1. Ano ang nabudlayan nga himuon sang madamo sa aton?

 NABUDLAYAN ka bala nga himuon ang imo espirituwal nga tulumuron? b Madamo nga kauturan ang nabudlayan man nga himuon ang ila goal ukon tulumuron. Halimbawa, gusto ni Philip nga pauswagon ang kalidad sang iya mga pangamuyo kag gusto niya nga mangamuyo sing mas madamo nga beses kada adlaw, pero nabudlayan sia nga makakita sang tion para sa sini. Gusto ni Erika nga mag-abot sing temprano sa miting para sa pag-alagad sa latagon, pero talagsa lang gid sia makatemprano abot. Gusto ni Tomáš nga basahon ang bilog nga Biblia, kag pila ka beses na niya nga gintinguhaan nga himuon ini. Pero nagsiling sia: “Daw wala ako nanamian magbasa sang Biblia. Tatlo ka beses ko na nga gusto basahon ang bilog nga Biblia, pero asta lang ako pirme sa Levitico.”

2. Ngaa indi kita dapat maluyahan sang buot kon wala gihapon naton mahimo ang aton espirituwal nga tulumuron?

² Kon wala mo gihapon mahimo ang imo tulumuron, indi ka dapat maluyahan sang buot. Bisan simple lang ang imo tulumuron, nagakinahanglan ini gihapon sang tion kag pagpanikasog. Bangod gusto mo gid nga mahimo ang imo tulumuron, ginapakita sini nga importante sa imo ang imo kaangtanan kay Jehova kag gusto mo nga ihatag sa iya ang imo pinakamaayo. Ginapabaloran gid ni Jehova ang imo mga pagpanikasog. Siempre, wala niya ginapaabot nga himuon mo ang indi mo masarangan. (Sal. 103:14; Miq. 6:8) Gani kon nagapili ka sang tulumuron, siguraduha nga masarangan mo ini. Kon nakapili ka na sang tulumuron, ano ang makabulig sa imo para mahimo mo ini? Binagbinagon naton ang pila ka panugda.

3. Ngaa importante nga mabaskog ang aton handum?

³ Importante nga mabaskog ang aton handum nga himuon ang aton espirituwal nga mga tulumuron. Kon gusto gid naton nga himuon ang aton tulumuron, panikasugan gid naton ini. Ang aton handum nga himuon ang aton tulumuron makumparar sa hangin nga nagahuyop sa de-layag nga baruto ukon bangka. Kon padayon ang paghuyop sang hangin, labanlaban nga makalab-ot gid ang nagasakay sa baruto sa iya kaladtuan. Kag kon mabaskog ang hangin, mas madasig pa gid sia nga makalab-ot sa iya gusto kadtuan. Kon mabaskog man ang aton handum nga himuon ang aton tulumuron, labanlaban nga mahimo gid naton ini. “Kon mabaskog ang imo handum nga himuon ang imo tulumuron, panikasugan mo gid ini,” siling sang isa ka brother nga si David nga taga-El Salvador. “Wala gid sing may makapugong sa imo nga himuon ini.” Ti, ano ang himuon mo para magbaskog ang imo handum?

4. Ano ang puede naton ipangamuyo? (Filipos 2:13) (Tan-awa man ang piktyur.)

⁴ Mangamuyo nga pabaskugon ang imo handum. Paagi sa espiritu ni Jehova, mapalig-on ka niya nga himuon ang imo tulumuron. (Basaha ang Filipos 2:13.) Kon kaisa, ginapili naton ang isa ka tulumuron bangod kabalo kita nga dapat naton ini himuon. Maayo man kon amo ini ang aton paagi sa pagpili sang tulumuron. Pero posible nga daw wala kita sang handum nga himuon ini. Naeksperiensiahan ini sang isa ka sister sa Uganda nga si Norina. Ginhimo niya nga tulumuron nga makakita sang Bible study. Pero daw wala sia sang handum nga himuon ini bangod pamatyag niya indi sia maayo magtudlo sang Biblia. Ano ang nakabulig sa iya? Nagsiling sia: “Adlaw-adlaw ako nga nagapangamuyo kay Jehova nga buligan niya ako nga pabaskugon ang akon handum nga mangita sang Bible study. Ginpanikasugan ko man nga pauswagon ang akon paagi sa pagtudlo sa iban. Pagligad sang pila ka bulan, natalupangdan ko nga nagbaskog ang akon handum nga mangita sang Bible study. Sadto mismo nga tuig, nakakita ako sang duha ka Bible study.”

