1-2. (a) Ano nga mga pamangkot ang binagbinagon naton? (b) Ngaa masiling naton nga gusto gid ni Jehova nga buligan kita?

 MABULIGAN kita ni Jehova nga mabatas ang aton mga problema kag mangin malipayon sa pag-alagad sa iya. Paano niya kita ginabuligan? Kag ano ang himuon naton para mabaton naton ang bulig ni Jehova? Sabton ini nga mga pamangkot sa sini nga artikulo. Pero, binagbinagon anay naton ini nga pamangkot: Gusto gid bala ni Jehova nga buligan kita?

² Para masabat ini nga pamangkot, makabulig sa aton kon usisaon naton ang tinaga nga gingamit ni apostol Pablo sa iya sulat para sa mga Hebreo. Nagsiling si Pablo: “Si Jehova ang akon manugbulig; indi ako magkahadlok. Ano ang mahimo sang tawo sa akon?” (Heb. 13:6) Suno sa mga reperensia sa Biblia, ang tinaga nga “manugbulig” nga gingamit sa sini nga bersikulo nagapatuhoy sa isa ka tawo nga nagadalidali para buligan ang isa nga nagapangayo sing bulig. Imadyina si Jehova nga nagadalidali para buligan ang isa nga nagaantos. Ginapakita sini nga paglaragway nga gusto gid ni Jehova nga buligan kita. Bangod ginabuligan kita ni Jehova, mabatas naton sing malipayon ang aton mga problema.

3. Ano ang tatlo ka paagi nga ginabuligan kita ni Jehova nga mabatas sing malipayon ang aton mga problema?

³ Ano ang pila ka paagi nga ginabuligan kita ni Jehova nga mabatas sing malipayon ang aton mga problema? Para masabat ini, basahon naton ang pila ka bahin sang libro sang Isaias. Ngaa? Kay madamo nga tagna nga ginsugid ni Jehova kay Isaias ang naaplikar sa mga alagad sang Dios subong. Isa pa, mahapos lang naton mahangpan ang mga tinaga nga gingamit ni Isaias para ilaragway si Jehova. Ang pila ka halimbawa sini mabasa naton sa Isaias kapitulo 30. Mabasa naton sa sina nga kapitulo ang matahom nga mga ilustrasyon nga gingamit ni Isaias para ilaragway ang pagbulig  ni Jehova. Nagsiling sia nga ginabuligan kita ni Jehova (1) paagi sa pagpamati sing maayo kag pagsabat sa aton mga pangamuyo, (2) paagi sa paggiya sa aton, kag (3) paagi sa pagpakamaayo sa aton subong kag sa palaabuton. Binagbinagon naton ining tatlo ka paagi.

4. (a) Ano ang ginsiling ni Jehova parte sa mga Judiyo sang panahon ni Isaias, kag ano ang wala Niya ginpunggan nga matabo sa ila? (b) Ano nga paglaum ang ginpromisa ni Jehova para sa mga matutom? (Isaias 30:18, 19)

⁴ Sa umpisa sang Isaias kapitulo 30, ginsilingan ni Jehova ang mga Judiyo nga “batinggilan nga mga anak,” nga ‘ginadugangan pa gid ang ila mga sala.’ Nagsiling pa sia: “Rebelyuso sila nga katawhan, . . . nga indi magpamati sang kasuguan ni Jehova.” (Isa. 30:1, 9) Wala ginpamatian sang katawhan si Jehova, gani gintagna ni Isaias nga magaantos gid sila kag indi ini pagpunggan ni Jehova. (Isa. 30:5, 17; Jer. 25:8-11) Natuman ini sang ginbihag sila sa Babilonia. Pero, may mensahe si Isaias para sa pila ka matutom nga mga Judiyo nga naghatag sa ila sing paglaum. Ginsilingan niya sila nga nagpromisa si Jehova nga magabalik sila sa Jerusalem. (Basaha ang Isaias 30:18, 19.) Natuman gid ini. Ginhilway sila ni Jehova sa Babilonia. Pero, tinuig pa ang nagligad antes ini natabo. Ang ekspresyon nga “si Jehova nagahulat sing mapailubon agod pakitaan kamo sing kahamuot” nagapahangop nga magaligad pa ang malawig nga tion antes hilwayon ni Jehova ang mga matutom. Ang matuod, 70 ka tuig nga nabihag ang mga Israelinhon sa Babilonia antes nakabalik ang pila sa ila sa Jerusalem. (Isa. 10:21; Jer. 29:10) Naghibi ang mga Israelinhon bangod grabe gid ang ila kasubo sang ginbihag sila sa Babilonia. Pero sang nakabalik na sila sa Jerusalem, naghibi sila bangod grabe gid ang ila kalipay.

