1. Suno sa Mateo 24:9, ngaa indi kita dapat matingala kon ginadumtan kita sang kalibutan?

SANG gintuga kita ni Jehova, gusto niya nga pakitaan naton sing gugma ang iban, kag gusto niya nga higugmaon man nila kita. Gani kon ginadumtan kita, nasakitan kita kag posible nga nahadlok pa gani kita. Halimbawa, ang isa ka sister nga si Georgina nga taga-Europe, nagsiling: “Sang 14 anyos ako, naakig gid si Nanay kay nag-alagad ako kay Jehova. Nasubuan gid ako, kag pamatyag ko nagaisahanon lang ako. Nahunahuna ko nga basi indi ako maayo nga bata.” * Ang isa ka brother nga si Danylo nagsulat: “Ginkastigo ako sang mga soldado, gin-insulto, kag ginpahog nila ako bangod isa ako ka Saksi ni Jehova. Hinadlukan ako, kag pamatyag ko manubo gid ang pagtan-aw nila sa akon.” Nasubuan gid kita kon ginadumtan kita sang mga tawo, pero wala na kita natingala sa sini. Gintagna ni Jesus nga dumtan kita.—Basaha ang Mateo 24:9.

2-3. Ngaa ginadumtan ang mga sumulunod ni Jesus?

² Ginadumtan sang kalibutan ang mga sumulunod ni Jesus. Ngaa? Bangod pareho kay Jesus, “indi [kita] bahin sang kalibutan.” (Juan 15:17-19) Ginarespeto naton ang mga gobierno sang tawo, pero wala kita nagapasilabot sa pulitika, nagasaludo sa bandera, ukon nagakanta sang national anthem. Si Jehova lang ang aton ginasimba. Ginasakdag naton ang kinamatarong sang Dios nga maggahom sa katawhan, pero ginakuestyon ni Satanas kag sang iya “kaliwat” ini nga kinamatarong. (Gen. 3:1-5, 15) Ginabantala naton nga ang Ginharian sang Dios lang ang makasolbar sang mga problema sang katawhan, kag dali na lang laglagon sini nga Ginharian ang tanan nga nagapamatok sa sini. (Dan. 2:44; Bug. 19:19-21) Maayo ini nga balita para sa mga mahagop, pero malain ini nga balita para sa mga malauton.—Sal. 37:10, 11.

³ Ginadumtan man kita bangod ginatuman naton ang mga kasuguan  sang Dios. Kon parte sa husto kag sala, lain gid ang ginasiling sang mga tawo sa kalibutan sangsa ginasiling sang Dios. Halimbawa, madamo nga tawo subong ang nagasiling nga indi sala ang imoral nga mga buhat. Pero para sa Dios, sala gid ini kay ginlaglag niya ang mga tawo sa Sodoma kag Gomorra bangod sang ila imoral nga mga ginahimo. (Jud. 7) Bangod ginasunod naton ang mga kasuguan sang Biblia parte sa sini nga mga buhat, madamo nga tawo ang nagayaguta sa aton kag nagasiling sila nga estrikto kita katama.—1 Ped. 4:3, 4.

4. Ano nga mga kinaiya ang makabulig sa aton kon ginadumtan kita sang mga tawo?

⁴ Kon ginadumtan kita kag ginainsulto sang mga tawo, ano ang makabulig sa aton nga mabatas ini? Kinahanglan naton ang mabakod nga pagtuo nga buligan kita ni Jehova. Pareho sa isa ka taming, ‘mapalong sang aton pagtuo ang tanan nga nagadabadaba nga baslay sang isa nga malauton.’ (Efe. 6:16) Pero magluwas sa pagtuo, kinahanglan man naton ang gugma. Ngaa? Bangod ang gugma ‘indi maakigon.’ Nagaantos ini kag nagabatas sang tanan nga butang nga makasakit sa aton. (1 Cor. 13:4-7, 13) Bangod ginadumtan kita sang kalibutan, binagbinagon naton kon paano kita mabuligan sang gugma nga mabatas ini. Tun-an naton kon paano makabulig ang aton gugma kay Jehova, ang aton gugma sa aton mga kauturan, kag ang aton gugma sa aton mga kaaway.

