TULUN-AN NGA ARTIKULO 22
Ang Kaalam nga Makabulig sa Aton Kabuhi
“Si Jehova mismo ang nagahatag sing kaalam.”—HULU. 2:6.
AMBAHANON 89 Magpamati, Magtuman, kag Pakamaayuhon Ka
ANG BINAGBINAGON SA SINI NGA ARTIKULO *
1. Ngaa kinahanglan gid naton ang kaalam nga halin sa Dios? (Hulubaton 4:7)
KON kinahanglan mo maghimo sang importante nga desisyon, sigurado gid nga nangamuyo ka nga hatagan ka sing kaalam kay kabalo ka nga importante ini. (Sant. 1:5) Si Hari Solomon nagsulat: “Ang kaalam amo ang pinakaimportante sa tanan.” (Basaha ang Hulubaton 4:7.) Indi ang kaalam sang mga tawo ang ginapatuhuyan ni Solomon, kundi ang kaalam nga halin kay Jehova nga Dios. (Hulu. 2:6) Pero makabulig bala sa aton ang kaalam nga halin sa Dios para masarangan naton ang aton mga problema subong? Huo. Binagbinagon naton ini sa sini nga artikulo.
2. Ano ang isa ka paagi para mangin maalam kita?
2 Ang isa ka paagi para mangin maalam kita amo ang pagtuon kag pag-aplikar sang mga gintudlo sang duha ka lalaki nga kilala sa ila kaalam. Una naton nga binagbinagon si Solomon. Ang Biblia nagasiling nga “ginhatagan sang Dios si Solomon sing daku nga kaalam kag paghantop.” (1 Hari 4:29) Ang ikaduha naton nga binagbinagon amo si Jesus nga amo ang pinakamaalam nga tawo nga nagkabuhi sa duta. (Mat. 12:42) Amo ini ang gintagna parte kay Jesus: “Magakunsad sa iya ang espiritu ni Jehova, ang espiritu sang kaalam kag paghangop.”—Isa. 11:2.
3. Ano ang binagbinagon naton sa sini nga artikulo?
3 Ginhatagan sang Dios sing kaalam si Solomon kag si Jesus, gani nakahatag sila sing maayo nga mga laygay parte sa mga butang nga importante sa aton tanan. Sa sini nga artikulo, binagbinagon naton ang tatlo sa sini: kuarta, obra, kag aton kaugalingon. Dapat mangin balanse ang aton pagtamod sa sini nga mga butang.
BALANSE NGA PAGTAMOD SA KUARTA
4. Ano ang kinalain sang kahimtangan ni Solomon sa kahimtangan ni Jesus?
4 Manggaranon gid katama si Solomon, kag komportable ang iya kabuhi. (1 Hari 10:7, 14, 15) Kon parte naman kay Jesus, diutay lang ang iya pagkabutang kag wala sia sing kaugalingon nga balay. (Mat. 8:20) Pero, pareho nga balanse ang ila pagtamod sa kuarta bangod naghalin kay Jehova nga Dios ang ila kaalam.
5. Ano ang balanse nga pagtamod ni Solomon sa kuarta?
5 Nagsiling si Solomon nga ang kuarta isa ka “pangamlig.” (Man. 7:12) Kon may kuarta kita, mabakal naton ang aton mga kinahanglanon kag ang pila sa aton mga luyag. Pero bisan pa manggaranon gid si Solomon, narealisar niya nga may mga butang nga mas importante sangsa kuarta. Halimbawa, nagsulat sia: “Ang maayo nga ngalan [ukon, “ang maayo nga reputasyon,” footnote] mas maayo nga pilion sangsa madamo nga manggad.” (Hulu. 22:1) Parte sa mga tawo nga sobra ang pagpabalor sa kuarta, nakita ni Solomon nga indi sila kontento sa ila mga ginapanag-iyahan. (Man. 5:10, 12) Kag nagsiling sia nga indi naton dapat paghimuon nga pinakaimportante sa aton kabuhi ang kuarta bangod madasig ini nga nagakadula.—Hulu. 23:4, 5.