5. Ano ang puede naton pamalandungan para magbaskog ang aton handum?

⁵ Pamalandungi ang mga ginhimo ni Jehova para sa imo. (Sal. 143:5) Ginpamalandungan ni apostol Pablo ang parte sa wala tupong nga kaayo ni Jehova sa iya, kag nagpabaskog ini sang iya handum nga himuon ang iya bug-os nga masarangan para kay Jehova. (1 Cor. 15:9, 10; 1 Tim. 1:12-14) Kon pamalandungan mo man ang mga ginhimo ni Jehova para sa imo, magabaskog man ang imo handum nga himuon ang imo tulumuron. (Sal. 116:12) Binagbinaga kon ano ang nakabulig sa isa ka sister sa Honduras para panikasugan ang iya tulumuron nga mangin regular payunir. Nagsiling sia: “Ginpamalandungan ko kon daw ano ako ka palangga ni Jehova. Halimbawa, ginbuligan niya ako nga mangin bahin sang iya katawhan. Kag ginaatipan niya ako kag ginaamligan. Sang ginpamalandungan ko ini, mas ginpalangga ko pa gid sia kag nagbaskog ang akon handum nga magpayunir.”

6. Ano pa ang makabulig sa aton para magbaskog ang aton handum?

⁶ Hunahunaa ang mga pagpakamaayo kon mahimo mo ang imo tulumuron. Talupangda kon ano ang nakabulig kay Erika, nga ginsambit kaina, para mahimo niya ang iya tulumuron nga mag-abot sing temprano. Nagsiling sia: “Narealisar ko nga madamo  nga pagpakamaayo ang wala ko nabaton bangod ulihi ako nga nagaabot para sa amon iskedyul sa pagbantala. Pero kon temprano ako maabot, may tion pa ako nga maistorya ang mga kauturan. Mabatian ko man ang mga panugda nga makabulig sa akon nga mag-uswag sa akon pagbantala kag mangin malipayon sa paghimo sini.” Ginhunahuna ni Erika ang mga pagpakamaayo kon mag-abot sia sing temprano, kag nahimo niya ang iya tulumuron. Ano nga mga pagpakamaayo ang puede mo hunahunaon? Kon parte sa pagbasa sang Biblia ukon parte sa pangamuyo ang imo tulumuron, hunahunaa kon paano ini makabulig para magbakod ang imo kaangtanan kay Jehova. (Sal. 145:18, 19) Kon tulumuron mo nga ipakita ang isa ka maayo nga kinaiya, hunahunaa kon paano ini makabulig para mangin maayo ang imo kaangtanan sa iban. (Col. 3:14) Tilawi nga ilista ang tanan nga rason kon ngaa gusto mo himuon ang imo tulumuron, kag tan-awa pirme ini nga listahan. Si Tomáš, nga ginsambit kaina, nagsiling: “Kon madamo ang rason para himuon ko ang akon tulumuron, mas ginapanikasugan ko pa gid ini.”

7. Ano ang nakabulig kay Julio kag sa iya asawa para mahimo nila ang ila tulumuron?

⁷ Mag-upod sa mga kauturan nga magapalig-on sa imo nga himuon ang imo tulumuron. (Hulu. 13:20) Talupangda kon ano ang nakabulig kay Julio kag sa iya asawa para mahimo nila ang ila tulumuron nga magsaylo sa kongregasyon nga diutay lang ang manugbantala. Nagsiling sia: “Ginpili namon nga mga abyan ang mga kauturan nga magapalig-on sa amon nga himuon ang amon tulumuron, kag ginaistorya namon ini sa ila. Pareho man sa amon ang tulumuron sang madamo sa ila, kag nasarangan nila nga himuon ini. Gani makahatag gid sila sang mga panugda nga makabulig sa amon. Ginapamangkot man kami sang amon mga abyan kon ano na ang amon mga nahimo, kag ginapalig-on nila kami.”

8. Ano ang posible nga resulta kon panikasugan lang naton ang aton tulumuron sa mga adlaw nga mabaskog ang aton handum? (Tan-awa man ang piktyur.)