5. Bangod ginahigugma ni Jesus ang iya Amay, ano ang nasarangan niya nga himuon?

⁵ Sang gab-i antes ginpatay si Jesus sang iya mga kaaway, ginsilingan niya ang iya matutom nga mga sumulunod: “Ginahigugma ko ang Amay, [gani] ginahimo ko ang suno sa sugo nga ginhatag sang Amay sa akon.” (Juan 14:31) Bangod ginahigugma ni Jesus si Jehova, nabatas niya ang mabudlay nga mga pagtilaw. Kon ginahigugma naton si Jehova, masarangan man naton ang mga kabudlayan.

6. Suno sa Roma 5:3-5, ano ang ginabatyag sang mga alagad ni Jehova bisan pa ginadumtan sila sang kalibutan?

⁶ Halin pa sang una, nabatas sang mga alagad ni Jehova ang mga paghingabot bangod sang ila gugma sa iya. Halimbawa, ginmanduan sadto sang pinakamataas nga hukmanan sang mga Judiyo ang mga apostoles nga mag-untat sa pagbantala. Pero bangod ginahigugma sang mga apostoles ang Dios, nagdesisyon sila nga “tumanon ang Dios subong manuggahom sa baylo sang mga tawo.” (Binu. 5:29; 1 Juan 5:3) Ining mabakod nga gugma sa Dios amo man ang nagapalig-on sa aton mga kauturan subong nga magpabilin nga matutom bisan pa ginahingabot sila sang mga gobierno. Bisan pa ginadumtan kita sang kalibutan, malipayon kita kag wala nagaluya ang aton buot.—Binu. 5:41; basaha ang Roma 5:3-5.

7. Ano ang dapat nga mangin reaksion naton kon pamatukan kita sang aton pamilya?

⁷ Ang pagpamatok sang aton pamilya amo ang isa sa pinakamabudlay nga pagtilaw. Sang nagtuon kita sang kamatuoran, posible nga ginhunahuna sang pila ka miembro sang aton pamilya nga nalimbungan kita. Posible nga ginhunahuna sang iban nga nagbuang na kita. (Ipaanggid ang Marcos 3:21.) Posible nga ginsakit pa gani kita ukon ginhambalan sing malain. Wala na kita natingala sa sini nga mga pagpamatok. Si Jesus nagsiling: “Ang kaaway sang tawo amo mismo ang mga katapo sang iya panimalay.” (Mat. 10:36) Pero bisan pa pamatukan kita sang aton mga paryente, wala naton sila ginakabig nga mga kaaway. Mas ginahigugma pa gid gani naton ang mga tawo bangod nagabakod ang aton gugma kay Jehova. (Mat. 22:37-39) Kon hambalan kita sang iban nga indi pagtumanon ang mga kasuguan kag mga prinsipio sa Biblia, indi gid naton ini paghimuon para lang malipay sila.

8-9. Ano ang nakabulig sa isa ka sister nga mabatas ang grabe nga pagpamatok?

⁸ Nabatas ni Georgina, nga ginsambit kaina, ang grabe nga pagpamatok sang iya iloy. Si Georgina nagsiling: “Nag-Bible study kami ni Nanay sa mga  Saksi. Pagligad sang anom ka bulan, gusto ko na magtambong sa mga miting, pero ginpamatukan ako ni Nanay. Nagaistorya gali sia sa mga apostata, kag ginagamit niya ang ila sala nga mga akusasyon kon nagaistorya kami. Ginainsulto man niya ako, ginagan-it niya ang akon buhok, ginakuga niya ako, kag ginapanghaboy niya ang akon mga publikasyon. Sang nag-15 anyos ako, nagpabawtismo ako. Indi gusto ni Nanay nga mag-alagad ako kay Jehova, gani gindala niya ako sa pasilidad nga nagabulig sa mga tin-edyer. Ang iban nga mga tin-edyer nga ari diri mga adik sa droga ukon nagahimo sang krimen. Kon ang nagapamatok sa imo amo kuntani ang nagapalangga kag nagaatipan sa imo, mabudlay gid ini batason.”

