1. Suno sa Mateo 7:13, 14, ngaa daw pareho sa paglakat sa dalan ang aton kabuhi?

GUSTO naton tanan nga magkabuhi sa bag-ong kalibutan, kag gusto naton nga ang aton mahigugmaon nga Dios nga si Jehova amo ang maggahom sa aton. Gani ginatinguhaan gid naton pirme nga maglakat sa dalan nga nagapadulong sa kabuhi. Pero nagsiling si Jesus nga mabudlay kon kaisa nga maglakat sa sini nga dalan. (Basaha ang Mateo 7:13, 14.) Bangod indi kita perpekto, madali lang kita magtalang.—Gal. 6:1.

2. Ano ang binagbinagon naton sa sini nga artikulo? (Tan-awa man ang kahon nga “ Ang Pagkamapainubuson Makabulig sa Aton nga Maghimo sang mga Pagbag-o.”)

² Kon gusto naton nga magpabilin sa mabudlay nga dalan nga nagapadulong sa kabuhi, dapat handa kita nga maghimo sang mga pagbag-o sa aton panimuot, panghunahuna, kag mga ginahimo. Ginpalig-on ni apostol Pablo ang mga Cristiano sa Corinto nga padayon nga “magpasibu.” (2 Cor. 13:11) Dapat man naton sundon ini nga laygay. Sa sini nga artikulo, binagbinagon naton kon paano kita mabuligan sang Biblia nga maghimo sang mga pagbag-o, kag kon paano kita mabuligan sang aton hamtong nga mga abyan nga magpabilin sa dalan nga nagapadulong sa kabuhi. Binagbinagon man naton ang rason kon ngaa nabudlayan kita kon kaisa nga sundon ang panuytoy sang organisasyon ni Jehova. Kag tun-an naton nga ang pagkamapainubuson makabulig sa aton nga mangin malipayon gihapon sa pag-alagad kay Jehova bisan pa may mga pagbag-o.

3. Paano makabulig sa imo ang Pulong sang Dios?

³ Mabudlay usisaon ang aton mga panghunahuna kag balatyagon. Madaya ang aton tagipusuon, gani mabudlay mabal-an kon ano ang gusto ipahimo sini sa aton. (Jer. 17:9) Kag ginadaya naton ang aton kaugalingon paagi sa “butig nga pangatarungan.” (Sant. 1:22) Gani dapat naton gamiton ang Pulong sang Dios sa pag-usisa sa aton  kaugalingon. Ginapakita sa aton sang Pulong sang Dios ang aton nasulod nga pagkatawo ukon ang aton pinakasulod nga “panghunahuna kag mga tinutuyo sang tagipusuon.” (Heb. 4:12, 13) Ang Pulong sang Dios daw pareho sa X-ray kay ginapakita sini sa aton ang indi naton makita. Pero dapat kita mangin mapainubuson kon gusto naton nga makabenepisyo kita sa mga laygay halin sa Biblia ukon halin sa nagapanguna nga mga utod.

4. Ano nga mga halimbawa ang nagapakita nga nangin bugalon si Hari Saul?

⁴ Ginapakita sang halimbawa ni Hari Saul kon ano ang posible nga matabo kon indi kita mapainubuson. Bangod nangin bugalon si Saul, indi sia magpati nga kinahanglan niya bag-uhon ang iya panghunahuna kag mga ginahimo. (Sal. 36:1, 2; Hab. 2:4) Halimbawa, sang ginsilingan ni Jehova si Saul sang dapat niya himuon pagkatapos niya mapierde ang mga Amaleknon, wala gintuman ni Saul si Jehova. Kag sang ginpatalupangod ni manalagna Samuel kay Saul ang indi niya pagtuman, nagsiling si Saul nga wala sia sing may ginhimo nga sala. Sa baylo, ginpakadiutay niya ang iya sala kag ginbasol niya ang iban sa iya ginhimo. (1 Sam. 15:13-24) Antes sang sini nga hitabo, ginpakita na ni Saul ini nga panimuot. (1 Sam. 13:10-14) Makapasubo nga ginpabay-an ni Saul nga mangin bugalon ang iya tagipusuon. Bangod wala niya ginbag-o ang iya panghunahuna, ginsabdong sia ni Jehova kag ginsikway.

5. Ano ang matun-an naton sa natabo kay Saul?

⁵ Indi naton gusto nga mangin pareho kay Saul. Gani dapat naton pamangkuton ang aton kaugalingon: ‘Kon may nabasa ako nga laygay halin sa Pulong sang Dios, nagapangita bala ako sang rason para indi ini pagsundon? Ginapakadiutay ko bala ang akon sala? Ginabasol ko bala ang iban sa akon nahimo?’ Kon huo ang aton sabat sa bisan isa lang sa sini nga mga pamangkot, dapat naton bag-uhon ang aton panghunahuna kag panimuot. Kay kon indi, posible mangin bugalon kita katama kag indi na kita pagkabigon ni Jehova nga iya abyan.—Sant. 4:6.

