1-2. Paano makabulig sa mga gulang ang halimbawa ni apostol Pablo?

 PALANGGA ni apostol Pablo ang iya mga kauturan. Nagpangabudlay sia para atipanon sila. (Binu. 20:31) Gani palangga gid si Pablo sang iya mga kauturan. Isa ka bes, “naghinibi” ang mga gulang halin sa Efeso kay indi na nila sia makita liwat. (Binu. 20:37) Palangga man sang aton matutom nga mga gulang ang ila mga kauturan, kag ginahimo nila ang ila bug-os nga masarangan para buligan sila. (Fil. 2:16, 17) Pero kon kaisa, indi mahapos para sa mga gulang nga himuon ang tanan nila nga responsibilidad. Ano ang makabulig sa ila?

² Makatuon ang aton mapisan nga mga gulang sa halimbawa ni Pablo. (1 Cor. 11:1) Wala sia sing gahom pareho sa mga anghel. Indi perpekto si Pablo, kag may mga tion nga nabudlayan sia nga himuon ang husto. (Roma 7:18-20) Kag may mga problema man sia. Pero wala sia nag-untat sa pagpangabudlay para sa iya mga kauturan, kag pirme sia malipayon sa paghimo sini. Kon ilugon sang mga gulang si Pablo, padayon nila nga maalagad si Jehova sing malipayon bisan pa may mga problema sila. Binagbinagon naton kon paano nila mahimo ini.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ang apat ka responsibilidad ukon sitwasyon nga mahimo nabudlayan ang mga gulang kon kaisa: (1) pagbalanse sang ila tion sa pagbantala kag sa iban pa nila nga responsibilidad, (2) paghatag sang tion sa mga kauturan para palig-unon sila, (3) pagtinguha nga indi magluya ang ila buot bangod sang ila kaluyahon, kag (4) pagbatas sa kaluyahon sang iban. Binagbinagon naton kon paano nasarangan ni Pablo ini nga mga kabudlayan, kag kon paano mailog sang mga gulang ang iya halimbawa.

4. Ngaa posible nabudlayan kon kaisa ang mga gulang sa pagpanguna sa pagbantala nga hilikuton?

⁴ Kon ngaa mabudlay ini himuon kon kaisa. Magluwas nga ginapangunahan sang mga gulang ang pagbantala nga hilikuton, madamo pa gid sila sing responsibilidad. Halimbawa, madamo sa ila ang nagabulosbulos sa pag-chairman sa midweek miting kag sa pagdumala sa Pagtinuon sang Kongregasyon sa Biblia. Posible man nga may iban pa sila nga mga bahin. Madamo sila sing ginahimo para hanason ang mga ministeryal nga alagad, kag nalipay sila nga pirme palig-unon ang mga kauturan. (1 Ped. 5:2) Ang iban nga gulang nagabulig sa pagpatindog kag pagmentinar sang mga Kingdom Hall kag iban pa nga mga pasilidad nga ginagamit sa pagsimba kay Jehova. Pero, pareho sa tanan nga kauturan sa kongregasyon, ang pinakaimportante nga hilikuton nga ginahimo sang mga gulang amo ang pagbantala sang maayong balita.—Mat. 28:19, 20.