⁹ Ano ang nakabulig kay Georgina nga makabatas? Nagsiling sia: “Sang adlaw nga ginpamatukan ako ni Nanay, bag-o ko lang natapos ang pagbasa sang bilog nga Biblia. Kumbinsido gid ako nga ang akon natun-an amo ang kamatuoran, kag nabatyagan ko nga nagsuod ako kay Jehova. Pirme ako nagapangamuyo sa iya, kag ginapamatian niya ako. Sang ara ako sa pasilidad, gin-agda ako sang isa ka sister sa iya balay kag gintun-an namon ang Biblia. Ginpalig-on man ako sang mga kauturan sa Kingdom Hall. Ginkabig nila ako nga miembro sang ila pamilya. Base sa akon eksperiensia, masiling ko gid nga mas gamhanan si Jehova sa tanan nga nagapamatok sa aton.”

10. Ano ang masigurado naton nga himuon ni Jehova nga aton Dios?

¹⁰ Si apostol Pablo nagsulat nga ‘mabaton gid naton ang gugma sang Dios nga ginapakita man ni Cristo Jesus nga aton Ginuo kay wala sing makapugong sa sini.’ (Roma 8:38, 39) Bisan pa nagaantos kita kon kaisa, ara gid pirme si Jehova para paumpawan kita kag palig-unon. Kag base sa eksperiensia ni Georgina, ginabuligan man kita ni Jehova paagi sa mga kauturan sa kongregasyon.

11. Paano makabulig sa mga disipulo ni Jesus ang gugma nga ginsambit niya sa Juan 15:12, 13? Maghatag sing halimbawa.

¹¹ Sang gab-i antes ginpatay si Jesus, ginpahanumdom niya sa iya mga disipulo nga dapat sila maghigugmaanay. (Basaha ang Juan 15:12, 13.) Kabalo sia nga kon may gugma sila nga handa magsakripisyo, mabuligan sila sini nga padayon nga mahiusa kag mabatas ang paghingabot sang kalibutan. Binagbinaga ang natabo sa kongregasyon sa Tesalonica. Pagkatukod pa lang sang sini nga kongregasyon, ginhingabot dayon ang mga kauturan. Pero ginbatas nila ini kag nagpakita sila sang gugma. (1 Tes. 1:3, 6, 7) Ginpalig-on sila ni Pablo nga padayon nga maghigugmaanay kag “himuon ini sing bug-os.” (1 Tes. 4:9, 10) Kon may gugma sila, palig-unon sila sini nga paumpawan  ang mga nasubuan kag buligan ang mga nagakinahanglan. (1 Tes. 5:14) Gintuman gid nila ang mga instruksion ni Pablo, kay sa iya ikaduha nga sulat pagligad sang mga isa ka tuig, ginsilingan niya sila: “Ang gugma sang kada isa kag sang tanan nagadugang sa isa kag isa.” (2 Tes. 1:3-5) Bangod sang ila gugma, nabatas nila ang mga kabudlayan kag paghingabot.

