1, 2. (a) Ano ang pinakaimportante sa aton kabuhi? (b) Ano nga mga kamatuoran ang ginapabaloran naton, kag ngaa? (Tan-awa ang mga piktyur sa umpisa sini nga artikulo.)

ANO ang pinakaimportante sa imo kabuhi? Bilang katawhan ni Jehova, ang aton kaangtanan sa iya amo ang pinakaimportante sa aton kabuhi, kag wala gid kita sing ibaylo sa sini. Ginapabaloran man naton ang kamatuoran sa Biblia, kay paagi sini nangin suod kita sa aton Amay sa langit.—Col. 1:9, 10.

² Hunahunaa ang tanan nga gintudlo sang aton Daku nga Instruktor paagi sa iya Pulong, ang Biblia! Gintudlo niya sa aton kon ano ka importante ang iya ngalan kag ginsugid ang iya dalayawon nga mga kinaiya. Ginsugid niya nga palangga niya kita amo nga ginhatag niya ang iya Anak nga si Jesus bilang gawad. Gintudlo man sa aton ni Jehova ang parte sa Mesianiko nga Ginharian, kag ginhatagan niya sing paglaum nga mabuhi sa langit ang mga hinaplas kag paglaum nga mabuhi sa Paraiso sa duta ang “iban nga mga karnero.” (Juan 10:16) Gintudluan niya kita kon paano dapat magkabuhi. Ginapabaloran naton ini nga mga kamatuoran bangod nagabulig ini sa aton nga mangin suod sa aton Manunuga kag nagahatag ini sing katuyuan sa aton kabuhi.

3. Ginapabayaran bala ni Jehova ang kamatuoran?

 ³ Si Jehova maalwan nga Dios. Kon gusto sang isa nga mabal-an ang kamatuoran, ginabuligan sia sang Dios para mabal-an ini. Ginhatag pa gani ni Jehova ang kabuhi sang iya pinalangga nga Anak bilang regalo. Wala gid ginapabayaran sang Dios ang kamatuoran. Sang nagtanyag si Simon sing kuarta kay apostol Pedro para may gahom man sia nga maghatag sing balaan nga espiritu sa iban, nagsiling si Pedro sa iya: “Kabay pa nga madula ka kag ang imo kuarta, bangod ginhunahuna mo nga mabakal mo ang wala sing bayad nga dulot sang Dios.” (Binu. 8:18-20) Kon amo, ano ang buot silingon sang sugo nga “bakla ang kamatuoran”?

4. Sa sini nga artikulo, ano ang tun-an naton parte sa kamatuoran?

⁴ Basaha ang Hulubaton 23:23. Dapat kita magpanikasog para mabal-an naton ang kamatuoran sa Pulong sang Dios. Dapat handa kita magsakripisyo para sa sini. Suno sa manunulat sang Hulubaton, kon ‘nabakal’ na naton ang “kamatuoran,” ukon natigayon na naton ini, dapat gid kita maghalong para indi naton ini ‘mabaligya,’ ukon madula. Binagbinagon naton kon ano ang buot silingon sang ‘pagbakal’ sang kamatuoran kag kon ano ang aton ibayad para sa sini. Makabulig ini para mapabaloran pa gid naton ang kamatuoran kag mangin determinado kita nga indi gid ini “pag-ibaligya.” Mahangpan man naton kon ngaa husto gid ang pagpanikasog para mabakal ang kamatuoran.

5, 6. (a) Paano naton baklon ang kamatuoran nga wala nagabayad sing kuarta? Maghatag sing halimbawa. (b) Ano ang maayo nga resulta kon tun-an naton kag sundon ang kamatuoran?

