1. Ano ang ginaduhaduhaan sang pila ka matutom nga alagad ni Jehova?

 MAKAPALIG-ON gid mabal-an nga nalipay si Jehova sa iya katawhan bilang isa ka grupo. Ang Biblia nagasiling: “Si Jehova nahamuot sa iya katawhan.” (Sal. 149:4) Pero kon kaisa, grabe gid ang pagluya sang buot sang pila ka utod, gani nagaduhaduha sila kon bala nalipay sa ila si Jehova. Madamo nga matutom nga alagad ni Jehova sang panahon sang Biblia ang nakabatyag man sini.​—1 Sam. 1:​6-10; Job 29:​2, 4; Sal. 51:11.

2. Kay sin-o nalipay si Jehova?

² Maathag nga ginapakita sang Biblia nga may puede himuon ang indi perpekto nga mga tawo para malipay sa ila si Jehova. Ano ang dapat naton himuon? Dapat kita magtuo kay Jesucristo kag magpabawtismo. (Juan 3:16) Paagi sa sini, ginapakita naton sa iban nga ginhinulsulan na naton ang aton mga sala kag nagpromisa kita sa Dios nga himuon naton ang iya kabubut-on. (Binu. 2:38; 3:19) Sang ginhimo naton ini bangod gusto naton mangin suod kay Jehova, nalipay gid sia sa aton. Kon padayon naton nga ginahimo ang aton bug-os nga masarangan para tumanon ang aton promisa kay Jehova, nalipay sia sa aton kag ginakabig niya kita nga suod niya nga mga abyan.​—Sal. 25:14.

3. Ano ang binagbinagon naton?

³ Pero, ngaa nagabatyag kon kaisa ang iban nga wala nalipay sa ila ang Dios? Paano ginapakita sa aton ni Jehova nga nalipay sia sa aton? Kag paano makasigurado ang isa ka Cristiano nga nalipay sa iya ang Dios?

KON NGAA PAMATYAG SANG IBAN WALA NALIPAY SA ILA SI JEHOVA

4-5. Bisan pa pamatyag naton wala kita sing pulos, ano ang masigurado naton?

⁴ Halin sang bata pa kita, madamo sa aton ang nagabatyag nga wala kita sing pulos. (Sal. 88:15) Ang isa ka brother nga si Adrián  nagsiling: “Halin pa sang una, pamatyag ko wala ako sing pulos. Sang bata pa ako, nadumduman ko nga nangamuyo ako nga kuntani makaistar sa Paraiso ang amon pamilya. Pero para sa akon, indi gid ako makaistar didto.” Si Tony, nga nagdaku sa indi Saksi nga pamilya, nagsiling: “Wala gid ako ginsilingan sang akon mga ginikanan nga palangga nila ako ukon ginapabugal nila ako. Bangod sini, pamatyag ko indi gid sila malipay sa akon bisan ano pa ang himuon ko.”

⁵ Kon nagabatyag kita kon kaisa nga wala kita sing pulos, dumdumon naton nga si Jehova mismo ang nagbuyok sa aton. (Juan 6:44) Nakita niya ang aton maayo nga mga kinaiya nga posible wala naton nakita, kag mas kilala niya kita sangsa pagkakilala naton sa aton kaugalingon. (1 Sam. 16:7; 2 Cron. 6:30) Gani kon magsiling sia nga hamili kita sa iya, masaligan gid naton ini.​—1 Juan 3:​19, 20.

6. Ano ang nahunahuna ni apostol Pablo bangod sa iya mga sala sang una?

⁶ Posible nga ginakonsiensia gihapon ang pila sa aton bangod sa mga nahimo naton antes naton natun-an ang kamatuoran. (1 Ped. 4:3) Bisan ang matutom nga mga Cristiano padayon nga nagapakigbato sa ila mga kaluyahon. Nagabatyag ka bala kon kaisa nga indi ka mapatawad ni Jehova? Makapaumpaw mahibaluan nga nabatyagan man ini sang matutom nga mga alagad ni Jehova. Halimbawa, nahunahuna ni apostol Pablo nga makaluluoy gid sia bangod sa iya mga kaluyahon. (Roma 7:24) Siempre, ginhinulsulan ni Pablo ang iya mga sala kag nagpabawtismo sia. Pero, gintawag niya ang iya kaugalingon nga “labing kubos sa mga apostoles” kag “labing makasasala.”​—1 Cor. 15:9; 1 Tim. 1:15.

7. Ano ang dapat naton dumdumon parte sa aton mga sala sang una?

⁷ Nagapromisa ang aton Amay sa langit nga patawaron niya kita kon maghinulsol kita. (Sal. 86:5) Gani kon sinsero ang aton paghinulsol sa nahimo naton nga mga sala, makasalig kita nga ginpatawad na kita ni Jehova kay amo ini ang iya ginpromisa.​—Col. 2:13.

