Nagbag-o gid ang akon kabuhi pagkatapos sadtong makahaladlok nga eksperiensia kay sugod sadto nangin interesado ako nga magtuon parte sa Dios. Pero antes ko isugid ang natabo pagkatapos sadto nga gab-i, isugid ko anay sa inyo ang mga naeksperiensiahan ko sang bata pa ako.

Natawo ako sang 1937 sa banwa sang Guesnain, sa naaminhan sang France kag may mga minahan sang coal diri. Nagatrabaho si Tatay sa minahan kag natun-an ko sa iya nga importante gid nga mangin mapisan. Gusto gid buligan ni Tatay ang mga nagatrabaho sa minahan kay indi husto ang pagtratar sa ila kag ginapaobra sila bisan pa delikado ang sitwasyon. Gani, nag-entra sia sa mga organisasyon nga nagapakigbato sa mga kinamatarong sang mga minero. Naugot man sia sa mga pari sa amon lugar. Madamo sa ila ang may maayo nga pangabuhi, pero nagapangayo pa sila sang pagkaon kag kuarta sa pigado nga mga minero. Grabe gid ang kaugot ni Tatay sa mga pari, gani wala niya ako gintudluan parte sa relihion. Ang matuod, wala gid namon ginaistoryahan ang parte sa Dios.

Naugot man ako kon ginatratar ang iban sing indi maayo. Ang isa gid sa naugtan ko amo nga ginapakanubo  sang madamo nga tawo ang mga taga-iban nga pungsod nga nagaistar sa France. Pero nanamian ako ’ya maghampang sing soccer upod sa mga bata sang mga imigrante kag nasadyahan gid ako kon kaupod ko sila. Isa pa, Polish si Nanay, indi French. Gusto ko gid nga indi na mag-ilinaway ang mga tawo bangod sa rasa kag mangin palareho na ang pagtratar sa tanan.

Sang 1957, ginpatawag ako sang gobierno para magsoldado. Amo ini ang rason kon ngaa ato ako sa kabukiran sang Algeria nga ginsambit ko kaina. Pagkatapos ko singgit, “O Dios ko!” nakita ko ang ilahas nga kabayo. Maayo lang kay indi kaaway nga soldado ang nakita ko. Naumpawan gid ako sa akon kakulba. Bangod sadto nga eksperiensia kag sang inaway, madamo ako sing ginpamensaran. Ngaa gintuga kita sang Dios? Nagaulikid bala ang Dios sa aton? Maabot pa ayhan ang tion nga wala na sing inaway?

Sang nagbakasyon ako, ginbisitahan ko ang akon mga ginikanan. Nakilala ko didto ang isa ka Saksi ni Jehova. Ginhatagan niya ako sing Biblia kag ginbasa ko ini pagbalik ko sa Algeria. Natandog gid ako sa ginsiling sang Bugna 21:3, 4. Ini nagasiling: “Ang tolda sang Dios yara sa mga tawo . . . Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” Daw indi ako makapati sa akon nabasahan. Nagapalibog ako kon bala matabo gid ini. Sadto nga tion, wala pa gid ako sing nabal-an parte sa Dios kag sa Biblia.

Pagkatapos ko magserbisyo sa militar sang 1959, nakilala ko ang isa ka Saksi nga si François. Madamo sia sing gintudlo sa akon nga mga kamatuoran sa Biblia. Halimbawa, ginpakita niya sa akon sa Biblia nga Jehova ang ngalan sang Dios. (Sal. 83:18) Ginpaathag man ni François nga sa ulihi siguraduhon ni Jehova nga palareho na ang pagtratar sa tanan nga tawo, himuon Niya nga paraiso ang duta, kag tumanon Niya ang ginsiling sa Bugna 21:3, 4.

Mahapos lang mahangpan ini nga mga panudlo, kag nalipay gid ako nga nabal-an ko ini. Pero, naugot gid ako sa mga pari kag gusto ko ipabalo sa tanan nga ang ila mga ginatudlo wala nabase sa Biblia. Daw naimpluwensiahan gihapon ako sang panghunahuna ni Tatay, kag gusto ko nga bag-uhon dayon ang indi maayo nga ginahimo sang iban.

Ginbuligan ako ni François kag sang bag-o ko nga mga abyan nga mga Saksi nga makontrol ang akon kaakig. Ginpaathag nila nga bilang mga Cristiano, indi naton dapat paghukman ang iban. Sa baylo, dapat naton sila buligan kag sugiran sang maayong balita parte sa Ginharian sang Dios. Amo ini nga hilikuton ang ginhimo ni Jesus kag ginsugo niya ang iya mga sumulunod nga himuon man ini. (Mat. 24:14; Luc. 4:43) Dapat ko man tun-an nga mangin kalmado kon nagaistorya sa mga tawo, bisan pa nga indi ako komporme sa ila ginapatihan. Ang Biblia nagasiling: “Ang ulipon sang Ginuo indi kinahanglan makig-away, kundi kinahanglan mangin malulo sa tanan.”—2 Tim. 2:24.

