1. Ano nga halimbawa ang ginpakita ni Jesus para sa iya mga sumulunod, kag ano ang ila ginhimo? (Tan-awa ang piktyur sa kober.)

SANG ari si Jesus sa duta, padayon niya nga ginbantalaan ang mga tawo kag wala sia nadulaan sing paglaum nga magapamati sila sa iya, kag gusto niya nga amo man sini ang himuon sang iya mga disipulo. (Juan 4:35, 36) Mapisan gid ang mga disipulo ni Jesus sa pagbantala nga hilikuton sang kaupod pa nila sia. (Luc. 10:1, 5-11, 17) Pero sang gin-aresto kag ginpatay si Jesus, nadulaan sing gana ang iya mga disipulo nga magbantala. (Juan 16:32) Gani pagkatapos ginbanhaw si Jesus, ginpalig-on niya sila nga magpokus sa pagbantala. Sang nagpalangit na si Jesus, nangin mapisan gid ang iya mga disipulo sa pagbantala. Bangod sini, naugot ang ila mga kaaway kag nagsiling: “Ginpuno ninyo ang Jerusalem sang inyo panudlo.”—Binu. 5:28.

2. Paano ginpakamaayo ni Jehova ang pagbantala nga hilikuton?

² Gintuytuyan ni Jesus ang mga Cristiano sang unang siglo sa ila pagbantala kag ginbuligan sila ni Jehova. Gani, madamo nga tawo ang namati sa ila mensahe. Halimbawa, sang Pentecostes 33 C.E., mga 3,000 ang nabawtismuhan. (Binu. 2:41) Kag padayon nga nagdamo ang mga disipulo. (Binu. 6:7) Pero, gintagna ni Jesus nga sa tion sang katapusan nga mga adlaw, mas madamo nga tawo ang magapamati sa maayong balita.—Juan 14:12; Binu. 1:8.

3-4. Ngaa mahimo mabudlay magbantala sa pila ka lugar, kag ano ang binagbinagon naton sa sini nga artikulo?

³ Ginahimo gid naton tanan ang aton bug-os nga masarangan nga magpadayon sa pagbantala. Sa pila ka lugar, indi mabudlay magbantala. Ngaa? Bangod madamo ang interesado magtuon sang Biblia. Indi na sila maarapalan sang mga Saksi amo nga ginapahulat lang nila ang iban nga interesado asta nga may bakante na ang ila iskedyul. Sa iban naman nga lugar, nabudlayan magbantala  ang mga kauturan kay ang mga tawo wala pirme sa ila balay. Kag ang mga ara naman sa ila balay, mahimo nga indi interesado sa Biblia.

⁴ Kon mabudlay magbantala sa inyo lugar, makabulig sa imo ang mga panugda sa sini nga artikulo. Binagbinagon naton kon ano ang ginhimo sang pila ka utod para mabantalaan ang mas madamo nga tawo. Binagbinagon man naton kon ngaa indi kita dapat maluyahan sing buot, mamati man ang mga tawo sa aton mensahe ukon indi.

5. Ano ang mga kabudlayan sang madamo nga Saksi?

⁵ Nabudlayan ang madamo nga Saksi nga maistorya ang mga tawo sa ila balay. Ang pila ka manugbantala nagaistar sa mga lugar nga madamo sing apartment ukon mga subdivision nga may mga guardia. Wala ginapasulod sang guardia ang bisan sin-o nga wala sing pahanugot sa isa nga nagaistar sa sini nga mga lugar. Sa iban nga lugar, hilway nga makapamalaybalay ang mga Saksi, pero halos wala sing tawo ang mga pamalay. Ang iban naman nga mga kauturan nagabantala sa mga uma ukon sa malayo nga mga lugar nga diutay lang ang tawo. Mahimo nga kinahanglan nila magbiyahe ukon maglakat sing malayo para kadtuan ang isa ka balay nga posible wala man sing tawo. Kon amo sini ang sitwasyon sa aton teritoryo, indi kita dapat maluyahan sing buot. Ano ang puede naton himuon para maistorya ang mas madamo nga tawo?

6. Ngaa masiling naton nga pareho sa pagpangisda ang ginahimo sang mga manugbantala?

⁶ Ginpaanggid ni Jesus ang pagbantala nga hilikuton sa pagpangisda. (Mar. 1:17) May mga tion nga bisan pa inadlaw na nga nagapangisda ang mga mangingisda, wala sila gihapon sing nakuha nga isda. Pero wala nagaluya ang ila buot. Para may makuha sila nga isda, ginabag-o nila ang ila oras sa pagpangisda, nagasaylo sila sa iban nga lugar, ukon ginabag-o nila ang ila paagi sa pagpangisda. Mahimo man naton ini sa aton pagbantala. Binagbinagon naton ang mga puede naton himuon.