12. Sa tion sang inaway sa isa ka pungsod, paano ginpakita sang mga kauturan ang ila gugma sa isa kag isa?

¹² Binagbinaga ang eksperiensia ni Danylo, nga ginsambit kaina, kag sang iya asawa. May inaway sadto sa ila pungsod kag nakalab-ot ini sa ila banwa nga ginaistaran. Bisan pa sa sini, padayon sila nga nagatambong sa mga miting, nagabantala sila sa bug-os nila nga masarangan, kag ginahatagan nila sang pagkaon ang mga kauturan. Dayon isa ka adlaw, ginkadtuan si Danylo sang armado nga mga soldado. “Ginpilit nila ako nga sikwayon ko ang akon relihion,” siling ni Danylo. “Sang nangindi ako, ginkastigo nila ako. Dayon ginpahog nila ako paagi sa pagtiro sa akon, pero ginpalapaw lang nila ang bala sa akon ulo. Antes sila maghalin, nagsiling sila nga mabalik sila kag luguson nila ang akon asawa. Pero dalidali kami nga ginpasakay sang mga kauturan sa tren pakadto sa iban nga banwa. Indi ko gid malipatan ang gugma sang sini nga mga kauturan. Pag-abot namon sa banwa nga ginsayluhan namon, ginhatagan kami sang mga kauturan didto sang pagkaon, kag ginbuligan nila ako nga makakita sang obra kag ilistaran. Sang ulihi, nakapaistar kami sang pila ka kauturan nga nagpalagyo man bangod sa inaway.” Ginapakita sang sini nga mga eksperiensia nga ang aton gugma sa isa kag isa makabulig sa aton nga mabatas ang mga paghingabot.

13. Paano kita ginabuligan sang balaan nga espiritu nga padayon nga mag-alagad kay Jehova bisan pa ginahingabot kita?

¹³ Ginsilingan ni Jesus ang iya mga sumulunod nga higugmaon nila ang ila mga kaaway. (Mat. 5:44, 45) Mahapos lang bala ini himuon? Indi! Pero posible ini sa bulig sang balaan nga espiritu sang Dios. Nalakip sa mga kinaiya nga ginapatubas sang balaan nga espiritu sang Dios amo ang gugma, pagkamapinasensiahon, maayo nga kabubut-on, kalulo, kag pagpugong sa kaugalingon. (Gal. 5:22, 23) Mabuligan kita sini nga mga kinaiya nga mabatas ang mga paghingabot. Madamo nga tawo ang nag-untat sa pagpamatok sa aton bangod nakita nila ini nga mga kinaiya sa ila Saksi nga bana, asawa, bata, ukon kaingod. Nangin utod pa gani naton ang madamo nga nagapamatok sadto sa aton. Gani kon nabudlayan ka nga higugmaon ang mga nagahingabot sa imo bangod  nagaalagad ka kay Jehova, mangamuyo nga hatagan ka sang balaan nga espiritu. (Luc. 11:13) Kag magsalig nga ang ginapatuman sang Dios amo gid pirme ang pinakamaayo.—Hulu. 3:5-7.

14-15. Sang ginpamatukan si Yasmeen sang iya bana, paano nakabulig sa iya ang Roma 12:17-21 para mapakita niya ang gugma sa iya bana?

¹⁴ Binagbinaga ang eksperiensia ni Yasmeen nga taga-Middle East. Sang nangin isa sia ka Saksi ni Jehova, nahunahuna sang iya bana nga nalimbungan sia, gani gusto sang iya bana nga mag-untat sia sa iya pag-alagad sa Dios. Gin-insulto sia sang iya bana. Dayon ginsilingan sang iya bana ang ila mga paryente, ang lider sang ila relihion, kag ang isa ka babaylan nga pahugon si Yasmeen kag patupatuan sia nga ginaguba niya ang iya pamilya. Ginpakalain pa gani sang iya bana ang mga kauturan samtang nagamiting ang kongregasyon. Pirme lang nagahibi si Yasmeen bangod sang indi maayo nga pagtratar sa iya.

¹⁵ Ginpaumpawan kag ginpalig-on si Yasmeen sang mga kauturan sa Kingdom Hall. Ginpalig-on sia sang mga gulang nga iaplikar ang ginasiling sang Roma 12:17-21. (Basaha.) “Mabudlay gid ini,” siling ni Yasmeen. “Pero ginpangabay ko si Jehova nga buligan niya ako, kag ginhimo ko ang akon bug-os nga masarangan nga iaplikar ang ginasiling sang Biblia. Gani sang hungod nga ginhigkuan sang akon bana ang amon kusina, gintinluan ko ini. Sang gin-insulto niya ako, kalmado lang ako nga nagsabat. Kag sang nagmasakit sia, gin-atipan ko sia.”

16-17. Ano ang natun-an mo sa eksperiensia ni Yasmeen?

