1-2. Ano ang masami nga nagakatabo sa tion sang bawtismo, kag ano ang binagbinagon naton sa sini nga artikulo?

 MAKALILIPAY gid makita ang mga kandidato sa bawtismo. Mabatyagan mo ang ila pagtuo samtang ginasabat nila ang duha ka pamangkot antes sila bawtismuhan. Makita mo nga nalipay gid ang ila pamilya kag mga abyan. Pagbutwa sa tubig sang mga ginbawtismuhan, makita mo nga malipayon gid sila kag mabatian mo ang mga palakpak sang mga nagatan-aw. Kada semana, linibo ang nagadedikar sang ila kabuhi kay Jehova nga Dios kag nagapabawtismo bilang iya mga Saksi.

² Gusto mo man bala magpabawtismo? Kon huo, pinasahi ka gid sa sining malain nga kalibutan bangod ‘ginapangita mo si Jehova.’ (Sal. 14:1, 2) Pamatan-on ka man ukon tigulang, para gid sa imo ini nga artikulo. Pero kon bawtismado na kita, gusto gid naton nga alagaron si Jehova asta sa wala sing katapusan. Gani bawtismado man kita ukon indi, maayo gid kon binagbinagon naton ang madamo nga mga rason kon ngaa dapat naton alagaron si Jehova. Binagbinagon naton ang tatlo sa sini.

3. Ngaa ginahigugma sang mga alagad ni Jehova ang kamatuoran kag ang pagkamatarong? (Salmo 119:128, 163)

³ Ginsugo ni Jehova ang iya katawhan nga ‘higugmaon ang kamatuoran.’ (Zac. 8:19) Kag ginpalig-on ni Jesus ang iya mga sumulunod nga pabaloran ang pagkamatarong. (Mat. 5:6) Buot silingon, dapat gusto gid naton nga himuon kon ano ang matarong, maayo, kag matinlo sa panulok sang Dios. Ginahigugma mo bala ang kamatuoran kag ang pagkamatarong? Sigurado kami nga ginahigugma mo gid ini. Ginadumtan mo ang kabutigan kag ang tanan nga sala kag kalainan. (Basaha ang Salmo 119:128, 163.) Kon nagabinutig ang isa ka tawo, ginailog niya si Satanas nga amo ang manuggahom sini nga kalibutan. (Juan 8:44; 12:31) Gusto gid ni Satanas nga pasipalahan ang balaan nga ngalan ni Jehova nga Dios,  gani nagapalapta sia sang mga kabutigan parte sa aton Dios sugod pa sang natabo ang pagrebelde sa Eden. Gusto niya paguaon nga si Jehova isa ka dalok nga Manuggahom, wala sia kuno nagasugid sing matuod, kag may ginadingot sia kuno sa mga tawo nga makahatag kuntani sa ila sang kaayuhan. (Gen. 3:1, 4, 5) Bangod sa sining mga kabutigan ni Satanas, indi maayo ang ginahunahuna sang mga tawo parte kay Jehova asta subong. Kon indi ‘paghigugmaon sang mga tawo ang kamatuoran,’ maimpluwensiahan sila ni Satanas nga himuon ang tanan nga indi matarong kag malain nga mga butang.—Roma 1:25-31.

4. Paano ginpakita ni Jehova nga sia “ang Dios sang kamatuoran”? (Tan-awa man ang piktyur.)

⁴ Si Jehova “ang Dios sang kamatuoran,” kag maalwan niya nga ginatudluan sang kamatuoran ang mga nagahigugma sa iya. (Sal. 31:5) Paagi sa sini, ginabuligan niya sila nga indi mapatalang sang mga kabutigan ni Satanas. Ginatudluan man ni Jehova ang iya mga alagad nga mangin honest kag matarong. Bangod sini, malipayon sila kag malinong ang ila hunahuna. (Hulu. 13:5, 6) Posible nga sang nagtuon ka sang Biblia, nabatyagan mo gid ini nga pagbulig kag pagtudlo ni Jehova. Natun-an mo nga ang mga paagi ni Jehova amo ang pinakamaayo para sa tanan nga tawo, kag maayo gid ang resulta kon sundon mo ini. (Sal. 77:13) Gani gusto mo nga himuon kon ano ang matarong sa panulok sang Dios. (Mat. 6:33) Gusto mo nga isugid ang kamatuoran kag pamatud-an nga sala ang ginsiling ni Satanas parte kay Jehova nga aton Dios. Paano mo ini mahimo?