7. Ano ang mahimo nga resulta kon magbantala kita sa lainlain nga oras?

⁷ Lainlaina ang oras sang imo pagpamalaybalay. Kon magbantala kita sa oras nga labanlaban ang mga tawo ara sa ila balay, mas madamo kita sing maistorya. Kay man, nagapauli gid man ang mga tawo sa ila balay. Madamo nga kauturan ang nagabantala kon hapon ukon kon gab-i kay madamo sila sing tawo nga maistorya. Isa pa, sa sini nga oras posible nga indi masyado masako ang tagbalay kag handa makig-istorya. Ukon puede mo man sundon ang ginhimo sang isa ka gulang nga si David. Nagsiling sia nga pagligad sang pila ka oras pagkatapos nila mabantalaan ang isa ka teritoryo, nagabalik sila sang iya kaupod sa mga balay nga wala sing tawo. Nagsiling sia, “Kanami gid kay sang nagbalik kami madamo na nga tawo ang ara sa ila balay.” *

8. Paano naton maaplikar ang Manugwali 11:6 sa aton pagbantala?

⁸ Dapat naton panikasugan nga maistorya ang mga tawo sa ila balay. Amo ini ang ginatudlo sa aton sang teksto nga ginbasihan sini nga artikulo. (Basaha ang Manugwali 11:6.) Ginhimo ini ni David, nga ginsambit kaina. Sang ulihi, may naistorya gid man sia sa isa ka balay nga madugay na niya ginabalikbalikan. Interesado gid ang tawo parte sa Biblia kag nagsiling sia, “Mga walo ka tuig na ako diri nagaistar, pero subong pa lang ako nakaistorya sa mga Saksi ni Jehova.” Si David nagsiling, “Narealisar ko nga kon  maistorya mo na ang mga tawo sa ila balay, masami nga nagapamati sila sa mensahe nga aton ginabantala.”

9. Ano ang ginhimo sang pila ka Saksi para mabantalaan ang mga tawo nga wala pirme sa ila balay?

⁹ Magbantala sa lain nga lugar. Para maistorya ang mga tawo nga wala pirme sa ila balay, ang pila ka manugbantala nagabantala sa lain nga lugar. Halimbawa, bangod ginadumilian ang pagpamalaybalay sa mga apartment, nagdesisyon ang mga utod nga magpanaksi sa dalan kag magpanaksi gamit ang mga cart. Bangod sini, naistorya nila ang mga tawo nga nagaistar sa sini nga mga apartment. Dugang pa, madamo nga manugbantala ang nagsiling nga mas nagaistorya ang mga tawo ukon nagabaton sing mga literatura kon ginabantalaan sila sa mga parke, sa mga balaligyaan, kag sa mga lugar sang negosyo. Si Floiran, nga isa ka manugtatap sang sirkito sa Bolivia, nagsiling: “Nagabantala kami sa mga balaligyaan kag sa mga lugar sang negosyo halin sa ala una asta alas tres sang hapon, kay sa sini nga mga oras indi sako ang mga manugbaligya. Sa masami, nagapamati gid sila sing maayo kag ang iban gani sa ila nasugdan sa pagtuon sang Biblia.”

10. Ano pa ang puede mo himuon para mabantalaan ang mga tawo?

¹⁰ Laina ang imo paagi sang pagbantala. Ibutang ta nga pila ka beses mo na nga ginabalikbalikan ang isa ka balay. Gintilawan mo man nga magbalik sa lainlain nga oras, pero wala gihapon sing tawo sa balay. Ano ang puede mo himuon para mabantalaan ang tawo nga nagaistar sa sina nga balay? Si Katarína nagsiling: “Nagahimo ako sing sulat para sa mga tawo nga indi ko maabtan sa ila balay. Ginasulat ko kon ano ang gusto ko ihambal sa ila kon maistorya ko sila  sing personal.” Ano ang matun-an naton sa iya ginhimo? Panikasugi nga mabantalaan ang tanan nga tawo sa inyo teritoryo.

11. Ngaa indi interesado ang pila ka tawo sa aton mensahe?

¹¹ Ang pila ka tawo indi interesado sa aton mensahe. Para sa ila, indi makabulig sa ila ang pagtuon parte sa Dios ukon sa Biblia. Wala sila nagapati sa Dios bangod sa grabe nga pag-antos sang mga tawo sa kalibutan. Indi sila interesado sa Biblia bangod nakita nila nga wala man ginasunod sang mga lider sang relihion ang mga ginatudlo nila halin sa Biblia. Ang iban masako sa ila trabaho, kag ang iban nagakaubos ang ila tion sa ila pamilya ukon sa ila mga problema. Para sa ila, indi sila mabuligan sang Biblia. Ano ang himuon naton para mangin malipayon kita bisan pa indi interesado ang mga tawo sa aton mensahe?

