1-2. (a) Ngaa dapat magsalig kay Jehova ang mga bag-ong kasal? (Salmo 37:3, 4) (b) Ano ang binagbinagon naton sa sini nga artikulo?

KON kalaslon ka na ukon bag-o ka lang nakasal, sigurado gid nga nalipay ka nga makaupod ang isa nga palangga mo gid. Pero may mga kabudlayan nga maeksperiensiahan ang mga mag-asawa, kag may importante nga mga desisyon nga dapat sila himuon. Nagadepende sa inyo mga desisyon kag sa inyo ginahimo kon makaeksperiensia kamo sang mga kabudlayan kon bala mangin malipayon kamo sa sulod sang madamo nga tinuig. Kon magsalig kamo kay Jehova, makahimo kamo sang maayo nga mga desisyon, magabakod ang inyo pag-asawahay, kag mangin mas malipayon kamo. Kon indi ninyo pagsundon ang laygay sang Dios, posible gid nga makaeksperiensia kamo sang mga kabudlayan. Magaresulta ini sa mga problema sa inyo pag-asawahay, kag indi kamo mangin malipayon.—Basaha ang Salmo 37:3, 4.

² Para sa mga bag-ong kasal ini nga artikulo, pero binagbinagon man sa sini ang mga problema nga posible nga maeksperiensiahan sang tanan nga mag-asawa. Binagbinagon sa sini ang matun-an naton sa halimbawa sang matutom nga mga lalaki kag babayi nga ginsambit sa Biblia. Ang mga matun-an naton sa sini maaplikar naton sa aton kabuhi, pati na sang mga mag-asawa. Binagbinagon man naton ang matun-an naton sa mga eksperiensia sang pila ka mag-asawa sa aton tion subong.

3-4. Ano nga mga problema ang posible nga maeksperiensiahan sang mga bag-ong kasal?

³ May pila ka tawo nga nagapalig-on sa mga bag-ong kasal nga sundon ang pagkabuhi sang kalabanan nga tawo. Halimbawa,  gina-pressure sila sang ila mga ginikanan kag iban pa nila nga mga paryente nga magbata dayon. Ukon posible nga palig-unon sila sang ila mga abyan kag mga miembro sang ila pamilya nga magbakal sang balay kag manami nga mga pagkabutang.

⁴ Kon indi sila maghalong, posible nga makahimo sila sang mga desisyon nga magaresulta sa madamo gid nga utang. Bangod sini, posible nga duha gid sila ang magbakabaka obra para mabayaran nila ang ila utang. Bangod sa ila obra, diutay na lang ang ila tion para sa personal nga pagtuon sang Biblia, pangpamilya nga pagsimba, kag pagbantala. Posible pa gani nga indi na sila maka-attend sa pila ka miting kay kinahanglan nila mag-overtime para madugangan ang ila sueldo ukon para indi sila pagpahalinon sa ila obra. Kon amo sini ang matabo, indi na nila madugangan ang ila mahimo sa pag-alagad kay Jehova nga makapahalipay kuntani sa ila.

5. Ano ang matun-an mo sa halimbawa nanday Klaus kag Marisa?

⁵ Madamo nga eksperiensia ang nagapamatuod nga kon magpokus kita sa pagpadamo sing manggad, indi gid kita mangin malipayon. Binagbinaga ang natabo sa mag-asawa nga sanday Klaus kag Marisa. * Sang nagpakasal sila, nag-obra gid sila nga duha para madamo sila sing kuarta kag pagkabutang. Pero indi gid sila malipayon. Nagsiling si Klaus: “Madamo gid kami sing kuarta, pero wala kami nagapanikasog nga dugangan ang amon ginahimo sa pag-alagad kay Jehova. Sa tuod lang, daw indi namon mahangpan ang amon kabuhi kag grabe gid ang amon stress.” Kon pareho sa sini ang inyo sitwasyon, posible nga narealisar man ninyo nga wala gid nagaresulta sa kalipay ang pagpokus sa pagpadamo sing manggad. Pero indi kamo dapat maluyahan sing buot. Binagbinagon naton ang maayo nga halimbawa sang iban nga makabulig sa inyo nga maghimo sang mga pagbag-o. Una naton nga binagbinagon ang matun-an sang mga bana sa halimbawa ni Hari Jehosapat.

