1. Ano nga importante nga desisyon ang dapat himuon sang tanan nga tawo?

 MAY importante nga desisyon nga dapat himuon ang mga tawo subong. Sin-o ang ila suportahan? Si Jehova nga Dios nga amo ang may kinamatarong nga maggahom sa uniberso, ukon ang iya mapintas nga kaaway nga si Satanas nga Yawa? Dapat magdesisyon ang kada isa kag indi puede mangin neutral. Nagadepende sa ila desisyon ang ila paglaum nga mabuhi sing wala sing katapusan. (Mat. 25:31-33, 46) Sa tion sang “dakung kapipit-an,” makabaton sila sang marka nga amo ang basihan kon bala luwason sila ukon laglagon.—Bug. 7:14; 14:9-11; Ezeq. 9:4, 6.

2. (a) Ano ang ginapalig-on sa aton sang Hebreo 10:35-39 nga dapat naton himuon? (b) Paano makabulig sa aton ang libro sang Bugna?

² Basaha ang Hebreo 10:35-39. Kon nagdesisyon ka nga suportahan ang paggahom ni Jehova, maayo gid ang ginhimo mo. Gani gusto mo gid buligan ang iban nga maghimo man sang husto nga desisyon. Para mahimo ini, puede mo gamiton ang mga impormasyon sa libro sang Bugna. Ginasugid sining dalayawon nga libro kon ano ang matabo sa mga nagapamatok kay Jehova, kag kon ano nga mga pagpakamaayo ang mabaton sang mga matutom nga nagasuporta sa iya paggahom. Dapat naton tun-an ining importante nga mga kamatuoran. Kon himuon naton ini, mas mapalig-on pa gid kita nga padayon nga mag-alagad kay Jehova. Kag puede naton gamiton ang aton mga natun-an para buligan ang iban nga pilion man si Jehova kag padayon nga mag-alagad sa iya.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ini nga mga pamangkot: Ano nga mga pagpakamaayo ang mabaton sang mga nagasuporta sa paggahom sang Dios? Pero ano naman ang  matabo sa mga nagasuporta sa mabangis nga sapat nga eskarlata ang kolor nga ginsambit sa libro sang Bugna?

4. Ano nga grupo ang nakita ni apostol Juan nga kaupod ni Jesus sa langit?

⁴ Nakita ni apostol Juan sa palanan-awon ang duha ka grupo nga nagasuporta sa paggahom ni Jehova kag ginpadyaan sila sing kabuhi nga wala sing katapusan. Ang una nga grupo may kadamuon nga 144,000. (Bug. 7:4) Ginkuha sila sa duta para maghimo sang isa ka gobierno, ukon Ginharian, sa langit kaupod si Jesus. Kaupod nila sia nga nagagahom sa duta. (Bug. 5:9, 10; 14:3, 4) Nakita ni Juan sa palanan-awon nga kaupod nila si Jesus nga nagatindog sa Bukid Sion sa langit.—Bug. 14:1.

5. Ano ang matabo sa mga miembro sang 144,000 nga ari pa sa duta?

⁵ Sugod sang panahon sang mga apostoles asta subong, linibo na ka tawo ang ginpili para mangin miembro sang 144,000. (Luc. 12:32; Roma 8:17) Pero ginsilingan si Juan nga diutay na lang sa ila ang mabilin sa duta sa tion sang katapusan nga mga adlaw. Antes magsugod ang dakung kapipit-an, mabaton sining “mga nabilin” ang ila katapusan nga ‘marka’ nga nagapakita nga nalipay si Jehova sa ila. (Bug. 7:2, 3; 12:17) Dayon sa tion sang dakung kapipit-an, dalhon sa langit ining mga nabilin para makaupod nila ang iban pa nga miembro sang 144,000 nga napatay nga matutom. Mangin kaupod sila ni Jesus nga magagahom sa Ginharian sang Dios.—Mat. 24:31; Bug. 5:9, 10.

6-7. (a) Ano nga grupo ang masunod nga nakita ni Juan, kag ano ang matun-an naton parte sa ila? (b) Ngaa dapat mangin interesado sa Bugna kapitulo 7 ang mga hinaplas nga ari pa sa duta kag ang “daku nga kadam-an”?