5. Ano ang ginapasalig sa aton sang Isaias 30:19?

⁵ Mapalig-on kita sa ginsiling ni Isaias: “Kahamut-an ka niya kon mabatian niya ang imo pagpangayo sing bulig.” (Isa. 30:19) Ginapasalig kita ni Isaias nga ginapamatian sing maayo ni Jehova ang aton pagpangayo sing bulig sa Iya kag sabton Niya dayon ang aton mga pangamuyo. Nagsiling pa si Isaias: “Sabton ka niya gilayon kon mabatian niya ini.” Ginapasalig kita sini nga gusto gid sang aton Amay nga buligan ang nagapangayo sing bulig sa iya. Makabulig ini sa aton nga magbatas sing malipayon.

6. Paano ginapakita sang ginsiling ni Isaias nga ginapamatian ni Jehova ang pangamuyo sang kada isa sang Iya mga alagad?

⁶ Ano pa ang matun-an naton sa sini nga bersikulo parte sa aton mga pangamuyo? Ginapamatian sing maayo ni Jehova ang pangamuyo sang kada isa sa aton. Ngaa masiling naton ini? Sa una nga bahin sang Isaias kapitulo 30, naggamit si Isaias sing tinaga nga “kamo” bangod ang ginahambalan ni Jehova amo ang Iya katawhan. Pero sa bersikulo 19 naggamit sia sing tinaga nga “ka” bangod para sa kada isa ang Iya mensahe. Nagsiling si Isaias: “Indi ka na maghibi”; “kahamut-an ka niya”; “sabton ka niya.” Mahigugmaon gid nga Amay si Jehova. Kon nagaluya ang buot sang iya anak, wala niya sia ginasilingan, “Dapat pareho ka kabakod sa imo utod.” Sa baylo, nagaulikid sia sa kada isa sa aton kag ginapamatian niya ang aton mga pangamuyo.—Sal. 116:1; Isa. 57:15.

7. Paano ginpakita ni Isaias kag ni Jesus nga importante ang padayon nga pagpangamuyo?

⁷ Kon mangamuyo kita sa aton Dios kag isugid naton sa iya ang aton problema, posible nga ang una nga himuon ni Jehova amo ang paghatag sa aton sing kusog para makabatas kita. Kag kon wala dayon nasolbar ang aton problema, posible nga kinahanglan naton mangabay kay Jehova sing madamo nga beses nga hatagan kita sing kusog nga mabatas ini. Gusto niya nga amo ini ang himuon naton. Amo ini ang ginpalig-on sa aton ni Isaias sang nagsiling sia: “Magpanawag kamo [kay Jehova].” (Isa. 62:7) Ginapakita sini nga  dapat padayon kita nga magpangamuyo kay Jehova. Ang ginsiling ni Isaias nagapahanumdom sa aton sang ilustrasyon ni Jesus parte sa pangamuyo nga mabasa sa Lucas 11:8-10, 13. Ginpalig-on kita ni Jesus nga ‘padayon nga magpamilit’ kon nagapangamuyo kita kag ‘padayon nga magpangayo’ sang balaan nga espiritu. Puede man kita magpangabay kay Jehova nga buligan niya kita nga makahimo sang maayo nga mga desisyon.