⁵ Bisan pa libre ang isa ka butang, indi buot silingon nga wala na kita sing himuon para mangin aton ini. Sa Hulubaton 23:23, ang Hebreo nga tinaga nga gin-translate “bakla” nagakahulugan man sing “tigayuna.” Ini nga mga tinaga nagapahangop nga dapat magpanikasog ang isa ukon dapat may ibaylo sia para sa isa ka importante nga butang. Maggamit kita sing halimbawa para mahangpan naton kon paano baklon ang kamatuoran. Ibutang ta nga may karatula nga “Libre nga mga Saging” sa merkado. Puede bala nga magtuhaw lang sa aton lamesa ang mga saging? Indi. Dapat kita magkadto sa merkado para kuhaon ang mga saging. Libre bala ang mga saging? Huo, pero dapat kita magpanikasog kag maghatag sing tion sa pagkadto sa merkado. Gani indi naton kinahanglan ang kuarta para mabakal ang kamatuoran. Pero dapat kita magpanikasog para matigayon ini.

⁶ Basaha ang Isaias 55:1-3. Makabulig sa aton ang ginsiling ni Jehova nga ginsulat ni Isaias para mahangpan ang buot silingon sang pagbakal sang kamatuoran. Sa sini nga teksto, ginpaanggid ni Jehova ang iya pulong sa tubig, gatas, kag alak. Makaparepresko gid ang kamatuoran sa pulong sang Dios, pareho sang mabugnaw kag matinlo nga tubig. Ginapabakod man kita sang pulong ni Jehova kag nagabulig ini sa aton nga magtubo sa espirituwal, pareho sang gatas nga nagabulig para magbakod kag magtubo ang bata. Pareho man sa alak ang pulong ni Jehova. Ngaa? Nagsiling ang Biblia nga ang alak makapasadya sa mga tawo. (Sal. 104:15) Gani paagi sa pagsiling sa aton nga ‘magbakal sing alak,’ ginapasalig kita ni Jehova nga mangin malipayon kita kon sundon naton ang iya pulong. (Sal. 19:8) Paagi sa sini nga pagpaanggid, nahangpan naton nga maayo ang resulta kon tun-an naton kag sundon ang kamatuoran. Ang aton pagpanikasog amo ang aton ginabayad para baklon ang kamatuoran. Binagbinagon naman naton ang lima nga mahimo naton isakripisyo para matigayon ang kamatuoran.

7, 8. (a) Ngaa dapat kita maghatag sing tion para baklon ang kamatuoran? (b) Ano ang ginsakripisyo sang isa ka estudyante, kag ano ang resulta?

⁷ Tion. Amo ini ang ginabayad sang tanan nga nagabakal sang kamatuoran. Dapat kita maghatag sing tion sa pagpamati sa mensahe sang Ginharian, pagbasa sang Biblia kag sang mga publikasyon nga base sa Biblia, pagtuon sang Biblia, paghanda para sa mga miting, kag pagtambong sa sini. Dapat naton ‘baklon’ ang tion, ukon gamiton ang tion nga para kuntani sa indi tanto ka importante nga mga hilikuton. (Basaha ang Efeso 5:15, 16 kag footnote.) Daw ano kalawig nga tion ang gamiton naton para matun-an ang panguna nga mga kamatuoran sa Biblia? Depende ini sa aton kahimtangan. Wala sing katapusan ang pagtuon parte sa kaalam, pamaagi, kag mga binuhatan ni Jehova. (Roma 11:33) Ginpaanggid sang pinakauna nga isyu sang Watch Tower ang kamatuoran sa “isa ka gamay nga bulak” kag nagsiling ini: “Indi makontento sa isa lang ka bulak sang kamatuoran. Kon bastante na ang isa lang ka bulak sang kamatuoran, wala kuntani ini gindugangan sang Dios sang madamo pa. Magpadayon sa pagtipon, magpadayon sa pagpangita.” Pamangkuton naton ang aton kaugalingon, ‘Daw ano na kadamo ang akon natun-an nga kamatuoran?’ Bisan pa mabuhi kita sing wala sing katapusan, may matun-an kita gihapon parte kay Jehova. Pero dapat naton gamiton sing maalamon ang aton tion subong, kag himuon ang aton bug-os nga masarangan para madamo kita sing matun-an nga kamatuoran. Binagbinaga ang halimbawa sang isa nga naghimo sini.

