1-2. Ano ang posible nga mahunahuna naton parte sa aton mga pangamuyo?

 MAY tion bala nga nahunahuna mo kon bala ginasabat gid man ni Jehova ang imo mga pangamuyo? Madamo nga kauturan ang nagsiling nga nahunahuna nila ini sang nakaeksperiensia sila sang mabudlay nga mga problema. Kon may ginabatas kita nga mga problema, posible nga nabudlayan man kita nga makita kon paano ginasabat ni Jehova ang aton mga pangamuyo.

² Binagbinagon naton kon ngaa makasalig kita nga ginasabat gid ni Jehova ang mga pangamuyo sang iya mga alagad. (1 Juan 5:15) Binagbinagon man naton ini nga mga pamangkot: Ngaa may mga tion nga pamatyag naton daw wala ginasabat ni Jehova ang aton mga pangamuyo? Paano ginasabat ni Jehova ang aton mga pangamuyo subong?

3. Ngaa gusto ni Jehova nga mangamuyo kita sa iya?

³ Ginapasalig kita sang Biblia nga palangga gid kita ni Jehova kag hamili kita sa iya. (Hag. 2:7; 1 Juan 4:10) Gani gusto niya nga mangamuyo kita sa iya para pangabayon ang iya bulig. (1 Ped. 5:6, 7) Gusto niya nga buligan kita nga magpabilin nga suod sa iya kag mabatas ang aton mga problema.

4. Ngaa masiling naton nga ginasabat gid ni Jehova ang mga pangamuyo sang iya mga alagad? (Tan-awa man ang piktyur.)

⁴ Madamo kita sang mabasa sa Biblia nga ginsabat ni Jehova ang mga pangamuyo sang iya mga alagad. Kay sin-o halimbawa ang madumduman mo parte sa sini? Ang isa ka halimbawa amo si Hari David. Indi bastabasta ang madamo sa iya nangin kaaway, gani pirme sia nagapangamuyo kay Jehova para pangabayon ang  iya bulig. Isa ka bes, nakitluoy sia kay Jehova: “O Jehova, pamatii ang akon pangamuyo; pamatii ang akon pagpangayo sing bulig. Sabta ako suno sa imo katutom kag pagkamatarong.” (Sal. 143:1) Ginsabat ni Jehova ang mga pangamuyo ni David paagi sa pagluwas sa iya. (1 Sam. 19:10, 18-20; 2 Sam. 5:17-25) Gani nakasiling si David: “Si Jehova malapit sa tanan nga nagapanawag sa iya.” Masiling man naton ini bangod matuod gid ini.—Sal. 145:18.

5. Ginsabat bala ni Jehova ang mga pangamuyo sang iya mga alagad sang una sa paagi nga gusto kuntani nila? Maghatag sing halimbawa. (Tan-awa man ang piktyur.)

⁵ Posible nga may mga tion nga lain sa ginapaabot naton ang sabat ni Jehova sa aton mga pangamuyo. Naeksperiensiahan ini ni apostol Pablo. Nangabay sia sa Dios nga kuhaon ang iya “tunok sa unod.” Tatlo ka beses nga ginpangamuyo ni Pablo ang parte sa sining mabudlay nga problema. Ginsabat bala ni Jehova ang iya mga pangamuyo? Huo, pero lain sa ginapaabot ni Pablo ang sabat ni Jehova. Wala ginkuha ni Jehova ang problema ni Pablo. Sa baylo, ginpabakod niya si Pablo para padayon sia nga makaalagad sa Iya sing matutom.—2 Cor. 12:7-10.

6. Ngaa may mga tion nga pamatyag naton daw wala ginasabat ni Jehova ang aton mga pangamuyo?

⁶ May mga tion man nga posible lain sa ginapaabot naton ang sabat ni Jehova. Pero makasalig kita nga kabalo gid si Jehova kon ano ang pinakamaayo nga paagi para buligan kita. “Makahimo [sia] sing sobra pa kabugana labaw sa aton ginapangayo ukon ginahunahuna.” (Efe. 3:20) Amo ini ang rason kon ngaa posible sabton niya ang aton mga pangamuyo sa tion ukon sa paagi nga wala naton ginapaabot.

