1. Ngaa nagakinahanglan kita tanan sing pagpalig-on?

TANAN kita nagakinahanglan sing pagpalig-on. Mahimo nga pirme kita nagapalibog, nasubuan, kag nabalaka. Basi nagaantos kita bangod tigulang na kita, nagabalatian, ukon napatyan sing pinalangga. May pila sa aton nga ginhimuan sang malain sang iban. Kag nangin bayolente pa gid ang mga tawo subong. Matuod, ining “makahalanguyos nga mga tion nga mabudlay atubangon” ebidensia nga nagakabuhi na kita “sa katapusan nga mga adlaw” kag malapit na mag-abot ang bag-ong kalibutan. (2 Tim. 3:1) Pero mahimo nga madugay na kita nga nagahulat sa pag-abot sang mga promisa ni Jehova, kag basi mas nagabudlay ang aton kahimtangan. Ano ang makabulig sa aton?

2, 3. (a) Ano ang nabal-an naton parte kay Habacuc? (b) Ngaa binagbinagon naton ang libro ni Habacuc?

² Para masabat ini, binagbinagon naton ang libro ni Habacuc. Bisan pa wala ginasugid sang Kasulatan ang mga detalye parte sa kabuhi ni Habacuc, mapalig-on kita sang libro nga gintawag sa iya ngalan. Ang iya ngalan mahimo nagakahulugan  sing “Hugot nga Hakos.” Mahimo nga nagapatuhoy ini sa pagpalangga ni Jehova sa mga nagasimba sa iya nga daw ginahakos niya sila, ukon sa ila pagdangop kag pagsalig sa iya. Nakighambal si Habacuc sa Dios kag namangkot sa iya. Ginsabat ni Jehova si Habacuc kag ginpasulat sa iya ang ila paghambalanay kay kabalo Sia nga makabenepisyo kita sa sini.—Hab. 2:2.

³ Ang paghambalanay sang nasubuan nga manalagna kag ni Jehova amo lang ang ginasugid sang Kasulatan parte kay Habacuc. Ang iya libro bahin sang “tanan nga butang nga ginsulat sadto” kag ara sa Pulong sang Dios, ang Biblia. “Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” (Roma 15:4) Paano makabulig ang libro ni Habacuc sa kada isa sa aton? Mabuligan kita sini nga mahangpan kon paano magsalig kay Jehova. Ginapasalig man kita sang tagna sa libro ni Habacuc nga puede kita mangin kalmado bisan pa nagaatubang kita sing mga problema. Gani binagbinagon naton ang libro ni Habacuc.

4. Ngaa nasubuan gid si Habacuc?

⁴ Basaha ang Habacuc 1:2, 3. Tuman gid kabudlay sang kahimtangan sang panahon ni Habacuc. Nasubuan gid sia bangod malaut kag mapintas ang mga tawo sa palibot niya. San-o pa madula ang kalautan? Ngaa kadugay ini solbaron ni Jehova? Bisan diin magtulok si Habacuc, makita niya ang ginahimo nga malain kag pagpamigos sang iya mga kasimanwa sa ila isigkatawo. Wala gid sia sing mahimo. Gani nangamuyo sia kay Jehova nga solbaron ini. Mahimo nga ginpamensar ni Habacuc nga wala mabalaka si Jehova ukon ginapabay-an lang ini sang Dios. Nabatyagan mo man bala ang ginbatyag sini nga alagad sang Dios?

5. Ano nga importante nga leksion ang matun-an naton sa libro ni Habacuc? (Tan-awa ang piktyur sa umpisa sini nga artikulo.)

⁵ Nadula na bala ang pagsalig ni Habacuc kay Jehova kag ang iya pagtuo sa mga promisa sang Dios? Wala. Bangod ginsugid niya kay Jehova ang iya mga problema kag ginakabalak-an, kag indi sa mga tawo, maathag nga wala sia madulaan sing paglaum. Nagapalibog sia kay indi niya mahangpan kon san-o magahatag sing solusyon ang Dios kag kon ngaa ginatugutan ni Jehova nga mag-antos gid sia. Ginpasulat ni Jehova kay Habacuc ang iya mga ginakabalak-an kay gusto sang Dios nga itudlo sa aton ining importante nga leksion: Indi kita mahadlok nga isugid kay Jehova ang aton mga ginakabalak-an ukon ginaduhaduhaan. Ang matuod, ginaagda niya kita nga mangamuyo sa iya kag isugid kon ano gid ang aton ginabatyag. (Sal. 50:15; 62:8) Ginapalig-on man kita sang Hulubaton 3:5 nga ‘magsalig kay Jehova sa bug-os naton nga tagipusuon kag indi magsalig sa aton kaugalingon nga paghangop.’ Nabal-an ini ni Habacuc kag ginhimo niya ini.

