1-2. Ano ang isa ka rason kon ngaa dapat kita mangin interesado sa libro sang Bugna?

 IMADYINA nga nagatan-aw ka sang mga piktyur sa album sang isa ka tawo. Samtang ginaisaisa mo tan-aw ang mga piktyur, indi mo kilala ang kalabanan nga ara sa sini. Pero nakibot ka sang nakita mo ang isa ka piktyur. Ngaa? Kay ara ka sa sini nga piktyur. Gani ginpanumdom mo kon san-o ginkuha ini nga piktyur kag kon sa diin ini nga lugar. Gin-isaisa mo man panumdom ang mga ngalan sang mga ara sa sini. Nanamian ka gid sa sini nga piktyur.

² Ang libro sang Bugna daw pareho sa sini nga piktyur. Ngaa? May duha ka rason. Una, ginsulat ini nga libro sang Biblia para sa aton. Ang una nga bersikulo sini nagsiling: “Ini ang bugna nga ginhatag sang Dios kay Jesucristo agod ipakita sa iya mga ulipon ang mga butang nga pat-od nga mahanabo sa indi madugay.” (Bug. 1:1) Gani, indi para sa tanan nga tawo ang ginsulat sa sini nga libro, kundi para sa aton nga mga alagad sang Dios. Bangod katawhan kita sang Dios, wala na kita natingala nga may bahin kita sa katumanan sang mga tagna sa sining dalayawon nga libro. Buot silingon, daw pareho lang nga ara kita sa piktyur.

3-4. Suno sa libro sang Bugna, san-o matuman ang mga tagna sa sini, kag ano ang dapat naton himuon bangod sini?

³ Ang ikaduha nga rason kon ngaa dapat kita mangin interesado sa libro sang Bugna amo ang tion kon san-o matuman ang mga tagna sa sini. Ginsugid sang tigulang na nga si apostol  Juan kon san-o ini matuman. Nagsiling sia: “Paagi sa balaan nga espiritu nakadangat ako sa adlaw sang Ginuo.” (Bug. 1:10) Sang ginsulat ini ni Juan sang mga 96 C.E., wala pa nagsugod ang “adlaw sang Ginuo.” (Mat. 25:14, 19; Luc. 19:12) Suno sa mga tagna sa Biblia, nagsugod ini nga adlaw sang 1914 sang nangin Hari si Jesus sa langit. Sugod sina nga tuig, ang mga tagna sa Bugna parte sa katawhan sang Dios amat-amat nga natuman. Gani ari na kita sa tion sang “adlaw sang Ginuo.”

⁴ Bangod makahalawathawat gid ang aton tion subong, dapat gid naton pamalandungan ang laygay sa Bugna 1:3: “Malipayon ang isa nga nagabasa sing mabaskog kag ang mga nagapamati sang mga pulong sini nga tagna kag nagatuman sang mga butang nga nasulat sa sini, kay malapit na ang gintalana nga tion.” Gani dapat naton ‘basahon sing mabaskog,’ ‘pamatian,’ kag ‘tumanon ang mga pulong sini nga tagna.’ Ano ang pila sa sini nga mga pulong nga dapat naton tumanon?

5. Paano ginapakita sang libro sang Bugna nga importante nga siguraduhon naton nga batunon ni Jehova ang aton pagsimba?

⁵ Ginasugid sa aton sang una nga kapitulo sang Bugna nga nabal-an ni Jesus ang tanan nga nagakatabo sa mga kongregasyon. (Bug. 1:12-16, 20; 2:1) Makita naton ini sa iya mga mensahe nga ginpadala sa pito ka kongregasyon sa Asia Minor. Maathag sa iya mga mensahe kon ano ang dapat himuon sang mga Cristiano sadto para batunon ni Jehova ang ila pagsimba. Kag dapat man ini himuon sang tanan nga katawhan sang Dios subong. Ano ang ginatudlo sini sa aton? Nabal-an sang aton Lider, nga si Cristo Jesus, kon bala maayo ang aton kaangtanan kay Jehova. Si Jesus ang nagapanguna sa aton, ginaamligan niya kita, kag makita niya ang tanan. Kabalo sia kon ano ang dapat naton himuon para malipay pirme si Jehova sa aton. Ano ang iya mga instruksion nga dapat naton tumanon subong?

6. (a) Suno sa ginsiling ni Jesus sa Bugna 2:3, 4, ano ang problema sang kongregasyon sa Efeso? (b) Ano ang matun-an naton sa sini?