Nabudlayan bala kita nga unahon ang Ginharian sa aton kabuhi bangod sang aton pagtamod sa materyal nga pagkabutang? (Tan-awa ang parapo 6-7) *
6. Ano ang balanse nga pagtamod ni Jesus sa materyal nga pagkabutang? (Mateo 6:31-33)
6 Balanse ang pagtamod ni Jesus sa materyal nga pagkabutang. Halimbawa, balanse ang iya pagtamod sa pagkaon kag pag-inom, kag nalipay man sia sa sini. (Luc. 19:2, 6, 7) Isa ka bes, may ginhimo sia nga alak nga pinakamaayo nga klase, nga amo ang pinakauna niya nga milagro. (Juan 2:10, 11) Kag sa adlaw nga ginpatay sia, nagasuksok sia sang malahalon nga bayo. (Juan 19:23, 24) Pero wala ginhimo ni Jesus nga pinakaimportante sa iya kabuhi ang materyal nga pagkabutang. Ginsilingan niya ang iya mga sumulunod: “Wala sing tawo nga makapaulipon sa duha ka agalon . . . Indi kamo makapaulipon sing dungan sa Dios kag sa Manggad.” (Mat. 6:24) Gintudlo ni Jesus nga kon unahon naton ang pagpangita sa Ginharian, siguraduhon ni Jehova nga may ara kita sang mga butang nga kinahanglan naton.—Basaha ang Mateo 6:31-33.
7. Paano nakabenepisyo ang isa ka brother bangod balanse ang iya pagtamod sa kuarta?
7 Madamo sa aton mga kauturan ang nag-aplikar sang laygay ni Jehova parte sa kuarta, kag nakabenepisyo sila sa sini. Binagbinaga ang halimbawa sang isa ka soltero nga brother nga si Daniel. Nagsiling sia: “Sang tin-edyer ako, nagdesisyon ako nga himuon nga pinakaimportante sa akon kabuhi ang pag-alagad kay Jehova.” Bangod ginpasimple niya ang iya kabuhi, nagamit ni Daniel ang iya tion kag ikasarang sa madamo nga hilikuton para kay Jehova. Nagsiling pa sia: “Wala ko gid ginhinulsulan ang akon desisyon. Posible nagmanggaranon ako kon ginhimo ko nga pinakaimportante sa akon kabuhi ang kuarta. Pero mabayluhan bala sang kuarta ang akon mga abyan subong? Matupungan bala sini ang kalipay nga resulta sang pag-una ko sa Ginharian? Bisan ano pa kadamo nga kuarta, indi ini makatupong sa mga pagpakamaayo nga ginhatag ni Jehova sa akon.” Maathag nga kon magpokus kita sa pag-alagad kay Jehova imbes nga sa kuarta, makabenepisyo gid kita.
BALANSE NGA PAGTAMOD SA OBRA
8. Ngaa masiling naton nga balanse ang pagtamod ni Solomon sa obra? (Manugwali 5:18, 19)
8 Nagsiling si Solomon nga makahatag sing kalipay ang aton pagpangabudlay. Gintawag niya ini nga ‘dulot sang Dios.’ (Basaha ang Manugwali 5:18, 19.) Nagsulat sia: “May kaayuhan sa tanan nga sahi sang pagpangabudlay.” (Hulu. 14:23) Kabalo si Solomon nga matuod ini kay nagpangabudlay man sia. Nagpatindog sia sang mga balay, nagtanom sia sang mga ulubasan, kag naghimo sia sang mga hardin kag punong sang tubig. Nagpatindog man sia sang mga siudad. (1 Hari 9:19; Man. 2:4-6) Gani nagpangabudlay sia, kag nakahatag ini sa iya sing kalipay. Pero kabalo si Solomon nga para mangin matuod sia nga malipayon, may dapat pa sia himuon. Gani madamo man sia sing ginhimo nga hilikuton para kay Jehova. Halimbawa, ginpangunahan niya ang pagpatindog sang matahom nga templo para sa pagsimba kay Jehova nga nagdugay sing pito ka tuig. (1 Hari 6:38; 9:1) Pagkatapos mahimo ni Solomon ang madamo nga hilikuton, narealisar niya nga ang pag-alagad kay Jehova amo ang pinakaimportante nga hilikuton nga mahimo sang isa ka tawo. Nagsulat sia: “Sa tapos mabatian ang tanan, amo ini ang akon mahinakop: Kahadluki ang matuod nga Dios kag tumana ang iya mga sugo.”—Man. 12:13.