8. Paano natuman sadto ang Isaias 30:20, 21?

⁸ Basaha ang Isaias 30:20, 21. Sang ginkibon sang mga soldado sang Babilonia ang Jerusalem sa sulod sang isa ka tuig kag tunga, nag-antos gid ang katawhan. Puro pag-antos ang ila nabatyagan nga daw amo ini ang ila ginakaon kag ginainom. Pero sa bersikulo 20 kag 21, nagpromisa si Jehova sa mga Judiyo nga buligan niya sila kon maghinulsol sila kag magbag-o. Ginatawag ni Isaias si Jehova nga “Daku nga Instruktor” kag nagpromisa sia nga tudluan ni Jehova ang katawhan kon paano nila Sia masimba sa husto nga paagi. Natuman ini sang ginhilway ang ginbihag nga mga Judiyo. Ginpakita ni Jehova nga sia ang ila Daku nga Instruktor, kag gingiyahan niya sila para mapasag-uli sang iya katawhan ang putli nga pagsimba. Nagapasalamat gid kita kay Jehova bangod sia ang aton Daku nga Instruktor.

9. Ano ang isa ka paagi nga ginatudluan kita ni Jehova subong?

⁹ Sa sini nga mga bersikulo, nagsiling si Isaias nga daw pareho kita sa mga estudyante nga ginatudluan ni Jehova, kag may duha ka paagi si Jehova sa pagtudlo sa aton. Una, nagsiling si Isaias: “Makita ninyo ang inyo Daku nga Instruktor.” Maimadyin naton sa sini nga ilustrasyon nga ang Instruktor nagatindog sa atubangan sang iya mga estudyante. Isa gid ka pribilehiyo nga ginatudluan kita sang Dios. Paano kita ginatudluan ni Jehova subong? Ginahimo niya ini paagi sa iya organisasyon. Maathag gid ang mga instruksion nga aton nabaton halin sa organisasyon ni Jehova kag ginapasalamatan gid naton ini. Ini nga mga instruksion mabaton naton paagi sa aton mga miting sa kongregasyon, sa mga asembleya kag kombension, sa aton mga publikasyon, sa mga programa sa JW Broadcasting^®, kag madamo pa. Ini tanan nagabulig sa aton nga mabatas sing malipayon ang aton mga problema.

10. Paano kita makabati “sang isa ka tingog sa likod [naton]”?

¹⁰ Ginsugid ni Isaias ang ikaduha nga paagi kon paano kita ginatudluan ni Jehova. Nagsiling sia: “Makabati ka sang isa ka tingog sa likod mo.” Suno sa manalagna, si Jehova daw pareho sa isa ka instruktor nga nagasunod sa likod sang iya mga estudyante kag ginatudlo niya sa ila kon  diin sila maagi. Subong, mabatian man naton nga nagahambal ang Dios sa likod naton. Paano? Madugay na nga ginsulat ang mga ginhambal sang Dios sa Biblia. Gani kon ginabasa naton ang Biblia, daw pareho lang nga ginapamatian naton ang Dios nga nagahambal sa likod naton.—Isa. 51:4.

11. Para makabatas kita sing malipayon, ano ang dapat naton himuon, kag ngaa?

¹¹ Ano ang himuon naton para makabenepisyo kita sa paggiya ni Jehova sa aton paagi sa iya organisasyon kag sa iya Pulong? Talupangda nga may duha ka ginsiling si Isaias. Una, “amo ini ang dalan.” Kag ikaduha, “lakat kamo sa sini.” (Isa. 30:21) Indi bastante nga bal-an lang naton “ang dalan.” Dapat man kita ‘maglakat sa sini.’ Natun-an naton sa Pulong ni Jehova kag sa pagpaathag sang iya organisasyon ang gusto ni Jehova nga himuon naton. Gintudluan man kita kon paano naton maaplikar ang mga natun-an naton. Gani, dapat naton tun-an ang gusto ni Jehova nga himuon naton kag iaplikar ini. Kon himuon naton ini, makabatas kita kag mangin malipayon kita sa pag-alagad sa iya, kag makasalig kita nga pakamaayuhon kita ni Jehova.