Naghimo ako sang mga pagbag-o kag nabawtismuhan ako bilang isa sa mga Saksi ni Jehova sang 1959 sa isa ka sirkito nga asembleya. Nakilala ko didto si Angèle nga isa ka pamatan-on nga sister, kag nanamian gid ako sa iya. Sugod sadto, nagabulubisita ako sa ila nga kongregasyon, kag sang 1960 nagpakasal kami. Maayo gid sia nga asawa, kag masiling ko nga regalo gid sia halin kay Jehova.—Hulu. 19:14.

Sa madamo nga tinuig, madamo gid ako sing natun-an sa maalam nga mga brother kag madugay na nga nagaalagad. Amo ini ang isa sa pinakaimportante nga natun-an ko: Para mahimo ang mabudlay nga asaynment, dapat kita mangin mapainubuson kag sundon ang ginsiling sang Hulubaton 15:22: “Magamadinalag-on [ang plano] kon may madamo nga manuglaygay.”

Sang 1964, kinahanglan ko gid iaplikar ina nga laygay. Sina nga tuig, nag-alagad ako bilang manugtatap sang sirkito, kag nagabisita ako sa mga kongregasyon para palig-unon ang mga kauturan kag buligan sila nga mangin suod kay Jehova. Pero bangod 27 anyos pa lang ako sadto, wala pa gid ako masyado sing nabal-an sa akon asaynment. Bangod sini, nakahimo ako sing sala nga mga desisyon. Pero, gintinguhaan ko nga indi na ini matabo liwat kag madamo gid ako sing natun-an sa mga “manuglaygay” nga madugay na nga nagaalagad.

Ang isa ka halimbawa amo ang natabo sang bag-o pa lang ako nagaalagad bilang manugtatap sang sirkito. Pagkatapos sang akon bisita sa isa ka kongregasyon sa Paris, ginpalapitan ako sang isa ka brother nga madugay na nga nagaalagad kay Jehova kag ginpamangkot niya ako kon bala puede kami makaistoryahanay nga kami lang nga duha. “Puede gid,” sabat ko sa iya.

Ginpamangkot niya ako, “Louis, sin-o sa banta mo ang dapat hatagan sang atension sang isa ka doktor, ang nagamasakit ukon ang wala nagamasakit?”

“Ang nagamasakit,” sabat ko sa iya.

Nagsiling sia: “Husto ka. Pero natalupangdan ko nga laban ang imo tion sa mga mabakod sa espirituwal, pareho sang manugtatap sang kongregasyon. Madamo nga kauturan sa amon kongregasyon ang naluyahan sing buot, bag-uhan, ukon mahuluy-on. Mapalig-on gid sila kon hatagan mo sila sing tion, kag maayo pa gid kon bisitahan mo sila sa ila balay kag updan mo sila sa ila pagkaon.”

Nagapasalamat gid ako kay ginlaygayan niya ako. Nabatyagan ko gid nga palangga niya ang mga karnero ni Jehova. Bisan pa natandog ang akon bugal, nangin mapainubuson ako kag gin-aplikar ko dayon ang iya laygay. Daku gid ang nabulig sa akon sang mga brother pareho sa iya. Ginapasalamatan ko gid si Jehova bangod sa ila.

Sang 1969 kag 1973 nga internasyonal nga mga kombension sa Colombes, Paris, gintangdo ako nga mangin manugtatap sa Food Service Department. Sang 1973 nga kombension, mga 60,000 ka tawo  ang kinahanglan pakaunon sa sulod sang lima ka adlaw. Daw indi ’ko kabalo kon paano ini namon himuon. Pero nakabulig liwat sa akon ang laygay sang Hulubaton 15:22 nga magpangayo sing laygay sa iban. Gani namangkot ako sa mga brother nga makabulig sa amon, pareho sang mga nagabaligya sang karne, nagatanom kag nagapamaligya sang utan, mga kusinero, kag mga nagapamakal sang pagkaon. Paagi sa amon pagbuligay, nahimo namon ining mabudlay nga asaynment.

Sang 1973, gin-agda kami sang akon asawa nga mag-alagad sa Bethel sa France. Mabudlay gid ang akon una nga asaynment sa Bethel. Kinahanglan ko mangita sing paagi kon paano mapadala ang mga literatura sa aton mga kauturan sa Cameroon nga sakop sang Africa. Gindumilian ang aton hilikuton sa sini nga pungsod halin sang 1970 asta sang 1993. Pamatyag ko indi ko ini masarangan himuon. Natalupangdan ini sang brother nga nagatatap sang hilikuton sa France, gani ginpalig-on niya ako, “Kinahanglan sang aton mga kauturan sa Cameroon ang espirituwal nga pagkaon kag dapat naton ini ihatag sa ila.” Kag amo gid sina ang amon ginhimo.

