1. Paano ginalaragway sang Biblia ang matuod nga gugma?

 “ANG dabdab [sang gugma] kaangay sang nagadabadaba nga kalayo, ang kalayo ni Jah. Ang masulog nga tubig indi makapalong sang gugma, wala sing suba nga makaanod sini.” b (Amb. 8:6, 7) Kanami gid sini nga paglaragway sa matuod nga gugma. Makapalig-on gid ini sa mga mag-asawa. Ngaa? Bangod ginapahangop sini nga masarangan ninyo nga ipakita ang matuod nga gugma sa isa kag isa.

2. Ano ang dapat himuon sang mag-asawa para indi madula ang ila gugma sa isa kag isa?

² Para mapakita sang mag-asawa ang matuod nga gugma sa isa kag isa sa bilog nila nga kabuhi, dapat nila ini panikasugan. Binagbinaga ang isa ka campfire ukon dabok. Para indi ini mapatay, dapat padayon ini nga gatungan sang kahoy. Kon indi ini paghimuon, mapatay gid ang kalayo. Amo man sini ang dapat himuon sang bana kag sang asawa sa ila gugma sa isa kag isa. Dapat padayon nila ini nga pabakuron para indi ini madula. Pero may mga tion nga pamatyag sang mag-asawa daw indi na nila palangga ang isa kag isa, ilabi na kon nagapamigado sila, may nagamasakit sa ila pamilya, ukon nabudlayan sila sa pagpadaku sang ila kabataan. Kon may asawa ka ukon bana, paano mo padayon nga mapadabdab “ang kalayo ni Jah” sa inyo pag-asawahay? Sa sini nga artikulo, binagbinagon naton ang tatlo ka paagi para mapabakod ninyo ang inyo gugma sa isa kag isa para mangin malipayon ang inyo pag-asawahay. c

3. Kon mabakod ang kaangtanan sang bana kag sang asawa kay Jehova, paano ini makabulig para indi madula ang ila gugma sa isa kag isa? (Manugwali 4:12) (Tan-awa man ang piktyur.)

³ Para padayon nga magdabdab “ang kalayo ni Jah,” dapat pabakuron sang bana kag sang asawa ang ila kaangtanan kay Jehova. Kon mabakod ang ila kaangtanan kay Jehova, paano ini makabulig sa ila pag-asawahay? Kon ginapabaloran sang mag-asawa ang ila kaangtanan sa ila Amay sa langit, iaplikar nila dayon ang iya mga laygay. Kon himuon nila ini, malikawan nila kag masarangan ang mga problema nga posible makadula sang ila gugma sa isa kag isa. (Basaha ang Manugwali 4:12.) Kon mabakod ang kaangtanan sang isa ka tawo kay Jehova, ginapanikasugan niya nga ilugon si Jehova. Ginatinguhaan man niya nga ipakita ang mga kinaiya ni Jehova, pareho sang kaayo, pagkamapinasensiahon, kag pagkamapinatawaron. (Efe. 4:32–5:1) Kon ipakita sang mag-asawa ini nga mga kinaiya, magabakod ang ila gugma sa isa kag isa. Ang isa ka sister nga si Lena, nga sobra 25 ka tuig na nga kasal, nagsiling: “Kon palangga sang isa ka tawo si Jehova, mahapos lang palanggaon kag respetuhon ini nga tawo.”

4. Ngaa si Jose kag si Maria ang ginpili ni Jehova nga mangin ginikanan sang Mesias?

⁴ Binagbinaga ini nga halimbawa sa Biblia. Sang nagpili si Jehova kon sin-o ang mangin ginikanan sang Mesias, madamo sia sang puede pilion sa kaliwatan ni David. Pero ginpili niya si Jose kag si Maria. Ngaa? Bangod mabakod ang ila kaangtanan kay Jehova, kag kabalo si Jehova nga unahon nila sia sa ila pag-asawahay. Mga mag-asawa, ano ang matun-an ninyo kay Jose kag kay Maria?

