1-2. (a) Ano ang nagabulig sa aton para mabatas ang mga kabudlayan? Ipaathag. (b) Ano ang binagbinagon naton sa sini nga artikulo?

“KON pamensaron ko ang kabudlayan nga naagyan ko, masiling ko gid nga wala ko yadto nasarangan nga ako lang.” Nahambal mo man bala ini? Madamo sa aton ang nakahambal sini. Mahimo nga nahambal mo ini sang nakapamalandong ka kon paano mo nabatas ang isa ka malala nga balatian ukon ang pagkapatay sang imo pinalangga. Kon pamensaron mo ang kabudlayan nga imo naagyan, mahimo nagahunahuna ka nga nabatas mo lang ini sa bulig sang balaan nga espiritu ni Jehova nga naghatag sa imo sang “gahom nga labaw sa kinaandan.”—2 Cor. 4:7-9.

² Kinahanglan man naton ang bulig sang balaan nga espiritu para mabatuan ang impluwensia sang malauton nga kalibutan. (1 Juan 5:19) Kag kinahanglan naton sang kusog para sa aton pagpakig-away batok sa “malaut nga mga espiritu.” (Efe. 6:12) Gani binagbinagon naton subong ang duha ka paagi nga ginabuligan kita sang balaan nga espiritu para mabatas ini tanan. Dayon binagbinagon naton kon ano ang dapat naton himuon para makabenepisyo kita sing bug-os sa bulig sang balaan nga espiritu.

3. Ano ang isa ka paagi nga ginabuligan kita ni Jehova para mabatas ang mga kabudlayan?

³ Ginahatagan kita sang balaan nga espiritu ni Jehova sang gahom, ukon kusog, para mahimo naton ang tanan nga kinahanglan naton himuon bisan may mga kabudlayan. Nagsiling si apostol Pablo nga nakapadayon sia sa pag-alagad kay Jehova bisan may mga kabudlayan bangod nagsalig sia sa “gahom sang Cristo.” (2 Cor. 12:9) Sa iya ikaduha nga paglakbay bilang misyonero, nangin masako si Pablo sa pagbantala kag nagtrabaho man sia para masuportahan ang iya kaugalingon. Sang ara sia sa Corinto, nagdayon sia sa balay nanday Aquila kag Priscila nga nagapanghimo sang tolda. Bangod nagapanghimo man si Pablo sang tolda, may mga adlaw nga nagaupod sia sa ila sa pag-obra. (Binu. 18:1-4) Ginhatagan sang balaan nga espiritu si Pablo sang kusog para makaobra sia kag para matuman niya ang iya ministeryo.

4. Suno sa 2 Corinto 12:7b-9, ano ang ginaantos ni Pablo?

 ⁴ Basaha ang 2 Corinto 12:7b-9. Sa sini nga mga bersikulo, ano ang buot silingon ni Pablo sang nagsiling sia nga may ara sia “tunok sa unod”? Kon may tunok sa imo lawas nga indi makuha, mahimo nga mag-antos ka gid. Gani gusto ipahangop ni Pablo nga may ginaantos sia nga kabudlayan. Gintawag niya ini nga kabudlayan nga “isa ka anghel ni Satanas” nga pirme “nagatampa” sa iya. Posible nga indi man si Satanas ukon ang iya mga demonyo ang naghatag sang kabudlayan kay Pablo, nga daw isa ka tunok sa iya unod. Pero sang natalupangdan sang malaut nga mga espiritu ang “tunok” ni Pablo, mahimo nga gintinguhaan gid nila nga pabudlayan pa gid sia. Daw pareho lang nga ginpasalop pa gid nila ang tunok para mag-antos pa gid si Pablo. Ano ang ginhimo ni Pablo?

5. Paano ginsabat ni Jehova ang mga pangamuyo ni Pablo?

⁵ Gusto kuntani ni Pablo nga kuhaon sa iya ang “tunok.” Nagsiling sia: “Tatlo ka beses ako nga nagpakiluoy [kay Jehova] nga kuhaon ini sa akon.” Pero wala nadula ang tunok sa unod ni Pablo bisan pa kapila niya ini ginpangamuyo. Wala bala ginsabat ni Jehova ang mga pangamuyo ni Pablo? Ginsabat niya ini. Matuod, wala ginkuha ni Jehova ang problema, pero ginhatagan niya si Pablo sang kusog para mabatas ini. Nagsiling si Jehova: “Ang akon gahom mapakita sing bug-os sa kaluyahon.” (2 Cor. 12:8, 9) Sa bulig sang Dios, malipayon gihapon si Pablo kag malinong ang iya hunahuna!—Fil. 4:4-7.

6. (a) Paano mahimo sabton ni Jehova ang aton mga pangamuyo? (b) Ano nga mga promisa nga nabasa mo sa mga teksto sa parapo ang nakahatag sa imo sang kusog?

