MAKAPALIG-ON gid kon may magpakita sa aton sing maayo nga kabubut-on. Kon mabatyagan naton nga may nabalaka sa aton, nagapasalamat gid kita. Gusto naton tanan nga pakitaan kita sing maayo nga kabubut-on. Pero paano naton mapakita ining dalayawon nga kinaiya?

Ang tawo nga may maayo nga kabubut-on nabalaka gid sa kaayuhan sang iban kag ginapakita niya ini paagi sa iya ginahambal kag ginahimo. Indi pakitakita ang iya maayo nga pamatasan. Mainayuhon sia sa ila bangod palangga niya sila kag nahangpan niya ang ila ginabatyag. Labaw pa sa sini, ang maayo nga kabubut-on isa sa mga kinaiya nga ginapatubas sang balaan nga espiritu sang Dios. (Gal. 5:22, 23) Gusto ni Jehova nga ipakita naton ini nga kinaiya, gani binagbinagon naton kon paano ini ginpakita ni Jehova kag sang iya Anak kag kon paano naton masunod ang ila halimbawa.

Mainayuhon si Jehova sa tanan, bisan sa “mga indi mapinasalamaton kag mga malauton.” (Luc. 6:35) Halimbawa, “ginapabutlak niya ang iya adlaw sa mga malauton kag sa mga maayo. Ginahatagan niya sing ulan ang mga matarong kag mga indi matarong.” (Mat. 5:45) Gani bisan ang mga wala nagakilala kay Jehova nga ila Manunuga makabenepisyo man sa iya mga ginaaman para sa kabuhi kag mahimo man malipay.

Ginpakita ni Jehova sing tumalagsahon ang maayo nga kabubut-on kanday Adan kag Eva. Sa tapos sila magpakasala, “gintambitambi nila ang mga dahon sang higuera kag ginhimo ini nga ila mga tampi.” Pero kabalo si Jehova nga kinahanglan nila ang mas nagakaigo nga bayo sa gua sang Eden kay ang duta ginpakamalaut na kag magatubo sa sini ang “tunukon nga mga tanom kag mga hilamon.” Gani mainayuhon si Jehova nga naghimo sing “malaba nga mga bayo nga panit” para sa ila.—Gen. 3:7, 17, 18, 21.

Bisan pa mainayuhon si Jehova “sa mga malauton kag sa mga maayo,” mas gusto niya nga pakitaan sing maayo nga kabubut-on ang iya matutom nga mga alagad. Halimbawa, sang panahon ni manalagna Zacarias, nasubuan gid ang isa ka anghel kay nag-untat ang mga tawo sa pagpatindog sang templo sa Jerusalem. Ginpamatian ni Jehova ang ginakabalak-an sang anghel kag ginsabat sia sa “maayo kag makapalipay nga mga pulong.” (Zac. 1:12, 13) Ginhimo man ini ni Jehova kay manalagna Elias. Sang nasubuan gid si Elias, nangabay sia kay Jehova nga mapatay na lang sia. Nahangpan ni Jehova ang iya ginbatyag kag nagpadala sia sang anghel para pabakuron si Elias. Ginpasalig man sia sang Dios nga wala sia nagaisahanon. Napalig-on si Elias sa sining mainayuhon nga hambal kag sa bulig nga iya nabaton, gani nakapadayon sia sa iya asaynment. (1 Hari 19:1-18) Sa tanan nga alagad sang Dios, sin-o ang panguna nga nag-ilog kay Jehova sa pagpakita sing maayo nga kabubut-on?

Sang nag-alagad si Jesus diri sa duta, kilala gid sia nga mainayuhon. Indi sia mapintas kag dominante. Nagsiling sia: “Kari sa akon, kamo tanan nga ginabudlayan kag ginabug-atan, kag papahuwayon ko kamo. . . . Kay ang akon gota mahapos pas-anon.” (Mat. 11:28-30) Bangod mainayuhon si Jesus, nagsunod sa iya ang mga tawo bisan diin sia magkadto. Bangod “naluoy sia” sa ila, ginpakaon niya sila, gin-ayo niya ang mga masakiton, kag gintudluan niya sila sing “madamo nga butang” parte sa iya Amay.—Mar. 6:34; Mat. 14:14; 15:32-38.

