1-2. (a) Suno sa Efeso 6:16, ngaa dapat may ara kita “daku nga taming sang pagtuo”? (b) Ano nga mga pamangkot ang binagbinagon naton?

MAY ara ka bala “daku nga taming sang pagtuo”? (Basaha ang Efeso 6:16.) Sigurado gid nga may ara ka sini. Pareho sa daku nga taming nga nagaamlig sa lawas sang tawo, ang imo pagtuo nagaamlig sa imo batok sa malaut nga impluwensia sang kalibutan pareho sang imoralidad, kasingki, kag tanan nga paggawi nga supak sa talaksan sang Dios.

² Pero, nagakabuhi kita sa “katapusan nga mga adlaw,” gani padayon nga ginatilawan ang aton pagtuo. (2 Tim. 3:1) Paano mo mausisa ang imo taming sang pagtuo para masigurado mo nga mabakod ini? Kag paano mo mauyatan sing hugot ang imo taming? Binagbinagon naton ang sabat sa sini nga mga pamangkot.

3. Ano ang ginahimo sang mga soldado sa ila mga taming, kag ngaa?

³ Sang panahon sang Biblia, ang mga taming sang mga soldado masami nga ginasampawan sang panit sang sapat. Ginapahiran sang mga soldado sing lana ang mga taming para magdugay ang panit sang sapat kag indi pagtuktukon ang metal nga mga bahin sang taming. Kon natalupangdan sang isa ka soldado nga naguba ang iya taming, ginasigurado niya nga makay-o ini para handa sia liwat sa masunod nga inaway. Paano ini nga halimbawa maaplikar sa imo pagtuo?

4. Ngaa dapat mo usisaon ang imo taming sang pagtuo, kag paano mo ini mahimo?

⁴ Pareho sa mga soldado sang una, dapat mo man regular nga usisaon kag kay-uhon ang imo taming sang pagtuo para pirme ka handa sa inaway. Bilang mga Cristiano, nagapakig-away kita batok  sa malaut nga mga espiritu. (Efe. 6:10-12) Wala sing may makausisa kag makakay-o sang imo taming para sa imo. Paano mo masigurado nga mabakod na gid ang imo pagtuo kag handa ka na sa pag-atubang sang mga pagtilaw? Una, dapat mangamuyo ka sang bulig sang Dios. Kag dapat mo gamiton ang Pulong sang Dios para mabuligan ka nga mahantop kon ano ka nga sahi sang tawo sa panan-aw sang Dios. (Heb. 4:12) Ang Biblia nagasiling: “Magsalig ka kay Jehova sa bug-os mo nga tagipusuon, kag indi ka magsalig sa imo kaugalingon nga paghangop.” (Hulu. 3:5, 6) Base sa sini nga teksto, hunahunaa kon ano ang imo mga naeksperiensiahan sang sini lang kag kon ano ang ginhimo mo para maatubang ini. Halimbawa, nagkaproblema ka bala sa kuarta? Ginhunahuna mo bala ang promisa ni Jehova nga mabasa sa Hebreo 13:5: “Indi ko gid kamo pagbayaan, kag indi ko gid kamo pagpabay-an”? Ina bala nga promisa nagpasalig sa imo nga buligan ka ni Jehova? Kon huo, ginapakita mo nga mabakod ang imo taming sang pagtuo.

5. Ano ang mahimo nga matalupangdan mo kon usisaon mo ang imo pagtuo?

⁵ Mahimo nga makibot ka sa imo matalupangdan kon usisaon mo sing maayo ang imo pagtuo. Mahimo nga matalupangdan mo nga may ara ka gali mga kaluyahon nga wala mo nahibaluan. Halimbawa, mahimo marealisar mo nga nagluya na ang imo pagtuo bangod sang sobra nga kabalaka, mga kabutigan, kag pagluya sang buot. Kon amo sini ang kahimtangan mo, paano mo maamligan ang imo pagtuo para indi ini mahalitan pa gid?

