1-2. Ano ang mga rason kon ngaa dapat kita magpakita sing mainunungon nga gugma sa isa kag isa?

MADAMO sing rason kon ngaa dapat kita magpakita sing mainunungon nga gugma sa isa kag isa. Ano ang pila sa sini? Ginasabat ini sang pila ka hulubaton sa Biblia: “Indi pag-ibulag sa imo ang mainunungon nga gugma kag katutom. . . . Dayon matigayon mo ang kahamuot kag maayo nga paghangop sa mga mata sang Dios kag sang tawo.” “Ang tawo nga may mainunungon nga gugma nagadala sing kaayuhan sa iya kaugalingon.” “Ang bisan sin-o nga nagatinguha sang pagkamatarong kag mainunungon nga gugma makatigayon sing kabuhi.”—Hulu. 3:3, 4; 11:17, footnote; 21:21.

² Ginsambit sini nga mga hulubaton ang tatlo ka rason kon ngaa dapat kita magpakita sing mainunungon nga gugma. Una, kon ipakita naton ang mainunungon nga gugma, palanggaon kita sang Dios. Ikaduha, kon ipakita naton ang mainunungon nga gugma, makabenepisyo kita. Halimbawa, mangin abyan naton ang mga tawo nga magaunong sa aton. Ikatlo, kon ipakita naton ang mainunungon nga gugma, mabaton naton ang mga pagpakamaayo sa palaabuton, lakip ang kabuhi nga wala sing katapusan. Gani madamo gid sing rason para tumanon naton ang ginsiling ni Jehova: “Magpakita sing mainunungon nga gugma kag kaluoy sa isa kag isa.”—Zac. 7:9.

3. Ano nga mga pamangkot ang binagbinagon naton sa sini nga artikulo?

³ Sa sini nga artikulo, binagbinagon naton ang mga sabat sa apat ka pamangkot. Sin-o ang dapat naton pakitaan sing mainunungon nga gugma? Ano ang matun-an naton sa libro sang Rut parte sa pagpakita sing mainunungon nga gugma? Paano naton mapakita ang mainunungon nga gugma subong? Ano ang mga benepisyo kon ipakita naton ang mainunungon nga gugma?

4. Paano naton mailog si Jehova sa pagpakita sing mainunungon nga gugma? (Marcos 10:29, 30)

⁴ Sa nagligad nga artikulo, nabinagbinag naton nga ang mga nagahigugma kag nagaalagad kay Jehova amo lang ang ginapakitaan niya sing mainunungon nga gugma. (Dan. 9:4) Gusto naton nga ‘ilugon ang Dios, subong mga anak nga hinigugma.’ (Efe. 5:1) Gani gusto naton nga pakitaan sing mainunungon nga gugma ang aton mga kauturan sa kongregasyon.—Basaha ang Marcos 10:29, 30.

5-6. Ano ang kinaandan nga paghangop sa tinaga nga “pagkamainunungon”?

⁵ Kon nahangpan naton sing maayo kon ano ang mainunungon nga gugma, mas mapakita naton ini sa aton mga kauturan. Para mahangpan pa gid naton sing maayo ang mainunungon nga gugma, binagbinagon naton kon ano ang kinaandan nga paghangop sa tinaga nga “pagkamainunungon.” Ari ang isa ka halimbawa.

 ⁶ Kon madamo na nga tuig nga nagaobra ang isa ka empleyado sa isa ka kompanya, makasiling kita nga mainunungon sia nga empleyado. Pero posible nga wala pa gid niya makilala sing personal ang mga tag-iya sang kompanya. Posible nga may mga tion nga wala sia nagakomporme sa mga kasuguan nga ginapatuman sini nga kompanya. Wala sia nanamian sa kompanya, pero nalipay sia kay may obra sia kag makabaton sia sang sueldo. Padayon sia nga magaobra diri asta magretiro sia, ukon posible nga maghalin sia kon may makita sia nga mas maayo nga obra.

