1-2. Kon may mga pagbag-o sa aton kabuhi, ngaa mas ginapabaloran naton ang pila ka prinsipio sa Biblia?

 SA TION sang kasal, nagapamati sing maayo ang guapo nga nobyo kag ang iya guapa nga nobya sa pamulongpulong parte sa pag-asawahay nga nabase sa Biblia. Nabal-an na nila ang mga prinsipio nga ginabinagbinag sa sini nga pamulongpulong. Pero sugod subong, importante gid sa ila ini nga mga impormasyon. Ngaa? Bangod kinahanglan nila ini iaplikar bilang mag-asawa.

² Amo man sini ang ginabatyag sang bag-o nga mga ginikanan. Sa sulod sang madamo nga tinuig, madamo na sila sang nabatian nga pamulongpulong parte sa pagpadaku sa kabataan. Pero, importante gid sa ila subong ini nga mga prinsipio. Kay man, may bata na sila nga dapat padakuon. Mabug-at gid ini nga responsibilidad. Gani kon may mga pagbag-o sa aton kabuhi, may mga prinsipio man sa Biblia nga mas ginapabaloran naton. Amo ini ang isa ka rason kon ngaa ginabasa sang mga alagad ni Jehova ang Kasulatan sa “tanan nga adlaw” sang ila kabuhi, nga ginsugo man sa mga hari sang Israel sang una. Dayon ginapamalandungan sang mga alagad ni Jehova ang ila nabasa.—Deut. 17:19.

3. Ano ang binagbinagon naton sa sini nga artikulo?

³ Mga ginikanan, may pribilehiyo kamo nga tudluan ang inyo kabataan parte kay Jehova. Isa ini sa pinakadalayawon nga pribilehiyo nga puede mabaton sang isa ka Cristiano. Pero indi bastante nga tudluan lang ninyo sila sang mga impormasyon parte sa aton Dios. Dapat ninyo buligan ang inyo kabataan nga palanggaon gid sia. Ano ang puede ninyo himuon para palanggaon sang inyo kabataan si Jehova? Sa sini nga artikulo, binagbinagon naton ang apat ka prinsipio sa Biblia nga makabulig sa inyo nga mga  ginikanan. (2 Tim. 3:16) Binagbinagon man naton kon paano ginpakamaayo ang pila ka ginikanan nga nag-aplikar sang mga laygay sang Biblia.

4. Ano ang isa ka prinsipio nga makabulig sa mga ginikanan para mabuligan nila ang ila kabataan nga palanggaon si Jehova? (Santiago 1:5)

⁴ Una nga prinsipio: Magpagiya kay Jehova. Pangabaya ninyo si Jehova nga hatagan kamo sing kaalam nga kinahanglan ninyo para mabuligan ninyo ang inyo kabataan nga palanggaon sia. (Basaha ang Santiago 1:5.) Sia ang pinakamaayo nga Persona nga makahatag sing laygay. Ngaa? Ari ang duha sa madamo nga rason. Una, si Jehova ang may pinakamadamo nga eksperiensia bilang isa ka ginikanan. (Sal. 36:9) Kag ikaduha, pirme maayo ang resulta sang iya mga laygay.—Isa. 48:17.

5. (a) Ano ang ginahatag sang organisasyon ni Jehova para buligan ang mga ginikanan? (b) Base sa video, ano ang natun-an mo sa paagi nanday Brother kag Sister Amorim sa pagpadaku sa ila kabataan?

⁵ Paagi sa iya Pulong kag iya organisasyon, ginahatagan kamo ni Jehova sang madamo nga impormasyon nga nabase sa Biblia nga magamit ninyo para buligan ang inyo kabataan nga palanggaon sia. (Mat. 24:45) Halimbawa, madamo kamo sing makita nga mapuslanon nga mga laygay sa mga artikulo nga “Bulig Para sa Pamilya.” Sa sulod sang madamo nga tinuig, mabasa ini sa magasin nga Magmata!, kag mabasa ini subong sa aton nga website. Madamo man sing mga video sa jw.org, nga may mga interbyu kag mga drama, nga makabulig sa mga ginikanan kon paano iaplikar ang mga laygay ni Jehova sa pagpadaku sa ila kabataan. *—Hulu. 2:4-6.

6. Ano ang ginsiling sang isa ka amay parte sa mga laygay nga nabaton nila sang iya asawa halin sa organisasyon ni Jehova?