Pila ka beses ako nga nagkadto sa mga pungsod nga ara sa dulunan sang Cameroon para makigkita sa mga gulang halin sa Cameroon. Maisog gid kag maalamon ini nga mga brother. Ginbuligan nila ako nga makakita sang paagi para mapadala sing regular ang mga literatura sa Cameroon. Ginpakamaayo gid ni Jehova ang amon pagpanikasog. Ang matuod, sa sulod sang mga 20 ka tuig, nakabaton gid ang mga kauturan sa sini nga pungsod sang tanan nga isyu sang Ang Lalantawan kag sang Ang Aton Pag-alagad sa Ginharian nga publikasyon nga ginabalhag kada bulan.

Sugod sang nagnobyahanay kami ni Angèle, madamo ako sing nakita nga maayo niya nga mga kinaiya. Nangin mas maathag pa gid sa akon ang iya maayo nga mga kinaiya sang nag-asawahay na kami. Ang matuod, sang gab-i pagkatapos namon ginkasal, ginpangabay niya ako nga ipangamuyo kay  Jehova nga maalagad namon sia sa bug-os namon nga masarangan bilang mag-asawa. Ginsabat gid ni Jehova ang amon pangamuyo.

Ginbuligan man ako ni Angèle nga magsalig pa gid kay Jehova. Halimbawa, sang gin-agda kami nga mag-alagad sa Bethel sang 1973, daw indi ko pagbatunon ini nga asaynment kay nanamian ako sa pag-alagad sa sirkito. Pero ginpahanumdom ako ni Angèle nga gindedikar namon ang amon kabuhi kay Jehova. Gani, dapat namon himuon ang bisan ano nga asaynment nga ginhatag sa amon sang iya organisasyon. (Heb. 13:17) Husto gid sia. Gani, nagkadto kami sa Bethel. Palangga gid sang akon asawa si Jehova kag ginapamensaran niya sing maayo ang iya mga ginahimo. Ini nga mga kinaiya nakabulig sa amon nga mangin suod pa gid sa isa kag isa. Nakabulig man ini sa amon nga makahimo sang maayo nga mga desisyon sa madamo nga tinuig namon nga pag-updanay.

Bisan pa tigulang na kami subong, wala gid nagbag-o ang maayo nga mga kinaiya ni Angèle kay padayon niya ako nga ginasuportahan. Halimbawa, English ang ginagamit nga lenguahe sa madamo nga eskwelahan sang organisasyon. Para makaeskwela sa sini, nagpanikasog gid kami ni Angèle nga magsagad sa English. Gani, nagsaylo kami sa kongregasyon nga nagagamit sing English bisan pa nga mga setentahon na ang amon edad sadto. Bangod miembro ako sang Branch Committee sa France, daw wala na ako sing tion para magtuon sang lain nga lenguahe. Pero nagbuligay kami ni Angèle para mahimo namon ini. Bisan pa otsentahon na kami subong, English kag French ang ginagamit namon kon nagahanda kami para sa mga miting sang kongregasyon. Ginapanikasugan man namon nga pirme magkomento sa mga miting kag mag-upod sa pagbantala sa amon kongregasyon. Ginpakamaayo gid ni Jehova ang amon panikasog nga magtuon sang English.

Sang 2017, gin-agda kami ni Angèle nga mag-eskwela sa School for Branch Committee Members and Their Wives. Ginhiwat ini sa Watchtower Educational Center sa Patterson, New York.

Si Jehova amo gid ang Daku nga Instruktor. (Isa. 30:20) Gani tanan kita, tigulang man ukon pamatan-on pa, makabaton gid sang pinakamaayo nga paghanas kag pagtudlo. (Deut. 4:5-8) Natalupangdan ko nga maayo gid ang resulta kon nagapamati ang mga pamatan-on kay Jehova kag sa mga kauturan nga madugay na nga nagaalagad. Nakabulig ini sa ila nga makahimo sang maayo nga mga desisyon sa ila kabuhi kag mangin matutom kay Jehova. Ang Hulubaton 9:9 nagasiling: “Magpaambit ka sa maalam nga tawo, kag magaalam pa gid sia. Tudlui ang matarong, kag magadugang pa gid ang iya nahibaluan.”

Kon kaisa, madumduman ko ang natabo didto sa kabukiran sang Algeria mga 60 ka tuig na ang nagligad. Sadto nga gab-i, wala ko gid ginpaabot nga mangin malipayon pa ang akon kabuhi. Madamo gid ako sing natun-an sa iban. Nagapasalamat gid kami ni Angèle kay ginhatagan kami ni Jehova sang malipayon nga kabuhi. Gani, panikasugan gid namon nga padayon nga makatuon sa amon Amay sa langit kag sa mga kauturan nga maalam, madugay na nga nagaalagad sa iya, kag nagapalangga sa iya.