1-2. Ano nga mga problema ang naeksperiensiahan sang madamo nga Saksi?

GINPALIG-ON ni apostol Pablo si Timoteo nga himuon niya ang iya bug-os nga masarangan sa pagbantala. (2 Tim. 4:5) Dapat man naton sundon ining ginlaygay ni Pablo kag himuon ang aton bug-os nga masarangan sa pag-alagad sa Dios. Pero kon kaisa, mabudlay ini himuon. Para sa madamo naton nga kauturan, kinahanglan nila magpakaisog para magbantala. (2 Tim. 4:2) Halimbawa, hunahunaa ang aton mga kauturan nga nagaistar sa lugar nga ginadumilian ang aton hilikuton. Nagabantala sila bisan pa nga posible prisuhon sila.

² Bangod sa madamo nga problema, mahimo magluya ang buot sang katawhan ni Jehova. Halimbawa, madamo nga kauturan ang kinahanglan magbakabaka obra para sa ila pamilya. Gusto man nila kuntani nga madugangan ang ila mahimo sa pagbantala. Pero pag-abot sang Sabado kag Domingo, kapoy na sila. Ang iban naman may balatian kag tigulang na kag mahimo indi na sila makahalin sa ila balay, gani limitado na lang ang ila mahimo sa pag-alagad kay Jehova. Ang iban naman pirme nagabatyag nga indi sila importante kay Jehova. Si Mary, * nga isa ka sister nga nagaistar sa Middle East, nagsiling: “Kon nagaluya ang akon buot, ginapakigbatuan ko gid ini. Pero kon maumpawan na ako, nagabatyag naman ako sing grabe nga kakapoy. Bangod sini, pamatyag ko indi maayo ang akon ginhimo kay daw wala na ako sing kusog kag tion para magbantala.”

3. Ano ang binagbinagon naton sa sini nga artikulo?

³ Bisan ano man ang aton problema, pabakuron kita ni Jehova para makapadayon kita nga makaalagad sa iya sa bug-os naton nga masarangan. Antes naton binagbinagon kon paano kita ginabuligan ni Jehova, binagbinagon anay naton kon paano niya ginpabakod si Pablo kag si Timoteo para makapadayon sila sa pagbantala bisan pa sang ila mga problema.

4. Ano nga mga kabudlayan ang naeksperiensiahan ni Pablo?

⁴ Madamo nga kabudlayan ang naeksperiensiahan ni Pablo. Kinahanglan gid niya ang bulig ni Jehova ilabi na sang ginbunal sia sang iya mga kaaway, ginbato, kag ginpriso. (2 Cor. 11:23-25) Nagsiling si Pablo nga kon kaisa nagaluya man ang iya buot kag kinahanglan niya ini pakigbatuan. (Roma 7:18, 19, 24) May problema man sia sa panglawas nga daw “tunok sa unod” kag grabe gid ang iya pakitluoy sa Dios nga ayuhon sia.—2 Cor. 12:7, 8.

5. Ano ang mga nahimo ni Pablo bisan pa may mga kabudlayan sia?

⁵ Ginpabakod ni Jehova si Pablo para makapadayon sia sa pagbantala bisan pa may mga kabudlayan sia. Binagbinaga ang mga nahimo ni Pablo. Halimbawa, sang napriso sia sa isa ka balay sa Roma, ginpangapinan niya ang maayong balita sa mga lider sang mga Judiyo kag posible pati sa mga opisyal sang gobierno. (Binu. 28:17; Fil. 4:21, 22) Ginbantalaan man niya ang madamo nga Guardia sang Pretorio, kag ginpanaksihan niya ang tanan nga nagbisita sa iya. (Binu. 28:30, 31; Fil. 1:13) Sadto man nga tion, gintuytuyan sang Dios si Pablo nga maghimo sang mga sulat nga nakabulig sa matuod nga mga Cristiano halin sang una asta subong. Kag bangod sa halimbawa ni Pablo, napalig-on ang mga kauturan sa kongregasyon sang Roma nga ‘labi pa nga mangin maisog sa pagbantala sang pulong sang Dios nga wala sing kahadlok.’ (Fil. 1:14) Bisan pa nga kon kaisa limitado lang ang mahimo ni Pablo, ginhimo niya ang iya bug-os nga masarangan nga “nagresulta sa pag-uswag sang maayong balita.”—Fil. 1:12.