⁶ Nagpakiluoy ka man bala kay Jehova nga dulaon niya ang imo kabudlayan, pareho sa ginhimo ni Pablo? Mahimo nga hanuot ka nga nangamuyo sing pila ka beses pero wala gihapon nadula ang imo problema ukon naglala pa gani ini. Nabalaka ka bala nga basi wala ka ginakahamut-an ni Jehova? Kon amo sini ang imo ginabatyag, dumduma ang halimbawa ni Pablo. Ginsabat ni Jehova ang mga pangamuyo ni Pablo, kag sigurado gid nga sabton man Niya ang imo mga pangamuyo! Mahimo nga indi pagdulaon ni Jehova ang kabudlayan. Pero paagi sa balaan nga espiritu, hatagan ka niya sang kusog nga kinahanglan mo para mabatas ini. (Sal. 61:3, 4) Mahimo ‘mapukan’ ka, pero indi ka pagpabay-an ni Jehova.—2 Cor. 4:8, 9; Fil. 4:13.

7-8. (a) Ngaa makumparar naton sa hangin ang balaan nga espiritu? (b) Paano nagapanghikot ang balaan nga espiritu suno sa paglaragway ni Pedro?

⁷ Ano ang isa pa ka paagi nga nagabulig sa aton ang balaan nga espiritu? Ang balaan nga espiritu makumparar naton sa hangin. Bisan pa mabalod ang dagat, makalab-ot gihapon ang isa ka sakayan sa iya kaladtuan kon magpaayon ini sa hangin nga nagapakadto sa husto nga direksion. Sing kaanggid, nagabulig sa aton ang balaan nga espiritu nga magpadayon sa pag-alagad kay Jehova bisan may mga kabudlayan, asta nga makalab-ot kita sa ginsaad sang Dios nga bag-ong kalibutan.

⁸ Isa ka mangingisda si apostol Pedro, gani madamo sia sing nabal-an parte sa pagpanakayon. Posible amo ini ang rason kon ngaa naggamit sia sang tinaga nga may labot sa pagpanakayon sang ginlaragway niya kon paano nagapanghikot ang balaan nga espiritu. Nagsiling sia: “Ang tagna wala mag-abot paagi sa kabubut-on sang tawo, kundi ang ginhambal sang mga tawo naghalin sa Dios samtang ginapahulag sila sang balaan nga espiritu.” Ang Griego nga tinaga nga gin-translate “ginapahulag” may literal nga kahulugan nga “ginadala.”—2 Ped. 1:21; footnote.

9. Ano ang gusto ni Pedro nga hunahunaon sang mga tawo sang gingamit niya ang tinaga nga “ginadala”?

⁹ Ano ang gusto ni Pedro nga hunahunaon sang mga tawo sang gingamit niya ang tinaga nga “ginadala”? Si Lucas, nga nagsulat sang Binuhatan, naggamit sang Griego nga tinaga nga kaanggid sini para ilaragway ang sakayan nga “nagpaanod” sa hangin. (Binu. 27:15) Suno sa isa ka eksperto sa Biblia, sang nagsiling si Pedro nga ang mga manunulat sang Biblia “ginadala” sang balaan nga espiritu, naggamit sia sang “dalayawon nga pagpaanggid parte sa pagpanakayon.” Gani daw pareho lang nga nagsiling si Pedro nga ang mga manalagna kag mga manunulat sang Biblia ginadala sang balaan nga espiritu para  matuman nila ang ila hilikuton, pareho sa kon paano ang sakayan ginadala sang hangin para makalab-ot ini sa iya kaladtuan. Ang amo gihapon nga eksperto sa Biblia nagsiling nga ang mga manunulat sang Biblia daw pareho sa mga sakayan nga “nagpasaka ukon naghumlad sang ila mga layag.” Handa sila sa paghimo sang hilikuton nga ginapahimo sa ila sang balaan nga espiritu. Ginhimo ni Jehova ang dapat niya himuon. Naghatag sia sang “hangin,” nga amo ang balaan nga espiritu. Ginhimo man sang mga manunulat sang Biblia ang dapat nila himuon. Nagsunod sila sa direksion sang balaan nga espiritu.

10-11. Ano ang duha ka butang nga dapat naton himuon para masigurado naton nga ginatuytuyan kita sang balaan nga espiritu? Maghatag sing halimbawa.

¹⁰ Wala na ginagamit ni Jehova ang iya balaan nga espiritu para tuytuyan ang mga tawo nga magsulat sang mga libro sang Biblia. Pero ginagamit gihapon ni Jehova ang iya balaan nga espiritu para tuytuyan ang iya mga alagad. Ginahimo gihapon ni Jehova ang dapat niya himuon. Paano naton masigurado nga ginatuytuyan kita sang balaan nga espiritu sang Dios? Dapat himuon man naton ang dapat naton himuon. Paano?