5. Paano nagpakita si Pablo sang maayo nga halimbawa bilang manugbantala?

⁵ Ang halimbawa ni Pablo. Sa Filipos 1:10, ginasugid sa aton ni Pablo kon ano ang nakabulig sa iya. Ginapalig-on niya kita: “[Pat-ura] ninyo ang mas importante nga mga butang.” Gin-aplikar ni Pablo ang iya laygay. Ginsugo sia nga magbantala, kag ginhimo niya ini nga pinakaimportante sa iya kabuhi sa sulod sang madamo nga tinuig. Nagbantala sia “sing dayag kag sa mga balay.” (Binu. 20:20) Wala sia nagsiling nga may oras lang sa isa ka adlaw nga gamiton niya sa pagbantala ukon mabantala lang sia sing isa ka adlaw sa isa ka semana. Nagbantala sia bisan diin kag bisan ano nga oras basta may kahigayunan sia. Halimbawa, samtang nagahulat si Pablo sa iya mga kaupod sa Atenas, ginbantalaan niya ang isa ka grupo sang kilala nga mga tawo, kag nangin tumuluo ang pila sa ila. (Binu. 17:16, 17, 34) Bisan pa ‘nabilanggo’ si Pablo, ginbantalaan niya ang mga nagabisita sa iya kag ang mga soldado nga nagabantay sa iya.—Fil. 1:13, 14; Binu. 28:16-24.

6. Ano ang gintudlo ni Pablo sa iya mga ginhanas?

⁶ Gingamit sing maayo ni Pablo ang iya tion. Pirme niya ginahagad ang iban nga updan sia sa pagbantala. Halimbawa, sa iya una nga paglakbay bilang misyonero, gin-upod niya si Juan Marcos. Kag sa iya ikaduha nga paglakbay, gin-upod niya si Timoteo. (Binu. 12:25; 16:1-4) Sigurado gid nga ginhimo ni Pablo ang iya bug-os nga masarangan para tudluan ini nga mga lalaki kon paano organisahon ang kongregasyon, kon paano palig-unon ang mga kauturan, kag kon paano mangin maayo nga manunudlo.—1 Cor. 4:17.

7. Paano matuman sang mga gulang ang laygay ni Pablo nga mabasa sa Efeso 6:14, 15?

⁷ Ang matun-an sang mga gulang. Mailog sang mga gulang si Pablo paagi sa pagbantala sa tanan nga kahigayunan. Magluwas sa pamalaybalay, dapat handa man sila nga magbantala bisan diin kag bisan ano nga oras. (Basaha ang Efeso 6:14, 15.) Halimbawa, puede sila makabantala kon  nagapamalaklon sila ukon ara sila sa ila ulubrahan. Kag kon nagabulig sila sa pagpatindog sing Kingdom Hall, puede nila bantalaan ang ila mga kaingod kag ang nagalibod nga mga tawo. Pareho kay Pablo, puede gamiton sang mga gulang ang tion nga ginagamit nila sa pagbantala para hanason ang iban, lakip na ang mga ministeryal nga alagad.

8. Kon kaisa, ano ang mas maayo nga himuon sang isa ka gulang?

⁸ Dapat likawan sang mga gulang nga mangin sobra sila kasako sa ila mga hilikuton sa kongregasyon ukon sa sirkito kay basi wala na sila sang tion sa pagbantala. Para may tion sila sa tanan nga dapat nila himuon, basi mas maayo kon indi nila pagbatunon ang pila ka asaynment. Dapat nila ini ipangamuyo kag hunahunaon sing maayo. Mabuligan sila sini nga marealisar nga kon batunon nila ang dugang nga asaynment, posible nga mapabay-an nila ang mas importante nga mga butang. Nalakip sa sini ang pagdumala sang family worship kada semana, ang pagbantala sa bug-os nila nga masarangan, kag ang paghanas sa ila kabataan sa pagbantala. Ang iban nabudlayan sa pagpangindi sa ginahatag sa ila nga pribilehiyo sa pag-alagad. Pero makasalig sila nga kon pangindian nila ini, nahangpan ni Jehova nga gusto nila mangin balanse sa tanan nila nga responsibilidad.

9. Ano ang posible nga nabudlayan nga himuon sang mga gulang kon kaisa?

⁹ Kon ngaa mabudlay ini himuon kon kaisa. Madamo sing problema ang katawhan ni Jehova. Sa sining katapusan nga mga adlaw, kinahanglan naton tanan ang pagpalig-on, bulig, kag paumpaw. Kag kon kaisa, kinahanglan buligan ang iban para indi sila makahimo sang sala. (1 Tes. 5:14) Indi masarangan sang mga gulang nga solbaron ang tanan nga problema sang katawhan ni Jehova. Pero gusto ni Jehova nga himuon sang mga gulang ang ila bug-os nga masarangan para palig-unon kag amligan ang iya katawhan. Ano ang himuon sang mga gulang para mahatagan nila sang tion ang pagbulig sa mga kauturan?