⁸ May mga tion gid nga daw wala kita sang gana nga panikasugan ang aton tulumuron. Buot silingon bala sini nga wala na kita sang puede himuon? May ara pa. Binagbinaga ini nga ilustrasyon. Daku ang mabulig sang hangin nga nagahuyop sa de-layag nga baruto para makalab-ot ini sa iya kaladtuan. Pero nagabag-obag-o ang kabaskugon sang hangin, kag may mga adlaw nga posible wala gid sang hangin. Kon amo sini ang sitwasyon, wala na bala sang puede himuon ang nagasakay sa baruto para makapadayon sia sa iya paglakbay? May ara pa. Halimbawa, may makina kag may bugsay ang pila ka de-layag nga baruto. Puede ini gamiton sang nagasakay sa baruto para makapadayon sia sa iya paglakbay pakadto sa iya kaladtuan. Daw pareho sa hangin ang aton handum nga panikasugan ang aton tulumuron. May mga adlaw nga mabaskog ang aton handum, pero may mga adlaw man nga daw wala kita sang gana. Kon panikasugan lang naton ang aton tulumuron sa mga adlaw nga mabaskog ang aton handum, posible nga indi gid naton ini mahimo. Pero pareho sa nagasakay sa baruto nga nagapangita sang iban nga paagi para makalab-ot sia sa iya kaladtuan, dapat man naton panikasugan ang aton tulumuron bisan pa daw wala kita sang gana nga himuon ini. Indi ini mahapos kay kinahanglan naton puersahon ang aton kaugalingon. Pero malipay gid kita kon mahimo naton ang aton tulumuron. Antes naton binagbinagon  kon ano ang mga puede naton himuon, sabton anay naton ang isa ka pamangkot.

9. Sala bala kon padayon naton nga panikasugan ang aton tulumuron bisan pa daw wala kita nalipay sa sini? Ipaathag.

⁹ Gusto ni Jehova nga alagaron naton sia sing malipayon kag sing kinabubut-on. (Sal. 100:2; 2 Cor. 9:7) Ti, padayon bala naton nga panikasugan ang aton tulumuron bisan pa daw wala kita nalipay sa sini? Binagbinaga ang halimbawa ni apostol Pablo. Nagsiling sia: “Estrikto nga ginadisiplina ko ang akon lawas kag ginahimo ini nga ulipon.” (1 Cor. 9:25-27, footnote) Ginpuersa ni Pablo ang iya kaugalingon nga himuon ang husto bisan pa daw wala sia sang handum nga himuon ini. Nalipay bala si Jehova sa pag-alagad ni Pablo sa iya? Huo. Kag ginpadyaan sia ni Jehova bangod sa iya mga pagpanikasog.—2 Tim. 4:7, 8.

10. Ano ang mga benepisyo kon panikasugan naton ang aton tulumuron bisan pa daw wala kita sang gana nga himuon ini?

¹⁰ Nalipay man si Jehova kon ginapanikasugan naton ang aton tulumuron bisan pa daw wala kita sang gana nga himuon ini. Kabalo sia nga may mga tion nga daw wala kita nanamian sa aton ginahimo sa pag-alagad sa iya, pero nalipay sia kay ginahimo gihapon naton ini bangod palangga naton sia. Pakamaayuhon man ni Jehova ang aton mga pagpanikasog pareho sa ginhimo niya kay Pablo. (Sal. 126:5) Kag kon mabaton naton ang mga pagpakamaayo ni Jehova, posible gid nga magabaskog ang aton handum nga himuon ang aton tulumuron. Ang isa ka sister sa Poland nga si Lucyna nagsiling: “Kon kaisa, daw wala ako gana magbantala, ilabi na kon kapoy ako. Pero nagabantala gid ako. Pagkatapos ko bantala, nalipay gid ako. Para sa akon, regalo ini ni Jehova.” Binagbinagon naman naton kon ano ang mga puede naton himuon kon daw wala kita sang gana nga panikasugan ang aton tulumuron.