⁶ Basaha ang Bugna 2:3, 4. Dapat naton tinguhaan nga indi madula ang aton una nga gugma kay Jehova. Ginapakita sang mensahe ni Jesus sa kongregasyon sa Efeso nga ginbatas nila ang madamo nga kabudlayan kag padayon sila nga nag-alagad kay Jehova. Pero nadula nila ang ila una nga gugma. Dapat nila pabakuron liwat ang ila gugma kay Jehova para batunon niya ang ila pagsimba. Subong, dapat man kita magbatas, pero dapat husto ang aton motibo sa pagbatas. Dapat naton dumdumon nga importante sa aton Dios kon ano ang aton ginahimo, pati na ang rason kon ngaa ginahimo naton ini. Importante sa iya ang aton motibo. Gusto niya nga ginasimba naton sia kay palangga gid naton sia kag nagapasalamat kita sa iya.—Hulu. 16:2; Mar. 12:29, 30.

7. (a) Suno sa Bugna 3:1-3, ano nga problema ang nakita ni Jesus sa kongregasyon sa Sardis? (b) Ano ang dapat naton himuon?

⁷ Basaha ang Bugna 3:1-3. Dapat padayon kita nga nagamata kag alisto. Lain naman ang problema sang mga Cristiano sa kongregasyon sa Sardis. Aktibo sila nga nag-alagad kay Jehova sang una, pero amat-amat sila nga nagluya sa ila pag-alagad sa Dios. Gani ginsilingan sila ni Jesus nga “magmata.” Ano ang ginatudlo sini sa aton? Siempre, indi pagkalimtan ni Jehova ang aton ginhimo nga pag-alagad sa iya. (Heb. 6:10) Pero indi naton dapat paghunahunaon nga bangod nag-alagad na kita kay Jehova sang una, puede lang  nga indi na kita mag-alagad sa iya subong. Bisan pa diutay na lang ang aton mahimo subong, dapat kita mangin mapisan “sa hilikuton sang Ginuo” para padayon kita nga nagamata kag alisto asta sa katapusan.—1 Cor. 15:58; Mat. 24:13; Mar. 13:33.

8. Ano ang matun-an naton sa mensahe ni Jesus para sa mga kauturan sa Laodicea nga mabasa sa Bugna 3:15-17?

⁸ Basaha ang Bugna 3:15-17. Dapat kita mangin mapisan sa aton pag-alagad kag himuon naton ini sing bug-os tagipusuon. Sa mensahe ni Jesus sa Laodicea, ginsugid niya ang ila problema. Nagsiling sia nga “maalabaab” ang ila pagsimba. Nadula ang ila gana sa pag-alagad, gani ginsilingan sila ni Jesus nga “makaluluoy” sila. Dapat nila panikasugan nga mangin mapisan sa ila pag-alagad kay Jehova. (Bug. 3:19) Ano ang ginatudlo sini sa aton? Kon daw indi na kita mapisan sa aton pag-alagad, dapat naton panikasugan nga pasalamatan ang tanan nga ginahatag ni Jehova kag sang iya organisasyon para sa aton. (Bug. 3:18) Likawan naton ang sobra nga pagpanikasog para mangin masulhay ang aton kabuhi subong, kay basi mangin indi na pinakaimportante sa aton kabuhi ang pagsimba kay Jehova.

9. Suno sa mga mensahe ni Jesus para sa mga Cristiano sa Pergamo kag sa Tiatira, ano ang dapat naton likawan?

⁹ Dapat naton isikway ang mga panudlo sang mga apostata. Ginsabdong ni Jesus ang pila ka kauturan sa Pergamo kay ginaguba nila ang paghiusa sang kongregasyon. (Bug. 2:14-16) Gindayaw naman ni Jesus ang mga kauturan sa Tiatira kay ginlikawan nila ang “madalom nga mga butang ni Satanas,” kag ginpalig-on niya sila nga ‘huptan sing malig-on’ ang kamatuoran. (Bug. 2:24-26) Dapat gid maghinulsol ang mga Cristiano nga maluya sing pagtuo kag nagsunod sa sala nga mga panudlo. Kamusta naman subong? Dapat man naton isikway ang mga panudlo nga wala nabase sa panghunahuna ni Jehova. Ang mga apostata “daw diosnon kon tulukon,” ukon daw ginapabaloran nila ang Biblia, pero “wala sing impluwensia ang gahom sini sa ila kabuhi.” (2 Tim. 3:5) Dapat pirme naton tun-an sing maayo ang Pulong sang Dios. Kon himuon naton ini, mahapos lang nga mabal-an naton ang butig nga mga panudlo kag isikway ini.—2 Tim. 3:14-17; Jud. 3, 4.