⁸ Nagsaylo sa New York City, U.S.A., ang pamatan-on nga Haponesa nga si Mariko * para mag-eskwela didto. Miembro sia sang isa ka relihion nga ginsugdan sa Japan sang 1959. Isa ka adlaw, napanaksihan sang isa ka payunir si Mariko sa iya balay. Nalipay gid sia sa iya natun-an nga kamatuoran sa Biblia amo nga ginpangabay niya ang payunir nga tudluan sia sang Biblia duha ka beses kada semana. Bisan pa masako sia sa eskwelahan kag may part-time nga trabaho, nagtambong sia sa mga miting sang kongregasyon. Diutay na lang nga tion ang gingamit niya sa paglingawlingaw para madugangan ang iya tion sa pagtuon sang kamatuoran. Bangod sang iya pagsakripisyo, madasig ang iya pag-uswag. Wala pa isa ka tuig, nagpabawtismo na sia. Pagligad sang anom ka bulan, sang 2006, nagpayunir sia, kag payunir sia gihapon subong.

9, 10. (a) Sang matun-an naton ang kamatuoran, paano sini ginbag-o ang aton pagtamod sa materyal nga mga butang? (b) Ano ang ginsakripisyo sang isa ka pamatan-on nga babayi, kag ano ang iya ginsiling?

⁹ Materyal nga mga butang. Para baklon ang kamatuoran, basi dapat naton isakripisyo ang daku sing sueldo nga trabaho ukon propesyon. Halimbawa, sang gin-agda ni Jesus ang mga mangingisda nga sanday Pedro kag Andres nga mangin “mga mangingisda sang mga tawo,” “ginbayaan nila ang mga pukot.” (Mat. 4:18-20) Indi buot silingon sini nga bayaan sang mga nagatuon sang kamatuoran ang ila trabaho. Suno sa Kasulatan, dapat magtrabaho ang isa kag atipanon ang iya pamilya. (1 Tim. 5:8) Pero kon matun-an sang isa ang kamatuoran, masami nga nagabag-o ang iya pagtamod sa materyal nga mga butang kag kon ano ang pinakaimportante. Nagsiling si Jesus: “Untati ninyo ang pagtipon sing mga bahandi para sa inyo kaugalingon diri sa duta . . . Sa baylo, magtipon kamo sing mga bahandi para sa inyo kaugalingon didto sa langit.” (Mat. 6:19, 20) Binagbinaga ang halimbawa sang isa ka pamatan-on nga babayi.

¹⁰ Bata pa si Maria, mahilig na sia maghampang sing golf. Sang maghayskul na sia, nagsagad na gid sia sa sini amo nga nangin iskolar sia sa isa ka unibersidad. Ang golf amo  ang pinakaimportante sa iya, kag handum niya nga mangin propesyonal sa sini nga hampang kag mangin manggaranon. Sang ulihi, nagtuon si Maria sang Biblia, kag ginpabaloran niya ang mga kamatuoran nga iya natun-an. Bangod sini, naghimo sia sing pagbag-o sa iya kabuhi. Nagsiling sia: “Sang ginbag-o ko ang akon panimuot kag pagkabuhi suno sa mga talaksan sang Biblia, nangin mas malipayon ako.” Narealisar ni Maria nga indi niya puede dunganon ang pagtinguha sa espirituwal kag materyal nga mga manggad. (Mat. 6:24) Gani ginsakripisyo niya ang iya handum nga mangin propesyonal sa golf, mangin manggaranon, kag mangin bantog. Subong, nagapayunir sia kag para sa iya amo ini “ang pinakamalipayon nga kabuhi.”

