1. Ano ang pila ka pagpakamaayo bangod bahin kita sang organisasyon ni Jehova?

 ISA gid ka pagpakamaayo nga bahin kita sang organisasyon ni Jehova sa sining mabudlay nga katapusan nga mga adlaw. Nagabudlay pa gid ang sitwasyon sa sini nga kalibutan, pero ginhatagan kita ni Jehova sang mga kauturan para buligan kita. (Sal. 133:1) Ginabuligan niya kita para mangin malipayon ang aton pamilya. (Efe. 5:33–6:1) Kag ginahatagan niya kita sang paghantop kag kaalam para masarangan naton ang mga kabalaka kag mangin malinong ang aton hunahuna.

2. Ano ang dapat naton himuon, kag ngaa?

² Pero, dapat kita magpanikasog para padayon naton nga maalagad sing matutom si Jehova. Ngaa? Bangod kon kaisa, posible masandad kita kon may ginsiling ukon ginhimo ang iban nga nagpalain sang aton buot. Posible magluya man ang aton buot kon makahimo kita sang mga sala, ilabi na kon sulitsulit lang ini. Dapat kita magpadayon sa pag-alagad kay Jehova (1) bisan pa nasandad kita sa isa ka utod, (2) bisan pa mabudlay ang aton sitwasyon bangod sa aton asawa ukon bana, kag (3) bisan pa nagluya ang aton buot bangod sa nahimo naton nga mga sala. Sa sini nga artikulo, binagbinagon naton ang kada isa sa sini nga mga sitwasyon. Sa kada sitwasyon, binagbinagon man naton kon ano ang matun-an naton sa isa ka matutom nga karakter sa Biblia nga nakaeksperiensia sini.

MAGPADAYON BISAN PA NASANDAD KA SA ISA KA UTOD

3. Ano nga problema ang dapat batason sang katawhan ni Jehova?

³ Ang problema. May mga kinaiya ang pila naton ka kauturan nga wala naton nanamian. Gani kon may ginhimo sila nga indi maayo sa aton ukon indi maayo ang pagtratar nila sa aton, posible maglain ang aton buot sa ila. Makahimo man sang sala ang mga gulang. Bangod sini, posible magduhaduha ang iban kon bala organisasyon gid ini sang Dios. Gani imbes nga padayon nga mag-alagad sa Dios “sing nahiusa” upod sa ila mga kauturan, posible nga likawan nila ang nagpasandad  sa ila ukon posible nga mag-untat sila sa pag-attend sa mga miting. (Sof. 3:9) Amo bala ini ang maayo nga himuon? Binagbinagon naton kon ano ang matun-an naton sa isa ka karakter sa Biblia nga nakaeksperiensia sang pareho sa sini nga mga problema.

4. Ano nga mga problema ang naeksperiensiahan ni apostol Pablo?

⁴ Ang halimbawa sa Biblia. Kabalo si apostol Pablo nga indi perpekto ang iya mga kauturan. Halimbawa, sang nagaumpisa pa lang sia nga magpakig-upod sa mga kauturan sa kongregasyon, indi sila magpati nga isa sia ka disipulo. (Binu. 9:26) Sang ulihi, ginguba sang iban ang iya reputasyon paagi sa pagsugid sing indi maayo parte sa iya. (2 Cor. 10:10) Nasaksihan ni Pablo ang indi maayo nga ginhimo sang isa ka gulang nga posible nagpasandad sa iban. (Gal. 2:​11, 12) Kag naglain gid ang buot ni Pablo kay Marcos nga isa sa mga suod niya nga kaupod. (Binu. 15:​37, 38) Puede kuntani himuon ni Pablo nga rason ang bisan diin man sa sini para likawan ang mga nagpasandad sa iya. Pero, padayon niya nga ginpabaloran ang iya mga kauturan kag padayon sia nga nag-alagad sing matutom kay Jehova. Ano ang nakabulig kay Pablo nga magpadayon?