⁶ Madamo nga ginikanan ang nagsiling nga nagapasalamat sila sa bulig ni Jehova paagi sa iya organisasyon. Ang isa ka amay nga si Joe nagsiling: “Indi mahapos ang pagtudlo sa tatlo ka kabataan nga palanggaon si Jehova. Gani pirme kami nagapangamuyo kay Jehova nga buligan niya kami sang akon asawa. Kag pirme namon matalupangdan nga kon kinahanglan gani namon ang bulig sa isa ka sitwasyon, may bag-o dayon nga artikulo ukon video parte sa sini. Pirme gid kami nagapagiya sa mga laygay ni Jehova.” Napamatud-an ni Joe kag sang iya asawa nga  nakabulig gid ini nga mga artikulo kag mga video para magsuod kay Jehova ang ila kabataan.

7. Ngaa importante nga mangin maayo nga halimbawa ang mga ginikanan? (Roma 2:21)

⁷ Ikaduha nga prinsipio: Mangin maayo nga halimbawa. Ginapanilagan sang kabataan ang ila mga ginikanan kag ginailog nila ang ila ginahimo. Matuod, wala sing perpekto nga ginikanan. (Roma 3:23) Pero, dapat himuon sang mga ginikanan ang ila bug-os nga masarangan para mangin maayo sila nga halimbawa sa ila kabataan. (Basaha ang Roma 2:21.) Parte sa kabataan, ang isa ka amay nagsiling: “Daw mga espongha sila nga nagasuyop sang tanan.” Nagsiling pa sia: “Hambalan nila kita kon lain ang aton ginahimo sangsa aton ginatudlo.” Gani kon gusto naton nga palanggaon sang aton kabataan si Jehova, dapat makita nila nga palangga gid naton sia.

8-9. Ano ang natun-an mo sa ginsiling ni Andrew kag ni Emma?

⁸ Madamo sing paagi para matudluan sang mga ginikanan ang ila kabataan nga palanggaon si Jehova. Ang 17 anyos nga brother nga si Andrew nagsiling: “Pirme ako ginatudluan sang akon mga ginikanan nga importante gid ang pangamuyo. Kada gab-i, nagapangamuyo si Papa upod sa akon, bisan pa nakapangamuyo na ako. Pirme nila kami ginasilingan sang akon manghod: ‘Puede ninyo maistorya si Jehova bisan ano oras kag bisan pila pa ka beses.’ Bangod sini, nangin importante gid sa akon ang pangamuyo. Subong, komportable ako nga isugid kay Jehova ang akon ginabatyag paagi sa pagpangamuyo sa iya, kag ginakabig ko sia nga isa ka Amay nga nagapalangga gid sa akon.” Mga ginikanan, tandai ninyo nga mabuligan ninyo ang inyo kabataan nga palanggaon si Jehova kon makita nila nga palangga man ninyo sia.

⁹ Binagbinaga man ang halimbawa ni Emma. Sang ginbiyaan sang iya amay ang ila pamilya, daku ang utang sang iya amay sa madamo nga tawo kag kinahanglan ini bayaran sang iya iloy. Si Emma nagsiling: “Madamo nga beses nga halos wala na sing kuarta si Mama, pero pirme niya ginaistorya kon paano ginaatipan kag ginabuligan ni Jehova ang iya mga alagad. Nakita ko sa iya pagkabuhi nga nagapati gid sia sa sini. Ginahimo gid ni Mama kon ano ang iya mga ginatudlo.” Ano ang matun-an naton sa sini? Puede gihapon mapakita sang mga ginikanan ang maayo nga halimbawa bisan sa mabudlay nga mga sitwasyon.—Gal. 6:9.

10. Ano nga mga kahigayunan ang puede gamiton sang madamo nga Israelinhon nga mga ginikanan para istoryahon ang ila kabataan parte kay Jehova? (Deuteronomio 6:6, 7)

¹⁰ Ikatlo nga prinsipio: Pirme istoryaha ang inyo kabataan. Ginsugo ni Jehova ang mga Israelinhon sang una nga tudluan nila pirme ang ila kabataan parte sa iya. (Basaha ang Deuteronomio 6:6, 7.) Madamo sila sang kahigayunan sa bilog nga adlaw para istoryahon ang ila kabataan kag para buligan sila nga palanggaon si Jehova. Halimbawa, ginabuligan sang Israelinhon nga bata nga lalaki ang iya amay sa pagpananom sa ila uma ukon sa paghakot sang ila patubas pakadto sa ila balay. Gani posible nga inoras sila nga magkaupod sang iya amay. Ginabuligan naman sang iya utod nga babayi ang ila iloy sa pagpanahi, pagpanghabol, kag sa iban pa nga ulubrahon sa balay. Gani posible nga halos bilog nga adlaw sila nga magkaupod sang iya iloy. Samtang updanay nga nagaobra ang mga ginikanan kag kabataan, puede nila istoryahan ang parte sa madamo nga importante nga topiko. Halimbawa, puede nila istoryahan ang parte sa kaayo ni Jehova kag kon paano niya ginabuligan ang ila pamilya.