6. Ano ang pila ka halimbawa sang maayo nga sahi sang kabalaka?

⁶ May ara man maayo nga sahi sang kabalaka. Halimbawa, nabalaka kita kon paano naton mapahamut-an si Jehova kag si Jesus. (1 Cor. 7:32) Kon nakahimo kita sang serioso nga sala, nabalaka kita kon paano mapanumbalik ang aton pagpakig-abyan sa Dios. (Sal. 38:18) Nabalaka man kita kon paano mapahamut-an ang aton tiayon kag maatipan ang aton pamilya kag mga kauturan.—1 Cor. 7:33; 2 Cor. 11:28.

7. Suno sa Hulubaton 29:25, ngaa indi kita dapat mahadlok sa tawo?

⁷ Sa pihak nga bahin, ang sobra nga kabalaka makaguba sang aton pagtuo. Halimbawa, mahimo nga pirme naton ginakabalak-an kon bala may bastante kita nga pagkaon kag bayo. (Mat. 6:31, 32) Gani mahimo magpokus kita sa pagtigayon sining mga butang. Mahimo pa gani nga magtubo sa aton ang gugma sa kuarta. Kon tugutan naton ini nga matabo, magaluya ang aton pagtuo kay Jehova kag maguba ang aton pagpakig-abyan sa iya. (Mar. 4:19; 1 Tim. 6:10) Ukon mahimo man nga nabalaka kita sing sobra sa kon ano ang paglantaw sang iban nga tawo sa aton. Kag bangod sini, mas nahadlok kita nga yagutaon ukon hingabuton sang mga tawo sangsa indi mapahamut-an si Jehova. Para maamligan kita sa sini nga katalagman, dapat pangabayon naton si Jehova nga hatagan kita sang pagtuo kag kaisog nga kinahanglan naton para indi kita mahadlok sa tawo.—Basaha ang Hulubaton 29:25; Luc. 17:5.

8. Ano ang dapat naton himuon kon may magsugid sa aton sang mga kabutigan?

⁸ Si Satanas ang “amay sang kabutigan,” kag ginagamit niya ang mga tawo nga naimpluwensiahan niya nga magpalapta sang mga kabutigan parte kay Jehova kag parte sa aton mga kauturan. (Juan 8:44) Halimbawa, nagapalapta ang mga apostata sang mga kabutigan kag nagapatiko sang kamatuoran parte sa organisasyon ni Jehova paagi sa Internet, TV, radyo, kag pamantalaan. Ini nga mga kabutigan amo ang pila sa “nagadabadaba nga [mga] baslay”  ni Satanas. (Efe. 6:16) Ano ang dapat naton himuon kon may magsugid sa aton sini nga mga kabutigan? Indi kita mamati sa sini! Ngaa? Bangod nagatuo kita kay Jehova kag nagasalig kita sa aton mga kauturan. Ang matuod, wala gid kita nagapakig-istorya sa mga apostata. Indi gid kita magpakigbais sa ila bisan daw gusto naton mabal-an kon ano ang ila isiling.

9. Ano ang matabo sa aton kon magluya ang aton buot?

⁹ Makapaluya sang aton pagtuo ang pagluya sang buot. Kon kaisa, nagaluya ang aton buot bangod may mga problema kita. Indi naton dapat pagbalewalaon ang aton mga problema pero indi man naton dapat pagpamensaron ini sa tanan nga tion. Kon himuon naton ini, mahimo malipatan naton ang tanan nga maayo nga mga butang nga ginpromisa ni Jehova sa aton. (Bug. 21:3, 4) Kon magluya ang aton buot, mahimo maubos ang aton kusog kag mag-untat kita sa pag-alagad kay Jehova. (Hulu. 24:10) Indi ini dapat matabo sa aton.