9. Ano ang ginhimo ni Jesus para indi mangin pinakaimportante sa iya kabuhi ang iya obra?
9 Nagpangabudlay si Jesus. Sang pamatan-on pa sia, nag-obra sia bilang isa ka panday. (Mar. 6:3) Bangod sini, nabuligan niya ang iya mga ginikanan nga nagapanikasog gid sa pag-aman sa ila daku nga pamilya. Sigurado gid nga ginpasalamatan sia sang iya mga ginikanan. Perpekto si Jesus kag perpekto ang iya mga gin-obra bilang isa ka panday, gani posible gid nga gusto sang madamo nga tawo ang iya mga gin-obra. Posible gid nga nalipay si Jesus sa iya pagpangabudlay. Pero bisan pa mapisan si Jesus sa iya obra, ginsigurado niya nga may tion sia sa pag-alagad kay Jehova. (Juan 7:15) Sang ulihi, bilang isa ka bug-os tion nga manugbantala, ginlaygayan ni Jesus ang mga nagapamati sa iya: “Indi ninyo pagpangabudlayi ang pagkaon nga nagakadunot, kundi ang pagkaon nga wala nagakadunot nga nagahatag sang kabuhi nga wala sing katapusan.” (Juan 6:27) Kag sa iya Sermon sa Bukid, nagsiling si Jesus: “Magtipon kamo sing mga bahandi para sa inyo kaugalingon didto sa langit.”—Mat. 6:20.
Paano naton mabalanse ang aton obra kag ang aton pag-alagad kay Jehova? (Tan-awa ang parapo 10-11) *
10. Ano nga problema ang posible maeksperiensiahan sang iban sa ila obra?
10 Kon iaplikar naton ang kaalam nga halin sa Dios, mangin balanse ang aton pagtamod sa aton obra. Bilang mga Cristiano, gintudluan kita nga “magpangabudlay [kag] magtrabaho.” (Efe. 4:28) Sa masami, makita sang aton mga boss nga honest kita kag mapisan, kag posible silingan nila kita nga ginapabaloran gid nila ini. Bangod sini, posible nga dugangan naton ang aton oras sa pag-obra kay gusto naton nga mangin maayo ang impresyon sang aton mga boss sa mga Saksi ni Jehova. Pero sa ulihi, marealisar naton nga nagdiutay na ang aton tion para sa aton pamilya kag para kay Jehova. Gani dapat kita maghimo sang pagbag-o para may tion kita sa pinakaimportante nga mga butang.
11. Ano ang natun-an sang isa ka brother parte sa balanse nga pagtamod sa obra?
11 Binagbinaga ang eksperiensia sang isa ka pamatan-on nga brother nga si William. Natun-an niya sa isa ka gulang nga gin-ubrahan niya sadto nga importante gid ang husto nga pagtamod sa obra. Nagsiling si William: “Maayo gid nga halimbawa [ini nga brother] sa pagpakita sing balanse nga pagtamod sa obra. Nagapangabudlay sia sing lakas, kag maayo ang iya relasyon sa iya mga kliyente bangod sang kalidad sang iya obra. Pero pagkatapos sang obra sa bug-os nga adlaw, makahibalo sia nga biyaan anay ang iya obra kag dayon atipanon ang iya pamilya kag ang iya pagsimba. Kag abi mo? Sia ang pinakamalipayon nga tawo nga nakilala ko!” *