5. Paano mo mapakita nga ginapabaloran mo ang kamatuoran kag ang pagkamatarong?

⁵ Puede mo mapakita sa imo paagi sang pagkabuhi nga ginasikway mo ang mga kabutigan ni Satanas kag ginapabaloran mo ang kamatuoran. Puede mo mapakita nga si Jehova ang gusto mo nga Manuggahom kag himuon mo ang ginasiling niya nga matarong. Paano mo ini mahimo? Mangamuyo kay Jehova kag idedikar mo ang imo kaugalingon sa iya, kag dayon ipabalo mo sa iban ang imo dedikasyon paagi sa pagpabawtismo. Kon higugmaon mo ang matuod kag ang matarong, mapalig-on ka gid sini nga magpabawtismo.

6. Base sa Salmo 45:4, ngaa ginahigugma mo si Jesucristo?

⁶ Ngaa ginahigugma mo si Jesucristo? Talupangda ang mga rason sa Salmo 45:4. (Basaha.) Ginapabaloran ni Jesus ang kamatuoran, ang pagkamapainubuson, kag ang pagkamatarong. Gani kon ginahigugma mo ang kamatuoran kag ang pagkamatarong, ginahigugma mo man si Jesucristo. Hunahunaa ang kaisog nga ginpakita  ni Jesus para pangapinan ang matuod kag ang matarong. (Juan 18:37) Pero, paano ginpakita ni Jesus nga importante ang pagkamapainubuson?

7. Ngaa nagadayaw ka gid sa pagkamapainubuson ni Jesus?

⁷ Paagi sa iya halimbawa, ginpakita ni Jesus nga importante ang pagkamapainubuson. Halimbawa, wala gid niya ginhimaya ang iya kaugalingon, kundi ginhatag niya ang tanan nga himaya sa iya Amay. (Mar. 10:17, 18; Juan 5:19) Ano ang nabatyagan mo sa pagkamapainubuson ni Jesus? Sigurado gid nga nagpalig-on ini sa imo nga higugmaon ang Anak sang Dios kag magsunod sa iya. Ngaa mapainubuson si Jesus? Bangod ginahigugma niya kag ginailog ang iya mapainubuson nga Amay. (Sal. 18:35; Heb. 1:3) Ginahigugma mo si Jesus bangod perpekto niya nga ginailog ang mga kinaiya ni Jehova.

8. Ngaa ginahigugma naton si Jesus bilang aton Hari?

⁸ Ginahigugma naton si Jesus bilang aton Hari bangod sia ang pinakamaayo nga Manuggahom. Si Jehova mismo ang naghanas sa iya Anak kag nagtangdo sa iya nga maggahom. (Isa. 50:4, 5) Hunahunaa man ang gugma kag sakripisyo nga ginpakita ni Jesus. (Juan 13:1) Bangod si Jesus ang imo Hari, dapat mo sia higugmaon. Nagsiling sia nga ginatawag niya nga mga abyan ang mga nagahigugma sa iya, kag ginapakita nila ang ila gugma sa iya paagi sa pagtuman sa iya mga sugo. (Juan 14:15; 15:14, 15) Isa gid ka kadungganan nga mangin abyan sang Anak ni Jehova.

9. Ano ang pagkaanggid sang pagpabawtismo sang Cristo kag sang pagpabawtismo sang mga Cristiano?

⁹ Ang isa sa mga sugo ni Jesus amo nga dapat magpabawtismo ang iya mga sumulunod. (Mat. 28:19, 20) Ang iya pagpabawtismo amo ang aton halimbawa. May kinalain ang pagpabawtismo ni Jesus kag ang pagpabawtismo sang iya mga sumulunod. (Tan-awa ang kahon nga “ Ano ang Kinalain sang Pagpabawtismo ni Jesus kag sang Pagpabawtismo sang Iya mga Sumulunod?”) Pero may pagkaanggid man ini. Sang ginbawtismuhan si Jesus, ginpakita niya nga handa sia nga himuon ang kabubut-on sang iya Amay. (Heb. 10:7) Sing kaanggid, kon magdedikar ang mga sumulunod sang Cristo sang ila kaugalingon kay Jehova nga Dios kag magpabawtismo sila, ginapakita nila nga ang paghimo sang kabubut-on sang Dios amo na ang pinakaimportante sa ila kabuhi, kag indi na ang ila personal nga mga handum. Gani ginailog nila ang halimbawa sang ila Agalon.