⁶ Pagkatapos makita ni Juan ang grupo sa langit, nakita naman niya “ang daku nga kadam-an.” Indi pareho sa 144,000, indi maisip ini nga grupo. (Bug. 7:9, 10) Ano ang matun-an naton parte sa ila? Ginsilingan si Juan: “Sila amo ang naggua halin sa dakung kapipit-an. Ginlabhan nila ang ila malaba nga panapton kag ginpaputi ini sa dugo sang Kordero.” (Bug. 7:14) Pagkatapos makalampuwas sa dakung kapipit-an ining “daku nga kadam-an,” magakabuhi sila diri sa duta kag mabaton nila ang dalayawon nga mga pagpakamaayo.—Sal. 37:9-11, 27-29; Hulu. 2:21, 22; Bug. 7:16, 17.

⁷ Sa langit man ukon sa duta ang aton paglaum, dapat kita magpati nga maeksperiensiahan gid naton ang ginasiling sang Bugna kapitulo 7. Mangin makahalawathawat gid ini nga tion para sa duha ka grupo sang mga alagad sang Dios. Mangin malipayon gid kita kay nagdesisyon kita nga suportahan ang paggahom ni Jehova. Ano pa ang ginasugid sa aton sang libro sang Bugna parte sa dakung kapipit-an?—Mat. 24:21.

8. Ano ang umpisa sang dakung kapipit-an, kag ano ang mangin reaksion sang kalabanan nga tawo sa sini?

⁸ Sa nagligad nga artikulo, natun-an naton nga malapit na lang salakayon sang mga gobierno sini nga kalibutan ang Babilonia nga Daku ukon ang bug-os kalibutan nga emperyo sang butig nga relihion. (Bug. 17:16, 17) Ini nga pagsalakay amo ang umpisa sang dakung kapipit-an. Bangod sini, magadesisyon bala ang madamo nga tawo nga mag-alagad kay Jehova? Indi. Sa baylo, ginasugid sang Bugna kapitulo 6 nga kon mag-abot na ini nga tion, ang mga tawo nga wala nagaalagad kay Jehova magadangop sa pulitikal kag komersial nga mga sistema sini nga kalibutan, nga ginpaanggid sa mga bukid. Bangod indi sila magsuporta sa Ginharian sang Dios, kabigon sila ni Jehova nga mga nagapamatok sa iya.—Luc. 11:23; Bug. 6:15-17.

9. Ngaa mangin lain gid ang katawhan ni Jehova sa tion sang dakung kapipit-an, kag ano ang matabo sa ila bangod sini?

 ⁹ Mangin mabudlay gid ang kahimtangan sa tion sang dakung kapipit-an. Sa sina nga tion, mangin lain gid ang matutom nga mga alagad ni Jehova. Sila lang gihapon ang grupo sang mga tawo sa duta nga padayon nga nagaalagad kay Jehova nga Dios kag wala nagasuporta sa “mabangis nga sapat.” (Bug. 13:14-17) Bangod sang ila panindugan, maakig sa ila ang mga nagapamatok kay Jehova. Bangod sini, magahimbon ang mga pungsod kag salakayon nila ang katawhan sang Dios sa bilog nga kalibutan. Ini nga pagsalakay amo ang ginatawag sang Biblia nga pagsalakay sang Gog sang Magog.—Ezeq. 38:14-16.

10. Base sa Bugna 19:19-21, ano ang mangin reaksion ni Jehova sa pagsalakay sa iya katawhan?

¹⁰ Ano ang mangin reaksion ni Jehova sa sining mapintas nga pagsalakay? Nagsiling sia: “Magadabdab ang akon kaakig.” (Ezeq. 38:18, 21-23) Ginasugid sang Bugna kapitulo 19 ang masunod nga matabo. Ipadala ni Jehova ang Iya Anak para amligan ang Iya katawhan kag para pierdihon ang ila mga kaaway. Magaupod kay Jesus sa pagpakig-away “ang mga kasuldadusan sa langit” ukon ang matutom nga mga anghel kag ang 144,000. (Bug. 17:14; 19:11-15) Ano ang mangin resulta sini nga inaway? Malaglag sing bug-os ang tanan nga tawo kag organisasyon nga nagapamatok kay Jehova.—Basaha ang Bugna 19:19-21.

