1-2. (a) Paano nagakomunikar si Jehova sa mga tawo? (b) Ano ang binagbinagon naton sa sini nga artikulo?

GUSTO gid ni Jehova magkomunikar sa aton. Sang una, ginagamit niya ang mga manalagna, mga anghel, kag ang iya Anak nga si Jesucristo para mahibaluan naton ang iya mga panghunahuna. (Amos 3:7; Gal. 3:19; Bug. 1:1) Subong, nagakomunikar sia sa aton paagi sa iya Pulong, ang Biblia. Ginhatag niya ini sa aton para mahibaluan naton ang iya panghunahuna kag para mahangpan ang iya mga dalanon.

² Sang ari si Jesus sa duta, naghambal si Jehova halin sa langit sing tatlo ka beses. Binagbinagon naton kon ano ang ginhambal ni Jehova, kon ano ang matun-an naton sa sini, kag kon paano kita makabenepisyo sa sini.

3. Suno sa Marcos 1:9-11, ano ang ginhambal ni Jehova sang ginbawtismuhan si Jesus, kag ano nga importante nga mga kamatuoran ang ginapakita sini?

³ Ginsulat sa Marcos 1:9-11 ang una nga tion nga naghambal si Jehova halin sa langit. (Basaha.) Sia nagsiling: “Ikaw ang akon Anak, ang hinigugma; ginakahamut-an ko ikaw.” Sigurado nga nalipay gid si Jesus sang mabatian niya nga ginpabutyag sang iya Amay ang gugma kag pagsalig sa iya! Ang ginhambal ni Jehova nagapakita sang tatlo ka importante nga kamatuoran parte kay Jesus. Una, si Jesus Anak niya. Ikaduha, ginahigugma ni Jehova ang iya Anak. Kag ikatlo, ginakahamut-an ni Jehova ang iya Anak. Binagbinagon naton sing maayo ang kada isa sini.

4. Paano si Jesus nangin Anak sang Dios sa bag-o nga paagi sa tion sang iya bawtismo?

⁴ “Ikaw ang akon Anak.” Ginapakita sining ginhambal ni Jehova nga ang iya pinalangga nga Anak, nga si Jesus, may bag-o nga kaangtanan sa Iya. Sang ara si Jesus sa langit, isa sia ka espiritu  nga anak sang Dios. Pero sa tion sang iya bawtismo, ginhaplasan sia sang balaan nga espiritu kag nangin Anak sia sang Dios sa bag-o nga paagi. Sa sini nga tion, ginpakita sang Dios nga si Jesus, bilang Iya hinaplas nga Anak, may paglaum nga magbalik sa langit bilang gintangdo sang Dios nga Hari kag Mataas nga Saserdote. (Luc. 1:31-33; Heb. 1:8, 9; 2:17) Amo ini kon ngaa sa tion sang bawtismo ni Jesus, nagsiling ang iya Amay: “Ikaw ang akon Anak.”—Luc. 3:22.

5. Paano naton mailog si Jehova sa pagpabutyag sang gugma kag apresasyon?

⁵ “Ikaw ang . . . hinigugma.” Ang pagpabutyag ni Jehova sang gugma kag apresasyon nagapahanumdom sa aton nga dapat naton palig-unon ang iban. (Juan 5:20) Nagalig-on kita kon ang mga pinalangga naton magpakita sang gugma sa aton kag maghatag sing komendasyon sa aton maayo nga hinimuan. Sing kaanggid, kinahanglan man sang aton mga kauturan sa kongregasyon kag sang mga miembro sang aton pamilya ang aton gugma kag pagpalig-on. Kon ginakomendahan naton ang iban, ginapalig-on naton ang ila pagtuo kag ginabuligan naton sila nga makaalagad sing matutom kay Jehova. Dapat gid palig-unon sang mga ginikanan ang ila kabataan. Kon ginakomendahan nila kag ginapalangga ang ila kabataan, ginabuligan nila nga maglig-on pa gid ang ila kabataan.