11. Sang matun-an naton ang kamatuoran, ano ang mahimo nga natabo sa aton kaangtanan sa iban?

¹¹ Kaangtanan sa iban. Sang ginsunod naton ang kamatuoran sa Biblia, mahimo nga nagbag-o ang aton kaangtanan sa aton mga abyan kag pamilya. Ngaa? Nangamuyo si Jesus parte sa iya mga sumulunod: “Pakabalaana sila paagi sa kamatuoran; ang imo pulong kamatuoran.” (Juan 17:17; footnote) Ang ginsiling niya nga “pakabalaana sila” nagakahulugan man sing “paina sila.” Sang ginbaton naton ang kamatuoran, napain kita sa kalibutan kay wala na kita nagapaimpluwensia sa sini. Lain na ang pagtamod sa aton sang mga tawo bangod ginasunod na naton ang mga talaksan sang Biblia. Bisan pa ginatinguhaan naton nga mangin maayo ang aton kaangtanan sa aton mga abyan kag pamilya, ang iban sa ila mahimo indi na magsapak sa aton ukon magpamatok pa gani sa aton ginapatihan. Mapaabot naton ini bangod si Jesus mismo nagsiling: “Sa pagkamatuod, ang kaaway sang tawo amo mismo ang mga katapo sang iya panimalay.” (Mat. 10:36) Pero nagpromisa man sia nga bisan pa daku ang isakripisyo naton para sa kamatuoran, mas madamo pa ang mabaton naton nga pagpakamaayo.—Basaha ang Marcos 10:28-30.

12. Ano ang ginsakripisyo sang isa ka Judiyo para sa kamatuoran?

¹² Ang Judiyo nga negosyante nga si Aaron gintudluan nga indi dapat ihambal ang ngalan sang Dios halin sang bata pa sia. Pero gusto ni Aaron mabal-an ang kamatuoran. Nalipay sia sang ginpaathag sa iya sang isa ka Saksi nga kon butangan sing mga vowel ang apat ka Hebreo nga consonant sa ngalan sang Dios, puede ini basahon nga “Jehovah.” Dalidali sia nga nagkadto sa sinagoga para isugid sa mga rabbi ang iya bag-o nga natun-an. Abi niya malipay man sila nga mabal-an ang kamatuoran parte sa ngalan sang Dios, pero indi gali. Ginduplaan nila sia kag gintabog. Wala man nalipay ang iya pamilya. Pero nagpadayon sia sa pagtuon sang kamatuoran kag nangin maisog nga Saksi ni Jehova sa bug-os niya nga kabuhi. Pareho kay Aaron, handa man naton nga isakripisyo ang aton kaangtanan sa iban ukon sa aton pamilya para matun-an ang kamatuoran.

13, 14. Paano nagbag-o ang aton panghunahuna kag paggawi sang matun-an naton ang kamatuoran? Maghatag sing halimbawa.

¹³ Indi diosnon nga panghunahuna kag paggawi. Para mabaton naton ang kamatuoran kag masunod ang mga talaksan sa Biblia, dapat handa kita sa pagbag-o sang aton panghunahuna kag paggawi. Nagsulat si Pedro parte sa sini: “Subong matinumanon nga mga anak, untati na ninyo ang pagpadihon sa mga kailigbon nga yara anay sa inyo sang wala pa kamo sing nahibaluan, sa baylo mangin balaan kamo sa tanan ninyo nga paggawi.” (1 Ped. 1:14, 15) Lapnag ang imoral nga paggawi sa siudad sang Corinto sang una, gani dapat gid bag-uhon sang mga tawo didto ang ila pagkabuhi kon matun-an nila ang kamatuoran. (1 Cor. 6:9-11) Subong, madamo man ang nagbiya sa indi diosnon nga paggawi sang matun-an nila ang kamatuoran. Ginpahanumdom man ni Pedro ang mga Cristiano sang panahon niya: “Tuman na ang panahon  nga ginhimo ninyo ang kabubut-on sang mga pungsod sang nagahimo kamo sang matampalason nga mga paggawi, indi mapunggan nga mga kailigbon, sobra nga pag-inom, magansal nga kinalipay, paindisanay sa pag-inom, kag makangilil-ad nga pagsimba sa mga diosdios.”—1 Ped. 4:3.