11. Ano ang pinakaimportante nga hitabo nga ginasugid sang libro sang Bugna?

¹¹ Imadyina ang mabatyagan sang mga matutom sa duta nga makalampuwas sa paglaglag sa tanan nga kaaway sang Dios. Grabe gid ang ila kalipay sa sina nga tion. Magahinugyaw man sa kalipay ang mga ara sa langit kon laglagon na ang Babilonia nga Daku. Pero may isa pa ka rason para mangin mas malipayon pa gid sila. (Bug. 19:1-3) Amo ini “ang kasal sang Kordero,” nga amo ang pinakaimportante nga hitabo nga ginasugid sang libro sang Bugna.—Bug. 19:6-9.

12. Base sa Bugna 21:1, 2, san-o hiwaton ang kasal sang Kordero?

¹² San-o hiwaton ang kasal? Ara na sa langit ang tanan nga miembro sang 144,000 antes ang inaway sa Armageddon. Pero, indi ini ang tion para sa kasal sang Kordero. (Basaha ang Bugna 21:1, 2.) Hiwaton ang kasal sang Kordero pagkatapos sang inaway sa Armageddon kag nalaglag na ang tanan nga kaaway sang Dios.—Sal. 45:3, 4, 13-17.

13. Ano ang mangin resulta sang kasal sang Kordero?

¹³ Ano ang mangin resulta sang kasal sang Kordero? Ang kasal amo ang nagapaposible para mag-updanay ang isa ka lalaki kag isa ka babayi. Sing kaanggid, ang kasal sang Kordero amo ang magapaposible para mag-updanay ang Hari, nga si Jesucristo, kag ang iya “nobya,” nga amo ang 144,000. Paagi sa sining importante nga hitabo, magasugod ang bag-o nga gobierno nga magagahom sa duta sa sulod sang 1,000 ka tuig.—Bug. 20:6.

14-15. Suno sa Bugna kapitulo 21, sa ano ginpaanggid ang 144,000? (Tan-awa ang piktyur sa kober.)

¹⁴ Sa Bugna kapitulo 21, ginpaanggid ang 144,000 sa matahom gid nga siudad nga ginatawag “Bag-o nga Jerusalem.” (Bug. 21:2, 9) Ini nga siudad may 12 ka sadsaran nga bato nga may nakasulat nga “12 ka ngalan sang 12 ka apostoles sang Kordero.” Ngaa nakuha sini ang atension ni Juan? Bangod nakita niya ang iya ngalan nga nakasulat sa isa ka bato. Dalayawon gid ini nga pribilehiyo.—Bug. 21:10-14; Efe. 2:20.

 ¹⁵ Wala gid sing kapareho ini nga siudad. Puro nga bulawan ang mayor nga dalan sini, perlas ang 12 ka gawang sini, ginbutangan sang malahalon nga mga bato ang mga pader kag mga sadsaran sini, kag pareho ang kalabaon, kasangkaron, kag kataason sini. (Bug. 21:15-21) Pero, daw may kulang sa sini nga siudad. Talupangda ang ginsiling ni Juan: “Wala ako sing nakita nga templo sa sini, kay si Jehova nga Dios nga Labing Gamhanan kag ang Kordero amo ang templo sini. Indi na kinahanglan sang siudad ang silak sang adlaw ukon sang bulan, kay ang himaya sang Dios amo ang nagapasanag sini, kag ang suga sini amo ang Kordero.” (Bug. 21:22, 23) Makaupod sang mga miembro sang Bag-o nga Jerusalem si Jehova. (Heb. 7:27; Bug. 22:3, 4) Gani, si Jehova kag si Jesus ang templo sini nga siudad.