8-9. Ano ang himuon naton kon pamatyag naton indi bastante ang aton ginahimo para malipay sa aton si Jehova?

⁸ Gusto naton tanan nga alagaron si Jehova sa bug-os naton nga masarangan. Pero, ginahunahuna sang iban nga indi bastante ang ila ginahimo para malipay sia sa ila. Ang isa ka sister nga si Amanda nagsiling: “Gusto ko gid ihatag kay Jehova ang akon pinakamaayo. Pero abi ko mahimo ko lang ini kon dugangan ko pirme ang akon ginahimo sa pag-alagad sa iya. Gani, pirme ko ginapanikasugan nga himuon ang sobra sa akon masarangan. Kon indi ko ini mahimo, nasubuan gid ako. Dayon ginapamensar ko nga wala nalipay sa akon si Jehova kay wala ko nahimo ang gusto ko himuon.”

⁹ Ano ang himuon naton kon pamatyag naton indi bastante ang aton ginahimo para malipay sa aton si Jehova? Dumdumon naton nga makatarunganon si Jehova. Wala niya kita ginasugo nga himuon naton ang indi naton masarangan. Bisan ano man ang aton ginahimo sa pag-alagad sa iya, ginapabaloran gid niya ini basta ginahimo naton ini sa bug-os naton nga masarangan. Pamalandungan man naton ang mga karakter sa Biblia nga nag-alagad kay Jehova sa bug-os nila nga tagipusuon. Binagbinaga ang halimbawa ni Pablo. Nagpangabudlay sia sa sulod sang madamo nga tinuig. Halimbawa, naglakbay sia sing linibo ka kilometro kag nagbulig sia nga maporma ang madamo nga kongregasyon. Pero sang nagbag-o ang iya sitwasyon, limitado na lang ang iya mahimo sa pagbantala. Ginapakita bala sini nga wala na nalipay sa iya si Jehova? Indi. Padayon niya nga ginhimo ang iya masarangan, kag ginpakamaayo sia ni Jehova. (Binu. 28:​30, 31) Sing kaanggid, posible magbag-o ang aton masarangan nga himuon para kay Jehova. Pero ang importante kay Jehova amo ang aton motibo sa pag-alagad sa iya. Binagbinagon naman naton kon paano ginapakita sa aton ni Jehova nga nalipay sia sa aton.

 PAANO GINAPAKITA SA ATON NI JEHOVA NGA NALIPAY SIA SA ATON?

10. Paano naton “mabatian” ang pagsiling ni Jehova nga nalipay sia sa aton? (Juan 16:27)

¹⁰ Paagi sa Biblia. Ginapakita ni Jehova sa iya katawhan nga palangga niya sila kag nalipay sia sa ila, kag gusto gid niya nga himuon ini. Sa Biblia, duha ka beses nga ginsilingan Niya si Jesus nga sia ang Iya hinigugma kag ginakahamut-an nga Anak. (Mat. 3:17; 17:5) Gusto mo bala “mabatian” ang pagsiling ni Jehova nga nalipay sia sa imo? Wala sia nagapakig-istorya sa aton halin sa langit, pero ginaistorya niya kita paagi sa iya Pulong. Kon basahon naton ang mga ginsiling ni Jesus nga mabasa sa mga Ebanghelyo, daw pareho lang nga si Jehova mismo ang nagasiling sini sa aton. (Basaha ang Juan 16:27.) Perpekto nga ginpakita ni Jesus ang mga kinaiya sang iya Amay. Nagsiling si Jesus nga nalipay sia sa iya matutom nga mga sumulunod bisan pa indi sila perpekto. Gani sa kada tion nga mabasa naton ini, imadyinon naton nga ginasiling ini sa aton ni Jehova.​—Juan 15:​9, 15.

11. Kon makaeksperiensia kita sang mga kabudlayan, ngaa indi buot silingon sini nga wala na nalipay sa aton si Jehova? (Santiago 1:12)

¹¹ Paagi sa paghatag sa aton sang aton mga kinahanglanon. Gusto gid ni Jehova nga buligan kita. Halimbawa, ginahatagan niya kita sang aton materyal nga mga kinahanglanon. Pero may mga tion nga ginatugutan niya nga makaeksperiensia kita sang mga kabudlayan, pareho sa natabo kay Job. (Job 1:​8-11) Kon makaeksperiensia kita sang mga pagtilaw, indi buot silingon sini nga wala na nalipay sa aton ang Dios. Sa baylo, nagahatag ini sa aton sang kahigayunan nga mapakita kon daw ano naton sia ka palangga kag kon daw ano kadaku ang aton pagsalig sa iya. (Basaha ang Santiago 1:12.) Kag bangod palangga niya kita, buligan niya kita nga mabatas ang mga pagtilaw.

