1. Ano ang ginatudlo sa aton sang Pulong sang Dios?

SI Jehova ang aton Daku nga Instruktor, gani mabuligan niya kita nga masolbar ang bisan ano nga problema. (Isa. 30:20, 21) Ginatudlo sa aton sang iya Pulong ang tanan naton nga kinahanglanon para “may ikasarang gid” kita kag “nasangkapan sing bug-os para sa tagsa ka maayong buhat.” (2 Tim. 3:17) Kon sundon naton ang ginatudlo sang Biblia, mangin mas maalam kita sangsa mga nagasalig sa “kaalam sini nga kalibutan.”—1 Cor. 3:19; Sal. 119:97-100.

2. Ano ang binagbinagon naton sa sini nga artikulo?

² Ang kaalam sang kalibutan masami nga nagapalig-on sa aton nga sundon ang aton makasasala nga mga handum. Gani mahimo nga mabudlayan kita nga isikway ang mga ginahunahuna kag ginahimo sang mga tawo nga bahin sang kalibutan. Ang Biblia nagasiling: “Magbantay kamo nga wala sing makataban sa inyo paagi sa pilosopiya kag wala sing pulos nga daya suno sa tradisyon sang mga tawo.” (Col. 2:8) Sa sini nga artikulo, binagbinagon naton kon ngaa ginpatihan sang mga tawo ang duha ka wala sing pulos nga daya, ukon kabutigan. Matun-an naton kon paano ang kada isa sining kabutigan nagapamatuod nga kabuangan ang kaalam sang kalibutan kag labaw gid sa sini ang kaalam nga naghalin sa Pulong sang Dios.

3-4. Paano nagbag-o ang pagtamod parte sa pagpakig-sex sang mga tuig 1900 asta 1930 sa Estados Unidos?

³ Sang mga tuig 1900 asta 1930 sa Estados Unidos, nagbag-o ang pagtamod sang mga tawo sa kon ano ang husto kag sala parte sa pagpakig-sex. Antes sini, madamo ang nagapati nga ang mag-asawa lang nga nakasal ang puede mag-sex kag indi ini dapat pag-istoryahan sa publiko. Pero sang ulihi, mas madamo na ang wala nagaugyon sa sini.

 ⁴ Sang katuigan 1920, nagbag-o gid ang paggawi sang mga tawo kag ang pagtamod nila parte sa pagpakig-sex. “Ang mga pelikula, mga palaguaon, mga kanta, mga libro, kag mga pasayod nangin parte na sa pagpakig-sex,” siling sang isa ka researcher. Sadto man nga tion, ang paagi sang pagsaot sang iban nagapukaw sang balatyagon sang mga tawo nga mag-sex kag ang estilo sang mga bayo indi na maugdang. Pareho gid ini sa gintagna sang Biblia nga matabo sa katapusan nga mga adlaw nga ang mga tawo mangin “mahigugmaon sa kinasadya.”—2 Tim. 3:4.

5. Ano na ang pagtamod sang kalibutan parte sa pagpakig-sex sugod sang dekada ’60?

⁵ Sang dekada ’60, madamo na ang nagapuyuay nga wala makasal, nagadiborsio, kag mga homoseksuwal. Makita na gid sa madamo nga kalingawan ang pagpakig-sex. Ano ang resulta sini tanan? Ang isa ka manunulat nagsiling nga masubo gid ang resulta kon wala ginasunod sang mga tawo ang husto nga talaksan sa moral. Ang halimbawa sini amo ang mga pamilya nga nagbulagay ang mga ginikanan ukon ginbayaan sang isa ka ginikanan, kag ang mga tawo nga may problema sa ila emosyon ukon naadik sa pornograpiya. Nagdamo man ang mga balatian nga ginapalaton paagi sa pagpakig-sex, pareho sang AIDS. Tanan ini nagapamatuod nga kabuangan ang kaalam sang kalibutan.—2 Ped. 2:19.

6. Ngaa masiling naton nga ang pagtamod sang kalibutan parte sa pagpakig-sex amo gid ang gusto ni Satanas?

⁶ Ang pagtamod sang kalibutan parte sa pagpakig-sex amo gid ang gusto ni Satanas. Nalipay gid sia kon indi pagtahuron sang mga tawo ang pag-asawahay paagi sa pagpakig-sex nga indi nahisuno sa gintuyo sang Dios para sa sini. (Efe. 2:2) Ang mga nagahimo sang seksuwal nga imoralidad wala nagapabalor sa ginregalo ni Jehova sa mga tawo nga ikasarang sa pagpanganak, kag mahimo nga indi man nila mabaton ang kabuhi nga wala sing katapusan.—1 Cor. 6:9, 10.

7-8. Ngaa mas maayo ang pagtamod sang Biblia parte sa pagpakig-sex sangsa pagtamod sang kalibutan?