7. Ngaa posible nga dapat naton bag-uhon ang aton ginapangamuyo? Maghatag sing halimbawa.

⁷ Kon mangin mas maathag sa aton kon ano ang gusto ni Jehova nga himuon naton, posible nga marealisar naton nga dapat naton bag-uhon ang aton ginapangamuyo. Binagbinaga ang halimbawa ni Martin Poetzinger. Wala madugay pagkatapos niya makapangasawa, ginpriso si Brother Poetzinger sa prisuhan sang mga Nazi. Sang primero, nangabay sia kay Jehova nga paguaon sia sa prisuhan para maatipan niya ang iya asawa kag para makabantala sia liwat. Pero pagligad sang duha ka semana, narealisar niya nga daw indi kabubut-on ni Jehova nga paguaon sia sa prisuhan. Gani nangamuyo sia: “Jehova, palihug buligi ako nga mabal-an kon ano ang gusto mo nga himuon ko.” Dayon ginhunahuna niya kon ano ang ginabatas sang iban pa nga mga kauturan sa prisuhan. Madamo sa ila ang nabalaka gid sa ila asawa kag kabataan. Dayon nangamuyo  si Brother Poetzinger: “Jehova, salamat gid sa akon bag-o nga asaynment. Palihug buligi ako nga pabakuron kag palig-unon ang akon mga kauturan.” Ginhimo gid ini ni Brother Poetzinger sa sulod sang siam ka tuig nga ara sia sa prisuhan.

8. Ano ang dapat naton dumdumon kon nagapangamuyo kita?

⁸ Dapat naton dumdumon nga may katuyuan si Jehova kag tumanon niya ini sa iya gintalana nga tion. Nalakip sa iya katuyuan ang pagdula sa tanan nga problema nga nagapaantos sa mga tawo, pareho sang mga kalamidad, balatian, kag kamatayon. Gani maabot ang tion nga indi na gid kita mag-antos liwat bangod sa sini nga mga problema. Tumanon ini ni Jehova paagi sa iya Ginharian. (Dan. 2:44; Bug. 21:3, 4) Pero samtang wala pa ini nga tion, ginatugutan ni Jehova si Satanas nga gamhan ang kalibutan. b (Juan 12:31; Bug. 12:9) Kon solbaron ni Jehova ang mga problema sang mga tawo subong, posible nga hunahunaon sang mga tawo nga maayo ang paagi sang paggahom ni Satanas. Bisan pa kinahanglan naton hulaton ang tion nga tumanon na ni Jehova ang iya mga promisa, wala niya kita ginapabay-an. Binagbinagon naton ang pila ka paagi kon paano kita ginabuligan ni Jehova.

9. Paano kita mabuligan ni Jehova kon may himuon kita nga desisyon? Maghatag sing halimbawa.

⁹ Ginahatagan niya kita sang kaalam. Nagapromisa si Jehova nga hatagan niya kita sang kaalam para makahimo kita sang maayo nga mga desisyon. Kinahanglan gid naton ang kaalam nga halin sa iya kon may himuon kita nga desisyon nga may epekto sa bilog naton nga kabuhi. (Sant. 1:5) Halimbawa, mangasawa bala kita ukon mamana ukon indi? Binagbinaga ang eksperiensia sang isa ka sister nga si Maria. c Malipayon sia nga nagaalagad bilang isa ka regular payunir sang may nakilala sia nga isa ka brother. Nagsiling sia: “Samtang nagasuod kami nga duha, nahulog man ang buot namon sa isa kag isa. Kabalo ako nga kinahanglan ko magdesisyon, gani madamo nga beses ko ini nga ginpangamuyo. Malawig kag hanuot gid ang akon mga pangamuyo parte sa sini. Kinahanglan ko ang giya ni Jehova, pero kabalo man ako nga indi si Jehova ang magadesisyon para sa akon.” Para kay Maria, ginsabat ni Jehova ang iya mga pangamuyo nga hatagan sia sang kaalam. Paano? Nag-research sia sa aton mga publikasyon kag nakakita sia sang mga artikulo nga nakabulig sa iya nga masabat ang iya mga pamangkot. Ginpamatian man niya ang maayo nga laygay sang iya matutom nga iloy. Nakabulig ini nga laygay para mausisa niya ang iya ginabatyag. Gani, nakahimo sia sang maayo nga desisyon.

10. Suno sa Filipos 4:13, ano ang himuon ni Jehova para buligan ang iya mga alagad? Maghatag sing halimbawa. (Tan-awa man ang piktyur.)