11. Ano ang isa ka kahigayunan nga magamit sang mga ginikanan para maistorya nila ang ila kabataan?

¹¹ Subong, lain na ang aton sitwasyon. Sa madamo nga pungsod, wala sang tion kon adlaw para makaupdanay ang mga ginikanan kag ang ila kabataan. Posible nga ara sa ulubrahan ang mga ginikanan, kag ara naman sa eskwelahan ang kabataan. Gani, dapat mangita sang tion  ang mga ginikanan para maistorya nila ang ila kabataan. (Efe. 5:15, 16; Fil. 1:10) Ang family worship amo ang isa ka kahigayunan para mahimo nila ini. Ang isa ka pamatan-on nga brother nga si Alexander nagsiling: “Ginasigurado gid ni Tatay nga may ara kami pirme family worship. Bisan ano pa ang matabo, wala gid nagasiling si Tatay nga indi lang kami anay mag-family worship. Pagkatapos sang amon pagtuon, nagaistoryahanay kami dayon.”

12. Ano ang dapat tandaan sang ulo sang pamilya sa tion sang family worship?

¹² Kon isa ikaw ka ulo sang pamilya, ano ang puede mo himuon para manamian ang imo kabataan sa inyo family worship? Puede mo gamiton sa inyo pagtuon ang aton manami nga bag-o nga publikasyon nga Magkabuhi sing Wala Katapusan! Makabulig ini nga libro para mangin masadya ang inyo pagtuon kag pag-istoryahanay. Gusto mo nga isugid sa imo sang imo kabataan ang ila nabatyagan kag problema, gani indi mo sila dapat pag-akigan ukon pagsermonan sa tion sang inyo family worship. Kag kon may ginsiling ang imo kabataan nga indi suno sa mga prinsipio sa Biblia, tinguhai nga indi maakig. Sa baylo, dapat ka magpasalamat kay honest sila sa imo, kag buligi sila nga indi matahap sa pagsugid sang ila ginabatyag. Mas mabuligan mo ang imo kabataan kon kabalo ka kon ano gid ang ila ginabatyag.

13. Ano ang iban pa nga kahigayunan nga magamit sang mga ginikanan para buligan ang ila kabataan nga mangin suod kay Jehova?

¹³ Mga ginikanan, mangita sing kahigayunan kada adlaw nga magamit ninyo para buligan ang inyo kabataan nga mangin suod kay Jehova. Indi paghunahunaa nga tudluan lang ninyo sila parte sa aton mahigugmaon nga Dios kon tion lang sang inyo pag-Bible study sa ila. Talupangda ang ginsiling sang isa ka iloy nga si Lisa: “Ginagamit namon ang mga tinuga sang Dios para tudluan ang amon kabataan parte kay Jehova. Halimbawa, kon may ginhimo ang amon ido nga nagpakadlaw sa amon kabataan, ginagamit namon ini nga halimbawa para tudluan sila nga si Jehova isa ka malipayon nga Dios kag gusto niya nga mangin malipayon man kita.”

14. Ngaa importante nga buligan sang mga ginikanan ang ila kabataan nga pilion ang maayo nga mga abyan? (Hulubaton 13:20)

¹⁴ Ikap-at nga prinsipio: Buligi ang inyo kabataan nga pilion ang maayo nga mga abyan. Ang Pulong sang Dios nagasiling nga may maayo ukon  malain nga impluwensia sa aton ang aton mga abyan. (Basaha ang Hulubaton 13:20.) Mga ginikanan, kilala bala ninyo ang mga abyan sang inyo kabataan? Nakilala bala ninyo sila sing personal kag nakaupod bala ninyo sila? Ano ang puede ninyo himuon para mangin abyan sang inyo kabataan ang mga nagapalangga kay Jehova? (1 Cor. 15:33) Mabuligan ninyo sila nga makapili sang maayo nga mga abyan paagi sa pag-agda sa hamtong sa espirituwal nga mga utod nga mag-upod sa mga hilikuton sang inyo pamilya.—Sal. 119:63.