6. Suno sa 2 Corinto 12:9, 10, ano ang nakabulig kay Pablo para makapadayon sia sa pagbantala?

⁶ Nahangpan ni Pablo nga nasarangan lang niya ang tanan nga nahimo niya sa pag-alagad kay Jehova bangod ginpabakod sia sang Dios. Nagsiling sia nga ang gahom sang Dios ‘napakita sing bug-os sa kaluyahon.’ (Basaha ang 2 Corinto 12:9, 10.) Ginpabakod ni Jehova si Pablo paagi sa Iya balaan nga espiritu para makapadayon sia sa pagbantala bisan pa ginhingabot sia, ginpriso, kag nakaeksperiensia sang iban pa nga kabudlayan.

7. Ano nga mga kabudlayan ang dapat batason ni Timoteo para makapadayon sia sa pagbantala?

⁷ Dapat man magsalig si Timoteo, ang pamatan-on nga kaupod ni Pablo, nga pabakuron sia sang Dios para makapadayon sia sa pagbantala. Nakaupod ni Pablo si Timoteo sa iya  malawig nga mga paglakbay bilang misyonero. Ginpakadto man ni Pablo si Timoteo sa mga kongregasyon para palig-unon ang mga kauturan. (1 Cor. 4:17) Mahimo nga nagbatyag si Timoteo nga indi niya ini masarangan. Gani posible nga amo ini ang rason kon ngaa ginpalig-on sia ni Pablo: “Indi pagtuguti nga may magpakanubo sang imo pagkapamatan-on.” (1 Tim. 4:12) May ara man tunok sa unod si Timoteo nga amo ang iya “masunson nga pagbalatian.” (1 Tim. 5:23) Pero kabalo si Timoteo nga pabakuron sia ni Jehova paagi sa Iya gamhanan nga balaan nga espiritu para mabantala niya ang maayong balita kag makaalagad sa iya mga kauturan.—2 Tim. 1:7.

8. Paano ginapabakod ni Jehova ang iya katawhan subong?

⁸ Subong, ginahatagan ni Jehova ang iya katawhan sing “gahom nga labaw sa kinaandan” para makapadayon sila sa pag-alagad sa iya sing matutom. (2 Cor. 4:7) Binagbinagon naton ang apat ka paagi nga ginapabakod kita ni Jehova kag ginabuligan para mangin matutom kita sa iya. Amo ini ang pangamuyo, ang Biblia, ang aton mga kauturan, kag ang aton pagbantala.

9. Paano makabulig sa aton ang pangamuyo?

⁹ Ginapabakod niya kita paagi sa pangamuyo. Sa Efeso 6:18, ginapalig-on kita ni Pablo nga mangamuyo sa Dios “sa tagsa ka higayon.” Sabton sang Dios ang aton mga pangamuyo paagi sa pagpabakod sa aton. Nabatyagan ni Jonnie, nga nagaistar sa Bolivia, nga ginpabakod sia ni Jehova sang nakaeksperiensia sia sang madamo nga problema. Dungan nga nagmasakit sing grabe ang iya asawa kag ang iya mga ginikanan. Nabudlayan gid si Jonnie sa pag-atipan sa ila nga tatlo. Napatay ang iya iloy, kag madugay pa antes nag-ayo ang iya asawa kag ang iya amay. Parte sa iya naeksperiensiahan, si Jonnie nagsiling: “Kon grabe ang akon kabalaka, nagapangamuyo ako kay Jehova kag ginasugid ko sa iya kon ano gid ang akon ginabatyag. Nakabulig gid ini sa akon pirme.” Ginpabakod ni Jehova si Jonnie para makabatas sia. Nabal-an ni Ronald nga isa ka gulang sa Bolivia nga may kanser ang iya iloy. Pagligad sang isa ka bulan, napatay ang iya iloy. Ano ang nakabulig sa iya nga makabatas? Nagsiling sia: “Kon nagapangamuyo ako kay Jehova, ginasugid ko sa iya ang tanan ko nga ginabatyag. Kon kaisa, indi ko mahangpan ang akon kaugalingon. Pero kabalo ’ko nga sia lang gid ang nakahangop sa akon sitwasyon kag ginabatyag.” Kon kaisa, nagabatyag kita nga daw indi na naton masarangan ang aton mga problema kag daw indi na kita kabalo kon ano ang aton ipangamuyo. Pero ginapalig-on kita ni Jehova nga mangamuyo sa iya bisan pa nabudlayan kita nga ipaathag sa iya ang aton mga ginabatyag.—Roma 8:26, 27.