7-8. (a) Ngaa nagapakita sing mainunungon nga gugma ang isa ka tawo? (b) Ngaa binagbinagon naton ang pila ka teksto sa libro sang Rut?

⁷ Gani ang kinalain sang pagkamainunungon nga ginbinagbinag sa  parapo 6 kag sang mainunungon nga gugma amo ang motibo. Sa Biblia, ngaa nagpakita sing mainunungon nga gugma ang mga alagad sang Dios? Indi bangod obligado sila, kundi bangod gusto nila. Binagbinaga ang halimbawa ni David. Gusto niya pakitaan sing mainunungon nga gugma ang iya pinalangga nga abyan nga si Jonatan bisan pa gusto sia patyon sang amay ni Jonatan. Bisan pa pila na ka tuig nga napatay si Jonatan, padayon nga ginpakitaan ni David sing mainunungon nga gugma ang anak ni Jonatan nga si Mefiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Madamo kita sang matun-an parte sa mainunungon nga gugma kon binagbinagon naton ang pila ka teksto sa libro sang Rut sa Biblia. Ano ang matun-an naton parte sa mainunungon nga gugma sa mga karakter sa sini nga libro? Paano naton ini maaplikar sa aton kongregasyon? *

9. Ngaa nahunahuna ni Noemi nga ginapamatukan sia ni Jehova?

⁹ Mabasa naton sa libro sang Rut ang natabo kay Noemi, sa iya umagad nga si Rut, kag kay Boaz. Palangga ni Boaz ang Dios kag paryente sia sang bana ni Noemi. Bangod sang tiggulutom sa Israel, nagsaylo sa Moab si Noemi, ang iya bana, kag ang ila duha ka anak nga lalaki. Samtang didto sila sa Moab, napatay ang bana ni Noemi. Nakapangasawa ang duha niya ka anak, pero masubo gid kay napatay man sila. (Rut 1:3-5; 2:1) Bangod sang mga natabo, grabe gid ang pagluya sang buot ni Noemi. Bangod sang iya kasubo, nahunahuna niya nga ginapamatukan sia ni Jehova. Talupangda ang ginsiling niya parte sa Dios: ‘Ginsilutan ako ni Jehova.’ “Gintugutan sang Labing Gamhanan nga Dios nga mangin mapait gid ang akon kabuhi.”  Nagsiling pa sia: “Si Jehova nga Labing Gamhanan ang nagpamatok kag nagsilot sa akon.”—Rut 1:13, 20, 21.

10. Ano ang reaksion ni Jehova sa ginsiling ni Noemi, kag paano sia ginbuligan ni Jehova?

¹⁰ Ano ang reaksion ni Jehova sa ginsiling ni Noemi? Wala niya ginpabay-an ang iya nasubuan nga alagad. Sa baylo, ginpakitaan niya sia sing empatiya. Nahangpan ni Jehova nga “ang pagpigos makahimo sa maalamon nga tawo nga buangbuang.” (Man. 7:7) Pero kinahanglan ni Noemi ang bulig para marealisar niya nga wala sia ginpabay-an ni Jehova. Paano sia ginbuligan sang Dios? (1 Sam. 2:8) Ginpalig-on niya si Rut para magpakita sing mainunungon nga gugma kay Noemi. Gusto gid ni Rut nga ipakita ang gugma kay Noemi, gani ginbuligan niya sia nga maghaganhagan ang iya kasubo kag ginpahanumdom sa iya nga palangga sia gihapon ni Jehova. Ano ang matun-an naton kay Rut?