6. Ano ang kinalain ni Hari Saul kag ni Hari David?

⁶ Talupangda ang kinalain ni Hari Saul kag ni Hari David nga nagbulos sa iya. Ginpabaloran gid ni David ang “kasuguan ni Jehova.” (Sal. 1:1-3) Kabalo si David nga ginaluwas ni Jehova ang mga mapainubuson pero ginapamatukan niya ang mga matinaastaason. (2 Sam. 22:28) Gani paagi sa kasuguan sang Dios, ginbag-o ni David ang iya panghunahuna. Nagsulat sia: “Dayawon ko si Jehova, nga naghatag sa akon sing laygay. Bisan sa tion sang kagab-ihon, ginatadlong sini ang akon pinakamadalom nga panghunahuna.”—Sal. 16:7.

7. Ano ang himuon naton kon mapainubuson kita?

⁷ Kon mapainubuson kita, iaplikar naton ang laygay sang Pulong sang Dios para mabag-o naton ang aton indi husto nga panghunahuna antes pa kita maimpluwensiahan sini nga maghimo sang sala. Daw pareho lang nga ginasilingan kita sang Pulong sang Dios: “Amo ini ang dalan. Lakat kamo sa sini.” Ginapaandaman kita sini kon nagtalang kita ukon kon nagapakadto kita sa wala ukon sa tuo. (Isa. 30:21) Kon pamatian naton si Jehova, para gid ini sa aton kaayuhan. (Isa. 48:17) Halimbawa, mahimo magbatyag kita sing kahuya kon laygayan kita sang iban. Pero malikawan naton ini kon pamatian naton si Jehova. Kag magasuod pa gid kita kay Jehova kay kabalo kita nga ginakabig niya kita bilang pinalangga niya nga mga anak.—Heb. 12:7.

8. Suno sa Santiago 1:22-25, ano ang himuon naton sa Pulong sang Dios nga ginpaanggid sa isa ka espiho?

⁸ Ang Pulong sang Dios daw pareho sa isa ka espiho. (Basaha ang Santiago 1:22-25.) Ang kalabanan sa aton nagapangespiho kada aga antes kita maghalin sa aton balay. Ginahimo naton ini kay gusto naton makita kon bala may kinahanglan kita bag-uhon sa aton hitsura antes kita makita sang iban. Gani kon ginabasa naton ang Biblia kada adlaw, buligan kita sini nga makita ang mga dapat naton bag-uhon sa aton panghunahuna kag panimuot. Natalupangdan sang madamo nga kauturan nga nakabulig gid sa ila ang pagbasa sang mga teksto nga ara sa bukleta nga Pag-usisa sa Kasulatan  Adlaw-adlaw. Ginahimo nila ini kada aga antes sila maghalin sa ila balay. Ginapanikasugan nila nga ang ila mabasa amo ang mag-impluwensia sa ila panghunahuna. Dayon sa bilog nga adlaw, ginatinguhaan nila nga iaplikar ang laygay sang Pulong sang Dios. Magluwas sa sini, dapat man naton tun-an kag pamalandungan ang Pulong sang Dios kada adlaw. Isa ini sa pinakaimportante nga dapat naton himuon para makapabilin kita sa mabudlay nga dalan nga nagapadulong sa kabuhi.

9. Ngaa posible nga laygayan ka sang imo abyan?

⁹ Naeksperiensiahan mo na bala nga maglakat sa dalan nga nagapahilayo sa imo kay Jehova? (Sal. 73:2, 3) Sang ginlaygayan ka sang imo hamtong nga abyan, ginpamatian mo bala sia kag gin-aplikar mo ang iya laygay? Kon huo, maayo gid ang imo ginhimo kag sigurado gid nga ginpasalamatan mo ang imo abyan kay ginpaandaman ka niya.—Hulu. 1:5.