6. Ngaa makasalig kita kay Jesucristo?

⁶ “Ginakahamut-an ko ikaw.” Ginapakita sining ginhambal ni Jehova nga nagasalig sia nga himuon ni Jesus sing matutom ang kabubut-on sang iya Amay. May pagsalig gid si Jehova sa iya Anak, gani makasalig man kita nga tumanon ni Jesus sing matutom ang tanan nga promisa ni Jehova. (2 Cor. 1:20) Kon pamalandungan naton ang halimbawa ni Jesus, mangin determinado pa gid kita nga magtuon parte sa  iya kag ilugon sia. Nagasalig man si Jehova nga padayon nga magatuon ang iya mga alagad parte sa iya Anak.—1 Ped. 2:21.

7. Suno sa Mateo 17:1-5, sa ano nga tion naghambal si Jehova halin sa langit, kag ano ang iya ginsiling?

⁷ Basaha ang Mateo 17:1-5. Ang ikaduha nga tion nga naghambal si Jehova halin sa langit amo ang tion nga ‘nagbaylo ang dagway’ ni Jesus. Gin-upod ni Jesus sanday Pedro, Santiago, kag Juan sa isa ka mataas nga bukid. Sang didto sila, nakita nila ang makahalawhaw nga palanan-awon. Nagsilak ang nawong ni Jesus kag nagsanag ang iya bayo. Dayon, duha ka tawo nga nagarepresentar kay Moises kag kay Elias ang nagpakighambal kay Jesus parte sa iya kamatayon kag pagkabanhaw. “Natulugan” sadto ang tatlo ka apostoles, pero pagbugtaw nila, nakita nila ang makahalawhaw nga palanan-awon. (Luc. 9:29-32) Dayon, ginlikupan sila sang masanag nga panganod, kag nabatian nila ang tingog sang Dios halin sa panganod. Pareho sang ginhimo ni Jehova sa tion sang bawtismo ni Jesus, ginpabutyag niya ang iya kahamuot kag gugma sa iya Anak sang nagsiling sia: “Ini ang akon Anak, ang hinigugma, nga ginakahamut-an ko.” Pero sa sini nga tion, may ginsiling pa gid si Jehova: “Magpamati kamo sa iya.”

8. Ano ang epekto kay Jesus kag sa iya mga disipulo sang palanan-awon?

⁸ Ang palanan-awon nagapakita sang himaya kag gahom ni Jesus bilang Hari sang Ginharian sang Dios sa palaabuton. Sigurado gid nga napalig-on kag napabakod ang Cristo nga atubangon ang mga pag-antos kag ang masakit nga kamatayon. Ini nga palanan-awon nagpabakod man sa pagtuo sang mga disipulo. Nagbulig ini sa ila nga mangin handa sa mga kabudlayan nga ila atubangon kag sa mga hilikuton nga ila himuon. Mga 30 ka tuig sang ulihi, ginpatuhuyan ni apostol Pedro ang palanan-awon parte sa pagbaylo sang dagway ni Jesus, nga nagapakita nga nadumduman gid niya ini.—2 Ped. 1:16-18.

9. Ano ang mapuslanon nga mga laygay ni Jesus sa iya mga disipulo?

⁹ “Magpamati kamo sa iya.” Gin-athag ni Jehova nga gusto niya nga magpamati kita sa iya Anak kag magtuman sa iya. Ano ang ginhambal ni Jesus sang ari sia sa duta? Madamo sia sing ginhambal nga dapat gid naton pamatian! Halimbawa, mahigugmaon niya nga gintudluan ang iya mga sumulunod kon paano ibantala ang maayong balita, kag sulitsulit niya sila nga ginhambalan nga padayon nga magbantay. (Mat. 24:42; 28:19, 20) Ginpalig-on man niya sila nga magpanikasog sing lakas kag indi mangampo. (Luc. 13:24) Ginpadaku ni Jesus nga ang iya mga sumulunod dapat maghigugmaanay sa isa kag isa, magpabilin nga nahiusa, kag magtuman sang iya mga sugo. (Juan 15:10, 12, 13) Mapuslanon gid ang mga laygay ni Jesus sa iya mga disipulo! Kag mapuslanon ini gihapon asta subong.

10-11. Paano naton mapakita nga nagapamati kita kay Jesus?

