1. Ano ang duha ka kamatuoran nga masaligan naton?

PALANGGA ni Jehova nga Dios ang mga nagasimba sa iya. Palangga niya sila halin pa sang una, kag indi gid sia mag-untat sa pagpalangga sa ila. Ginapabaloran man niya ang katarungan. (Sal. 33:5) Gani masaligan naton ining duha ka kamatuoran: (1) Nasakitan si Jehova kon himuan sang malain ang iya mga alagad. (2) Siguraduhon niya nga hatagan sila sing katarungan. Natun-an naton sa una sa sining apat ka artikulo * nga ang Kasuguan nga ginhatag sang Dios sa Israel paagi kay Moises ginbase sa gugma. Ginpalig-on sini ang mga tawo nga ipakita ang katarungan sa tanan, ilabi na sa indi makaamlig sang ila kaugalingon. (Deut. 10:18) Maathag nga ginapakita sang Kasuguan nga nagaulikid gid si Jehova sa mga nagasimba sa iya.

2. Ano nga mga pamangkot ang sabton naton?

² Sang ginsugdan ang Cristianong kongregasyon sang 33 C.E., wala na ginpatuman ang Mosaikong Kasuguan. Buot bala silingon sini nga wala na sang kasuguan nga makaamlig sa mga Cristiano nga ginbase sa gugma kag nagapalig-on sang katarungan? Indi. May bag-o nga kasuguan ang mga Cristiano. Sa sini nga artikulo, binagbinagon naton kon ano ini nga kasuguan. Dayon sabton naton ini nga mga pamangkot: Ngaa masiling naton nga ginbase sa gugma ini nga kasuguan? Ngaa masiling naton nga ginapalig-on sini ang mga tawo nga ipakita ang katarungan? Base sa sini nga kasuguan, paano dapat trataron sang mga may awtoridad ang iban?

3. Ano “ang kasuguan sang Cristo” nga ginsambit sa Galacia 6:2?

³ Basaha ang Galacia 6:2. Ginatuman sang mga Cristiano “ang kasuguan sang Cristo.” Wala sing ginsulat si Jesus nga mga kasuguan para sa iya mga sumulunod, pero naghatag sia sing mga instruksion, mga sugo, kag mga prinsipio para maggiya sa ila. “Ang kasuguan sang Cristo” amo ang tanan nga gintudlo ni Jesus. Para mahangpan naton sing maayo ini nga kasuguan, binagbinagon naton ang masunod nga mga parapo.

4-5. Paano nagtudlo si Jesus, kag san-o sia nagtudlo?

⁴ Paano nagtudlo si Jesus? Una, gintudluan niya ang mga tawo paagi sa iya mga ginsiling nga may daku nga epekto sa ila. Gintudlo niya ang kamatuoran parte sa Dios, ang matuod nga katuyuan sang kabuhi, kag ang Ginharian sang Dios nga amo ang magasolbar sang tanan nga problema sang tawo. (Luc. 24:19) Nagtudlo man si Jesus paagi sa iya halimbawa. Ginpakita niya sa iya mga sumulunod ang husto nga paagi sang pagkabuhi.—Juan 13:15.

⁵ San-o nagtudlo si Jesus? Nagtudlo sia sa tion sang iya ministeryo sa duta. (Mat. 4:23) Gintudluan man niya ang iya mga sumulunod pagkatapos sia mabanhaw. Halimbawa, nagpakita sia sa posible sobra sa 500 ka disipulo kag ginsugo niya sila nga ‘tudluan ang iban agod mangin disipulo niya.’ (Mat. 28:19, 20; 1 Cor. 15:6) Bilang ulo sang kongregasyon, padayon nga gintudluan ni Jesus ang iya mga disipulo pagbalik niya sa langit. Halimbawa, sang mga 96 C.E., ginsugo sang Cristo si apostol Juan nga palig-unon kag laygayan ang hinaplas nga mga Cristiano.—Col. 1:18; Bug. 1:1.