10. Ano ang himuon mo kon laygayan ka sang imo abyan?

¹⁰ Ginapahanumdom kita sang Pulong sang Dios: “Ang matutom nga abyan nagasabdong bisan pa makasakit ini sa balatyagon.” (Hulu. 27:6) Ano ang buot silingon sini? Binagbinaga ini nga halimbawa: Ibutang ta nga matabok ka sa dalan nga madamo sing salakyan. Nawili ka sa imo cell phone gani madiretso ka lang tani tabok nga wala nagatulok kon bala may salakyan. Maayo lang kay ginbutong ka sang imo abyan pahigad. Grabe gid kahugot ang pag-uyat niya sa imo butkon gani naglagob ini. Pero diutayan ka lang tani mabungguan kon wala niya ini ginhimo. Bisan pa nagpalanakit ang imo butkon sing pila ka adlaw bangod sang lagob, maakig ka bala sa imo abyan bangod gulpi ka lang niya ginbutong? Sigurado nga indi. Malipay ka pa gani kay ginbuligan ka niya. Mahimo masakitan ka man kon laygayan ka sang imo abyan parte sa imo mga ginsiling ukon ginhimo nga nagalapas sa kasuguan sang Dios. Pero indi ka dapat maakig sa iya kay ginlaygayan ka niya. Kabuangan gid kon maakig ka. (Man. 7:9) Sa baylo, pasalamati ang imo abyan kay nangisog sia nga laygayan ka.

11. Ano ang posible nga rason kon ngaa indi pagpamatian sang isa ang maayo nga laygay sang iya abyan?

¹¹ Ano ang posible nga rason kon ngaa indi pagpamatian sang isa ang maayo nga laygay sang iya abyan? Bugal. Gusto pamatian sang bugalon nga mga tawo ang “nagapakalam sang ila mga dulunggan.” Kag “indi sila magpamati sa kamatuoran.” (2 Tim. 4:3, 4) Para sa ila, indi nila kinahanglan ang laygay kay nagahunahuna sila nga mas maalam sila ukon mas importante sila sangsa iban. Pero si apostol Pablo nagsulat: “Kon ang isa nagahunahuna nga importante sia apang indi man gali, ginadaya lang niya ang iya kaugalingon.” (Gal. 6:3) Ginpaathag ini sing maayo ni Hari Solomon. Nagsulat sia: “Mas maayo pa ang imol nga pamatan-on nga maalamon sangsa tigulang nga hari nga buangbuang, nga wala na nagapamati sa laygay.”—Man. 4:13.

12. Ano ang matun-an naton kay apostol Pedro nga mabasa sa Galacia 2:11-14?

¹² Talupangda ang ginhimo ni apostol Pedro sang ginsaway sia ni apostol Pablo sa atubangan sang iban. (Basaha ang Galacia 2:11-14.) Puede kuntani nga maakig si Pedro bangod sa ginsiling ni Pablo sa iya kag bangod ginsaway sia ni Pablo sa atubangan sang iban. Pero maayo ang ginhimo ni Pedro. Ginbaton niya ang laygay kag wala sia nagdumot kay Pablo. Sang ulihi, gintawag pa gani niya si Pablo nga “hinigugma nga utod.”—2 Ped. 3:15.

13. Ano ang dapat naton tandaan kon nagalaygay kita sa iban?

¹³ Kon sa banta mo dapat laygayan ang imo abyan, ano ang dapat mo tandaan? Antes mo istoryahon ang imo abyan, pamangkuta ang imo kaugalingon, ‘Indi ayhan nga “tuman [lang ako] ka matarong”?’ (Man. 7:16) Ang tuman ka matarong nga tawo nagahukom sa iban base lang sa iya opinyon kon ano ang husto kag sala. Wala sia nagahukom base sa kasuguan ni Jehova, kag indi sia maluluy-on. Kon nahunahuna mo na ini sing maayo kag nagdesisyon ka nga dapat gid istoryahon  ang imo abyan, ipaathag sa iya kon ano gid ang problema kag maggamit sing mga pamangkot nga makabulig sa iya nga marealisar ang iya sala. Siguraduha nga ang imo laygay nabase sa Biblia, kag dumduma nga ang imo abyan manabat kay Jehova, indi sa imo. (Roma 14:10) Indi magsalig sa imo kaugalingon nga paghangop kundi sa kaalam nga ara sa Pulong sang Dios, kag iluga ang kaluoy ni Jesus kon nagalaygay ka. (Hulu. 3:5; Mat. 12:20) Ngaa? Bangod hukman kita ni Jehova depende kon bala ginpakitaan naton sing kaluoy ang iban ukon wala.—Sant. 2:13.

14. Ano ang ginagamit sang organisasyon sang Dios para buligan kita?

¹⁴ Ginagiyahan kita ni Jehova sa dalan nga nagapadulong sa kabuhi paagi sa iya organisasyon. Ginagamit sini nga organisasyon ang mga video, mga publikasyon, kag ang mga miting para buligan kita nga iaplikar ang mga laygay sang Pulong sang Dios. Masaligan gid ang mga impormasyon nga aton ginabaton kay ginbase ini sa Biblia. Kon nagadesisyon ang Nagadumala nga Hubon parte sa pinakamaayo nga paagi sang pagbantala, nagapatuytoy sila sa balaan nga espiritu. Pero regular man nila nga ginabinagbinag liwat ang ila mga desisyon para mabal-an kon may dapat bag-uhon. Ginahimo nila ini bangod “ang danyag sini nga kalibutan nagabag-o,” kag dapat mag-adjust ang organisasyon sang Dios sa bag-o nga mga kahimtangan.—1 Cor. 7:31.