¹⁰ Nagsiling si Jesus: “Ang tanan nga dampig sa kamatuoran nagapamati sa akon.” (Juan 18:37) Mapakita naton nga nagapamati kita sa iya kon ‘padayon naton nga batason ang isa kag isa kag magpinatawaray kita sing kinabubut-on.’ (Col. 3:13; Luc. 17:3, 4) Mapakita pa gid naton nga nagapamati kita sa iya paagi sa mapisan nga pagbantala sang maayong balita “sa maayo nga panahon kag sa mabudlay nga panahon.”—2 Tim. 4:2.

¹¹ Nagsiling si Jesus: “Ang akon mga karnero nagapamati sa akon tingog.” (Juan 10:27) Mapakita sang mga sumulunod sang Cristo nga nagapamati sila sa iya paagi sa pagtuman sang ila nabatian. Wala sila nagakatublag sang “mga  kabalaka sa kabuhi.” (Luc. 21:34) Sa baylo, ginauna nila sa ila kabuhi ang pagtuman sa mga sugo ni Jesus, bisan pa sa mabudlay gid nga mga kahimtangan. Madamo sa aton mga kauturan ang nagabatas sang mabudlay gid nga mga kahimtangan, pareho sang pagpamatok, kaimulon, kag mga kalamidad. Bisan pa nagakatabo ini tanan, matutom sila gihapon kay Jehova. Ginapasalig sila ni Jesus: “Ang bisan sin-o nga nagabaton sang akon mga sugo kag nagatuman sini amo ang nagahigugma sa akon. Kag ang bisan sin-o nga nagahigugma sa akon higugmaon sang akon Amay.”—Juan 14:21.

12. Ano ang isa pa ka paagi nga mapakita naton nga nagapamati kita kay Jesus?

¹² Ang isa pa ka paagi nga mapakita naton nga nagapamati kita kay Jesus amo ang pagpasakop sa mga gintangdo niya nga manguna sa aton. (Heb. 13:7, 17) Sining nagligad nga tinuig, madamo sing pagbag-o sa organisasyon sang Dios, pareho sang bag-o nga mga gamit kag mga pamaagi sa aton ministeryo. May pagbag-o man sa aton midweek miting kag sa paagi sang aton pagtukod, pagkay-o, kag pagmentinar sang aton mga Kingdom Hall. Nagapasalamat gid kita sa sining mahigugmaon kag ginpamensaran sing maayo nga mga panuytoy! Pat-od gid nga pakamaayuhon ni Jehova ang aton mga panikasog nga sundon ang mga panuytoy sang iya organisasyon.

13. Ano ang mga benepisyo sa pagpamati kay Jesus?

¹³ Makabenepisyo kita sa pagpamati sa tanan nga gintudlo ni Jesus. Ginpromisa ni Jesus sa iya mga disipulo nga ang iya mga ginatudlo makapaumpaw sa ila. “Makakita kamo sing kapahuwayan para sa inyo kaugalingon,” siling niya. “Kay ang akon gota mahapos pas-anon kag ang akon lulan mamag-an.” (Mat. 11:28-30) Ang Pulong sang Dios, nga nagalakip sang rekord sang apat ka Ebanghelyo parte sa kabuhi kag ministeryo ni Jesus, makapaumpaw sa aton, makapalig-on sang aton pagtuo, kag makahatag sa aton sing kaalam. (Sal. 19:7; 23:3) Nagsiling si Jesus: “Malipayon ang mga nagapamati sa pulong sang Dios kag nagatuman sini!”—Luc. 11:28.

14-15. (a) Suno sa Juan 12:27, 28, ano ang ikatlo nga tion nga naghambal si Jehova halin sa langit? (b) Paano ang ginhambal ni Jehova nagpalig-on kag nagpabakod kay Jesus?

¹⁴ Basaha ang Juan 12:27, 28. Mabasa sa Ebanghelyo ni Juan ang ikatlo nga tion nga naghambal si Jehova halin sa langit. Mga pila ka adlaw antes sang kamatayon ni Jesus,  ara sia sa Jerusalem para saulugon ang iya katapusan nga Paskua. “Natublag ako,” siling niya. Dayon nangamuyo sia: “Amay, himayaa ang imo ngalan.” Kag ang iya Amay naghambal halin sa langit: “Ginhimaya ko na ini kag himayaon ko ini liwat.”