12. Suno sa Isaias 30:23-26, paano ginapakamaayo ni Jehova ang iya katawhan?

¹² Basaha ang Isaias 30:23-26. Paano natuman ini nga tagna sang nakabalik na sa Israel ang ginbihag nga mga Judiyo sa Babilonia? Ginpakamaayo gid sila ni Jehova kay ginhatagan niya sila sang madamo nga butang kag ginbuligan niya sila nga padayon nga mag-alagad sa iya. Ginhatagan sila ni Jehova sang bugana nga pagkaon. Pero ang mas importante, ginhatagan sila ni Jehova sang tanan nga kinahanglanon nila para mangin suod sila sa iya kag para masimba nila sia liwat sa husto nga paagi. Subong pa lang nakabaton ang katawhan sang Dios sing amo sini kadamo nga pagpakamaayo halin sa Dios. Suno sa bersikulo 26, nagsanag pa gid ang kapawa nga ginhatag ni Jehova sa ila. Buot silingon, ginbuligan niya sila nga mahangpan ang iya Pulong. (Isa. 60:2) Nakabulig gid sa mga alagad ni Jehova ang mga pagpakamaayo nga ila nabaton para padayon sila nga mag-alagad sa iya sing malipayon. Nangin mabakod man sila “bangod sang maayo nga kahimtangan sang tagipusuon.”—Isa. 65:14.

13. Paano nagakatuman subong ang tagna parte sa pagpasag-uli sang putli nga pagsimba?

¹³ Ang tagna bala parte sa pagpasag-uli sang putli nga pagsimba nagakatuman man subong? Huo. Paano? Sugod sang 1919 C.E., minilyon na ka tawo ang nahilway sa pagkabihag sa Babilonia nga Daku ukon ang bug-os kalibutan nga emperyo sang butig nga relihion. Gindala sila sa lugar nga mas maayo pa sa Ginsaad nga Duta sang  mga Israelinhon. Gindala sila sa espirituwal nga paraiso. (Isa. 51:3; 66:8) Ano ang espirituwal nga paraiso?

14. Ano ang espirituwal nga paraiso, kag sin-o ang nagaistar diri subong? (Tan-awa ang Dugang nga Paathag.)

¹⁴ Sugod sang 1919 C.E., nag-istar sa espirituwal nga paraiso ang mga hinaplas. b Pagligad sang tion, ang mga may paglaum nga mabuhi sa duta nga ginatawag “iban nga mga karnero” nag-istar man sa sining espirituwal nga duta kag ginapakamaayo sila ni Jehova.—Juan 10:16; Isa. 25:6; 65:13.

15. Diin makita ang espirituwal nga paraiso?

¹⁵ Diin makita subong ang espirituwal nga duta ukon paraiso? Ang mga sumilimba ni Jehova nagaistar sa bilog nga kalibutan. Gani, ang espirituwal nga paraiso nga ila ginaistaran nahamtang sa bilog nga kalibutan. Subong, kon mapisan naton nga ginasuportahan ang matuod nga pagsimba, makaistar kita sa espirituwal nga paraiso bisan diin man kita nagaistar sa duta.

