Ngaa nagsiling “ang malapit nga paryente” ni Noemi nga “mabuhinan” ang iya palanublion kon pangasaw-on niya si Rut? (Rut 4:1, 6)

Sang panahon sang Biblia, kon ang isa ka lalaki nga may asawa mapatay nga wala sang bata, ano ang matabo sa iya duta? Madula bala ang ngalan sang iya pamilya? Ginasabat sang Mosaikong Kasuguan ini nga mga pamangkot.

Kon mapatay ang isa ka lalaki, puede panublion sang iya utod nga lalaki ukon sang malapit niya nga paryente ang iya duta. Kon namigado ang isa ka lalaki kag ginbaligya niya ang iya duta, puede ini gawaron sang iya utod nga lalaki ukon sang malapit niya nga paryente. Sa sini nga paagi, ang ila pamilya gihapon ang mangin tag-iya sang duta.—Lev. 25:23-28; Num. 27:8-11.

Ano ang himuon para indi madula ang ngalan sang pamilya sang napatay nga tawo? Pangasaw-on ang iya asawa sang isa niya ka utod. Ginatawag ini nga katungdanan sang isa ka bayaw, kag amo ini ang ginhimo sa sitwasyon ni Rut. Kon makabata sila, dalhon sang ila bata ang ngalan sang napatay nga tawo. Ang ila bata man ang magapanubli sang mga ginapanag-iyahan sang napatay nga tawo. Paagi sa sini nga kahimusan, maatipan man ang mga balo.—Deut. 25:5-7; Mat. 22:23-28.

Binagbinaga ang natabo kay Noemi. Sang napatay ang iya bana nga si Elimelec kag ang ila duha ka bata nga lalaki, wala na sang nabilin nga lalaki nga magaatipan sa iya. (Rut 1:1-5) Sang nagbalik si Noemi upod ang iya umagad nga si Rut sa Juda, ginsilingan niya si Rut nga pangabayon si Boaz nga gawaron ang ila duta. Isa ka malapit nga paryente ni Elimelec si Boaz. (Rut 2:1, 19, 20; 3:1-4) Pero kabalo si Boaz nga may ara pa isa ka mas malapit nga paryente sangsa iya. Ini nga paryente amo ang may una nga katungdanan bilang manuggawad.—Rut 3:9, 12, 13.

Gusto kuntani sang mas malapit nga paryente nga gawaron ang duta. (Rut 4:1-4) Kabalo sia nga kinahanglan pa niya maggasto sang daku nga kuarta para baklon ang duta, pero kabalo man sia nga tigulang na si Noemi kag indi na sia makabata sang magapanubli sang duta nga ginapanag-iyahan ni Elimelec. Kon amo, sia ang mangin tag-iya sang duta kag mangin bahin ini sang iya palanublion. Pabor ini para sa iya.

Pero sang nabal-an niya nga kinahanglan man niya pangasaw-on si Rut, nagdesisyon sia nga indi pagbaklon ang duta. Nagsiling sia: “Indi ko na lang ini pagbaklon, kay basi mabuhinan ang akon palanublion.” (Rut 4:5, 6) Ngaa nagbag-o ang iya desisyon?

Kon pangasaw-on niya si Rut kag makabata sila sang lalaki, panublion sang ila bata ang duta ni Elimelec. Amo man sini ang matabo bisan pa iban nga lalaki ang magpangasawa kay Rut. Pero ngaa nagsiling sia nga “mabuhinan” ang iya “palanublion”? Wala ini masambit sa Biblia, pero ari ang pila ka posible nga mga rason.

• Una, kanugon lang sang iya magasto sa pagbakal sang duta ni Elimelec kay ang bata ni Rut ang magapanubli sini sa ulihi.

• Ikaduha, sia ang magahatag sang mga kinahanglanon nanday Noemi kag Rut.

• Ikatlo, kon may mga bata na sia nga daan, matunga ang iya palanublion sa iya mga bata kag sa mga bata nila ni Rut.

• Ikap-at, kon wala sia sang iban pa nga bata, ang bata nga lalaki nila ni Rut amo ang magapanag-iya sang iya duta kag sang duta ni Elimelec. Kon mapatay sia, dalhon sini nga bata ang ngalan ni Elimelec, indi ang iya ngalan. Indi niya gusto nga irisgo ang iya palanublion para mabuligan si Noemi, gani ginpagawad niya kay Boaz ang duta. Ginhimo ini ni Boaz ‘agod indi madula ang palanublion sang napatay nga tawo.’—Rut 4:10.

Mas gusto sang malapit nga paryente ni Noemi nga indi madula ang iya ngalan kag indi mabuhinan ang iya palanublion. Gin-una niya ang iya kaugalingon nga kaayuhan, kag gintinguhaan gid niya nga indi madula ang iya ngalan. Pero ano ang natabo? Nadula ini, kag wala kita kabalo subong kon ano ang iya ngalan. Wala man niya nabaton ang pinasahi nga pribilehiyo nga nabaton ni Boaz nga mangin katigulangan sang Mesias, nga amo si Jesucristo. Bangod wala ginbuligan sang malapit nga paryente ni Noemi ang nagakinahanglan sang bulig, indi gid maayo ang nangin resulta sini sa iya.—Mat. 1:5; Luc. 3:23, 32.