¹⁰ Ginapabakod niya kita para mabatas naton ang mga problema. Pareho sa ginhimo ni Jehova  para kay apostol Pablo, pabakuron man niya kita. (Basaha ang Filipos 4:13.) Binagbinaga kon paano ginbuligan ni Jehova ang isa ka brother nga si Benjamin para mabatas niya ang mabudlay nga mga sitwasyon. Sang pamatan-on sia, malawig sia nga nag-istar kag ang iya pamilya sa mga refugee camp sa Africa. Nagsiling si Benjamin: “Pirme ako nagapangamuyo kay Jehova nga buligan niya ako nga mangin mabakod para mahimo ko kon ano ang maayo sa iya panulok. Ginsabat ni Jehova ang akon mga pangamuyo paagi sa paghatag sa akon sang malinong nga hunahuna, sang kaisog para makapadayon ako sa pagbantala, kag sang mga publikasyon para makapabilin ako nga suod sa iya.” Nagsiling pa sia: “Sang ginbasa ko ang eksperiensia sang mga kauturan parte sa kon paano sila ginbuligan ni Jehova nga makabatas, napabakod ako sini nga padayon nga mangin matutom.”

11-12. Paano ginagamit ni Jehova ang aton mga kauturan para sabton ang aton mga pangamuyo? (Tan-awa man ang piktyur.)

¹¹ Ginagamit niya ang aton mga kauturan. Sang gab-i antes ginhatag ni Jesus ang iya kabuhi, hanuot sia nga nangamuyo kay Jehova. Nangabay sia nga kabay pa nga indi sia pagpakahuy-an kay basi hunahunaon sang iban nga ginpasipalahan niya ang iya Amay. Sa baylo nga himuon ang ginpangabay ni Jesus, ginbuligan ni Jehova si Jesus paagi sa pagpadala sang isa ka anghel para pabakuron sia. (Luc. 22:42, 43) Puede man kita buligan ni Jehova paagi sa aton mga kauturan. Posible nga tawgan nila kita ukon bisitahan para palig-unon kita. Puede kita tanan makapangita sang kahigayunan para mapalig-on naton ang aton mga kauturan paagi sa “maayo nga pulong.”—Hulu. 12:25.

¹² Binagbinaga ang eksperiensia sang isa ka sister nga si Miriam. Mga pila ka semana pagkatapos mapatay ang iya bana, nagaisahanon na lang si Miriam sa iya balay. Gani, nasubuan gid sia kag na-depress. Daw indi sia mag-untat sa iya paghibi kag gusto niya kuntani nga may maistorya sia. Nagsiling sia: “Daw wala ako sang kusog para tawgan ang akon mga kilala, gani nangamuyo ako kay Jehova. Samtang nagahibi ako kag nagapangamuyo, nag-ring ang akon telepono. Gintawgan ako sang isa ka gulang nga suod ko nga abyan.” Ginpaumpawan si Miriam sini nga gulang kag sang iya asawa. Kumbinsido si Miriam nga si Jehova ang nagpahanabo nga tawgan sia sang gulang.

13. Maghatag sing halimbawa nga nagapakita nga puede gamiton ni Jehova ang mga tawo nga wala nagasimba sa iya para sabton ang aton mga pangamuyo.

 ¹³ Posible nga gamiton niya ang mga tawo nga wala nagasimba sa iya. (Hulu. 21:1) May mga tion nga ginagamit sila ni Jehova para buligan ang iya katawhan bilang sabat sa ila mga pangamuyo. Halimbawa, ginpahanabo niya nga pasugtan ni Hari Artajerjes si Nehemias nga magbalik sa Jerusalem para magbulig sa pagkay-o sang siudad. (Neh. 2:3-6) Subong, kon kinahanglan naton ang bulig, puede man gamiton ni Jehova bisan ang mga tawo nga wala nagasimba sa iya para buligan kita.

