1-2. Kon indi ka pa handa nga magpabawtismo, ngaa indi ka dapat maluyahan sang buot? (Tan-awa ang piktyur sa kober.)

 KON handum mo nga magpabawtismo, kanami gid sang gusto mo nga himuon sa imo kabuhi. Handa ka na bala subong nga magpabawtismo? Kon pamatyag mo handa ka na kag nagakomporme man ang mga gulang, indi mag-alang-alang nga magpabawtismo. Kon himuon mo ini, mangin malipayon ka gid sa imo pag-alagad kay Jehova.

² Pero, ano abi kon may nagsiling sa imo nga may dapat ka anay pauswagon antes ka mabawtismuhan? Ukon ano abi kon narealisar mo nga may dapat ka anay pauswagon? Indi ka dapat maluyahan sang buot. May puede ka himuon para mag-uswag ka kag mabawtismuhan. Pamatan-on ka man ukon tigulang, masarangan mo ini nga himuon.

3. Ano ang ginpamangkot sang Etiopianhon nga opisyal sang palasyo kay Felipe, kag ano ang mahimo naton ipamangkot? (Binuhatan 8:36, 38)

³ Basaha ang Binuhatan 8:36, 38. Ginpamangkot si Felipe nga ebanghelisador sang isa ka Etiopianhon nga opisyal sang palasyo: “Ano ang nagapugong sa akon sa pagpabawtismo?” Gusto sang Etiopianhon nga magpabawtismo, pero handa na gid bala sia nga himuon ini?

4. Paano ginpakita sang Etiopianhon nga gusto gid niya dugangan ang iya nabal-an?

⁴ “Nagkadto [ang Etiopianhon] sa Jerusalem agod magsimba.” (Binu. 8:27) Gani posible gid nga isa sia ka Judiyo nga proselita ukon ginbaton niya ang Judaismo. Sigurado gid nga natun-an niya ang parte kay Jehova paagi sa sagrado nga mga sinulatan sa Hebreong Kasulatan. Pero, gusto gid niya dugangan ang iya nabal-an. Sang nakita sia ni Felipe sa dalan, ano ang ginahimo niya? Nagabasa sia sang mga sinulatan ni manalagna Isaias sa isa ka linukot. (Binu. 8:28) Madalom ini nga mga kamatuoran. Gani, wala nakontento ini nga opisyal sang palasyo sa pila lang ka panguna nga mga  panudlo sa Kasulatan. Gusto gid niya dugangan ang iya nabal-an.

5. Paano gin-aplikar sang Etiopianhon ang iya natun-an?

⁵ Ang Etiopianhon amo “ang nagadumala sa tanan nga bahandi sang rayna [sang Etiopia]” kag isa sia ka mataas nga opisyal sang palasyo. (Binu. 8:27) Gani posible gid nga masako sia sa iya madamo nga responsibilidad. Pero, nagpain sia sang tion para masimba si Jehova. Wala sia nakontento nga matun-an lang ang kamatuoran, kundi gin-aplikar niya ini. Gani naglakbay sia halin sa Etiopia para masimba niya si Jehova sa templo sa Jerusalem. Posible gid nga daku nga tion kag kuarta ang gingamit niya sa sini nga paglakbay, pero balewala ini sa iya kay gusto gid niya nga masimba si Jehova.

6-7. Paano nagbakod ang gugma sang Etiopianhon kay Jehova?

⁶ Ginbuligan ni Felipe ang Etiopianhon nga matun-an ang pila ka importante kag bag-o nga kamatuoran. Ang isa sa sini amo nga si Jesus ang Mesias. (Binu. 8:34, 35) Sigurado gid nga nalipay ini nga opisyal sang palasyo sang nabal-an niya ang ginhimo ni Jesus para sa iya. Ano ang ginhimo niya sang nabal-an niya ini? Isa sia ka Judiyo nga proselita nga ginarespeto sang mga tawo, gani puede kuntani nga wala sia sing himuon nga pagbag-o. Pero nagbakod ang iya gugma kay Jehova kag sa Iya Anak. Gani naghimo sia sang desisyon nga nagpabag-o sang iya kabuhi. Nagdesisyon sia nga magpabawtismo bilang sumulunod ni Jesucristo. Nakita ni Felipe nga handa na ang Etiopianhon, gani ginbawtismuhan niya sia.