6-7. (a) Sa diin nasulat ang mga gintudlo ni Jesus? (b) Paano naton matuman ang kasuguan sang Cristo?

⁶ Sa diin nasulat ang mga gintudlo ni Jesus? Nasulat sa apat ka Ebanghelyo ang madamo sa mga ginsiling kag ginhimo ni Jesus sa duta. Mabuligan man kita sang iban pa nga libro sa Cristianong Griegong Kasulatan nga mahangpan ang panghunahuna ni Jesus, bangod ang mga nagsulat sini gintuytuyan sang balaan nga espiritu kag ara sa ila “ang hunahuna sang Cristo.”—1 Cor. 2:16.

⁷ Ang matun-an naton: Ang mga gintudlo ni Jesus makabulig sa aton sa tanan nga bahin sang aton kabuhi. Ang kasuguan sang Cristo may epekto sa tanan naton nga ginahimo, ara man kita sa aton balay, sa ulubrahan, sa eskwelahan,  ukon sa kongregasyon. Matun-an naton ini nga kasuguan paagi sa pagbasa sa Cristianong Griegong Kasulatan kag sa pagpamalandong sa sini. Ginatuman naton ini nga kasuguan kon ginasunod naton ang mga instruksion, mga sugo, kag mga prinsipio sa sini nga mga libro sa Biblia. Kon ginatuman naton ang kasuguan sang Cristo, ginatuman naton ang aton mahigugmaon nga Dios, nga si Jehova, bangod naghalin sa iya ang tanan nga gintudlo ni Jesus.—Juan 8:28.

8. Sa ano ginbase ang kasuguan sang Cristo?

⁸ Kon ang isa ka balay natukod sa mabakod nga pundasyon, ang mga nagaistar sa sini magabatyag nga hilway sila sa katalagman. Gani kon ang isa ka maayo nga kasuguan may mabakod man nga pundasyon, ang mga nagatuman sa sini magabatyag man nga hilway sila sa katalagman kag naamligan. Ang kasuguan sang Cristo ginbase sa pinakamaayo nga pundasyon, nga amo ang gugma. Ngaa masiling naton ini?

9-10. Ano nga mga halimbawa ang nagapakita nga gugma ang motibo ni Jesus, kag paano naton sia mailog?

⁹ Una, ang motibo ni Jesus sa tanan niya nga ginhimo amo ang gugma. Nagpakita sia sing kaluoy bangod sang iya gugma. Bangod naluoy si Jesus sa mga tawo, gintudluan niya sila, gin-ayo niya ang mga nagamasakit, ginpakaon ang mga ginagutom, kag ginbanhaw ang mga patay. (Mat. 14:14; 15:32-38; Mar. 6:34; Luc. 7:11-15) Bisan pa nagakinahanglan ini sing daku nga tion kag kusog, handa si Jesus nga unahon ang kaayuhan sang iban. Labaw sa tanan, nagpakita sia sang daku nga gugma sang ginhatag niya ang iya kabuhi para sa iban.—Juan 15:13.

¹⁰ Ang matun-an naton: Mailog naton si Jesus kon unahon naton ang kaayuhan sang iban. Mailog man naton sia kon tinguhaan naton nga ipakita pa gid ang kaluoy sa mga tawo sa aton teritoryo. Kon ginabantala naton kag ginatudlo ang maayong balita bangod naluoy kita sa ila, ginatuman naton ang kasuguan sang Cristo.

11-12. (a) Ano ang pamatuod nga nagaulikid gid si Jehova sa aton? (b) Paano naton mailog ang gugma ni Jehova?