16. Ano ang himuon naton para padayon naton nga makita ang katahom sang espirituwal nga paraiso?

¹⁶ Para padayon kita nga makaistar sa espirituwal nga paraiso, dapat padayon naton nga ipakita nga nagapasalamat kita kay bahin kita sang bug-os kalibutan nga Cristianong kongregasyon. Paano naton ina mahimo? Paagi sa pag-apresyar sa matahom nga mga kinaiya sang aton mga kauturan kag indi pagpokus sa ila mga kaluyahon. (Juan 17:20, 21) Ngaa importante nga himuon naton ini? Hunahunaa ini nga ilustrasyon. Sa isa ka matahom nga parke, madamo gid kita sing makita nga sarisari nga mga kahoy. Amo man sini sa aton mga kongregasyon subong. Mapaanggid naton sa mga kahoy ang aton sarisari nga mga kauturan. (Isa. 44:4; 61:3) Kon may makita kita nga indi maayo sa isa ka kahoy, indi kita dapat magpokus sa sini. Sa baylo, dapat naton apresyahon ang katahom sang “parke.” Katahom gid sang paghiusa sang aton bug-os kalibutan nga Cristianong kongregasyon, pero posible nga indi naton ini makita kon magpokus kita sa aton mga kaluyahon ukon sa kaluyahon sang aton mga kauturan.

17. Ano ang himuon sang kada isa sa aton para padayon nga maghiusa ang kongregasyon?

 ¹⁷ Ano ang himuon sang kada isa sa aton para padayon nga maghiusa ang kongregasyon? Dapat naton pabaloran ang paghidait. (Mat. 5:9; Roma 12:18) Dapat naton tinguhaan nga mangin maayo ang aton kaangtanan sa iban sa kongregasyon para mangin matahom pa gid ang espirituwal nga paraiso. Dapat naton dumdumon nga ginbuyok ni Jehova sa putli nga pagsimba ang kada isa nga nagaistar sa espirituwal nga paraiso. (Juan 6:44) Hamili gid kay Jehova ang iya mga alagad. Gani nalipay gid sia kon makita niya nga ginatinguhaan naton nga indi madula ang paghidait kag indi maguba ang paghiusa sa aton mga kauturan.—Isa. 26:3; Hag. 2:7.

18. Ano ang dapat naton pirme pamalandungan, kag ngaa?

¹⁸ Madamo nga pagpakamaayo ang ginahatag ni Jehova sa iya mga alagad. Ano ang himuon naton para mabaton naton ini? Dapat naton pamalandungan ang aton natun-an sa Pulong sang Dios kag sa aton mga publikasyon nga nabase sa Biblia. Kon magtuon kita kag pamalandungan ang aton natun-an, makabulig ini sa aton nga mapakita ang mga kinaiya nga dapat ipakita sang isa ka Cristiano. Ini nga mga kinaiya magapalig-on sa aton nga magpakita sing “utudnon nga gugma” sa aton mga kauturan kag “magpinalanggaanay.” (Roma 12:10) Kon pamalandungan naton ang mga pagpakamaayo nga nabaton naton subong, mas magasuod pa gid kita kay Jehova. Kag kon pamalandungan naton ang mga pagpakamaayo nga ginpromisa ni Jehova nga ihatag niya sa aton sa palaabuton, mas magalig-on pa gid ang aton paglaum nga maalagad naton sia asta sa wala sing katapusan. Ini tanan nagabulig sa aton nga mangin malipayon sa pag-alagad kay Jehova.

19. (a) Suno sa Isaias 30:18, ano ang masigurado naton? (b) Ano ang makabulig sa aton nga magbatas sing malipayon?

¹⁹ Kon laglagon na ni Jehova ining malain nga kalibutan, “magatindog” sia para sa aton. (Isa. 30:18) Kabalo kita nga si Jehova “Dios sang hustisya.” Gani, sigurado nga laglagon gid niya ang kalibutan ni Satanas sa Iya ginpat-od nga tion. (Isa. 25:9) Dapat naton hulaton sing mapinasensiahon ang adlaw nga luwason kita ni Jehova. Samtang wala pa ina mag-abot, dapat padayon naton nga pabaloran ang aton pribilehiyo nga makapangamuyo, tun-an ang Pulong sang Dios kag iaplikar ang aton natun-an, kag pamalandungan ang aton mga pagpakamaayo. Kon himuon naton ini, buligan kita ni Jehova nga magbatas kag mangin malipayon sa pag-alagad sa iya.