12. Paano ang pag-aplikar sang Filipos 2:4 makabulig sa aton pagbantala?

¹² Ipakita nga nagaulikid ka sa mga tawo. Madamo nga tawo ang indi interesado sa aton mensahe. Pero sang nakita nila nga nagaulikid gid kita sa ila, namati sila sa aton. (Basaha ang Filipos 2:4.) Halimbawa, si David nga ginsambit kaina, nagsiling, “Kon may magsiling nga indi sia interesado, ginabalik namon ang amon Biblia ukon ang amon literatura sa amon bag kag nagasiling: ‘Puede ko mabal-an kon ngaa indi ka interesado sa Biblia?’” Mabatyagan sang mga tawo kon nagaulikid ang nagaistorya sa ila. Mahimo malipatan nila ang aton mga ginsiling, pero mahimo nga madumduman gid nila ang aton pag-ulikid sa ila. Bisan pa indi gusto mamati sang tagbalay sa aton, mapakita naton nga nagaulikid kita sa iya paagi sa aton reaksion kag ekspresyon sang aton nawong.

13. Ano ang himuon naton para mangin mas interesado ang mga tawo sa aton mensahe?

¹³ Mapakita naton nga nagaulikid kita sa aton ginabantalaan kon ipasibu naton ang aton mensahe sa kinahanglan nila. Halimbawa, base sa imo obserbasyon, may mga bata bala nga nagaistar sa balay? Posible nga interesado ang mga ginikanan kon ano ang ginasiling sang Biblia parte sa pagpadaku sa mga kabataan ukon kon ano ang makabulig para mangin malipayon ang pamilya. Madamo bala sing kandado ang puertahan? Puede naton sambiton nga nahadlok na gid ang mga tawo kay lapnag na ang krimen sa kalibutan. Posible nga malipay gid ang tagbalay kon mabatian niya nga magaabot ang tion nga wala na sing krimen. Kon may maistorya ka nga interesado mamati, panikasugi nga ipaathag sa iya kon paano makabulig sa iya ang Biblia. Si Katarína, nga ginsambit kaina, nagsiling, “Ginapamalandungan ko kon paano  nakabulig sa akon ang Biblia nga mangin maayo ang akon kabuhi.” Bangod sini, mabatyagan gid sang mga tawo nga iya maistorya nga kumbinsido gid sia sa iya ginasiling.

14. Kon may kaupod ka sa pagbantala, paano ninyo mabuligan ang isa kag isa suno sa Hulubaton 27:17?

¹⁴ Magtuon sa pamaagi sang iban. Sang unang siglo, gintudlo ni Pablo kay Timoteo ang iya mga paagi sang pagbantala kag pagtudlo, kag ginpalig-on niya si Timoteo nga itudlo man ini sa iban. (1 Cor. 4:17) Pareho kay Timoteo, makatuon man kita sa madugay na nga mga manugbantala sa kongregasyon. (Basaha ang Hulubaton 27:17.) Binagbinaga ang halimbawa sang isa ka brother nga si Shawn. Nagpayunir sia sa malayo nga lugar kag ang kalabanan nga tawo indi na gusto maghalin sa ila relihion. Ano ang nakabulig sa iya nga indi maluyahan sing buot? “Ginatinguhaan ko gid nga may upod ako kon magbantala,” siling niya. “Samtang nagalakat pakadto sa masunod nga balay, ginaistoryahan namon kon paano pa gid namon mapauswag ang amon paagi sang pagtudlo. Halimbawa, ginaistoryahan namon kon ano ang ginsiling sang tagbalay kag kon ano ang ginhambal namon sa iya. Dayon ginaistoryahan namon kon ano ang amon himuon sa masunod kon amo gihapon ang isiling sang tagbalay.”

15. Ngaa importante gid ang pangamuyo kon nagabantala kita?

¹⁵ Mangamuyo sing bulig kay Jehova. Sa kada tion nga magbantala ka, mangabay sing bulig kay Jehova. Kinahanglan gid naton ang bulig sang iya balaan nga espiritu sa tanan naton nga ginahimo. (Sal. 127:1; Luc. 11:13) Kon magpangabay ka kay Jehova sing bulig paagi sa pangamuyo, ihambal sa iya kon ano gid ang gusto mo nga bulig. Halimbawa, pangabaya sia nga buligan ka nga makita ang mga tawo nga gusto magtuon parte sa iya kag gusto mamati. Dayon, himua ang imo bug-os nga masarangan nga mabantalaan ang tanan nga posible mo maistorya.