⁷ Kon sundon mo ang halimbawa sang Etiopianhon, mahandaan mo ang pagpabawtismo. Indi ka man magduhaduha kag makasiling ka man, “Ano ang nagapugong sa akon sa pagpabawtismo?” Binagbinagon naton kon paano mo mahimo ang ginhimo sang Etiopianhon: Padayon sia nga nagtuon, gin-aplikar niya ang iya natun-an, kag padayon niya nga ginpabakod ang iya gugma sa Dios.

8. Ano ang ginasiling sang Juan 17:3 nga dapat mo himuon?

⁸ Basaha ang Juan 17:3. Napalig-on ka bala nga mag-Bible study bangod sa sining ginsiling ni Jesus? Amo ini ang nagpalig-on sa madamo sa aton. Pero ginapalig-on man bala kita sini nga padayon nga magtuon? Huo. Kay man, indi gid kita mag-untat sa ‘pagkilala sa lamang matuod nga Dios.’ (Man. 3:11) Padayon kita nga magatuon asta sa wala sing katapusan. Samtang nagadamo ang aton natun-an, nagasuod man kita kay Jehova.—Sal. 73:28.

9. Ano ang dapat naton himuon pagkatapos naton matun-an ang panguna nga mga panudlo sa Biblia?

⁹ Sang nagtuon kita parte kay Jehova, nag-umpisa kita sa panguna nga mga panudlo sa Biblia. Sa sulat ni apostol Pablo sa mga Hebreo, gintawag niya ining panguna nga mga panudlo nga  “nahauna nga mga butang.” Wala niya ginapakadiutay “ang panguna nga doktrina.” Sa baylo, ginakumparar niya ini sa gatas nga nagapapagros sa bata. (Heb. 5:12; 6:1) Pero ginpalig-on niya ang tanan nga Cristiano nga tun-an man ang madalom nga mga kamatuoran sa Pulong sang Dios. Dapat padayon sila nga magtuon para indi lang panguna nga mga panudlo ang ila nabal-an. Nanamian ka bala magtuon parte sa madalom nga mga panudlo sa Biblia? Gusto mo bala nga mag-uswag paagi sa padayon nga pagtuon parte kay Jehova kag sa iya mga katuyuan?

10. Ngaa nabudlayan ang iban nga magtuon?

¹⁰ Madamo sa aton ang nabudlayan nga magtuon. Kamusta sa imo bahin? Sa eskwelahan, posible natun-an mo kon paano magbasa kag magtuon sing maayo. Ti, nanamian ka bala magtuon? Ano abi kon narealisar mo nga wala ka nanamian magbasa sang mga libro? Madamo nga tawo ang amo sini ang ginabatyag. Pero, mabuligan ka ni Jehova. Perpekto sia, kag sia ang pinakamaayo nga Manunudlo.

11. Paano ginapakita ni Jehova nga sia ang “Daku nga Instruktor”?

¹¹ Ginatawag ni Jehova ang iya kaugalingon nga “inyo Daku nga Instruktor.” (Isa. 30:20, 21) Mapinasensiahon sia nga Manunudlo, mainayuhon, kag mahinangpanon. Nagapokus sia sa maayo nga mga kinaiya sang iya mga estudyante. (Sal. 130:3) Kag wala niya ginapahimo sa aton ang indi naton masarangan. Dumduma nga sia ang nagdesinyo sang imo utok nga isa ka dalayawon nga regalo. (Sal. 139:14) May natural kita nga handum nga magtuon. Gusto sang aton Manunuga nga padayon kita nga magtuon asta sa wala sing katapusan, kag gusto niya nga manamian kita sa sini. Gani maayo gid kon ‘palambuon naton ang paghandum’ sa mga kamatuoran sa Biblia. (1 Ped. 2:2) Maghimo sang mga goal ukon mga tulumuron nga masarangan mo nga himuon, kag panikasugi nga basahon kag tun-an ang Biblia sing regular. (Jos. 1:8) Paagi sa bulig ni Jehova, manamian ka na sa ulihi magbasa kag magtuon parte sa iya.