6. Sang ginsalakay si Hari Jehosapat kag ang iya katawhan sang madamo nga soldado, paano niya ginsunod ang laygay sa Hulubaton 3:5, 6?

⁶ Mga bana, nagabatyag bala kamo kon kaisa nga daw indi ninyo masarangan ang inyo mga responsibilidad? May matun-an kamo sa halimbawa ni Hari Jehosapat. Responsibilidad ni Jehosapat bilang hari nga amligan ang bilog nga pungsod. Paano niya ginhimo ining mabudlay nga responsibilidad? Ginhimo niya ang iya bug-os nga masarangan para maamligan ang katawhan. Ginpabakod niya ang depensa sang mga siudad sang Juda kag gintipon niya ang sobra 1,160,000 ka maisog nga mga soldado. (2 Cron. 17:12-19) Sang ulihi, dapat solbaron ni Jehosapat ang mabudlay nga problema. Madamo nga soldado ang nagapakadto sa iya para salakayon sia, ang iya pamilya, kag ang iya katawhan. Mga soldado sila halin sa Ammon, Moab, kag kabukiran sang Seir. (2 Cron. 20:1, 2) Ano ang ginhimo ni Jehosapat? Nagpangabay sia kay  Jehova nga buligan sia kag hatagan sing kusog. Ginsunod niya ang laygay nga mabasa sa Hulubaton 3:5, 6. (Basaha.) Mapainubuson nga nangamuyo si Jehosapat, kag mabasa ini sa 2 Cronica 20:5-12. Ginapakita sini nga nagsalig gid sia sa iya mahigugmaon nga Amay sa langit. Paano ginsabat ni Jehova ang pangamuyo ni Jehosapat?

7. Paano ginsabat ni Jehova ang pangamuyo ni Jehosapat?

⁷ Nagpakighambal si Jehova kay Jehosapat paagi sa isa ka Levinhon nga si Jahaziel. Nagsiling si Jehova: “Magtindog kamo sa inyo mga puesto, kag magpahimunong lang, kag tan-awa ninyo ang pagluwas sa inyo ni Jehova.” (2 Cron. 20:13-17) Daw indi man amo sini ang ginahimo sa tion sang inaway. Pero indi tawo ang nagsugo sini sa ila. Si Jehova ang nagsugo sini. Nagtuman si Jehosapat kay nagsalig gid sia sa iya Dios. Sang naglakat sia kag ang iya katawhan para sugataon ang mga kaaway, indi mga soldado ang ginpauna niya, kundi ang mga manug-amba nga wala sing armas. Gintuman ni Jehova ang promisa niya kay Jehosapat, kag ginpierde Niya ang mga kaaway.—2 Cron. 20:18-23.

8. Ano ang matun-an sang mga bana sa halimbawa ni Jehosapat?

⁸ Mga bana, may matun-an kamo sa halimbawa ni Jehosapat. Responsibilidad ninyo nga atipanon ang inyo pamilya, gani ginapanikasugan gid ninyo nga amligan kag amanan ang inyo pamilya. Kon may mga problema, mahimo ginahunahuna ninyo nga masarangan ninyo ini nga solbaron. Pero indi kamo magsalig sa inyo kaugalingon. Sa baylo, hanuot nga mangamuyo kay Jehova nga buligan kamo. Dayon, mangamuyo man kaupod sang inyo asawa. Magpagiya kay Jehova paagi sa pagtuon sang Biblia kag sang mga publikasyon halin sa organisasyon sang Dios, kag iaplikar ang mga laygay sini. Mahimo nga indi magkomporme ang iban sa inyo mga desisyon nga ginbase sa Biblia, kag posible nga magsiling sila nga indi husto ang inyo mga desisyon. Mahimo nga magsiling sila nga ang kuarta amo ang makahatag sang pinakamaayo nga pangamlig sa inyo pamilya. Pero dumduma ang halimbawa ni Jehosapat. Nagsalig sia kay Jehova kag ginpamatud-an niya ini paagi sa iya mga ginhimo. Wala ginpabay-an ni Jehova ang iya matutom nga alagad, kag indi ka man niya pagpabay-an. (Sal. 37:28; Heb. 13:5) Ano pa ang puede himuon sang mga mag-asawa para mangin malipayon sila?

