TULUN-AN NGA ARTIKULO 10
Masarangan Mo nga ‘Ubahon ang Daan nga Personalidad’
“Ubaha ninyo ang daan nga personalidad upod ang mga buhat sini.”—COL. 3:9.
AMBAHANON 29 Mangin Takus sa Amon Ngalan
ANG BINAGBINAGON SA SINI NGA ARTIKULO *
1. Ano ang kabuhi mo antes ka nag-Bible study?
ANO ang kabuhi mo antes ka nag-Bible study upod sa mga Saksi ni Jehova? Madamo sa aton ang indi na gusto nga pamensaron pa ini. Posible nga ginasunod naton ang ginasiling sang kalibutan parte sa husto kag sala, kag makita ini sa aton pamatasan kag personalidad. Gani sang ginasunod naton ang kalibutan, ‘wala kita sing paglaum kag wala kita sing kaangtanan sa Dios.’ (Efe. 2:12) Pero nagbag-o ang aton kabuhi sang nag-Bible study na kita.
2. Ano ang natun-an mo kag narealisar sang nag-Bible study ka?
2 Samtang naga-Bible study ka, natun-an mo nga may ara ka Amay sa langit nga nagapalangga gid sa imo. Narealisar mo nga para malipay sa imo si Jehova kag para mangin bahin ka sang iya pamilya, dapat ka maghimo sang daku nga pagbag-o sa imo kabuhi, pamatasan, kag panghunahuna. Dapat mo sundon ang ginasiling ni Jehova parte sa husto kag sala.—Efe. 5:3-5.
3. Suno sa Colosas 3:9, 10, ano ang gusto ni Jehova nga himuon naton, kag ano ang binagbinagon naton sa sini nga artikulo?
3 Si Jehova ang aton Manunuga kag Amay sa langit, gani may kinamatarong sia nga magsiling kon ano nga mga kinaiya ang dapat ipakita sang mga miembro sang iya pamilya. Kag gusto niya nga antes kita mabawtismuhan, panikasugan gid naton nga ‘ubahon ang daan nga personalidad upod ang mga buhat sini.’ * (Basaha ang Colosas 3:9, 10.) Makabulig ini nga artikulo sa mga gusto magpabawtismo nga masabat ang tatlo ka pamangkot: (1) Ano “ang daan nga personalidad”? (2) Ngaa gusto ni Jehova nga ubahon naton ini? (3) Paano naton ini mahimo? Kon bawtismado na kita, makabulig sa aton ini nga artikulo para indi naton masuksok liwat ang nauba na naton nga daan nga personalidad.
ANO “ANG DAAN NGA PERSONALIDAD”?
4. Ano ang ginahimo sang tawo nga may “daan nga personalidad”?
4 Kon ara pa sa isa ka tawo “ang daan nga personalidad,” sala nga mga butang ang iya ginahunahuna kag ginahimo. Posible nga kaayuhan lang niya ang iya ginapensar, dali sia maakig, wala sia nagapasalamat, kag bugalon sia. Mahimo nanamian sia magtan-aw sang pornograpiya kag sang imoral ukon masingki nga mga palaguaon. May maayo man sia nga mga kinaiya, kag posible nakonsiensia man sia kon may malain sia nga ginsiling ukon ginhimo. Pero indi niya gusto bag-uhon ang iya ginahunahuna kag ginahimo.—Gal. 5:19-21; 2 Tim. 3:2-5.
Kon ubahon naton “ang daan nga personalidad,” masarangan naton nga dulaon ang malain nga mga pamatasan kag untatan ang sala nga mga buhat (Tan-awa ang parapo 5) *
5. Madula bala naton ang tanan naton nga malain nga ginahunahuna kag ginahandum? Ipaathag. (Binuhatan 3:19)
5 Indi kita perpekto, gani indi naton madula ang tanan naton nga malain nga ginahunahuna kag ginahandum. Kon kaisa, may mahimo kita ukon masiling nga hinulsulan naton. (Jer. 17:9; Sant. 3:2) Pero kon ubahon naton ang daan nga personalidad, masarangan naton nga dulaon ang malain nga mga pamatasan kag untatan ang sala nga mga buhat. Mangin bag-o na ang aton personalidad.—Isa. 55:7; basaha ang Binuhatan 3:19.
