1-3. (a) Paano naton dapat tamdon ang kamatuoran sa Biblia? Ipaathag. (Tan-awa ang mga piktyur sa umpisa sini nga artikulo.) (b) Ano nga mga pamangkot ang binagbinagon naton sa sini nga artikulo?

SUBONG, kinaandan na nga ginabalik sang mga tawo ang ila ginabakal. Sa pila ka pungsod, ginabanta nga ginabalik ang halos 9 porsiento sang mga ginbakal sa balaligyaan kag sobra 30 porsiento sang mga ginbakal paagi sa Internet. Mahimo nga nakita sang mga tawo nga ang ila nabakal lain sa ila ginapaabot, may diperensia ini, ukon wala sila nanamian sa sini. Gani ginapabayluhan nila ini ukon ginabawi nila ang ila ginbayad.

² Pero indi gid naton gusto ibalik, ukon ‘ibaligya’ ang “sibu nga ihibalo” parte sa kamatuoran sa Biblia nga aton ‘ginbakal.’ (Basaha ang Hulubaton 23:23; 1 Tim. 2:4) Sa nagligad nga artikulo, ginbinagbinag naton ang mga ginsakripisyo naton para sa kamatuoran. Naghatag kita sing tion para matun-an ini. Mahimo nga ginsakripisyo naton ang isa ka propesyon ukon ang aton kaangtanan sa iban. Mahimo man nga ginbag-o naton ang aton panghunahuna kag paggawi, ukon wala na naton ginsunod ang mga kinabatasan kag tradisyon nga indi suno sa Kasulatan. Pero gamay  lang ang ginsakripisyo naton kon ipaanggid sa mga pagpakamaayo nga nabaton naton.

³ Nagsugid si Jesus sang isa ka ilustrasyon para ilaragway kon daw ano ka importante ang kamatuoran parte sa Ginharian sang Dios para sa mga gusto makabalo sini. Parte ini sa nagalakbay nga negosyante nga nagapangita sang maayo nga mga perlas. Sang makita sini nga tawo ang isa ka malahalon nga perlas, ‘ginbaligya niya gilayon’ ang tanan niya nga pagkabutang para baklon ini. (Mat. 13:45, 46) Ginapabaloran man naton ang kamatuoran parte sa Ginharian sang Dios kag ang iban pa nga hamili nga kamatuoran nga natun-an naton sa Pulong sang Dios amo nga handa kita sa pagsakripisyo gilayon. Kon padayon naton nga ginapabaloran ang kamatuoran, ‘indi gid naton ini pag-ibaligya.’ Pero makapasubo nga wala na ginpabaloran sang iban sa katawhan sang Dios ang kamatuoran kag ginbaligya pa nila ini. Kabay pa nga indi gid naton ini paghimuon! Para mapabaloran naton ang kamatuoran kag indi gid ini mabaligya, dapat naton sundon ang ginlaygay sang Biblia nga ‘padayon nga maglakat sa kamatuoran.’ (Basaha ang 3 Juan 2-4.) Nagakahulugan ini nga ginauna naton ang kamatuoran sa aton kabuhi kag nagagawi kita suno sa sini. Binagbinagon naton ini nga mga pamangkot: Ngaa kag paano mahimo ‘ibaligya’ sang iban ang kamatuoran? Ano ang himuon naton para indi naton mahimo ini nga sala? Paano kita mangin determinado pa gid nga ‘padayon nga maglakat sa kamatuoran’?

4. Sang unang siglo, ngaa ‘ginbaligya’ sang iban ang kamatuoran?

⁴ Sang unang siglo, ang iban sa mga una nga nagbaton sa mga gintudlo ni Jesus wala nagpadayon sa paglakat sa kamatuoran. Halimbawa, sang ginpakaon ni Jesus ang madamo nga tawo paagi sa milagro, nagsunod sila sa iya sa tabok sang Dagat sang Galilea. Pero nakibot sila sa ginsiling ni Jesus: “Kon indi kamo magkaon sang unod sang Anak sang tawo kag mag-inom sang iya dugo, indi kamo makatigayon sang kabuhi.” Sa baylo nga pangabayon si Jesus nga ipaathag ini, nasandad sila sa iya kag nagsiling: “Mabudlay batunon ang iya ginsiling; sin-o ang makahimo sina?” Gani, “madamo sa iya mga disipulo ang nagbalik sa mga butang nga ila ginbiyaan kag wala na magsunod sa iya.”—Juan 6:53-66.

5, 6. (a) Subong, ngaa ang iban wala nagpabilin sa kamatuoran? (b) Paano mahimo nga amat-amat nga magpalayo ang isa sa kamatuoran?