10. Suno sa Hebreo 4:12, ngaa importante gid nga basahon naton ang Biblia kag pamalandungan ini?

¹⁰ Ginapabakod niya kita paagi sa Biblia. Ginabasa ni Pablo ang Kasulatan para mapabakod sia kag mapaumpawan, kag amo man sini ang dapat naton himuon. (Roma 15:4) Samtang ginabasa naton ang Pulong sang Dios kag ginapamalandungan ini, mahimo gamiton ni Jehova ang iya balaan nga espiritu para buligan kita nga mahangpan sing maayo kon paano makabulig sa aton ang Biblia. (Basaha ang Hebreo 4:12.) Si Ronald, nga ginsambit kaina, nagsiling: “Nalipay gid ako nga ginpanikasugan ko nga basahon ang Biblia kada gab-i. Pirme ko ginapamalandungan ang mga kinaiya ni Jehova kag kon paano niya ginaatipan ang iya mga alagad. Nagpabakod gid ini sa akon.”

11. Paano napabakod sang Biblia ang isa ka sister nga nagapangasubo?

¹¹ Kon ginapamalandungan naton ang Pulong sang Dios, makabulig ini sa aton nga tamdon sing nagakaigo ang aton mga problema.  Binagbinaga kon paano nakabulig ang Biblia sa isa ka balo nga nagapangasubo. Ginsilingan sia sang isa ka gulang nga basahon niya ang libro sang Job kay makabulig ini sa iya. Sang ginbasa niya ini, naugot sia sa indi husto nga panghunahuna ni Job. Daw gusto niya laygayan si Job: “Job, indi ka magpokus sa imo mga problema.” Pero narealisar niya nga pareho man gali kay Job ang iya panghunahuna. Nakabulig ini sa iya nga bag-uhon ang iya panimuot kag napabakod sia sini nga mabatas ang kasakit bangod sa pagkapatay sang iya bana.

12. Paano kita ginapabakod ni Jehova paagi sa aton mga kauturan?

¹² Ginapabakod niya kita paagi sa aton mga kauturan. Ginapabakod man kita ni Jehova paagi sa aton mga kaupod nga nagasimba sa iya. Nagsulat si Pablo nga handum gid niya nga “makapalig-unay” sila sang iya mga kauturan. (Roma 1:11, 12) Si Mary, nga ginsambit kaina, nanamian gid kon kaupod niya ang mga kauturan. Nagsiling sia: “Ginagamit ni Jehova bisan ang mga kauturan nga wala nakahibalo nga may mga problema ako. May ginasiling sila nga makapalig-on sa akon ukon nagapadala sila sang card, kag amo gid ini ang kinahanglan ko nga pagpalig-on. Nakabulig man sa akon sang naistorya ko ang mga sister nga nakaeksperiensia sang mga problema nga pareho sa akon kag nakatuon gid ako sa ila ginhimo. Kag pirme ginapabatyag sang mga gulang sa akon nga importante ako sa kongregasyon.”

13. Paano naton mapabakod ang isa kag isa sa mga miting sang kongregasyon?

¹³ Ang aton mga miting sa kongregasyon amo ang isa sa pinakamaayo nga paagi nga makapalig-unay kita. Kon mag-attend ka sa miting, panikasugi nga pabakuron ang iban paagi sa pagsiling sa ila nga palangga mo sila kag pasalamati sila sa ila ginahimo. Binagbinaga ini nga eksperiensia. Antes magsugod ang miting, ginsilingan sang isa ka gulang nga si Peter ang isa ka sister nga indi Saksi ang bana: “Makapalig-on gid nga makita ka kada miting. Kanami gid kay pirme mo ginadala ang imo anom ka bata kag dalayawon gid kay ginabuligan mo sila nga makakomento.” Naglumawlumaw ang iya mata kag nagsiling sia: “Salamat gid Brod, nakapaumpaw gid ini sa akon. Kinahanglan ko gid subong ang pagpalig-on.”