5. Ano ang matun-an sang mga bana kay Jose?

⁵ Ginatuman dayon ni Jose ang mga instruksion ni Jehova, gani maayo gid sia nga bana. Indi magnubo sa tatlo ka beses nga nakabaton sia sang instruksion halin sa Dios parte sa iya pamilya. Gintuman niya dayon ini nga mga instruksion bisan pa mabudlay ini para sa iya. (Mat. 1:20, 24; 2:13-15, 19-21) Bangod gintuman ni Jose ang mga instruksion sang Dios, naamligan ni Jose si Maria, naatipan niya sia, kag nahatag niya ang iya mga kinahanglanon. Bangod sang ginhimo ni Jose, sigurado nga mas ginpalangga pa gid sia kag ginrespeto ni Maria. Mga bana, paano ninyo mailog si Jose? Magpagiya kamo sa mga laygay nga nabase sa Biblia para maatipan ninyo sing maayo ang inyo pamilya. d Kon iaplikar ninyo ini nga mga laygay bisan pa kinahanglan ninyo maghimo sang mga pagbag-o, mapakita ninyo sa inyo asawa nga palangga ninyo sia kag magabakod ang inyo pag-asawahay. Ang isa ka sister sa Vanuatu nga sobra 20 ka tuig na nga kasal nagsiling: “Kon ginatun-an sang akon bana ang mga instruksion ni Jehova kag ginaaplikar niya ini, mas ginarespeto ko pa gid sia. Wala ako sing dapat kabalak-an kay may salig ako sa iya mga desisyon.”

6. Ano ang matun-an sang mga asawa kay Maria?

 ⁶ Mabakod ang kaangtanan ni Maria kay Jehova, kag sia mismo ang nagpabakod sang iya pagtuo. Nahangpan man niya sing maayo ang Kasulatan, kag nagapain sia sang tion para pamalandungan ang iya mga natun-an. e (Luc. 2:19, 51) Sigurado kita nga maayo gid sia nga asawa bangod mabakod ang iya kaangtanan kay Jehova. Subong, ginapanikasugan sang madamo nga asawa nga ilugon si Maria. Halimbawa, ang isa ka sister nga si Emiko nagsiling: “Sang dalaga pa ako, may ara ako kaugalingon nga iskedyul sa pag-alagad para mapabakod ko ang akon kaangtanan kay Jehova. Sang nakapamana ako, natalupangdan ko nga bangod ang akon bana amo ang nagapangamuyo para sa amon kag sia ang nagapanguna sa amon pagsimba kay Jehova, daw nagasalig na lang ako sa iya para mapabakod ko ang akon pagtuo. Narealisar ko nga ako mismo ang dapat magpabakod sang akon kaangtanan kay Jehova. Subong, nagapain gid ako sang tion para magpangamuyo sa akon Dios, magbasa sang Biblia, kag magpamalandong sa iya mga ginatudlo.” (Gal. 6:5) Mga asawa, kon padayon ninyo nga pabakuron ang inyo kaangtanan kay Jehova, mas dayawon pa gid kamo kag palanggaon sang inyo bana.—Hulu. 31:30.

7. Ano ang matun-an sang mag-asawa kay Jose kag kay Maria parte sa pagsimba kay Jehova nga magkaupod?

⁷ Nagbuligay man si Jose kag si Maria para mapabakod nila ang ila kaangtanan kay Jehova. Kabalo sila nga importante gid nga simbahon nila si Jehova bilang pamilya. (Luc. 2:22-24, 41; 4:16) Posible nga mabudlay ini himuon ilabi na sang madamo na sila sang kabataan. Pero nasarangan nila ini nga himuon. Maayo gid sila nga halimbawa para sa mga mag-asawa subong. Kon may kabataan kamo, pareho kay Jose kag kay Maria, posible nga mabudlay ang pag-attend sa mga miting ukon ang pag-iskedyul sang family worship. Posible nga mas mabudlay pa gid makakita sang tion para makaupdanay kamo nga mag-asawa sa pagtuon ukon sa pagpangamuyo. Pero, dumduma nga kon updanay kamo nga nagasimba kay Jehova, mas magasuod kamo sa iya kag sa isa kag isa. Gani unaha ninyo ang pagsimba kay Jehova.

8. Kon may problema ang inyo pag-asawahay, ano ang puede ninyo himuon para makabenepisyo kamo gihapon sa inyo family worship?