9. Ano ang masiling naton parte kay manalagna Isaias kag sa iya asawa?

⁹ Ang pag-alagad kay Jehova amo ang pinakaimportante kay Isaias kag sa iya asawa. Isa ka manalagna si Isaias, kag posible nga nagpanagna man ang iya asawa kay gintawag sia nga “manalagna nga babayi.” (Isa. 8:1-4) Bilang mag-asawa, gin-una ni Isaias kag sang iya asawa ang pag-alagad kay Jehova. Maayo gid sila nga halimbawa para sa mga mag-asawa subong.

10. Paano makabulig sa mga mag-asawa ang pagtuon sang mga tagna sa Biblia para mahimo nila ang ila bug-os nga masarangan sa pag-alagad kay Jehova?

¹⁰ Mailog man sang mga mag-asawa subong si Isaias kag ang iya asawa paagi sa paghimo sang ila bug-os nga masarangan sa pag-alagad kay Jehova. Mapabakod nila ang ila pagsalig kay Jehova kon tun-an nila nga magkaupod ang mga tagna sa Biblia kag kon paano ini pirme nagakatuman. * (Tito 1:2) Puede nila pamalandungan kon ano ang ila bahin sa katumanan sang pila ka tagna sa Biblia. Halimbawa, makabulig  sila para matuman ang tagna ni Jesus nga ang maayong balita ibantala sa bug-os nga duta antes mag-abot ang katapusan. (Mat. 24:14) Kon mas kumbinsido sila nga mag-asawa nga nagakatuman gid ang mga tagna sa Biblia, mas mapalig-on sila sini nga himuon ang ila bug-os nga masarangan sa pag-alagad kay Jehova.

11. Ano ang ginhimo nanday Priscila kag Aquila, kag ngaa?

¹¹ May matun-an ang bataon nga mga mag-asawa sa Judiyo nga mag-asawa nga sanday Priscila kag Aquila nga nagaistar sa siudad sang Roma. Nabatian nila ang maayong balita parte kay Jesus kag nangin Cristiano sila. Sigurado gid nga kontento sila sa ila kabuhi. Pero gulpi ini nga nagbag-o sang nagmando si Emperador Claudio sa tanan nga Judiyo nga maghalin sa Roma. Hunahunaa ang epekto sini kanday Aquila kag Priscila. Dapat nila biyaan ang lugar nga ila naandan, mangita sang bag-o nga ilistaran, kag mag-umpisa sa bag-o nga lugar sang ila obra nga paghimo sing tolda. Nangin rason bala ini nga mga kabudlayan para indi nila pag-unahon ang Ginharian? Posible gid nga nabal-an mo ang sabat sa sini. Nag-istar sanday Aquila kag Priscila sa Corinto, kag nagbulig sila sa kongregasyon sa sini nga lugar. Kaupod nila si apostol Pablo nga nagapalig-on sa mga kauturan didto. Sang ulihi, nagsaylo sila sa iban nga mga banwa nga nagakinahanglan sang dugang nga manugbantala. (Binu. 18:18-21; Roma 16:3-5) Madamo sila sing nahimo sa ila pag-alagad kag malipayon gid sila.