⁵ Subong, makapasubo nga ang iban wala nagpabilin sa kamatuoran. Mahimo nga nasandad sila bangod ginbag-o ang aton paghangop sa isa ka teksto sa Biblia ukon bangod sa ginsiling ukon ginhimo sang isa ka kilala nga utod. Mahimo nga naglain ang buot sang iban bangod ginlaygayan sila paagi sa Kasulatan ukon bangod wala sila maghangpanay sang isa ka utod sa kongregasyon. Ang iban naman nagpati sa mga apostata kag sa iban pa nga nagapamatok sa kamatuoran. Gani, hungod nga ‘nagpalayo’ ang iban kay Jehova kag sa kongregasyon. (Heb. 3:12-14) Mas maayo kuntani kon gin-ilog nila si apostol Pedro nga may mabakod nga pagtuo kag pagsalig kay Jesus! Sang ginpamangkot ni Jesus ang mga apostoles kon gusto man nila magbiya sa iya, nagsabat dayon si Pedro: “Ginuo, kay sin-o kami makadto? Ikaw ang may pinamulong sang kabuhi nga wala sing katapusan.”—Juan 6:67-69.

⁶ Ang iban amat-amat nga nagpalayo sa kamatuoran, kag mahimo nga wala nila ini matalupangdan. Pareho sila sa isa ka baruto nga inanay nga ginaanod palayo sa pangpang sang suba. Nagapaandam ang Biblia  nga dapat kita maghalong para indi kita “maanod palayo.” (Heb. 2:1) Masami nga indi hungod sang isa nga maanod palayo sa kamatuoran. Pero ginpabay-an niya nga magluya ang iya kaangtanan kay Jehova, kag mahimo nga madula gid niya ini sa ulihi. Ano ang himuon naton para indi ini matabo sa aton?

7. Ano ang dapat naton himuon para indi naton mabaligya ang kamatuoran?

⁷ Para padayon kita nga maglakat sa kamatuoran, dapat naton batunon kag tumanon ang tanan nga ginasiling ni Jehova. Dapat naton unahon ang kamatuoran sa aton kabuhi kag sundon ang mga prinsipio sa Biblia sa tanan naton nga ginahimo. Nangamuyo si Hari David kay Jehova: “Magalakat ako suno sa imo kamatuoran.” (Sal. 86:11) Determinado si David nga himuon ini. Dapat determinado man kita nga padayon nga maglakat sa kamatuoran sang Dios. Kay kon indi, basi pamensaron naton ang ginbayad naton para sa kamatuoran kag masulay kita nga bawion ang pila sini. Dapat gid naton pabaloran ang bug-os nga kamatuoran. Indi puede nga pilion lang naton ang gusto naton nga kamatuoran kag balewalaon ang iban. Dapat kita maglakat sa “tanan nga kamatuoran.” (Juan 16:13) Binagbinagon naton liwat ang lima nga mahimo nga ginbayad naton ukon ginsakripisyo para sa kamatuoran. Magabulig ini sa aton para mangin determinado pa gid kita nga indi ini pagbawion.—Mat. 6:19.

8. Paano maanod palayo sa kamatuoran ang isa ka Cristiano paagi sa paggamit sang iya tion? Maghatag sing halimbawa.

⁸ Tion. Para indi kita maanod palayo sa kamatuoran, dapat maalamon kita sa paggamit sang aton tion. Kon indi kita maghalong, basi sobra na ang tion nga ginagamit naton sa kalingawan, sa Internet, ukon sa pagtan-aw sang TV. Indi na ini maayo kon ginagamit na naton ang tion nga para kuntani sa aton personal nga pagtuon kag sa iban pa nga hilikuton sa pag-alagad kay Jehova. Binagbinaga ang natabo sa utod nga si Emma. * Nanamian gid sia sa mga kabayo halin sang bata pa sia, kag pirme sia nagapangabayo. Pero sang ulihi, daw nakonsiensia sia sa madamo nga tion nga ginagamit niya sa sini. Gani naghimo sia sing pagbag-o. Napalig-on man sia sang eksperiensia ni Cory Wells, nga nagasakay anay sa kabayo sa mga eksibisyon. * Subong, mas madamo na nga tion ang ginagamit ni Emma sa pag-alagad kay Jehova upod sa iya Cristiano nga pamilya kag mga abyan. Nangin suod pa gid sia kay Jehova kag nalipay sia nga ginagamit na niya sing maalamon ang iya tion.