10. Ano ang natun-an mo sa sulat sang isa ka sister?

¹⁰ Binagbinaga kon paano nahuptan sang isa ka sister sa United States nga mabakod ang iya pagtuo samtang ginaatipan niya ang iya bana nga may malubha nga balatian. Nagsulat sia sa ulong talatapan: “Grabe gid ang amon stress kag kon kaisa nagaluya ang amon buot, pero wala kami nadulaan sing paglaum. Nagapasalamat gid ako sa tanan nga ginaaman ni Jehova para mapabakod ang amon pagtuo kag mapalig-on kami. Kinahanglan gid namon ini nga mga laygay kag pagpalig-on. Ginabuligan kami sini nga magpadayon sa pag-alagad kay Jehova kag mabatas ang mga kabudlayan nga ginagamit ni Satanas para paluyahon kami.” Suno sa ginsiling sang sister, malandas naton ang pagluya sang buot! Paano? Hunahunaa nga ang imo mga kabudlayan isa ka pagtilaw halin kay Satanas. Magsalig kay Jehova nga paumpawan ka niya. Kag panginpusli ang espirituwal nga pagkaon nga ginaaman niya.

11. Ano ang dapat naton ipamangkot sa aton kaugalingon para mabal-an naton kon mabakod ang aton pagtuo?

¹¹ Sa banta mo, kinahanglan mo bala pabakuron pa gid ang imo pagtuo? Sang nagligad nga mga bulan, nalikawan mo bala nga magpaapekto sa sobra nga kabalaka? Napunggan mo bala  ang imo kaugalingon nga magpamati sa mga kabutigan sang mga apostata kag makigbais sa ila? Nalandas mo bala ang pagluya sang imo buot? Kon huo, mabakod ang imo pagtuo. Pero dapat kita magbantay bangod may iban pa nga ginagamit si Satanas batok sa aton. Binagbinagon naton subong ang isa sa sini.

12. Ano ang mahimo sang materyalismo sa aton?

¹² Ang materyalismo makapaluya sang aton pagtuo. Bangod sini, gamay na lang ang aton maobra para kay Jehova. Si apostol Pablo nagsiling: “Wala sing soldado nga nadalahig sa negosyo sang kabuhi, agod matigayon niya ang kahamuot sang isa nga naglista sa iya.” (2 Tim. 2:4) Ang matuod, indi puede nga may iban pa nga trabaho ang Romano nga mga soldado sang una. Ano ang matabo kon indi ini pagsundon sang isa ka soldado?

13. Ngaa indi puede magnegosyo ang isa ka soldado?

¹³ Hunahunaa ini nga halimbawa. Kada aga, ang isa ka grupo sang mga soldado nagaensayo para sa inaway, pero may isa ka soldado nga wala nagaensayo. Ini nga soldado masako nga nagabaligya sang mga pagkaon sa merkado. Kada gab-i, ginausisa sang mga soldado ang ila mga hinganiban kag ginabaid ang ila mga espada. Pero ang isa nga nagabaligya sang pagkaon nagapreparar sang iya inugbaligya para sa sunod nga adlaw. Isa ka aga, ginsalakay sila sang ila mga kaaway. Sin-o sa mga soldado ang handa sa pagpakig-away kag dayawon sang ila kumander? Kag kon ikaw isa sa mga soldado, sin-o ang gusto mo nga kaupod sa pagpakig-away, ang handa nga mga soldado ukon ang isa nga masako sa negosyo?

14. Ano ang ginapabaloran naton bilang mga soldado sang Cristo?

¹⁴ Pareho kita sa maayo nga mga soldado. Ang pinakaimportante para sa aton amo nga mahamuot sa aton ang aton mga Kumander, nga si Jehova kag ang Cristo. Mas ginapabaloran naton ini sangsa bisan ano nga matigayon naton sa kalibutan ni Satanas. Ginasigurado naton nga may tion kita kag kusog sa pag-alagad kay Jehova kag sa pagpabakod sang aton taming sang pagtuo kag sang tanan naton nga espirituwal nga hinganiban.

