Sang gab-i antes napatay si Jesus, ginlaygayan niya ang iya mga apostoles nga indi sila magpakataas sa ila mga kauturan. Nagsiling sia sa ila: “Ang mga hari sang mga pungsod nagapakaginuo sa ila mga sakop, kag ang mga may awtoridad sa ila ginatawag nga mga Manugbulig. Apang, indi kamo dapat mangin subong sina.”—Luc. 22:25, 26.

Sin-o ang mga Manugbulig nga ginsambit ni Jesus? Makita sa mga larawan, sensilyo, kag sinulatan sadto nga kinabatasan sang mga Griego kag mga Romano nga padunggan ang bantog nga mga tawo kag mga manuggahom paagi sa pagtawag sa ila nga Euergetes, ukon Manugbulig. Ginahatag ini nga dungog sa ila bangod sang ila pagserbisyo sa mga tawo.

Madamo nga hari ang gintawag nga Manugbulig. Lakip sa ila ang mga manuggahom sang Egipto nga sanday Ptolemy III Euergetes (mga 247-222 B.C.E.) kag Ptolemy VIII Euergetes II (mga 147-117 B.C.E.). Amo man sini ang pagtawag sa mga manuggahom sang Roma nga sanday Julio Cesar (48-44 B.C.E.) kag Augusto (31 B.C.E.–14 C.E.), kag kay Herodes nga Daku, nga hari sang Judea. Mahimo nga ginhatag ini nga dungog kay Herodes sang nagbakal sia sang trigo halin sa iban nga pungsod para sa iya mga sinakpan sa tion sang tiggulutom kag ginhatagan niya sing mga bayo ang mga imol.

Suno kay Adolf Deissmann, nga isa ka German nga eksperto sa Biblia, kinaandan na sadto ang pagpadungog sa iban paagi sa pagtawag sa ila nga Manugbulig. Nagsiling sia: “Madali lang makakita sa mga sinulatan sadto sing sobra isa ka gatos ka halimbawa [sang mga ngalan nga gintawag nga Manugbulig].”

Gani ano ang buot silingon ni Jesus sang nagsiling sia sa iya mga disipulo: “Apang, indi kamo dapat mangin subong sina”? Ginahambalan bala niya sila nga indi sila dapat mabalaka sa pagbulig sa mga tawo? Wala. Mas importante kay Jesus ang motibo sang isa sa pagpakita sing kaalwan.

Sang panahon ni Jesus, gusto sang mga manggaranon nga mangin maayo ang ila reputasyon. Gani ginagastuhan nila ang mga palaguaon kag mga hampang sa mga arena, nagapahimo sila sang mga parke kag mga templo, kag nagahimo sang iban pa nga serbisyo. Pero ginahimo nila ini para dayawon sila, para mangin bantog, ukon para pilion sila sang mga tawo nga mangin manuggahom. “Bisan pa may pila nga matuod gid man nga maalwan,” siling sang isa ka reperensia, “ginahimo ini sang kalabanan bangod sang ila personal nga interes sa pulitika.” Indi gusto ni Jesus nga sundon sang iya mga sumulunod ini nga pag-una sa ambisyon kag personal nga interes.

Pagligad sang pila ka tuig, ginpaathag man ni apostol Pablo nga dapat husto ang motibo sang isa sa pagpakita sing kaalwan. Nagsulat si Pablo sa iya mga kauturan sa Corinto: “Maghimo ang kada isa suno sa ginpamat-od niya sa iya tagipusuon, indi sing paganot ukon napilitan, kay ginahigugma sang Dios ang nagahatag sing malipayon.”—2 Cor. 9:7.