¹⁴ Tinuig na nga nangin palahubog sanday Devynn kag Jasmine. Bisan pa maayo nga bookkeeper si Devynn, pirme lang sia nagakadulaan sang obra bangod sang iya pagpahubog. Kilala si Jasmine nga maakigon kag bayolente. Isa ka adlaw, samtang hubog si Jasmine nga nagalakat sa dalan, nasugilanon sia sang duha ka Saksi nga mga misyonero. Nagsiling ang mga misyonero nga mabalik sila para tudluan sia sang Biblia sa iya balay. Pero pag-abot nila sang madason nga semana, hubog sanday Jasmine kag Devynn. Wala sila maghunahuna nga nabalaka sa ila ang mga misyonero kag kadtuan gid sila sa ila balay. Nagbag-o ang sitwasyon sang nagbalik liwat ang mga misyonero. Gusto na magtuon nanday Jasmine kag Devynn kag ginsunod nila dayon ang ila mga natun-an sa Biblia. Wala pa tatlo ka bulan, gin-untatan na nila ang pagpahubog kag nagpakasal sila sang ulihi. Madamo sa ila baryo ang nakakita sang ila mga pagbag-o, kag gusto man nila nga magtuon sang Biblia.

15. Ano mahimo ang isa sa pinakamabudlay naton nga isakripisyo para sa kamatuoran, kag ngaa?

¹⁵ Mga kinabatasan kag tradisyon nga indi suno sa Kasulatan. Mahimo nga ang isa sa pinakamabudlay naton nga isakripisyo para sa kamatuoran amo ang pag-untat sa pagsunod sa mga kinabatasan kag tradisyon nga indi suno sa Kasulatan. Mahimo nga mahapos lang sa iban nga mahangpan ang mga rason sa Kasulatan nga dapat ini untatan, pero nabudlayan ang iban sa sini bangod nabalaka sila sa isiling sang ila pamilya, kaupod sa trabaho, kag mga abyan. Ginapakabahandi sang mga tawo ini nga mga kinabatasan, ilabi na ang may labot sa pagpadungog sa napatay nga mga paryente. (Deut. 14:1) Makabulig sa aton ang halimbawa sang iban nga nangin maisog sa paghimo sing pagbag-o. Binagbinaga ang ginhimo sang mga Cristiano sa Efeso sang unang siglo.

16. Ano ang ginsakripisyo sang pila ka taga-Efeso para sa kamatuoran?

¹⁶ Bantog anay sa Efeso ang paghimo sing madyik. Ano ang ginsakripisyo sang mga nagahimo anay sing madyik sang nangin Cristiano sila? Ang Biblia nagsiling: “Gintipon man sang madamo nga nagahimo sing madyik ang ila mga libro kag ginsunog nila ini sa atubangan sang tanan. Sa pag-isip nila, nagabili ini tanan sing 50,000 ka bilog nga pilak. Gani padayon nga naglapnag kag nagmadinalag-on ang pulong ni Jehova sa gamhanan nga paagi.” (Binu. 19:19, 20) Daku gid nga balor ang ginsakripisyo sang matutom nga mga Cristiano kag ginpakamaayo gid sila bangod sini.

17. (a) Ano ang pila sa ginsakripisyo naton para sa kamatuoran? (b) Ano nga mga pamangkot ang binagbinagon naton sa masunod nga artikulo?

¹⁷ Ano ang ginsakripisyo mo para sa kamatuoran? Naghatag kita tanan sing tion para matun-an ini. Ang pila sa aton nagsakripisyo sang materyal nga mga butang kag sang aton kaangtanan sa iban. Madamo ang nagbag-o sang ila panghunahuna kag paggawi kag nag-untat sa pagsunod sa mga kinabatasan kag tradisyon nga indi suno sa Kasulatan. Kumbinsido kita nga mas labaw gid ang kamatuoran sa Biblia sangsa bisan ano nga aton ginsakripisyo. Paagi sa kamatuoran, may suod kita nga kaangtanan kay Jehova, kag amo ini ang pinakaimportante sa aton kabuhi. Kon hunahunaon naton ang mga pagpakamaayo nga aton nabaton bangod nabal-an naton ang kamatuoran, daw indi naton maintiendihan kon ngaa gusto ini ibaligya sang iban. Ngaa puede ini matabo, kag ano ang aton himuon para indi naton mahimo ini nga sala? Binagbinagon naton ini nga mga pamangkot sa masunod nga artikulo.