9. Paano matabo nga unahon sang iban ang materyal nga mga butang sa baylo sang pag-alagad kay Jehova?

⁹ Materyal nga mga butang. Padayon kita nga magalakat sa kamatuoran kon husto ang aton pagtamod sa materyal nga mga butang. Sang matun-an naton ang kamatuoran, narealisar naton nga mas importante ang pag-alagad kay Jehova sangsa materyal nga mga butang. Nalipay kita nga isakripisyo ini para sa kamatuoran. Pero sa pagligad sang tion, basi nakita naton ang iban nga nagabakal sang pinakabag-o nga mga gadyet ukon sang iban pa nga mga butang. Basi magbatyag kita nga daw makaluluoy kita. Basi indi na kita makontento sa ara sa aton kag unahon na naton ang materyal nga mga butang sa baylo sang pag-alagad kay Jehova. Pareho ini sa natabo kay Demas. Bangod ginhigugma niya “ini nga sistema sang mga butang,” wala na sia nag-upod kay apostol Pablo sa pag-alagad. (2 Tim. 4:10) Mahimo nga ginpasulabi niya ang materyal nga mga  butang sangsa pag-alagad sa Dios. Ukon mahimo nga indi na niya gusto magsakripisyo para mag-alagad kaupod ni Pablo. Ano ang matun-an naton sa sini? Basi mahilig man kita sa materyal nga mga butang sang una. Dapat gid kita maghalong para indi magtubo liwat ini nga handum sa aton kag madula naton ang pagpabalor sa kamatuoran.

10. Para padayon kita nga maglakat sa kamatuoran, ano ang indi naton dapat pagtugutan?

¹⁰ Kaangtanan sa iban. Para padayon kita nga maglakat sa kamatuoran, indi naton dapat pagtugutan nga maimpluwensiahan kita sang mga wala nagaalagad kay Jehova. Sang nagsugod kita sa paglakat sa kamatuoran, nagbag-o ang aton kaangtanan sa aton mga abyan kag pamilya nga indi Saksi. Mahimo nga gintahod sang iban sa ila ang aton bag-o nga ginapatihan, pero mahimo nga nagpamatok ang iban. (1 Ped. 4:4) Ginatinguhaan naton nga mangin maayo ang aton kaangtanan sa aton pamilya, pero wala naton ginabalewala ang kamatuoran para lang malipay sila. Padayon kita nga mangin mainayuhon sa ila. Pamatian naton ang paandam sa 1 Corinto 15:33 kag pilion naton nga mangin suod nga abyan ang mga nagapalangga kay Jehova.

11. Paano naton malikawan ang indi diosnon nga panghunahuna kag paggawi?

¹¹ Indi diosnon nga panghunahuna kag paggawi. Ang tanan nga nagalakat sa kamatuoran dapat mangin balaan. (Isa. 35:8; basaha ang 1 Pedro 1:14-16.) Sang matun-an naton ang kamatuoran, naghimo kita sang mga pagbag-o para masunod naton ang mga talaksan sang Biblia. Daku nga pagbag-o ang ginhimo sang iban. Indi gid naton dapat pag-ibaylo ang aton matinlo kag balaan nga kahimtangan sa imoral nga pagkabuhi sang kalibutan. Paano naton mabatuan ang pagsulay nga maghimo sang imoral nga buhat? Hunahunaa ang daku nga ginsakripisyo ni Jehova para mangin balaan kita, ang hamili nga dugo sang iya Anak nga si Jesucristo. (1 Ped. 1:18, 19) Para makapabilin kita nga matinlo sa panulok ni Jehova, dapat naton pirme dumdumon ang balor sang halad-gawad ni Jesus.

12, 13. (a) Ngaa dapat pareho kay Jehova ang pagtamod naton sa mga selebrasyon? (b) Ano ang masunod naton nga binagbinagon?

¹² Mga kinabatasan kag tradisyon nga indi suno sa Kasulatan. Basi piliton kita sang aton pamilya, mga kaupod sa trabaho, kag mga kaeskwela nga mag-upod sa ila mga selebrasyon. Ano ang makabulig sa aton para indi kita maimpluwensiahan nga mag-entra sa mga kinabatasan kag mga selebrasyon nga wala nagapadungog kay Jehova? Dapat maathag sa aton ang pagtamod ni Jehova sa sini. Makabulig kon repasuhon naton ang aton mga publikasyon nga nagapaathag sang ginhalinan sini nga mga selebrasyon. Kon pamalandungan naton ang mga rason halin sa Kasulatan kon ngaa indi kita dapat magselebrar sini, masigurado naton nga nagalakat kita sa paagi nga “kalahamut-an sa Ginuo.” (Efe. 5:10) Kon magsalig kita kay Jehova kag sa iya Pulong sang kamatuoran, indi kita ‘mahadlok sa tawo.’—Hulu. 29:25.