5. Ano ang nakabulig kay Pablo nga indi paglikawan ang iya mga kauturan? (Colosas 3:​13, 14) (Tan-awa man ang piktyur.)

⁵ Palangga ni Pablo ang iya mga kauturan. Bangod palangga niya sila, wala sia nagpokus sa ila mga kaluyahon. Sa baylo, nagpokus sia sa ila maayo nga mga kinaiya. Bangod man sa gugma ni Pablo sa ila, ginpatawad niya sila. Kag ginsilingan kita ni Pablo nga dapat man naton ini himuon suno sa Colosas 3:​13, 14. (Basaha.) Binagbinaga kon paano niya ginpatawad si Marcos. Sa una nga paglakbay ni Pablo bilang misyonero, ginbiyaan sia ni Marcos. Pero wala naghinakit si Pablo. Sang ulihi, sang naghimo si Pablo sing makatalandog nga sulat para sa kongregasyon sa Colosas, gindayaw niya si Marcos bilang isa ka importante nga kaupod nga “nagahatag sing daku nga lugpay” sa iya. (Col. 4:​10, 11) Sang napriso si Pablo sa Roma, nangabay sia nga pakadtuon si Marcos sa iya para buligan sia. (2 Tim. 4:11) Maathag nga ginpatawad ni Pablo ang iya mga kauturan kag wala niya sila ginlikawan. Ano ang matun-an naton kay Pablo?

6-7. Ano ang makabulig sa aton para padayon naton nga mapakita nga palangga naton ang aton mga kauturan bisan pa sang ila mga kaluyahon? (1 Juan 4:7)

⁶ Ang matun-an naton. Gusto ni Jehova nga padayon naton nga pakitaan sing gugma ang aton mga kauturan. (Basaha ang 1 Juan 4:7.) Kon naglain ang aton buot sa isa ka utod bangod sa iya ginhimo, dapat naton hunahunaon nga indi niya ini hungod. Wala lang niya napakita ang pila ka maayo nga mga kinaiya, pero ginapanikasugan man niya nga sundon ang mga prinsipio sa Biblia. (Hulu. 12:18) Palangga sang Dios ang iya matutom nga  mga alagad bisan pa may mga kaluyahon sila. Bisan pa makahimo kita sang mga sala, ginakabig niya kita gihapon nga iya mga abyan kag wala sia nagahinakit sa aton. (Sal. 103:9) Importante gid nga ilugon naton ang aton mapinatawaron nga Amay.​—Efe. 4:32–5:1.

⁷ Tandaan man naton nga samtang nagahilapit ang katapusan, dapat magpabilin kita nga suod sa aton mga kauturan. Mapaabot naton nga mas magabudlay pa gid ang mga paghingabot nga maeksperiensiahan naton. Posible pa gani nga prisuhon kita bangod sang aton mga ginapatihan. Kon matabo ina, mas kinahanglan pa gid naton ang aton mga kauturan. (Hulu. 17:17) Binagbinaga ang natabo kay Josep a nga isa ka gulang sa Spain. Ginpriso sia kag ang iban pa nga kauturan bangod nangindi sila nga magsoldado. Nagsiling sia: “Sa prisuhan, daku ang tsansa nga mairitar namon ang isa kag isa bangod ululupod kami. Dapat namon batason ang isa kag isa kag dapat handa kami magpatawad. Nakabulig ini para indi maguba ang amon paghiusa. Naproteksionan man namon ang isa kag isa sa mga priso nga wala nagaalagad kay Jehova. Isa ka bes, nabali ang akon butkon kag ginbutangan ini sang bendahe, gani indi ko mahimo ang pila ka hilikuton. Pero ginlabhan sang isa ka utod ang akon mga bayo, kag madamo pa sia sing ginhimo para buligan ako. Naeksperiensiahan ko ang matuod nga gugma sa tion nga kinahanglan ko gid ini.” Gani kon naglain ang aton buot sa isa ka utod bangod wala kita naghangpanay, dapat solbaron na naton ini subong.

