1. Ano ang posible nga ipamangkot naton sa aton kaugalingon?

KABALO kita nga malapit na lang laglagon ang butig nga relihion, ang pagsalakay sang Gog sang Magog, kag ang inaway sang Armageddon. Nabalaka ka bala kon kaisa kon mahunahuna mo ini? May tion bala nga napamangkot mo ang imo kaugalingon, ‘Makapabilin ayhan ako nga matutom kon mag-abot na ining makahaladlok nga mga hitabo?’ Kon nahunahuna mo na ini nga mga pamangkot, makabulig gid sa imo ini nga artikulo. Ginabinagbinag sa sini ang ginsiling ni Jesus sa iya mga disipulo: “Indi kamo magkasubo. Magtuo kamo.” (Juan 14:1) Kon mabakod ang aton pagtuo, mangin kalmado kita ano man ang matabo sa palaabuton.

2. Paano naton mapabakod ang aton pagtuo, kag ano ang binagbinagon naton sa sini nga artikulo?

² Kon binagbinagon naton ang ginahimo naton kon ginatilawan ang aton pagtuo, makabulig ini sa aton nga mabal-an kon ano ang dapat naton himuon para magbakod ang aton pagtuo. Ano ang ginahimo naton kon ginatilawan kita? Kon pamalandungan naton ini nga pamangkot, mabal-an naton kon diin kita mapokus para pabakuron ang aton pagtuo. Sa kada tion nga mabatas naton ang pagtilaw, mas nagabakod ang aton pagtuo. Makabulig ini sa aton nga mabatas ang mga pagtilaw sa palaabuton. Sa sini nga artikulo, binagbinagon naton ang apat ka sitwasyon nga naeksperiensiahan sang mga disipulo ni Jesus. Ginapakita sini nga kinahanglan nila pabakuron ang ila pagtuo. Dayon, binagbinagon naton kon paano naton mabatas ang pareho sini nga mga problema subong, kag kon paano ini makabulig sa aton nga mangin handa sa matabo sa palaabuton.

3. Suno sa Mateo 6:30, 33, ano ang gusto ipahangop sa aton ni Jesus parte sa pagtuo?

³ Gusto gid sang ulo sang pamilya nga amanan sang bastante nga pagkaon, bayo, kag ilistaran ang iya asawa kag kabataan. Indi  ini mahapos himuon kon kaisa sa sining mabudlay nga sitwasyon. Nadulaan sang obra ang pila naton ka kauturan, kag wala sila nakakita sang bag-o nga obra bisan pa sang ila mga pagpanikasog. May iban naman nga ginhatagan sang obra, pero ginpangindian nila ini kay nagalapas ini nga obra sa mga prinsipio sa Biblia. Sa sini nga mga sitwasyon, dapat mabakod ang aton pagtuo nga amanan gid ni Jehova ang aton pamilya. Ginsiling ini ni Jesus sa iya mga disipulo sa Sermon sa Bukid. (Basaha ang Mateo 6:30, 33.) Kon kumbinsido gid kita nga indi kita pagpabay-an ni Jehova, makapokus kita sa pag-alagad sa iya. Kon mangin maathag sa aton nga ginabuligan gid kita ni Jehova sa aton mga kinahanglanon, mas magasuod pa gid kita sa iya kag magabakod ang aton pagtuo.

4-5. Ano ang nakabulig sa isa ka pamilya sang nagkaproblema sila parte sa ila mga kinahanglanon?

⁴ Binagbinaga kon paano ginbuligan ni Jehova ang isa ka pamilya sa Venezuela sang nagkaproblema sila parte sa ila mga kinahanglanon. Sang una, may uma ang pamilya Castro, gani bastante ang ila kuarta para sa ila mga kinahanglanon. Pero ginkuha sang armado nga mga tawo ang ila propiedad kag ginpahalin sila. Ang amay nga si Miguel nagsiling: “Subong, nagapanguma na lang kami sa gamay nga duta nga ginapanag-iyahan sang iban. Ang una ko gid nga ginahimo kada adlaw amo ang pagpangamuyo kay Jehova nga hatagan kami sang amon mga kinahanglanon sa sina nga adlaw.” Mabudlay gid ang ila sitwasyon, pero nagatuo gid sila nga masarangan sang aton mahigugmaon nga Amay nga iaman ang ila mga kinahanglanon kada adlaw. Bangod sini, regular nga naga-attend sa mga miting sang kongregasyon kag nagabantala ang pamilya Castro. Ang pag-alagad kay Jehova amo ang pinakaimportante sa ila kabuhi, kag ginaamanan sila ni Jehova sang ila mga kinahanglanon.