¹⁵ Natublag si Jesus bangod sa iya daku nga responsibilidad nga magpabilin nga matutom kay Jehova. Nahibaluan ni Jesus nga paantuson gid sia kag patyon. (Mat. 26:38) Pero ang pinakaimportante kay Jesus amo ang paghimaya sa ngalan sang iya Amay. Gin-akusahan sia nga manugpasipala, kag nabalaka sia nga basi mapakahuy-an ang Dios bangod sang iya kamatayon. Pat-od gid nga ang ginhambal ni Jehova naghatag sing kaisog kay Jesus! Makasigurado sia nga mahimaya ang ngalan ni Jehova. Ang ginhambal sang iya Amay nagpalig-on kag nagpabakod sa iya nga batason ang mga kabudlayan nga iya maatubang. Mahimo nga si Jesus lang ang nakahangop sang ginsiling sadto sang iya Amay, pero ginsigurado ni Jehova nga masulat ang Iya ginhambal para sa aton tanan.—Juan 12:29, 30.

16. Ngaa mahimo mabalaka kita kon kaisa nga mahuy-an ang ngalan sang Dios?

¹⁶ Pareho kay Jesus, mahimo mabalaka man kita nga mahuy-an ang ngalan ni Jehova. Mahimo nga pareho kay Jesus, nagaatubang kita sang inhustisya. Ukon ayhan nabalaka kita sa mga kabutigan nga ginapalapta sang mga nagapamatok sa aton. Mahimo mahunahuna naton nga mahuy-an ang ngalan ni Jehova kag ang iya  organisasyon bangod sa sining mga kabutigan. Kon matabo ini, ang ginsiling ni Jehova makapalig-on gid sa aton. Indi kita dapat mabalaka sing sobra. Makasigurado kita nga “ang paghidait sang Dios nga labaw sa tanan nga paghangop magabantay sang [aton] tagipusuon kag ikasarang sa paghunahuna paagi kay Cristo Jesus.” (Fil. 4:6, 7) Pirme gid himayaon ni Jehova ang iya ngalan. Paagi sa iya Ginharian, dulaon niya ang tanan nga halit nga ginhimo ni Satanas kag sang sini nga kalibutan sa Iya matutom nga mga alagad.—Sal. 94:22, 23; Isa. 65:17.

17. Suno sa Isaias 30:21, paano nagahambal si Jehova sa aton subong?

¹⁷ Nagahambal gihapon si Jehova sa aton subong. (Basaha ang Isaias 30:21.) Matuod, indi naton mabatian nga nagahambal ang Dios sa aton halin sa langit. Pero ginhatag niya ang iya Pulong, ang Biblia, para magtuytoy sa aton. Dugang pa, ang espiritu ni Jehova nagabulig sa “matutom nga tulugyanan” nga padayon nga maghatag sa Iya mga alagad sang ila pagkaon. (Luc. 12:42) Madamo gid nga espirituwal nga pagkaon ang ginahatag sa aton, pareho sang naimprinta nga mga publikasyon kag mga video. May mga publikasyon man nga mabasa kag mapamatian sa aton mga website.

18. Paano ang ginsiling ni Jehova nagpalig-on sang imo pagtuo kag kaisog?

¹⁸ Pirme naton dumdumon ang ginsiling ni Jehova sang ari sa duta ang iya Anak! Kabay nga ang ginhambal sang Dios, nga nasulat sa Biblia, magpasalig sa aton nga kontrolado ni Jehova ang tanan nga nagakatabo, kag dulaon niya ang halit nga ginhimo sa aton ni Satanas kag sang iya malaut nga kalibutan. Kag kabay nga mangin determinado kita nga pamatian sing maayo ang tingog ni Jehova. Kon himuon naton ini, mabatas naton ang mga problema subong kag ang mga kabudlayan sa ulihi. Ang Biblia nagapahanumdom sa aton: “Kinahanglan nga magbatas kamo, agod sa tapos ninyo mahimo ang kabubut-on sang Dios, mabaton ninyo ang katumanan sang saad.”—Heb. 10:36.