10. Kon ginahigugma mo si Jesus, paano ka mapalig-on sini nga magpabawtismo?

¹⁰ Nagapati ka nga si Jesus amo ang bugtong nga Anak ni Jehova, kag nalipay ka nga sia ang gintangdo sang Dios nga mangin aton Hari. Kabalo ka nga mapainubuson si Jesus kag perpekto niya nga ginailog ang iya Amay. Natun-an mo nga ginpakaon niya ang mga nagutom, ginpaumpawan niya ang mga naluyahan sang buot, kag gin-ayo pa gani niya ang mga nagamasakit. (Mat. 14:14-21) Nakita mo kon paano niya ginapangunahan ang iya kongregasyon subong. (Mat. 23:10) Kag kabalo ka nga sa palaabuton, dalayawon gid ang mga himuon niya para sa aton bilang Hari sang Ginharian sang Dios. Paano mo mapakita nga ginahigugma mo si Jesus? Paagi sa pagsunod sa iya halimbawa. (Juan 14:21) Maumpisahan mo ang pagsunod sa iya paagi sa pagdedikar sang imo kaugalingon kay Jehova kag pagpabawtismo.

11. Ano ang pinakaimportante nga rason kon ngaa dapat kita magpabawtismo?

¹¹ Ano ang pinakaimportante nga rason kon ngaa dapat kita magpabawtismo? Sa mga sugo sang Dios, amo ini ang ginsiling ni Jesus nga pinakaimportante: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Amo man bala sini kadaku ang imo gugma sa Dios?

12. Ngaa ginahigugma mo si Jehova? (Tan-awa man ang piktyur.)

¹² Madamo gid sang rason para higugmaon si Jehova. Halimbawa, natun-an mo nga sia “ang  tuburan sang kabuhi” kag sia ang nagahatag sang “tagsa ka maayo nga dulot kag tagsa ka himpit nga regalo.” (Sal. 36:9; Sant. 1:17) Halin sa aton maalwan kag mahigugmaon nga Dios ang tanan nga maayo nga butang nga ara sa imo.

13. Ngaa isa gid ka dalayawon nga regalo ang gawad?

¹³ Isa gid ka dalayawon nga regalo ni Jehova sa aton ang gawad. Ngaa masiling naton ini? Binagbinaga ang suod nga kaangtanan ni Jehova kag sang iya Anak. Nagsiling si Jesus: “Ginahigugma ako sang Amay” kag “ginahigugma ko ang Amay.” (Juan 10:17; 14:31) Suod gid ang ila kaangtanan bangod binilyon ka tuig sila nga magkaupod. (Hulu. 8:22, 23, 30) Gani hunahunaa kon daw ano kasakit para sa Dios nga tugutan nga mag-antos kag mapatay ang iya Anak. Ginahigugma gid ni Jehova ang mga tawo, pati na ikaw, gani kinabubut-on niya nga ginhalad ang iya pinalangga nga Anak para may paglaum kita tanan nga mabuhi sing wala sing katapusan. (Juan 3:16; Gal. 2:20) Amo ini ang pinakaimportante nga rason kon ngaa dapat naton higugmaon ang Dios.

14. Ano ang pinakamaayo nga himuon mo sa imo kabuhi?

¹⁴ Samtang nagadamo ang imo nabal-an parte kay Jehova, mas ginahigugma mo pa gid sia. Sigurado gid nga gusto mo nga mangin suod pa gid sa iya asta sa wala sing katapusan. Puede mo gid ini mahimo. Ginapalig-on ka niya nga pasadyahon ang iya tagipusuon. (Hulu. 23:15, 16) Mahimo mo ini paagi sa imo mga ginasiling kag ginahimo. Gani  ipakita sa imo paagi sang pagkabuhi nga ginahigugma mo gid si Jehova. (1 Juan 5:3) Amo ini ang pinakamaayo nga himuon mo sa imo kabuhi.

15. Paano mo mapakita nga ginahigugma mo si Jehova?

¹⁵ Paano mo mapakita nga ginahigugma mo si Jehova? Una, mangamuyo sa iya para ipabutyag nga ginadedikar mo na ang imo kaugalingon sa matuod nga Dios. (Sal. 40:8) Dayon, ipabalo sa iban ang imo dedikasyon paagi sa pagpabawtismo. Ginbinagbinag naton kaina nga ang pagpabawtismo isa ka malipayon kag importante nga hitabo sa imo kabuhi. Si Jehova na ang mangin pinakaimportante sa imo kabuhi, kag indi ang imo kaugalingon. (Roma 14:8; 1 Ped. 4:1, 2) Isa gid ini ka daku nga desisyon. Pero kon himuon mo ini, maeksperiensiahan mo ang pinakamaayo gid nga kabuhi. Paano?