12. Ngaa dapat naton tun-an ang kabuhi kag ang pagministeryo ni Jesus?

¹² Regular nga pamalandungi ang kabuhi kag ang pagministeryo ni Jesus. Para padayon naton nga maalagad si Jehova, importante gid nga sundon naton sing maayo si Jesus ilabi na sa sining mabudlay nga mga tion. (1 Ped. 2:21) Ginsilingan ni Jesus ang iya mga disipulo nga makaeksperiensia sila sang mga kabudlayan. (Luc. 14:27, 28) Pero, sigurado sia nga magapabilin nga matutom sa Dios ang iya matuod nga mga sumulunod pareho sa ginhimo niya. (Juan 16:33) Gani tun-i sing maayo ang kabuhi ni Jesus, kag maghimo sang mga tulumuron nga ilugon sia.

13. Ano ang dapat mo padayon nga pangabayon kay Jehova, kag ngaa?

¹³ Kon may ihibalo ka na, bastante na bala ini? Indi. Kinahanglan mo ang ihibalo para madugangan mo ang imo nabal-an parte kay Jehova, kag para mapabakod mo ang imo gugma kag pagtuo sa iya. Kinahanglan mo man ini para mapakita mo ang madamo nga kinaiya. (1 Cor. 8:1-3) Pero samtang padayon ka nga nagatuon, padayon man nga pangabaya si Jehova nga buligan ka nga dugangan ang imo pagtuo. (Luc. 17:5) Maalwan niya nga ginasabat ini nga mga pangamuyo. Kon may matuod ka nga pagtuo nga nabase sa sibu nga ihibalo parte sa aton Dios, buligan ka sini nga mag-uswag.—Sant. 2:26.

14. Ano ang ginsiling ni apostol Pedro nga nagapakita nga importante gid nga iaplikar naton ang aton natun-an? (Tan-awa man ang piktyur.)

¹⁴ May ginsiling si apostol Pedro nga nagapakita nga importante gid nga padayon nga iaplikar sang mga sumulunod sang Cristo ang ila natun-an. Ginsambit niya ang kasaysayan ni Noe sa Biblia. Ginsilingan ni Jehova si Noe nga laglagon Niya ang malain nga mga tawo sadto nga tion paagi sa baha. Kabalo si Noe nga maabot ang baha,  pero indi bastante nga nabal-an lang niya ini para maluwas sia kag ang iya pamilya. Talupangda nga ginpatuhuyan ni Pedro ang tion antes sang Baha “samtang ginahimo ang arka.” (1 Ped. 3:20) Gani gin-aplikar ni Noe kag sang iya pamilya ang ila natun-an sa Dios paagi sa paghimo sang arka nga isa ka daku nga sakayan. (Heb. 11:7) Dayon ginkumparar ni Pedro sa bawtismo ang ginhimo ni Noe. Nagsiling sia: “Ang katumbas sini amo ang bawtismo, nga nagaluwas man karon sa inyo.” (1 Ped. 3:21) Nagpanikasog si Noe kag ang iya pamilya sa sulod sang madamo nga tinuig para mahuman nila ang arka. Sing kaanggid, kinahanglan mo man magpanikasog para mahandaan mo ang pagpabawtismo. Ano nga pagpanikasog ang dapat mo himuon?