11. Ngaa ginabuligan sang mga kauturan ang mga nasubuan ukon naluyahan sing buot?

¹¹ Kon may mainunungon kita nga gugma, panikasugan gid naton nga buligan ang mga nasubuan ukon naluyahan sing buot. Pareho kay Rut nga nag-unong kay Noemi, madamo nga kauturan subong ang nag-unong man sa mga nasubuan ukon naluyahan sing buot sa kongregasyon. Palangga nila ang ila mga kauturan, kag gusto gid nila sila buligan sa bug-os nila nga masarangan. (Hulu. 12:25, footnote; 24:10) Ginpalig-on kita ni apostol Pablo nga himuon ini. Nagsiling sia: “Lugpayi ang mga ginapung-awan, sakdaga ang mga maluya, kag mangin mapinasensiahon sa tanan.”—1 Tes. 5:14.

12. Ano ang pinakamaayo nga paagi para mabuligan ang mga utod nga naluyahan sing buot?

¹² Ang pinakamaayo nga paagi para mabuligan mo ang mga utod nga naluyahan sing buot amo ang pagpamati sa ila kag pagpasalig sa ila nga palangga mo sila. Ginapabaloran ni Jehova ang imo kaayo sa pagbulig sa iya pinalangga nga mga alagad. (Sal. 41:1) Ang Hulubaton 19:17 nagasiling: “Ang isa nga nagakaluoy sa kubos nagapahulam kay Jehova, kag bayaran Niya ang iya ginahimo.”

13. Ano ang kinalain sang ginhimo ni Rut sa ginhimo ni Orpa, kag paano ginpakita ni Rut ang mainunungon nga gugma? (Tan-awa ang piktyur sa kober.)

¹³ Mahangpan pa gid naton sing maayo kon ano ang mainunungon nga gugma kon binagbinagon naton ang natabo kay Noemi pagkatapos mapatay ang iya bana kag duha ka anak nga lalaki. Sang nabalitaan ni Noemi nga “ginpakamaayo liwat ni Jehova ang iya katawhan kay ginhatagan niya sila sing pagkaon,” nagdesisyon sia nga magbalik sa Israel. (Rut 1:6) Sang primero, nag-upod sa iya ang duha niya ka umagad. Pero samtang nagalakat sila, tatlo ka beses sila nga ginsilingan ni Noemi nga magbalik sa Moab. Ano ang natabo? Ang Biblia nagsiling: “Ginhalukan ni Orpa ang iya ugangan kag naglakat. Apang, si Rut nagpabilin sa iya ugangan.” (Rut 1:7-14) Ginpati ni Orpa si Noemi kag nagbalik sia sa Moab. Pero sobra pa sa gusto ni Noemi ang ginhimo ni Rut. Puede  man sia magpauli sa Moab, pero bangod sang iya mainunungon nga gugma, nagdesisyon sia nga updan si Noemi. (Rut 1:16, 17) Gin-unungan ni Rut si Noemi, indi bangod obligado sia, kundi bangod gusto niya nga himuon ini. Ginpakita ni Rut ang matuod nga mainunungon nga gugma. Ano ang matun-an naton sa sini?

14. (a) Sa aton tion subong, ano ang ginahimo sang mahigugmaon nga mga kauturan? (b) Suno sa Hebreo 13:16, ano ang dapat naton himuon para mahamuot sa aton ang Dios?

¹⁴ Kon may mainunungon kita nga gugma, handa kita magsakripisyo para magbulig. Subong, madamo man nga alagad ni Jehova ang nagpakita sing mainunungon nga gugma sa ila mga kauturan bisan pa sa mga indi nila kilala. Halimbawa, kon mabalitaan nila nga may kalamidad nga natabo, nagapamangkot sila dayon kon paano sila makabulig. Kon may problema sa pinansial ang isa ka utod, ginahibalo nila dayon kon ano ang kinahanglan sang utod kag nagabulig sila. Pareho sang mga taga-Macedonia sang unang siglo, handa sila magsakripisyo para magbulig. Naghatag sila sang ‘labaw pa sa ila masarangan’ para mabuligan ang ila mga kauturan nga nagakinahanglan. (2 Cor. 8:3) Nalipay gid si Jehova sa ginapakita nila nga mainunungon nga gugma.—Basaha ang Hebreo 13:16.