10. Ano pa ang matun-an naton sa ginsiling ni Jesus sa mga kongregasyon sa Pergamo kag sa Tiatira?

¹⁰ Indi kita dapat maghimo sang bisan ano nga imoral nga buhat kag indi naton ini pagkunsintihon.  May isa pa ka problema ang mga kongregasyon sa Pergamo kag sa Tiatira. Ginsabdong ni Jesus ang pila ka kauturan sa sini nga mga kongregasyon nga nagahimo sang imoralidad kag nagakunsinti sini. (Bug. 2:14, 20) Ano ang ginatudlo sini sa aton? Kon nakahimo kita sang imoralidad, indi ini pagkunsintihon ni Jehova, bisan pa madugay na kita nga nagaalagad sa iya kag may mga responsibilidad kita sa kongregasyon. (1 Sam. 15:22; 1 Ped. 2:16) Gusto niya nga sundon naton ang iya mga kasuguan bisan pa grabe na gid ka imoral sang mga tawo sa kalibutan.—Efe. 6:11-13.

11. Ano na ang natun-an naton? (Tan-awa man ang kahon nga “ Ano ang Natun-an Naton?”)

¹¹ Ano na ang natun-an naton? Dapat naton siguraduhon nga batunon ni Jehova ang aton pagsimba. Kon may ginahimo kita nga posible mangin rason nga indi pagbatunon ni Jehova ang aton pagsimba, dapat kita dayon maghimo sing pagbag-o. (Bug. 2:5, 16; 3:3, 16) Pero, may ginsiling pa si Jesus sa iya mga mensahe para sa mga kongregasyon. Ano ini?

12. Ano ang matun-an naton sa ginsiling ni Jesus sa iya mga mensahe sa mga kongregasyon sa Smirna kag sa Filadelfia? (Bugna 2:10)

¹² Binagbinagon naton subong ang ginsiling ni Jesus sa iya mga mensahe sa mga kongregasyon sa Smirna kag sa Filadelfia. Ginsilingan niya sila nga indi sila dapat mahadlok sa paghingabot kay sigurado nga padyaan ni Jehova ang ila katutom. (Basaha ang Bugna 2:10; 3:10) Ano ang ginatudlo sini sa aton? Dapat naton tandaan nga makaeksperiensia gid kita sang paghingabot, kag dapat handa kita nga batason ini. (Mat. 24:9, 13; 2 Cor. 12:10) Ngaa importante gid nga tandaan naton ini?

13-14. Ano ang natabo sa katawhan sang Dios bangod sang mga hitabo nga ginasugid sang Bugna kapitulo 12?

¹³ Ginasugid sa aton sang libro sang Bugna nga hingabuton ang katawhan sang Dios sa “adlaw sang Ginuo” nga amo ang aton tion subong. Mabasa sa kapitulo 12 sang Bugna nga pagkatapos nangin Hari si Jesus, may natabo nga inaway sa langit. Nakig-away si Miguel, nga amo si Jesucristo, kag ang iya mga anghel kay Satanas kag sa mga demonyo. (Bug. 12:7, 8) Napierde ang mga kaaway sang Dios kag gintagbong sila sa duta, kag sila ang rason sang grabe nga pag-antos sang mga tawo. (Bug. 12:9, 12) Pero ano ang natabo sa katawhan sang Dios?

¹⁴ Ginsugid dayon sang Bugna ang reaksion ni Satanas. Bangod indi na sia makabalik sa langit, ang mga hinaplas nga ari pa sa duta ang iya ginhingabot. Ini nga mga hinaplas amo ang mga representante sang Ginharian sang Dios kag “nagapanaksi [sila] tuhoy kay  Jesus.” (Bug. 12:17; 2 Cor. 5:20; Efe. 6:19, 20) Paano natuman ini nga tagna?

15. Sin-o ang ginarepresentar sang “duha ka saksi” nga ginsambit sa Bugna kapitulo 11, kag ano ang natabo sa ila?

¹⁵ Ginaimpluwensiahan ni Satanas ang mga kaaway sang Dios nga hingabuton ang mga hinaplas nga nagapanguna sa pagbantala sang Ginharian. Ini nga mga hinaplas amo ang ginarepresentar sang “duha ka saksi” nga ginpatay nga ginsambit sa Bugna. * (Bug. 11:3, 7-11) Sang 1918, ang walo ka brother nga nagapanguna sa organisasyon gin-akusahan sang sala nga wala nila nahimo, ginpamatbatan sila nga nakasala, kag ginsentensiahan sila nga prisuhon sa madamo nga tinuig. Para sa kalabanan nga tawo, daw pareho lang nga “napatay” ang hilikuton sini nga mga hinaplas.