6. Ngaa gusto ni Jehova nga dulaon naton ang aton malain nga panghunahuna kag untatan ang aton malain nga ginahimo?
6 Gusto ni Jehova nga dulaon naton ang aton malain nga panghunahuna kag untatan ang aton malain nga ginahimo bangod palangga gid niya kita kag gusto niya nga mangin malipayon kita. (Isa. 48:17, 18) Kabalo sia nga kon magpadala kita sa aton malain nga mga handum, mahalitan kita kag ang aton pamilya kag mga abyan. Nasakitan sia kon nahalitan kita kag ang iban.
7. Suno sa Roma 12:1, 2, ano nga desisyon ang dapat naton himuon?
7 Sa umpisa, posible nga pakalainon kita sang aton mga abyan kag pamilya bangod ginapanikasugan naton nga bag-uhon ang aton personalidad. (1 Ped. 4:3, 4) Posible nga magsiling sila nga mahimo naton ang bisan ano nga gusto naton himuon kag indi kita dapat magpadikta sa iban. Abi sang mga tawo nga nagasikway sang mga kasuguan ni Jehova, wala sing nagaimpluwensia sa ila kay makapagusto sila sa ila kabuhi. Pero ang matuod, ginaimpluwensiahan sila sang kalibutan ni Satanas. (Basaha ang Roma 12:1, 2.) Dapat magdesisyon ang kada isa sa aton: Puede nga indi naton pag-ubahon ang aton daan nga personalidad, nga naimpluwensiahan sang aton makasasala nga handum kag sang kalibutan ni Satanas, ukon puede kita magpabulig kay Jehova nga bag-uhon ang aton kaugalingon para mapakita naton ang maayo nga mga kinaiya sa bug-os naton nga masarangan.—Isa. 64:8.
PAANO MO ‘MAUBA’ ANG DAAN NGA PERSONALIDAD?
8. Ano ang makabulig sa aton para madula naton ang aton malain nga panghunahuna kag mauntatan naton ang aton malain nga ginahimo?
8 Kabalo si Jehova nga kinahanglan ang tion kag pagpanikasog para madula naton ang aton malain nga panghunahuna kag mauntatan naton ang aton malain nga ginahimo. (Sal. 103:13, 14) Gani ginagamit ni Jehova ang iya Pulong, ang iya espiritu, kag ang iya organisasyon para buligan kita nga magbag-o paagi sa paghatag sa aton sang kaalam kag kusog. Sigurado gid nga ginbuligan ka na niya. Binagbinagon naton ang pila sa puede mo himuon para mauba mo ang daan nga personalidad kag para mabawtismuhan ka.
9. Paano ka mabuligan sang Pulong sang Dios?
9 Gamita ang Biblia para mausisa mo sing maayo ang imo kaugalingon. Ang Pulong sang Dios daw pareho sa isa ka espiho. Buligan ka sini nga mausisa ang imo ginahunahuna, ginahambal, kag ginahimo. (Sant. 1:22-25) Puede makahatag sa imo sang laygay ang naga-Bible study sa imo kag ang iban pa nga hamtong nga mga utod. Halimbawa, puede nila gamiton ang Biblia para makita mo kon ano ang imo mga ikasarang kag ang imo mga kaluyahon. Puede ka nila tudluan kon paano mangita sang impormasyon nga nabase sa Biblia nga makabulig sa imo nga mauntatan ang imo malain nga ginahimo. Kag handa gid pirme si Jehova nga buligan ka. Sia ang pinakamaayo nga makabulig sa imo kay mabasa niya ang imo tagipusuon. (Hulu. 14:10; 15:11) Gani panikasugi gid nga mangamuyo sa iya kag magtuon sang iya Pulong kada adlaw.