6. Ngaa importante ang pagpangamuyo?

⁶ Si Habacuc mismo ang nagpalapit kay Jehova, nga iya ginasaligan nga Abyan kag Amay. Wala sia magsalig sa iya kaugalingon nga paghangop para masolbar ang iya ginakabalak-an. Sa baylo, nangamuyo sia kag ginsugid ang iya ginabatyag kag ginakabalak-an, kag dapat naton sia ilugon. Si Jehova ang Manugpamati sang pangamuyo, kag gusto niya nga magsalig kita sa iya paagi sa pagpangamuyo kag pagsugid sa iya sang aton mga ginakabalak-an. (Sal. 65:2) Kon himuon naton ini, mabaton naton ang sabat ni Jehova paagi sa iya mga panuytoy kag mabatyagan naton nga daw ginahakos niya kita. (Sal. 73:23, 24) Buligan niya kita nga mahangpan kon paano niya ginatamod  ang aton kahimtangan, bisan ano pa ang aton problema. Ang pagpangamuyo isa sa pinakamaayo nga paagi nga mapakita naton nga nagasalig kita sa Dios.

7. Ano ang ginhimo ni Jehova sang ginsugid ni Habacuc ang iya mga ginakabalak-an?

⁷ Basaha ang Habacuc 1:5-7. Sang masugid na ni Habacuc kay Jehova ang iya mga ginakabalak-an, mahimo nga nagpalibog sia kon ano ang himuon ni Jehova. Bilang mapinalanggaon nga Amay, nahangpan ni Jehova ang ginbatyag ni Habacuc, gani wala sia naakig. Nabal-an sang Dios nga nagaantos si Habacuc kag nagapangayo sing bulig. Ginsugid ni Jehova kay Habacuc ang malapit na lang matabo sa indi matutom nga mga Judiyo. Mahimo gid nga si Habacuc ang una nga ginsugiran ni Jehova nga malapit na niya sila silutan.

8. Ngaa ang sabat ni Jehova indi amo ang ginapaabot ni Habacuc?

⁸ Ginpaathag ni Jehova kay Habacuc nga may himuon na Sia. Malapit na niya silutan ang mapintas kag malaut nga mga tawo sa Juda. Sang nagsiling si Jehova nga “sa panahon ninyo,” ginpahibalo niya nga matabo ini nga paghukom sa panahon ni Habacuc ukon sang mga Israelinhon nga kaupod niya. Ang sabat ni Jehova indi amo ang ginapaabot ni Habacuc. Amo gid bala ini ang solusyon sa iya ginakabalak-an? Ang ginsugid sa iya ni Jehova nagakahulugan nga magaantos pa gid ang tanan nga taga-Juda. Ang mga Caldeanhon (mga taga-Babilonia) mapintas kag wala sing kaluoy. Mas mapintas pa sila sangsa iya mga kasimanwa, nga nakabalo sang mga talaksan ni Jehova. Ngaa gamiton ni Jehova ining mapintas kag pagano nga pungsod sa pagsilot sa iya katawhan? Ano ayhan ang batyagon mo kon ikaw si Habacuc?

9. Ano pa ang ginpamangkot ni Habacuc?

⁹ Basaha ang Habacuc 1:12-14, 17. Nagpalibog gihapon si Habacuc bisan pa nahangpan niya nga gamiton ni Jehova ang Babilonia sa pagsilot sa mga malauton sa palibot niya. Pero nagpaubos sia kag nagsiling nga si Jehova gihapon ang iya “Igang.” (Deut. 32:4; Isa. 26:4) Padayon nga nagsalig si Habacuc nga ang Dios mapinalanggaon kag mainayuhon. Gani namangkot sia liwat kay Jehova. Ngaa ayhan tugutan sang Dios nga maglain pa gid ang kahimtangan sa Juda? Ngaa wala sia sing ginhimo dayon? Ngaa pabay-an lang sang Labing Gamhanan nga magdugang ang kalautan? Ngaa ‘nagahipos lang’ sia bisan pa lapnag na gid ang kalautan? Sia ang “Balaan nga Dios,” kag ‘tuman kaputli sang iya mga mata sa pagtan-aw sing malain.’