12. Ano ang matun-an naton sa eksperiensia ni Dmitrii?

¹² Binagbinaga ang eksperiensia sang isa ka brother sa Asia nga si Dmitrii nga nadulaan sing obra. Madamo nga binulan sia nga nangita sing obra, pero wala gid sia sing nakita. Ginpakita niya nga daku ang pagsalig niya kay Jehova paagi sa pagdugang sang iya tion sa pagbantala. Pagligad sang madamo nga binulan, wala gihapon sia nakakita sing obra. Dayon nagmasakit sia sing grabe kag indi na sia makabangon. Nahunahuna niya nga indi sia isa ka maayo nga bana kag amay, kag pamatyag niya wala na nalipay si Jehova sa iya. Dayon isa ka gab-i, gin-print sang iya bata nga babayi sa isa ka papel ang ginasiling sang Isaias 30:15: “Mangin mabakod kamo kon magpakalinong kamo kag magsalig sa akon.” Gindala ini  sang bata sa iya amay kag nagsiling sia, “Pa, kon nasubuan ka, dumduma ini nga teksto.” Narealisar ni Dmitrii nga dapat niya pasalamatan si Jehova kay may bastante gihapon nga pagkaon ang ila pamilya, may bayo sila, kag may ginaistaran. Nagsiling sia, “Dapat mangin kalmado lang ako kag padayon ko nga ipakita nga nagasalig ako sa akon Dios.” Kon daw pareho man sa sini ang imo problema, makasalig ka nga nagaulikid sa imo si Jehova kag buligan ka niya nga makabatas.

13. Sin-o ang posible gamiton ni Jehova para ipakita nga nalipay sia sa aton, kag paano niya sila ginagamit?

¹³ Paagi sa aton mga kauturan. Ginagamit ni Jehova ang aton mga kauturan para ipakita sa aton nga nalipay sia sa aton. Halimbawa, puede niya sila gamiton para palig-unon kita sa tion nga kinahanglan gid naton ini. Naeksperiensiahan ini sang isa ka sister sa Asia sang tion nga madamo sia sang problema. Nadulaan sia sing obra kag nagmasakit sia sing grabe. Dayon nakahimo sang serioso nga sala ang iya bana, kag ginkuha ang pribilehiyo sang iya bana bilang isa ka gulang. “Indi ko mahangpan kon ngaa natabo ini sa akon,” siling niya. “Nahunahuna ko nga basi may nahimo ako nga sala kag naakig sa akon si Jehova.” Nakitluoy ang aton sister kay Jehova nga ipabatyag sa iya nga palangga Niya sia. Paano ini ginpabatyag sa iya ni Jehova? Nagsiling ang aton sister, “Gin-istorya ako sang mga gulang kag ginpasalig nila ako nga palangga ako ni Jehova.” Sang ulihi, nakitluoy sia liwat kay Jehova. “Sadto mismo nga adlaw, nakabaton ako sang sulat halin sa mga kauturan sa kongregasyon,” siling niya. “Samtang ginabasa ko ang ila makapaumpaw nga sulat, nabatyagan ko nga ginsabat ni Jehova ang akon pangamuyo.” Gani sa masami, ginapakita ni Jehova nga nalipay sia sa aton paagi sa pagpalig-on sa aton sang iban.​—Sal. 10:17.

14. Ano ang isa pa ka paagi nga ginapakita ni Jehova nga nalipay sia sa aton?

¹⁴ Ginapakita man ni Jehova nga nalipay sia sa aton sa isa pa ka paagi. Ginagamit niya ang aton mga kauturan sa paglaygay sa aton kon  kinahanglan naton ini. Halimbawa, sang unang siglo, gingamit ni Jehova si apostol Pablo sa paghimo sing 14 ka sulat para sa iya mga kauturan. Sa sini nga mga sulat, prangka nga ginlaygayan ni Pablo ang iya mga kauturan. Pero ginhimo niya ini sa mahigugmaon nga paagi. Ngaa gintuytuyan ni Jehova si Pablo nga laygayan sila? Bangod isa ka maayo nga Amay si Jehova, kag ginadisiplina niya ang iya mga anak “nga nahamut-an niya.” (Hulu. 3:​11, 12) Gani kon makabaton kita sing laygay nga nabase sa Biblia, indi buot silingon sini nga naakig sa aton si Jehova. Sa baylo, ginapakita sini nga palangga niya kita gihapon. (Heb. 12:6) Ano ang iban pa nga pamatuod nga nalipay sa aton si Jehova?