Mainayuhon gid si Jesus kay ginahangop niya ang kahimtangan sang iban. Bisan pa sa tion nga gusto niya magpahuway, gin-abiabi niya “sing maayo” ang tanan nga sinsero nga nagapangita sa iya. (Luc. 9:10, 11) Wala niya gin-akigan ang babayi nga nagtandog sa iya bayo bisan pa indi matinlo ang babayi bangod ginatagasan sia sing dugo. Nagalaum ang babayi nga mapaayo sia ni Jesus. (Lev. 15:25-28) Naluoy si Jesus bangod 12 ka tuig na nga nagaantos ini nga babayi, gani nagsiling sia: “Anak, ang imo pagtuo nag-ayo sa imo. Lakat ka nga may paghidait. Nag-ayo ka na sa imo balatian.” (Mar. 5:25-34) Dalayawon gid ini nga pagpakita sing maayo nga kabubut-on!

Sa ginbinagbinag naton nga mga halimbawa, natun-an naton nga ang maayo nga kabubut-on mapakita sa buhat. Ginpaathag ini ni Jesus sa iya ilustrasyon parte sa mabinuligon nga Samaritano. Indi maayo ang pagtamdanay sang mga Samaritano kag mga Judiyo. Pero sa sini nga ilustrasyon, naluoy ang Samaritano sa Judiyo nga ginkawatan, ginbakol, kag ginbayaan nga halos patay na sa dalan. Bangod may maayo nga kabubut-on ang Samaritano, ginbulong niya ang mga pilas sang tawo kag gindala sia sa isa ka dalayunan. Ginbayaran sang Samaritano ang tag-iya sang dalayunan para atipanon ang napilasan nga tawo kag nagsiling nga bayaran man niya ang dugang pa nga gasto.—Luc. 10:29-37.

Mapakita man naton ang maayo nga kabubut-on paagi sa paghambal sing makapalig-on kag may konsiderasyon. Ang Biblia nagasiling nga “ang kabalaka sa tagipusuon sang tawo nagapabug-at sini,” pero “ang maayo nga pulong nagapasadya sa iya.” (Hulu. 12:25) Kon may maayo kita nga kabubut-on kag kaayo, mapalig-on naton ang mga naluyahan sing buot paagi sa pagsugid sang makapabakod sa ila. * Kon maghambal kita sing mainayuhon sa ila, mabatyagan nila nga nabalaka kita sa ila. Bangod napalig-on naton sila, madali na nila mabatas ang ila mga problema.—Hulu. 16:24.

Bangod gintuga ang tawo “suno sa larawan sang Dios,” may ikasarang ang tanan nga ipakita ang maayo nga kabubut-on. (Gen. 1:27) Halimbawa, sang gindala nga priso si apostol Pablo sa Roma, ginbantayan sia sang kumander sang mga soldado sang Roma nga si Julio. Pero “ginpakitaan [niya] sing kaayo si Pablo.” Sa siudad sang Sidon, “gintugutan niya si Pablo nga magkadto sa iya mga abyan agod matatap nila sia.” (Binu. 27:3) Sang nalunod ang barko nga ginsakyan ni Pablo kag sang mga kaupod niya, nagpakita ang mga taga-Malta sing “tumalagsahon nga kaayo” sa ila kag nagdabok pa gani sing kalayo para makapainit-init sila. (Binu. 28:1, 2) Dalayawon gid ang ila ginhimo. Pero kon may maayo kita nga kabubut-on, dapat ipakita naton ini sa tanan nga tion.

Para mahamuot ang Dios sa aton, dapat mangin batasan naton ang pagpakita sing maayo nga kabubut-on. Pero mabudlay ini himuon kon kaisa. Ngaa? Basi nahuya kita, wala kita sing pagsalig sa kaugalingon, ginapamatukan kita, ukon mas gusto naton unahon ang aton kaugalingon. Pero makabulig sa  aton ang pagsalig sa balaan nga espiritu kag pag-ilog kay Jehova.—1 Cor. 2:12.