16. Ano ang makatilingala nga natabo sang 1919, kag ano ang padayon nga ginahimo ni Satanas sugod sadto?

¹⁶ Ang tagna sa Bugna kapitulo 11 nagasiling man nga ang “duha ka saksi” pagabanhawon pagkatapos sang malip-ot nga tion. Makatilingala ang katumanan sini pagkasunod gid nga tuig. Sang Marso 1919, ginpagua sa prisuhan ining hinaplas nga mga brother. Sang ulihi, ginbasura ang ila mga kaso. Ginpangunahan dayon sini nga mga brother ang pagbantala kag pagtudlo sa iban parte sa Ginharian. Pero wala nag-untat si Satanas sa paghingabot sa katawhan sang Dios. Sugod sadto, ginpahanabo ni Satanas ang daw “suba” nga paghingabot sa tanan nga katawhan sang Dios. (Bug. 12:15) Gani, kinahanglan gid naton tanan ang “pagbatas kag pagtuo.”—Bug. 13:10.

17. Ano ang wala ginapaabot nga bulig nga nabaton sang katawhan sang Dios bisan pa ginahingabot sila ni Satanas?

¹⁷ Ginapahangop sang Bugna kapitulo 12 nga may magabulig sa katawhan sang Dios nga wala gid nila ginapaabot. Nagasiling ini nga gintulon sang “duta” ang “suba” sang paghingabot. (Bug. 12:16) Amo gid sini ang natabo. May mga tion nga ginbuligan ang katawhan sang Dios sang mas makatarunganon nga bahin sang kalibutan ni Satanas, pareho sang pila ka hudisyal nga sistema sini. Madamo nga beses nga nagdaug ang mga alagad ni Jehova sa mga kaso sa korte, gani hilway nila nga nahimo ang pila ka hilikuton sa pag-alagad. Paano nila gingamit ang ila kahilwayan? Maalamon nga gingamit nila ini sa paghimo sang hilikuton nga  ginsugo ni Jehova sa ila. (1 Cor. 16:9) Ano ang nalakip sa sini nga hilikuton?

18. Ano ang aton panguna nga hilikuton sa sining katapusan nga mga adlaw?

¹⁸ Gintagna ni Jesus nga ibantala sang iya katawhan ang “maayong balita sang Ginharian [sang Dios]” sa bug-os nga duta antes mag-abot ang katapusan. (Mat. 24:14) Kon nagabantala sila, ginabuligan sila sang anghel, ukon sang grupo sang mga anghel. Ini nga mga anghel ginalaragway nga ‘nagapahayag sing wala sing katapusan nga maayong balita sa mga nagaistar sa duta, kag sa tagsa ka pungsod kag tribo kag hambal kag katawhan.’—Bug. 14:6.

19. Ano ang isa pa ka mensahe nga dapat man ibantala sang mga nagapalangga kay Jehova?

¹⁹ Indi lang parte sa maayong balita sang Ginharian ang dapat ibantala sang katawhan sang Dios. Dapat man sila magbulig sa hilikuton sang mga anghel nga ginsambit sa Bugna kapitulo 8 asta 10. Ginpabalo sini nga mga anghel ang sunodsunod nga mga kalalat-an nga maeksperiensiahan sang mga nagasikway sa Ginharian sang Dios. Gani, ginabantala sang mga Saksi ni Jehova ang paghukom nga himuon sang Dios sa mga bahin sang malain nga kalibutan ni Satanas, kag ginpaanggid ini nga mensahe sa “yelo kag kalayo.” (Bug. 8:7, 13) Dapat mabal-an sang mga tawo nga malapit na ang katapusan para makahimo sila sang mga pagbag-o sa ila kabuhi kag para maluwas sila sa adlaw sang kaakig ni Jehova. (Sof. 2:2, 3) Pero indi gusto sang kalabanan nga tawo ini nga mensahe. Gani kinahanglan naton ang kaisog para mabantala naton ini. Sa tion sang dakung kapipit-an, mas masakit pamatian ang katapusan nga mensahe sang paghukom nga aton ibantala.—Bug. 16:21.

20. Ano ang binagbinagon naton sa masunod nga duha ka artikulo?

²⁰ Dapat gid naton tumanon ang “mga pulong sini nga tagna” bangod nalakip kita sa katumanan sang ginbasa naton sa libro sang Bugna. (Bug. 1:3) Pero paano naton mabatas sing matutom ang mga paghingabot para padayon kita nga mangin maisog sa pagbantala sini nga mga mensahe? Duha ka butang ang magapabakod sa aton: una, ang ginasugid sang libro sang Bugna parte sa mga kaaway sang Dios kag, ikaduha, ang mga pagpakamaayo nga mabaton naton sa palaabuton kon magapabilin kita nga matutom. Binagbinagon naton ini sa masunod nga duha ka artikulo.