10. Ano ang ginasiling sang 1 Tesalonica 2:7 parte sa pag-atipan ni Pablo sa katawhan ni Jehova?

¹⁰ Ang halimbawa ni Pablo. Handa pirme si Pablo nga dayawon, pasalamatan, kag palig-unon ang iya mga kauturan. Maayo gid kon ilugon sang mga gulang ang iya halimbawa paagi sa pagpakita sang gugma kag kaayo sa ila mga kauturan. (Basaha ang 1 Tesalonica 2:7.) Ginsilingan ni Pablo ang iya mga kauturan nga palangga niya sila kag palangga sila ni Jehova. (2 Cor. 2:4; Efe. 2:4, 5) Ginkabig sila ni Pablo nga iya mga abyan, kag naghatag sia sang tion para makaupod sila. Ginpakita niya nga may salig sia sa ila paagi sa pagsugid sa ila sang iya mga ginakabalak-an kag kaluyahon. (2 Cor. 7:5; 1 Tim. 1:15) Pero wala nagpokus si Pablo sa iya mga problema. Sa baylo, nagpokus sia sa pagbulig sa iya mga kauturan.

11. Ngaa ginlaygayan ni Pablo ang iya mga kauturan?

¹¹ Kon kaisa, dapat laygayan ni Pablo ang iya mga kauturan. Pero wala gid niya ini ginhimo kay nagaugtas sia sa ila. Ginlaygayan niya sila kay palangga niya sila kag gusto niya sila amligan sa mga posible makahalit sa ila. Kon nagalaygay sia, ginatinguhaan  niya nga madali ini mahangpan, kag nabalaka sia kon paano ginabaton ang iya laygay. Halimbawa, sa iya sulat sa mga taga-Corinto, prangka niya nga ginlaygayan ang mga kauturan. Pagkatapos niya mahimo ini nga sulat, ginpadala niya si Tito sa ila. Gusto mabal-an ni Pablo kon ano ang ila reaksion sa iya sulat. Nalipay gid sia sang nabal-an niya nga ginbaton nila kag gin-aplikar ang iya laygay.—2 Cor. 7:6, 7.

12. Paano mapalig-on sang mga gulang ang ila mga kauturan?

¹² Ang matun-an sang mga gulang. Mailog sang mga gulang ang halimbawa ni Pablo paagi sa paghatag sang tion para makaupod ang ila mga kauturan. Ang isa ka paagi para mahimo nila ini amo ang pag-abot sing temprano sa mga miting sang kongregasyon para maistorya nila kag mapalig-on ang iban. Sa masami, mapalig-on na naton ang isa ka utod kag mapabatyag naton sa iya nga palangga naton sia bisan pila lang ka minuto naton sia nga maistorya. (Roma 1:12; Efe. 5:16) Para mailog sang isa ka gulang si Pablo, dapat man niya gamiton ang Biblia para palig-unon ang iya mga kauturan kag para pasaligon sila nga palangga sila sang Dios. Ginasilingan man sang gulang ang iya mga kauturan nga palangga niya sila. Pirme niya sila ginakamusta kag nagapangita sia sang kahigayunan nga madayaw sila kag mapasalamatan. Kon kinahanglan maglaygay sang isa ka gulang, dapat niya ini ibase sa Pulong sang Dios. Dapat mangin maathag sa utod kon ngaa ginlaygayan sia, pero dapat ini himuon sang gulang sa maayo nga paagi kay gusto niya nga batunon sang utod ang iya laygay.—Gal. 6:1.