¹³ Dapat kita padayon nga maglakat sa kamatuoran, kag nagalaum kita nga himuon ini sing wala sing katapusan. Paano kita mangin determinado pa gid nga maglakat sa kamatuoran? Binagbinagon naton ang tatlo ka paagi.

14. (a) Paano makabulig ang padayon naton nga pagtuon sang kamatuoran para mangin determinado pa gid kita nga indi ini madula? (b) Ngaa importante ang kaalam, disiplina, kag paghangop?

¹⁴ Una, padayon nga magtuon sang hamili nga mga kamatuoran sa Pulong sang Dios  kag pamalandungi ini. Maghatag pirme sing tion para sa sini. Kon pirme ka nagatuon, mapabaloran mo pa gid ang kamatuoran kag mangin determinado ka nga indi ini madula. Suno sa Hulubaton 23:23, dugang pa sa kamatuoran, baklon man naton ang “kaalam, disiplina, kag paghangop.” Indi bastante nga nabal-an lang naton ang kamatuoran. Dapat naton ini iaplikar sa aton kabuhi. Kon may paghangop kita, makita naton nga nagahisantuanay ang tanan nga ginasiling ni Jehova. Kon may kaalam kita, himuon naton ang nabal-an naton nga dapat himuon. Kon kaisa, ginadisiplina kita sang kamatuoran paagi sa pagpalig-on sa aton nga maghimo sang pagbag-o. Dapat handa kita pirme nga batunon ang disiplina. Mas hamili pa ini sangsa pilak.—Hulu. 8:10.

15. Paano kita ginaamligan sang kamatuoran pareho sang paha?

¹⁵ Ikaduha, mangin determinado nga iaplikar ang kamatuoran sa imo kabuhi kada adlaw. Ginpaanggid sang Biblia ang kamatuoran sa paha sang soldado. (Efe. 6:14) Sang panahon sang Biblia, ginaamligan sang paha ang hawak sang soldado kag ang iban pa nga bahin sang iya lawas. Pero dapat hugot ini. Indi makaamlig ang halog nga paha. Paano kita ginaamligan sang kamatuoran pareho sang paha? Kon ginapabaloran naton ini pirme pareho sang paha nga natakod sing hugot, amligan kita sini sa sala nga panghunahuna kag buligan kita sini nga maghimo sang husto nga desisyon. Kon ginasulay kita ukon ginatilawan, buligan kita sang kamatuoran sa Biblia nga mangin determinado pa gid nga himuon ang husto. Pareho sang soldado nga ginasigurado nga may paha gid sia kon magkadto sa patag-awayan, determinado kita nga iaplikar ang kamatuoran sa tanan nga bahin sang aton kabuhi. Ang paha sang soldado may suluksukan man sang iya espada. Binagbinagon naman naton ang isa pa ka paagi para mangin determinado pa gid kita nga maglakat sa kamatuoran.

16. Paano makabulig ang pagtudlo naton sang kamatuoran sa iban para mangin determinado pa gid kita nga maglakat sa kamatuoran?

¹⁶ Ikatlo, himua ang imo bug-os nga masarangan nga itudlo sa iban ang kamatuoran sa Biblia. Ginpaanggid ang “pulong sang Dios” sa espada. Dapat naton ini gamiton sing maayo pareho sang soldado nga nagauyat sing hugot sa iya espada. (Efe. 6:17) Gusto naton nga mangin maayo pa gid kita nga mga manunudlo, nga “ginagamit sing husto ang pulong sang kamatuoran.” (2 Tim. 2:15) Kon ginagamit naton ang Biblia para buligan ang iban nga mabal-an ang kamatuoran kag isikway ang kabutigan, magatudok pa gid sa aton hunahuna kag tagipusuon ang pulong sang Dios. Paagi sa sini, mangin determinado pa gid kita nga maglakat sa kamatuoran.

17. Ngaa hamili sa imo ang kamatuoran?

¹⁷ Ang kamatuoran isa ka hamili nga regalo ni Jehova. Paagi sa sini nga regalo, may suod kita nga kaangtanan sa aton Amay sa langit, kag amo ini ang pinakaimportante sa aton kabuhi. Madamo na si Jehova sing gintudlo sa aton, pero umpisa pa lang ini. Nagpromisa sia nga tudluan niya kita sing wala sing katapusan. Gani, pabalori ang kamatuoran pareho sang maayo nga perlas. Padayon nga “bakla ang kamatuoran kag indi ini pag-ibaligya.” Pareho kay David, matuman mo man ini nga promisa kay Jehova: “Magalakat ako suno sa imo kamatuoran.”—Sal. 86:11.