⁷ Ang mga nagasunod sa kaalam sang kalibutan nagabalewala sa talaksan sang Biblia sa moral, kay para sa ila indi ini praktikal. Mahimo sila mamangkot, ‘Ngaa gintuga pa kita sang Dios nga may seksuwal nga mga handum kag dayon silingan kita nga indi ini paghimuon?’ Nagapati sila nga dapat himuon sang mga tawo ang tanan nga gusto nila. Pero wala ini ginatudlo sang Biblia. Ginahatagan kita sini sing dignidad  paagi sa pagtudlo nga may ikasarang kita nga batuan ang sala nga mga handum kag indi lang kita basta magsunod sa tanan naton nga handum. (Col. 3:5) Isa pa, gintuyo ni Jehova nga ang seksuwal nga mga handum para lang sa mga mag-asawa. Paagi sa sini, mapadunggan ang pag-asawahay, nga isa ka regalo halin sa iya. (1 Cor. 7:8, 9) Bangod sini, malipay ang bana kag asawa sa ila relasyon, kag malikawan nila ang kasubo kag mga problema nga masami nga resulta sang seksuwal nga imoralidad.

⁸ Indi pareho sa kaalam sang kalibutan, ginatudluan kita sang Biblia sang husto nga pagtamod parte sa pagpakig-sex. Ginsiling sang Biblia nga puede ini makahatag sing kalipay. (Hulu. 5:18, 19) Pero nagsiling man ang Biblia: “Dapat mahibaluan sang kada isa sa inyo kon paano niya punggan ang iya kaugalingon nga lawas sa balaan kag dungganon nga paagi, indi sa makagod kag indi mapunggan nga kailigbon sa sekso nga ginahimo sang mga pungsod nga wala makakilala sa Dios.”—1 Tes. 4:4, 5.

9. (a) Mga 100 ka tuig ang nagligad, paano napalig-on ang katawhan ni Jehova nga sundon ang labaw gid nga kaalam nga naghalin sa Pulong sang Dios? (b) Ano ang ginlaygay sang 1 Juan 2:15, 16? (c) Suno sa Roma 1:24-27, ano nga imoral nga mga buhat ang dapat naton likawan?

⁹ Mga 100 ka tuig ang nagligad, wala maimpluwensiahan ang katawhan ni Jehova sang pagtamod sang mga ‘wala sang igbalatyag sa maayo kag malain.’ (Efe. 4:19) Gintinguhaan nila nga sundon gid ang mga talaksan ni Jehova. Ang Mayo 15, 1926, nga Watch Tower nagsiling nga “ang isa ka lalaki ukon isa ka babayi dapat mangin matinlo sa iya ginahunahuna kag ginahimo, ilabi na kon kaupod niya ang indi niya kasekso.” Bisan ano pa ang nagakatabo sa kalibutan sadto, ginsunod sang katawhan ni Jehova ang labaw gid nga kaalam nga naghalin sa Pulong sang Dios. (Basaha ang 1 Juan 2:15, 16.) Nagapasalamat gid kita sa Pulong sang Dios! Nagapasalamat man kita nga nagaaman si Jehova sang espirituwal nga pagkaon nga suno sa tion para buligan kita nga indi madaya sang kaalam sini nga kalibutan parte sa pagpakig-sex. *—Basaha ang Roma 1:24-27.

10-11. Ano ang ginpaandam sang Biblia nga matabo sa katapusan nga mga adlaw?

¹⁰ Nagpaandam ang Biblia nga sa katapusan nga mga adlaw, ang mga tawo mangin “mahigugmaon sa kaugalingon.” (2 Tim. 3:1, 2) Gani indi na kita matingala nga ginapalig-on sang kalibutan ang sobra nga pagpaimportante sa kaugalingon. Suno sa isa ka reperensia, sang dekada ’70, nagdamo ang mga libro nga nagahatag sang mga laygay kon paano mangin madinalag-on. Ang pila sini nagsiling nga indi dapat magbag-o ang isa ka tawo ukon indi sia dapat maghunahuna nga may diperensia sia. Halimbawa, amo ini ang ginsiling sang isa ka libro: “Higugmaa ang imo kaugalingon kay ikaw ang pinakamatahom, pinakadalayawon, kag pinakaimportante nga tawo.” Nagsiling man ini nga libro nga ang indibiduwal amo dapat ang magdesisyon kon ano ang husto kag mahapos para sa iya nga himuon.

¹¹ Nabatian mo na bala ini? Amo ini ang ginpalig-on ni Satanas kay Eva. Nagsiling sia nga puede si Eva ‘mangin kaangay sa Dios, nga nakahibalo kon ano ang maayo kag malain.’ (Gen. 3:5) Subong, madamo ang nagapakataas sa ila kaugalingon kag indi nila gusto nga hambalan sila sang bisan sin-o, pati na sang Dios, kon ano ang husto kag sala. Makita naton ini sa pagtamod sang madamo parte sa pag-asawahay.