¹¹ Ikaduha, ginpakita ni Jesus ang gugma sang iya Amay. Sa tion sang iya ministeryo, ginpakita niya nga nagaulikid gid si Jehova sa mga nagasimba sa Iya. Halimbawa, gintudlo ni Jesus nga ang kada isa sa aton importante sa aton Amay sa langit. (Mat. 10:31) Nalipay gid si Jehova kon ang nadula nga karnero maghinulsol kag magbalik sa kongregasyon. (Luc. 15:7, 10) Ginpakita ni Jehova ang iya gugma sa aton paagi sa paghatag sang iya Anak bilang halad-gawad para sa aton.—Juan 3:16.

¹² Ang matun-an naton: Paano naton mailog ang gugma ni Jehova? (Efe. 5:1, 2) Mailog naton sia kon importante sa aton ang kada isa sang aton mga kauturan, kag nalipay kita kon magbalik kay Jehova ang “nadula nga karnero.” (Sal. 119:176) Ginapakita naton ang aton gugma sa aton mga kauturan paagi sa paggamit sang aton tion kag kusog para buligan sila. (1 Juan 3:17) Kon nagapakita kita sang gugma sa iban, ginatuman naton ang kasuguan sang Cristo.

13-14. (a) Suno sa Juan 13:34, 35, ano ang ginsugo ni Jesus sa iya mga sumulunod, kag ngaa bag-o ini nga sugo? (b) Paano naton matuman ining bag-o nga sugo?

¹³ Ikatlo, ginsugo ni Jesus ang iya mga sumulunod nga ipakita ang gugma nga handa magsakripisyo. (Basaha ang Juan 13:34, 35.) Ini nga gugma wala nalakip sa Kasuguan nga ginhatag sang Dios sa Israel. Gani bag-o ini nga sugo ni Jesus kay ginapatuman sini nga dapat naton higugmaon ang aton mga kauturan pareho sang paghigugma ni Jesus sa aton. Gugma ini nga handa magsakripisyo. * Dapat naton higugmaon ang aton mga kauturan sing sobra pa sa paghigugma naton sa aton kaugalingon. Bangod sang aton gugma, handa kita nga mapatay para sa ila, pareho sang ginhimo ni Jesus para sa aton.

 ¹⁴ Ang matun-an naton: Paano naton matuman ining bag-o nga sugo? Matuman naton ini paagi sa pagsakripisyo para sa aton mga kauturan. Handa kita sa paghimo sang daku nga sakripisyo, pareho sang paghatag sang aton kabuhi para sa ila. Pero handa man kita maghimo bisan sang gagmay nga sakripisyo. Halimbawa, ginatuman naton ang kasuguan sang Cristo kon pirme naton ginabuligan ang isa ka tigulang nga utod para makatambong sa miting, kon handa kita magsakripisyo para malipay ang aton pinalangga, kag kon ginagamit naton ang aton bakasyon sa trabaho para magbulig sa mga nahalitan sang kalamidad. Paagi sa sini, magabatyag ang kada isa sa aton kongregasyon nga hilway sa katalagman kag naamligan.

15-17. (a) Paano makita ang katarungan sa mga ginhimo ni Jesus? (b) Paano naton mailog si Jesus?

¹⁵ Sa Biblia, ang “katarungan” amo ang paghimo sang husto kag matarong suno sa ginasiling sang Dios kag ang paghimo sini nga wala sing ginapasulabi. Ngaa masiling naton nga ginapalig-on sang kasuguan sang Cristo ang mga tawo nga ipakita ang katarungan?

¹⁶ Una, binagbinaga kon paano makita ang katarungan sa mga ginhimo ni Jesus. Sang panahon niya, ang Judiyo nga mga lider sang relihion naugot sa mga indi Judiyo, ginapakanubo nila ang kinaandan nga mga Judiyo, kag wala nila ginarespeto ang mga babayi. Pero wala sing ginpasulabi si Jesus. Wala niya ginsikway ang mga indi Judiyo nga nagatuo sa iya. (Mat. 8:5-10, 13) Nagbantala sia sa tanan, manggaranon man sila ukon imol. (Mat. 11:5; Luc. 19:2, 9) Wala niya ginpintasan ukon gin-insulto ang mga babayi. Ginarespeto niya sila kag mainayuhon sia sa ila, bisan sa mga babayi nga ginapakalain sang iban.—Luc. 7:37-39, 44-50.