16. Base sa Salmo 41:12, paano padyaan ni Jehova ang mga nagaalagad sa iya?

¹⁶ Si Jehova ang pinakamaalwan sa tanan. Bisan ano pa ang ihatag mo sa iya, hatagan ka niya sing sobra pa sa imo ginhatag. (Mar. 10:29, 30) Buligan ka niya nga maeksperiensiahan ang pinakamaayo kag pinakamalipayon nga kabuhi bisan pa sa sining malain nga kalibutan. Kag sampol lang ini sang puede niya ihatag sa imo. Kon magpabawtismo ka, umpisa pa lang ini sang pinakamalipayon nga kabuhi nga puede magpadayon asta san-o. Puede mo maalagad ang imo pinalangga nga Amay asta sa wala sing katapusan. Padayon nga magabakod ang inyo gugma sa kada isa, kag magakabuhi ka samtang buhi sia. Buot silingon, magakabuhi ka asta sa wala sing katapusan.—Basaha ang Salmo 41:12.

17. Ano ang puede mo mahatag kay Jehova nga wala sa iya?

¹⁷ Kon idedikar mo ang imo kaugalingon sa Dios kag magpabawtismo, may kahigayunan ka nga mahatag sa imo Amay ang isa ka butang nga hamili gid sa iya. Naghalin sa iya ang tanan nga maayo nga butang kag ang tanan nga naeksperiensiahan mo nga naghatag sa imo sang kalipay. Para mabalusan mo ang Tag-iya sang langit kag duta, puede mo mahatag ang isa ka butang nga wala sa iya. Ano ini? Ang imo kinabubut-on kag matutom nga pag-alagad sa iya. (Job 1:8; 41:11; Hulu. 27:11) Amo ini ang pinakamaayo nga himuon mo sa imo kabuhi. Gani ang imo gugma kay Jehova amo ang pinakaimportante nga rason kon ngaa dapat ka magpabawtismo.

18. Ano ang mga puede mo ipamangkot?

¹⁸ Mapabawtismo ka bala? Ikaw lang ang makasabat sa sini nga pamangkot. Pero makabulig sa imo kon pamangkuton mo ang imo kaugalingon, ‘Ngaa wala pa ako nagpabawtismo?’ (Binu. 8:36) Dumduma ang tatlo ka rason nga ginbinagbinag naton. Una, ginahigugma mo ang kamatuoran kag ang pagkamatarong. Pamangkuta ang imo kaugalingon, ‘Gusto ko bala makita ang tion nga ang tanan nagahambal na sang matuod kag nagahimo sang matarong?’ Ikaduha, ginahigugma mo si Jesucristo. Pamangkuta ang imo kaugalingon, ‘Gusto ko bala nga ang Anak sang Dios amo ang akon Hari, kag gusto ko bala nga sundon ang iya halimbawa?’ Ikatlo, nga amo ang pinakaimportante sa tanan, ginahigugma mo si Jehova. Pamangkuta ang imo kaugalingon, ‘Gusto ko bala nga pasadyahon ang tagipusuon ni Jehova paagi sa pag-alagad sa iya bilang akon Dios?’ Kon huo ang imo sabat sa sini nga mga pamangkot, ngaa wala ka pa nagpabawtismo?—Binu. 16:33.

19. Ngaa indi ka dapat mag-alang-alang nga magpabawtismo? Maghatag sing ilustrasyon. (Juan 4:34)

¹⁹ Kon nagaalang-alang ka nga magpabawtismo, binagbinaga ang isa ka ilustrasyon nga gingamit ni Jesus. (Basaha ang Juan 4:34.) Talupangda nga ginkumparar ni Jesus sa pagkaon ang paghimo sang kabubut-on sang iya Amay. Ngaa? Kinahanglan naton magkaon kay para ini sa aton kaayuhan. Gani kabalo si Jesus nga para sa aton kaayuhan ang tanan nga ginapahimo ni Jehova sa aton. Wala sing may ginapahimo si Jehova nga posible makahalit sa aton. Gusto bala ni Jehova nga magpabawtismo ka? Huo. (Binu. 2:38) Makasalig ka nga kon tumanon mo ang sugo nga magpabawtismo, magaresulta ini sa imo kaayuhan. Indi bala nga wala ka nagaalang-alang nga magkaon sang manamit gid nga pagkaon? Ti, ngaa nagaalang-alang ka nga magpabawtismo?

20. Ano ang binagbinagon naton sa masunod nga artikulo?

²⁰ Ngaa nagaalang-alang ang iban nga magpabawtismo? Posible nga madamo ang magsiling nga, “Indi pa ako handa.” Ang pagdedikar sang imo kaugalingon kay Jehova kag ang pagpabawtismo amo ang pinakaimportante nga desisyon nga mahimo mo sa imo kabuhi. Gani kinahanglan ang tion, pagpamensar sing maayo, kag pagpanikasog para mabawtismuhan ka. Pero kon gusto mo gid nga magpabawtismo, ano ang puede mo himuon subong para mabawtismuhan ka? Binagbinagon naton ini sa masunod nga artikulo.