15. Paano mo mapakita ang matuod nga paghinulsol?

¹⁵ Ang isa sa una nga dapat mo himuon amo ang paghinulsol sing sinsero sa imo mga sala. (Binu. 2:37, 38) Kon matuod ang imo paghinulsol, magahimo ka sang mga pagbag-o. Gin-untatan mo na bala ang paghimo sang mga butang nga wala nalipay si Jehova, pareho sang imoral nga pagkabuhi, pagpanigarilyo, ukon paghambal sing binastos ukon masakit? (1 Cor. 6:9, 10; 2 Cor. 7:1; Efe. 4:29) Kon wala mo pa ini mauntatan, padayon nga magpanikasog nga maghimo sang mga pagbag-o. Istoryaha ang naga-study sa imo, ukon magpabulig sa mga gulang sa kongregasyon kag mangayo sing laygay sa ila. Kon isa ikaw ka pamatan-on kag ara ka pa sa poder sang imo mga ginikanan, padayon nga magpabulig sa ila para mabag-o mo ang indi maayo nga mga pamatasan nga posible mangin rason nga indi ka mabawtismuhan.

16. Ano nga mga hilikuton sa pag-alagad kay Jehova ang dapat naton himuon sing regular?

¹⁶ Importante man nga regular mo nga himuon ang mga hilikuton sa pag-alagad kay Jehova. Nalakip sa sini ang pag-attend kag pagkomento sa mga miting. (Heb. 10:24, 25) Kag kon kalipikado ka na nga mag-upod sa pagbantala, himua man ini sing regular. Kon pirme ka magbantala, manamian ka gid sa sini. (2 Tim. 4:5) Kon isa ikaw ka pamatan-on kag ara ka pa sa poder sang imo mga ginikanan, pamangkuta ang imo kaugalingon: ‘Kinahanglan pa bala ako hambalan sang akon mga ginikanan parte sa pag-attend sa mga miting ukon sa pagbantala? Ukon nagamatumato ako nga himuon ini nga mga hilikuton?’ Kon ginahimo mo ini nga mga hilikuton nga indi na kinahanglan ang pahanumdom, ginapakita mo nga may pagtuo ka kag ginahigugma mo si Jehova nga Dios kag gusto mo sia pasalamatan. “Mga  buhat [ini] sang diosnon nga debosyon” nga regalo mo kay Jehova. (2 Ped. 3:11; Heb. 13:15) Nalipay ang aton Dios sa tanan nga regalo nga ginahatag naton sa iya sing kinabubut-on. (Ipaanggid ang 2 Corinto 9:7.) Ginahimo naton ini bangod nalipay kita kon ginahatag naton kay Jehova ang aton pinakamaayo.

17-18. Ano ang importante nga kinaiya nga makabulig sa imo nga mag-uswag kag mabawtismuhan, kag paano ini makabulig sa imo? (Hulubaton 3:3-6)

¹⁷ Samtang ginapanikasugan mo nga mag-uswag kag mabawtismuhan, makaeksperiensia ka sang mga kabudlayan. Posible nga yagutaon ka sang iban bangod sang imo bag-o nga mga ginapatihan, kag posible nga pamatukan ka pa gani nila ukon hingabuton. (2 Tim. 3:12) Posible nga ginapanikasugan mo gid nga untatan ang paghimo sang isa ka butang nga malain, pero may mga tion nga ginahimo mo gihapon ini. Ukon posible nga nagalalain ka bangod daw indi mo malab-ot ang imo tulumuron. Ano ang makabulig sa imo nga makabatas? Ang imo gugma kay Jehova nga isa ka importante gid nga kinaiya.

¹⁸ Isa ka dalayawon nga kinaiya ang imo gugma kay Jehova, kag amo ini ang pinakamaayo mo nga kinaiya. (Basaha ang Hulubaton 3:3-6.) Kon mabakod ang imo gugma sa Dios, indi ka gid mag-untat sa pag-alagad sa iya bisan pa makaeksperiensia ka sang mga problema. Pirme ginasambit sang Biblia ang parte sa mainunungon nga gugma ni Jehova sa iya mga alagad. Bangod sa sini nga gugma, indi gid niya pagbiyaan ang iya mga alagad kag indi gid sia mag-untat sa paghigugma sa ila. (Sal. 100:5) Ginhimo ka suno sa larawan sang Dios, gani mapakita mo man ini nga klase sang gugma. (Gen. 1:26) Paano?