¹¹ Hunahunaa ini nga halimbawa. Kon gusto sang marinero nga mabuligan sia sang hangin, dapat niya himuon ining duha ka butang. Una, dapat niya ipuesto ang iya sakayan sa lugar nga maigo ini sang hangin. Kon ang sakayan ara lang sa higad sang baybay kag malayo sa hangin, indi gid ini makahalin. Ikaduha, dapat nga ipasaka ukon ihumlad niya sing bug-os ang mga layag sang iya sakayan. Makahalin lamang ang iya sakayan kon mahuyop sang hangin ang mga layag. Sing kaanggid, makapadayon lang kita sa pag-alagad kay Jehova kon buligan kita sang balaan nga espiritu. Para mabuligan kita sang balaan nga espiritu, dapat naton himuon ining duha ka butang. Una, dapat naton himuon ang mga hilikuton nga ginatuytuyan sang balaan nga espiritu sang Dios. Ikaduha, dapat naton “ipasaka ukon ihumlad sing bug-os ang aton mga layag” paagi sa paghimo sining mga hilikuton sa bug-os naton nga masarangan. (Sal. 119:32) Kon himuon naton ini, hatagan kita sang balaan nga espiritu ni Jehova sang kusog para makapadayon kita sa pag-alagad sa iya sing matutom bisan may mga pagpamatok kag kabudlayan, asta nga makalab-ot kita sa bag-ong kalibutan sang Dios.

12. Ano ang binagbinagon naton subong?

 ¹² Nabinagbinag naton ang duha ka paagi kon paano ang balaan nga espiritu nagabulig sa aton. Ang balaan nga espiritu nagahatag sa aton sang kusog kag nagabulig sa aton nga magpabilin nga matutom bisan may mga kabudlayan. Ginatuytuyan man kita kag ginabuligan sang balaan nga espiritu para mahimo naton ang mga hilikuton nga gusto ni Jehova nga himuon naton para matigayon naton ang kabuhi nga wala sing katapusan. Subong, binagbinagon naton ang apat ka butang nga dapat naton himuon para makabenepisyo kita sing bug-os sa bulig sang balaan nga espiritu.

13. Suno sa 2 Timoteo 3:16, 17, ano ang mahimo sang Kasulatan sa aton kabuhi, pero ano ang dapat naton himuon?

¹³ Una, tun-i ang Pulong sang Dios. (Basaha ang 2 Timoteo 3:16, 17.) Ang Griego nga tinaga nga gin-translate “gintuytuyan sang Dios” may literal nga kahulugan nga “ginhuypan sang Dios.” Gingamit sang Dios ang iya espiritu para “huypan” ukon ibutang sa hunahuna sang mga manunulat sang Biblia ang iya panghunahuna. Kon basahon naton ang Biblia kag pamalandungan ang aton ginabasa, nagasulod sa aton hunahuna kag tagipusuon ang mga panuytoy sang Dios. Dayon ginapahulag kita sini nga maghimo sing mga pagbag-o sa aton kabuhi para mapahamut-an si Jehova. (Heb. 4:12) Pero para makabenepisyo kita sing bug-os sa bulig sang balaan nga espiritu, dapat kita maghatag sang tion para tun-an sing regular ang Biblia kag pamalandungan ang aton ginabasa. Sa paghimo sini, ginatugutan naton nga maimpluwensiahan sang Pulong sang Dios ang tanan naton nga ginahambal kag ginahimo.

14. (a) Ngaa masiling naton nga nagapanghikot ang balaan nga espiritu sa aton Cristianong mga miting? (b) Ano ang himuon naton para makatambong kita sa mga miting nga “napasaka ukon nahumlad ang aton mga layag”?

¹⁴ Ikaduha, simbaha ang Dios upod ang mga kauturan. (Sal. 22:22) Ang espiritu ni Jehova nagapanghikot sa aton Cristianong mga miting. (Bug. 2:29) Ngaa masiling naton ini? Bangod kon nagasimba kita upod ang aton mga kauturan, nagapangamuyo kita sang balaan nga espiritu, nagaamba kita sang mga ambahanon sa Ginharian nga nabase sa Pulong sang Dios, kag nagapamati kita sang mga instruksion nga nabase sa Biblia nga ginahatag sang mga brother nga gintangdo sang balaan nga espiritu. Kag amo man ini ang balaan nga espiritu nga nagabulig sa mga sister nga mahandaan kag mahatag ang ila mga bahin. Pero, para makabenepisyo sing bug-os sa bulig sang balaan nga espiritu, dapat naton handaan ang mga miting para makakomento kita. Kon himuon naton ini, nagatambong kita sa mga miting nga “napasaka ukon nahumlad ang aton mga layag.”