13. Ano ang posible nga mabatyagan sang isa ka gulang sa iya kaluyahon?

¹³ Kon ngaa mabudlay ini himuon kon kaisa. Indi perpekto ang mga gulang. Pareho sa tanan, makahimo man sila sang sala. (Roma 3:23) Kon kaisa, posible nga nabudlayan sila kon paano tamdon sing husto ang ila kaluyahon. May iban nga nabalaka sing sobra sa ila kaluyahon, gani nagaluya ang ila buot. May iban naman nga ginapakadiutay nila ang ila kaluyahon, gani nagabatyag sila nga wala sila sing dapat bag-uhon sa ila kabuhi.

14. Suno sa Filipos 4:13, paano nakabulig ang pagkamapainubuson para masarangan ni Pablo ang iya kaluyahon?

¹⁴ Ang halimbawa ni Pablo. Mapainubuson si Pablo, gani nahangpan niya nga indi niya masarangan ang iya kaluyahon. Kinahanglan niya ang kusog halin sa Dios. Sang una, grabe gid ang paghingabot ni Pablo sa mga Cristiano. Sang ulihi, nahangpan niya nga sala ang iya ginhimo, gani ginbag-o niya ang iya panimuot kag personalidad. (1 Tim. 1:12-16) Sa bulig ni Jehova, nangin mahigugmaon, maluluy-on, kag mapainubuson nga gulang si Pablo. Kabalo sia nga madamo sia sang nahimo nga sala, pero gintinguhaan niya nga indi ini pirme pagpamensaron. Sa baylo, nagsalig sia nga patawaron sia ni Jehova. (Roma 7:21-25) Wala niya ginhunahuna nga indi na sia  makahimo sang sala. Sa baylo, ginpanikasugan niya nga mapauswag ang iya personalidad bilang Cristiano, kag mapainubuson sia nga nagsalig sa bulig ni Jehova para matuman niya ang hilikuton nga ginhatag sa iya.—1 Cor. 9:27; basaha ang Filipos 4:13.

15. Ano ang dapat himuon sang mga gulang para mangin husto ang ila pagtamod sa ila kaluyahon?

¹⁵ Ang matun-an sang mga gulang. Indi perpekto ang gintangdo nga mga gulang. Pero ginapaabot ni Jehova nga akuon nila ang ila mga sala kag pauswagon nila ang ila personalidad bilang Cristiano. (Efe. 4:23, 24) Dapat usisaon sang isa ka gulang ang iya kaugalingon paagi sa pagtuon sang Biblia para makita niya kon ano ang dapat niya pauswagon kag bag-uhon. Kon himuon niya ini, buligan sia ni Jehova nga mangin malipayon kag maayo nga gulang.—Sant. 1:25.

16. Ano ang posible nga matabo kon magpokus ang isa ka gulang sa kaluyahon sang iban?

¹⁶ Kon ngaa mabudlay ini himuon kon kaisa. Bangod pirme nagapakig-upod ang mga gulang sa mga kauturan, makita nila ang kaluyahon sang mga kauturan. Kon indi sila maghalong, posible nga mag-ugtas sila, maakig, ukon magpadasudaso sa paghunahuna nga malain ang batasan sang isa ka utod. Ginpaandaman ni Pablo ang mga Cristiano nga amo ini ang gusto ni Satanas nga himuon nila.—2 Cor. 2:10, 11.

17. Paano gintamod ni Pablo ang iya mga kauturan?

¹⁷ Ang halimbawa ni Pablo. Pirme niya ginahunahuna ang maayo nga mga kinaiya sang iya mga kauturan. Kabalo sia sang ila mga sala, kay may mga tion pa gani nga naapektuhan sia sang ila mga ginhimo. Pero kabalo si Pablo nga bisan pa nakahimo sang sala ang isa ka utod, indi buot silingon sini nga malain sia nga tawo. Palangga niya ang iya mga kauturan kag nagpokus sia sa ila maayo nga mga kinaiya. Kon nabudlayan ang iya mga kauturan nga himuon ang husto, wala niya ginaduhaduhaan ang ila motibo kag ginahangop niya nga kinahanglan lang nila ang bulig.