15. Ano ang puede himuon sang mga ginikanan para makapili sang maayo nga mga abyan ang ila kabataan?

¹⁵ Binagbinaga ang eksperiensia sang isa ka amay nga si Tony. Amo ini ang ginsiling niya nga ginahimo nila sang iya asawa para makakita sang maayo nga mga abyan ang ila kabataan: “Sa sulod sang mga tinuig, madamo na nga kauturan nga lainlain ang edad kag gindak-an ang naagda namon sang akon asawa sa amon balay. Magkaupod kami nga nagakaon kag naga-family worship. Isa ini ka maayo gid nga paagi para makilala ang mga nagapalangga kay Jehova kag nagaalagad sa iya sing malipayon. Pagpakamaayo gid nga nakadayon sa amon balay ang mga manugtatap sang sirkito, mga misyonero, kag iban pa nga mga kauturan. Madamo gid sing natun-an ang amon kabataan sa ila mga eksperiensia, sa ila katutom, kag sa ila mga sakripisyo para sa pag-alagad kay Jehova. Nakabulig ini sa amon kabataan nga mangin suod kay Jehova.” Mga ginikanan, buligi gid ang inyo kabataan nga pilion ang maayo nga mga abyan.

16. Ano ang dapat hunahunaon sang isa ka ginikanan kon may bata sia nga magsiling nga indi niya gusto mag-alagad kay Jehova?

¹⁶ Pero ano abi kon may bata ka nga magsiling nga indi niya gusto mag-alagad kay Jehova bisan pa ginhimo mo ang imo bug-os nga masarangan nga buligan sia? Indi paghunahunaa nga napaslawan ka bilang isa ka ginikanan. Ginhatagan ni Jehova ang kada isa sa aton, lakip ang imo bata, sing kahilwayan sa pagdesisyon. Gani makapili sia kon bala maalagad sia sa Dios ukon indi. Kon nagdesisyon ang imo bata nga biyaan si Jehova, indi madulaan sang paglaum nga magabalik sia sa ulihi. Dumduma ang ilustrasyon parte sa rebelyuso nga anak. (Luc. 15:11-19, 22-24) Nagpalayo ini nga anak kag madamo sia sing ginhimo nga  malain, pero nagbalik sia sa iya amay sang ulihi. Basi magsiling ang iban: “Isa lang ina ka istorya. Posible gid bala ina matabo?” Huo. Amo sina ang natabo sa isa ka pamatan-on nga si Elie.

17. Paano ka napalig-on sang eksperiensia ni Elie?

¹⁷ Amo ini ang ginsiling ni Elie parte sa iya mga ginikanan: “Gintinguhaan nila nga tudluan ako nga higugmaon si Jehova kag ang iya Pulong, ang Biblia. Pero sang tin-edyer ako, nagrebelde ako.” Nagaalagad si Elie kay Jehova, pero sekreto man sia nga nagahimo sang malain. Ginhimo sang iya mga ginikanan ang tanan para indi sia magbiya kay Jehova, pero wala niya sila ginpamatian. Sang naghalin sia sa ila balay, naghimo sia sang sala nga mga buhat. Pero may mga tion nga nagaistorya sila sang iya amigo parte sa Biblia. Si Elie nagsiling: “Samtang padayon ko nga ginasugid sa akon amigo ang parte kay Jehova, pirme ko na ginapamensar si Jehova. Amat-amat nga nagtubo ang binhi sang kamatuoran sa Biblia nga gintanom sang akon mga ginikanan sa akon tagipusuon.” Sang ulihi, nagbalik si Elie kay Jehova. * Sigurado nga nalipay gid ang iya mga ginikanan kay gintudluan nila sia nga palanggaon si Jehova halin sang bata pa sia.—2 Tim. 3:14, 15.

18. Ano ang masiling mo sa mga ginikanan nga nagapanikasog gid nga tudluan ang ila kabataan nga palanggaon si Jehova?

¹⁸ Mga ginikanan, ginhatagan kamo sing dalayawon nga pribilehiyo nga amo ang pagbulig sa bag-o nga henerasyon nga mag-alagad kay Jehova. (Sal. 78:4-6) Indi ini mahapos, gani ginapasalamatan kag ginadayaw gid namon kamo sa inyo mga pagpanikasog para buligan ang inyo kabataan. Kon padayon ninyo nga himuon ang inyo bug-os nga masarangan para buligan ang inyo kabataan nga palanggaon si Jehova kag tudluan sila nga mangin matinumanon sa iya, malipay gid sa inyo ang aton mahigugmaon nga Amay sa langit.—Efe. 6:4.