MAGPADAYON BISAN PA MABUDLAY ANG IMO SITWASYON BANGOD SA IMO ASAWA UKON BANA

8. Ano nga problema ang dapat batason sang mga mag-asawa?

⁸ Ang problema. May mga problema ang tanan nga mag-asawa. Ang Biblia prangka nga nagasiling nga makaeksperiensia sang “kapipit-an sa unod” ang mga mag-asawa. (1 Cor. 7:28) Ngaa? Bangod pareho nga indi perpekto ang bana kag asawa, lainlain ang ila mga kinaiya, kag lainlain ang ila gusto kag indi gusto. Posible nga lainlain ang ila kultura kag gindak-an. Posible nga may mga kinaiya ang ila asawa ukon bana nga wala nila nakita antes sila nagpakasal. Puede bangdan sang problema sa pag-asawahay ang bisan diin man sa sini. Kay man, imbes nga batunon nga may sala sila nga duha kag dapat sila magbuligay para masolbar ang ila problema, posible nga basulon nila ang isa kag isa. Posible pa gani nga mahunahuna nila nga mas maayo kon magbulagay na lang sila ukon magdiborsio. Pero amo bala ini ang solusyon? b Binagbinagon naton ang isa ka karakter sa Biblia nga nagpadayon sa pag-alagad kay Jehova bisan pa grabe kabudlay sang iya sitwasyon bangod sa iya bana.

9. Ano nga problema ang naeksperiensiahan ni Abigail?

⁹ Ang halimbawa sa Biblia. Ang Biblia nagasiling nga ang bana ni Abigail nga si Nabal isa ka mapintas nga tawo kag malain sing batasan. (1 Sam. 25:3) Posible nga mabudlay gid ang sitwasyon ni Abigail. May tsansa bala kuntani si Abigail para tapuson ang ila pag-asawahay? Huo. Sang gin-insulto ni Nabal ang magabulos nga hari sang Israel nga si David kag ang iya mga tinawo, nagdesisyon si David nga patyon si Nabal. (1 Sam. 25:​9-13) Puede kuntani magpalagyo si Abigail para mapatay ni David si Nabal. Pero wala sia nagpalagyo. Sa baylo, ginkumbinsi niya si David nga indi pagpatyon si Nabal. (1 Sam. 25:​23-27) Ngaa ginhimo niya ini?

10. Ano ang posible nagpalig-on kay Abigail nga indi pagbulagan ang iya bana bisan pa mabudlay ang iya sitwasyon bangod sa iya bana?

¹⁰ Palangga ni Abigail si Jehova kag gintahod niya ang kasuguan ni Jehova parte sa pag-asawahay.  Posible gid nga kabalo sia kon ano ang ginhambal sang Dios sang ginkasal Niya ang pinakauna nga mag-asawa nga sanday Adan kag Eva. (Gen. 2:24) Kabalo si Abigail nga ginakabig ni Jehova nga sagrado ang pag-asawahay. Gusto niya nga malipay sa iya ang Dios, kag posible amo ini ang nagpalig-on sa iya nga himuon ang iya bug-os nga masarangan para maluwas niya ang iya panimalay, lakip na ang iya bana. Gani may ginhimo sia dayon para punggan si David sa pagpatay kay Nabal. Nangayo man sia sing pasaylo bisan pa indi sia ang may sala. Maisog si Abigail kag ginauna niya ang kaayuhan sang iban, gani palangga sia ni Jehova. Ano ang matun-an sang mga asawa kag mga bana sa halimbawa ni Abigail?

11. (a) Ano ang gusto ni Jehova nga himuon sang mga mag-asawa? (Efeso 5:33) (b) Ano ang natun-an mo sa ginhimo ni Carmen para indi maguba ang pag-asawahay nila sang iya bana? (Tan-awa man ang piktyur.)