⁸ Pero kon may problema ang inyo pag-asawahay, posible nga daw wala kamo sang gana nga mag-updanay para mag-family worship. Ano ang puede ninyo himuon? Sa umpisa, magpili kamo sang topiko nga pareho ninyo nga nanamian kag binagbinaga ninyo ini sing malip-ot lang. Kon himuon ninyo ini, mas palanggaon pa gid ninyo ang isa kag isa kag mapalig-on kamo nga simbahon si Jehova nga magkaupod.

9. Ngaa dapat magpain sang tion ang bana kag asawa para makaupdanay sila nga duha?

⁹ Mga mag-asawa, mapabakod man ninyo ang inyo gugma sa isa kag isa kon magpain kamo sang tion para makaupdanay kamo nga duha. Kon himuon ninyo ini, mabal-an ninyo ang ginahunahuna kag ginabatyag sang kada isa. (Gen. 2:24) Binagbinaga si Lilia kag si Ruslan nga sobra 15 ka tuig na nga kasal. May narealisar sila wala madugay pagkatapos nila magpakasal. Nagsiling si Lilia: “Abi namon madugangan ang amon tion para sa isa kag isa, pero indi gali. Masako kami sa amon obra kag sa mga ulubrahon sa balay. Sang ulihi sang may kabataan na kami, nangin mas masako pa gid kami. Narealisar namon nga kon indi kami magpain sang tion para makaupdanay kami nga duha, posible nga madula ang amon gugma sa isa kag isa.”

10. Paano maaplikar sang mga mag-asawa ang prinsipio sa Efeso 5:15, 16?

¹⁰ Ano ang puede himuon sang mag-asawa para may tion gid sila nga makaupdanay? Puede kamo mag-iskedyul sang tion para sa isa kag isa. (Basaha  ang Efeso 5:15, 16.) Ang isa ka brother sa Nigeria nga si Uzondu nagsiling: “Kon nagahimo ako sang iskedyul para sa mga dapat ko himuon, ginalakip ko ang tion nga makaupdanay kami sang akon asawa, kag ginahatagan ko sang prioridad ina nga tion.” (Fil. 1:10) Binagbinaga kon ano ang ginahimo ni Anastasia, nga asawa sang manugtatap sang sirkito sa Moldova, para magamit niya sing maayo ang iya tion. Nagsiling sia: “Ginahimo ko ang mga dapat ko himuon sa tion nga masako ang akon bana sa iya mga responsibilidad. Paagi sa sini, makakita gid kami sang tion para makaupdanay kami nga duha.” Pero ano abi kon daw indi magtabuay ang inyo iskedyul nga duha?

11. Ano nga mga hilikuton ang ginhimo ni Aquila kag ni Priscila nga magkaupod?

¹¹ May matun-an ang mga mag-asawa sa halimbawa sang isa ka mag-asawa nga palangga sang madamo nga kauturan sang unang siglo. Sila amo sanday Aquila kag Priscila. (Roma 16:3, 4) Diutay lang ang ginasiling sang Biblia parte sa ila pag-asawahay, pero mabasa naton sa sini nga updanay sila nga nag-obra, nagbantala, kag nagbulig sa iban. (Binu. 18:2, 3, 24-26) Kon ginasambit sa Biblia si Aquila kag si Priscila, magkaupod gid pirme nga ginasambit ang ila ngalan.

12. Ano ang puede himuon sang bana kag asawa para mas madamo sila sang tion nga makaupdanay nga duha? (Tan-awa man ang piktyur.)

¹² Paano mailog sang mga mag-asawa sanday Aquila kag Priscila? Hunahunaa ang mga hilikuton nga dapat ninyo himuon. Basi puede ninyo himuon nga magkaupod ang pila sa sini. Halimbawa, magkaupod nga nagbantala sanday Aquila kag Priscila. May regular bala kamo nga iskedyul nga magbantala nga magkaupod? Magkaupod man nga nag-obra sanday Aquila kag Priscila. Posible nga indi pareho ang inyo obra nga mag-asawa, pero puede ninyo himuon ang mga ulubrahon sa inyo balay nga magkaupod. (Man. 4:9) Kon magbuligay kamo para himuon ang isa ka hilikuton, mabatyagan ninyo nga ginasuportahan ninyo ang isa kag isa kag may kahigayunan kamo nga makaistorya. Binagbinaga si Robert kag si Linda nga sobra 50 ka tuig na nga kasal. Nagsiling si Robert: “Sa tuod lang, diutay lang ang amon tion para maglingawlingaw nga magkaupod. Pero kon nagapanghugas ako sang pinggan, ginatrapuhan ini sang akon asawa. Kag kon nagapanghilamon ako sa amon hardin, ginabuligan niya ako. Sa sini nga mga tion, nalipay gid ako. Bangod magkaupod namon nga ginahimo ang pila ka hilikuton, nagsuod pa gid kami nga duha. Mas ginpalangga pa gid namon ang isa kag isa.”

