Antes ko isugid ang masunod nga natabo, isugid ko anay sa inyo kon paano ako nagsugod sa akon bug-os tion nga pag-alagad.

Natawo ako sang 1942 sa Curaçao nga isa ka matahom nga isla sa Caribbean. Taga-Suriname si Tatay, pero nagsaylo sia sa isla para mag-obra. Mga pila ka tuig antes ako natawo, nabawtismuhan si Tatay bilang isa sa mga Saksi ni Jehova kag isa sia sa pinakauna nga Saksi sa Curaçao. a Kada semana, gina-Bible study niya kami nga mag-ulutod bisan pa kon kaisa indi namon gusto mag-study. Sang 14 anyos ako, nagsaylo kami sa Suriname para maatipan ni Tatay si Lola nga tigulang na.

Sa Suriname, nangin abyan ko ang mga pamatan-on sa kongregasyon nga mapisan nga nagaalagad kay Jehova. Mas magulang sila sa akon sing pila ka tuig, kag mga regular payunir sila. Kasadya gid sa ila kon ginaistoryahan nila ang ila mga eksperiensia sa pagbantala. Pagkatapos sang miting, ginaistoryahan man namon ang parte sa Biblia, kag kon kaisa, ginahimo namon ini samtang nagatangla sa kalangitan. Nakabulig sila sa akon nga mahangpan kon ano gid ang gusto ko sa akon kabuhi. Gusto ko mag-alagad kay Jehova. Gani nabawtismuhan ako sang 16 anyos ako. Kag sang 18 anyos ako, nagregular payunir ako.

Madamo gid ako sing natun-an sang payunir ako, kag nakabulig ini sa akon pag-alagad sing bug-os tion. Halimbawa, ang isa sa una ko nga natun-an amo nga dapat ko hanason ang iban. Sang nagpayunir ako, ginbuligan ako sang isa ka misyonero nga si Willem van Seijl. b Madamo sia sing gintudlo sa akon kon paano ko himuon ang akon mga responsibilidad sa kongregasyon. Wala ko gid mahunahuna sadto nga daku gid ang mabulig  sini nga paghanas sa akon sa ulihi. Pagkasunod nga tuig, gintangdo ako bilang espesyal payunir. Nalakip sa akon asaynment ang pagbulig sa gagmay nga mga grupo sang mga kauturan nga nagaistar sa malayo gid nga lugar sa kagulangan sang Suriname. Nagapasalamat gid ako kay ginhanas ako sang mga utod. Sugod sadto, ginatinguhaan ko gid nga sundon ang ila halimbawa sa paghanas sa iban.

Maayo gid ang resulta kon simple ang imo kabuhi kag organisado. Amo ina ang ikaduha nga leksion nga akon natun-an. Pagsugod sang kada bulan, ginaplano na namon sang akon upod nga espesyal payunir kon ano ang amon kaunon kag kon ano ang kinahanglanon namon para sa masunod nga mga semana. Dayon, nagapabanwa ang isa sa amon para baklon ini. Malayo gid ini nga paglakbay. Ginabanta namon ang amon gasto kag pagkaon para makaigo sa isa ka bulan ang amon allowance. Importante gid ini kay kon mawad-an kami sang amon kinahanglanon sa kagulangan, pila lang gid ang makabulig sa amon. Bangod bata pa lang ako natun-an ko na nga magkabuhi sing simple kag organisado, nakabulig ini sa akon nga unahon pirme ang pag-alagad kay Jehova.

Maayo gid ang resulta kon kabalo kita sang lenguahe sang mga tawo nga ginatudluan naton. Amo ina ang ikatlo nga leksion nga akon natun-an. Kabalo ako maghambal sing Dutch, English, kag Papiamento. Kabalo man ako maghambal sing Sranantongo (ginatawag man nga Sranan) kay amo ini ang lenguahe sang kalabanan nga tawo sa Suriname. Pero sa kagulangan, natalupangdan ko nga nagapamati ang mga tawo sa maayong balita kon ginaistorya namon sila sa ila lenguahe. Nabudlayan ako maghambal sang pila nila ka lenguahe. Ang isa sini amo ang Saramaccan nga nagadepende sa tono ang kahulugan sang mga tinaga. Pero nalipay gid ako kay gintun-an ko ini. Sa sulod sang mga tinuig, madamo ako sing natudluan nga mga tawo parte sa kamatuoran bangod kabalo ako sang ila lenguahe.

Siempre may makahuluya man ako nga mga eksperiensia. Halimbawa, may isa ka babayi nga naga-Bible study kag Saramaccan ang iya lenguahe. Bangod nagasakit ang iya tiyan, ginpamangkot ko sia kon kamusta na ang iya pamatyag. Pero ang napamangkot ko gali sa iya kon bala nagabusong sia. Siempre nahuya gid sia sa akon ginpamangkot. Pero bisan pa sini, wala ini nagpugong sa akon nga istoryahon ang mga tawo sa ila lenguahe.