12. Ngaa dapat istoryahan sang mga mag-asawa ang mga gusto nila himuon sa pag-alagad kay Jehova?

¹² Mailog sang mga mag-asawa subong sanday Priscila kag Aquila kon unahon nila ang Ginharian. Antes pa sila magpakasal, dapat naistoryahan na nila kon ano ang ila gusto himuon sa ila kabuhi. Amo ini ang pinakamaayo nga tion para istoryahan ini. Kon magkaupod sila nga magdesisyon parte sa mga gusto nila himuon sa pag-alagad kay Jehova kag kon panikasugan nila ini, mas madamo sila sing kahigayunan nga makita nga ginagiyahan sila sang espiritu ni Jehova. (Man. 4:9, 12) Binagbinaga ang eksperiensia nanday Russell kag Elizabeth. Si Russell nagsiling, “Antes kami nagpakasal,  gin-istoryahan namon kon ano ang gusto namon himuon sa amon pag-alagad kay Jehova.” Si Elizabeth nagsiling, “Gin-istoryahan na nga daan namon ini para kon maghimo kami sang desisyon sa ulihi, masigurado namon nga indi ini makaupang sa mga gusto namon himuon sa amon pag-alagad.” Sang ulihi, nagsaylo sanday Russell kag Elizabeth sa Micronesia kay kinahanglan didto ang dugang nga manugbantala.

13. Suno sa Salmo 28:7, ano ang resulta kon magsalig kita kay Jehova?

¹³ Pareho kanday Russell kag Elizabeth, madamo nga mag-asawa ang nagpasimple sang ila kabuhi para mas madamo sila sing tion sa pagbantala kag pagtudlo sa iban. Kon magdesisyon ang mga mag-asawa nga himuon ang ila bug-os nga masarangan sa pag-alagad kay Jehova kag panikasugan nila ini, maayo gid ang resulta. Maeksperiensiahan nila ang pag-atipan ni Jehova, magabakod ang ila pagsalig sa iya, kag mangin matuod sila nga malipayon.—Basaha ang Salmo 28:7.

14. Paano ginpakita ni apostol Pedro kag sang iya asawa nga nagasalig sila sa promisa nga mabasa sa Mateo 6:25, 31-34?

¹⁴ May matun-an man ang mga mag-asawa kay apostol Pedro kag sa iya asawa. Pagligad sang mga anom ka bulan ukon mga isa ka tuig pagkatapos makilala ni apostol Pedro si Jesus, may importante nga desisyon nga dapat himuon si Pedro. Mangingisda si Pedro kag amo ini ang iya palangabuhian. Gani sang gin-agda ni Jesus si Pedro nga magsunod sa iya sing bug-os tion, dapat binagbinagon ni Pedro ang epekto sini sa iya pamilya. (Luc. 5:1-11) Nagdesisyon si Pedro nga updan si Jesus sa iya pagbantala. Maayo gid ang iya desisyon. Kag may rason kita sa pagsiling nga ginsuportahan sang asawa ni Pedro ang iya desisyon. Ginapakita sang Biblia nga may mga tion nga nag-upod sia sa paglakbay ni Pedro pagkatapos mabanhaw si Jesus. (1 Cor. 9:5) Bangod maayo gid nga halimbawa ang asawa ni Pedro, wala nabudlayan si Pedro sa paglaygay sa mga bana kag mga asawa. (1 Ped. 3:1-7) Ginpakita ni Pedro kag sang iya asawa nga nagasalig sila sa promisa ni Jehova nga ihatag Niya sa ila ang ila mga kinahanglanon kon unahon nila sa ila kabuhi ang Ginharian.—Basaha ang Mateo 6:25, 31-34.

15. Ano ang matun-an mo sa eksperiensia nanday Tiago kag Esther?

¹⁵ Kon pila ka tuig na kamo nga nakasal, ano ang puede ninyo himuon para padayon kamo nga magpanikasog nga dugangan ang inyo pag-alagad kay Jehova? Ang isa ka paagi amo ang pagbinagbinag sang mga eksperiensia sang iban nga mag-asawa. Halimbawa, puede ninyo basahon ang mga artikulo nga “Naghalad sang Ila Kaugalingon sing Kinabubut-on.” Nakabulig ini nga mga artikulo sa isa ka mag-asawa sa Brazil nga sanday Tiago kag Esther. Napalig-on sila sini nga mag-alagad sa lugar nga nagakinahanglan sang dugang nga manugbantala. Si Tiago nagsiling, “Sang ginbasa namon kon paano ginbuligan ni Jehova ang iya mga alagad sa aton tion subong, gusto man namon maeksperiensiahan ang paggiya kag pagbulig ni Jehova.” Gani nagsaylo sila sa Paraguay, kag nag-alagad sila sa Portuguese nga kongregasyon sugod sang 2014. Si Esther nagsiling: “Ang isa ka teksto nga paborito gid namon nga duha amo ang Efeso 3:20. Madamo nga beses nga naeksperiensiahan namon nga matuod gid ang ginasiling sini nga teksto sa amon pag-alagad kay Jehova.” Sa sini nga sulat ni Pablo sa mga taga-Efeso, nagpromisa sia nga ihatag ni Jehova ang sobra pa sa aton ginapangayo. Madamo ang pamatuod nga masaligan gid ini nga promisa.