May iban pa bala nga paagi nga mapakita naton ang maayo nga kabubut-on? Pamangkuton naton ang aton kaugalingon: ‘May simpatiya bala ako nga nagapamati sa iban? Handa bala ako magbulig sa ila? San-o ako nakapakita sing maayo nga kabubut-on sa indi ko pamilya ukon suod nga abyan?’ Dayon, tinguhaan naton nga makilala pa gid ang iban, ilabi na ang mga kauturan sa kongregasyon. Kon himuon naton ini, mabal-an naton ang ila kahimtangan kag mga kinahanglanon. Dayon, panikasugan naton nga ipakita ang maayo nga kabubut-on sa ila pareho sa gusto naton nga ipakita nila sa aton. (Mat. 7:12) Buligan gid kita ni Jehova nga ipakita ini nga kinaiya kon mangamuyo kita sa iya.—Luc. 11:13.

Nagpakita gid si apostol Pablo sing maayo nga kabubut-on sa iban. Halimbawa, “gin-abiabi niya ang tanan nga nagduaw sa iya.” (Binu. 28:30, 31) Napalig-on ang mga tawo nga makig-upod kay Pablo bangod nabalaka sia sa ila, kag ginpakita niya ini paagi sa mainayuhon nga buhat kag hambal. Mapalig-on man naton ang mga tawo nga tun-an ang kamatuoran kon magpakita kita sing maayo nga kabubut-on sa ila. Kon himuon naton ini sa tanan, bisan sa mga nagapamatok sa aton, mahimo maghaganhagan ang ila kaakig kag mangin malulo sila sa aton. (Roma 12:20) Sa ulihi, basi batunon pa nila ang mensahe sang Biblia.

Sa palaabuton nga Paraiso sa duta, malipay gid ang madamo nga pagabanhawon sa ipakita sa ila nga maayo nga kabubut-on, nga mahimo wala pa nila maeksperiensiahan anay. Magapasalamat gid sila kag mapalig-on nga ipakita man ini sa iban. Ang matuod, ang tanan nga wala nagapakita sing maayo nga kabubut-on kag wala nagabulig sa iban indi pagtugutan nga makabaton sang mga pagpakamaayo sang Ginharian sang Dios. Ang mga nagapakita sing gugma kag maayo nga kabubut-on amo lamang ang mabuhi sing wala sing katapusan sa Paraiso. (Sal. 37:9-11) Mangin isa gid ini ka kalibutan nga may kalipay kag paghidait! Pero subong pa lang, paano kita makabenepisyo sa pagpakita sing maayo nga kabubut-on?

“Ang mabuot nga tawo nagadala sing kaayuhan sa iya kaugalingon,” siling sang Biblia. (Hulu. 11:17) Nanamian ang mga tawo sa isa nga mabuot kag mainayuhon, kag gusto man nila nga mangin mainayuhon sa iya. Nagsiling si Jesus: “Kon ano nga talaksan ang ginagamit ninyo sa iban, amo man nga talaksan ang gamiton nila sa inyo.” (Luc. 6:38) Gani madali makakita sing maayo nga mga abyan ang mga mainayuhon.

Ginpalig-on ni apostol Pablo ang mga kauturan sa kongregasyon sa Efeso nga ‘mangin mainayuhon sa isa kag isa, mangin maluluy-on, nga nagapatawad sing kinabubut-on sa isa kag isa.’ (Efe. 4:32) Daku gid ang benepisyo kon ang tanan sa kongregasyon may simpatiya, may maayo nga kabubut-on, kag nagabuligay. Indi sila masakit maghambal, wala sila nagapakalain sa iban, ukon nagapang-insulto. Wala sila nagapalapta sang kutsokutso nga makahalit sa iban, kundi ginatinguhaan nila nga makabulig paagi sa ila ginahambal. (Hulu. 12:18) Bilang resulta, mangin mabakod ang kongregasyon kag malipay sa pag-alagad kay Jehova.

Gani, mapakita naton ang maayo nga kabubut-on sa hambal kag sa buhat. Kon mainayuhon kita, ginailog naton ang aton mapinalanggaon kag maalwan nga Dios, si Jehova. (Efe. 5:1) Paagi sa sini, nagabakod ang aton mga kongregasyon kag mapalig-on ang iban nga magsimba man kay Jehova. Kabay pa nga makilala gid kita nga nagapakita sing maayo nga kabubut-on!