Sang 1970, gintangdo ako bilang manugtatap sang sirkito. Sina nga tuig ginapatan-aw ko sa mga kauturan sa kagulangan ang isa ka slide. Mga piktyur ini nga puede matan-aw paagi sa isa ka gamit. May tig-ulo ini nga “Visiting the World Headquarters of Jehovah’s Witnesses.” Para makadtuan ang mga kauturan, nagalakbay kami sa mga suba sang kagulangan. Nagasakay kami sa malaba nga baruto nga wala sing katig kag human sa kahoy. May karga kami nga isa ka generator, isa ka tangke sang gasolina, mga lampara, kag mga gamit para sa slide. Kon makadungka na kami, nagalakat kami sa tunga sang kagulangan dala ini nga mga gamit pakadto sa lugar nga ipatan-aw namon ang slide. Bisan pa malayo, nalipay gid ako kay nanamian gid ang mga tawo sa pagtan-aw sini. Nalipay gid ako sa pagtudlo sa iban parte kay Jehova  kag sa dutan-on nga bahin sang iya organisasyon. Mabudlay kag makapoy ang paghimo sini nga hilikuton, pero nalipay gid ako kon makita ko ang iban nga nagasuod kay Jehova.

Bangod wala ako sing asawa, nangin mahapos para sa akon nga himuon ang akon mga asaynment, pero gusto ko gihapon mangasawa. Gani ginpangamuyo ko nga makakita ako sing asawa nga gusto mag-alagad sing bug-os tion upod sa akon sa mabudlay nga teritoryo sa kagulangan. Mga isa ka tuig sang ulihi, ginpangaluyagan ko si Ethel nga isa ka espesyal payunir nga handa gid mag-alagad kay Jehova bisan pa mabudlay ang iya asaynment. Sang pamatan-on pa lang si Ethel, nanamian gid sia kay apostol Pablo kay mapisan ini sa ministeryo. Gusto gid niya sia ilugon kag himuon ang iya bug-os nga masarangan sa pagbantala. Nagpakasal kami sang Septiembre 1971 kag nag-alagad kami sa sirkito.

Pigado ang pamilya ni Ethel, gani wala gid sia nabudlayan sa amon asaynment sa kagulangan. Halimbawa, kon magbisita kami sa mga kongregasyon sa kagulangan, diutay lang ang amon dala. Sa suba kami nagapanglaba kag nagapaligo. Kag wala kami pili sa pagkaon bisan ano man ang ihanda sang mga kauturan. Kon kaisa ginahandaan nila kami sing iguana, piranha, ukon bisan ano nga maayam nila sa kagulangan ukon makuha sa suba. Kon wala sing pinggan, sa dahon sang saging kami nagakaon. Kon wala sing kutsara kag tinidor, nagakinamot kami magkaon. Para sa amon ni Ethel, ang amon pag-alagad sing magkaupod kay Jehova nakabulig gid sa amon nga magsuod pa gid kami kay Jehova. (Man. 4:12) Indi gid namon ini pag-ibaylo sa bisan ano nga butang.

Isa ka adlaw, pagpauli namon halin sa pagbisita sa mga kauturan sa kagulangan, natabo ang ginsugid ko kaina. Sang nag-agi ang baruto sa mabaskog nga sulog sang suba, gulpi lang nagsalom ang unahan sang amon baruto pero naglutaw man dayon. Maayo lang kay may mga life jacket kami kag wala kami nahulog sa baruto. Pero, napuno  sang tubig ang amon baruto. Gani, gin-ula namon ang pagkaon sa amon mga balunan kag gingamit ini para sag-ahon ang tubig sa sulod sang baruto.

Wala gid kami sing nabilin nga pagkaon, gani samtang padayon kami nga nagausoy sa suba, nagapangisda kami. Pero wala kami sing makuha. Gani nangamuyo kami kay Jehova kag nagpangabay nga hatagan niya kami sing pagkaon para sa sadto nga adlaw. Pagkatapos gid namon pangamuyo, nakabunit ang isa ka utod sang daku nga isda nga bastante na para sa amon nga lima nga mabusog sadto nga gab-i.

Pagligad sang lima ka tuig nga pag-alagad bilang manugtatap sang sirkito, wala gid namon ginpaabot ni Ethel nga mangin ginikanan na kami. Isa gid ini ka pagpakamaayo para sa amon. Nalipay gid ako sang nabal-an ko nga nagabusong si Ethel, pero ginapamensar ko kon ano na ang matabo sa amon. Gusto gid namon ni Ethel nga mag-alagad gihapon sing bug-os tion. Sang 1976, natawo ang amon bata nga lalaki nga si Ethniël. Kag pagligad sang duha ka tuig kag tunga, natawo naman ang ikaduha namon nga bata nga lalaki nga si Giovanni.