10. Kon kaisa, ngaa mahimo nga pareho kita kay Habacuc?

¹⁰ Kon kaisa, mahimo nga pareho kita kay Habacuc. Namati kita kay Jehova. Nagsalig kita sa iya, ginbasa naton kag gintun-an ang iya Pulong, kag naghatag ini sa aton sing paglaum. Nabal-an naton ang iya mga promisa nga ginatudlo sang iya organisasyon. Pero basi nagapalibog kita gihapon, ‘San-o madula ang aton pag-antos?’ Ano ang matun-an naton sa ginhimo dayon ni Habacuc?

11. Ano ang determinado nga himuon ni Habacuc sa tapos niya pamatian si Jehova?

¹¹ Basaha ang Habacuc 2:1. Ang pagsugilanon ni Habacuc kay Jehova nagpakalma sa iya. Gani nangin determinado sia nga maghulat kag magsalig kay Jehova. Sang ulihi, ginhambal niya liwat nga determinado sia nga maghulat sang nagsiling sia: “Ginahulat ko sing hipos ang adlaw sang kalisdanan.” (Hab. 3:16) Ang iban pa nga matutom nga mga alagad sang Dios padayon man nga  nagsalig sa iya, kag ginapalig-on kita sini nga padayon man nga maghulat kay Jehova.—Miq. 7:7; Sant. 5:7, 8.

12. Ano ang matun-an naton kay Habacuc?

¹² Ano ang matun-an naton kay Habacuc? Una, indi gid kita dapat mag-untat sa pagpangamuyo kay Jehova, bisan ano pa ang aton problema. Ikaduha, dapat naton pamatian ang ginasiling ni Jehova paagi sa iya Pulong kag organisasyon. Ikatlo, dapat padayon kita nga maghulat kay Jehova, kag magsalig nga dulaon niya ang aton pag-antos sa iya gintalana nga tion. Kon ilugon naton si Habacuc, mangin kalmado man kita kag magabulig ini sa aton nga magbatas. Ang aton paglaum magabulig sa aton nga mangin mapinasensiahon kag mangin malipayon bisan ano pa ang aton problema. Magabulig man ini sa aton nga magsalig sa aton Amay sa langit.—Roma 12:12.

13. Ano ang ginpasalig sang Habacuc 2:3?

¹³ Basaha ang Habacuc 2:3. Sigurado gid nga nalipay si Jehova kay nagdesisyon si Habacuc nga maghulat. Nabal-an gid sang Labing Gamhanan ang mabudlay nga kahimtangan ni Habacuc. Gani ginpalig-on kag ginpasalig sang Dios ang manalagna nga sabton gid ang iya mga pamangkot. Malapit na masolusyunan ang iya mga ginakabalak-an. Daw ginasilingan sang Dios si Habacuc: “Maghulat ka lang, salig lang sa akon. Sabton ko gid ang imo pangamuyo, bisan pa abi mo daw naatrasar ini.” Ginpahanumdom sia ni Jehova nga may gintalana na Sia nga tion sa pagtuman sang Iya mga promisa. Ginpalig-on niya si Habacuc nga hulaton lang ini. Sa ulihi, maabot gid ang ginalauman sang manalagna.

14. Ano dapat ang determinado naton nga himuon kon may problema kita?

¹⁴ Kon padayon kita nga maghulat kay Jehova kag mamati sing maayo sa iya ginasiling, magasalig kita sa iya kag mangin kalmado kita bisan ano pa ang aton problema. Nagsiling si Jesus nga indi kita dapat magpokus sa “mga tion” nga wala pa ginpahibalo sang Dios. (Binu. 1:7) Dapat kita magsalig nga nabal-an ni Jehova kon san-o ang pinakamaayo nga tion. Gani dapat kita maghulat sing mapainubuson kag mapinasensiahon, kag magtuo sa Dios, kag gamiton naton ang aton tion sa pag-alagad kay Jehova sa bug-os naton nga masarangan.—Mar. 13:35-37; Gal. 6:9.

15, 16. (a) Ano nga mga promisa ang mabasa naton sa libro ni Habacuc? (b) Ano ang ginatudlo sa aton sini nga mga promisa?