15. Ano nga pagbag-o ang naeksperiensiahan sang pila ka manugbantala?

¹⁵ Kon ang organisasyon sang Dios may bag-o nga paathag parte sa isa ka panudlo sang Biblia, ginabaton naton ini. Kag kon may ginahatag ini nga panuytoy parte sa kon ano ang maayo kag malain, ginasunod naton ini. Pero ano ang reaksion naton kon ang organisasyon sang Dios may ginhimo nga pagbag-o nga may epekto mismo sa aton kabuhi? Halimbawa, sining nagligad nga mga tinuig, daku katama ang gingasto sa pagpatindog kag pagmentinar sang mga pasilidad nga ginagamit naton sa pagsimba. Gani nagdesisyon ang Nagadumala nga Hubon, nga kon posible, madamo nga kongregasyon ang maggamit sang Kingdom Hall. Bangod sini nga pagbag-o, may mga kongregasyon nga gintingob. Halimbawa, ang duha ka kongregasyon ginhimo nga isa na lang. Kag may mga Kingdom Hall nga ginbaligya. Gani ang pondo sang organisasyon nagamit sa pagpatindog sang mga Kingdom Hall sa mga lugar nga nagakinahanglan gid sini. Kon isa ikaw sa naapektuhan sa sini nga pagbag-o, mahimo nga mabudlay ini para sa imo. Naglayo ang ginabiyahe sang pila ka manugbantala  para makatambong sa mga miting. Ang pila ka manugbantala nga nagpangabudlay para mapatindog ukon mamentinar ang Kingdom Hall natingala kon ngaa ibaligya ini. Mahimo nagabatyag sila nga kanugon lang sang ila tion kag pagpangabudlay. Pero ginasuportahan nila ini nga pagbag-o, gani dapat gid sila dayawon kag pasalamatan.

16. Kon iaplikar naton ang laygay sa Colosas 3:23, 24, paano ini makabulig sa aton nga mangin malipayon gihapon?

¹⁶ Mangin malipayon kita gihapon kon dumdumon naton nga para kay Jehova ang tanan nga ginahimo naton kag sia ang nagatuytoy sang iya organisasyon. (Basaha ang Colosas 3:23, 24.) Maayo nga halimbawa si Hari David parte sa paghatag sing donasyon para mapatindog ang templo. Nagsiling sia: “Sin-o gid bala ako kag ang akon katawhan, nga dapat pa kami maghatag sing kinabubut-on nga mga dulot pareho sini? Kay ang tanan nga butang halin sa imo, kag ginahatag namon sa imo ang nagahalin sa imo.” (1 Cron. 29:14) Kon nagahatag kita sing donasyon, ginahatag man naton kay Jehova ang naghalin sa iya. Pero ginapasalamatan gid ni Jehova ang tion, kusog, kag kuarta nga ginahatag naton para suportahan ang hilikuton nga ginapahimo niya.—2 Cor. 9:7.

17. Ngaa indi kita dapat maluyahan sing buot kon kinahanglan naton maghimo sang mga pagbag-o?

¹⁷ Para makapabilin kita sa mabudlay nga dalan nga nagapadulong sa kabuhi, dapat naton sundon sing maayo ang halimbawa ni Jesus. (1 Ped. 2:21) Kon narealisar mo nga kinahanglan mo maghimo sang mga pagbag-o, indi ka dapat maluyahan sing buot. Ang matuod, dapat ka malipay kay ginapakita sini nga gusto mo gid tumanon ang mga panuytoy ni Jehova. Tandai nga kabalo si Jehova nga indi kita perpekto, gani wala niya ginapaabot nga perpekto gid naton nga masunod ang halimbawa ni Jesus.

18. Ano ang dapat naton himuon para padyaan kita?

¹⁸ Kabay pa nga magpokus kita tanan sa palaabuton kag mangin handa kita nga maghimo sang mga pagbag-o sa aton panimuot, panghunahuna, kag mga ginahimo. (Hulu. 4:25; Luc. 9:62) Mangin mapainubuson kita, ‘padayon nga magkasadya, kag magpasibu.’ (2 Cor. 13:11) Kon himuon naton ini, ‘ang Dios sang gugma kag paghidait mangin kaupod naton.’ Buligan niya kita nga mangin malipayon subong kag hatagan niya kita sang kabuhi nga wala sing katapusan sa bag-ong kalibutan.