Daku gid sadto ang kinahanglanon sa Suriname, gani nagdesisyon ang branch office nga magpadayon ako sa pag-alagad bilang manugtatap sang sirkito samtang ginapadaku namon ang amon duha ka bata. Sang gagmay pa ang amon mga bata, gin-asayn ako sa mga sirkito nga diutay lang ang kongregasyon. Sa masami, sa isa ka bulan, nagaalagad ako sing pila ka semana bilang manugtatap sang sirkito kag dayon nagaalagad ako bilang payunir sa amon kongregasyon sa nabilin nga mga semana. Kon malapit lang ang kongregasyon nga akon bisitahan, ginaupod ko si Ethel kag ang amon mga bata. Pero, kon magbisita ako sa mga kongregasyon kag maghiwat sing mga asembleya sa kagulangan, ginabilin ko sila.

Ginaplano ko sing maayo ang akon mga hilikuton para mahimo ko ang tanan ko nga responsibilidad. Ginasigurado ko nga maka-family study gid kami kada semana. Kon magbisita ako sa mga kongregasyon sa kagulangan, si Ethel ang nagadumala sang family study upod sa amon mga bata. Pero, pirme gid kami nagaupdanay nga pamilya. Pirme kami nagalingawlingaw ni Ethel upod sa amon mga bata. Nagahampang kami ukon nagalagaw sa matahom nga mga lugar malapit sa amon. Sa masami, gab-i na ako nagatulog kay nagahanda pa ako para sa akon mga asaynment. Maayo gid nga asawa si Ethel pareho sa asawa nga ginsambit sa Hulubaton 31:15. Aga pa sia nagabugtaw kay ginasigurado gid niya  nga mabinagbinag namon ang teksto kada adlaw kag makapamahaw kami nga pamilya sing magkaupod antes mag-eskwela ang mga bata. Nagapasalamat gid ako kay may mapisan ako nga asawa. Pirme gid niya ako ginabuligan nga matuman ko ang tanan ko nga responsibilidad nga ginhatag sa akon ni Jehova.

Ginpanikasugan gid namon ni Ethel nga buligan ang amon mga bata nga palanggaon si Jehova kag ang pagbantala. Gusto namon nga mag-alagad man sila sing bug-os tion. Pero gusto namon nga himuon nila ini bangod amo ini ang gusto nila, indi bangod ginpilit namon sila. Pirme namon ginaistorya sa ila ang kalipay sa pag-alagad sing bug-os tion. Siempre, ginasugiran man namon sila sang mga kabudlayan. Pero ginapadaku gid namon sa ila kon paano ginbuligan kag ginpakamaayo ni Jehova ang amon pamilya. Ginbuligan man namon sila nga makig-abyan sa mga utod nga ginauna ang pag-alagad kay Jehova.

Gin-amanan gid ni Jehova ang amon pamilya sang tanan namon nga kinahanglanon. Ginatinguhaan ko gid nga masuportahan ang kinahanglanon sang akon pamilya. Sang soltero pa ako kag espesyal payunir sa kagulangan, natun-an ko nga magpain sang kuarta para may gamiton ako kon may kinahanglan ako baklon sa ulihi. Bisan pa ginahimo namon ang amon masarangan, may mga tion nga kulang gid ang amon kinahanglanon. Pero pirme gid kami ginabuligan ni Jehova. Halimbawa, halin sang 1986 asta sang 1992, magamo gid ang sitwasyon sa Suriname. Mabudlay gid sadto makatigayon bisan sang panguna nga mga kinahanglanon. Pero, gin-amanan gid kami ni Jehova.—Mat. 6:32.

Sa bug-os namon nga kabuhi, wala gid kami ginpabay-an ni Jehova kag ginbuligan gid niya kami nga mangin malipayon kag kontento. Pagpakamaayo gid sa amon ang amon mga bata, kag nalipay gid kami kay napadaku namon sila nga mag-alagad kay Jehova. Grabe gid ang amon kalipay kay nagdesisyon man sila nga mag-alagad sing bug-os tion. Nag-eskwela si Ethniël kag si Giovanni sa ginatawag subong nga School for Kingdom Evangelizers kag nagaalagad sila subong sa branch office sa Suriname upod sa ila mga asawa.

Tigulang na kami ni Ethel, pero masako kami gihapon sa amon asaynment bilang mga espesyal payunir. Ang matuod, bangod sa kasakuon namon, wala gihapon ako sang tion para magtuon maglangoy. Pero, wala ko gid ginhinulsulan ang akon mga desisyon. Para sa akon, ang desisyon ko nga mag-alagad sing bug-os tion sang pamatan-on pa ako amo ang isa sa pinakamaayo nga desisyon nga ginhimo ko.