15. Paano kita mabuligan sang balaan nga espiritu kon nagabantala kita?

¹⁵ Ikatlo, magbantala. Kon ginagamit naton ang Biblia sa pagbantala kag pagtudlo nga hilikuton, ginatugutan naton ang balaan nga espiritu nga buligan kita sa aton ministeryo. (Roma 15:18, 19) Pero para makabenepisyo sing bug-os sa bulig sang espiritu sang Dios, dapat ka magbantala sing regular kag maggamit sang Biblia sa tanan nga tion kon posible. Ang isa ka paagi para mas epektibo ang imo pagbantala amo ang paggamit sang sampol nga pag-istoryahanay nga makita sa Pagkabuhi kag Pagministeryo nga Workbook Para sa Miting.

16. Ano ang pinakadirekta nga paagi para mabaton naton ang balaan nga espiritu?

¹⁶ Ikap-at, magpangamuyo kay Jehova. (Mat. 7:7-11; Luc. 11:13) Ang pinakadirekta nga paagi para mabaton naton ang balaan nga espiritu amo ang pagpangamuyo sa sini kay Jehova. Wala sing may makabalabag sang aton mga pangamuyo kay Jehova kag wala man sing may makapugong sa espiritu sang Dios para buligan kita. Bisan ara kita sa prisuhan, wala sing mahimo si Satanas para indi naton mabaton ang balaan nga espiritu. (Sant. 1:17) Paano kita dapat magpangamuyo para makabenepisyo kita sing bug-os sa bulig sang balaan nga espiritu? Para masabat ini, tun-an naton ang ilustrasyon parte sa pagpangamuyo nga mabasa lang sa Ebanghelyo ni Lucas. *

17. Ano ang matun-an naton nga leksion parte sa pagpangamuyo sa ilustrasyon ni Jesus nga mabasa sa Lucas 11:5-9, 13?

¹⁷ Basaha ang Lucas 11:5-9, 13. Ginpakita sang ilustrasyon ni Jesus kon paano kita dapat magpangamuyo para sa balaan nga espiritu. Sa sini nga ilustrasyon, nabaton sang tawo ang iya kinahanglan “bangod sa iya padayon nga pagpamilit.” Wala sia nagpangalag-ag nga magpangabay sang bulig sa iya abyan bisan tungang-gab-i na. * Ano ang ginatudlo sini nga ilustrasyon suno kay Jesus? Nagsiling sia: “Padayon kamo sa pagpangayo, kag kamo pagahatagan; padayon kamo sa pagpangita, kag kamo makakita; padayon kamo sa pagpanuktok, kag kamo pagabuksan.” Ano ang matun-an naton nga leksion? Para mabaton naton ang bulig sang balaan nga espiritu, dapat padayon naton ini nga ipangamuyo.

18. Suno sa ilustrasyon ni Jesus, ngaa makasalig kita nga hatagan kita ni Jehova sang iya balaan nga espiritu?

¹⁸ Nagabulig man sa aton ang ilustrasyon ni Jesus nga mahangpan kon ngaa hatagan kita ni Jehova sang balaan nga espiritu. Sa ilustrasyon, gusto sang tawo nga abiabihon sing maayo ang iya bisita. Gusto niya pakan-on ang iya bisita nga tungang-gab-i na nag-abot pero wala gid sia sing may mahanda. Nagsiling si Jesus nga ginhatagan sang iya abyan sing tinapay ang tawo bangod padayon sia nga nagpangayo. Ano ang punto ni Jesus? Kon ang indi perpekto nga tawo handa sa pagbulig sa iya abyan nga padayon nga nagapangayo, indi bala nga mas makasalig kita nga buligan sang aton mainayuhon nga Amay sa langit ang padayon nga mga nagapangayo sa iya sang balaan nga espiritu? Gani sigurado kita nga sabton gilayon ni Jehova ang aton mga pangamuyo para sa balaan nga espiritu.—Sal. 10:17; 66:19.

19. Ngaa sigurado gid kita nga mabatas naton ang mga pagsalakay ni Satanas?

¹⁹ Wala si Satanas nagauntat sa pagsalakay sa aton, pero sigurado gid nga mabatas naton ini. Ngaa? Bangod ginabuligan kita sang balaan nga espiritu sa duha ka paagi. Una, ginahatagan kita sini sang kusog para mabatas ang mga problema. Ikaduha, daw kaanggid ini sa hangin nga “nagahuyop sang aton mga layag” kay ginabuligan kita sini nga makapadayon sa pag-alagad kay Jehova asta nga makalab-ot kita sa bag-ong kalibutan. Kabay nga mangin determinado kita nga magbenepisyo sing bug-os sa bulig sang balaan nga espiritu!