10. Ano ang natun-an mo sa eksperiensia ni Elie?
10 Mangin kumbinsido nga ang mga kasuguan ni Jehova amo ang pinakamaayo. Para sa aton kaayuhan ang tanan nga ginapatuman sa aton ni Jehova. Ang mga nagatuman sang iya mga kasuguan may kompiansa sa ila kaugalingon, may direksion ang ila kabuhi, kag nakabatyag sila sang matuod nga kalipay. (Sal. 19:7-11) Pero nahalitan gid ang mga wala nagtuman sa mga kasuguan ni Jehova kag nagpadala sa ila makasasala nga handum. Binagbinaga ang ginsiling sang isa ka lalaki nga si Elie parte sa pagsikway sa mga kasuguan sang Dios. Matutom nga mga Saksi ni Jehova ang iya mga ginikanan. Pero sang nagtin-edyer si Elie, nag-upod sia sa malain nga mga kaupdanan. Nangin adik sia sa droga, nangin imoral sia, kag nangin kawatan. Nagsiling si Elie nga natalupangdan niya nga kadali lang sa iya maakig kag nangin bayolente sia. “Ginhimo ko ang tanan nga buhat nga indi dapat himuon sang isa ka Cristiano,” siling niya. Pero wala nalipatan ni Elie ang mga natun-an niya sang pamatan-on pa sia. Sang ulihi, nag-Bible study sia liwat. Nagpanikasog sia nga untatan ang malain niya nga ginahimo, kag nabawtismuhan sia sang 2000. Ano ang benepisyo kay Elie kay ginsunod niya ang mga kasuguan ni Jehova? Nagsiling si Elie: “Matawhay na ang akon pensar kag wala na ako ginatublag sang akon konsiensia.” * Ginapakita sini nga eksperiensia nga mahalitan gid ang mga nagasikway sang mga kasuguan ni Jehova. Pero kon gusto nila magbag-o, handa si Jehova nga buligan sila.
11. Ano ang mga ginadumtan ni Jehova?
11 Dumti ang mga ginadumtan ni Jehova. (Sal. 97:10) Ginasiling sang Biblia nga ginadumtan ni Jehova ang “matinaastaason nga mga mata, butigon nga dila, [kag] mga kamot nga nagapaagay sing dugo nga wala sing sala.” (Hulu. 6:16, 17) “Ginakangil-aran [man niya] ang mga mapintas kag nagapangdaya.” (Sal. 5:6) Ginadumtan gid ni Jehova ini nga mga pamatasan kag mga buhat. Ang isa ka pamatuod sini amo ang paglaglag niya sa tanan nga malain nga mga tawo sang panahon ni Noe bangod ginpuno nila ang duta sang kasingki. (Gen. 6:13) Binagbinaga ang isa pa ka halimbawa. Paagi kay manalagna Malaquias, nagsiling si Jehova nga ginadumtan Niya ang mga nagaluib sa ila mga asawa para madiborsiohan nila sila. Wala ginabaton sang Dios ang ila pagsimba, kag manabat sila sa ila ginahimo.—Mal. 2:13-16; Heb. 13:4.
Nangil-ad kita kon silingan kita nga kaunon ang dunot nga pagkaon. Amo man sini ang dapat naton mabatyagan parte sa mga butang nga ginsiling ni Jehova nga malain (Tan-awa ang parapo 11-12)
12. Ano ang buot silingon sang ‘kangil-aran ang malaut’?
12 Gusto ni Jehova nga ‘kangil-aran naton ang malaut.’ (Roma 12:9) Ang tinaga nga ‘kangil-aran’ nagapatuhoy sa isa ka mabaskog nga balatyagon. Nagakahulugan ini sang grabe nga dumot ukon kangil-ad sa isa ka butang. Imadyina ang imo mabatyagan kon silingan ka nga kaunon ang dunot nga pagkaon. Sigurado gid nga nagalalain ka na bisan pamensaron pa lang ini. Amo man sini ang dapat naton mabatyagan parte sa mga butang nga ginsiling ni Jehova nga malain. Dapat nga nangil-ad na kita bisan ang pagpamensar lang sa sini.
13. Ngaa dapat naton amligan ang aton panghunahuna?
13 Amligi ang imo panghunahuna. Ang aton mga ginahimo resulta sang aton mga ginahunahuna. Amo ini ang rason kon ngaa gintudluan kita ni Jesus nga isikway ang panghunahuna nga posible nga magresulta sa paghimo sang serioso nga sala. (Mat. 5:21, 22, 28, 29) Gusto naton nga malipay sa aton ang aton Amay sa langit. Gani importante gid nga isikway naton dayon ang malain nga panghunahuna.