19. Paano mo mapakita nga ginapasalamatan mo gid ang tanan nga ginhimo ni Jehova para sa imo? (Galacia 2:20)

¹⁹ Ang una nga puede mo himuon amo ang pasalamatan si Jehova. (1 Tes. 5:18) Kada adlaw, pamangkuta ang imo kaugalingon, ‘Paano ginpakita ni Jehova ang iya gugma sa akon?’ Dayon siguraduha nga mapasalamatan mo si Jehova sa imo mga pangamuyo, kag sambita ang espesipiko nga mga butang nga ginhimo niya para sa imo. Bangod sang gugma ni Jehova, madamo sia sing ginhimo nga maayo nga mga butang. Hunahunaa nga ginhimo niya ini para gid sa imo. Amo ini ang ginhunahuna ni apostol Pablo parte sa mga ginhimo ni Jehova. (Basaha ang Galacia 2:20.) Pamangkuta ang imo kaugalingon, ‘Gusto ko bala ipakita nga ginahigugma ko man sia?’ Kon may gugma ka kay Jehova, buligan ka sini nga pamatukan ang mga pagsulay kag mabatas  ang mga problema. Palig-unon ka sini nga padayon nga mag-alagad kay Jehova sing regular kag ipakita adlaw-adlaw nga ginahigugma mo ang imo Amay.

20. Ano ang himuon mo para madedikar mo ang imo kaugalingon kay Jehova, kag daw ano ka importante ini nga desisyon?

²⁰ Sa ulihi, palig-unon ka sang imo gugma kay Jehova nga mangamuyo sa iya. Pinasahi ini nga pangamuyo para idedikar mo ang imo kaugalingon sa Dios. Tandai nga kon nakadedikar ka na kay Jehova, may ara ka dalayawon nga paglaum nga mapanag-iyahan niya asta sa wala sing katapusan. Paagi sa pagdedikar kay Jehova, nagapromisa ka nga alagaron sia bisan sa mabudlay nga mga sitwasyon. Isa ka beses mo lang nga himuon ini nga promisa. Serioso nga desisyon ang pagdedikar kay Jehova. Pero hunahunaa ini: Madamo nga maayo nga desisyon ang posible mahimo mo sa imo kabuhi, pero wala na sing mas maayo pa sangsa pagdedikar sang imo kabuhi kay Jehova. (Sal. 50:14) Tinguhaan ni Satanas nga paluyahon ang imo gugma sa imo Amay kay gusto niya nga mag-untat ka. Indi gid magpadaug kay Satanas. (Job 27:5) Kon mabakod ang imo gugma kay Jehova, buligan ka sini nga tumanon ang imo dedikasyon kag mangin suod pa gid sa imo Amay sa langit.

21. Ngaa masiling naton nga umpisa pa lang ang pagpabawtismo?

²¹ Kon nakadedikar ka na kay Jehova, istoryaha ang mga gulang sa inyo kongregasyon parte sa masunod nga dapat mo himuon. Pero dumduma pirme nga umpisa pa lang ang pagpabawtismo. Umpisa ini sang pag-alagad kay Jehova nga magalawig asta sa wala sing katapusan. Gani pabakura na subong ang imo gugma sa imo Amay. Maghimo sang mga tulumuron para magbakod ang imo gugma kada adlaw. Kon himuon mo ini, mapalig-on ka nga magpabawtismo. Mangin isa gid ini ka makalilipay nga adlaw. Pero umpisa pa lang ini. Kabay pa nga padayon mo nga pabakuron ang imo gugma kay Jehova kag sa iya Anak asta sa wala sing katapusan.