⁵ Sa sining mabudlay nga sitwasyon, ginpabaloran ni Miguel kag sang iya asawa nga si Yurai ang pag-atipan ni Jehova sa ila. Kon kaisa, ginagamit ni Jehova ang mga kauturan para hatagan sila sang pila nila ka kinahanglanon ukon para buligan si Miguel nga makakita sang obra. Kon kaisa naman, ginagamit ni Jehova ang branch office para hatagan sila sang pila nila ka kinahanglanon. Wala gid sila ginpabay-an ni Jehova. Gani nagbakod ang pagtuo sang ila pamilya. Pagkatapos masugid sang ila kamagulangan nga anak nga si Yoselin ang isa ka halimbawa kon paano sila ginbuligan ni Jehova, nagsiling sia: “Makapalig-on gid nga makita kon paano kami ginbuligan ni Jehova. Para sa akon, isa sia ka abyan nga handa gid pirme magbulig sa akon.” Nagsiling pa sia: “Ang mga problema nga naeksperiensiahan sang amon pamilya nagbulig sa amon nga mangin handa sa mas mabudlay pa gid nga mga problema sa palaabuton.”

6. Paano mo mapabakod ang imo pagtuo kon nagapamigado ka?

⁶ Nagapamigado ka bala subong? Mabudlay gid ang imo sitwasyon. Pero puede mo gihapon mapabakod ang imo pagtuo. Mangamuyo kay Jehova kag basaha ang ginsiling ni Jesus sa Mateo 6:25-34 kag pamalandungi ini. Binagbinaga ang mga eksperiensia sa aton tion subong nga nagapamatuod nga ginaamanan ni Jehova ang mga nagahimo sang ila bug-os nga masarangan sa pag-alagad sa  iya. (1 Cor. 15:58) Kon himuon mo ini, magabakod ang imo pagtuo nga buligan ka sang aton Amay sa langit kay ginbuligan man niya ang mga may pareho sa imo nga sitwasyon. Kabalo sia kon ano ang imo mga kinahanglanon, kag kabalo sia kon paano ini ihatag sa imo. Kon maeksperiensiahan mo ang pagbulig ni Jehova, magabakod ang imo pagtuo kag makabulig ini sa imo nga mabatas ang mas mabudlay nga mga problema sa palaabuton.—Hab. 3:17, 18.

7. Suno sa Mateo 8:23-26, paano natilawan ang pagtuo sang mga disipulo sang nag-abot “ang mabaskog nga unos”?

⁷ Sang ara si Jesus kag ang iya mga disipulo sa sakayan, hinali lang nag-abot ang mabaskog nga unos. Gingamit ni Jesus ini nga sitwasyon para buligan sila nga mahangpan nga kinahanglan nila pabakuron ang ila pagtuo. (Basaha ang Mateo 8:23-26.) Grabe gid kabaskog sang unos kag nasudlan na sang tubig ang sakayan, pero mahamuok gihapon nga nagakatulog si Jesus. Hinadlukan gid ang mga disipulo, gani ginpukaw nila sia kag ginpangabay nga luwason sila. Ginsilingan sila ni Jesus: “Ngaa hinadlukan gid kamo, kamo nga diutay sing pagtuo?” Dapat nahangpan sining nahadlok nga mga disipulo nga masarangan gid ni Jehova nga amligan si Jesus kag ang mga kaupod niya. Ano ang matun-an naton sa sini? Ang mabakod nga pagtuo makabulig sa aton nga mabatas “ang mabaskog nga unos.” Posible nga matuod ini nga bagyo ukon bisan ano nga problema nga daw pareho sang bagyo.

8-9. Paano natilawan ang pagtuo ni Anel, kag ano ang nakabulig sa iya?