13. Para magsuod gid ang bana kag asawa, ano ang dapat nila himuon?

¹³ Pero tandai ninyo nga bisan pa nagaupdanay ang bana kag asawa, indi buot silingon sini nga magasuod sila dayon nga duha. Ang isa ka asawa nga taga-Brazil nagsiling: “Grabe gid kasako sang aton kabuhi subong. Bangod sini, posible mahunahuna naton nga indi na kita dapat magpain sang tion para sa aton bana ukon asawa kay kaupod man naton sila sa isa ka balay. Pero indi gali ini bastante. Narealisar ko nga may dapat pa gali  himuon. Dapat ko gali siguraduhon nga ginahatagan ko gid sang atension ang akon bana.” Talupangda kon ano ang ginahimo ni Bruno kag sang iya asawa nga si Tays para mahatagan nila sang atension ang isa kag isa. Nagsiling si Bruno: “Kon tawhay kami nga duha, wala kami nagagamit sang cell phone para ma-enjoy namon ang tion nga magkaupod kami.”

14. Kon daw wala nanamian nga mag-updanay ang mag-asawa, ano ang puede nila himuon?

¹⁴ Pero ano abi kon daw wala kamo nanamian nga mag-updanay? Basi indi pareho ang inyo mga gusto nga himuon, ukon basi nairitar kamo sa isa kag isa. Ano ang puede ninyo himuon? Binagbinaga ang ilustrasyon parte sa dabok nga ginsambit kaina. Sa umpisa, gamay pa lang ang kalayo sini. Para magdabadaba ini, dapat ini amat-amat nga gatungan sang daku nga mga binial sang kahoy. Sing kaanggid, puede kamo magpain sang tion bisan malip-ot lang para makaupdanay kamo kada adlaw. Himua ninyo ang hilikuton nga pareho ninyo nga nanamian, indi ang hilikuton nga posible awayan ninyo. (Sant. 3:18) Dayon amat-amat nga dugangi ang inyo tion sa isa kag isa. Kon himuon ninyo ini, posible nga magabakod liwat ang inyo gugma.

15. Para magbakod ang gugma sang bana kag asawa, ngaa importante gid nga respetuhon nila ang isa kag isa?

¹⁵ Importante gid nga ginarespeto sang bana kag asawa ang isa kag isa. Ang respeto daw pareho sa oxygen nga nagapadabadaba sa dabok. Kon wala sang oxygen, madasig lang nga mapatay ang kalayo. Gani kon wala ginarespeto sang bana kag asawa ang isa kag isa, madasig lang nga madula ang ila gugma. Pero kon panikasugan nila nga respetuhon ang isa kag isa, magabakod ini. Pero tandai ini: Ang importante indi kon bala pamatyag mo ginarespeto mo ang imo asawa ukon bana, kundi kon bala nabatyagan sang imo asawa ukon bana nga ginarespeto mo gid sia. Binagbinaga si Penny kag si Aret nga sobra 25 ka tuig na nga kasal. Nagsiling si Penny: “Bangod ginarespeto namon ang isa kag isa, kamag-an sang amon pamatyag kon ara kami sa amon balay. Wala kami natahap nga isugid ang amon ginahunahuna bangod ginapabaloran namon ang opinyon sang kada isa.” Gani, ano ang puede mo himuon para mabatyagan sang imo asawa ukon bana nga ginarespeto mo gid sia? Binagbinagon naton ang halimbawa ni Abraham kag ni Sara.