18. Ano ang natun-an mo sa ginhimo ni Pablo para buligan sanday Eudias kag Sintique? (Filipos 4:1-3)

¹⁸ Halimbawa, binagbinaga kon paano ginbuligan ni Pablo ang duha ka utod nga babayi sa kongregasyon sa Filipos. (Basaha ang Filipos 4:1-3.) Posible nga wala naghangpanay sanday Eudias kag Sintique kag naglainay ang ila buot. Wala sila gin-akigan ni Pablo, kag wala sia nagpadasudaso sa paghunahuna nga malain ang ila batasan. Sa baylo, nagpokus sia sa ila maayo nga mga kinaiya. Matutom sila nga mga utod nga madugay na nga nagaalagad kay Jehova. Kabalo si Pablo nga palangga ni Jehova ini nga mga utod. Bangod nagpokus si Pablo sa maayo nga mga kinaiya sini nga mga utod, ginpalig-on niya sila nga solbaron ang ila indi paghangpanay. Bangod sang iya maayo nga pagtamod sa iban, pirme sia malipayon sa pag-alagad kag nangin suod niya nga mga abyan ang mga kauturan sa kongregasyon.

19. (a) Ano ang himuon sang mga gulang para makapokus sila sa maayo nga mga kinaiya sang ila mga kauturan? (b) Ano ang matun-an mo sa piktyur sang isa ka gulang nga nagapaninlo sang Kingdom Hall?

¹⁹ Ang matun-an sang mga gulang. Mga gulang,  magpokus sa maayo nga mga kinaiya sang inyo mga kauturan. Indi kita tanan perpekto, pero may maayo nga mga kinaiya ang kada isa sa aton. (Fil. 2:3) Posible nga kinahanglan laygayan sang mga gulang ang isa ka utod kon kaisa. Pero pareho kay Pablo, dapat panikasugan sang mga gulang nga indi magpokus sa makaulugot nga ginasiling kag ginahimo sang isa ka utod. Sa baylo, dapat sila magpokus sa gugma sang utod kay Jehova, sa iya pagbatas sa pag-alagad sa Dios, kag sa iya ikasarang sa paghimo sang maayo. Kon magpokus ang mga gulang sa maayo nga mga kinaiya sang iban, mabatyagan sang mga kauturan nga palangga sila sang kongregasyon.

20. Ano ang puede himuon sang mga gulang para padayon nga makabulig sa ila ang halimbawa ni Pablo?

²⁰ Mga gulang, makabulig gid sa inyo kon padayon ninyo nga tun-an ang halimbawa ni Pablo. Halimbawa, sa Watch Tower Publications Index, pangitaa ang topiko nga “Paul” kag ang subtitulo nga “example for elders.” Samtang ginabasa mo ang mga artikulo nga makita diri, pamangkuta ang imo kaugalingon, ‘Paano ang halimbawa ni Pablo makabulig sa akon nga magpabilin nga malipayon samtang ginahimo ko ang akon responsibilidad bilang isa ka gulang?’

21. Sa ano makasalig ang mga gulang?

²¹ Mga gulang, tandai ninyo nga wala nagapangabay si Jehova nga mangin perpekto kamo, kundi nagapangabay sia nga mangin matutom kamo. (1 Cor. 4:2) Nalipay si Jehova kay Pablo kay nagpangabudlay sia kag matutom sia sa pag-alagad. Makasalig kamo nga nalipay man si Jehova sa mga ginahimo ninyo sa pag-alagad sa iya. ‘Indi gid pagkalimtan ni Jehova ang inyo binuhatan kag ang gugma nga ginpakita ninyo para sa iya ngalan paagi sa pag-alagad kag sa padayon nga pag-alagad sa mga balaan.’—Heb. 6:10.