IBAN PA NGA PAMATUOD NGA NALIPAY SA ATON SI JEHOVA

15. Sin-o ang ginahatagan ni Jehova sang iya balaan nga espiritu, kag ngaa makapabakod ini sa aton?

¹⁵ Basta nalipay si Jehova sa iya alagad, ginahatagan niya sia sang iya balaan nga espiritu. (Mat. 12:18) Pamangkuton naton ang aton kaugalingon, ‘Nasarangan ko bala nga ipakita ang pila ka kinaiya nga ginapatubas sang espiritu sang Dios?’ Halimbawa, natalupangdan mo bala nga nangin mas mapinasensiahon ka na subong kon ikumparar sang una nga indi mo pa kilala si Jehova? Ang matuod, kon pirme mo ginapakita ang mga kinaiya nga ginapatubas sang espiritu sang Dios, pamatuod ini nga nalipay sa imo si Jehova.​—Tan-awa ang kahon nga “ Ang mga Kinaiya nga Ginapatubas sang Espiritu Amo Ang . . . ”

16. Sin-o ang ginagamit ni Jehova para ibantala ang maayong balita, kag ano ang ginabatyag mo sa sini nga pribilehiyo? (1 Tesalonica 2:4)

¹⁶ Nalipay sa aton si Jehova gani gintugyan niya sa aton ang pagbantala sang maayong balita. (Basaha ang 1 Tesalonica 2:4.) Talupangda kon paano nakabenepisyo ang isa ka sister nga si Jocelyn bangod ginabantala niya sa iban ang maayong balita. Isa ka adlaw, nasubuan gid si Jocelyn. “Daw wala ako sing gana nga himuon ang bisan ano kag pamatyag ko wala ako sing pulos ,” siling niya. “Pero nagapayunir ako, kag iskedyul ko sa pagbantala sadto nga adlaw. Gani nangamuyo ako kag nagbantala.” Sadto nga aga, naistorya ni Jocelyn ang isa ka mabuot nga babayi nga si Mary kag nagpasugot sia nga magpa-Bible study. Pagligad sang pila ka bulan, ginsugid ni Mary kay Jocelyn nga sang nanuktok si Jocelyn sa iya balay, nagapangamuyo sia sadto sa Dios para mangayo sang bulig. Ano ang natun-an ni Jocelyn sa sini nga eksperiensia? Nagsiling sia, “Nabatyagan ko nga daw ginasilingan ako ni Jehova sing, ‘Nalipay ako sa imo.’” Siempre, indi  tanan nga ginabantalaan naton magapamati sa aton mensahe. Pero makasigurado kita nga kon ginahimo naton ang aton bug-os nga masarangan para isugid sa iban ang maayong balita, nalipay sa aton si Jehova.

17. Ano ang natun-an mo sa ginsiling ni Vicky parte sa halad-gawad? (Salmo 5:12)

¹⁷ Nalipay sa aton si Jehova gani nagabenepisyo kita sa halad-gawad. (1 Tim. 2:​5, 6) Pero ano abi kon daw indi kita gihapon magpati nga nalipay sa aton si Jehova bisan pa nagatuo kita sa halad-gawad kag bawtismado na kita? Dumduma nga indi sa tanan nga tion masaligan naton ang aton balatyagon, pero masaligan naton si Jehova. Ginakabig niya nga matarong ang mga nagatuo sa halad-gawad kag nagapromisa sia nga pakamaayuhon niya sila. (Basaha ang Salmo 5:12; Roma 3:26) Nakabulig sa isa ka sister nga si Vicky ang pagpamalandong parte sa halad-gawad. Isa ka adlaw, pagkatapos niya pamalandungan sing maayo ang parte sa halad-gawad, narealisar niya: “Palangga gid ako ni Jehova kag madugay na niya ako nga ginapasensiahan. Pero daw ginasilingan ko sia: ‘Indi ako nagakabagay sa imo pagpalangga. Indi matabunan sang halad sang imo Anak ang akon mga sala.’” Bangod ginpamalandungan niya ang regalo nga halad-gawad, nabatyagan niya nga palangga sia ni Jehova. Kon pamalandungan man naton ang parte sa halad-gawad, mabatyagan man naton nga palangga kita ni Jehova kag nalipay sia sa aton.

18. Ano ang masigurado naton kon padayon naton nga palanggaon ang aton Amay sa langit?

¹⁸ Bisan pa ginapanikasugan gid naton nga iaplikar ang mga natun-an naton sa sini nga artikulo, posible gihapon magluya ang aton buot kag posible magbatyag kita nga wala nalipay sa aton si Jehova. Kon matabo ina, dumduma nga nalipay sia “sa mga padayon nga nagahigugma sa Iya.” (Sant. 1:12) Gani padayon nga panikasugi nga mangin suod pa gid kay Jehova, kag binagbinaga kon paano niya ginapakita nga nalipay sia sa imo. Kag indi pagkalimti nga ‘indi malayo si Jehova sa tagsa sa aton.’—Binu. 17:27.