16. Sin-o ang puede pangayuan sang laygay sang bataon nga mga mag-asawa parte sa mga gusto nila himuon sa ila kabuhi?

 ¹⁶ May matun-an ang bataon nga mga mag-asawa sa eksperiensia sang iban nga nagsalig kay Jehova. May pila ka mag-asawa nga madamo nga tinuig na nga nagapayunir. Puede kamo makapangayo sa ila sang laygay parte sa mga gusto ninyo himuon sa inyo pag-alagad. Isa pa ini ka paagi para mapakita ninyo nga nagasalig kamo kay Jehova. (Hulu. 22:17, 19) Mabuligan man sang mga gulang ang bataon nga mga mag-asawa nga hunahunaon ang mga puede pa nila himuon sa pag-alagad kay Jehova kag kon paano nila ini mahimo.

17. Ano ang natabo kanday Klaus kag Marisa, kag ano ang matun-an naton sa ila eksperiensia?

¹⁷ Pero kon kaisa, ang gusto naton himuon sa aton pag-alagad indi amo ang nagakatabo. Binagbinaga ang natabo kanday Klaus kag Marisa nga ginsambit sa umpisa. Pagligad sang tatlo ka tuig pagkatapos sang ila kasal, ginbiyaan nila ang ila lugar kag nagboluntaryo sila sa konstruksion sa branch office sa Finland. Pero indi gali sila puede magtener didto sang sobra sa anom ka bulan. Sang primero, nasubuan gid sila. Pero wala magdugay pagkatapos sini, gin-agda sila sa klase nga nagatudlo sang Arabic nga lenguahe. Subong, malipayon sila nga nagaalagad sa Arabic nga kongregasyon sa iban nga pungsod. Parte sa ila naeksperiensiahan, si Marisa nagsiling: “Nahadlok ako sadto nga himuon ang wala ko pa nahimo, gani kinahanglan ko magsalig sing bug-os kay Jehova. Pero nakita ko nga ginabuligan gid kami ni Jehova sa paagi nga wala namon ginapaabot. Bangod sini, nagbakod pa gid ang akon pagsalig kay Jehova.” Ginapakita sini nga halimbawa nga makasigurado kamo nga pakamaayuhon gid kamo ni Jehova kon magsalig kamo sing bug-os sa iya.

18. Ano ang makabulig sa mga mag-asawa para padayon sila nga magsalig kay Jehova?

¹⁸ Ang pag-asawahay isa ka regalo halin kay Jehova. (Mat. 19:5, 6) Gusto niya nga malipay ang mga mag-asawa sa sini nga regalo. (Hulu. 5:18) Mga bataon nga mag-asawa, usisaa ninyo kon ano ang ginahimo ninyo sa inyo kabuhi. Ginahimo bala ninyo ang inyo bug-os nga masarangan para ipakita kay Jehova nga ginapasalamatan gid ninyo sia sa mga regalo niya sa inyo? Mangamuyo kamo kay Jehova. Pangitaa ninyo sa iya Pulong ang mga prinsipio nga maaplikar ninyo sa inyo kahimtangan. Dayon, tumana ang mga laygay ni Jehova sa inyo. Kon magpokus kamo nga mag-asawa sa pag-alagad kay Jehova, makasalig kamo nga mangin malipayon gid ang inyo kabuhi.