⁸ Binagbinaga ang eksperiensia ni Anel, nga isa ka dalaga nga sister sa Puerto Rico. Nagbakod ang iya pagtuo bangod nabatas niya ang isa ka mabudlay nga problema. “Ang mabaskog nga unos” nga nag-abot sa iya isa gid ka matuod nga bagyo. Sang 2017, naguba ang balay ni Anel bangod sang bagyo nga Maria. Bangod sang bagyo, nadulaan man sia sang obra. “Sa sining mabudlay nga sitwasyon, grabe gid ang akon nga kabalaka,” siling ni Anel, “pero nabuligan ako sang pagpangamuyo nga magsalig kay Jehova kag indi magpadaug sa kabalaka.”

⁹ Nagsiling si Anel nga nakabulig man sa iya ang iya pagtuman para mabatas niya ang iya mga problema. Nagsiling sia: “Ang pagtuman sa mga panuytoy sang organisasyon ni Jehova nakabulig sa akon nga mangin kalmado. Ginbuligan ako ni Jehova paagi sa mga kauturan. Ginpalig-on nila ako kag ginhatagan nila ako sang akon mga kinahanglanon.” Nagsiling pa sia: “Sobra pa sa kinahanglan ko ang ginhatag sa akon ni Jehova, kag nagbakod gid ang akon pagtuo.”

10. Ano ang puede mo himuon kon may ginabatas ka nga mabudlay gid nga problema?

¹⁰ May ginabatas ka bala nga mabudlay gid nga problema? Posible nga mabudlay ang imo kahimtangan bangod sang kalamidad. Ukon basi nagaluya gid ang imo buot kag indi ka kabalo sang imo himuon bangod sang malala nga balatian. Posible nga nabalaka ka kon kaisa, pero indi gid mag-untat sa pagsalig kay Jehova. Magpalapit sa iya paagi sa hanuot nga pangamuyo. Pabakura ang imo pagtuo paagi sa pagpamalandong kon  paano ka ginbuligan ni Jehova sang una. (Sal. 77:11, 12) Makasalig ka nga indi ka gid pagpabay-an ni Jehova.

11. Ngaa dapat gid naton tumanon ang mga nagapanguna sa aton?

¹¹ Ano pa gid ang makabulig sa imo para mabatas mo ang mga problema? Ginsambit ni Anel ang parte sa pagtuman. Saligi ang mga ginasaligan ni Jehova kag ni Jesus. Kon kaisa, daw indi naton mahangpan ang mga panuytoy nga ginahatag sang gintangdo nga mga nagapanguna. Pero ginapakamaayo ni Jehova ang mga nagatuman. Ginapakita sang iya Pulong kag sang mga eksperiensia sang iya matutom nga mga alagad nga naluwas ang kabuhi sang mga nagatuman. (Ex. 14:1-4; 2 Cron. 20:17) Pamalandungi ini nga mga halimbawa. Kon himuon mo ini, mangin kumbinsido ka pa gid nga dapat mo gid tumanon ang mga panuytoy sang organisasyon ni Jehova subong kag ang mga panuytoy sini sa palaabuton. (Heb. 13:17) Gani indi ka mahadlok sa dakung kapipit-an nga malapit na lang gid matabo.—Hulu. 3:25.

12. Suno sa Lucas 18:1-8, paano makabulig ang pagtuo para mabatas naton ang inhustisya?

¹² Kabalo si Jesus nga matilawan ang pagtuo sang iya mga disipulo bangod sang inhustisya. Para mabuligan sila nga mabatas ini, nagsugid sia sang isa ka ilustrasyon nga mabasa sa libro sang Lucas. Ginsugid ni Jesus ang parte sa isa ka balo nga babayi nga nagbalikbalik sa isa ka indi matarong nga hukom kay nagapangayo sia sang katarungan. Sigurado sia nga buligan sia sang hukom kon indi sia mag-untat sa pagpangabay sa iya. Sang ulihi, ginhimo sang hukom ang iya ginpangabay. Ano ang matun-an naton sa sini? Matarong si Jehova. Gani nagsiling si Jesus: “Kon amo, indi bala hatagan sang Dios sing katarungan ang iya mga pinili nga nagapanawag sa iya adlaw kag gab-i?” (Basaha ang Lucas 18:1-8.) Nagsiling pa si Jesus: “Kon mag-abot ang Anak sang tawo, makakita gid bala sia sini nga pagtuo sa duta?” Kon makaeksperiensia kita sang inhustisya, dapat kita mangin mapinasensiahon kag indi kita dapat mag-untat sa pag-alagad. Paagi sa sini, ginapakita naton nga may mabakod kita nga pagtuo pareho sang balo nga babayi. Kon may amo kita sini nga pagtuo, sigurado kita nga buligan kita ni Jehova. Dapat man kita mangin kumbinsido nga makabulig gid sa aton ang pangamuyo. Kon kaisa, mahimo sabton ni Jehova ang aton pangamuyo sa paagi nga wala naton ginapaabot.