16. Ngaa importante ang personal nga pagtuon sa aton pagbantala?

¹⁶ Magpain sing tion para sa personal nga pagtuon. Ang Pulong sang Dios nagasiling: “[Pamatud-i] ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.” (Roma 12:2) Kon nagatuon kita, mas makilala pa gid naton ang Dios. Gani, kon ginasugid naton sa iban ang parte sa iya, mabatyagan nila nga kumbinsido gid kita sa aton ginapatihan. Si Katarína, nga ginsambit kaina, nagsiling: “Sang kasan-o lang, narealisar ko nga kinahanglan ko pabakuron ang akon pagtuo sa pila ka panguna nga panudlo sang Biblia. Gani nagtuon ako sing maayo para pamatud-an nga may ara Manunuga, nga ang Biblia amo gid ang Pulong sang Dios, kag ang Dios may organisasyon nga ginagamit niya subong.” Si Katarína nagsiling nga ang iya personal nga pagtuon nakabulig sa iya nga magbakod pa gid ang iya pagtuo kag mangin malipayon pa gid sa iya pagbantala.

17. Ngaa wala naluyahan sing buot si Jesus sa iya pagbantala?

¹⁷ Bisan pa ang pila ka tawo indi gusto mamati sa mensahe ni Jesus, wala sia naluyahan sing buot. Sa baylo, nagpadayon sia sa pagbantala. Ngaa? Kabalo sia nga kinahanglan matun-an sang mga tawo ang kamatuoran, kag gusto niya mabuligan ang madamo nga tawo. Kabalo man sia nga may pila ka tawo nga indi mamati sa umpisa, pero magapamati na sa ulihi. Binagbinaga ang natabo sa iya mismo pamilya. Sa tatlo ka tuig kag tunga nga pagministeryo ni Jesus, wala sing utod niya ang nangin disipulo niya. (Juan 7:5) Pero pagkatapos niya mabanhaw, nangin mga Cristiano sila.—Binu. 1:14.

18. Ngaa nagapadayon kita sa pagbantala?

¹⁸ Wala kita kabalo kon sin-o ang magabaton  sa ulihi sang mga kamatuoran sa Biblia nga aton ginatudlo. May pila nga wala nagpamati sa aton mensahe, pero nangin interesado sang ulihi pagligad sang malawig nga tion. Bisan ang mga tawo nga indi gusto mamati sa aton, mahimo ‘maghimaya sa Dios’ sa ulihi kon makita nila ang aton maayo nga paggawi kag kon magpadayon kita sa pagbantala.—1 Ped. 2:12.

19. Suno sa 1 Corinto 3:6, 7, ano ang dapat naton dumdumon kon nagabantala kita?

¹⁹ Dapat naton dumdumon nga bisan pa kita ang nagatanom kag nagabunyag, ang Dios ang nagapatubo sini. (Basaha ang 1 Corinto 3:6, 7.) Si Getahun, nga isa ka brother nga nagaalagad sa Ethiopia, nagsiling: “Sa sobra 20 ka tuig, ako lang gid ang Saksi sa amon lugar. Pero subong, may 14 na ka manugbantala diri. Ang 13 sa ila nabawtismuhan na, kag lakip sa ila ang akon asawa kag tatlo ka bata. Mga 32 ang naga-attend kada miting.” Nalipay gid si Getahun kay wala sia nag-untat sa pagbantala kag naghulat sia nga buyukon ni Jehova ang mga tawo para mangin sumilimba Niya.—Juan 6:44.

20. Ngaa daw pareho kita sa mga manug-rescue?

²⁰ Importante kay Jehova ang tanan nga tawo. Ginhatagan niya kita sing asaynment nga magpangabudlay upod sa iya Anak para tipunon ang mga tawo halin sa tanan nga pungsod antes sang katapusan sini nga sistema. (Hag. 2:7) Ang aton pagbantala daw pareho sa pagluwas sa mga tawo nga na-trap sa minahan. Kag daw pareho kita sa isa ka team nga ginpadala sa pagluwas sini nga mga tawo. Bisan pa mahimo nga diutay lang ang maluwas, importante gid ang ginhimo sang tanan nga nag-rescue. Amo man sini sa aton pagbantala. Wala kita kabalo kon pila pa ka tawo ang maluwas naton sa sistema ni Satanas. Pero puede gamiton ni Jehova ang kada isa sa aton para buligan sila. Si Andreas, nga nagaistar sa Bolivia, nagsiling, “Nahangpan ko nga kon may isa ka tawo nga nagtuon sang Biblia kag nagpabawtismo, resulta ini sang pagbuligay sang madamo nga kauturan.” Kabay pa nga amo man sini ang ipakita naton nga panimuot sa aton pagbantala. Kon himuon naton ini, pakamaayuhon gid kita ni Jehova kag mangin malipayon gid kita sa aton pagbantala.