14. Paano makabulig sa aton ang pagbantala?

¹⁴ Ginapabakod niya kita paagi sa aton pagbantala. Nagamag-an ang aton pamatyag kon ginabantalaan naton ang iban, mamati man sila sa aton ukon indi. (Hulu. 11:25) Naeksperiensiahan mismo sang isa ka sister nga si Stacy kon paano sia napabakod sang pagbantala. Nasubuan gid sia sang na-disfellowship ang isa ka miembro sang iya pamilya, kag pirme niya ginapamensar ang mga ginhimo niya kuntani para nabuligan ini nga miembro sang iya pamilya antes sia gindisiplina. Ano ang nakabulig kay Stacy nga madula ini nga panghunahuna? Ang pagbantala. Kay kon nagabantala sia, mas nagapokus sia sa pagbulig sa mga tawo sa ila teritoryo. Nagsiling sia: “Sadto nga tion, ginbuligan ako ni Jehova nga makakita sang Bible study nga madasig nga nag-uswag. Nagpalig-on gid ini sa akon. Ang nakabulig gid sa akon sang may problema ako amo ang pagbantala.”

15. Ano ang natun-an mo sa ginsiling ni Mary?

¹⁵ Ang iban nagabatyag nga diutay lang ang ila nahimo sa pagbantala bangod sang ila kahimtangan. Kon amo sina ang imo ginabatyag, dumduma nga nalipay si Jehova kon ginahimo mo ang imo bug-os nga masarangan. Binagbinaga liwat ang halimbawa ni Mary. Sang nagsaylo sia sa kongregasyon nga lain ang lenguahe, pamatyag niya daw wala sia sing mabulig sa kongregasyon. Nagsiling sia, “Bisan pa madugay na ako sa kongregasyon, ang mahimo ko lang amo ang malip-ot nga pagkomento, pagbasa sang Biblia, ukon paghatag sing tract kon nagabantala.”  Pamatyag niya indi gid niya masarangan ang mga mahimo sang sagad na sa lenguahe sang kongregasyon. Pero, ginbag-o niya ang iya panghunahuna. Narealisar niya nga mahimo sia gamiton ni Jehova bisan pa limitado lang ang iya masarangan. Nagsiling sia, “Simple lang ang mga kamatuoran nga ara sa Biblia, kag makapabag-o ini sang kabuhi sang mga tawo.”

16. Paano ginapabakod ni Jehova ang mga indi makahalin sa ila balay?

¹⁶ Kon indi kita makahalin sa aton balay, dumduma nga kabalo si Jehova nga gusto gid naton magbantala. Gani ginabuligan niya kita nga mabantalaan ang mga nagaatipan sa aton, ukon ang mga doktor kag mga nars. Indi gid naton pag-ikumparar ang aton nahimo sang una sa aton mahimo subong kay posible maluyahan kita sing buot. Sa baylo, dapat kumbinsido kita nga ginabuligan kita ni Jehova subong kay magapabakod ini sa aton nga mabatas ang bisan ano nga kabudlayan kag mangin malipayon.

17. Suno sa Manugwali 11:6, ngaa dapat kita padayon nga magbantala bisan pa daw wala man sing gusto mamati?

¹⁷ Wala kita kabalo kon diin sa mga binhi sang kamatuoran nga aton gintanom ang magatubo. (Basaha ang Manugwali 11:6.) Halimbawa, ang isa ka sister nga si Barbara, nga mga otsentahon ang edad, regular nga nagapanaksi paagi sa telepono kag paagi sa sulat. Ginlakip niya sa isa sa iya mga sulat ang Marso 1, 2014, nga Ang Lalantawan nga may tig-ulo “Ano ang Nahimo sang Dios Para sa Imo?” Wala sia kabalo nga ang napadal-an gali niya amo ang mag-asawa nga madugay na nga na-disfellowship. Sulitsulit nga ginbasa sini nga mag-asawa ang magasin. Pamatyag sang bana nga daw ginaistorya sia mismo ni Jehova. Sang ulihi, nag-attend sa mga miting ini nga mag-asawa. Pagkatapos sang sobra 27 ka tuig halin sang na-disfellowship sila, nakapanumbalik sila sa ila pag-alagad kay Jehova. Napalig-on kag napabakod gid si Barbara sa maayo nga resulta sang isa niya ka sulat.

18. Ano ang dapat naton himuon para mapabakod kita sang Dios?

¹⁸ Madamo sing paagi nga ginapabakod kita ni Jehova. Lakip sa sini amo ang pangamuyo, ang Biblia, ang aton mga kauturan, kag ang aton pagbantala. Kon ginahimo naton ini kag ginapabaloran, ginapakita naton nga nagasalig kita nga buligan niya kita kag gusto gid niya ini himuon. Gani dapat pirme kita magsalig sa aton Amay sa langit kay nalipay sia nga “ipakita ang iya kusog para sa ila nga ang tagipusuon bug-os sa iya.”—2 Cron. 16:9.