15. Ano ang ginpaandam ni Pablo sa aton, kag ngaa?

 ¹⁵ Dapat kita pirme magbantay! Ngaa? Si apostol Pablo nagpaandam nga ‘ang mga determinado nga mangin manggaranon magatalang sa pagtuo.’ (1 Tim. 6:9, 10) Ang tinaga nga “nagtalang” nagapahangop nga mahimo nagapokus na kita sa pagtigayon sang mga butang nga indi naton kinahanglanon. Dayon mahimo pamensaron na naton ang “madamo nga binuang kag makahalalit nga handum.” Pero dapat naton dumdumon nga ginagamit ni Satanas ini nga mga handum para paluyahon ang aton pagtuo.

16. Ang Marcos 10:17-22 nagapalig-on sa aton nga pamalandungan ang ano nga mga pamangkot?

¹⁶ Ano abi kon bastante man ang aton kuarta para ibakal sang madamo nga butang? Sala bala kon baklon naton ang mga butang nga gusto naton pero indi man kinahanglanon? Indi. Pero pamalandungi ini nga mga pamangkot: Bisan pa makasarang kita nga baklon ang isa ka butang, may tion pa bala kita kag kusog para gamiton kag mentinahon ini? May posibilidad bala nga pabaloran naton sing sobra ang aton mga pagkabutang? Kon ginapabaloran gid naton ang aton mga pagkabutang, mahimo ayhan kita mangin pareho sang lamharon nga lalaki nga wala nagbaton sang pangagda ni Jesus nga pasangkaron ang iya pag-alagad sa Dios? (Basaha ang Marcos 10:17-22.) Mas maayo gid kon simple ang aton kabuhi para magamit  naton ang aton tion kag kusog sa paghimo sang kabubut-on sang Dios!

17. Ano ang indi gid naton dapat pagkalimtan?

¹⁷ Indi gid naton dapat pagkalimtan nga nagapakig-away kita, kag dapat kita mangin handa sa pagpakig-away adlaw-adlaw. (Bug. 12:17) Indi mauyatan sang aton mga kauturan ang aton taming sang pagtuo para sa aton. Dapat kita mismo ang mag-uyat sini sing hugot.

18. Ngaa dapat hugot gid ang pag-uyat sang mga soldado sang una sa ila taming?

¹⁸ Sang una, ginapadunggan ang isa ka soldado kon maisog sia nga nagapakig-away. Pero mahuy-an sia kon indi niya dala ang iya taming sa pagpauli niya. Ang isa ka Romano nga manunulat sang kasaysayan nga si Tacitus nagsiling: “Makahuluya gid kon mabilin sang isa ka soldado ang iya taming.” Isa ini ka rason kon ngaa hugot gid ang pag-uyat sang mga soldado sa ila taming.

19. Paano naton mauyatan sing hugot ang aton taming sang pagtuo?

¹⁹ Ginauyatan naton sing hugot ang aton taming sang pagtuo kon regular kita nga nagatambong sa Cristianong mga miting kag ginasugid naton sa iban ang ngalan ni Jehova kag ang iya Ginharian. (Heb. 10:23-25) Dapat man naton basahon ang Pulong sang Dios adlaw-adlaw kag mangamuyo kay Jehova nga buligan kita nga maaplikar ang aton ginabasa. (2 Tim. 3:16, 17) Kon himuon naton ini, wala sing may mahimo si Satanas para mahalitan kita sing permanente. (Isa. 54:17) Ang aton “daku nga taming sang pagtuo” magaamlig sa aton. Kaupod ang aton mga kauturan, mangin maisog kita kag madinalag-on sa aton pagpakig-away adlaw-adlaw. Kag isa gid ka kadungganan nga magdampig kay Jesus kay malapit na niya pierdihon si Satanas kag ang iya mga sumulunod.—Bug. 17:14; 20:10.