14. Ano ang mabal-an parte sa aton kon basihan ang aton ginahambal, kag ano nga mga pamangkot ang dapat naton sabton?
14 Maghalong sa imo ginahambal kag paagi sang paghambal. Nagsiling si Jesus: “Ang nagagua sa baba nagahalin sa tagipusuon.” (Mat. 15:18) Ginapahangop sini nga mabal-an sa aton ginahambal kon sin-o gid kita. Gani pamangkuta ang imo kaugalingon: ‘Wala bala ako nagabutig, kag ginasugid ko bala ang matuod bisan pa maakig sa akon ang iban? Kon may asawa ako ukon bana, ginalikawan ko bala nga mag-flirt ukon magpakiat sa indi ko asawa ukon bana? Ginalikawan ko bala ang binastos nga panghambal nga daw pareho lang nga nagalikaw ako sa makalalaton nga balatian? Kon naakig ako sa isa ka tawo, nagasabat bala ako sing kalmado sa iya?’ Makabulig sa imo ang pagpamalandong sa sini nga mga pamangkot. Ang imo paghambal daw pareho sa mga butones sa isa ka bayo. Kon hukson mo ang mga butones, mas mahapos para sa imo nga ubahon ang imo bayo. Kon likawan mo man ang masakit nga panghambal, pagbutig, kag binastos nga panghambal, mas mahapos man para sa imo nga ubahon ang daan nga personalidad.
15. Ano ang buot silingon sang paglansang “sa usok” sang aton daan nga personalidad?
15 Bag-uha dayon ang mga dapat mo bag-uhon. May gingamit si apostol Pablo nga isa ka ilustrasyon para tudluan kita nga importante gid nga maghimo kita sang mga pagbag-o. Nagsulat sia nga dapat naton ilansang “sa usok” ang aton daan nga personalidad. (Roma 6:6) Buot silingon, dapat naton ilugon ang halimbawa ni Jesus. Handa si Jesus nga ilansang sia sa usok para malipay si Jehova sa iya. Gani para malipay sa aton si Jehova, dapat handa man kita nga dulaon ang aton mga pamatasan kag untatan ang aton ginahimo nga ginadumtan ni Jehova. Kon himuon naton ini, mangin matinlo ang aton konsiensia kag may paglaum kita nga mabuhi sing wala sing katapusan. (Juan 17:3; 1 Ped. 3:21) Tandai nga indi pagbag-uhon ni Jehova ang iya mga kasuguan para paayunan ang aton gusto. Kita ang dapat magbag-o kag kita ang dapat magsunod sa iya mga kasuguan.—Isa. 1:16-18; 55:9.
16. Ngaa dapat padayon mo nga pakigbatuan ang imo mga kaluyahon?
16 Padayon nga pakigbatui ang imo mga kaluyahon. Bisan pa mabawtismuhan ka na, dapat mo gihapon pakigbatuan ang imo mga kaluyahon. Binagbinaga ang eksperiensia ni Maurício. Sang pamatan-on sia, nangin isa sia ka homoseksuwal. Sang ulihi, may naistorya sia nga mga Saksi ni Jehova, kag nagpa-Bible study sia sa ila. Naghimo sia sang mga pagbag-o sa iya kabuhi, kag nabawtismuhan sia sang 2002. Bisan pa madamo na nga tuig nga nagaalagad si Maurício kay Jehova, nagsiling sia: “Kon kaisa, ginapakigbatuan ko gihapon ang akon indi husto nga balatyagon.” Pero wala ini nagpaluya sang iya buot. Nagsiling sia: “Ginadumdom ko nga kon mabatuan ko ini, malipay si Jehova sa akon.” *