¹¹ Ang matun-an naton. Gusto ni Jehova nga tahuron sang mga mag-asawa ang iya kasuguan parte sa pag-asawahay bisan pa mabudlay pakigbagayan ang ila asawa ukon bana. Sigurado gid nga nalipay ang Dios kon makita niya nga nagapanikasog ang mga mag-asawa nga solbaron ang ila mga problema. Nalipay man sia kon ginapalangga nila kag ginatahod ang isa kag isa. (Basaha ang Efeso 5:33.) Binagbinaga ang halimbawa ni Carmen. Mga anom ka tuig pagkatapos niya magpamana, nagpa-Bible study sia sa mga Saksi ni Jehova. Sang ulihi, nabawtismuhan sia. “Naakig ang akon bana sa akon desisyon,” siling ni Carmen. “Nagapangimon sia kay Jehova. Gani ginainsulto niya ako kag ginapahog niya ako nga biyaan niya kuno ako.” Bisan pa sini, padayon nga ginpabaloran ni Carmen ang ila pag-asawahay. Sa sulod sang 50 ka tuig, nagpanikasog gid sia nga palanggaon kag respetuhon ang iya bana. “Samtang nagaligad ang tinuig, natun-an ko nga mangin mas mahinangpanon sa akon bana kag istoryahon sia sa maayo nga paagi. Bangod kabalo ako nga ginakabig ni Jehova nga sagrado ang pag-asawahay, ginhimo ko ang akon bug-os nga masarangan para amligan ini. Wala ko gid gintinguhaan nga biyaan ang akon bana bangod palangga ko si Jehova.” c Kon mabudlay ang imo sitwasyon bangod sa problema sa inyo pag-asawahay, makasalig ka nga buligan ka ni Jehova nga makapadayon sa pag-alagad sa iya.

MAGPADAYON BISAN PA NAGLUYA ANG IMO BUOT BANGOD SA NAHIMO MO NGA SALA

12. Ano nga problema ang posible maeksperiensiahan naton kon makahimo kita sang serioso nga sala?

¹² Ang problema. Kon makahimo kita sang serioso nga sala, posible nga magaluya gid ang aton buot. Ang Biblia nagasiling nga bangod sa aton mga sala, posible makabatyag kita sang ‘kalisod.’ (Sal. 51:17) Binagbinaga ang halimbawa ni Robert. Sa sulod sang madamo nga tinuig,  nagpanikasog gid sia, gani nangin isa sia ka ministeryal nga alagad. Pero, nakahimo sia sang serioso nga sala kag narealisar niya nga nasubuan gid sa iya si Jehova. “Gintublag gid ako sang akon konsiensia,” siling niya. “Naglalain gid ako. Naghilibion ako nga nangamuyo kay Jehova. Nahunahuna ko nga indi na gid niya pagpamatian ang akon mga pangamuyo bangod ginpasubo ko sia.” Kon makahimo kita sang serioso nga sala, posible makabatyag kita sang grabe nga kasubo amo nga mahunahuna naton nga ginsikway na kita ni Jehova. (Sal. 38:4) Kon amo sini ang imo ginabatyag, binagbinaga ang isa ka matutom nga karakter sa Biblia nga padayon nga nag-alagad kay Jehova bisan pa nakahimo sia sang serioso nga sala.

13. Ano nga serioso nga sala ang nahimo ni Pedro, kag ano nga mga sala ang nahimo niya antes sini?

¹³ Ang halimbawa sa Biblia. Sang gab-i antes ginpatay si Jesus, nakahimo si apostol Pedro sang madamo nga sala. Bangod sa sini nga mga sala, nakahimo sia sang serioso nga sala. Una, ginpakita ni Pedro nga sobra ang pagsalig niya sa iya kaugalingon. Nagsiling sia nga magaunong sia kay Jesus bisan pa biyaan si Jesus sang iban pa nga mga apostoles. (Mar. 14:​27-29) Dayon, samtang ara sila sa hardin sang Getsemane, sulitsulit nga napaslawan si Pedro nga magpadayon sa pagbantay. (Mar. 14:​32, 37-41) Dayon, ginbiyaan ni Pedro si Jesus sang gindakop si Jesus sang mga tawo nga may mga espada kag mga inuglampos. (Mar. 14:50) Kag tatlo ka beses nga ginpanghiwala ni Pedro si Jesus. Nagpanumpa pa gani sia bisan pa kabalo sia nga nagabinutig sia. (Mar. 14:​66-71) Ano ang reaksion ni Pedro sang narealisar niya nga nakahimo sia sang serioso nga sala? Nasubuan gid sia kag naghilibion bangod posible gintublag gid sia sang iya konsiensia. (Mar. 14:72) Pagligad sang pila ka oras, ginpatay ang iya abyan nga si Jesus. Posible nga nagalalain gid si Pedro sadto nga tion. Posible nga nabatyagan niya nga wala sia sing pulos.