11. Paano kita mabuligan ni Jehova nga mapakita ang pagpugong sa kaugalingon?

¹¹ Mangamuyo sang pagpugong sa kaugalingon. Kon may pagpugong kita sa kaugalingon, makontrol naton ang aton ginabatyag kag ginahimo. Sa masami, ginapunggan naton ang aton kaugalingon para indi kita makahimo sang malain. Pero, kinahanglan man ang pagpugong sa kaugalingon para mahimo naton ang maayo, ilabi na kon mabudlay himuon ang isa ka hilikuton ukon daw wala kita gana nga himuon ini. Dumduma nga ang pagpugong sa kaugalingon isa sa mga kinaiya nga ginapatubas sang espiritu, gani pangabaya si Jehova nga buligan ka sang iya balaan nga espiritu nga mapakita ining importante nga kinaiya. (Luc. 11:13; Gal. 5:22, 23) Ginpaathag ni David, nga ginsambit kaina, kon paano sia nabuligan sang pangamuyo. Gusto niya nga mangin regular ang iya personal nga pagtuon. Nagsiling sia: “Nagapangamuyo ako kay Jehova nga buligan niya ako nga mapakita ang pagpugong sa kaugalingon. Paagi sa iya bulig, nasugdan ko ang epektibo nga personal nga pagtuon kag regular ko na ini nga ginahimo.”

12. Paano makabulig ang prinsipio sa Manugwali 11:4 para mahimo naton ang aton espirituwal nga mga tulumuron?

¹² Indi paghulata nga mangin maayo gid ang kahimtangan. Sa sini nga kalibutan, posible nga indi naton maeksperiensiahan ang gusto naton nga kahimtangan. Kon hulaton naton nga mangin maayo gid ang kahimtangan, posible nga indi gid naton mahimo ang aton tulumuron. (Basaha ang Manugwali 11:4.) Ang isa ka brother nga si Dayniel nagsiling: “Indi naton paghulaton ang gusto kuntani naton nga kahimtangan kay wala ini nagaabot. Gani kon may gusto kita nga himuon, mas maayo kon umpisahan naton ini dayon.” May ginsiling ang isa ka brother sa Uganda nga si Paul nga isa pa ka rason kon ngaa indi naton dapat pagpadugayan ang paghimo sa aton tulumuron. Nagsiling sia: “Kon umpisahan naton ang gusto naton nga himuon bisan pa mabudlay ang kahimtangan, pakamaayuhon kita ni Jehova.”—Mal. 3:10.

13. Ano ang mga bentaha kon amat-amaton lang naton ang paghimo sa aton mga tulumuron?

¹³ Amat-amata lang ang paghimo sa imo tulumuron. Kon daw mabudlay himuon ang aton tulumuron, posible nga daw wala kita sang gana nga panikasugan ini. Kon amo sini ang imo ginabatyag, basi puede mo amat-amaton lang ang paghimo sini. Halimbawa, kon tulumuron mo nga ipakita ang isa ka kinaiya, puede mo ini umpisahan nga ipakita sa simple lang nga mga paagi. Kon tulumuron mo nga  basahon ang bilog nga Biblia, puede nga lip-uton mo lang anay ang imo iskedyul sa pagbasa sini. Nabudlayan si Tomáš, nga ginsambit sa introduksion, nga himuon ang iya tulumuron nga basahon ang bilog nga Biblia sa sulod sang isa ka tuig. Nagsiling sia: “Narealisar ko nga dapat ko dasigon ang pagbasa sang Biblia para mahimo ko ang akon tulumuron, pero indi ko ini masarangan. Gani ginpanikasugan ko ini liwat. Pero sa sini nga tion, ginhimo ko nga tulumuron nga magbasa sang bahin lang sang isa ka kapitulo kada adlaw, kag dayon pamalandungan ko ini. Sang ginhimo ko ini, nanamian na ako magbasa sang Biblia.” Bangod nanamian na si Tomáš magbasa sang Biblia, amat-amat niya nga gindugangan ang iya tion sa pagbasa. Sang ulihi, natapos gid niya basa ang bilog nga Biblia. c

14. Ano nga mga hitabo ang posible magapabudlay sa aton nga mahimo ang aton tulumuron?

¹⁴ Bisan pa mabaskog ang aton handum nga himuon ang aton tulumuron ukon ginapanikasugan gid naton ini, posible nga may mga hitabo nga magapabudlay sa aton. Halimbawa, bangod sa “wala ginapaabot nga hitabo,” posible nga mabuhinan ang aton oras nga para kuntani sa aton tulumuron. (Man. 9:11) Posible nga makaeksperiensia kita sang mga problema nga magapaluya sang aton buot kag kusog. (Hulu. 24:10) Bangod indi kita perpekto, makahimo kita sang sala nga posible mangin rason nga mabudlayan kita sa paghimo sa aton tulumuron. (Roma 7:23) Ukon posible nga makabatyag kita sang kakapoy. (Mat. 26:43) Ano ang makabulig sa aton kon may mga hitabo nga nagpabudlay sa aton nga mahimo ang aton tulumuron?

