maumpawan sa kasakit kag pag-antos nga ginhimo sang paggahom ni Satanas. Nalipay kita kay may ara kita Manuggahom nga “makapakita sing kahanuklog sa aton mga kaluyahon.”—Heb. 2:17, 18; 4:15, 16.

14. Suno sa Efeso 5:1, 2, ano ang dapat naton ipakita?

¹⁴ Kon binagbinagon naton ang halimbawa ni Jehova kag ni Jesus, mapalig-on kita nga ipakita pa gid ang simpatiya. (Basaha ang Efeso 5:1, 2.) Indi kita makabasa sang tagipusuon pareho sa ila. Pero, puede naton hangpon ang balatyagon kag kinahanglanon sang iban. (2 Cor. 11:29) Indi pareho sa maiyaiyahon nga mga tawo sa kalibutan, “ginapangita [naton] indi lamang ang [aton] personal nga kaayuhan, kundi ang iya man sang iban.”—Fil. 2:4.

15. Sin-o ang kinahanglan nga magpakita sang simpatiya?

¹⁵ Kinahanglan ipakita sang mga gulang sa kongregasyon ang simpatiya. Kabalo sila nga manabat sila kon paano nila ginaatipan ang mga karnero ni Jehova. (Heb. 13:17) Para mabuligan nila ang ila mga kauturan, dapat may simpatiya sila. Paano mapakita sang mga gulang ang simpatiya?

16. Ano ang ginahimo sang gulang nga may simpatiya, kag ngaa importante ini?

¹⁶ Ang gulang nga may simpatiya nagahatag sing tion sa iya mga kauturan. Nagapamangkot sia kag nagapamati sing maayo kag mapinasensiahon. Importante gid ini kon ang utod gusto magsugid sang iya mga problema pero nabudlayan sia sa pagpabutyag sini. (Hulu. 20:5) Kon nagahatag sing tion ang isa ka gulang sa iya mga kauturan, nagabakod ang ila pagsalig sa isa kag isa, ang ila pag-abyanay, kag ang ila gugma.—Binu. 20:37.

17. Ano nga kinaiya sang mga gulang ang gusto gid makita sang madamo nga kauturan? Maghatag sing halimbawa.

¹⁷ Madamo nga kauturan ang nagasiling nga ang kinaiya nga gusto gid nila makita sa mga gulang amo ang pag-ulikid sa balatyagon sang iban. Ngaa? “Kon may amo sila sini nga kinaiya, mas mahapos makig-istorya sa ila, kay kabalo ka nga mahangpan ka nila,” siling ni Adelaide. Nagsiling pa sia: “Mabal-an mo nga may simpatiya sila sa imo paagi sa ila ginahambal  kon nagaistorya ka sa ila.” Ang isa ka brother nagsiling: “Naghibi ang isa ka gulang samtang ginasugid ko ang akon kahimtangan. Indi ko gid ini malimtan.”—Roma 12:15.

18. Paano naton mapakita ang simpatiya sa iban?

¹⁸ Indi lang mga gulang ang dapat magpakita sang simpatiya. Tanan kita makapakita sini. Paano? Tinguhai nga hangpon ang mga kabudlayan sang mga miembro sang aton pamilya kag mga kauturan. Ipakita ang pag-ulikid sa mga tin-edyer sa kongregasyon pati na sa mga nagamasakit, mga tigulang, kag sa mga napatyan sang pinalangga. Kamustaha sila, kag pamatii sing maayo ang ila ginasiling. Ipakita sa ila nga nahangpan mo gid ang ila kahimtangan. Buligi sila suno sa imo masarangan. Kon himuon naton ini, ginapakita naton ang matuod nga gugma.—1 Juan 3:18.

19. Ngaa dapat kita mangin mapasibusibuon kon nagabulig sa iban?

¹⁹ Dapat kita mangin mapasibusibuon kon nagabulig sa iban. Ngaa? Bangod lainlain ang reaksion sang kada isa sa mga kabudlayan. Gusto sang iban nga isugid ang ila problema, samtang ang iban indi. Gusto naton magbulig, pero dapat naton likawan nga mamangkot sing tama ka personal. (1 Tes. 4:11) Kag kon isugid gid man sang iban ang ila ginabatyag, mahimo nga indi kita mag-ugyon sa ila ginasiling. Pero, dapat naton hangpon nga amo sina ang ila ginabatyag. Mangin maabtik kita sa pagpamati kag mahinay sa paghambal.—Mat. 7:1; Sant. 1:19.

20. Ano ang binagbinagon naton sa masunod nga artikulo?

²⁰ Gusto naton ipakita ang simpatiya sa kongregasyon, pero gusto man naton ini ipakita sa aton pagministeryo. Paano naton mapakita ang simpatiya kon nagatudlo sa iban? Binagbinagon naton ini sa masunod nga artikulo.