14. Paano ka napalig-on sang eksperiensia ni Soo Hing? (Tan-awa man ang piktyur.)

¹⁴ Para sa isa ka sister nga si Soo Hing, ginbuligan sia ni Jehova paagi sa iya doktor. May sakit ang iya bata nga lalaki, kag parte ini sa mental health. Isa ka bes, naaksidente ang iya bata kag nahalitan gid sia. Gani, nag-resign sia kag ang iya bana sa ila obra para maatipan nila sia. Bangod sini, may mga tion nga kulang ang ila kuarta. Nagsiling si Soo Hing nga pamatyag niya daw pareho sia sa isa ka lastiko nga gin-inat kag daw mabugto na. Ginsugid niya kay Jehova ang tanan niya nga ginabatyag kag nagpangayo sia sang bulig sa iya. Wala madugay pagkatapos sini, nangita sang paagi ang ila doktor kon paano sila mabuligan. Bangod sini, nakabaton sila sang bulig halin sa gobierno kag nakakita sila sang ilistaran nga barato lang ang arkila. Nagsiling si Soo Hing: “Ginbuligan gid kami ni Jehova sa amon sitwasyon. Kumbinsido kami nga ‘ginapamatian gid niya ang aton mga pangamuyo.’”—Sal. 65:2.

15. Ano ang nakabulig sa isa ka sister para marealisar niya nga ginasabat ni Jehova ang iya mga pangamuyo?

¹⁵ Sa masami, indi tumalagsahon ang paagi sang aton Amay sa langit sa pagsabat sa aton mga pangamuyo. Pero ang iya mga sabat amo gid ang aton kinahanglan para makapabilin kita nga matutom sa iya. Gani mangin alisto kon paano ginasabat ni Jehova ang imo mga pangamuyo. Para sa isa ka sister nga si Yoko, daw wala ginasabat ni Jehova ang iya mga pangamuyo. Pero gintestingan niya nga isulat sa notebook ang iya mga ginapangabay kay Jehova. Sang ulihi, gintan-aw niya ang iya notebook kag narealisar niya nga ginsabat ni Jehova ang kalabanan sa iya mga pangamuyo. Nalipatan na gani niya ang pila sa iya mga ginpangabay, pero ginsabat ini ni Jehova. Gani regular kita nga magpain sang tion para hunahunaon sing maayo kon paano ginsabat ni Jehova ang aton mga pangamuyo.—Sal. 66:19, 20.

16. Kon parte sa pangamuyo, paano naton mapakita ang aton pagtuo? (Hebreo 11:6)

 ¹⁶ Mapakita naton ang aton pagtuo indi lang paagi sa pagpangamuyo kay Jehova, kundi paagi man sa pagbaton sang iya sabat. (Basaha ang Hebreo 11:6.) Binagbinaga ang halimbawa ni Mike kag sang iya asawa nga si Chrissy. Gusto gid nila nga mag-alagad sa Bethel. Nagsiling si Mike, “Madamo nga beses kami nga nag-aplay sa Bethel kag pirme namon ini ginpangamuyo kay Jehova, pero wala gid kami ginpatawag.” Pero nagasalig gid si Mike kag si Chrissy nga kabalo si Jehova kon ano ang pinakamaayo nga asaynment para sa ila. Padayon nila nga ginhimo ang ila bug-os nga masarangan bilang mga regular payunir sa kongregasyon nga nagakinahanglan sang bulig, kag nagaboluntaryo man sila sa mga konstruksion nga ginahimo sang organisasyon ni Jehova. Subong, nagaalagad sila sa sirkito. Nagsiling si Mike, “May mga tion nga lain sa ginapaabot namon ang sabat ni Jehova sa amon mga pangamuyo, pero mas maayo gid ang iya mga sabat sangsa ginapangabay namon.”

17-18. Suno sa Salmo 86:6, 7, sa ano kita makasalig?

¹⁷ Basaha ang Salmo 86:6, 7. Sigurado si salmista David nga ginapamatian kag ginasabat ni Jehova ang iya mga pangamuyo. Makasigurado ka man sa sini. Ang mga halimbawa nga ginbinagbinag sa sini nga artikulo nagapasalig sa aton nga hatagan kita ni Jehova sang kaalam kag pabakuron niya kita para mabatas naton ang aton mga problema. Puede niya gamiton ang aton mga kauturan kag bisan ang mga tawo nga wala nagasimba sa iya para buligan kita.

¹⁸ May mga tion nga lain sa aton ginapaabot ang sabat ni Jehova sa aton mga pangamuyo, pero sabton gid niya ini. Hatagan niya kita sang aton kinahanglanon sa tion nga kinahanglan gid naton ini. Gani padayon nga mangamuyo kay Jehova kag magsalig nga pamatian niya ini. Makasalig ka nga atipanon ka ni Jehova subong kag ‘ihatag niya ang handum sang tagsa ka buhi nga butang’ sa bag-ong kalibutan sa palaabuton.—Sal. 145:16.