15-16. Paano ginpakita ni Rut nga gusto gid niya magbulig?

¹⁵ Madamo kita sang matun-an kon binagbinagon naton ang kasaysayan ni Rut kag ni Noemi. Ari ang pila sa sini.

¹⁶ Padayon nga magbulig. Sang nagsiling si Rut nga updan niya si Noemi pabalik sa Juda, wala nagsugot si Noemi sang primero. Pero gusto gid mag-upod ni Rut. Ano ang resulta? “Sang makita ni Noemi nga maupod gid si Rut sa iya, wala na sia mamilit pa”nga bayaan sia ni Rut.—Rut 1:15-18.

17. Ano ang magapalig-on sa aton para indi kita mag-untat sa pagbulig?

¹⁷ Ang matun-an naton: Dapat kita mangin mapinasensiahon para mabuligan ang mga naluyahan sing buot, kag indi kita dapat mag-untat sa pagbulig sa ila. Sa primero, posible nga indi pagbatunon sang utod ang aton bulig. Pero kon may mainunungon kita nga gugma, indi gid naton sia pagpabay-an. (Gal. 6:2) Nagalaum kita nga sa ulihi batunon niya ang aton bulig para maumpawan sia.

18. Ano ang posible nga nagpasakit sang buot ni Rut?

¹⁸ Tinguhai nga indi maglain ang imo buot. Pag-abot ni Noemi kag ni Rut sa Betlehem, nakita si Noemi sang iya mga kaingod sang una. Ginsilingan niya sila: “Bugana ako sang maglakat ako, apang ginpabalik ako ni Jehova nga wala gid sing dala.” (Rut 1:21) Ano ayhan ang nabatyagan ni Rut sang mabatian niya ang ginsiling ni Noemi? Ginhimo ni Rut ang iya bug-os nga masarangan para buligan si Noemi. Gin-updan sia ni Rut sa paghibi, ginpaumpawan sia, kag gin-updan sia sa paglakat sing pila ka adlaw. Bisan pa sang mga ginhimo ni Rut, si Noemi nagsiling: “Ginpabalik ako ni Jehova nga wala gid sing dala.” Bisan pa ara si Rut sa tupad ni Noemi sadto nga tion, daw ginapahangop ni Noemi nga wala sing nabulig si Rut sa iya. Posible gid nga nasakitan si Rut sa iya nabatian. Pero nag-unong sia gihapon kay Noemi.

19. Ano ang magapalig-on sa aton para indi kita mag-untat sa pagbulig sa aton utod nga naluyahan sing buot?

¹⁹ Ang matun-an naton: Posible nga makahambal man sang masakit ang utod nga naluyahan sing buot nga ginbuligan naton. Pero tinguhaan naton nga indi maglain ang aton buot. Indi kita mag-untat sa pagbulig sa aton utod,  kag pangabayon naton si Jehova nga buligan kita nga makakita sang paagi nga paumpawan ang aton utod.—Hulu. 17:17.

20. Ano ang nagpabakod kay Rut para indi mag-untat sa pagbulig kay Noemi?

²⁰ Palig-una dayon ang mga nasubuan. Nagpakita si Rut sing mainunungon nga gugma kay Noemi, pero sia naman subong ang nagakinahanglan sang bulig. Gani gingamit ni Jehova si Boaz para palig-unon sia. Nagsiling si Boaz kay Rut: “Kabay nga padyaan ni Jehova ang imo ginahimo kag kabay nga makabaton ka sing himpit nga suhol halin kay Jehova nga Dios sang Israel, nga sa idalom sang iya mga pakpak nagdangop ka.” Naumpawan gid si Rut sa makapalig-on nga ginsiling ni Boaz. Dayon, nagsiling si Rut kay Boaz: “Ginlugpayan mo ako kag naghambal ka nga may pag-ulikid sa imo alagad.” (Rut 2:12, 13) Bangod ginpalig-on ni Boaz si Rut sa tion nga kinahanglan niya ini, napabakod si Rut nga indi mag-untat sa pagbulig kay Noemi.