BALANSE NGA PAGTAMOD SA ATON KAUGALINGON
12. Paano ginpakita ni Solomon nga balanse ang pagtamod niya sa iya kaugalingon, pero paano nagbag-o ang iya pagtamod?
12 Sang matutom pa nga nagaalagad si Solomon kay Jehova, balanse ang pagtamod niya sa iya kaugalingon. Sang pamatan-on pa sia, mapainubuson niya nga ginsiling ang mga indi niya masarangan nga himuon kag nagpabulig sia kay Jehova. (1 Hari 3:7-9) Sa umpisa sang iya paggahom, kabalo man si Solomon nga indi gid maayo ang resulta kon mangin bugalon ang isa ka tawo. Nagsiling sia: “Ang bugal nagauna sa pagkapukan, kag ang matinaastaason nga espiritu sa pagkasandad.” (Hulu. 16:18) Pero masubo gid kay wala gin-aplikar ni Solomon ang iya mismo laygay. Sang ulihi, nangin bugalon sia kag wala niya gintuman ang pila ka sugo ni Jehova. Halimbawa, ang isa ka sugo nagasiling nga ang Hebreo nga hari ‘indi dapat magpangasawa sing madamo, agod indi magtalang ang iya tagipusuon.’ (Deut. 17:17) Wala gintuman ni Solomon ini nga sugo kay 700 ang iya nangin asawa kag 300 ang iya nangin babayi, kag madamo sa ila ang pagano. (1 Hari 11:1-3) Posible ginhunahuna ni Solomon nga indi ini mangin problema para sa iya. Pero sang ulihi, nag-antos si Solomon bangod sang malain nga mga resulta sang iya indi pagtuman kay Jehova.—1 Hari 11:9-13.
13. Ano ang matun-an naton kon pamalandungan naton ang pagkamapainubuson ni Jesus?
13 Mapainubuson si Jesus kag balanse gid pirme ang pagtamod niya sa iya kaugalingon. Antes sia nagkadto sa duta, madamo sia sing ginhimo nga dalayawon nga mga butang sa iya pag-alagad kay Jehova. Paagi kay Jesus, “gintuga ang tanan iban pa nga butang sa langit kag sa duta.” (Col. 1:16) Sang ginbawtismuhan sia, posible gid nga nadumduman niya ang iya mga ginhimo sang kaupod niya ang iya Amay. (Mat. 3:16; Juan 17:5) Pero bisan pa nadumduman ini ni Jesus, wala sia nangin bugalon. Wala gid niya ginpakataas ang iya kaugalingon sa iban. Ginsilingan niya ang iya mga disipulo nga ‘wala sia nagkari sa duta agod alagdon, kundi agod mag-alagad kag ihatag ang iya kabuhi nga gawad kabaylo sang madamo.’ (Mat. 20:28) Nagsiling man sia nga wala niya ginahimo ang isa ka hilikuton base lang sa iya kaugalingon nga desisyon. (Juan 5:19) Mapainubuson gid si Jesus. Maayo gid sia nga halimbawa nga dapat naton sundon.
14. Ano ang matun-an naton kay Jesus parte sa balanse nga pagtamod sa aton kaugalingon?
14 Gintudluan ni Jesus ang iya mga sumulunod nga dapat mangin balanse ang pagtamod nila sa ila kaugalingon. Isa ka bes, ginpasalig sila ni Jesus: “Ang buhok sa inyo ulo naisip niya tanan.” (Mat. 10:30) Makapalig-on gid sa aton ang ginsiling ni Jesus, ilabi na kon negatibo ang pagtamod naton sa aton kaugalingon. Ginapahangop ni Jesus nga interesado gid sa aton ang aton Amay sa langit kag ginapabaloran gid Niya kita. Gusto ni Jehova nga simbahon naton sia, kag para sa iya, nagakadapat kita magbaton sang kabuhi nga wala sing katapusan sa iya bag-o nga kalibutan. Indi gid naton dapat paghunahunaon nga sala ang pagtamod ni Jehova sa aton.
Ano nga mga pagpakamaayo ang indi naton maeksperiensiahankon kon nakapokus lang kita sa aton kaugalingon? (Tan-awa ang parapo 15) *
15. (a) Ano ang ginpalig-on sa aton sang Ang Lalantawan parte sa balanse nga pagtamod sa aton kaugalingon? (b) Base sa piktyur sa pahina 24, ano nga mga pagpakamaayo ang indi naton maeksperiensiahan kon nakapokus lang kita sa aton kaugalingon?