15. Kon may mga hitabo nga nagapabudlay sa aton, ngaa indi kita dapat mag-untat sa paghimo sa aton tulumuron? (Salmo 145:14)

¹⁵ Dumduma nga kon may mga hitabo nga nagpabudlay sa imo, indi buot silingon sini nga untatan mo na ang paghimo sa imo tulumuron. Ang Biblia nagasiling nga makaeksperiensia kita sang mga problema sing madamo nga beses. Pero, nagasiling man ini nga masarangan naton ang aton mga problema kay buligan kita ni Jehova. (Basaha ang Salmo 145:14.) Ang isa ka brother nga si Philip, nga ginsambit kaina, nagsiling: “Madamo na nga beses nga indi ko mahimo  ang akon tulumuron, pero wala ako nagapokus sa sini. Sa baylo, nagapokus ako sa mga tion nga ginpanikasugan ko liwat ang akon tulumuron.” Si David, nga ginsambit kaina, nagsiling: “Kon may mga hitabo nga nagapabudlay sa akon, ginatinguhaan ko nga indi ini makapugong sa akon. Para sa akon, mga kahigayunan ini para mapakita ko kay Jehova kon daw ano ko sia ka palangga.” Kon padayon mo nga panikasugan ang imo tulumuron bisan pa may mga kabudlayan, ginapakita mo kay Jehova nga gusto mo nga malipay sia. Sigurado nga nalipay gid si Jehova sa imo kon padayon ka nga nagapanikasog.

16. Kon may mga hitabo nga nagpabudlay sa aton, ano ang posible nga matun-an naton sa sini?

¹⁶ Kon may mga hitabo nga nagpabudlay sa imo, hibalua kon ano ang matun-an mo sa sini. Hunahunaa ang mga rason kon ngaa natabo ini, kag pamangkuta ang imo kaugalingon, ‘Ano ang puede ko himuon para indi ini matabo liwat?’ (Hulu. 27:12) Pero kon kaisa, kon nabudlayan kita nga himuon ang aton tulumuron, ginapakita sini nga posible mabudlay gid man ini. Kon amo sini ang imo sitwasyon, usisaa ang imo tulumuron para mabal-an mo kon bala masarangan mo gihapon ini. d Kon wala mo mahimo ang imo tulumuron bangod mabudlay ini himuon, indi paghunahunaon ni Jehova nga maluya ka.—2 Cor. 8:12.

17. Ngaa dapat naton dumdumon kon ano na ang aton mga nahimo?

¹⁷ Dumduma kon ano na ang imo mga nahimo. Ang Biblia nagasiling nga “ang Dios matarong kag indi niya pagkalimtan ang [imo] binuhatan.” (Heb. 6:10) Gani indi mo man dapat pagkalimtan ang imo mga nahimo. Pamalandungi ang imo mga tulumuron nga nahimo mo na, pareho sang pagpabakod sang imo kaangtanan kay Jehova, pagsugid sa iban parte sa iya, kag pagpabawtismo. Kon nasarangan mo nga himuon ang imo espirituwal nga mga tulumuron sang una, masarangan mo man nga himuon ang imo tulumuron subong.—Fil. 3:16.

18. Ano ang dapat naton pirme pamalandungan samtang ginapanikasugan naton ang aton tulumuron? (Tan-awa man ang piktyur.)

¹⁸ Pareho sa nagasakay sa baruto nga malipayon nga nakalab-ot sa iya kaladtuan, masarangan mo man nga himuon ang imo tulumuron sa bulig ni Jehova. Pero dumduma nga bisan nagalakbay pa lang ang nagasakay sa baruto, nalipay na sia sa iya makita. Madamo nga tawo ang amo sini ang ginabatyag sa ila paglakbay. Sing kaanggid, tinguhai nga makita kon paano ka ginabuligan ni Jehova kay makabulig ini sa imo nga mangin malipayon samtang ginapanikasugan mo ang imo espirituwal nga tulumuron. (2 Cor. 4:7) Kon indi ka mag-untat sa pagpanikasog sa imo tulumuron, mas madamo nga pagpakamaayo ang mabaton mo.—Gal. 6:9.