21. Suno sa Isaias 32:1, 2, ano ang dapat himuon sang nagaulikid nga mga gulang?

²¹ Ang matun-an naton: Kon kaisa, kinahanglan man palig-unon ang nagapakita sing mainunungon nga gugma. Gindayaw ni Boaz ang kaayo nga ginpakita ni Rut kay Noemi. Subong, ginadayaw kag ginapasalamatan man sang mga gulang ang kaayo nga ginapakita sang mga kauturan para buligan ang iban. Nagpabakod ini sa mga kauturan nga indi mag-untat sa pagbulig.—Basaha ang Isaias 32:1, 2.

22-23. Paano nagbag-o ang panimuot ni Noemi, kag ngaa? (Salmo 136:23, 26)

²² Sang ulihi, ginhatagan ni Boaz sang madamo nga pagkaon si Rut kag si Noemi. (Rut 2:14-18) Ano ang reaksion ni Noemi sa kaalwan ni Boaz? Nagsiling sia: “Kabay nga pakamaayuhon sia ni Jehova, nga padayon nga nagapakita sang iya mainunungon nga gugma sa mga buhi kag  mga patay.” (Rut 2:20a) Daku gid ini nga pagbag-o sa panimuot ni Noemi. Sang una, nagahilibion si Noemi nga nagsiling nga ‘si Jehova nagpamatok sa iya.’ Pero subong, malipayon sia nga nagsiling nga ‘si Jehova padayon nga nagapakita sang iya mainunungon nga gugma.’ Ngaa nagbag-o ang panimuot ni Noemi?

²³ Narealisar ni Noemi nga wala sia ginpabay-an ni Jehova. Gingamit ni Jehova si Rut para updan sia pabalik sa Juda. (Rut 1:16) Nahangpan man ni Noemi nga gingamit ni Jehova si Boaz para buligan sila nga duha ni Rut. Si Boaz ang isa sa ila ‘paryente nga may kinamatarong sa paggawad’ sa ila. * (Rut 2:19, 20b, footnote) Posible nga nahunahuna ni Noemi: ‘Nahangpan ko na subong nga wala gid ako ginbayaan ni Jehova. Ara gid sia pirme nga nagabulig sa akon.’ (Basaha ang Salmo 136:23, 26.) Sigurado gid nga daku ang pagpasalamat ni Noemi kay Rut kag kay Boaz kay wala sila nag-untat sa pagbulig sa iya. Sigurado nga nalipay gid sila nga tatlo kay naumpawan kag napabakod si Noemi.

24. Ngaa padayon kita nga nagapakita sing mainunungon nga gugma sa aton mga kauturan?

²⁴ Ano ang natun-an naton sa libro sang Rut parte sa mainunungon nga gugma? Kon may mainunungon kita nga gugma, indi kita mag-untat sa pagbulig sa aton mga kauturan nga nasubuan ukon naluyahan sing buot. Nagapalig-on man ini sa aton nga magsakripisyo para mabuligan sila. Dapat palig-unon dayon sang mga gulang ang mga nagapakita sing mainunungon nga gugma sa iban. Nalipay gid kita kon magbakod liwat sa pag-alagad kay Jehova ang aton ginbuligan. (Binu. 20:35) Pero ano ang pinakaimportante nga rason kon ngaa padayon kita nga nagapakita sing mainunungon nga gugma? Bangod gusto naton ilugon si Jehova, nga “bugana sa mainunungon nga gugma,” kag gusto naton nga malipay sia.—Ex. 34:6; Sal. 33:22.