¹⁷ Ang matun-an naton: Mailog naton si Jesus kon wala kita sing ginapasulabi kag nagabantala kita sa tanan nga gusto mamati, ano man ang ila relihion, manggaranon man sila ukon imol. Ginailog si Jesus sang Cristiano nga mga lalaki paagi sa pagrespeto sa mga babayi. Kon ginahimo naton ini, ginatuman naton ang kasuguan sang Cristo.

18-19. Ano ang gintudlo ni Jesus parte sa katarungan, kag ano ang matun-an naton sa sini?

¹⁸ Ikaduha, binagbinaga ang gintudlo ni Jesus parte sa katarungan. Gintudlo niya ang mga prinsipio nga magapalig-on sa iya mga sumulunod nga maghimo sang maayo sa iban. Halimbawa, ginsugo kita ni Jesus nga himuon naton sa iban ang gusto naton nga himuon nila sa aton. (Mat. 7:12) Gusto naton tanan nga himuan kita sang maayo sang iban. Gani dapat kita maghimo sang maayo sa ila. Kon himuon naton ini, mapalig-on sila nga maghimo sang maayo sa aton. Pero ano abi kon ginhimuan kita sang malain? Gintudluan man ni Jesus ang iya mga sumulunod nga magsalig nga “hatagan [ni Jehova] sing katarungan ang [mga] nagapanawag sa iya adlaw kag gab-i.” (Luc. 18:6, 7) Isa ini ka promisa. Nabal-an sang aton matarong nga Dios ang ginaatubang naton nga mga pagtilaw sa sining katapusan nga mga adlaw, kag hatagan niya kita sing katarungan sa iya gintalana nga tion.—2 Tes. 1:6.

¹⁹ Ang matun-an naton: Kon sundon naton ang mga prinsipio nga gintudlo ni Jesus, magahimo kita sang maayo sa iban. Kag kon ginhimuan kita sang malain sa kalibutan ni Satanas, makasalig kita nga hatagan gid kita ni Jehova sing katarungan.

20-21. (a) Paano dapat trataron sang mga may awtoridad ang iban? (b) Paano mapakita sang bana ang gugma nga handa magsakripisyo, kag paano dapat trataron sang amay ang iya kabataan?

²⁰ Sa kasuguan sang Cristo, paano dapat trataron sang mga may awtoridad ang iban? Bangod  ginbase sa gugma ini nga kasuguan, dapat respetuhon kag palanggaon sang mga may awtoridad ang ila mga ginatatap. Dapat nila dumdumon nga gusto sang Cristo nga ipakita naton ang gugma sa tanan naton nga ginahimo.

²¹ Sa pamilya. Dapat higugmaon sang bana ang iya asawa “subong sang ginahimo sang Cristo sa kongregasyon.” (Efe. 5:25, 28, 29) Dapat ilugon sang bana ang gugma sang Cristo nga handa magsakripisyo paagi sa pag-una sa mga kinahanglanon kag kaayuhan sang iya asawa. Mahimo nga nabudlayan ang iban nga lalaki nga ipakita ini nga gugma, ayhan bangod nagdaku sila sa isa ka pamilya nga wala nagapakita sing gugma ukon wala nagatratar sing maayo sa iban. Mahimo nga nabudlayan sila nga bag-uhon ang ila malain nga mga batasan, pero dapat nila ini himuon para matuman nila ang kasuguan sang Cristo. Ang bana nga may gugma nga handa magsakripisyo ginarespeto sang iya asawa. Ang amay nga nagapalangga sa iya kabataan indi gid magasakit sa ila paagi sa iya ginahambal ukon ginahimo. (Efe. 4:31) Sa baylo, ginapakita niya sa iya kabataan nga ginapalangga kag ginapabaloran niya sila, gani nagabatyag sila nga hilway sa katalagman kag naamligan. Bangod sini, ginapalangga sia kag ginasaligan sang iya kabataan.