17. Base sa eksperiensia ni Nabiha, ano ang natun-an mo nga nagpalig-on sa imo?
17 Mangamuyo kay Jehova nga buligan ka, kag magsalig sa iya espiritu, indi sa imo kusog. (Gal. 5:22; Fil. 4:6) Dapat gid kita magpanikasog para mauba naton ang aton daan nga personalidad kag para indi na naton ini masuksok liwat. Binagbinaga ang eksperiensia sang isa ka babayi nga si Nabiha. Sang seis anyos sia, ginbayaan sang iya amay ang ila pamilya. “Naglalain ako kag nasakitan gid,” siling niya. Samtang nagadaku si Nabiha, nangin masingki sia kag dali maakig. Sang ulihi, nagabaligya na sia sang droga. Pero naaresto sia kag napriso sang pila ka tuig. May mga Saksi nga nagbisita sa prisuhan, kag nagpa-Bible study sia sa ila. Daku gid ang ginbag-o ni Nabiha. “Mahapos lang dulaon ang pila ko ka bisyo,” siling niya. “Pero nabudlayan ako nga untatan ang pagpanigarilyo.” Sobra isa ka tuig nga nagpanikasog si Nabiha para mauntatan niya ang pagpanigarilyo. Ano ang nakabulig sa iya? Nagsiling sia: “Labaw sa tanan, nakabulig sa akon ang padayon nga pagpangamuyo kay Jehova.” Subong, amo ini ang ginasiling niya sa iban: “Nagasalig ako nga kon nasarangan ko magbag-o para pahamut-an si Jehova, mahimo man ini ni bisan sin-o!” *
MASARANGAN MO MAGBAG-O PARA MABAWTISMUHAN KA
18. Suno sa 1 Corinto 6:9-11, ano ang nasarangan himuon sang madamo nga alagad sang Dios?
18 Sang unang siglo, may mga lalaki kag babayi nga ginpili si Jehova nga mangin manuggahom kaupod sang Cristo, kag ang pila sa ila malain anay nga mga tawo. Halimbawa, ang iban sa ila makihilahion, homoseksuwal, kag kawatan. Pero sa bulig sang balaan nga espiritu sang Dios, nabag-o nila ang ila personalidad. (Basaha ang 1 Corinto 6:9-11.) Amo man subong, minilyon ang nabuligan sang Biblia nga maghimo sang mga pagbag-o sa ila kabuhi. * Bisan mabudlay himuon, nauntatan nila ang malain nila nga ginahimo. Ang ila halimbawa nagapamatuod nga masarangan mo man bag-uhon ang imo personalidad kag mauntatan mo ang imo malain nga ginahimo para mabawtismuhan ka.
19. Ano ang binagbinagon sa masunod nga artikulo?
19 Magluwas nga dapat ubahon sang mga gusto magpabawtismo ang ila daan nga personalidad, dapat man nila panikasugan nga isuksok ang bag-o nga personalidad. Binagbinagon sa masunod nga artikulo kon paano nila ini mahimo kag kon paano sila mabuligan sang iban.
AMBAHANON 41 Palihug Pamatii ang Akon Pangamuyo
^ par. 5 Para mabawtismuhan kita, dapat handa kita nga bag-uhon ang aton personalidad. Buligan kita sini nga artikulo nga mabal-an kon ano ang daan nga personalidad, kon ngaa dapat naton ini ubahon, kag kon paano naton ini mahimo. Binagbinagon naman sa masunod nga artikulo kon paano naton masuksok ang bag-o nga personalidad kag padayon ini nga ipakita bisan pa nabawtismuhan na kita.
^ par. 3 DUGANG NGA PAATHAG: Ang ‘pag-uba sang daan nga personalidad’ nagakahulugan sang pagdula sang mga pamatasan kag mga handum nga indi gusto ni Jehova. Dapat ini himuon antes sang bawtismo.—Efe. 4:22.
^ par. 10 Para sa dugang nga impormasyon, tan-awa ang artikulo nga “Ang Biblia Nagapabag-o sang Kabuhi—‘Dapat Ako Magbalik kay Jehova,’” nga mabasa sa Abril 1, 2012, nga Ang Lalantawan.
^ par. 16 Para sa dugang nga impormasyon, tan-awa ang artikulo nga “Ang Biblia Nagapabag-o sang Kabuhi—‘Maayo Gid Sila sa Akon,’” nga mabasa sa Mayo 1, 2012, nga Ang Lalantawan.
^ par. 17 Para sa dugang nga impormasyon, tan-awa ang artikulo nga “Ang Biblia Nagapabag-o sang Kabuhi—‘Maakigon Ako kag Masingki nga Pamatan-on,’” nga mabasa sa Oktubre 1, 2012, nga Ang Lalantawan.
^ par. 18 Tan-awa ang kahon nga “ Ang Biblia Nagapabag-o sang Kabuhi.”
^ par. 64 PIKTYUR: Ang pagdula naton sang aton malain nga mga pamatasan kag pag-untat sang aton sala nga mga buhat daw pareho sa pag-uba sang daan nga bayo.