14. Ano ang nakabulig kay Pedro nga padayon nga mag-alagad kay Jehova? (Tan-awa ang piktyur.)

¹⁴ Nakapadayon si Pedro sa pag-alagad kay Jehova bangod sa pila ka rason. Wala niya ginpain ang iya kaugalingon. Sa baylo, ginkadtuan niya ang iya mga kauturan kag ginpaumpawan nila sia. (Luc. 24:33) Kag pagkatapos ginbanhaw si Jesus, nagpakita sia kay Pedro. Posible gid nga gusto niya palig-unon si Pedro. (Luc. 24:34; 1 Cor. 15:5) Sang ulihi, ginsilingan ni Jesus si Pedro nga magabaton sia sing mas dalagku nga mga responsibilidad. Gani wala gin-akigan ni Jesus ang iya abyan bisan pa sa nahimo niya nga mga sala. (Juan 21:​15-17) Kabalo si Pedro nga nakahimo sia sang serioso nga sala, pero wala sia nag-untat sa pagpanikasog nga himuon ang husto. Ngaa? Bangod kumbinsido sia nga palangga sia gihapon sang iya Agalon nga si Jesus. Kag padayon man nga ginbuligan si Pedro sang iya mga kauturan. Ano ang matun-an naton sa halimbawa ni Pedro?

15. Ano ang gusto ni Jehova nga indi naton pagduhaduhaan? (Salmo 86:5; Roma 8:​38, 39) (Tan-awa man ang piktyur.)

 ¹⁵ Ang matun-an naton. Gusto ni Jehova nga indi kita magduhaduha nga palangga niya kita kag handa sia nga patawaron kita. (Basaha ang Salmo 86:5; Roma 8:​38, 39.) Kon makahimo kita sang sala, normal lang nga konsiensiahon kita. Pero, indi naton dapat paghunahunaon nga indi na kita palangga ni Jehova ukon indi niya kita pagpatawaron. Sa baylo, magpabulig kita dayon. Si Robert, nga ginsambit kaina, nagsiling: “Nakahimo ako sang sala bangod nagsalig ako sa akon kaugalingon para pamatukan ang pagsulay.” Narealisar niya nga dapat sia mag-istorya sa mga gulang. Nagsiling sia: “Sang nag-istorya ako sa mga gulang, ginbuligan nila ako nga mabatyagan nga palangga ako ni Jehova. Kag nabatyagan ko nga palangga man ako sang mga gulang. Ginbuligan nila ako nga makumbinsi nga wala ako ginbiyaan ni Jehova.” Sa aton bahin, makumbinsi man kita nga palangga gid kita ni Jehova kag ginapatawad niya kita kon maghinulsol kita sa aton mga sala, kon magpabulig kita, kag kon panikasugan naton nga indi masulit ang aton mga sala. (1 Juan 1:​8, 9) Kon kumbinsido kita sa sini, indi gid kita mag-untat sa pag-alagad kay Jehova bisan pa makahimo kita sang sala.

16. Ngaa gusto mo nga padayon nga mag-alagad kay Jehova?

¹⁶ Ginapabaloran gid ni Jehova ang aton mga pagpanikasog para alagaron sia sa sining mabudlay nga katapusan nga mga adlaw. Sa bulig ni Jehova, makapadayon kita sa pag-alagad sing matutom sa iya bisan pa nagluya ang aton buot. Padayon naton nga palanggaon ang aton mga kauturan kag patawaron naton sila kon nasandad nila kita. Kon may mga problema sa aton pag-asawahay, himuon naton ang aton bug-os nga masarangan para masolbar ini. Kon himuon naton ini, ginapakita naton nga palangga gid naton ang Dios kag ginatahod naton ang iya mga kasuguan parte sa pag-asawahay. Kag kon makahimo kita sang sala, magpabulig kita kay Jehova, batunon naton ang iya gugma kag pagpatawad, kag padayon kita nga mag-alagad sa iya. Makasalig kita nga pakamaayuhon gid kita ni Jehova kon “indi kita magpangampo sa paghimo sing maayo.”​—Gal. 6:9.