13. Paano nakabulig ang pangamuyo sa isa ka pamilya nga nakaeksperiensia sang inhustisya?

¹³ Binagbinaga ang eksperiensia sang isa ka sister nga si Vero, nga taga-Democratic Republic of the Congo. Ginsalakay ang ila baryo sang mga soldado, gani nagpalagyo si Vero upod ang iya bana nga indi Saksi kag ang ila 15 anyos nga bata nga babayi. Samtang nagapalagyo sila, nakalabay sila sa isa ka dalan nga may nagabantay nga mga soldado. Ginpapundo sila sang mga soldado kag ginpahog sila nga patyon sila. Sang naghibi si Vero, ginpakalma sia sang iya bata. Matunog nga nangamuyo ang iya bata kag sulitsulit niya nga ginsambit ang ngalan ni Jehova sa iya pangamuyo. Pagkatapos niya pangamuyo, ginpamangkot sia sang kumander sang mga soldado, “Inday, sin-o  ang nagtudlo sa imo kon paano mangamuyo?” Nagsabat sia, “Si Nanay ang nagtudlo sa akon, kag gingamit niya ang pangamuyo sa Mateo 6:9-13 sang gintudluan niya ako.” Ang kumander nagsiling, “Inday, puede na kamo makalakat sang imo mga ginikanan, kag kabay pa nga amligan kamo sang inyo Dios nga si Jehova.”

14. Ano ang posible nga magtilaw sang aton pagtuo, kag ano ang makabulig sa aton nga makabatas?

¹⁴ Ang mga eksperiensia pareho sini nagatudlo sa aton nga importante gid ang pangamuyo. Pero ano abi kon wala dayon ginsabat ang imo pangamuyo ukon indi tumalagsahon ang sabat sa sini? Pareho sa balo sa ilustrasyon ni Jesus, padayon nga mangamuyo, kag magsalig nga indi ka pagpabay-an sang aton Dios kag sabton gid niya ang imo pangamuyo sa ulihi. Padayon nga magpangabay kay Jehova nga hatagan ka sang iya balaan nga espiritu. (Fil. 4:13) Tandai nga sa ulihi malipatan mo na ang imo gin-antos bangod sang madamo nga pagpakamaayo nga ihatag ni Jehova sa imo. Kon ginabatas mo ang mga pagtilaw sa bulig ni Jehova, mas magabakod ka pa gid kag mabatas mo ang mga pagtilaw sa palaabuton.—1 Ped. 1:6, 7.

15. Suno sa Mateo 17:19, 20, ano nga kabudlayan ang naeksperiensiahan sang mga disipulo ni Jesus?

¹⁵ Gintudluan ni Jesus ang iya mga disipulo nga buligan sila sang pagtuo nga mabatas ang mga kabudlayan. (Basaha ang Mateo 17:19, 20.) Isa ka bes, indi nila matabog ang isa ka demonyo bisan pa nahimo na nila ini sing madamo nga beses. Ngaa? Ginpaathag ni Jesus nga kinahanglan nila dugangan ang ila pagtuo. Ginsilingan niya sila nga kon bastante ang ila pagtuo, masarangan nila ang bisan ano nga kabudlayan bisan pa daw bukid ini kadaku. Subong, posible man kita makaeksperiensia sang mga kabudlayan nga daw indi naton masarangan.