15 Mga 15 ka tuig na ang nagligad, ginpalig-on kita sang Ang Lalantawan nga dapat mangin balanse ang pagtamod naton sa aton kaugalingon. Nagsiling ini: “Sa pagkamatuod, indi naton dapat hunahunaon ang aton kaugalingon nga labaw sa kon ano gid kita tubtob sa punto nga nagapahambog na kita; kag indi man naton dapat tamdon ang aton kaugalingon nga wala gid sing kabilinggan. Sa baylo, dapat naton tinguhaan nga palambuon ang makatarunganon nga pagtamod sa aton kaugalingon, nga ginabinagbinag ang aton kabakod kag subong man ang aton mga limitasyon. Ang isa ka Cristianong babayi nagsiling: ‘Indi man gid ako malain nga tawo; kag indi man ako ang pinakamaayo. May maayo ako nga mga kinaiya kag may malain man, kag ang tanan subong man sini.’” * Ginapakita sini nga maayo gid kon balanse ang pagtamod naton sa aton kaugalingon.
16. Ngaa ginahatagan kita ni Jehova sang maayo nga mga laygay?
16 Ginahatagan kita ni Jehova sang maayo nga mga laygay paagi sa iya Pulong. Palangga niya kita, kag gusto niya nga mangin malipayon kita. (Isa. 48:17, 18) Ang pag-una kay Jehova sa aton kabuhi amo ang pinakamaayo nga desisyon nga mahimo naton nga makahatag sa aton sang matuod nga kalipay. Kon himuon naton ini, malikawan naton ang madamo nga problema nga nagapaantos sa mga tawo nga sobra ang pagpabalor sa kuarta, sa ila obra, ukon sa ila kaugalingon. Kabay pa nga panikasugan gid sang kada isa sa aton nga mangin maalamon para mapasadya naton ang tagipusuon ni Jehova.—Hulu. 23:15.
AMBAHANON 94 Salamat sa Pulong sang Dios
^ Maalam gid si Solomon kag si Jesus. Si Jehova nga Dios ang naghatag sa ila sing kaalam. Sa sini nga artikulo, binagbinagon naton kon ano ang matun-an naton sa ginlaygay ni Solomon kag ni Jesus parte sa balanse nga pagtamod sa kuarta, sa obra, kag sa aton kaugalingon. Binagbinagon man naton kon paano nakabenepisyo ang pila sa aton mga kauturan nga nag-aplikar sang ila mga natun-an sa Biblia.
^ Tan-awa ang artikulo nga “Kon Paano Ka Malipay sa Mabudlay nga Obra” sa Pebrero 1, 2015, nga Ang Lalantawan.
^ Tan-awa ang artikulo nga “Ang Biblia Makabulig sa Imo nga Makasapo sing Kalipay” sa Agosto 1, 2005, nga Ang Lalantawan.
^ MGA PIKTYUR: Magkaupod sa isa ka kongregasyon sanday John kag Tom nga mga pamatan-on nga brother. Nagakaubos ang tion ni John sa pagpatahom sa iya salakyan. Ginagamit ni Tom ang iya salakyan sa pagbantala kag pag-attend sa mga miting, kag ginapasakay niya sa sini ang iban nga kauturan.
^ MGA PIKTYUR: Naga-overtime si John. Indi niya gusto nga maakig sa iya ang iya boss. Gani kon magsiling ang iya boss nga dapat sia mag-overtime, naga-overtime gid si John. Sina man nga gab-i, gin-updan ni Tom ang isa ka gulang para mag-shepherding sa isa ka utod. Isa ka ministeryal nga alagad si Tom. Madugay na niya nga ginpaathag sa iya boss nga may mga gab-i nga indi sia puede mag-overtime kay ginagamit niya ini sa iya pag-alagad kay Jehova.
^ MGA PIKTYUR: Nakapokus si John sa iya kaugalingon. Para kay Tom, ang pag-alagad kay Jehova amo ang pinakaimportante sa iya kabuhi. Gani, madamo sia sing nangin abyan sang nagbulig sia sa pagkay-o sa isa ka Assembly Hall.