12. Ano ang pagtamod sang kalibutan parte sa pag-asawahay?

 ¹² Nagsiling ang Biblia nga dapat tahuron sang bana kag asawa ang kada isa kag tumanon nila ang ila sumpa sang ginkasal sila. Ginpalig-on sini ang mag-asawa nga indi gid magbulagay paagi sa pagsiling: “Bayaan sang lalaki ang iya amay kag ang iya iloy kag magahiusa sia sa iya asawa, kag sila mangin isa ka unod.” (Gen. 2:24) Pero ang mga nagasunod sa kaalam sang kalibutan nagasiling nga dapat unahon sang bana ukon asawa ang iya kaugalingon. “Sa pila ka seremonya,” siling sang isa ka libro parte sa diborsio, “ang kinaandan nga sumpa sa kasal nga ‘tubtob kita nagakabuhi’ gin-islan sang may kondisyon nga promisa sa kasal nga ‘tubtob kita nagahigugmaanay.’” Bangod ginatamod sang mga tawo nga ang pag-asawahay indi permanente, madamo nga pamilya ang nagakaguba kag nagaantos. Gani kabuangan gid ang pagtamod sang kalibutan parte sa pag-asawahay.

13. Ngaa ginakangil-aran ni Jehova ang mga bugalon?

¹³ Ang Biblia nagasiling: “Ginakangil-aran ni Jehova ang bisan sin-o nga bugalon sing tagipusuon.” (Hulu. 16:5) Ngaa? Ang mga bugalon nagahigugma sing sobra sa ila kaugalingon kag ginailog nila si Satanas. Bangod sang sobra niya nga pagpakataas sang iya kaugalingon, pati si Jesus gusto niya magyaub kag magsimba sa iya, bisan pa nga si Jesus ang gingamit sang Dios sa pagtuga sang tanan nga butang. (Mat. 4:8, 9; Col. 1:15, 16) Para sa mga bugalon, mga maalam sila. Pero sa pagtamod sang Dios, mga buangbuang sila.

14. Suno sa Roma 12:3, paano naton dapat tamdon ang aton kaugalingon?

¹⁴ Ginatudlo sang Biblia ang husto nga pagtamod sa kaugalingon. Ginasiling sini nga may nagakaigo nga gugma sa kaugalingon. Nagsiling si Jesus: “Higugmaa ang imo isigkatawo subong sang imo kaugalingon.” Ginapakita sini nga dapat naton hatagan sing nagakaigo nga atension ang aton mga kinahanglanon. (Mat. 19:19) Pero ginatudlo sang Biblia nga indi kita dapat maghunahuna nga mas importante kita sangsa iban.  Nagasiling ini: “Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo.”—Fil. 2:3; basaha ang Roma 12:3.

15. Ngaa kumbinsido ka nga maayo gid ang mga laygay sang Biblia parte sa kon paano naton dapat tamdon ang aton kaugalingon?

¹⁵ Subong, madamo sang ginakilala nga mga maalam ang nagabalewala sa mga laygay sang Biblia. Nagasiling sila nga kon tamdon mo ang iban nga mas importante sangsa imo, mamentaha lang sila sa imo. Pero ano ang resulta bangod ginsunod sang mga tawo ang panimuot nga ginapalig-on sang kalibutan ni Satanas? Ano ang nakita mo nga resulta? Malipayon bala ang mga tawo nga nagapensar lang sang ila kaugalingon? Malipayon bala ang ila pamilya? May matuod gid bala sila nga mga abyan? May maayo bala sila nga kaangtanan sa Dios? Sa imo nakita, ano ang nagaresulta sa kaayuhan, ang pagsunod sa kaalam sini nga kalibutan ukon sa kaalam nga naghalin sa Pulong sang Dios?

16-17. Ano ang ginapasalamatan naton, kag ngaa?

¹⁶ Ang mga tawo nga nagasunod sa mga laygay sang ginakilala nga mga maalam sa kalibutan daw pareho sa turista nga nagapamangkot sing direksion sa pareho niya nga turista nga nagtalang man. Nagsiling si Jesus parte sa mga “maalam” sang panahon niya: “Mga bulag sila nga mga manugtuytoy. Kon ang bulag magtuytoy sa isa pa ka bulag, pareho sila nga mahulog sa buho.” (Mat. 15:14) Matuod gid nga ang kaalam sini nga kalibutan kabuangan sa Dios.

¹⁷ Ang maalamon nga mga laygay sang Biblia pirme “mapuslanon sa pagpanudlo, sa pagsabdong, sa pagtadlong, sa pagdisiplina sa pagkamatarong.” (2 Tim. 3:16) Nagapasalamat gid kita nga ginaamligan kita ni Jehova paagi sa iya organisasyon para indi kita madaya sang kaalam sini nga kalibutan! (Efe. 4:14) Ang ginaaman niya nga espirituwal nga pagkaon nagapabakod sa aton nga sundon ang mga talaksan sang iya Pulong. Nalipay gid kita nga ginatuytuyan kita sang pinakamasaligan nga kaalam nga naghalin sa Biblia!