22. Suno sa 1 Pedro 5:1-3, sin-o ang tag-iya sang “mga karnero,” kag paano sila dapat trataron?

²² Sa kongregasyon. Dapat dumdumon sang mga gulang nga indi sila ang tag-iya sang “mga karnero.” (Juan 10:16; basaha ang 1 Pedro 5:1-3.) Ang mga tinaga nga “panong sang Dios,” “sa atubangan sang Dios,” kag “mga ginapanag-iyahan sang Dios” nagapahanumdom sa mga gulang nga si Jehova ang tag-iya sang mga karnero. Gusto niya nga pakitaan sing gugma kag pagpalangga ang iya mga karnero. (1 Tes. 2:7, 8) Nahamuot si Jehova sa mga gulang nga nagapakita sang gugma samtang ginatuman nila ang ila responsibilidad bilang mga manugbantay. Ginapalangga man sila kag ginarespeto sang ila mga kauturan.

23-24. (a) Kon may nakahimo sang serioso nga sala sa kongregasyon, paano ini ginaasikaso sang mga gulang? (b) Ano ang dapat binagbinagon sang mga gulang kon nagaasikaso sila sini nga sala?

 ²³ Ano ang responsibilidad sang mga gulang kon nagaasikaso sang serioso nga mga sala? Indi ini pareho sa responsibilidad sang mga hukom kag mga gulang sa Israel nga ginhatagan sang Dios sing Kasuguan. Suno sa sini nga Kasuguan, may awtoridad ang gintangdo nga mga lalaki nga asikasuhon ang mga kaso nga may labot sa pagsimba kay Jehova, pati na ang mga kaso nga wala labot sa sini. Pero sa kasuguan sang Cristo, responsibilidad sang mga gulang ang pag-asikaso sa sala nga may labot lang sa kaangtanan sang isa sa Dios kag sa kongregasyon. Nahangpan nila nga ginhatagan sang Dios ang gobierno sing kinamatarong sa pag-asikaso sa sibil kag kriminal nga mga kaso. Lakip sa sini ang awtoridad nga ipatuman ang silot pareho sang multa ukon pagpriso.—Roma 13:1-4.

²⁴ Kon may nakahimo sang serioso nga sala sa kongregasyon, paano ini ginaasikaso sang mga gulang? Ginagamit nila ang Kasulatan sa pag-usisa sa sini nga kaso kag sa pagdesisyon. Ginadumdom nila nga ginbase sa gugma ang kasuguan sang Cristo. Bangod sang gugma, binagbinagon sang mga gulang kon ano ang dapat himuon para mabuligan ang mga nangin biktima sini nga sala sa kongregasyon. Mapakita man sang mga gulang ang gugma sa nakasala. Binagbinagon nila kon bala mahinulsulon sia, kag kon paano sia mabuligan para mapasag-uli ang iya kaangtanan kay Jehova.

25. Ano ang binagbinagon sa masunod nga artikulo?

²⁵ Nagapasalamat gid kita kay ginhatag sa aton ang kasuguan sang Cristo. Kon kita tanan nagapanikasog nga tumanon ini, makabulig kita para magbatyag nga ginapalangga, ginapabaloran, kag naamligan ang kada isa sa aton kongregasyon. Pero nagakabuhi pa kita sa kalibutan nga ‘ang malaut nga mga tawo nagalain pa gid.’ (2 Tim. 3:13) Dapat gid kita pirme mag-andam. Paano mapakita sang Cristianong kongregasyon ang katarungan sang Dios kon may bata nga nangin biktima sang seksuwal nga pag-abuso? Sabton sa masunod nga artikulo ini nga pamangkot.