¹⁶ Ginpakamaayo si Yasmeen bangod sang gugma niya sa iya bana. Nagsiling sia: “Ginsaligan pa gid ako sang akon bana kay kabalo sia nga wala ako nagabutig sa iya. Ginapamatian na niya ako sing maayo kon nagaistorya kami parte sa relihion, kag nagsiling sia nga tinguhaan niya nga mangin malinong ang amon pag-updanay. Ginapalig-on na niya ako nga magtambong sa mga miting sang kongregasyon. Nagsuod pa gid kami nga duha kag nangin malipayon. Nagalaum ako nga kuntani matuon man ang akon bana sang kamatuoran kag makaupod ko sia sa pag-alagad kay Jehova.”

¹⁷ Ginapakita sang eksperiensia ni Yasmeen nga ang gugma ‘nagaantos sang tanan nga butang, nagalaum sang tanan nga butang, kag nagabatas sang tanan nga butang.’ (1 Cor. 13:4, 7) Mas gamhanan ang gugma sangsa dumot. Kon higugmaon naton ang mga nagahingabot sa aton, mahimo magbag-o ang ila pagtan-aw sa aton kag mahimo mag-untat sila sa pagpamatok sa aton. Kag mapasadya naton si Jehova. Pero bisan pa padayon kita nga dumtan sang mga nagapamatok sa aton, puede kita gihapon mangin malipayon. Ngaa?

18. Ngaa puede kita gihapon mangin malipayon bisan pa ginadumtan kita?

¹⁸ Si Jesus nagsiling: “Malipayon kamo kon ginadumtan kamo sang mga tawo.” (Luc. 6:22) Indi naton gusto nga dumtan kita. Wala naton ginapangayo nga hingabuton kita para tawgon kita nga martir. Pero ngaa puede kita gihapon mangin malipayon bisan pa ginadumtan kita? Binagbinaga ang tatlo ka rason. Una, kon nagabatas kita, nalipay ang Dios sa aton. (1 Ped. 4:13, 14) Ikaduha, matilawan ang aton pagtuo gani mangin mabakod ini. (1 Ped. 1:7) Kag ikatlo, mabaton naton ang dalayawon nga padya nga amo ang kabuhi nga wala sing katapusan.—Roma 2:6, 7.

19. Ngaa malipayon gihapon ang mga apostoles bisan pa ginbunal sila?

¹⁹ Wala madugay pagkatapos ginbanhaw si Jesus, naeksperiensiahan sang mga apostoles ang kalipay nga ginsiling niya. Ginbunal sila kag ginmanduan nga mag-untat sa pagbantala, pero malipayon sila gihapon. Ngaa? “Bangod ginkabig sila nga takus pakahuy-an tungod sa [ngalan ni Jesus].” (Binu. 5:40-42) Mas labaw ang ila gugma sa ila Agalon sangsa ila kahadlok sa ila mga kaaway. Kag bangod sang ila gugma, “wala sila mag-untat” sa pagbantala sing maayong balita. Madamo sa aton mga kauturan subong ang padayon nga nagaalagad sing matutom bisan pa sang mga kabudlayan. Kabalo sila nga indi gid pagkalimtan ni Jehova ang ila binuhatan kag ang gugma nga ginpakita nila para sa iya ngalan.—Heb. 6:10.

20. Ano ang binagbinagon naton sa masunod nga artikulo?

²⁰ Samtang ara pa ining daan nga sistema, hingabuton gid kita sang kalibutan. (Juan 15:19) Pero indi kita dapat mahadlok. Binagbinagon naton sa masunod nga artikulo nga ‘palig-unon kag amligan’ ni Jehova ang mga matutom sa iya. (2 Tes. 3:3) Gani padayon naton nga higugmaon si Jehova, ang aton mga kauturan, kag bisan ang aton mga kaaway. Kon himuon naton ini, padayon kita nga mahiusa kag mangin mabakod ang aton pagtuo. Madayaw man naton si Jehova, kag mapamatud-an naton nga mas gamhanan ang gugma sangsa dumot.