¹⁵ Nagpromisa si Jehova sa mga matarong nga nagasalig sa iya: “Ang matarong nga tawo magakabuhi tungod sa iya katutom,” kag “ang duta mapuno sang ihibalo tuhoy sa himaya ni Jehova.” (Hab. 2:4, 14) Huo, ang mga padayon nga nagasalig sa Dios hatagan niya sing kabuhi nga wala sing katapusan.

¹⁶ Sa una nga pagbasa, daw simple lang ang ginpromisa sa Habacuc 2:4. Pero importante gid ini nga pasalig ni Jehova kay ginkutlo ini ni apostol Pablo sing tatlo ka beses! (Roma 1:17; Gal. 3:11; Heb. 10:38) Bisan ano man nga kabudlayan ang ginaantos naton, makita gid naton nga matuman ang mga promisa sang Dios kon padayon kita nga magtuo kag magsalig sa iya. Ginapalig-on kita ni Jehova nga magpokus sa aton paglaum sa palaabuton.

17. Ano ang ginapasalig sa aton sang libro ni Habacuc?

¹⁷ Makapalig-on gid ang libro ni Habacuc sa aton nga nagakabuhi sa sining katapusan nga mga adlaw. Nagapromisa si Jehova sing kabuhi nga wala sing katapusan sa matarong  nga nagatuo kag nagasalig sa iya. Gani padayon naton nga pabakuron ang aton pagtuo kag pagsalig sa Dios, bisan ano pa ang aton problema kag ginakabalak-an. Ang ginsiling ni Jehova kay Habacuc nagapasalig sa aton nga buligan Niya kita kag pagaluwason. Ginapalig-on niya kita nga magsalig sa iya kag padayon nga maghulat sa iya gintalana nga tion nga maggahom ang Ginharian sang Dios sa duta. Sa sina nga tion, ang bug-os nga duta puy-an sang malipayon kag malulo nga mga tawo nga nagasimba kay Jehova.—Mat. 5:5; Heb. 10:36-39.

18. Ano ang ginbatyag ni Habacuc sa ginsiling ni Jehova sa iya?

¹⁸ Basaha ang Habacuc 3:16-19. Napalig-on gid si Habacuc sa ginsiling ni Jehova sa iya. Ginpamalandungan niya ang dalayawon nga mga ginhimo ni Jehova sa iya katawhan sang una. Gani nagbakod ang iya pagsalig. Sigurado sia nga may himuon na si Jehova! Nagpalig-on ini sa manalagna, bisan pa nabal-an niya nga mahimo pa sia mag-antos. Wala na magduhaduha si Habacuc kay nagasalig gid sia nga luwason sia ni Jehova. Ang iya ginsiling sa bersikulo 18 mahimo nga isa sa pinakamatahom nga ginhambal sang tawo nga nagasalig sa Dios. Suno sa pila ka eksperto sa Biblia, ini nga bersikulo literal nga nagakahulugan nga “Magatumbo ako sa kalipay tungod sa Ginuo; magasaot ako sa kasadya tungod sa Dios.” Makapalig-on gid sa aton tanan ang ginsiling sang bersikulo 16-19. Dalayawon gid ang mga promisa ni Jehova sa aton, kag ginapasalig man niya kita nga malapit na gid niya ini tumanon.

19. Paano naton mabaton ang pagpalig-on nga nabaton man ni Habacuc?

¹⁹ Ang importante nga mensahe nga natun-an naton sa libro ni Habacuc amo ang pagsalig kay Jehova. (Hab. 2:4) Padayon kita nga magasalig kay Jehova kon pabakuron naton ang aton kaangtanan sa iya. Paano? (1) Padayon nga mangamuyo kay Jehova kag isugid sa iya ang tanan naton nga problema kag ginakabalak-an. (2) Magpamati sing maayo sa ginasiling ni Jehova sa iya Pulong kag sunda ang panuytoy sang iya organisasyon. (3) Magtuo kag padayon nga maghulat kay Jehova. Amo ini ang ginhimo ni Habacuc. Matuod, nasubuan gid sia sa umpisa sang iya libro, pero napalig-on sia kag nangin malipayon sang ulihi. Kon ilugon naton si Habacuc, mabatyagan man naton ang mapinalanggaon nga paghakos ni Jehova. Amo ini ang pinakamaayo nga pagpalig-on nga mabaton naton, kag indi gid ini makita sa sining malaut nga kalibutan.