16. Sang ginpatay ang bana ni Geydi, paano nakabulig ang pagtuo para mabatas niya ang grabe nga kasubo?

¹⁶ Binagbinaga ang eksperiensia sang isa ka sister nga si Geydi nga taga-Guatemala. Ginpatay ang iya bana nga si Edi samtang nagapauli sila halin sa isa ka miting sang kongregasyon. Paano nakabulig ang pagtuo para mabatas ni Geydi ang grabe nga kasubo? Nagsiling sia: “Gintugyan ko kay Jehova ang akon ginabatyag paagi sa pangamuyo, gani nagtawhay ang akon hunahuna. Nabatyagan ko nga ginaatipan ako ni Jehova paagi sa akon pamilya kag mga abyan sa kongregasyon. Bangod ginahimo ko ang akon bug-os nga masarangan sa pag-alagad kay Jehova, naghaganhagan ang kasakit nga akon ginabatyag. Nabuligan man ako sini nga magpokus lang sa nagakatabo kada adlaw kag indi sobra nga mabalaka sa masunod nga adlaw. Natun-an ko sa akon eksperiensia nga bisan ano man nga pagtilaw ang maeksperiensiahan ko sa palaabuton, mabatas ko ini sa bulig ni Jehova, ni Jesus, kag sang organisasyon.”

17. Ano ang puede naton himuon kon may problema kita nga daw bukid kadaku?

¹⁷ Nagapangasubo ka bala bangod napatay ang imo pinalangga? Pabakura ang imo pagtuo sa paglaum nga pagkabanhaw paagi sa pagtuon sa mga kasaysayan sang mga ginbanhaw nga mabasa sa Biblia. Nagapangasubo ka bala bangod na-disfellowship  ang isa ka miembro sang inyo pamilya? Magtuon para mapamatud-an mo sa imo kaugalingon nga ang pagdisiplina sang Dios amo ang pinakamaayo. Ano man ang imo problema, gamita ini nga sitwasyon para mapabakod mo ang imo pagtuo. Isugid kay Jehova kon ano gid ang imo ginabatyag. Indi pagbatasa ang imo problema nga nagaisahanon, kundi magpabilin nga suod sa imo mga kauturan. (Hulu. 18:1) May mga tion nga makahibi ka kon madumduman mo ang natabo sa imo, pero padayon gihapon nga himua ang mga hilikuton nga makabulig sa imo nga makabatas. (Sal. 126:5, 6) Padayon nga mag-attend sa mga miting, magbantala, kag magbasa sang Biblia. Kag hunahunaa pirme ang dalayawon nga mga pagpakamaayo nga ginpromisa ni Jehova nga ihatag niya sa imo sa palaabuton. Kon maeksperiensiahan mo ang pagbulig ni Jehova, mas magabakod pa gid ang pagtuo mo sa iya.

18. Kon marealisar mo nga indi mabakod ang imo pagtuo, ano ang puede mo himuon?

¹⁸ Bangod sang imo mga problema subong ukon sang una, mahimo marealisar mo nga indi mabakod ang imo pagtuo. Pero indi ka dapat maluyahan sing buot. Gamita ini nga sitwasyon para pabakuron ang imo pagtuo. Ipangabay man ang pareho sa ginpangabay sang mga apostoles ni Jesus sang nagsiling sila: “Dugangi ang amon pagtuo.” (Luc. 17:5) Pamalandungi man ang mga eksperiensia nga ginbinagbinag naton sa sini nga artikulo. Pareho kanday Miguel kag Yurai, dumduma ang tanan nga tion nga ginbuligan ka ni Jehova. Pareho sa bata ni Vero kag kay Anel, hanuot nga mangamuyo kay Jehova, ilabi na kon may daku ka nga problema. Kag pareho kay Geydi, tandai nga posible nga gamiton ni Jehova ang aton pamilya ukon mga abyan para buligan kita. Kon nagapabulig ka kay Jehova para mabatas ang imo mga problema subong, mas magabakod pa gid ang imo pagsalig nga buligan ka niya nga mabatas ang bisan ano nga problema sa palaabuton.

19. Sa ano sigurado si Jesus, kag sa ano ka makasigurado?

¹⁹ Ginbuligan ni Jesus ang iya mga disipulo nga mahangpan nga kinahanglan nila pabakuron ang ila pagtuo, pero nagsalig gid sia nga mabatas nila ang mga pagtilaw sa palaabuton sa bulig ni Jehova. (Juan 14:1; 16:33) Sigurado gid si Jesus nga makalampuwas ang daku nga kadam-an sa dakung kapipit-an bangod sang ila mabakod nga pagtuo. (Bug. 7:9, 14) Malakip ka bala sa sining daku nga kadam-an? Paagi sa bulig ni Jehova, malakip ka sa ila kon himuon mo ang imo bug-os nga masarangan subong nga pabakuron ang imo pagtuo.—Heb. 10:39.