16. Ano ang maeksperiensiahan sang katawhan sa tion sang Isa ka Libo ka Tuig nga Paggahom sang Ginharian sang Dios?

¹⁶ Nalipay gid ang mga hinaplas nga pamalandungan ang parte sa sini nga siudad. Pero dapat man mangin interesado sa sini ang mga may paglaum nga mabuhi sa duta. Sa tion sang Isa ka Libo ka Tuig nga Paggahom sang Ginharian sang Dios, indi maisip nga pagpakamaayo ang ihatag sang Bag-o nga Jerusalem. Nakita ni Juan nga nagailig ini nga mga pagpakamaayo bilang isa ka “suba sang tubig sang kabuhi.” Kag sa magtimbang nga pangpang sang suba may “mga kahoy sang kabuhi” nga may mga dahon nga “makapaayo sa mga pungsod.” (Bug. 22:1, 2) Ang tanan nga tawo nga nagakabuhi sa sina nga tion may kahigayunan nga makabenepisyo sa sini nga mga aman. Amat-amat nga mangin perpekto ang tanan nga matinumanon nga mga tawo. Wala na sing balatian, kasakit, kag luha bangod sa kasubo.—Bug. 21:3-5.

17. Suno sa Bugna 20:11-13, sin-o ang makabenepisyo sa Isa ka Libo ka Tuig nga Paggahom?

¹⁷ Sin-o ang makabenepisyo sa sining dalayawon nga mga aman? Ang una nga makabenepisyo sa sini amo ang daku nga kadam-an nga makalampuwas sa Armageddon, lakip ang kabataan nga posible mabun-ag sa bag-o nga kalibutan. Pero nagapromisa man ang Bugna kapitulo 20 nga banhawon ang mga patay. (Basaha ang Bugna 20:11-13.) Banhawon diri sa duta ang “mga matarong” nga napatay nga matutom pati ang “mga indi matarong” nga wala mahatagan sang kahigayunan nga makatuon parte kay Jehova. (Binu. 24:15; Juan 5:28, 29) Buot bala  silingon sini nga banhawon sa tion sang Isa ka Libo ka Tuig nga Paggahom ang tanan nga napatay? Indi. Indi pagbanhawon ang mga tawo nga hungod nga nagsikway sa ginhatag sa ila nga kahigayunan nga mag-alagad kay Jehova antes sila napatay. Ginhatagan sila sang tsansa, pero ginpakita nila nga indi sila nagakadapat magkabuhi sa Paraiso sa duta.—Mat. 25:46; 2 Tes. 1:9; Bug. 17:8; 20:15.

18. Ano ang kahimtangan sa duta pagkatapos sang 1,000 ka tuig?

¹⁸ Pagkatapos sang 1,000 ka tuig, mangin perpekto na ang tanan nga nagakabuhi sa duta. Wala na sing epekto sa ila ang sala nga napanubli sang mga tawo kay Adan. (Roma 5:12) Madula na ang tanan nga malain nga epekto sang sala ni Adan. Gani, “mabuhi” ang mga ara sa duta bilang perpekto na nga mga tawo pagkatapos sang 1,000 ka tuig.—Bug. 20:5.

19. Ngaa kinahanglan ang katapusan nga pagtilaw?

¹⁹ Kabalo kita nga nagpabilin nga matutom si Jesus bisan pa ginsulay sia ni Satanas. Pero magapabilin man bala nga matutom ang tanan nga perpekto nga tawo kon sulayon sila ni Satanas? Ang kada isa amo ang magasabat sa sini kon buy-an na si Satanas sa kadadalman pagkatapos sang 1,000 ka tuig. (Bug. 20:7) Ang mga tawo nga magapabilin nga matutom sa sining katapusan nga pagtilaw makabaton sing kabuhi nga wala sing katapusan kag sing matuod nga kahilwayan. (Roma 8:21) Pero ang mga tawo nga magarebelde kay Jehova pagalaglagon. Laglagon sila sing bug-os upod sa Yawa kag sa iya mga demonyo.—Bug. 20:8-10.

20. Ano ang nabatyagan mo parte sa dalayawon nga mga tagna sa libro sang Bugna?

²⁰ Ano ang nabatyagan mo pagkatapos naton mabinagbinag sing malip-ot ang libro sang Bugna? Indi bala makalilipay imadyinon nga nalakip ka sa katumanan sining dalayawon nga mga tagna? Sigurado gid nga napalig-on ka sini nga buligan ang iban para makaupod man naton sila sa pagsimba sa aton Dios sa husto nga paagi. (Bug. 22:17) Napalig-on gid kita sa aton pagbinagbinag sa mga matabo sa palaabuton, gani gusto man naton isiling ang ginsiling ni apostol Juan: “Kabay pa! Kari ka, Ginuong Jesus.”—Bug. 22:20.