16. Ano ang matun-an sang mga bana sa halimbawa ni Abraham? (1 Pedro 3:7) (Tan-awa man ang piktyur.)

¹⁶ Ginrespeto ni Abraham si Sara. Ginpamatian niya ang opinyon ni Sara kag wala niya ginbalewala ang iya nabatyagan. Isa ka bes, naakig gid si Sara. Ginsugid niya kay Abraham ang iya nabatyagan, kag ginbasol pa gani niya si Abraham. Naakig bala si Abraham sa iya? Wala. Kabalo sia nga nagapasakop si Sara sa iya kag ginasuportahan niya ang iya mga desisyon. Gani ginpamatian sia ni Abraham kag gintinguhaan niya nga solbaron ang problema. (Gen. 16:5, 6) Ano ang matun-an naton sa sini? Mga bana, may awtoridad kamo nga maghimo sang desisyon para sa inyo pamilya. (1 Cor. 11:3) Pero mapakita mo nga palangga  mo ang imo asawa kon pamatian mo anay ang iya opinyon antes ka magdesisyon, ilabi na kon may epekto sa iya ang himuon mo nga desisyon. (1 Cor. 13:4, 5) May mga tion nga posible na-stress ang imo asawa kag gusto niya isugid sa imo ang iya nabatyagan. Ginapabatyag mo bala sa iya nga ginarespeto mo sia paagi sa pagpamati sa iya sing maayo? (Basaha ang 1 Pedro 3:7.) Binagbinaga si Angela kag si Dmitry nga halos 30 ka tuig na nga kasal. Ginpaathag ni Angela kon paano ginapabatyag sang iya bana nga ginarespeto niya sia. Nagsiling sia: “May mga tion nga akig ako kag may mga tion man nga gusto ko lang nga may kaistorya. Sa sini nga mga tion, handa gid pirme si Dmitry sa pagpamati sa akon. Mapinasensiahon gid sia nga nagapamati bisan pa indi kalmado kon kaisa ang akon paghambal.”

17. Ano ang matun-an sang mga asawa sa halimbawa ni Sara? (1 Pedro 3:5, 6)

¹⁷ Ginrespeto ni Sara si Abraham paagi sa pagsuporta sa iya mga desisyon. (Gen. 12:5) Isa ka bes, gusto ni Abraham nga abiabihon ang mga bisita nga wala nila ginpaabot. Gani ginsilingan niya si Sara nga untatan anay ang iya ginahimo para maghimo sang madamo nga tinapay. (Gen. 18:6) Gintuman dayon ni Sara si Abraham kag ginsuportahan niya ang iya desisyon. Mga asawa, mailog ninyo si Sara paagi sa pagsuporta sa mga desisyon sang inyo bana. Kon himuon ninyo ini, ginapabakod ninyo ang inyo pag-asawahay. (Basaha ang 1 Pedro 3:5, 6.) Ginpaathag ni Dmitry, nga ginsambit sa nagligad nga parapo, kon paano ginapabatyag sang iya asawa nga ginarespeto niya sia. Nagsiling sia: “Kanami gid kay Angela kay ginasuportahan niya ang akon mga desisyon bisan pa indi pareho kon kaisa ang amon mga opinyon. Kon daw indi maayo ang resulta sang akon desisyon, wala niya ako ginabasol.” Kon ginarespeto ka sang isa ka tawo, sigurado nga palanggaon mo gid sia.

18. Ano ang benepisyo kon panikasugan sang mag-asawa nga pabakuron ang ila gugma sa isa kag isa?

¹⁸ Subong, ginatinguhaan ni Satanas nga dulaon ang gugma sang mga mag-asawa sa isa kag isa. Kabalo sia nga kon wala na sila nagapalanggaanay, posible nga amat-amat sila nga magpalayo kay Jehova. Pero, indi gid madula ang matuod nga gugma. Gani kabay pa nga mangin pareho sa gugma nga ginlaragway sa Ambahanon ni Solomon ang gugma ninyo nga mag-asawa. Unaha si Jehova sa inyo pag-asawahay, magpain sang tion para makaupdanay kamo nga mag-asawa, kag respetuha ninyo ang isa kag isa. Kon himuon ninyo ini, madayaw sang inyo pag-asawahay si Jehova nga amo ang ginhalinan sang matuod nga gugma. Kag pareho sa kalayo nga padayon nga ginabutangan sang gatong, magadabdab ang inyo gugma sa isa kag isa sa bilog ninyo nga kabuhi.